2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

89. ப²ரஸும் நிக்³க³ஹேதும் அஸக்கோந்தோதி த³ஸ்ஸிதபா⁴வம் ஜானாபேதி. கஸ்மா அயம் ப²ரஸும் உக்³கி³ரீதி சே? மனுஸ்ஸானந்திஆதி³ தஸ்ஸ பரிஹாரோ. ‘‘ஆகோடேஸி சி²ந்தீ³தி ச வசனதோ ருக்க²தே³வதானம் ஹத்தா²னி சி²ஜ்ஜந்தி, ந சாதுமஹாராஜிகாதீ³னம் விய அச்சே²ஜ்ஜானீ’’தி வத³ந்தி.

90-92. ப⁴வந்தி அஹுவுஞ்சாதி த்³விகாலிகோ பூ⁴தஸத்³தோ³. யதி³ பீ³ஜதோ நிப்³ப³த்தேன பீ³ஜம் த³ஸ்ஸிதம், ததே³வ ஸந்தகம் யதி³த³ம். ஸோவ குக்குடோ மம்ஸிமக்கி²தோதி அயமேவ ஹி பரிஹாரோ. அட்ட²கதா²ஸுபி ஹி ‘‘பீ³ஜே பீ³ஜஸஞ்ஞீ’’தி லிகி²தம். யம் பீ³ஜம் பூ⁴தகா³மோ நாம ஹோதி, தஸ்மிம் பீ³ஜே பூ⁴தகா³மபீ³ஜேதி யோஜேத்வா. அமூலகத்தா கிர ஸம்புண்ணபூ⁴தகா³மோ ந ஹோதி, ‘‘ஸமூலபத்தோ ஏவ ஹி பூ⁴தகா³மோ நாமா’’தி காரணம் வத³ந்தி. ‘‘அபூ⁴தகா³மமூலத்தாதி பூ⁴தகா³மதோ அனுப்பன்னத்தா அபூ⁴தகா³மமூலம், பூ⁴தகா³மஸ்ஸ அமூலகத்தா வா. ந ஹி ததோ அஞ்ஞோ பூ⁴தகா³மோ உப்பஜ்ஜதீ’’தி த்³விதா⁴பி லிகி²தம். பியங்கு³ அஸனருக்கோ² வட்³ட⁴னத்தசோ க²ஜ்ஜப²லோ, ‘‘பீதஸாலோ’’திபி வுச்சதி. அமூலகபூ⁴தகா³மே ஸங்க³ஹம் க³ச்ச²தீதி நாளிகேரஸ்ஸேவாயம். க⁴டபிட்டி²ஜாதத்தா, பீ³ஜகா³மானுலோமத்தா ச து³க்கடவத்து². ந வாஸேதப்³ப³ம் ‘‘து³ரூபசிண்ணத்தா’’தி லிகி²தம், ‘‘யேஸம் ருக்கா²னம் ஸாகா² ருஹதீதி வசனதோ யேஸம் ந ருஹதி, தேஸம் ஸாகா²ய கப்பியகரணகிச்சம் நத்தீ²தி ஸித்³த⁴’’ந்தி வுத்தம். முத்³த³திணந்தி தஸ்ஸ நாமம். ‘‘முஞ்ஜதிணந்தி பாடோ²’’தி லிகி²தம்.

