4. போ⁴ஜனவக்³கோ³

1. ஆவஸத²பிண்ட³ஸிக்கா²பத³வண்ணனா

203-4. பூக³ஸ்ஸாதி பூகே³ன. குக்குச்சாயந்தோதி நிஸ்ஸரணேனேத்த² ப⁴விதப்³ப³ம், தம் மயம் ந ஜானாமாதி ஸன்னிட்டா²னஸ்ஸ கரணவஸேன ‘‘குக்குச்சாயந்தோ’’தி வுச்சதி. யதா² ஹி ஆயஸ்மா உபாலி நயக்³கா³ஹேன ‘‘அனாபத்தி ஆவுஸோ ஸுபினந்தேனா’’தி (பாரா. 78) ஆஹ, ததா² தே²ரோபி ‘‘அனாபத்தி கி³லானஸ்ஸா’’தி கஸ்மா ந பரிச்சி²ந்த³தீதி? அனத்தாதி⁴காரத்தா வினயபஞ்ஞத்தியா, ‘‘நாயம் அத்தனோ ஓகாஸோ’’தி படிக்கி²த்தத்தா, ஸிக்கா²பத³ஸ்ஸ அபரிபுண்ணத்தா. பட²மபாராஜிகஸிக்கா²பதே³ பரிபுண்ணம் கத்வா பஞ்ஞத்தேயேவ ஹி ஸோ தே²ரோ ‘‘அனாபத்தி ஸுபினந்தேனா’’தி ஆஹ ‘‘அஞ்ஞத்ர ஸுபினந்தா’’தி வுத்தபதா³னுஸாரேனாதி. யஸ்மா ஓதி³ஸ்ஸ அயாவத³த்தே²வ தா³யகானம் பீளா நத்தி², தஸ்மா ‘‘அனோதி³ஸ்ஸ யாவத³த்தோ²’’தி வுத்தம்.

208. ‘‘அந்தராமக்³கே³ ஏகதி³வஸ’ந்தி ஏகம்யேவ ஸந்தா⁴ய வுத்த’’ந்தி ச ‘‘ஏஸேவ நயோதி வுத்தனயமேவ த³ஸ்ஸேதும் க³ந்த்வா பச்சாக³ச்ச²ந்தோ ஹீதிஆதி³மாஹா’’தி ச ‘‘ஸுத்³த⁴சித்தோ ஹுத்வா பகதிக³மனேவ பு⁴ஞ்ஜிதும் லப⁴தீ’’தி ச ‘‘அகி³லானஸ்ஸ கி³லானஸஞ்ஞினோ காயேன ஸமுட்டா²தீ’’தி ச லிகி²தம்.

ஆவஸத²பிண்ட³ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

209-218. கு³ள்ஹபடிச்ச²ன்னோதி அபாகடோவ. ஏகோ புத்தேனாதி ஏகஸ்ஸேகம் ப⁴த்தம் ‘‘அஹம் அஞ்ஞேன நிமந்திதோ’’தி ந வுச்சதி. ‘‘ஸசே ஏகதோ க³ண்ஹந்தி , க³ணபோ⁴ஜனம் ஹோதீ’’தி (பாசி. அட்ட². 217-218) வுத்தத்தா சத்தாரோ உபாஸகா சத்தாரோ பி⁴க்கூ² விஸும் விஸும் நிமந்தேத்வா ஹத்த²பாஸே டி²தானம் சே தே³ந்தி, க³ணபோ⁴ஜனம் ஹோதி ஏவாதி ஏகே, தம் ந யுத்தம் விய. ‘‘விஞ்ஞத்திதோ பஸவனே க³ணஸ்ஸ ஏகதோ க³ஹணே இமினா ஸிக்கா²பதே³ன ஆபத்தி, விஸும் க³ஹணே பணீதபோ⁴ஜனஸூபோத³னவிஞ்ஞத்தீஹீ’’தி லிகி²தம். ‘‘விஞ்ஞத்திதோ பஸவனம் அட்டு²ப்பத்திவஸேன அட்ட²கதா²யம் அனுஞ்ஞாதம். ஸூபோத³னாதி³வஸேன தத்த² ஆபத்தி ஏவா’’தி வுத்தம், தம் ந யுத்தம். கஸ்மா? பரிவாரே (பரி. 168) ஏவ த்³வின்னம் ஆகாரானம் ஆக³தத்தா, தஸ்மா அட்ட²கதா²யம் ‘‘அனுஞ்ஞாத’’ந்தி து³வுத்தம். அட்டு²ப்பத்தியம்யேவ பாகடந்தி ‘‘பத³பா⁴ஜனே ந வுத்த’’ந்தி வத்தப்³ப³ம். ஏகதோ க³ண்ஹந்தீதி க³ஹிதப⁴த்தாபி அஞ்ஞே யாவ க³ண்ஹந்தி, தாவ சே திட்ட²ந்தி, ஏகதோ க³ண்ஹந்தியேவ நாம. ‘‘க³ச்ச²தி சே, அனாபத்தீ’’தி வத³ந்தி.

ஏத்தா²ஹ – ‘‘படிக்³க³ஹணமேவ ஹேத்த² பமாண’’ந்தி வுத்தம், அத² கஸ்மா பாளியம் ‘‘க³ணபோ⁴ஜனம் நாம யத்த² சத்தாரோ…பே… பு⁴ஞ்ஜந்தி, ஏதம் க³ணபோ⁴ஜனம் நாமா’’தி (பாசி. 218) வுத்தந்தி? வுச்சதி – யத்தா²தி உபயோக³த்தே² பு⁴ம்மவசனம். சத்தாரோதி க³ணஸ்ஸ ஹேட்டி²மபரிச்சே²த³னித³ஸ்ஸனம். பஞ்சன்னம் போ⁴ஜனானந்தி ஆபத்திப்பஹோனகபோ⁴ஜனனித³ஸ்ஸனம். அஞ்ஞதரேன போ⁴ஜனேன நிமந்திதாதி அகப்பியனிமந்தனனித³ஸ்ஸனம். நிமந்தனவஸேனேவ பன க³ணபோ⁴ஜனஸ்ஸ வுத்தத்தா ‘‘நிமந்திதா பு⁴ஞ்ஜந்தீதி வுத்த’’ந்தி வுத்தம். ‘‘அஞ்ஞதரம் போ⁴ஜனம் விஞ்ஞாபேத்வா பு⁴ஞ்ஜந்தீ’’தி பன ந வுத்தம் அட்டு²ப்பத்தியம்யேவ பாகடத்தா. யம் பு⁴ஞ்ஜந்தீதி ஏவம் ஸம்ப³ந்தோ⁴ வேதி³தப்³போ³. தத்த² பு⁴ஞ்ஜந்தீதி படிக்³கா³ஹகனியமவசனம். ந ஹி அப்படிக்³க³ஹிதகம் பி⁴க்கூ² பு⁴ஞ்ஜந்தி. இத³ம் வுத்தம் ஹோதி ‘‘க³ணஸ்ஸ யதோ படிக்³க³ஹிதாஹாரபோ⁴ஜனஹேது பாசித்திய’’ந்தி. ஆக³ந்துகபட்டம் மோக⁴ஸுத்தேன ஸிப்³பி³த்வா ட²பேந்தி, தத்த² அனுவாதே யதா² ஏகதலம் ஹோதி, ததா² ஹத்தே²ஹி க⁴ட்டேதி. வலேதீதி ஆவட்டேதி. பரிவத்தனந்தி ஸுத்தம் க³ண்ஹந்தானம் ஸுக²க்³க³ஹணத்த²ம் ஸுத்தபரிவத்தனம் கரோதி, பட்டம் ஸிப்³ப³ந்தானம் ஸுக²ஸிப்³ப³னத்த²ம் பட்டபரிவத்தனஞ்ச. நவசீவரகாரகோ இதா⁴தி⁴ப்பேதோ, ந இதரோதி. ‘‘பி³ம்பி³ஸாரம் ஆபுச்சி²த்வா ஸம்பா⁴ரே கயிரமானேயேவ காலா அதிக்கந்தா, பச்சா² க³ணபோ⁴ஜனஸிக்கா²பதே³ பஞ்ஞத்தே ப⁴க³வந்தம் உபஸங்கமித்வா புச்சீ²’’தி வத³ந்தி, அஞ்ஞதா² அட்ட²கதா²ய விருஜ்ஜ²னதோ.

