1. முஸாவாத³வக்³கோ³

1. முஸாவாத³ஸிக்கா²பத³வண்ணனா

1. வாத³க்கி²த்தோதி ஏத்த² அவிஸேஸேன வாத³ஜப்பவிதண்ட³ஸங்கா²தோ திவிதோ⁴பி கதா²மக்³கோ³ ‘‘வாதோ³’’ இச்சேவ வுத்தோதி வேதி³தப்³போ³. தேஸு ‘‘தித்தி²யேஹி ஸத்³தி⁴’’ந்தி வசனதோ ட²பேத்வா வாத³ம் ‘‘ஸேஸா’’தி வத³ந்தி. ச²லஜாதினிக்³க³ஹட்டா²னகுஸலதாய கதா³சி கத்த²சி அவஜானித்வா படிஜானாதி, ததா² புப்³பே³ கிஞ்சி வசனம் படிஜானித்வா பச்சா² அவஜானாதி. ஏவம் வா அஞ்ஞதா² வா அஞ்ஞேனஞ்ஞம் படிசரதி. ஏவம் பவத்தோ ஸம்பஜானமுஸா பா⁴ஸம் படிஸ்ஸுணித்வா அஸச்சாயந்தோ ஸங்கேதம் கத்வா விஸம்வாதே³ந்தோ ஏவம் ஸோ வாத³க்கி²த்தோ ஸமானோ பாசித்தியவத்து²ஞ்ச பரிபூரேந்தோ விசரதீதி ஏவமதி⁴ப்பாயோ வேதி³தப்³போ³. அத்தனோ வாதே³தி ஏத்த² ‘‘ஸப்³பே³ த⁴ம்மா அனத்தா’’தி (த⁴. ப. 279; சூளனி. அஜிதமாணவபுச்சா²னித்³தே³ஸ 7; நேத்தி. 5; மஹானி. 27) பட²மமாரத்³தே⁴ அத்தனோ வாதே³. ‘‘யம் து³க்க²ம் தத³னத்தா’’தி (ஸம். நி. 3.15) நோ ஸமயோ. ‘‘ஸப்³பே³ த⁴ம்மா’’தி வுத்தே நிப்³பா³னம்பி ஸங்க³ஹம் க³ச்ச²தி. ‘‘நிப்³பா³னம் பரமம் ஸுக²’’ந்தி (த⁴. ப. 203-204; ம. நி. 2.215) வுத்தத்தா பன தம் ந து³க்க²ம். நோ டா²னமேதம் விஜ்ஜதி. அயம் பரவாதீ³ ‘‘யம் து³க்க²ம் தத³னத்தா’’தி ஸுத்தம் த³ஸ்ஸேத்வா ஸித்³த⁴ந்தம் ஸம்ப⁴மேத்வா ‘‘விரோதி⁴ விருத்³தோ⁴’’தி வுத்தம் தோ³ஸம் ஆரோபேஸ்ஸதீதி தஸ்மிம் பட²மவாதே³ கஞ்சி தோ³ஸம் ஸல்லக்கே²ந்தோ ஆரோபிதே வா தோ³ஸே அனாரோபிதே வா ‘‘நாயம் மம வாதோ³’’தி தம் அவஜானித்வா ‘‘நிப்³பா³னந்த்வேவ ஸஸ்ஸத’’ந்தி, ‘‘அனத்தா இதி நிச்ச²யா’’தி ச ஸுத்தம் தி³ஸ்வா தஸ்ஸ பட²மவாத³ஸ்ஸ நித்³தோ³ஸதம் ஸல்லக்கே²த்வா ‘‘மமேவ அயம் வாதோ³’’தி தமேவ பச்சா² படிஜானாதி. ஏவம் தத்த² யதா²வுத்தமானிஸம்ஸம் ஸல்லக்கே²ந்தோ தம் படிஜானித்வா யதி³ அனத்தா ஸப்³பே³ த⁴ம்மா, த⁴ம்மா ஏவ ந தே ப⁴வந்தி. ஸபா⁴வம் தா⁴ரேந்தீதி ஹி ‘‘த⁴ம்மா’’தி வுச்சந்தி.

அயஞ்ச அத்த-ஸத்³தோ³ ஸபா⁴வவாசீதி ஏவம் ஆரோபிதே வா தோ³ஸே அனாரோபிதே வா தோ³ஸோதி ஸல்லக்கே²த்வா ‘‘நாயம் மம வாதோ³’’தி தமேவ பட²மவாத³ம் பச்சா² அவஜானாதி. அத² ஸோ பரவாதீ³ ஸபக்க²ம் படிஸேதே⁴ படிஜானனத்தாபனயனம். படிஜானாதி பத்யாஸ்ஸ இதி வசனதோ ‘‘படிஞ்ஞா அஞ்ஞா ஸோ நாம தே நிக்³க³ஹோ’’தி வுத்தோ. ஸபா⁴வாதிரித்தம் அத்த²ம் படிஸேதா⁴தி⁴ப்பாயதோ ஸபா⁴வதோ அதிரித்தம் பா³லபரிகப்பிதமத்தானம் ஸந்தா⁴ய ‘‘அனத்தா ஸப்³பே³ த⁴ம்மா’’தி மே படிஞ்ஞாதகதா², ஸா ச தத³வத்தா²யேவாதி ந மே தம் படிஞ்ஞாதத்தாபனயனம் அத்தி², ‘‘நாயம் மம வாதோ³’’தி அவஜானனம் பன ஸபா⁴வஸங்கா²தம் அத்தானம் ஸந்தா⁴ய ‘‘அனத்தா ஸப்³பே³ த⁴ம்மா’’தி ந வதா³மீதி அதி⁴ப்பாயேன கதந்தி இமினா அஞ்ஞேன காரணேன தம் புப்³பே³ படிஞ்ஞாதத்தாபனயனம் காரணம் படிச்சா²தே³தி. ‘‘அனத்தா ஸப்³பே³வ த⁴ம்மா’’தி ந வத்தப்³ப³ம் ‘‘அத்த-ஸத்³த³ஸ்ஸ ஸபா⁴வவாசித்தா’’தி இத³ம் காரணம் படிச்ச தேன புப்³பே³ படிஞ்ஞாதத்தாபனயனம் கதம். தமஞ்ஞகாரணம் பச்சா² த³ஸ்ஸிதேன அஞ்ஞேன காரணேன படிச்சா²தே³தீதி அதி⁴ப்பாயோ.