ஸமணகப்பேஹீதி ஸமணவோஹாரேஹி, தஸ்மா வத்தப்³ப³ம் பி⁴க்கு²னா ‘‘கப்பியம் கரோஹீ’’தி. தஸ்ஸ ஆணத்தியா கரோந்தேனாபி ஸாமணேராதி³னா ‘‘கப்பிய’’ந்தி வத்வாவ அக்³கி³பரிஜிதம் காதப்³ப³ந்தி ஸித்³த⁴ம். அக்³கி³பரிஜிதாதீ³னி விய கப்பியத்தா அபீ³ஜனிப்³ப³ட்டபீ³ஜானிபி ‘‘பஞ்சஹி ஸமணகப்பேஹீ’’தி (சூளவ. 250) ஏத்த² பவிட்டா²னி, யதா²லாப⁴தோ வா ஸமணகப்பவசனம் க³ஹேதப்³ப³ம். ‘‘கப்பிய’ந்தி வத்துகாமோ ‘கப்ப’ந்தி சே வத³தி, ‘வட்டதீ’தி வத³ந்தீ’’தி வுத்தம். ‘‘கப்பிய’ந்தி வசனம் ஸகஸகபா⁴ஸாயபி வட்டதீ’’தி வத³ந்தி. ‘‘கப்பியந்தி வத்வா’’தி வுத்தத்தா பி⁴க்கு²னா ‘கப்பியம்’இச்சேவ வத்தப்³ப³ம், ‘‘இதரேன பன யாய காயசி பா⁴ஸாயா’’தி வத³ந்தி, வீமம்ஸிதப்³ப³ம். ‘‘உச்சு²ம் கப்பியம் கரிஸ்ஸாமீதி தா³ரும் விஜ்ஜ²தீ’’தி வசனதோ கப்பியம் காதப்³ப³ம் ஸந்தா⁴ய விரத்³தே⁴தி வுத்தம் ஹோதி, ஆசரியா பன ‘‘கப்பியம் காரேதப்³ப³ம் ஸந்தா⁴ய கப்பியந்தி ஸித்தா²தி³ம் காரேதி, வட்டதீ’’தி வத³ந்தி, தஸ்ஸ காரணம் வத³ந்தா காதும் வட்டனபா⁴வேனேவ விரஜ்ஜி²த்வா கதேபி கப்பியம் ஜாதம். யதி³ ந வட்டேய்ய, ஸித்தா²தி³ம்ஹி கதே ந வட்டேய்யாதி, உபபரிக்கி²தப்³ப³ம். உட்டி²தஸேவாலக⁴டம் ஆதபே நிக்கி²பிதும் வட்டதி, விகோபேதுகாமதாய ஸதி து³க்கடம் யுத்தம் விய. ‘‘புப்ப²ரஜ்ஜுபா⁴ஜனக³திகா, தஸ்மா ந வட்டதி. நாளே வா ப³த்³த⁴புப்ப²கலாபே நாளஸ்மிம் கதேபி வட்டதி தஸ்மிம் புப்ப²ஸ்ஸ அத்தி²தாயா’’தி வத³ந்தி. போராணக³ண்டி²பதே³ ‘‘பீ³ஜகா³மேன பூ⁴தகா³மோ த³ஸ்ஸிதோ அனவஸேஸபரியாதா³னத்த²’’ந்தி வுத்தம்.

பூ⁴தகா³மஸிக்கா²பத³வண்ணனா நிட்டி²தா.

2. அஞ்ஞவாத³கஸிக்கா²பத³வண்ணனா

98-9. அஞ்ஞம் வத³தீதி அஞ்ஞவாத³கம், ‘‘வசனம் கரேய்யா’’தி லிகி²தம். ‘‘துண்ஹீபூ⁴தஸ்ஸேதம் நாம’’ந்தி பாடோ². உக்³கா⁴தேதுகாமோதி ஸமோஹனிதுகாமோ, அந்தராயம் கத்துகாமோதி போராணா.

100. ‘‘ஸுதி³ட்டோ² ப⁴ந்தே, ந பனேஸோ கஹாபணோதிஆதீ³ஸு அனாரோபிதே து³க்கடேன முஸாவாத³பாசித்தியம், அரோபிதே பாசித்தியத்³வயம் ஹோதீ’’தி வத³ந்தி, வீமம்ஸிதப்³ப³ம்.