220. ‘‘த்³வே தயோ ஏகதோதி யேபி அகப்பியனிமந்தனம் ஸாதி³யித்வா’’திஆதி³வசனேன அகப்பியனிமந்தனபச்சயா ஏவ அனாபத்தி, விஞ்ஞத்திதோ ஆபத்தியேவாதி தீ³பேதி. அனிமந்திதோ சதுத்தோ² யஸ்ஸ ததே³தம் அனிமந்திதசதுத்த²ம். ஏஸ நயோ ஸப்³ப³த்த². பவேஸேத்வாதி நிஸீதா³பேத்வா. சீவரதா³னஸமயலத்³த⁴கசதுக்கம் சீவரகாரஸமயலத்³த⁴கசதுக்கந்தி ஏவமாதீ³னி. தானி சாதி யேஹி போ⁴ஜனேஹி விஸங்கேதோ நத்தி², தானி. மஹாதே²ரேதி உபஸம்பன்னே. அட்ட²த்வாதி டி²தேன நிமித்தம் த³ஸ்ஸிதம் ஹோதி. தத்த² தத்த² க³ந்த்வாதி ரதி²காதீ³ஸு பி⁴க்கு²ஸமீபே க³ந்த்வா. இமஸ்மிம் பன ஸிக்கா²பதே³ கத்த²சி போத்த²கே ‘‘அனுஜானாமி, பி⁴க்க²வே, சீவரதா³னஸமயே க³ணபோ⁴ஜனம் பு⁴ஞ்ஜிதும். ஏவஞ்சித³ம் ப⁴க³வதா பி⁴க்கூ²ன’’ந்தி பாடோ² தி³ஸ்ஸதி. கத்த²சி ‘‘பு⁴ஞ்ஜிது’’ந்தி வத்வா ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’தி பாடோ², அயம் ஸோப⁴னோ.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

221. அதி⁴ட்டி²தாதி நிச்சப்பவத்தா. ப³த³ரசுண்ணஸக்கராதீ³ஹி யோஜிதம் ப³த³ரஸாளவம். கிரகம்மகாரேனாதி கிரஸ்ஸ கம்மகாரேன.

226. ‘‘விகப்பேத்வா க³ண்ஹாஹீ’’தி ஏத்தா²ஹு போராணத்தே²ரா ‘‘ப⁴க³வதோ ஸம்முகா² அவிகப்பேத்வா கே³ஹதோ நிக்க²மித்வா ரதி²காய அஞ்ஞதரஸ்ஸ பி⁴க்கு²னோ ஸந்திகே விகப்பேஸி, விகப்பேந்தேன பன ‘மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீ’தி வத்தப்³ப³ம், இதரேன வத்தப்³ப³ம் ‘தஸ்ஸ ஸந்தகம் பரிபு⁴ஞ்ஜ வா யதா²பச்சயம் வா கரோஹீ’’’தி. பஞ்சஸுஸஹத⁴ம்மிகேஸூதி ஸம்முகா² டி²தஸ்ஸ ஸஹத⁴ம்மிகஸ்ஸ யஸ்ஸ விகப்பேதுகாமோ, தம் ஸஹத⁴ம்மிகம் அதி³ஸ்வா க³ஹட்ட²ஸ்ஸ வா ஸந்திகே, ஸயமேவ வா ‘‘பஞ்சஸு ஸஹத⁴ம்மிகேஸு இத்த²ன்னாமஸ்ஸ விகப்பேமீ’’தி வத்வா பு⁴ஞ்ஜிதப்³ப³ந்தி ஏகே, ஏவம் ஸதி தே²ரோ தஸ்மிம்யேவ நிஸின்னோவ ததா² வாசம் நிச்சா²ரேத்வா படிக்³க³ண்ஹாதீதி தக்கோ தி³ஸ்ஸதி. மஹாபச்சரியாதீ³ஸு பன பரம்முகா² விகப்பனாவ வுத்தா, ஸா ‘‘தேன ஹானந்த³, விகப்பேத்வா க³ண்ஹாஹீ’’தி இமினா ஸமேதி, ததா²பி மாதிகாட்ட²கதா²யம் (கங்கா². அட்ட². பரம்பரபோ⁴ஜனஸிக்கா²பத³வண்ணனா) ‘‘தஸ்மா யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவம் பரம்முகா² வா’’தி வசனதோ ஸஹத⁴ம்மிகஸ்ஸ ஸந்திகே ஏவ வத்தப்³ப³ம், ந ஸயமேவாதி தி³ஸ்ஸதி. யஸ்மா அயம் பச்சி²மனயோ போராணக³ண்டி²பதே³னபி ஸமேதி, தஸ்மா இத⁴ மாதிகாட்ட²கதா²னுஸாரேன அத்தோ² வேதி³தப்³போ³. ஏத்த² கிஞ்சாபி ‘‘தே மனுஸ்ஸா…பே… போ⁴ஜனமத³ம்ஸூ’’தி வசனதோ அகப்பியனிமந்தனம் பஞ்ஞாயதி, ததா²பி தே²ரஸ்ஸ குக்குச்சுப்பத்திகாரணேன ப⁴த்தேன ஸோ நிமந்திதோதி வேதி³தப்³போ³. அஞ்ஞதா² பரதோ ‘‘த்³வே தயோ நிமந்தனே ஏகதோ பு⁴ஞ்ஜதீ’’தி வசனேன, அனாபத்திவாரேன ச விருஜ்ஜ²தி.

229. ஏத்தா²யம் விசாரணா – ‘‘அஞ்ஞோ மனுஸ்ஸோ பத்தம் க³ண்ஹாதி, ந தா³தப்³ப³’’ந்தி வசனதோ அபரபா⁴கே³ அகப்பியனிமந்தனேன நத்தி² பயோஜனம், புப்³ப³பா⁴கே³யேவ அகப்பியனிமந்தனேன பயோஜனந்தி ஸ்வேபி ப⁴ந்தே ஆக³ச்சே²ய்யாதா²தி ஏத்த² கதரம் அகப்பியனிமந்தனம், தஸ்மா அதி⁴ப்பாயோ சேத்த² பமாணந்தி. ந, ‘‘பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’’தி வசனதோதி. தத்த² ‘‘ஸ்வேபி ப⁴ந்தே’’தி ஏத்த² யதா² வசனமத்தம் அக்³க³ஹேத்வா அகப்பியனிமந்தனக்கமேன அத்தோ² க³ஹிதோ, ததா² ‘‘பிண்டா³ய சரித்வா’’தி ஏத்தா²பி அந்தரா அகப்பியனிமந்தனேன லத்³த⁴ப⁴த்தம் ஸந்தா⁴ய வுத்தந்தி அத்தோ² க³ஹேதப்³போ³. பிண்டா³ய ஹி சரந்தம் தி³ஸ்வா ‘‘ஏத்த², ப⁴ந்தே, ப⁴த்தம் க³ண்ஹதா²’’தி தி³ன்னம்பி அகப்பியனிமந்தனேன லத்³த⁴ம் நாம ஹோதி. வோஹாரேன பன ‘‘பிண்டா³ய சரித்வா லத்³த⁴ப⁴த்த’’ந்தி வுச்சதி, ஏவம்ஸம்பத³மித³ம் த³ட்ட²ப்³ப³ம். அஞ்ஞதா² மாதிகாட்ட²கதா²யம் ‘‘க³ணபோ⁴ஜனே வுத்தனயேனேவ பஞ்சஹி போ⁴ஜனேஹி நிமந்திதஸ்ஸ…பே… பரஸ்ஸ பரஸ்ஸ போ⁴ஜனே’’தி வுத்தவசனவிரோதோ⁴. இத³ஞ்ஹி வசனம் யேன பட²மம் நிமந்திதோ, ததோ பட²மனிமந்திதம் ஆதா³ய க³தோ பரஸ்ஸ பரஸ்ஸ நிமந்தனகதா³யகஸ்ஸ போ⁴ஜனேதி அத்த²பரிதீ³பனதோ நிமந்தனதோ லத்³த⁴ப⁴த்தஸ்ஸ போ⁴ஜனேயேவ ஆபத்தீதி தீ³பேதி. ‘‘த்³வே தயோ நிமந்தனே ஏகதோ’’தி வசனேனபி ஸமேதி, அஞ்ஞதா² ‘‘யேன நிமந்திதோ, தஸ்ஸ போ⁴ஜனதோ பரஸ்ஸ போ⁴ஜனே’’தி ஏத்தகம் வத்தப்³ப³ம் ஸியா, பாளியம் வா ‘‘நிமந்தனேன ஏகதோபு⁴ஞ்ஜதீ’’தி ஏத்தகம் வத்தப்³ப³ம் ஸியா. து³தியனிமந்தனஸ்ஸ பட²மபோ⁴ஜனே ஆபத்திப்பஸங்க³னிவாரணத்த²ம் ‘‘யேன யேனா’’திஆதி³ வுத்தம். நிமந்தனபடிபாடியா பு⁴ஞ்ஜதீதி பாளீதி சே? ந, ‘‘அனாபத்தி நிச்சப⁴த்தே’’திஆதி³பாளிவிரோத⁴தோ.