யஸ்மா ந கேவலம் யதா²த³ஸ்ஸிதனயேன ஸோ அத்த²மேவ அவஜானாதி, படிஜானாதி ச, கிந்து வசனம்பி, தஸ்மா அட்ட²கதா²யம் (பாசி. அட்ட². 1) ‘‘ஜானிதப்³ப³தோ’’தி பட²மம் காரணம் வத்வா பரவாதி³னா ‘‘யதி³ ஜானிதப்³ப³தோ அனிச்சம், நிப்³பா³னம் தே அனிச்சம் ஸியா’’தி வுத்தே ‘‘ந மயா ‘ஜானிதப்³ப³தோ’தி காரணம் வுத்தம், ‘ஜாதித⁴ம்மதோ’தி மயா வுத்தம், தம் தயா ப³தி⁴ரதாய அஞ்ஞேன ஸல்லக்கி²தந்திஆதீ³னி வத³தீதி அதி⁴ப்பாயோ. ‘ஜானிதப்³ப³தோ’தி வத்வா புன ‘ஜாதித⁴ம்மதோ’திஆதீ³னி வத³தீ’’தி வுத்தம். ‘‘அவஜானித்வா புன படிஜானந்தோ தம் அவஜானனம் இமினா படிச்சா²தே³தி நாமா’’தி லிகி²தம்.

2. ஜானித்வா ஜானந்தஸ்ஸ சாதி ஜானித்வா வா ஜானந்தஸ்ஸ வாதி அத்த²த்³வயம் தீ³பேதீதி.

3. அபிச மிச்சா²வாசாபரியாபன்னாதி சதுப்³பி³த⁴மிச்சா²வாசாபரியாபன்னா. ஸீஹளாதி³னாமபே⁴த³க³தாதி கேசி, தஸ்மா ஏவம் வத³தோ வசனம், தம்ஸமுட்டா²பிகா சேதனாதி உப⁴யம் வுத்தந்தி மாதிகாயம் உபி⁴ன்னம் ஸங்க³ஹிதத்தா. விப⁴ங்கே³ தம் வசனம் யஸ்மா வினா விஞ்ஞத்தியா நத்தி², தஸ்மா ‘‘வாசஸிகா விஞ்ஞத்தீ’’தி விஞ்ஞத்தி ச த³ஸ்ஸிதா. ‘‘ஏவம் வத³தோ வசன’’ந்தி லோகவோஹாரேன வத்வா பரமத்த²தோ த³ஸ்ஸேந்தோ ‘‘தம்ஸமுட்டா²பிகா வா சேதனாதி வுத்த’’ந்தி ச வத³தி. ஓளாரிகேனேவாதி சேதனாஸமுட்டா²னவாசானம் ஸுகு²மத்தா விஸயவஸேனேவ கதாதி.

9. தி³ட்ட²ஸ்ஸ ஹோதீதி தி³ட்டோ² அஸ்ஸ, அனேன வா உபசாரஜ்ஜா²னவஸேன ந மயா அப்³யாவடோ மதோ, ‘‘ந மயா பவந்தோ படோ தி³ட்டோ²’’திஆதி³ம் ப⁴ணந்தஸ்ஸ ச பரமத்த²ஸுஞ்ஞதம் உபாதா³ய ஏவ ‘‘இத்தி²ம் ந பஸ்ஸாமி, ந ச புரிஸ’’ந்தி ப⁴ணந்தஸ்ஸ ச ந முஸாவாதோ³.

11. ஆபத்திம் ஆபஜ்ஜதியேவாதி ஏத்த² ‘‘து³ப்³பா⁴ஸிதாபத்தீ’’தி வத³ந்தி. கஸ்மா? ‘‘கேளிம் குருமானோ’’தி வுத்தத்தா. ‘‘வாசா கி³ரா…பே… வாசஸிகா விஞ்ஞத்தீ’’தி உஜுகம் ஸந்தா⁴ய, காயோ ந உஜுகோ.

முஸாவாத³ஸிக்கா²பத³வண்ணனா நிட்டி²தா.

2. ஓமஸவாத³ஸிக்கா²பத³வண்ணனா

13. ‘‘புன அரே பத்தேதி புன தம் டா²னம் பரிவட்டேத்வா ஆக³தே அஞ்ஞஸ்மிம் அரே’’தி லிகி²தம். பதிட்டி²தாரப்பதே³ஸந்தி பூ⁴மிம். புன அரேதி புன தஸ்மிம்யேவ அரே பூ⁴மிம் பத்தேதி அத்தோ²தி கேசி, தம் ந ஸுந்த³ரம் விய. ஜாபிதோதி பராஜிதோ, ‘‘பராஜிதோ’’தி வா பாடோ². பாபேஸீதி அபி⁴ப⁴வஸி. மனாபம் பா⁴ஸமானஸ்ஸ ப்³ராஹ்மணஸ்ஸ க³ரும் பா⁴ரம். உத³ப்³ப³ஹீதி ஆகட்³டீ⁴தி அத்தோ², அனாத³ரத்தே² வா ஸாமிவசனம். த⁴னஞ்ச நம் அலாபே⁴ஸீதி யதா² ஸோ த⁴னம் அலபி⁴, ததா² அகாஸீதி அதி⁴ப்பாயோ.

15. புப்³பே³தி நிதா³னே. அவகண்ணகந்தி சி²ன்னகண்ணகனாமம். ஜவகண்ணகந்தி வங்ககண்ணகனாமம். த⁴னிட்ட²கம் த⁴னவட்³ட⁴கனாமம், ஸிரிவட்³ட⁴கனாமம் குலவட்³ட⁴கஸ்ஸேவ நாமம். தச்ச²ககம்மந்தி க²ணனகம்மகாரா கோட்ட²கா, பாஸாணகம்மகாராதி கேசி. ‘‘முத்³தா³தி பப்³ப³க³ணனா. க³ணனாதி மஹாக³ணனா’’தி போராணக³ண்டி²பதே³ வுத்தம். ‘‘மது⁴மேஹம் ஓமேஹ’’ந்தி லிகி²தம். தூ²லகாயஸ்ஸ மம்ஸூபசயோதி ஏகே. யப⁴ மேது²னே. வீதராக³தாதீ³ஹி அக்கோஸந்தோபி கிலேஸேஹேவ கிர அக்கோஸதி நாம, ததா² ‘‘ஸோதாபன்னோ’’தி அக்கோஸந்தோ ஆபத்தியா அக்கோஸதி நாமாதி ஏகே. லிங்கா³யத்தத்தா அச்சோதா³தாதி³பி லிங்க³மேவ ஜாதம்.