102. அத⁴ம்மேன வா வக்³கே³ன வா ந கம்மாரஹஸ்ஸ வாதி ஏத்த² ‘‘மயி வுத்தே மம் வா அஞ்ஞம் வா ஸங்கோ⁴ அத⁴ம்மேன வா கம்மம், வக்³கே³ன வா கம்மம் கரிஸ்ஸதி, ந கம்மாரஹஸ்ஸ வா மே, அஞ்ஞஸ்ஸ வா கம்மம் கரிஸ்ஸதீ’’தி ந கதே²தீதி யோஜேதப்³ப³ம்.

அஞ்ஞவாத³கஸிக்கா²பத³வண்ணனா நிட்டி²தா.

3. உஜ்ஜா²பனகஸிக்கா²பத³வண்ணனா

103. ‘‘ச²ந்தா³யா’’தி அக்க²ரக்க²ராயாதிஆதி³ விய லிங்க³விபல்லாஸேன வுத்தம், ச²ந்த³த்த²ந்தி வா அத்தோ². யேஸம் ஸேனாஸனானி பஞ்ஞபேதி, தேஸம் அத்தனி ச²ந்த³த்த²ந்தி அதி⁴ப்பாயோ.

106. அனுபஸம்பன்னந்திஆதீ³ஸு கரணத்தோ² க³ஹேதப்³போ³. அஞ்ஞம் அனுபஸம்பன்னந்தி அஞ்ஞேன அனுபஸம்பன்னேன. தஸ்ஸ வாதி அனுபஸம்பன்னஸ்ஸ. ‘‘ஸம்முதிகாலே பஞ்சங்க³விரஹாத³யோ அஸம்மதா நாமா’’தி, ‘‘உபஸம்பன்னேன லத்³த⁴ஸம்முதி ஸிக்கா²பச்சக்கா²னேன வினஸ்ஸதீ’’தி ச வுத்தம். ஸங்கே⁴னாதி ஸப்³பே³ன ஸங்கே⁴ன கம்மவாசாய அஸ்ஸாவேத்வா ‘‘தவேஸோ பா⁴ரோ’’தி கேவலம் ஆரோபிதபா⁴ரோ. கேவல-ஸத்³தோ³ ஹேத்த² கம்மவாசாய அஸ்ஸாவிதபா⁴வமத்தமேவ தீ³பேதி. ஸயமேவாதி இதரேஸம் பி⁴க்கூ²னம் அனுமதியா. அபூ⁴தேன கீ²யனகஸ்ஸ ஆதி³கம்மிகஸ்ஸ கத²ம் அனாபத்தீதி சே? இமினா ஸிக்கா²பதே³ன. முஸாவாதே³ ஆபத்தியேவ த்³வே பாசித்தியோ வுத்தா விய தி³ஸ்ஸந்தி புப்³ப³பயோகே³ ருக்கா²தி³சி²ந்த³னாதீ³ஸு விய, விசாரேதப்³ப³ம்.

உஜ்ஜா²பனகஸிக்கா²பத³வண்ணனா நிட்டி²தா.