க³ண்டி²பதே³ பன ‘‘பிண்டா³ய சரித்வா லத்³த⁴ப⁴த்தம் கஸ்மா பு⁴ஞ்ஜிதும் ந லப⁴தீதி சே? ‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’தி வுத்தத்தா’’தி லிகி²தம். யதி³ ஏவம் நிச்சப⁴த்தாதி³கம்பி ந வட்டதீதி ஆபஜ்ஜதீதி நிச்சப⁴த்தாதி³ ஓதி³ஸ்ஸகந்தி சே? தம் ந, தத³ஞ்ஞஸ்ஸ அத்தனோ த⁴னேன நிப்ப²ன்னஸ்ஸ, ஸங்க⁴தோ லத்³த⁴ஸ்ஸ வா பாதோ பசனகயாகு³ சே க⁴னா ஹோதி, தஸ்ஸாபி, ஏககுடிகம் கா³மம் உபனிஸ்ஸாய விஹரதோ பி⁴க்கா²சரியவஸேன லபி⁴தப்³ப³னிச்சப⁴த்தஸ்ஸ ச அகப்பியபா⁴வப்பஸங்க³தோ. தத்த² பி⁴க்கா²சரியவஸேன லத்³த⁴ம் ந கப்பதி நிமந்தனகானம் அப்பஸாதா³வஹனதோதி சே? ந, ‘‘பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி வசனவிரோத⁴தோ. கா²த³னீயம்பி ஹி பரஸ்ஸ கா²தி³த்வா பு⁴த்தத்தா நிமந்தனபோ⁴ஜனம் அபு⁴ஞ்ஜந்தோ அப்பஸாத³ம் கரோதி ஏவ, தஸ்மா அப்பஸாதா³வஹம் அப்பமாணம், தஸ்மா நிச்சப⁴த்தாதி³ ஓதி³ஸ்ஸகம் ந ஸம்ப⁴வதி. அபிச ஹேட்டா² வுத்தனயேன ஸத்³தி⁴ம் இத⁴ வுத்தனயேன ஸம்ஸந்தி³த்வா யம் யம் க²மதி, தம் தம் க³ஹேதப்³ப³ந்தி ஸப்³போ³பி கேஸஞ்சி ஆசரியானம் வினிச்ச²யோ. ஆசரியஸ்ஸ பன வினிச்ச²யோ அந்தே ஆவி ப⁴விஸ்ஸதி. ‘‘கீ²ரம் வா ரஸம் வா பிவதோ அமிஸ்ஸம்பீதி அதி⁴ப்பாயோ’’தி வுத்தம். க³ண்டி²பதே³ ‘‘ஹேட்டா² ஓத³னேனாமிஸ்ஸேத்வா உபரி திட்ட²தீ’’தி லிகி²தம்.

மஹாஉபாஸகோதி கே³ஹஸாமிகோ. மஹாஅட்ட²கதா²யம் ‘‘ஆபத்தீ’’தி வசனேன குருந்தி³யம் ‘‘வட்டதீ’’தி வசனம் விருத்³த⁴ம் விய தி³ஸ்ஸதி. ‘‘த்³வின்னம்பி அதி⁴ப்பாயோ மஹாபச்சரியம் விசாரிதோ’’தி லிகி²தம். ‘‘சாரித்ததோதி ‘ஸந்தம் பி⁴க்கு²ம் அனாபுச்சா²’தி பரதோ வத்தப்³ப³தோ’’தி வுத்தம். வசீகம்மம் அவிகப்பனம். ஏத்த² ‘‘மஹாஉபாஸகோ பி⁴க்கூ² நிமந்தேதி…பே… பச்சா² லத்³த⁴ம் ப⁴த்தம் பு⁴ஞ்ஜந்தஸ்ஸ ஆபத்தி. பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’’தி அட்ட²கதா²யம் வசனதோ, ‘‘காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி பாளிதோ, க²ந்த⁴கே ‘‘ந ச, பி⁴க்க²வே, அஞ்ஞத்ர நிமந்தனே அஞ்ஞஸ்ஸ போ⁴ஜ்ஜயாகு³ பரிபு⁴ஞ்ஜிதப்³பா³, யோ பரிபு⁴ஞ்ஜேய்ய, யதா²த⁴ம்மோ காரேதப்³போ³’’தி (மஹாவ. 283) வசனதோ ச நிமந்தேத்வா வா பவேதே³து அனிமந்தேத்வா வா, பட²மக³ஹிதனிமந்தனஸ்ஸ பி⁴க்கு²னோ பட²மனிமந்தனபோ⁴ஜனதோ அஞ்ஞம் யம் கிஞ்சி பரஸந்தகம் போ⁴ஜனம் பரம்பரபோ⁴ஜனாபத்திம் கரோதி. அத்தனோ ஸந்தகம், ஸங்க⁴க³ணதோ லத்³த⁴ம் வா அக³ஹட்ட²ஸந்தகம் வட்டதி, நிமந்தனதோ பட²மம் நிப³த்³த⁴த்தா பன நிச்சப⁴த்தாதி³ பரஸந்தகம்பி வட்டதி. க²ந்த⁴கே ‘‘ந ச, பி⁴க்க²வே…பே… யதா²த⁴ம்மோ காரேதப்³போ³’’தி (மஹாவ. 283) வசனம் பரஸந்தகபோ⁴ஜனவுத்தனியமனம். ததோ ஹத்த²கோவ நோ தக்கோதி ஆசரியோ.

பரம்பரபோ⁴ஜனஸிக்கா²பத³வண்ணனா நிட்டி²தா.

