2. து³தியபாராஜிகம்

த⁴னியவத்து²வண்ணனா

84. து³தியே ராஜூஹி ஏவ பரிக்³க³ஹிதத்தா ‘‘ராஜக³ஹ’’ந்தி லத்³த⁴னாமகே ஸமீபத்தே²ன, அதி⁴கரணத்தே²ன ச படிலத்³த⁴பு⁴ம்மவிப⁴த்திகே கி³ஜ்ஜ²கூடே பப்³ப³தே சதூஹி விஹாரேஹி விஹரந்தோதி அதி⁴ப்பாயோ. தஸ்ஸ ‘‘வஸ்ஸம் உபக³ச்சி²ம்ஸூ’’தி இமினா ஸம்ப³ந்தோ⁴ வேதி³தப்³போ³. தயோ ஏவ ஹி ஞத்திம் ட²பேத்வா க³ணகம்மம் கரோந்தி, ந ததோ ஊனா அதி⁴கா வா அகிரியத்தா. தத்த² வினயபரியாயேன ஸங்க⁴க³ணபுக்³க³லகம்மகோஸல்லத்த²ம் இத³ம் பகிண்ணகம் வேதி³தப்³ப³ம் – அத்தி² ஸங்க⁴கம்மம் ஸங்கோ⁴ ஏவ கரோதி, ந க³ணோ ந புக்³க³லோ, தம் அபலோகனகம்மஸ்ஸ கம்மலக்க²ணேகதே³ஸம் ட²பேத்வா இதரம் சதுப்³பி³த⁴ம்பி கம்மம் வேதி³தப்³ப³ம். அத்தி² ஸங்க⁴கம்மம் ஸங்கோ⁴ ச கரோதி, க³ணோ ச கரோதி, புக்³க³லோ ச கரோதி. கிஞ்சாதி? யம் புப்³பே³ ட²பிதம். வுத்தஞ்ஹேதம் பரிவாரட்ட²கதா²யம் ‘‘யஸ்மிம் விஹாரே த்³வே தயோ ஜனா வஸந்தி, தேஹி நிஸீதி³த்வா கதம்பி ஸங்கே⁴ன கதஸதி³ஸமேவ. யஸ்மிம் பன விஹாரே ஏகோ பி⁴க்கு² ஹோதி, தேன பி⁴க்கு²னா உபோஸத²தி³வஸே புப்³ப³கரணபுப்³ப³கிச்சம் கத்வா நிஸின்னேன கதம்பி கதிகவத்தம் ஸங்கே⁴ன கதஸதி³ஸமேவ ஹோதீ’’தி (பரி. அட்ட². 495-496). புனபி வுத்தம் ‘‘ஏகபி⁴க்கு²கே பன விஹாரே ஏகேன ஸாவிதேபி புரிமகதிகா படிப்பஸ்ஸம்ப⁴தி ஏவா’’தி. அத்தி² க³ணகம்மம் ஸங்கோ⁴ கரோதி, க³ணோ கரோதி, புக்³க³லோ கரோதி, தம் தயோ பாரிஸுத்³தி⁴உபோஸதா² அஞ்ஞேஸம் ஸந்திகே கரீயந்தி, தஸ்ஸ வஸேன வேதி³தப்³ப³ம். அத்தி² க³ணகம்மம் க³ணோவ கரோதி, ந ஸங்கோ⁴ ந புக்³க³லோ, தம் பாரிஸுத்³தி⁴உபோஸதோ² அஞ்ஞமஞ்ஞம் ஆரோசனவஸேன கரீயதி, தஸ்ஸ வஸேன வேதி³தப்³ப³ம். அத்தி² புக்³க³லகம்மம் புக்³க³லோவ கரோதி, ந ஸங்கோ⁴ ந க³ணோ, தம் அதி⁴ட்டா²னுபோஸத²வஸேன வேதி³தப்³ப³ம். அத்தி² க³ணகம்மம் ஏகச்சோவ க³ணோ கரோதி, ஏகச்சோ ந கரோதி, தத்த² அஞத்திகம் த்³வே ஏவ கரோந்தி, ந தயோ. ஸஞத்திகம் தயோவ கரோந்தி, ந ததோ ஊனா அதி⁴கா வா, தேன வுத்தம் ‘‘தயோ ஏவ ஹி ஞத்திம் ட²பேத்வா க³ணகம்மம் கரோந்தி, ந ததோ ஊனா அதி⁴கா வா அகிரியத்தா’’தி. தஸ்மா