16. ஸப்³ப³த்த² வதே³தீதி உத்³தே³ஸோ. ப⁴ணதீதி வித்தா²ரோ. வதே³தீதி வா இமினா பரவிஞ்ஞாபனம் தீ³பேதி.

26. அஞ்ஞாபதே³ஸவாரேஸு பன ‘‘ஏவம் வதே³தீ’’தி வுத்தம். கஸ்மா? புப்³பே³ த³ஸ்ஸிதஉத்³தே³ஸக்கமனித³ஸ்ஸனத்த²ம். புப்³பே³பி ‘‘ஹீனேன ஹீனம், ஹீனேன உக்கட்ட²ம், உக்கட்டே²ன ஹீனம், உக்கட்டே²ன உக்கட்ட²’’ந்தி ஜாத்யாதீ³ஸு ஏகேகஸ்மிம் சதுதா⁴ சதுதா⁴ த³ஸ்ஸிதஉத்³தே³ஸக்கமஸ்ஸ நித³ஸ்ஸனம் ‘‘ஏவ’’ந்தி இமினா கரோதி. ‘‘ஹீனேன ஹீனம் வதே³தீ’’தி வுத்தட்டா²னேயேவ ஹி ‘‘ஏவம் வதே³தீ’’தி வுத்தே ஸோ ஆகாரோ நித³ஸ்ஸிதோ ஹோதீதி அதி⁴ப்பாயோ. அஞ்ஞதா² அஞ்ஞாபதே³ஸேன ஸோ ஆகாரோ ந ஸம்ப⁴வதீதி ஆபஜ்ஜதி. ந ஸம்ப⁴வதி ஏவாதி சே? ந, விஸேஸகாரணாபா⁴வா, தத்த² அனாபத்திப்பஸங்க³தோ, அனியமனித்³தே³ஸேன அனியமத்த²ஸம்ப⁴வதோ ச. ‘‘ஸந்தி இதே⁴கச்சே சண்டா³லா’’திஆதி³னா ஹி அனியமனித்³தே³ஸேன சண்டா³லம் வா அசண்டா³லம் வா ஸந்தா⁴ய ப⁴ணந்தஸ்ஸ ஆபத்தீதி அனியமத்தோ² ஸம்ப⁴வதீதி அதி⁴ப்பாயோ. யதி³ ஏவம் ஏத்தகமேவ வத்தப்³ப³ம் தாவதா புப்³பே³ த³ஸ்ஸிதஉத்³தே³ஸக்கமனித³ஸ்ஸனஸித்³தி⁴தோதி? ந, ‘‘வதே³தீ’’தி இமினா அயோஜிதே ‘‘ஏவ’’ந்தி பதே³ இமம் நாம ஆகாரம் த³ஸ்ஸேதீதி அனவபோ³த⁴தோ. அஞ்ஞாபதே³ஸனயேபி பரவிஞ்ஞாபனேயேவ து³க்கடபாசித்தியம் வியாதி நியமனபயோஜனம் வா ‘‘வதே³தீ’’தி பத³ந்தி வேதி³தப்³ப³ம். அத² வா அத்தனோ ஸமீபே ட²த்வா அஞ்ஞம் பி⁴க்கு²ம் ஆணாபேந்தோ ஹீனேன ஹீனம் வதே³தி ப⁴ணதி, ஆபத்தி பாசித்தியஸ்ஸ. ஸசே ஸயம் ஹீனோ ஹீனேன ஹீனம் சண்டா³லம்…பே… புக்குஸம் ‘‘புக்குஸோ’’தி ப⁴ணதி ஆபத்தி வாசாய வாசாய பாசித்தியஸ்ஸ, ஏஸ நயோ அஞ்ஞாபதே³ஸவாரேஸுபீதி யோஜனா வேதி³தப்³பா³. அயமத்தோ² து³ட்ட²தோ³ஸேஸு பரியேஸிதப்³போ³. அஞ்ஞதா² ‘‘வதே³தி ப⁴ணதீ’’தி ஏதேஸம் அஞ்ஞதரம் உப⁴யத்த² அனஞ்ஞாபதே³ஸவாரஅஞ்ஞாபதே³ஸவாரேஸு, விஸேஸேன வா அஞ்ஞாபதே³ஸவாரேஸு நிரத்த²கம் ஆபஜ்ஜதி வினாயேவ தேன வசனஸிலிட்ட²தாஸம்ப⁴வதோ. அத்ததோ பாளியம் அவுத்தத்தா பனேத்த² ‘‘ஸாணத்திக’’ந்தி வுத்தந்தி வேதி³தப்³ப³ம். தத்ராயம் பத³ஸந்தி⁴ வதே³தீதி வத³ இதீதி. அஸம்முகா² வத³ந்தஸ்ஸ து³க்கடம் ‘‘ஸம்முகா² பன ஸத்தஹிபி ஆபத்திக்க²ந்தே⁴ஹி வத³ந்தஸ்ஸ து³க்கட’’ந்தி அந்த⁴கட்ட²கதா²யம் வுத்தத்தா. த³வகம்யதா நாம கேளி, தம் த³ஸ்ஸேதும் ‘‘ஹஸாதி⁴ப்பாயதா’’தி வுத்தம். ‘‘அஸம்முகா²பி த³வகம்யதாய வத³ந்தஸ்ஸ து³ப்³பா⁴ஸிதமேவா’’தி ஆசரியா வத³ந்தி. பாபக³ரஹிதாய குஜ்ஜி²த்வாபி வத³ந்தஸ்ஸ து³க்கடம், அஸம்முகா² அனாபத்தீதி.

ஓமஸவாத³ஸிக்கா²பத³வண்ணனா நிட்டி²தா.

3. பேஸுஞ்ஞஸிக்கா²பத³வண்ணனா

36-7. ‘‘இமஸ்ஸ ஸுத்வா அமுஸ்ஸா’’தி பாடோ². ‘‘இமேஸம் ஸுத்வா’’தி ந ஸுந்த³ரம். பே⁴தா³யபீதி பே⁴தா³ய. திண்ணம்பி பி⁴க்கு²பா⁴வதோயேவ நிபஜ்ஜனதோ ‘‘பி⁴க்கூ²னம் பேஸுஞ்ஞே’’தி ப³ஹுவசனம் கதம்.