4. காணமாதாஸிக்கா²பத³வண்ணனா

31-3. படியாலோகந்தி பச்சி²மம் தே³ஸம். பூவக³ணனாயாதி அதிரித்தபூவக³ணனாயாதி அத்தோ². ஸசே ‘‘அபாதே²ய்யாதி³அத்தா²ய ஸஜ்ஜித’’ந்தி ஸஞ்ஞாய க³ண்ஹாதி, அசித்தகத்தா ஸிக்கா²பத³ஸ்ஸ ஆபத்தி ஏவ. அத² உக்³க³ஹிதம் க³ண்ஹாதி, ந முச்சதியேவ. அஸம்விபா⁴கே³ பன அனாபத்தி அகப்பியத்தா. அசித்தகதா பஞ்ஞத்திஜானனாபா⁴வேனேவ, ந வத்து²ஜானனாபா⁴வேனாதி ஏகே. ந, மாதிகாட்ட²கதா²யம் ‘‘பாதே²ய்யாதி³அத்தா²ய ஸஜ்ஜிதபா⁴வஜானன’’ந்தி அங்கே³ஸு அவுத்தத்தா. போராணக³ண்டி²பதே³ பனேவம் வுத்தம் ‘‘ஏகேன வா அனேகேஹி வா த்³வத்திபத்தபூரேஸு க³ஹிதேஸு தேஸம் அனாரோசனேன வா ஸயம் வா ஜானித்வா யோ அஞ்ஞம் க³ண்ஹாதி, தஸ்ஸ து³க்கடம். ஏகதோ தீஸு, சதூஸு வா பவிட்டே²ஸு ஏகேன சே த்³வேபத்தபூரா க³ஹிதா, து³தியே த்³வே க³ண்ஹந்தே பட²மோ சே ந நிவாரேதி, பட²மஸ்ஸ பாசித்தியம். நிவாரேதி சே, அனாபத்தி, து³தியஸ்ஸேவ து³க்கட’’ந்தி. ஸசே ஸஞ்சிச்ச ந வத³தி, போராணக³ண்டி²பதே³ வுத்தனயேன பாசித்தியம், மாதிகாட்ட²கதா²வஸேன (கங்கா². அட்ட². காணமாதாஸிக்கா²பத³வண்ணனா) து³க்கடம். ‘‘அதிரேகபடிக்³க³ஹண’’ந்தி தத்த² பஞ்சமம் அங்க³ம் வுத்தம், தஸ்மா அப்படிக்³க³ஹிதத்தா ந பாசித்தியம், கத்தப்³பா³கரணதோ பன து³க்கடம். அஞ்ஞதா² கிரியாகிரியம் இத³ம் ஆபஜ்ஜதி, அனிவாரணம், அனாரோசனம் வா ச²ட்ட²ங்க³ம் வத்தப்³ப³ம் ஸியா. ஏகனிகாயிகானம் வாதி ஏத்த² ‘‘ஆஸன்னவிஹாரபி⁴க்கூ², ஆஸன்னஆஸனஸாலாக³தா வா ஸசே விஸபா⁴கே³ஹி ஆனீதம் ந படிக்³க³ண்ஹந்தி, ‘ஆராமிகாதீ³னம்யேவ வா தா³பேந்தீ’தி ஜானாதி, யத்த² பரிபோ⁴க³ம் க³ச்ச²தி, தத்த² தா³தும் வட்டதீ’’தி வுத்தம். ‘‘த்³வத்திபத்தபூரா’தி வசனதோ பச்சி²ஆதீ³ஸு அதி⁴கம்பி க³ண்ஹதோ அனாபத்தீ’’தி கேசி வினயத⁴ரமானினோ வத³ந்தி, தம் தேஸம்யேவ நிஸீத³து, ஆசரியா பன ‘‘பச்சி²ஆதீ³ஸுபி உக்கட்ட²பத்தஸ்ஸ பமாணவஸேன த்³வத்திபத்தபூரா க³ஹேதப்³பா³. உக்கட்ட²பரிச்சே²த³கதா² ஹேஸா’’தி வத³ந்தி.

காணமாதாஸிக்கா²பத³வண்ணனா நிட்டி²தா.

5. பட²மபவாரணஸிக்கா²பத³வண்ணனா

236. யாவத³த்த²பவாரணாய பவாரிதா கிஞ்சாபி ‘‘பவாரிதா’’இச்சேவ அதி⁴ப்பேதா அட்டு²ப்பத்தியாவ, அத² கோ² பச்சி²மாவ இதா⁴தி⁴ப்பேதா.

237. ‘‘அலமேதம் ஸப்³ப³’’ந்தி வுத்தத்தா அதிரித்தம் நாம ஹோதி. பி⁴க்கு²ஸ்ஸ இத³ம்பி தே அதி⁴கம், இதோ அஞ்ஞம் ந லச்ச²தீதி கிர அத்தோ².

238-9. ‘‘அஸனம் பஞ்ஞாயதீ’’தி ஏதேனேவ ‘‘பு⁴த்தாவீ’’தி ஏதஸ்ஸ ஸித்³த⁴த்தா விஸும் அத்த²ஸித்³தி⁴ நத்தி². யதி³ அத்தி², அங்கா³னம் ச²க்கத்தத³ஸ்ஸனந்தி. வுத்தம்பி சேதந்திஆதி³ பவாரணங்கா³னம் பஞ்சகத்தத³ஸ்ஸனம். வரகோதி யோ கோசி வரகோ. ‘‘பவாரணம் பன ஜனேதியேவாதி விஸும் ஸித்த²ம் வோத³கம் கரோந்தி, பவாரணம் ந ஜனேதி. யாகு³ம் வா பிவந்தோ பட²மம் உத³கம் பிவதி, வட்டதி. அவஸிட்ட²ம் ஹேட்டா²ஸித்த²ம் பவாரணம் ந ஜனேதீ’’தி லிகி²தம். உபதிஸ்ஸத்தே²ரோ ‘‘ஜனேதியேவா’’தி வத³தி, தம் ந இச்ச²ந்தி ஆசரியா. ப⁴ஜ்ஜிதபிட்ட²ந்தி தண்டு³லசுண்ணமேவ. ப⁴ஜ்ஜிதஸத்துயோ பிண்டே³த்வா கதமோத³கோ ஸத்துமோத³கோ.