தயோவ வினயபரியாயேன ஸம்பஹுலா, ந ததோ உத்³த⁴ந்தி வேதி³தப்³ப³ம். அனுக³ண்டி²பதே³ பன ‘‘கிஞ்சாபி கம்மலக்க²ணம் தயோவ கரோந்தி, அத² கோ² தேஹி கதம் ஸங்கே⁴ன கதஸதி³ஸந்தி வுத்தத்தா ஏகேன பரியாயேன தயோ ஜனா வினயபரியாயேனபி ஸங்கோ⁴’’தி வுத்தம், இத³ம் ஸப்³ப³ம்பி வினயகம்மம் உபாதா³ய வுத்தம், லாப⁴ம் பன உபாதா³ய அந்தமஸோ ஏகோபி அனுபஸம்பன்னோபி ‘‘ஸங்கோ⁴’’தி ஸங்க்²யம் க³ச்ச²தி கிர. பவாரணாதி³வஸஸ்ஸ அருணுக்³க³மனஸமனந்தரமேவ ‘‘வுத்த²க³ஸ்ஸா’’தி வுச்சந்தி, உக்கம்ஸனயேன ‘‘பாடிபத³தி³வஸதோ பட்டா²யா’’தி வுத்தம், தேனேவ ‘‘மஹாபவாரணாய பவாரிதா’’தி வுத்தம். அஞ்ஞதா² அந்தராயேன அபவாரிதா ‘‘வுத்த²வஸ்ஸா’’தி ந வுச்சந்தீதி ஆபஜ்ஜதி. த²ம்பா⁴தி³ கட்ட²கம்மந்தி வேதி³தப்³ப³ம். கேசி தனுகம் தா³ருத்த²ம்ப⁴ம் அந்தோகத்வா மத்திகாமயம் த²ம்ப⁴ம் கரோந்தி, அயம் பன ததா² ந அகாஸி, தேன வுத்தம் ‘‘ஸப்³ப³மத்திகாமயம் குடிகம் கரித்வா’’தி. தேலமிஸ்ஸாய தம்ப³மத்திகாய.

85. ‘‘மா பச்சி²மா ஜனதா பாணேஸு பாதப்³யதம் ஆபஜ்ஜீ’’தி இமினா அனுத்³தே³ஸஸிக்கா²பதே³ன யத்த² இட்ட²கபசன பத்தபசன குடிகரண விஹாரகாராபன நவகம்மகரண க²ண்ட³பு²ல்லபடிஸங்க²ரண விஹாரஸம்மஜ்ஜன படக்³கி³தா³ன கூபபோக்க²ரணீக²ணாபனாதீ³ஸு பாதப்³யதம் ஜானந்தேன பி⁴க்கு²னா கப்பியவசனம்பி ந வத்தப்³ப³ந்தி த³ஸ்ஸேதி, தேனேவ பரியாயம் அவத்வா தேஸம் ஸிக்கா²பதா³னம் அனாபத்திவாரேஸு ‘‘அனாபத்தி அஸதியா அஜானந்தஸ்ஸா’’தி வுத்தம். ‘‘அந்தராபத்திஸிக்கா²பத³’’ந்திபி ஏதஸ்ஸ நாமமேவ. ‘‘க³ச்ச²தே²தம், பி⁴க்க²வே, குடிகம் பி⁴ந்த³தா²’’தி இமினா கதம் லபி⁴த்வா தத்த² வஸந்தானம்பி து³க்கடமேவாதி ச ஸித்³த⁴ம். அஞ்ஞதா² ஹி ப⁴க³வா ந பி⁴ந்தா³பேய்ய. ஏஸ நயோ பே⁴த³னகம் சே²த³னகம் உத்³தா³லனகந்தி ஏத்தா²பி, ஆபத்திபே⁴தா³வ. ததோ ஏவ ஹி பே⁴த³னகஸிக்கா²பதா³தீ³ஸு விய ‘‘அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி ந வுத்தம், ததா² அஞ்ஞஸ்ஸத்தா²ய கரோதி, சேதியாதீ³னம் அத்தா²ய கரோதி, து³க்கடமேவாதி ச ஸித்³த⁴ம், அஞ்ஞதா² குடிகாரஸிக்கா²பதா³தீ³ஸு விய ‘‘அஞ்ஞஸ்ஸத்தா²ய