4. பட²மஸேனாஸனஸிக்கா²பத³வண்ணனா

110. ‘‘ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதீ’’தி வசனதோ, பரிவாரே ‘‘ஏகா பஞ்ஞத்தி, ஏகா அனுபஞ்ஞத்தீ’’தி (பரி. 226) வசனதோ ச இத⁴ அத்தி² அனுபஞ்ஞத்தீதி ஸித்³த⁴ம். கிஞ்சாபி ஸித்³த⁴ம், ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’திஆதி³னா பன பஞ்ஞத்திட்டா²னம் ந பஞ்ஞாயதி, கேவலம் ‘‘அனுஜானாமி, பி⁴க்க²வே, அட்ட²மாஸே…பே… நிக்கி²பிது’’ந்தி ஏத்தகமேவ வுத்தம், தம் கஸ்மாதி சே? பட²மபஞ்ஞத்தியம் வுத்தனயேனேவ வத்தப்³ப³தோ அவிஸேஸத்தா ந வுத்தம். யதி³ ஏவம் கா ஏத்த² அனுபஞ்ஞத்தீதி? அஜ்ஜோ²காஸேதி. அயமனுபஞ்ஞத்தி பஞ்ஞத்தியம்பி அத்தீ²தி சே? அத்தி², தம் பன ஓகாஸமத்ததீ³பனம், து³தியம் சாதுவஸ்ஸிகமாஸஸங்கா²தகாலதீ³பனம். யஸ்மா உப⁴யம்பி ஏகம் காலோகாஸம் ஏகதோ கத்வா ‘‘அஜ்ஜோ²காஸே’’தி வுத்தந்தி தீ³பேந்தோ ப⁴க³வா ‘‘அனுஜானாமி, பி⁴க்க²வே…பே… நிக்கி²பிது’’ந்தி ஆஹாதி வேதி³தப்³ப³ம். தேனேவ மாதிகாட்ட²கதா²யம் (கங்கா². அட்ட². பட²மஸேனாஸனஸிக்கா²பத³வண்ணனா) வுத்தம் ‘‘யத்த² ச யதா³ ச ஸந்த²ரிதும் ந வட்டதி, தம் ஸப்³ப³மித⁴ அஜ்ஜோ²காஸஸங்க்²யமேவ க³தந்தி வேதி³தப்³ப³’’ந்தி. ஹேமந்தகாலஸ்ஸ அனாபத்திஸமயத்தா இத³ம் ஸிக்கா²பத³ம் நிதா³னானபேக்க²ந்தி ஸித்³த⁴ம், ததா² ஹி அஜ்ஜோ²காஸபத³ஸாமத்தி²யேன அயம் விஸேஸோ – வஸ்ஸானகாலே ஓவஸ்ஸகட்டா²னே அஜ்ஜோ²காஸே, மண்ட³பாதி³ம்ஹி ச ந வட்டதி. ஹேமந்தகாலே பகதிஅஜ்ஜோ²காஸே ந வட்டதி, ஸப்³ப³மித⁴ ஓவஸ்ஸகேபி மண்ட³பாதி³ம்ஹி வட்டதி, தஞ்ச கோ² யத்த² ஹிமவஸ்ஸேன ஸேனாஸனம் ந தேமேதி, கி³ம்ஹகாலே பகதிஅஜ்ஜோ²காஸேபி வட்டதி, தஞ்ச கோ² அகாலமேகா⁴த³ஸ்ஸனேயேவாதி அயம் விஸேஸோ ‘‘அட்ட² மாஸே’’தி ச ‘‘அவஸ்ஸிகஸங்கேதே’’தி ச ஏதேஸம் த்³வின்னம் பதா³னம் ஸாமத்தி²யதோபி ஸித்³தோ⁴.

கிஞ்ச பி⁴ய்யோ – அட்ட²கதா²யம் ஸந்த³ஸ்ஸிதவிஸேஸோவ. சம்மாதி³னா ஓனத்³த⁴கோ வா நவவாயிமோ வா ந ஸீக⁴ம் வினஸ்ஸதி. காயானுக³திகத்தாதி காயே யத்த², தத்த² க³தத்தா. ஸங்கி⁴கமஞ்சாதி³ம்ஹி காயம் பு²ஸாபேத்வா விஹரிதும் ந வட்டதீதி த⁴ம்மஸிரித்தே²ரோ. ‘‘ஸங்கி⁴கம் பன ‘அஜ்ஜோ²காஸபரிபோ⁴கே³ன பரிபு⁴ஞ்ஜத², ப⁴ந்தே, யதா²ஸுக²’ந்தி தா³யகா தே³ந்தி ஸேனாஸனம், ஏவரூபே அனாபத்தீ’’தி அந்த⁴கட்ட²கதா²யம் வசனதோ, இத⁴ ச படிக்கே²பாபா⁴வதோ வட்டதி. ‘‘அஞ்ஞஞ்ச ஏவரூபந்தி அபரே’’தி வுத்தம். ‘‘பாத³ட்டா²னாபி⁴முகா²தி நிஸீத³ந்தஸ்ஸ பாத³பதனட்டா²னாபி⁴முகா²’’தி லிகி²தம். ஸம்மஜ்ஜந்தஸ்ஸ பாத³ட்டா²னாபி⁴முக²ந்தி ஆசரியஸ்ஸ தக்கோ.