‘‘யாகு³ஸித்த²மத்தானேவ த்³வே…பே… படிக்கி²பதி, ந பவாரேதீ’’தி வுத்தத்தா பரசங்கமச்சா²த³யோ பக்கி²பித்வா பக்கயாகு³ம் பிவந்தோ ஸசே அஞ்ஞம் தாதி³ஸம்யேவ படிக்கி²பதி, பவாரணா ந ஹோதீதி கிர த⁴ம்மஸிரித்தே²ரோ. ஸசே அஞ்ஞம் படிக்கி²பதி, ந பவாரேதி. கஸ்மா? அஸனஸங்கா²தஸ்ஸ விப்பகதபோ⁴ஜனஸ்ஸாபா⁴வதோ. போ⁴ஜனஸாலாயம் பு⁴ஞ்ஜந்தோ சே, அத்தனோ அபாபுணனகோட்டா²ஸம் அபி⁴ஹடம் படிக்கி²பதி, ந பவாரேதி. காமம் படிக்கி²பதி, பத்தே பன ஆராமிகோ ஆகிரதி, ததோ பு⁴ஞ்ஜிதும் ந வட்டதி. இத³ஞ்ஹி பு³த்³த⁴ப்படிகுட்ட²அனேஸனாய உப்பன்னேயேவ ஸங்க³ஹம் க³ச்ச²தி. யதா² ஹி ஸங்க⁴தோ உத்³த⁴டபிண்ட³ம் து³ஸ்ஸீலோ தே³தி, தம் படிக்கி²பதி, ந பவாரேதி, ஏவம்ஸம்பத³மித³ம். ‘‘விஸபா⁴கோ³ லஜ்ஜீ சே தே³தி, தம் தேன ஸம்போ⁴க³ம் அகத்துகாமதாய படிக்கி²பதி, பவாரேதீதி அபரே’’தி வுத்தம். பரிவேஸனாயாதி ப⁴த்தக்³கே³. ‘‘மம்ஸேன ரஸம், மம்ஸஞ்ச ரஸஞ்ச மம்ஸரஸந்தி ஆபஜ்ஜனதோ ‘மம்ஸரஸ’ந்தி வுத்தே படிக்கே²பதோ ஹோதி, மம்ஸஸ்ஸ ரஸம் மம்ஸரஸந்தி விக்³க³ஹோ நாதி⁴ப்பேதோ’’தி வுத்தம். மம்ஸகரம்ப³கோ நாம…பே… வட்டதீதி ஸுத்³த⁴யாகு³ ஏவ ஹோதி. அப்பவாரணமிஸ்ஸககரம்ப³கோயேவ ஹோதி, தஸ்மா ந பவாரேதி, தேன வுத்தம் பரதோ ‘‘இத³ஞ்ச கரம்ப³கேன ந ஸமானேதப்³ப³’’ந்திஆதி³, தஸ்மா ‘‘தம் அபி⁴ஹரித்வா கஞ்ஜியம் க³ண்ஹதா²’தி வத³ந்தம் படிக்கி²பதி, பவாரணா ந ஹோதீ’’தி ச ‘‘மிஸ்ஸகயாகு³ம் க³ண்ஹதா²’தி அவுத்தத்தா ‘ஸம்மிஸ்ஸிதம் விஸும் கத்வா தே³தீ’தி வுத்தத்தா’’தி ச வுத்தம், யஸ்மா யாகு³மிஸ்ஸகந்தி ஏத்த² பத³த்³வயே பவாரணாரஹஸ்ஸ நாமக்³க³ஹணம் நத்தி², தஸ்மா தத்ர சே யாகு³ ப³ஹுதரா வா ஹோதி ஸமஸமா வா, ந பவாரேதி. கஸ்மா? தத்த² அபி⁴ஹாரகபடிக்கே²பகானம் யாகு³ஸஞ்ஞத்தா. யாகு³ சே மந்தா³, ப⁴த்தம் ப³ஹுதரம், பவாரேதி. கஸ்மா? தேஸம் உபி⁴ன்னம்பி தத்த² பி⁴ன்னஸஞ்ஞத்தாதி தக்கோ ஆசரியஸ்ஸ. ப⁴த்தமிஸ்ஸகே பவாரணாரஹஸ்ஸ நாமஸ்ஸ ஸப்³பா⁴வதோ ஸப்³ப³தா³ பவாரேதி ஏவ. மிஸ்ஸகே பன வுத்தனயேன காரணம் வத்தப்³ப³ம். விஸும் கத்வா தே³தீதி யதா² ப⁴த்தஸிட்ட²ம் ந பததி, ததா² கா³ள்ஹம் ஹத்தே²ன பீளேத்வா பரிஸ்ஸாவேத்வா தே³தி.

அகப்பியகதந்தி ஏத்த² ‘‘கப்பியம் அகாராபிதேஹி கத³லிப்ப²லாதீ³ஹி ஸத்³தி⁴ம் அதிரித்தம் கப்பியம் காராபேத்வாபி தம் கத³லிப்ப²லாதி³ம் ட²பேத்வா அவஸேஸம் பு⁴ஞ்ஜிதும் வட்டதி. அமிஸ்ஸகரஸத்தா புன தானி கப்பியம் காராபேத்வா அஞ்ஞஸ்மிம் பா⁴ஜனே ட²பேத்வா அதிரித்தம் காரேத்வா பு⁴ஞ்ஜிதும் வட்டதி. கஸ்மா? புப்³பே³ தேஸு வினயகம்மஸ்ஸ அனாருள்ஹத்தா’’தி வத³ந்தி. ‘‘பு⁴த்தாவினா ச பவாரிதேன ஆஸனா வுட்டி²தேன கத’’ந்தி வசனதோ பு⁴த்தாவினா அப்பவாரிதேன ஆஸனா வுட்டி²தேன கத்தப்³ப³ந்தி ஸித்³த⁴ம், தஸ்மா ‘‘பாதோவ அத்³தா⁴னம் க³ச்ச²ந்தேஸு த்³வீஸு ஏகோ பவாரிதோ அவுட்டி²தோ தத்த² நிஸீத³தி, ஸோ இதரேன பிண்டா³ய சரித்வா லத்³த⁴ம் பி⁴க்க²ம் அத்தனா அபு⁴த்வாபி ‘அலமேதம் ஸப்³ப³’ந்தி காதும் லப⁴தி ஏவா’’தி வுத்தம், தம் ஸுக்கபக்கே² ‘‘பு⁴த்தாவினா கதம் ஹோதீ’’தி இமினாவ ஸித்³த⁴ம், தஸ்மிம் பக்கே² அத்தனோ ஸத்தங்கா³னி ந பூரேந்தி, கண்ஹபக்கே² படிபா⁴கே³ன ஸத்த வுத்தானீதி வேதி³தப்³ப³ம். பு⁴த்தாவினா அப்பவாரிதேன ஆஸனா வுட்டி²தேன, அவுட்டி²தேன வா கதம் ஹோதி, வட்டதி. ‘‘பவாரிதேன ஆஸனா அவுட்டி²தேனேவா’’தி இமம் பன அத்த²விகப்பம் தீ³பேதும் ‘‘ஸத்தங்கா³னி வுத்தானீ’’திபி வத்தும் வட்டதி. ஸோ புன காதும் ந லப⁴தி பட²மம் கதஸ்ஸ புன தேனேவ கத்தப்³ப³ப்பஸங்க³தோ. யஞ்ச அகதம், தம் கத்தப்³ப³ந்தி ஹி வுத்தம். அத² ஸோவ பட²மோ புன கத்துகாமோ ஹோதி, அஞ்ஞஸ்மிம் பா⁴ஜனே புப்³பே³ அகதம் காதும் லப⁴தி. து³தியோ பட²மபா⁴ஜனேபி காதும் லப⁴தி. ‘‘யேன அகதம், தேன காதப்³ப³’’ந்தி ஹி வுத்தம். இமமேவத்த²ம் ஸந்தா⁴ய ‘‘யேன யம் பட²மம் கப்பியம் கதம், தமேவ ஸோ புன காதும் ந லப⁴தி, அஞ்ஞேன காதப்³ப³’’ந்தி லிகி²தம். தத்த² தந்தி தம் பட²மம் கதந்தி அத்தோ². பேஸேத்வா காரேதப்³ப³ந்தி ஏத்த² அனுபஸம்பன்னோ சே க³தோ, தத்ரட்டே²ன ஏகேன பி⁴க்கு²னா படிக்³கா³ஹேத்வா அபரேன காரேதப்³ப³ந்தி தத்த² ஏகோவ ஏவமேவ காதும் ந லப⁴தீதி. ‘‘யம் கிஞ்சி கி³லானம் உத்³தி³ஸ்ஸா’திஆதி³வசனதோ விஹாராதீ³ஸு கி³லானஸ்ஸ பாபுணனகோட்டா²ஸம்பி கி³லானாதிரித்தம் நாம, தஸ்மா வட்டதீ’’தி வத³ந்தி. ஆஹாரத்தா²யாதி விகாலே ஏவாதி ஏகே.

241. காயகம்மம் அஜ்ஜோ²ஹரணதோ. வசீகம்மம் வாசாய ‘‘அதிரித்தம் கரோத² ப⁴ந்தே’’தி அகாராபனேனாதி வேதி³தப்³ப³ம்.

பட²மபவாரணஸிக்கா²பத³வண்ணனா நிட்டி²தா.

6. து³தியபவாரணஸிக்கா²பத³வண்ணனா

243. ஸாதா⁴ரணமேவாதி ஸப்³ப³பவாரணானம் ஸாதா⁴ரணம் ‘‘யாவத்தகம் இச்ச²ஸீ’’தி இத³ம்.

து³தியபவாரணஸிக்கா²பத³வண்ணனா நிட்டி²தா.