38-9. ‘‘இத்த²ன்னாமோ ஆயஸ்மா சண்டா³லோ…பே… புக்குஸோதி ப⁴ணதீ’’தி வத்வா பேஸுஞ்ஞம் உபஸம்ஹரதீதி யோஜனா. அஞ்ஞதா² ‘‘புக்குஸோதி ப⁴ணதீ’’தி வத்தப்³ப³தா ஆபஜ்ஜதி. ஏத்த² அனுபஸம்பன்னவாரோ லப்³ப⁴மானோபி ந உத்³த⁴டோ ஓமஸவாதே³ த³ஸ்ஸிதனயத்தா, ஸங்கே²பதோ அந்தே த³ஸ்ஸேதுகாமதாய வா. ததா² ஹி அந்தே தீணி து³க்கடானி த³ஸ்ஸிதானி. தானி பன த³ஸ்ஸேந்தோ ப⁴க³வா யஸ்மா ‘‘உபஸம்பன்னஸ்ஸ ஸுத்வா உபஸம்பன்னஸ்ஸ பேஸுஞ்ஞம் உபஸம்ஹரதீ’’தி வுத்தானம் த்³வின்னம் பதா³னம் அஞ்ஞதரவிபல்லாஸவஸேன வா உப⁴யவிபல்லாஸவஸேன வா பாசித்தியந்தி கத்வா த்³வேபி தானி ஏகதோ வுத்தானீதி த³ஸ்ஸேதுகாமோ, தஸ்மா ஸப்³ப³பட²மம்யேவ ‘‘உபஸம்பன்னோ உபஸம்பன்னஸ்ஸ ஸுத்வா உபஸம்பன்னஸ்ஸ பேஸுஞ்ஞம் உபஸம்ஹரதி, ஆபத்தி பாசித்தியஸ்ஸா’’தி ஆஹ. ‘‘த்³வீஸு பனேதேஸு யஸ்மா பாராஜிகம் அஜ்ஜா²பன்னோபி உபஸம்பன்னோ தாதி³ஸம்யேவ உபஸம்பன்னம் கு²ம்ஸேதுகாமோ ஓமஸதி, தாதி³ஸஸ்ஸ ஸுத்வா தாதி³ஸஸ்ஸ பேஸுஞ்ஞம் உபஸம்ஹரதி, ஆபத்தி பாசித்தியஸ்ஸ, தஸ்மா ‘உபஸம்பன்னோ’தி இத³ம் ஆதி³பத³ம் ஸப்³ப³த்த² வுத்த’’ந்தி கேசி வத³ந்தி, தம் ந யுத்தம், அனவஸேஸஆபத்திம் ஆபன்னஸ்ஸ புன ஆபத்தியா அஸம்ப⁴வதோ, தஸ்மா கேவலம் மாதிகாயம் பி⁴க்கு²பதா³பா⁴வதோயேவ ‘‘ப⁴ணதி உபஸம்ஹரதீ’’தி பதா³னம் காரகனித்³தே³ஸாபா⁴வே அஸம்ப⁴வதோ ஏவ தம் ஆதி³பத³ம் வுத்தந்தி வேதி³தப்³ப³ம். இத³ம் பாளிலேஸாபா⁴வதோ அனாணத்திகமேவ. ‘‘ந பியகம்யஸ்ஸ, ந பே⁴தா³தி⁴ப்பாயஸ்ஸா’’தி உபஸம்ஹரணாபேக்க²ம் ஸாமிவசனம் துண்ஹீபூ⁴தஸ்ஸ வசனப்பயோஜனாபா⁴வதோ, தேன வுத்தம் ‘‘பாபக³ரஹிதாய ப⁴ணந்தஸ்ஸ அனாபத்தீ’’தி.

பேஸுஞ்ஞஸிக்கா²பத³வண்ணனா நிட்டி²தா.

4. பத³ஸோத⁴ம்மஸிக்கா²பத³வண்ணனா

45-6. ஸப்³ப³மேதம் பத³ஸோ த⁴ம்மோ நாமாதி ஏத்த² த⁴ம்மோ நாம பு³த்³த⁴பா⁴ஸிதோதி ஏவம் ஸம்ப³ந்தோ⁴. அக்க²ரஸமூஹோதி அஸமத்தபதே³. பச்சேகபு³த்³த⁴பா⁴ஸிதம் பு³த்³த⁴பா⁴ஸிதே ஏவ. அனுபாஸகக³ஹட்டே²ஹி பா⁴ஸிதோ இஸிபா⁴ஸிதாதி³ஸங்க³ஹம் க³ச்ச²தீதி வேதி³தப்³ப³ம். கத்த²சி போத்த²கே ‘‘தே³வதாபா⁴ஸிதோ’’தி பத³ம் நத்தி², யத்த² அத்தி², ஸா பாளி. கா³தா²ப³ந்தே⁴பி ச ஏஸ நயோதி ஏகமேவ அக்க²ரம் வத்வா டா²னம் லப்³ப⁴தி ஏவ. ‘‘ஏவம் மே ஸுத’’ந்திஆதி³ஸுத்தம் ப⁴ணாபியமானோ ஏகாரம் வத்வா திட்ட²தி சே, அன்வக்க²ரேன பாசித்தியம், அபரிபுண்ணபத³ம் வத்வா டி²தே அனுப்³யஞ்ஜனேன. பதே³ஸு ஏகம் பட²மபத³ம் விருஜ்ஜ²தி சே, அனுபதே³ன பாசித்தியம். அட்ட²கதா²னிஸ்ஸிதோதி அட்ட²கதா²னிஸ்ஸிதவஸேன டி²தோ. புப்³பே³ பகதிபா⁴ஸாய வுத்தம் அட்ட²கத²ம் ஸந்தா⁴ய. பாளினிஸ்ஸிதோதி பாளியம் ஏவாக³தோ. மக்³க³கதா²தீ³னிபி பகரணானி.