111. ‘‘பாது³த்³தா⁴ரேனாதி ப³ஹிஉபசாரே டி²தத்தா’’தி லிகி²தம். க³ச்ச²ந்தி, து³க்கடம் த⁴ம்மகதி²கஸ்ஸ விய. கஸ்மா ந பாசித்தியம்? பச்சா² ஆக³தேஹி வுட்³ட⁴தரேஹி உட்டா²பேத்வா க³ஹேதப்³ப³தோ. த⁴ம்மகதி²கஸ்ஸ பன அனுட்ட²பேதப்³ப³த்தா. ‘‘அனாணத்தியா பஞ்ஞத்தியம்பி தஸ்ஸ பா⁴ரோ’’தி வுத்தம்.

112. பரிஹரணேயேவாதி ஏத்த² க³ஹேத்வா விசாரணேதி த⁴ம்மஸிரித்தே²ரோ. அத்தனோ ஸந்தககரணேதி உபதிஸ்ஸத்தே²ரோ. பீ³ஜனீபத்தகம் சதுரஸ்ஸபீ³ஜனீ.

113. ‘‘யோ பி⁴க்கு² வா ஸாமணேரோ வா…பே… லஜ்ஜீ ஹோதீ’தி வுத்தத்தா அலஜ்ஜிம் ஆபுச்சி²த்வா க³ந்தும் ந வட்டதீ’’தி வத³ந்தி. பாடே² ‘‘கேனசி பலிபு³த்³த⁴ம் ஹோதீ’’தி ச அட்ட²கதா²யம் ‘‘பலிபு³த்³த⁴’’ந்தி ச ஸேனாஸனம்யேவ ஸந்தா⁴ய வுத்தம், தஸ்மா ததா²பி அத்தீ²தி க³ஹேதப்³ப³ம். ‘‘அனாபுச்ச²ம் வா’’தி பாடோ².

பட²மஸேனாஸனஸிக்கா²பத³வண்ணனா நிட்டி²தா.

5. து³தியஸேனாஸனஸிக்கா²பத³வண்ணனா

116-7. ஏத்தகமேவ வுத்தமட்ட²கதா²ஸு, ததா²பி பத³ட்டா²த³யோபி லப்³ப⁴ந்தி ஏவ. அனுக³ண்டி²பதே³ ‘‘அஞ்ஞம் அத்த²ரணாதி³ அகப்பியத்தா ந வுத்த’’ந்தி வுத்தம். ‘‘மஞ்சம் வா பீட²ம் வா விஹாரே வா விஹாரூபசாரே வா’தி இமினாபி ஸம்ஸந்த³னத்த²ம் ‘கிஞ்சாபி வுத்தோ, அத² கோ²’திஆதி³ ஆரத்³த⁴’’ந்தி ச வுத்தம். உபசாரமத்தஞ்சேதம் ‘‘ருக்க²மூலே’’தி, தத்த² வத்தப்³ப³ம் நத்தி².

118. அனாபுச்சி²த்வாபி க³ந்தும் வட்டதீதி அஸதியா க³ச்ச²தோபி அனாபத்தி, ஆபுச்ச²னம் பன வத்தம் ஸஞ்சிச்ச அனாபுச்ச²தோ வத்தபே⁴த³து³க்கடத்தா. புக்³க³லிகஸேனாஸனே ஸங்கி⁴கஸேய்யம், ஸங்கி⁴கஸேனாஸனே வா புக்³க³லிகஸேய்யம் அத்த²ரித்வா க³ச்ச²ந்தஸ்ஸ து³க்கடம் யுத்தம் விய. கஸ்மா? ‘‘ஸேய்யாமத்தமேவ நஸ்ஸேய்யா’’தி வுத்தத்தா. இத⁴ பன ‘‘பலிபு³த்³த⁴ம் பலிபு³த்³தோ⁴’’தி து³வித⁴ம்பி அத்தி².