7. விகாலபோ⁴ஜனஸிக்கா²பத³வண்ணனா

247-9. நடானம் நாடகானி நடனாடகானி, ஸீதாஹரணாதீ³னி. மூலஞ்ச தம் கா²த³னீயஞ்சாதி மூலகா²த³னீயம். ஏஸ நயோ ஸப்³ப³த்த². பிட்ட²ந்தி சுண்ணம். கா²ரகமூலந்தி யூபஸமூலம். சச்சுமூலம் நேளியமூலம். தம்ப³கம் வசம். தண்டு³லேய்யகம் சூளகுஹு. வத்து²லேய்யகம் மஹாகுஹு. வஜகலி நிகோட்ட²ம். ஜஜ்ஜ²ரீ ஹிரதோ.

கோட்ட²ம் ஜரட்ட²ம் வுச்சதி. க³ண்டி² முஹுகுலமுது³ விசயத்த² வஜமுஜு வது³ளவி.

வஜ்ஜயேதிமே கிம்ஸுகம், ஹலித்³தி³. கஸேருகோ, கடிப³லவந்தி தஸ்ஸ நாமம். அம்பா³டகம் அமூலகம் பிட⁴ல கக்குல. மஸாலு கினள. ஆலுவ களி தட்³டி⁴அளி அலஸ கடிஸ்ஸல நமேத³தி மேர. ஸிக்³கு³ ஸீரி கோள காலகம் நேகளவி. கீ²ரவல்லிகந்தோ³ துமூரோரியோ ஹோதி. ஸங்க²தோ தோ⁴வனமேவ. அயம் ‘‘பரிஸங்கா²ரோ’’தி லிகி²தம். கீ²ரகாகோலீ கிரிகவேளி. ஜீவிகம் ஜீவிஹி. உஸப⁴க உம்மஸுவியி.

ஹிந்தாலம் கிதிலி. குந்தால தோஹோ திலிஸதா பதி³களிரோ படஸேவலகளி. கரமந்த³கம் கரம்ப³ த³ண்டோ³கிர உத³கஜோதி கண்ட³கோ. ‘‘ஸிங்க⁴தகோதிபி வுச்சதீ’’தி லிகி²தம். ப²க்³க³வ ஹகிளி. நத்தமாலந்தி கரஞ்ஜி.

ஸேல்லு லோஹோலியம். காஸமத்³த³க குது³வவலி அனஸிகின. உம்மாதி³ய மேலேலிதி³ய. சீனமுக்³கோ³ வேனமுத்தி ஹுரமுக்³க³. ராஜமாஸோ மாஹவிலிதி. அக்³கி³மந்தோ முஞ்சி. ஸுனிபண்ணகோ திபிலவனினாளிகா திலக. பூ⁴மியம் ஜாதலோணீதி ஏத்த² லோணீனாமஸ்ஸ ஸாதா⁴ரணத்தா ‘‘பூ⁴மிய’’ந்தி விஸேஸேத்வா வுத்தம். ப்³ரஹ்மீபத்தம் தே³மேதேயே பணஸா. ‘‘தீ³பவாஸினோ வத³ந்தீ’’தி ஸிதி²லம் கத்வா கஸ்மா வுத்தந்தி சே? ‘‘கா²த³னீயத்த²ம் ப²ரதீதி லக்க²ணேன அஸமானத்தா’’தி வுத்தம். பதே³லிவினிதேகி. ஸுலஸிபண்ணந்தி தஸாபலிகம்.

அக³ந்தி⁴கபுப்ப²ம் கரிஸ்ஸயேதி சேகவாதி³த³புப்ப²ம் சேலேபதிமலம். ஜீவந்தீபுப்ப²ம் ஜீவிதந்தி³க³மல. ப³குல முது²வல. குய்யக புனபுன்னாமபுன்னரா, ஜாதிஸுமன. நவமாலிகா சேஹேமல.

திந்திணிக கசினீ விலேயி. மாதுலுங்க³ லவனோ. புஸ்ஸப²ல ஸுபுலி. திம்ப³ரூஸக திகி³ப்³பே³ரேஹிதி ஸுஸதுது⁴த. திபுஸவாதிங்க³ண து⁴ததிகேண படியி. சோச வரியியேலி. மோச அதிரேலி. கோ³ட்ட²ப²லம் பூவப²லந்தி ஏகே. கோட்ட²ஸே கிர அச்சி²வ.

அஸமுஸ்ஸி பி³ம்ப³ இதி கேசி. காஸ்மரீதி ஸேபண்ணி. அதிதேமேதி கரியமேதிஸ்ஸ. ஜாதிப²லம் கதம்மேதி. கடுகப²லம் திரிரக.

தருணப²லம் கிரிஉபுலு. போக்க²ரட்டி² கிஞ்சக்க²ட்டி². ஸித்³த⁴த்த²கம் ஸாஸபம் ஸேதவண்ணம். ராஜிகம் ரத்தம் ஹோதி.

ஹிங்கு³ம் ஹிங்கு³ஜதுந்தி ஸப்³பா³பி ஹிங்கு³விகதியோ. ஏத்த² ஹிங்கு³ஜது நாம பத்தஸாகா² பசித்வா காதப்³பா³. ஸாகா² பசித்வா கதா ஸிபாடிகா. அஞ்ஞேஹி மிஸ்ஸேத்வா கதாதி கேசி. தகம் கட்ட²ஜந்தி அக்³கி³கேளினி. நிகிதிஸ்ஸாகாலேஸயோ. திமேர, தகபத்தி பஸாகா²பத்தே பசித்வா காதப்³பா³. ‘‘தகபண்ணி ஸாவதி ஏவ காதப்³பா³’’தி லிகி²தம்.

விகாலபோ⁴ஜனஸிக்கா²பத³வண்ணனா நிட்டி²தா.

8. ஸன்னிதி⁴காரகஸிக்கா²பத³வண்ணனா

253. அபரஜ்ஜு ஸன்னிதி⁴ நாம ஹோதீதி அத்தோ². அஜ்ஜ படிக்³க³ஹிதந்தி ந கேவலம் படிக்³க³ஹிதமேவ, அத² கோ² உக்³க³ஹிதகம்பி, தேனேவ அட்ட²கதா²யம் ‘‘படிக்³க³ண்ஹாதி, ஆபத்தி து³க்கடஸ்ஸாதி ஏவம் ஸன்னிதி⁴கதம் யம் கிஞ்சி யாவகாலிகம் வா யாமகாலிகம் வா அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே தாவ ஆபத்தி து³க்கடஸ்ஸா’’தி வுத்தம். யதி³ தம் பட²மமேவ படிக்³க³ஹிதம், ‘‘படிக்³க³ஹணே தாவா’’தி ந வத்தப்³ப³ம், தஸ்மா வேதி³தப்³ப³மேதம் ‘‘அத்தனோ காலே க³ஹிதம் அஜ்ஜ படிக்³க³ஹித’ந்தி வுத்த’’ந்தி.

ஏத்தா²ஹ – யதா² பஞ்ச பே⁴ஸஜ்ஜானி உக்³க³ஹிதகானி அனதி⁴ப்பேதானி. ஸத்தாஹாதிக்கமே அனாபத்தி அனஜ்ஜோ²ஹரணீயத்தா, ததா² இதா⁴பி உக்³க³ஹிதகம் நாதி⁴ப்பேதந்தி? ஏத்த² வுச்சதி – பே⁴ஸஜ்ஜஸிக்கா²பதே³ (பாரா. 618 ஆத³யோ) உக்³க³ஹிதகம் நாதி⁴ப்பேதந்தி யுத்தம் அத்தனோ காலாதிக்கமனமத்தேன தத்த² ஆபத்திப்பஸங்க³தோ. ஏத்த² ந யுத்தம் அத்தனோ காலாதிக்கமனமத்தேன ஆபத்திப்பஸங்கா³பா⁴வதோ. அஜ்ஜோ²ஹரணேனேவ ஹி ஏத்த² ஆபத்தீதி அதி⁴ப்பாயோ, தஸ்மா அனுக³ண்டி²பத³மதேன அஜ்ஜ உக்³க³ஹேத்வா புனதி³வஸே பு⁴ஞ்ஜந்தோ த்³வே ஆபத்தியோ ஆபஜ்ஜதி.