வாஸாகா³ரம் ட²பேத்வா ஸப்³ப³த்த², அனாபத்தீ’’தி நயமேவ வதே³ய்ய, ந பி⁴ந்தா³பேய்ய. ஸப்³ப³மத்திகாமயபா⁴வம் பன மோசேத்வா கட்ட²பாஸாணாதி³மிஸ்ஸம் கத்வா பரிபு⁴ஞ்ஜதி, அனாபத்தி. ததா² ஹி சே²த³னகஸிக்கா²பதா³தீ³ஸு ப⁴க³வதா நயோ தி³ன்னோ ‘‘அஞ்ஞேன கதம் பமாணாதிக்கந்தம் படிலபி⁴த்வா சி²ந்தி³த்வா பரிபு⁴ஞ்ஜதீ’’திஆதீ³ஸு. கேசி பன ‘‘வயகம்மம்பீதி ஏதேன மூலம் த³த்வா காராபிதம்பி அத்தி², தேன தம் அஞ்ஞேன கதம்பி ந வட்டதீதி ஸித்³த⁴’’ந்தி வத³ந்தி, தம் ந ஸுந்த³ரம். கஸ்மா? ஸம்பா⁴ரே கிணித்வா ஸயமேவ கரோந்தஸ்ஸாபி வயகம்மஸம்ப⁴வதோ. கிம் வா பாளிலேஸே ஸதி அட்ட²கதா²லேஸனயோ. இட்ட²காஹி கி³ஞ்ஜகாவஸத²ஸங்கே²பேன கதா வட்டதீதி ஏத்த² பகதிஇட்ட²காஹி சினித்வா கத்தப்³பா³வஸதோ² கி³ஞ்ஜகாவஸதோ² நாம. ஸா ஹி ‘‘மத்திகாமயா’’தி ந வுச்சதி, ‘‘இட்ட²ககுடிகா’’த்வேவ வுச்சதி, தஸ்மா து²ஸகோ³மயதிணபலாலமிஸ்ஸா மத்திகாமயாபி அபக்கிட்ட²கமயாபி ‘‘ஸப்³ப³மத்திகாமயா’’த்வேவ வுச்சதீதி நோ க²ந்தீதி ஆசரியோ, ப⁴ஸ்மாத³யோ ஹி மத்திகாய த³ள்ஹிபா⁴வத்த²மேவ ஆதீ³யந்தி, அபக்கிட்ட²கமயாபி கி³ஞ்ஜகாவஸத²ஸங்க்²யம் ந க³ச்ச²தி, ந ச ஆயஸ்மா த⁴னியோ ஏகப்பஹாரேனேவ கும்ப⁴காரோ விய கும்ப⁴ம் தம் குடிகம் நிட்டா²பேஸி, அனுக்கமேன பன ஸுக்கா²பேத்வா ஸுக்கா²பேத்வா மத்திகாபிண்டே³ஹி சினித்வா நிட்டா²பேஸி, அபக்கிட்ட²கமயா குடி விய ஸப்³ப³மத்திகாமயா குடி ஏகாப³த்³தா⁴ ஹோதி, ந ததா² பக்கிட்ட²கமயா, தஸ்மா ஸா கப்பதீதி ஏகே. ஸப்³ப³மத்திகாமயாய குடியா ப³ஹி சே திணகுடிகாதி³ம் கத்வா அந்தோ வஸதி, து³க்கடமேவ. ஸசே தத்த² தத்த² சி²த்³த³ம் கத்வா ப³ந்தி⁴த்வா ஏகாப³த்³த⁴ம் கரோதி, வட்டதி. அந்தோ சே திணகுடிகாதி³ம் கத்வா அந்தோ வஸதி, வட்டதி. காரகோ ஏவ சே வஸதி, கரணபச்சயா து³க்கடம் ஆபஜ்ஜதி, ந வஸனபச்சயா. ஸசே அந்தோ வா ப³ஹி வா உப⁴யத்த² வா ஸுதா⁴ய லிம்பதி, வட்டதி. யஸ்மா ஸப்³ப³மத்திகாமயா குடி ஸுகரா பி⁴ந்தி³தும், தஸ்மா தத்த² ட²பிதம் பத்தசீவராதி³ அகு³த்தம் ஹோதி, சோராதீ³ஹி அவஹரிதும் ஸக்கா, தேன வுத்தம் ‘‘பத்தசீவரகு³த்தத்தா²யா’’தி.