து³தியஸேனாஸனஸிக்கா²பத³வண்ணனா நிட்டி²தா.

6. அனுபக²ஜ்ஜஸிக்கா²பத³வண்ணனா

121. ச²ப்³ப³க்³கி³யேஸுயேவ தே²ரா பி⁴க்கூ²தி கேசி. பாதே³ தோ⁴வித்வாதிஆதி³ம்ஹி பவிஸந்தஸ்ஸ வா பாத³தோ⁴வனபாஸாணதோ யாவ மஞ்சபீட²ம் பஸ்ஸாவத்தா²ய நிக்க²மந்தஸ்ஸ வா யாவ பஸ்ஸாவட்டா²னந்தி யோஜனா காதப்³பா³. ஏவம் ஸந்தே ‘‘பஸ்ஸாவத்தா²ய நிக்க²மந்தஸ்ஸ வா’’தி ந வத்தப்³ப³ம், ‘‘பஸ்ஸாவட்டா²னதோ நிக்க²மந்தஸ்ஸ வா’’தி வத்தப்³ப³ம். பஸ்ஸாவட்டா²னந்தி கத்த²சி போத்த²கே. ததா² ஹி மாதிகாட்ட²கதா²யம் (கங்கா². அட்ட². அனுபக²ஜ்ஜஸிக்கா²பத³வண்ணனா) ‘‘பவிஸந்தஸ்ஸ பாத³தோ⁴வனபாஸாணதோ யாவ மஞ்சபீட²ம் நிக்க²மந்தஸ்ஸ மஞ்சபீட²தோ யாவ பஸ்ஸாவட்டா²னம், தாவ உபசாரோ’’தி வுத்தம், தஸ்மா ‘‘பாதே³ தோ⁴வித்வா பவிஸந்தஸ்ஸ, பஸ்ஸாவத்தா²ய நிக்க²மந்தஸ்ஸ ச த்³வாரே நிக்கி²த்தபாத³தோ⁴வனபாஸாணதோ, பஸ்ஸாவட்டா²னதோ ச மஞ்சபீட²’’ந்தி கத்த²சி போத்த²கே பாடோ², ஸோ அபாடோ². கஸ்மா? மஞ்சபீடா²னம் உபசாரஸ்ஸ வுத்தத்தா. பவிஸந்தஸ்ஸ யாவ மஞ்சபீடா²னம் உபசாரோ, நிக்க²மந்தஸ்ஸ ததோ பட்டா²ய யாவ பஸ்ஸாவட்டா²னம் வச்சகுடிசங்கமட்டா²னந்தி இமினா அத்தே²ன யதா² ஸம்ஸந்த³தி, ததா²விதோ⁴ பாடோ²தி ஆசரியோ.

122. உபசாரம் ட²பேத்வாதி இத⁴ வுத்தஉபசாரம் ட²பேத்வா. ‘‘த³ஸ்ஸனஸவனூபசாரேபி ஸந்த²ரந்தஸ்ஸா’’தி லிகி²தம்.

அனுபக²ஜ்ஜஸிக்கா²பத³வண்ணனா நிட்டி²தா.

7. நிக்கட்³ட⁴னஸிக்கா²பத³வண்ணனா

126-7. ச²ஸத்தகோட்ட²கானி வாதி ஏத்த² த்³வாரகோட்ட²கம் அதி⁴ப்பேதம். ‘‘நிக்க²மா’’தி வசனம் ஸுத்வாபி அத்தனோ ருசியா நிக்க²மதி, அனாபத்தி; இத⁴ அக்³கி³ஸாலாதி³ ஏவ உபசாரோதி.

நிக்கட்³ட⁴னஸிக்கா²பத³வண்ணனா நிட்டி²தா.