தத்ராயம் விசாரணா – அத்தனா பு⁴ஞ்ஜிதுகாமோ அஜ்ஜ உக்³க³ஹேத்வா புனதி³வஸே பு⁴ஞ்ஜதி, த்³வே ஆபத்தியோ ஆபஜ்ஜதி. ஸாமணேராதீ³னம்யேவ அத்தா²ய உக்³க³ஹேத்வா க³ஹிதம் புனதி³வஸே படிக்³க³ஹேத்வா பு⁴ஞ்ஜந்தோ ஆபத்தியா ந காரேதப்³போ³தி. படிக்³க³ண்ஹாதி, ஆபத்தி து³க்கடஸ்ஸாதி ஏத்தா²யமதி⁴ப்பாயோ – ஸசே பே³லட்ட²ஸீஸோ விய து³தியததியாதி³தி³வஸத்தா²ய அஜ்ஜ படிக்³க³ஹேத்வா ஸாமணேராதீ³னம் கோ³பனத்தா²ய தே³தி, தஸ்ஸ புனதி³வஸே அஜ்ஜோ²ஹரணத்த²ம் படிக்³க³ஹணே ஆபத்தி து³க்கடஸ்ஸாதி ஸம்ப⁴வதி. ஸயமேவ ஸசே தம் கோ³பேத்வா ட²பேதி, புனதி³வஸே பதிதம் கசவரம் தி³ஸ்வா விமதிவஸேன வா படிக்³க³ண்ஹதோ படிக்³க³ஹணதோவ ஆபத்தி து³க்கடஸ்ஸாதி ஸம்ப⁴வதி. நோ சே படிக்³க³ண்ஹாதி, தம் து³க்கடம் நத்தி². ‘‘இத³ஞ்ஹி ‘ஏகம் பாத³ம் அதிக்காமேதி, ஆபத்தி து²ல்லச்சயஸ்ஸா’திஆதி³ வியா’’தி வுத்தம். யோ பன ஏகப்பஹாரேனேவ த்³வேபி பாதே³ அதிக்காமேதி, தஸ்ஸ தம் து²ல்லச்சயம் நத்தி², ஏவம்ஸம்பத³மித³ந்தி வேதி³தப்³ப³ம். ஏத்த² படிக்³க³ஹிதபா⁴வம் அவிஜஹந்தமேவ ஸன்னிதி⁴ம் ஜனேதீதி த⁴ம்மஸிரித்தே²ரோ, தம் ‘‘படிக்³க³ண்ஹாதி, ஆபத்தி து³க்கடஸ்ஸா’’தி பாளியா விருஜ்ஜ²தி. கபாலேன பீதோ பன ஸ்னேஹோ அப்³போ³ஹாரிகோ. கிஞ்சாபி உண்ஹே ஓதாபேந்தஸ்ஸ பக்³க⁴ரதி, ததா²பி ‘‘பே⁴ஸஜ்ஜஸிக்கா²பதே³ வியா’’தி வுத்தம். இதரதா² கபாலேன பீதா ஸப்பிஆத³யோபி ஸத்தாஹாதிக்கமே ஆபத்திம் ஜனேய்யுந்தி. ஸயம் படிக்³க³ஹேத்வாதி இதா⁴பி புப்³பே³ வுத்தவிதி⁴யேவ. து³த்³தோ⁴தபத்தகதா²பி ஏதேன ஸமேதி விய. ஆஹாரத்தா²யாதி காலேபி லப்³ப⁴தி. பகதிஆமிஸேதி கப்பியாமிஸே. ஸாமிஸேன முகே²ன அஜ்ஜோ²ஹரதோ த்³வேதி ‘‘ஹிய்யோ படிக்³க³ஹிதயாமகாலிகம் அஜ்ஜ புரேப⁴த்தம் ஸாமிஸேன முகே²ன அஜ்ஜோ²ஹரதோ த்³வே பாசித்தியானீ’’தி லிகி²தம். அஜ்ஜ படிக்³க³ஹிதம் யாவகாலிகம்பி ஹி யாமாதிக்கந்தபானகேன ஸம்ஸட்ட²ம் ஸன்னிதி⁴ம் கரோதி. அகப்பியமம்ஸேஸு மனுஸ்ஸமம்ஸே து²ல்லச்சயம், ஸேஸமம்ஸே து³க்கடஞ்ச வட்³ட⁴தி.

255. ஸத்தாஹகாலிகம் யாவஜீவிகம் ஆஹாரத்தா²யாதி காலேபி து³க்கடமேவ ஸன்னிதி⁴ம் அனாபஜ்ஜனதோதி கேசி. தத³ஹு படிக்³க³ஹிதம் தத³ஹு புரேப⁴த்தம் வட்டதீதி சே? ந, பாளியம்பி அட்ட²கதா²யம்பி விஸேஸஸ்ஸ நத்தி²தாய. பே⁴ஸஜ்ஜஸிக்கா²பதே³ புரேப⁴த்தம் யதா²ஸுக²ம் பரிபு⁴ஞ்ஜனம் வுத்தந்தி சே? ஆஹாரே ஸப்பிஆதி³ ஸங்க³ஹம் யாதி, தேன தக்³க³திகவஸேன வுத்தம், ந பே⁴ஸஜ்ஜவஸேன வுத்தந்தி உபதிஸ்ஸோ.

ஸன்னிதி⁴காரகஸிக்கா²பத³வண்ணனா நிட்டி²தா.

9. பணீதபோ⁴ஜனஸிக்கா²பத³வண்ணனா

259. அகப்பியஸப்பினாதி யேஸம் மம்ஸம் ந கப்பதி, தேஸம் ஸப்பினா. ‘‘வஸாதேலஞ்ஹி ட²பேத்வா அகப்பியஸப்பி நாம நத்தீ²’’தி லிகி²தம். விஸங்கேதந்தி ஏத்த² ‘‘ஸூபோத³னவிஞ்ஞத்திபி ந ஹோதீ’’தி வுத்தம். காயிகானீதி காயேன ஆபஜ்ஜிதப்³பா³னி.

261. மஹானாமஸிக்கா²பதே³ன காரேதப்³போ³தி ஸங்க⁴வஸேன பவாரிதே பே⁴ஸஜ்ஜத்தா²ய ஸப்பிஆதி³பஞ்சகம் விஞ்ஞாபேதி சே, தத்த² ‘‘ந பே⁴ஸஜ்ஜேன கரணீயேன பே⁴ஸஜ்ஜ’’ந்தி ஏத்த² ஸங்க³ஹம் க³ச்ச²தி, தஸ்மா ‘‘தேன பாசித்திய’’ந்தி வுத்தம். பாளிமுத்தகேஸு ‘‘பி⁴க்கு²னீனம்பி து³க்கட’’ந்தி லிகி²தம்.

பணீதபோ⁴ஜனஸிக்கா²பத³வண்ணனா நிட்டி²தா.