48. உபசாரந்தி த்³வாத³ஸஹத்த²ம். ‘‘ஓபாதேதீதி ஏகதோ ப⁴ணதி ஸமாக³ச்ச²தீ’’தி லிகி²தம். கிஞ்சாபி அபலாலத³மனம்பி ஸீலுபதே³ஸோபி ப⁴க³வதோ காலே உப்பன்னோ, அத² கோ² தேஸு யம் யம் பு³த்³த⁴வசனதோ ஆஹரித்வா வுத்தம், தம் ததே³வ ஆபத்திவத்து² ஹோதீதி விஞ்ஞாபனத்த²ம் மஹாஅட்ட²கதா²யம் ‘‘வத³ந்தீ’’தி வசனேஹி ஸிதி²லம் கதம். பு³த்³த⁴வசனதோ ஆஹரித்வா வுத்தஸ்ஸ ப³ஹுலதாய தப்³ப³ஹுலனயேன தேஸு ஆபத்தி வுத்தா, தஸ்மா மஹாபச்சரியம் தஸ்ஸாதி⁴ப்பாயோ பகாஸிதோதி அத்தோ². ‘‘ஸப்³பே³ஸமேவ வசனந்தி அபரே’’தி வுத்தம். ஸசே ஆசரியோ டி²தோ நிஸின்னானம் பாட²ம் தே³தி, ‘‘ந டி²தோ நிஸின்னஸ்ஸ த⁴ம்மம் தே³ஸேஸ்ஸாமீ’’தி வுத்தாபத்திம் நாபஜ்ஜதீதி ஏகே. தேஸம்பி பாட²தா³னம் த⁴ம்மதே³ஸனதோ ந அஞ்ஞந்தி தம் ந யுத்தம், ச²த்தபாணிகாதீ³னம் பாட²தா³னேன அனாபத்திப்பஸங்க³தோ, ஆபத்திபா⁴வோ ச ஸித்³தோ⁴. வுத்தஞ்ஹேதம் –

‘‘உபோ⁴ அத்த²ம் ந ஜானந்தி, உபோ⁴ த⁴ம்மம் ந பஸ்ஸரே;

யோ சாயம் மந்தம் வாசேதி, யோ சாத⁴ம்மேனதீ⁴யதீ’’தி. (பாசி. 647);

ஏத்த² அதீ⁴யதீதி அத்தோ², தஸ்மா பாட²தா³னம்பி த⁴ம்மதே³ஸனாவ. ஸேகி²யட்ட²கதா²யம் (பாசி. அட்ட². 634) ‘‘த⁴ம்மபரிச்சே²தோ³ பனேத்த² பத³ஸோத⁴ம்மே வுத்தனயேன வேதி³தப்³போ³’’தி வுத்தம், தஸ்மா அயமேவ த⁴ம்மோ ஸப்³ப³த்த² த⁴ம்மபடிஸம்யுத்தஸிக்கா²பதே³ஸு வேதி³தப்³போ³. யதி³ ஏவம் ஸங்கா²ரபா⁴ஸாதி³வஸேன சித்தத⁴ம்மம் தே³ஸேந்தஸ்ஸ ஸேகி²யவஸேன அனாபத்தி ஸியா, ததோ ச²பகஜாதகவிரோதோ⁴. தத்த² மந்தானம் பா³ஹிரக³ந்த²த்தாதி சே? ந, தத³தி⁴ப்பாயாஜானனதோ. அயஞ்ஹி தத்த² அதி⁴ப்பாயோ ‘‘பா³ஹிரகக³ந்த²ஸங்கா²தம்பி மந்தம் உச்சே ஆஸனே நிஸின்னஸ்ஸ வாசேதும் மே பி⁴க்க²வே அமனாபம், பகே³வ த⁴ம்மம் தே³ஸேது’’ந்தி. ‘‘ததா³பி மே, பி⁴க்க²வே, அமனாபம் நீசே ஆஸனே நிஸீதி³த்வா உச்சே ஆஸனே நிஸின்னஸ்ஸ மந்தம் வாசேதும், கிமங்க³ம் பன ஏதரஹி…பே… த⁴ம்மம் தே³ஸேது’’ந்தி (பாசி. 647) ஹி அயம் பாளி யதா²வுத்தமேவ அதி⁴ப்பாயம் தீ³பேதி, ந அஞ்ஞம். தேனேவ ‘‘மந்தம் வாசேதும் த⁴ம்மம் தே³ஸேது’’ந்தி வசனபே⁴தோ³ கதோ. அஞ்ஞதா² உப⁴யத்த² ‘‘த⁴ம்மம் தே³ஸேது’’மிச்சேவ வத்தப்³ப³ந்தி.

மயா ஸத்³தி⁴ம் மா வதா³திஆதி³ம்ஹி பன அனுக³ண்டி²பதே³ ஏவம் வுத்தோ ‘‘ஸசே பி⁴க்கு² ஸாமணேரேன ஸத்³தி⁴ம் வத்துகாமோ, ததா² ஸாமணேரோபி பி⁴க்கு²னா ஸத்³தி⁴ம் வத்துகாமோ ஸஹஸா ஓபாதேதி, ‘யேபு⁴ய்யேன பகு³ணம் க³ந்த²ம் ப⁴ணந்தம் ஓபாதேதீ’’திஆதீ³ஸு விய அனாபத்தி, ந ஹி ஏத்தாவதா பி⁴க்கு² ஸாமணேரஸ்ஸ உத்³தி³ஸதி நாம ஹோதி. யஸ்மா மஹாஅட்ட²கதா²யம் நத்தி², தஸ்மாபி யுத்தமேவேதம். ஸசே தத்த² விசாரேத்வா படிக்கி²த்தம் ஸியா ஆபத்தி, கிரியாகிரியஞ்ச நாபஜ்ஜதி. கஸ்மா? யஸ்மா சித்தேன ஏகதோ வத்துகாமோ, அத² கோ² நம் ‘ஏகதோ மா வதா³’தி படிக்கி²பித்வாபி ஏகதோ வத³ந்தோ ஆபஜ்ஜதி. அவத்துகாமஸ்ஸ ஸஹஸா விரஜ்ஜி²த்வா ஏகதோ வத³ந்தஸ்ஸ அனாபத்தி, தேன வுத்தம் ‘மயா ஸத்³தி⁴ம் மா வதா³தி வுத்தோ யதி³ வத³தி, அனாபத்தீ’தி. ததா²பி ஆசரியானம் மதிமனுவத்தந்தேன ஏவரூபேஸு டா²னேஸு யதா²வுத்தனயேனேவ படிபஜ்ஜிதப்³ப³ம். கஸ்மா? யஸ்மா மஹாஅட்ட²கதா²யம் நத்தி², நத்தி²பா⁴வதோயேவ ஆபத்தி. ஸசே தத்த² அனாபத்திஅவசனம் ந ஸம்ப⁴வதி அயமட்டா²னத்தா’’தி.