8. வேஹாஸகுடிஸிக்கா²பத³வண்ணனா

129. ‘‘பமாணமஜ்ஜி²மஸ்ஸ க³லப்பமாணே தி³ன்னதுலாபி வேஹாஸகுடியேவா’’தி லிகி²தம், ‘‘ந ஸா இத⁴ அதி⁴ப்பேதா’’தி வுத்தம்.

வேஹாஸகுடிஸிக்கா²பத³வண்ணனா நிட்டி²தா.

9. மஹல்லகவிஹாரஸிக்கா²பத³வண்ணனா

135. யாவ த்³வாரகோஸாதி த்³வாரஸமீபா, யாவ பி⁴த்தீதி அத்தோ², தம் ஸுவுத்தம். கவாடவித்தா²ரப்பமாணோதி ஹத்த²பாஸஸ்ஸாதி⁴ப்பேதத்தா, ஸமந்தா கவாடவித்தா²ரப்பமாணஉபசாரஸ்ஸ க³ஹிதத்தா அபரிபூரஉபசாராபி ஹோதி. ஆலோகம் கரோதீதி ஆலோகம் ஸந்தே⁴தி பிதே⁴தீதி ஸந்தி⁴ ஏவ ஆலோகஸந்தி⁴னாமகா ஹோந்தி. வாதபானகவாடலேபகம்மே அப்பஹரிதட்டா²னகிச்சம் நத்தி².

136. இட்ட²காதி ச²த³னகபாலாஸிலாதி³இட்ட²கா. ச²த³னூபரீதி ஏத்த² பட²மம் தாவ ஏகவாரம் அபரிஸேஸம் சா²தே³த்வா புன சா²த³னத³ண்ட³கே ப³ந்தி⁴த்வா து³தியவாரம் ததே²வ சா²தே³தப்³ப³ம். ‘‘ததியவாரசதுத்த²வாரே ஸம்பத்தே த்³வே மக்³கே³ அதி⁴ட்ட²ஹித்வா ததியமக்³க³ம் ஆணாபேத்வா பக்கமிதப்³ப³’’ந்தி வுத்தம், தம் ‘‘புனப்புனம் சா²தா³பேதீ’’தி இமினா யுஜ்ஜதி.

போராணா பன ‘‘பட²மவாரேயேவ தயோ மக்³கே³ அதி⁴ட்டா²தும் வட்டதி, சதுத்த²தோ பட்டா²ய ஆபத்தி பாசித்தியம், சதுத்த²லேபதோ பட்டா²ய ஆபத்தீ’’தி வத³ந்தி. தத்த² ச²த³னே வுத்தவிதி⁴னிதா³னேன ஸமேதி, லேபே வுத்தவிதி⁴திகச்சே²தே³ன ஸமேதி. ததா²பி ஸோ ந யுத்தோவ. நிதா³னே, அட்ட²கதா²யஞ்ச ஸித்³த⁴லேபத்தா ஸப்³ப³ஸோவாபி அச்ச²ன்னே, ச²ன்னேவாபி அனேகஸோ பரியாயஸ்ஸ ததியஸ்ஸேவ அதி⁴ட்டா²னந்தி நோ ஸமேதீதி ஆசரியோ. ‘‘த்³வே மக்³கே³’’தி, ‘‘த்³வே ச²த³னே’’தி ச ‘‘ததியவாரதோ பட்டா²ய ஏவம் சா²தா³பேஹீ’தி ஆணாபேத்வா பக்கமிதப்³ப³’’ந்தி ச உபதிஸ்ஸத்தே²ரோ வத³தி கிர.

மஹல்லகவிஹாரஸிக்கா²பத³வண்ணனா நிட்டி²தா.

10. ஸப்பாணகஸிக்கா²பத³வண்ணனா

140. ஸப்பாணகஸிக்கா²பத³ம் உத்தானத்த²மேவ.

ஸமத்தோ வண்ணனாக்கமேன பூ⁴தகா³மவக்³கோ³ து³தியோ.