5. அசேலகவக்³கோ³

1. அசேலகஸிக்கா²பத³வண்ணனா

269. விகா⁴ஸாதா³னம் அந்தரா பூவலாபே⁴ன அஞ்ஞதரா பரிப்³பா³ஜிகா பவிஸித்வா டி²தா. தா³பேதீதி அனுபஸம்பன்னேன.

அசேலகஸிக்கா²பத³வண்ணனா நிட்டி²தா.

2. உய்யோஜனஸிக்கா²பத³வண்ணனா

276. விஜஹந்தஸ்ஸாதி அனாத³ரத்தே² ஸாமிவசனம். உய்யோஜகஸ்ஸ விஜஹந்தஸ்ஸ ஸதோ ஆபத்தி து³க்கடஸ்ஸாதிபி அத்தோ². இத⁴ அனுபஸம்பன்னோ நாம ஸாமணேரோவாதி⁴ப்பேதோ.

உய்யோஜனஸிக்கா²பத³வண்ணனா நிட்டி²தா.

3. ஸபோ⁴ஜனஸிக்கா²பத³வண்ணனா

280. ஸபோ⁴ஜனேதி ஏத்த² பட²மவிகப்போ ‘‘இத்தீ² ச புரிஸோ சா’’தி இமினா ததியபதே³ன யுஜ்ஜதி, து³தியவிகப்போ பட²மேஹி த்³வீஹி. குலேதி க⁴ரே. அனுபவிஸித்வா நிஸீத³னசித்தேன ஸசித்தகம்.

ஸபோ⁴ஜனஸிக்கா²பத³வண்ணனா நிட்டி²தா.

4. ரஹோபடிச்ச²ன்னஸிக்கா²பத³வண்ணனா

284. இத⁴ பஞ்சமம் உபனந்த³ஸ்ஸ சதுத்த²ம் ஹோதி, தஸ்மா பி⁴க்கு²னிவக்³க³ஸ்ஸ த³ஸமட்ட²கதா²யம் உபரி உபனந்த³ஸ்ஸ ‘‘ததியஸிக்கா²பதே³னா’’தி ந பாடோ², ‘‘சதுத்தே²னா’’தி பாடோ²தி வேதி³தப்³போ³.

ரஹோபடிச்ச²ன்னஸிக்கா²பத³வண்ணனா நிட்டி²தா.

5. ரஹோனிஸஜ்ஜஸிக்கா²பத³வண்ணனா

289. ரஹோனிஸஜ்ஜஸிக்கா²பத³ம் உத்தானத்த²மேவ.

6. சாரித்தஸிக்கா²பத³வண்ணனா

294. ஸப⁴த்தோதி நிமந்தனப⁴த்தோதி போராணா.

புரேப⁴த்தஞ்ச பிண்டா³ய, சரித்வா யதி³ பு⁴ஞ்ஜதி;

ஸியா பரம்பராபத்தி, பச்சா²ப⁴த்தம் ந ஸா ஸியா.

பச்சா²ப⁴த்தஞ்ச க³மிகோ, புப்³ப³கே³ஹம் யதி³ க³ச்சே²;

ஏகே ஆபத்தியேவாதி, அனாபத்தீதி ஏகச்சே.

குலந்தரஸ்ஸோக்கமனே, ஆபத்திமதயோ ஹி தே;

ஸமானப⁴த்தபச்சாஸா, இதி ஆஹு இதா⁴பரே.

மதா க³ணிகப⁴த்தேன, ஸமேந்தி நம் நிமந்தனே;

விஸ்ஸஜ்ஜனம் ஸமானந்தி, ஏகே ஸம்முக²தாபரே.

ஸன்னிட்டா²னத்தி²கேஹேவ, விசாரேதப்³ப³பே⁴த³தோ;

விஞ்ஞூ சாரித்தமிச்சேவ, ஸிக்கா²பத³மித³ம் விதூ³தி.

சாரித்தஸிக்கா²பத³வண்ணனா நிட்டி²தா.

7. மஹானாமஸிக்கா²பத³வண்ணனா

310. காலந்தி ஸோ. யஸ்மா ஸங்க⁴பவாரணாயமேவாயம் விதி⁴, தஸ்மா ‘‘ஞாதகானம் பவாரிதான’’ந்தி வுத்தம். ‘‘இமினா ஹி தயா பவாரிதம்ஹ, அம்ஹாகஞ்ச இமினா ச இமினா ச அத்தோ²’’தி யதா²பூ⁴தம் ஆசிக்கி²த்வா விஞ்ஞாபேதும் கி³லானோவ லப⁴தி. யம் பன வுத்தம் பணீதபோ⁴ஜனஸிக்கா²பதே³ ‘‘மஹானாமஸிக்கா²பதே³ன காரேதப்³போ³’’தி, தம் ஸங்க⁴வஸேன பவாரிதம், பே⁴ஸஜ்ஜத்தா²ய ஸப்பிஆதி³பே⁴ஸஜ்ஜபஞ்சகம் விஞ்ஞாபேதி சே, ‘‘ந பே⁴ஸஜ்ஜேன கரணீயேன பே⁴ஸஜ்ஜம் விஞ்ஞாபேதீ’தி வசனேன பாசித்தியந்தி அத்தோ²’’தி (பாசி. 309) லிகி²தம்.

மஹானாமஸிக்கா²பத³வண்ணனா நிட்டி²தா.

8. உய்யுத்தஸேனாஸிக்கா²பத³வண்ணனா

311-5. மம் தி³ட்டே²னாதி மயா தி³ட்டே²ன, மம த³ஸ்ஸனேன வா. ஏகம்பி ஸரஹத்த²ம் புரிஸந்தி அங்க³பரியாபன்னம்.

உய்யுத்தஸேனாஸிக்கா²பத³வண்ணனா நிட்டி²தா.

9. ஸேனாவாஸஸிக்கா²பத³வண்ணனா

319. நவமே ஸேனாபரிக்கே²பேன வா பரிக்கே²பாரஹட்டா²னேன வா ஸஞ்சரணட்டா²னபரியந்தேன வா பரிச்சி²ந்தி³தப்³பா³.

ஸேனாவாஸஸிக்கா²பத³வண்ணனா நிட்டி²தா.

10. உய்யோதி⁴கஸிக்கா²பத³வண்ணனா

324. த³ஸமே ஏகமேகம் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தோ பஸ்ஸதி, ஆபத்தி பாசித்தியஸ்ஸாதிஆதி³. அட்ட²மே பன ஏகமேகம் த³ஸ்ஸனாய க³ச்ச²தி, ஆபத்தி து³க்கடஸ்ஸ. யத்த² டி²தோ பஸ்ஸதி, ஆபத்தி து³க்கடஸ்ஸாதி பாளி. கஸ்மா? அங்க³ப்பமாணாபே⁴தே³பி அனீகவிஸேஸதோ. த³ஸமே பன அட்ட²மங்க³ஸ்ஸ த³ஸ்ஸனேன து³க்கடம் ஸியாதி.

உய்யோதி⁴கஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன அசேலகவக்³கோ³ பஞ்சமோ.