தத்ராயம் விசாரணா – ‘‘மயா ஸத்³தி⁴ம் மா வதா³’’தி வுத்தோ யதி³ வத³தி, பி⁴க்கு²னோ அனாபத்தீதி யுத்தமேதம் பி⁴க்கு²னோ வத்துகாமதாயாபா⁴வதோ, பா⁴வேபி ஸஜ்ஜா²யகரணாதீ³ஸு தீஸு அனாபத்திதோ ச. அத² ஸாமணேரேன ப்³யத்ததாய ‘‘மயா ஸத்³தி⁴ம் மா வதா³’’தி வுத்தோ பி⁴க்கு² அப்³யத்ததாய வத³தி, ஆபத்தி ஏவ வத்துகாமதாஸப்³பா⁴வதோ. ஸஹஸா சே வத³தி, அனாபத்தி தத³பா⁴வதோ. ஸசே பி⁴க்கு² ஏவம் ‘‘மயா ஸத்³தி⁴ம் மா வதா³’’தி வத்வா தேன ஸத்³தி⁴ம் ஸயம் வத³தி, ஆபத்தி ஏவ. ந ஹி ஏதம் ஸிக்கா²பத³ம் கிரியாகிரியம். யதி³ ஏதம் ஸிக்கா²பத³ம் கிரியாகிரியம் ப⁴வேய்ய, யுத்தம். தத்த² அனாபத்தீதி அதி⁴ப்பாயோ. மஹாபச்சரியம் இமினாவ அதி⁴ப்பாயேன ‘‘மயா ஸத்³தி⁴ம் மா வதா³’’தி வுத்தம் ஸியா. ந ஹி ஸாமணேரஸ்ஸ கிரியா இத⁴ பமாணந்தி, இமஸ்மிம் பன அதி⁴ப்பாயே வுத்தே அதியுத்தம்வாதி அத்தோ². அக்க²ரத்தோ² ப்³யஞ்ஜனத்தோ². கிஞ்சாபி ‘‘யஞ்ச பத³ம் யஞ்ச அனுபத³ம் யஞ்ச அன்வக்க²ரம் யஞ்ச அனுப்³யஞ்ஜனம், ஸப்³ப³மேதம் பத³ஸோத⁴ம்மோ நாமா’’தி வுத்தம், ததா²பி ‘‘பதே³ன வாசேதி, பதே³ பதே³ ஆபத்தி பாசித்தியஸ்ஸ, அக்க²ராய வாசேதி, அக்க²ரக்க²ராய ஆபத்தி பாசித்தியஸ்ஸா’’தி இத³மேவ த்³வயம் யோஜிதம், தம் கஸ்மாதி சே? பதே³ன அனுபத³அனுப்³யஞ்ஜனானம் ஸங்க³ஹிதத்தா. வுத்தஞ்ஹேதம் ‘‘அனுபத³ந்தி து³தியபாதோ³. அனுப்³யஞ்ஜனந்தி புரிமப்³யஞ்ஜனேன ஸதி³ஸம் பச்சா²ப்³யஞ்ஜன’’ந்தி (பாசி. அட்ட². 45), தஸ்மா அனுபதே³கதே³ஸமத்தமேவ அனுப்³யஞ்ஜனந்தி ஸித்³த⁴ம். ‘‘அக்க²ரானுப்³யஞ்ஜனஸமூஹோ பத³’’ந்தி ச வுத்தத்தா பத³மத்தமேவ வத்தப்³ப³ம் தேன அனுபதா³தி³த்தயக்³க³ஹணதோதி சே? ந வத்தப்³ப³ம் வசனவிஸேஸதோ. பதே³ன வாசேந்தோ ஹி பதே³ வா அனுபதே³ வா அனுப்³யஞ்ஜனே வா ஆபத்திம் ஆபஜ்ஜதி. ந அக்க²ரேன. அக்க²ரேன வாசேந்தோ பன பதா³தீ³ஸு அஞ்ஞதரஸ்மிம் ஆபஜ்ஜதி. ந ஹி ‘‘வரோ வரஞ்ஞூ வரதோ³ வராஹரோ’’திஆதி³ம்ஹி பட²மம் வ-காரம் வாசேந்தோ து³தியாதி³வ-காரே ஓபாதேதி, பட²மம் ரோ-காரம் வாசேந்தோ து³தியரோ-காரே ஓபாதேதி, பட²மம் ர-காரம் வாசேந்தோ து³தியர-காரே ஓபாதேதி, ஆபத்தி பாசித்தியஸ்ஸாதி ஸம்ப⁴வதி. அனுப்³யஞ்ஜனானுலோமதோ ஸம்ப⁴வதி ஏவாதி சே? ந, ‘‘பதே³ பதே³ ஆபத்தி பாசித்தியஸ்ஸா’’தி இமினா விருத்³த⁴த்தா. இத³ஞ்ஹி வசனம் ஏகஸ்மிம் பதே³ ஏகா ஆபத்தீதி தீ³பேதி. ‘‘ரூபம் அனிச்சந்தி வுச்சமானோ ரூதி ஓபாதேதீ’’தி வசனதோ ஸகலம் பாத³ம் வாசேந்தஸ்ஸ பட²மஅக்க²ரமத்தே ஏகதோ வுத்தே ஆபத்தீதி ஸித்³த⁴ந்தி சே? ந, ‘‘அக்க²ரக்க²ராய ஆபத்தி பாசித்தியஸ்ஸா’’தி இமினா விருத்³த⁴த்தா, தஸ்மா ரூதி ஓபாதேதீதி வத்தும் அஸம்ப⁴வதோ ரூ-காரஸ்ஸ யதா²வுத்தத⁴ம்மபரியாபன்னபா⁴வஸித்³தி⁴தோ தம் அவத்வா கேவலம் அக்க²ராய வாசேந்தஸ்ஸ யதா²வுத்தத⁴ம்மபரியாபன்னஅக்க²ரபா⁴வத³ஸ்ஸனத்த²ம் ‘‘ரூபம் அனிச்சந்தி வுச்சமானோ’’தி வுத்தம், வசனஸிலிட்ட²தாவஸேன வா அனுப்³யஞ்ஜனே வேத³னாவசனம் வியாதி வேதி³தப்³ப³ம்.

பத³ஸோத⁴ம்மஸிக்கா²பத³வண்ணனா நிட்டி²தா.