10. த³ந்தபோனஸிக்கா²பத³வண்ணனா

264-5. முக²த்³வாரந்தி கண்ட²னாளி. உச்சாரணமத்தந்தி உக்கி²பிதப்³ப³மத்தகம். கஸடம் ச²ட்³டே³த்வாதி ஸமுதா³சாரவஸேன, அச²ட்³டி³தேபி ‘‘வட்டதீ’’தி வுத்தம். ஹத்த²பாஸாதிக்கமந்தி தா³யகஸ்ஸ. பி⁴க்கு²ஸ்ஸ தே³தீதி அஞ்ஞஸ்ஸ பி⁴க்கு²ஸ்ஸ. கஞ்ஜிகந்தி யம் கிஞ்சி த்³ரவம். பத்தோ படிக்³க³ஹேதப்³போ³தி பூ⁴மியம் ட²பிதே அபி⁴ஹாராபா⁴வதோ. ‘‘யதா² பட²மதரம் பதிததே²வே தோ³ஸோ நத்தி², ததா² ஆகிரித்வா அபனேந்தானம் பதிததே²வேபி அபி⁴ஹடத்தா நேவத்தி² தோ³ஸோ’’தி லிகி²தம். சருகேனாதி கு²த்³த³கபிண்டே³ன. ஜாக³ரந்தஸ்ஸபீதி ‘‘அபி-ஸத்³தே³ன ஸுத்தஸ்ஸபீ’’தி லிகி²தம். கேசீதி அப⁴யகி³ரிவாஸினோ. தேஹி காயஸம்ஸக்³கே³ காயபடிப³த்³தே⁴னாபி தப்படிப³த்³தே⁴னாபி து²ல்லச்சயாபத்தி த³ஸ்ஸிதா ஏவாதி அத்தோ². காயபடிப³த்³த⁴படிப³த்³தே⁴னாதி வசனமத்தமேவேதம். ‘‘ஸத்த²கேனாதி படிக்³க³ஹிதகேனா’’தி லிகி²தம், தம் து³ல்லிகி²தம் ஸதிபி மலே புன படிக்³க³ஹேதப்³ப³கிச்சாபா⁴வதோ. கேஸஞ்சி அத்தா²யாதி அனுபஸம்பன்னானம் அத்தா²ய. ‘‘ஸாமணேரஸ்ஸ ஹத்த²ம் பு²ட்ட²மத்தமேவ தம் பரிச்சத்த’’ந்தி லிகி²தம்.

படிக்³க³ஹணுபக³பா⁴ரம் நாம மஜ்ஜி²மபுரிஸேன உக்கி²பிதப்³ப³கம். மூலபடிக்³க³ஹணமேவ வட்டதீதி ஏத்த² ‘‘மச்சி²கவாரணத்த²ந்தி வுத்தத்தா ‘அபு⁴ஞ்ஜனத்தா²யாபி படிக்³க³ஹேத்வா க³ஹிதே வட்டதீ’’’தி யே வத³ந்தி, தே வத்தப்³பா³ ‘‘ஸீஸமக்க²னதேலம் படிக்³க³ஹேத்வா ‘இத³ம் ஸீஸமக்க²ன’ந்தி அனாபோ⁴கே³னேவ ஸத்தாஹம் அதிக்காமேந்தஸ்ஸ கிம் நிஸ்ஸக்³கி³யம் ப⁴வேய்யா’’திஆதி³, ஸுத்தாதி⁴ப்பாயோ பன ஏவம் க³ஹேதப்³போ³ ‘‘மச்சி²கவாரணத்த²ம் பீ³ஜந்தஸ்ஸ தஸ்மிம் லக்³க³ரஜாதி³ம்ஹி பத்தே பதிதே ஸுக²ம் பரிபு⁴ஞ்ஜிதும் ஸக்கா’தி ஸஞ்ஞாய புப்³பே³ படிக்³க³ஹிதப்³ப³’’ந்தி வுத்தம். பரிவத்தனகதா²யம் ‘‘அம்ஹாகம் தண்டு³லேஸு கீ²ணேஸு ஏதேஹி அம்ஹாகம் ஹத்த²க³தேஹி ஸாமணேரஸந்தகேஹிபி ஸக்கா பதிட்ட²பேது’ந்தி பி⁴க்கூ²னம் சித்துப்பாதோ³ சே ஸம்ப⁴வதி, ‘பரிவத்தனம் ஸாத்த²க’ந்தி உபதிஸ்ஸத்தே²ரோ’’தி வுத்தம். யதி³ ஏவம் ஸுத்³த⁴சித்தானம் நிரத்த²கந்தி ஆபன்னமேவ, ததா² ‘‘பண்டி³தோ ஏஸ ஸாமணேரோ பத்தபரிவத்தனம் கத்வா த³ஸ்ஸதி, மயமேவ ச இமஸ்ஸ விஸ்ஸாஸேன வா யாசித்வா வா பு⁴ஞ்ஜிஸ்ஸாமா’’தி சித்தே ஸதி பு⁴ஞ்ஜிதும் ந வட்டதி கதேபி பரிவத்தனேதி ச ஆபன்னம், கிம் ப³ஹுனா. நிரபேக்கே²ஹேவ க³ண்ஹிதப்³ப³ம், ந ஸாபேக்கே²ஹீதி த³ஸ்ஸனத்த²ம் வுத்தந்தி ஆசரியோ. அயமேவத்தோ² ‘‘ஸசே பன ஸக்கோதி விதக்கம் ஸோதே⁴தும், ததோ லத்³த⁴ம் கா²தி³தும்பி வட்டதீ’’தி வசனேன ஸித்³தோ⁴வ. ஆதா⁴ரகே பத்தோ ட²பிதோ ஹோதி யதா²படிக்³க³ஹிதபா⁴வே நிராலயோ. ஸமுத்³தோ³த³கேன அப்படிக்³க³ஹிதகேன. மேண்ட³கஸ்ஸ கீ²ரம் கீ²ரத்தாவ வட்டதி. ‘‘அத்தனோ பன கீ²ரம் முகே²னேவ பிவந்தஸ்ஸ அனாபத்தீதி த³ஸ்ஸேதும் வுத்த’’ந்தி வுத்தம். ‘‘ஸரீரனிஸ்ஸிதமஹாபூ⁴தானி ஹி இதா⁴தி⁴ப்பேதானீ’’தி லிகி²தம், தது³ப⁴யம்பி ‘‘கப்பியமம்ஸகீ²ரம் வா’’திஆதி³னா நயேன விருஜ்ஜ²தி.

அபிச ‘‘அப்படிக்³க³ஹிதபா⁴ஜனே அஞ்ஞபி⁴க்கு²ஸந்தகே அத்தனோ பிண்ட³பாதம் பக்கி²பதி, ‘தம் தோ²க’ந்தி வா அஞ்ஞேன வா காரணேன வத³தி, தம் ஸப்³பே³ஸம் ந கப்பதி. கஸ்மா? வினயது³க்கடத்தா. அத்தனா படிக்³க³ஹேத்வா பக்கி²பிதப்³ப³ம் வினயவிதி⁴ம் அகத்வா து³க்கடந்தி அதி⁴ப்பாயோ. ஏவம் தாதி³ஸம் கிமத்த²ம் ந பு⁴ஞ்ஜதீதி? அட்ட²கதா²யம் ‘உக்³க³ஹிதகோ ஹோதீ’தி வுத்தத்தா. ஏவஞ்ஹி தத்த² வுத்தம் பூ⁴மியம் வா பா⁴ஜனே வா ப²லம் வா யம் கிஞ்சி ஆமிஸம் வா யாவஜீவிகம்பி அப்படிக்³க³ஹிதகம் அஜானந்தோ ஆமஸதி, ந வட்டதி, உக்³க³ஹிதகம் ஹோதீ’’தி அனுக³ண்டி²பதே³ வுத்தம், தஸ்மா இமஸ்ஸ மதேன பி⁴க்கு² பி⁴க்கு²ஸ்ஸ ஸசே பத்தே அப்படிக்³க³ஹிதே பிண்ட³ம் ட²பேதி, தம் அகப்பியம் உக்³க³ஹிதகந்தி ஸித்³த⁴ம். அயமேவத்தோ² ‘‘ஸசே அத்தனோ வா பி⁴க்கூ²னம் வா யாகு³பசனகபா⁴ஜனே…பே… நிராமிஸம் கத்வா பரிபு⁴ஞ்ஜிதப்³ப³’’ந்தி வசனேன ஸம்ஸந்தி³த்வா கதே²தப்³போ³. ‘‘கப்பியமம்ஸகீ²ரம் வா’’தி பஸங்க³வஸேன வுத்தம். த³தி⁴ சே படிலத்³த⁴ம், தஞ்ச அதி⁴ப்பேதந்தி கேசி.

த³ந்தபோனஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன போ⁴ஜனவக்³கோ³ சதுத்தோ².