5. பட²மஸஹஸேய்யஸிக்கா²பத³வண்ணனா

50. ‘‘ந ஸஹஸேய்யம் கப்பேதப்³ப³’’ந்தி பா⁴வவஸேன வுத்தம், கேஸுசி ‘‘ந ஸஹஸேய்யா கப்பேதப்³பா³’’தி பாடோ², ந கப்பேதப்³பா³ பி⁴க்கு²னாதி பஞ்ஞத்தந்தி அதி⁴ப்பாயோ. ‘‘அபஸ்ஸேனம் வாதி வாயிமமஞ்சகமேவ ஹோதீ’’தி லிகி²தம். யம் ஏதேஸம் ந கப்பதி, தம் தேஸம்பீதி உபஜ்ஜா²யாதீ³னம் ஸந்திகம் அக³ந்த்வா ஸஹஸேய்யம் கப்பேய்யாதி பாட²ஸேஸோ.

52. ‘‘அனுபஸம்பன்னோ நாம பி⁴க்கு²ம் ட²பேத்வா அவஸேஸோ’தி வுத்தத்தா மாதுகா³மோ அனுபஸம்பன்னோதி சதுத்த²ரத்தியம் மாதுகா³மோ த்³வேபி ஸஹஸேய்யாபத்தியோ ஜனேதீதி அபரே’’தி வுத்தம், ‘‘பி⁴க்கு²ம் ட²பேத்வா…பே… பன்னோதி பாராஜிகவத்து²பூ⁴தோ திரச்சா²னபுரிஸோ அதி⁴ப்பேதோ’’தி ச, உப⁴யம்பி வீமம்ஸிதப்³ப³ம். து³தியஸிக்கா²பதே³ மாதுகா³மோ நாமாதி மனுஸ்ஸித்தி²ம்யேவ க³ஹேத்வா யக்கீ² பேதீ திரச்சா²னக³தா பாராஜிகவத்து²பூ⁴தா ந க³ஹிதா தேஸு து³க்கடத்தா. ‘‘ஸசே பன அத்தனோபி ஸிக்கா²பதே³ து³க்கடம் ப⁴வேய்ய, அத² கஸ்மா பட²மஸிக்கா²பதே³ பாசித்திய’’ந்தி ச வுத்தம். ‘‘அபரிக்கி²த்தே பமுகே² அனாபத்தீ’’தி ஸீஹளட்ட²கதா²வசனம், தஸ்ஸத்த²ம் தீ³பேதும் அந்த⁴கட்ட²கதா²யம் ‘‘பூ⁴மியம் வினா ஜக³தியா பமுக²ம் ஸந்தா⁴ய கதி²த’’ந்தி வுத்தம். புன வஸதீதி சதுத்த²தி³வஸே வஸதி. பி⁴க்கு²னிபன்னேதி பி⁴க்கு²ம்ஹி நிபன்னே. ஸன்னிபதிதமண்ட³பம் நாம மஹாவிஹாரே ஸன்னிபாதட்டா²னம். ‘‘தீணி ச தி³வஸானி து³க்கடகே²த்தே வஸித்வா சதுத்தே² தி³வஸே ஸஹஸேய்யாபத்திபஹோனகே ஸயதி, பாசித்தியேவா’’தி ஏகச்சே வத³ந்தி கிர, தம் ந யுத்தம்.

பட²மஸஹஸேய்யஸிக்கா²பத³வண்ணனா நிட்டி²தா.

6. து³தியஸஹஸேய்யஸிக்கா²பத³வண்ணனா

55. ‘‘அத² கோ² தே மனுஸ்ஸா’’தி ச ‘‘தே அத்³தி⁴கா’’தி ச பாடோ². ‘‘ஏகரத்த’’ந்திபி அத்தி², ஸோ ந ஸுந்த³ரோ. பண்ட³கே பாளியம் து³க்கடஸ்ஸ வுத்தத்தா ‘‘உப⁴தோப்³யஞ்ஜனேஹி மூலாபத்தீதி தி³ஸ்ஸதீ’’தி, ‘‘அனிமித்தாத³யோ இத்தி²யோவா’’தி ச வத³ந்தி உப⁴தோப்³யஞ்ஜனகே வுத்தம் விய. கிஞ்சாபி மதித்தீ² பாராஜிகவத்து² ஹோதி, அனுபாதி³ன்னபக்கே² டி²தத்தா பன இத⁴ ஆபத்திம் ந கரோதி. பாராஜிகாபத்திட்டா²னஞ்சேத்த² ந ஓலோகேதப்³ப³ம்.

து³தியஸஹஸேய்யஸிக்கா²பத³வண்ணனா நிட்டி²தா.

7. த⁴ம்மதே³ஸனாஸிக்கா²பத³வண்ணனா

66. ‘‘விஞ்ஞூ படிப³லா’’தி வசனதோ அவிஞ்ஞூ இத்தி²யாபி தே³ஸேந்தஸ்ஸ அனாபத்தி. இத⁴ யக்கீ²ஆத³யோ மனுஸ்ஸித்தீ² விய அனோளாரிகத்தா து³க்கடவத்து²கா ஜாதா. திரச்சா²னக³தமனுஸ்ஸவிக்³க³ஹித்தி²யா படிப³லதாய வுத்தத்தா இதராபி து³க்கடவத்து²யேவாதி ஏகே. ‘‘மாதுகா³மாயா’’தி லிங்க³விபல்லாஸேன வுத்தம். ‘‘அட்ட²கதா²தி³பாட²ம் ட²பேத்வா த³மிளாதி³னா யதா²ருசி கதே²தும் லப⁴தி கிரா’’தி லிகி²தம், யதா² யக்கீ²ஆத³யோ து³க்கடவத்து²கா ஜாதா, ததா² புரிஸவிக்³க³ஹம் க³ஹேத்வா டி²தேன யக்கா²தி³னா ஸத்³தி⁴ம் டி²தஸ்ஸ மாதுகா³மஸ்ஸ த⁴ம்மம் தே³ஸேந்தோ து³க்கடம் அனாபஜ்ஜித்வா கஸ்மா பாசித்தியமாபஜ்ஜதீதி சே? ஈஸகம்பி து³தியபக்க²ம் அப⁴ஜனதோ. மனுஸ்ஸமாதுகா³மோபி ந து³தியோ, பகே³வ யக்கா²த³யோதி. ந து³தியானியதே தஸ்ஸ து³தியத்தாதி சே? ந தத்த² து³ட்டு²ல்லவாசாபேக்கா² து³தியதா, கிந்து நிஸஜ்ஜாபேக்கா², இத⁴ ச ந நிஸஜ்ஜமத்தம், கிந்து தே³ஸனா இதா⁴தி⁴ப்பேதா. ஸா ச நிபஜ்ஜனதோ ஓளாரிகா, தஸ்மா அஸமத்த²னித³ஸ்ஸனம்.

த⁴ம்மதே³ஸனாஸிக்கா²பத³வண்ணனா நிட்டி²தா.

8. பூ⁴தாரோசனஸிக்கா²பத³வண்ணனா

67. ‘‘சதுத்த²பாராஜிகவத்து² ச இத³ஞ்ச ஏகமேவா’’தி வுத்தம், ந யுத்தம். கஸ்மா? தத்த² ‘‘மோக⁴புரிஸா’’தி வுத்தத்தா. தே அரியமிஸ்ஸகா ந ஹோந்தீதி த்³வேபி ஏகஸதி³ஸானீதி மம தக்கோ. ‘‘அரியாபி படிஜானிம்ஸு, தேஸம்பி அப்³ப⁴ந்தரே விஜ்ஜமானத்தா உத்தரிமனுஸ்ஸத⁴ம்மஸ்ஸா’’தி லிகி²தம். ‘‘ஸப்³பே³பி பூ⁴தம் ப⁴க³வாதி புது²ஜ்ஜனஅரியானம் உத்தரிமனுஸ்ஸத⁴ம்மஸ்ஸ ஆரோசிதத்தா ‘பூ⁴த’ந்தி வுத்தம், ந அத்தனோ உத்தரிமனுஸ்ஸத⁴ம்மம் ஸந்தா⁴யாதி அபரே’’தி வுத்தம்.

77. புப்³பே³ அவுத்தேஹீதி சதுத்த²பாராஜிகே அவுத்தேஹீதி.

பூ⁴தாரோசனஸிக்கா²பத³வண்ணனா நிட்டி²தா.

9. து³ட்டு²ல்லாரோசனஸிக்கா²பத³வண்ணனா

78-80. ‘‘தேனேவ ஹத்தே²ன உபக்கமித்வா அஸுசிம் மோசேஸீ’’தி பாடோ² ஸம்பதிபாடோ² ஸுந்த³ரோ. அபலோகேத்வாவ காதப்³பா³. நோ சே, பாளியம்யேவ வுத்தம் ஸியா. ‘‘ஓத்தப்பேனா’’தி வத்தப்³பே³ ருள்ஹீவஸேன பரேஸு ‘‘ஹிரோத்தப்பேனா’’தி வுத்தம். மஹாஅட்ட²கதா²யம் உத்தானத்தா ந வுத்தம், பாசித்தியாஸம்ப⁴வத³ஸ்ஸனேனேவ ஹி து³க்கடந்தி ஸித்³த⁴ம்.

83. தத்த² ‘‘கம்ம’’ந்தி வுத்தஅஜ்ஜா²சாரேபி பரியாபன்னத்தா தம் தஸ்ஸ த³ண்ட³கம்மவத்து². ‘‘தத்த² கம்மம் ஆபன்னோ’’தி புப்³பே³பி லிகி²தம். மஹாஅட்ட²கதா²யம் ‘‘அத்தகாமம் ஆபன்னோ’’தி பாடோ², ‘‘அயமேவ க³ஹேதப்³போ³’’தி வத³ந்தி, வீமம்ஸிதப்³ப³ம்.

து³ட்டு²ல்லாரோசனஸிக்கா²பத³வண்ணனா நிட்டி²தா.

10. பத²வீக²ணனஸிக்கா²பத³வண்ணனா

86. கடஸக்க²ரா ஸேதமத்திகா விய முது³கா ஸக்க²ரஜாதி. ‘‘அகதபப்³பா⁴ரேதி அவலஞ்ஜிதப்³ப³ட்டா²னத³ஸ்ஸனத்த²ம் வுத்த’’ந்தி லிகி²தம். ‘‘அனோவஸ்ஸகட்டா²னத³ஸ்ஸனத்த²’’ந்தி வத்தப்³ப³ம். மூஸிகுக்குரந்தி மூஸிகாஹி உத்³த⁴டபம்ஸு. ஸுத்³த⁴சித்தாதி கிஞ்சாபி ‘‘ஏவம் பவட்டிதே பத²வீ பி⁴ஜ்ஜிஸ்ஸதீ’’தி ஜானந்தி, நோ பன சே பத²வீபே⁴த³த்தி²கா, ஸுத்³த⁴சித்தா நாம ஹோந்தி. பம்ஸுஆத³யோ த்³வே கோட்டா²ஸா ஆபத்திகரா. கேசி ‘‘ஸப்³ப³ச்ச²ன்னாதீ³ஸு உபட்³டே⁴ து³க்கடஸ்ஸ வுத்தத்தா ஸசே து³க்கடம், யுத்த’’ந்தி வத³ந்தி. தத்த² யுத்தம் தாதி³ஸஸ்ஸ வத்து²னோ ஸம்ப⁴வா, இத⁴ பன ஜாதபத²வீ ச அஜாதபத²வீ சாதி த்³வேயேவ வத்தூ²னி, தஸ்மா த்³வின்னம் ஏகேன ப⁴விதப்³ப³ந்தி ந யுத்தம். ஏத்தா²பி து³க்கடவசனம் அத்தீ²தி சே? தம் பன ஸஞ்ஞாவஸேன, ந வத்து²வஸேனாதி ந யுத்தமேவ.

87. அக்³கி³ம் காதும் வட்டதீதி ஏத்த² ஏத்தாவதா உஸுமம் க³ண்ஹாதி, தஸ்மா வட்டதீதி கேசி. ஏவம் ஸதி பத²வியா அக்³கி³ம்ஹி கதே தூ³ரதோபி பூ⁴மி உண்ஹா ஹோதி, தத்தகம் கோபேதப்³ப³ம் ஸியா, ந ச கப்பதி, தஸ்மா யஸ்மிம் டா²னே பததி, தம் ஸோ அக்³கி³ ட³ஹதி, தஸ்மா வட்டதீதி ஏகே. அட³ஹிதேபி ‘‘அத³ட்³டா⁴ய பத²வியா அக்³கி³ம் ட²பேதும் ந வட்டதீ’’தி வுத்தத்தா அத்தனா பாதனாயேவ தோ³ஸோ பதிதே உபதா³ஹேதி வேதி³தப்³ப³ம்.

பத²வீக²ணனஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன முஸாவாத³வக்³கோ³ பட²மோ.