பாளிமுத்தகவினிச்ச²யவண்ணனா

தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே பத்தே தா⁴ரேந்தி, உச்சாவசானி பத்தமண்ட³லானி தா⁴ரேந்தீ’’தி (சுளவ. 253) ஏவமாதீ³னி வத்தூ²னி நிஸ்ஸாய ‘‘ந, பி⁴க்க²வே, உச்சாவசா பத்தா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸா’’திஆதி³னா நயேன அகப்பியபரிக்கா²ரேஸு ச து³க்கடம் பஞ்ஞத்தம். கஸ்மா? தத³னுலோமத்தா. யத்தா²பி ந பஞ்ஞத்தம், தத்த² ‘‘ந, பி⁴க்க²வே, உச்சாவசானி ச²த்தானி தா⁴ரேதப்³பா³னி, யோ தா⁴ரேய்ய, ஆபத்தி து³க்கடஸ்ஸா’’திஆதி³னா (சூளவ. 269-270) நயேன து³க்கடம் ஸம்ப⁴வதி, தஸ்மா ‘‘தத்ராயம் பாளிமுத்தகோ’’தி ஆரபி⁴த்வா ஸப்³ப³பரிக்கா²ரேஸு வண்ணமட்ட²ம், ஸவிகாரம் வா கரோந்தஸ்ஸ ஆபத்தி து³க்கடந்தி தீ³பேந்தேன ‘‘ந வட்டதீ’’தி வுத்தந்தி வேதி³தப்³ப³ம். ஏத்தா²ஹ – ‘‘அனுஜானாமி, பி⁴க்க²வே, ட²பேத்வா பஹரணிம் ஸப்³ப³ம் லோஹப⁴ண்ட³ம், ட²பேத்வா ஆஸந்தி³ம் பல்லங்கம் தா³ருபத்தம் தா³ருபாது³கம் ஸப்³ப³ம் தா³ருப⁴ண்ட³ம், ட²பேத்வா கதகஞ்ச கும்ப⁴காரிகஞ்ச ஸப்³ப³ம் மத்திகாப⁴ண்ட³’’ந்தி (சூளவ. 293) வுத்தத்தா யதா²ட²பிதம் வஜ்ஜேத்வா இதரம் ஸப்³ப³ம் வண்ணமட்ட²ம்பி ஸவிகாரம்பி அவிஸேஸேன வட்டதீதி? வுச்சதே – தம் ந யுத்தம் யதா²த³ஸ்ஸிதபாளிவிரோத⁴தோ, தஸ்மா ‘‘ட²பேத்வா பஹரணி’’ந்தி ஏவம் ஜாதிவஸேன அயம் பாளி பவத்தா, யதா²த³ஸ்ஸிதா பாளி வண்ணமட்டா²தி³விகாரபடிஸேத⁴னவஸேன பவத்தாதி ஏவம் உப⁴யம்பி ந விருஜ்ஜ²தி, தஸ்மா யதா²வுத்தமேவ. ஆரக்³கே³ன நிகா²த³னக்³கே³ன, ‘‘ஆரக்³கே³ரிவ ஸாஸபோ’’தி (ம. நி. 2.458; த⁴. ப. 401; ஸு. நி. 630) ஏத்த² வுத்தனயதோ ஆரக்³கே³ன.

பட்டமுகே² வாதி பட்டகோடியம். பரியந்தேதி சீவரபரியந்தே. வேணிஉஹுமுனியுபேஞ்ஞாம. அக்³கி⁴யந்தி சேதியம். க³யமுக்³க³ரந்தி துலாத³ண்ட³ஸண்டா²னம், க³யா ஸீஸே ஸூசிகா ஹோதி, முக²பத்தா லத்³ரா. உக்கிரந்தி நீஹரந்தி கரோந்தி ட²பேந்தி. கோணஸுத்தபிளகா நாம க³ண்டி²கபட்டாதி³கோணேஸு ஸுத்தமயபிளகா. யம் ஏத்த² சீவரம் வா பத்தோ வா ‘‘ந வட்டதீ’’தி வுத்தோ, தத்த² அதி⁴ட்டா²னம் ருஹதி, விகப்பனாபி ருஹதீதி வேதி³தப்³ப³ம். தே³ட்³டு³போ⁴தி உத³கஸப்போ. அச்சீ²தி குஞ்ஜரக்கி². கோ³முத்தகந்தி கோ³முத்தஸண்டா²னா ராஜியோ. குஞ்சிகாய ஸேனாஸனபரிக்கா²ரத்தா ஸுவண்ணரூபியமயாபி வட்டதீதி சா²யா தி³ஸ்ஸதி, ‘‘குஞ்சிகாய வண்ணமட்ட²கம்மம் ந வட்டதீ’’தி வசனதோ அஞ்ஞே கப்பியலோஹாதி³மயாவ குஞ்சிகா கப்பந்தி பரிஹரணீயபரிக்கா²ரத்தா. ஆரகண்டகோ போத்த²காதி³கரணஸத்த²கஜாதி. ‘‘ஆமண்ட³கஸாரகோ ஆமலகப²லமயோ’’தி வத³ந்தி. தாலபண்ணபீ³ஜனீஆதீ³ஸு ‘‘வண்ணமட்ட²கம்மம் வட்டதீ’’தி வுத்தம். கிஞ்சாபி தானி குஞ்சிகா விய பரிஹரணீயானி, அத² கோ² ‘‘உச்சாவசானி ந தா⁴ரேதப்³பா³னீ’’தி படிக்கே²பாபா⁴வதோ வுத்தம். கேவலஞ்ஹி தானி ‘‘அனுஜானாமி, பி⁴க்க²வே, விதூ⁴பனஞ்ச தாலவண்டஞ்சா’’திஆதி³னா (சூளவ. 269) வுத்தானி. க³ண்டி²பதே³ பன ‘‘தேலபா⁴ஜனேஸு வண்ணமட்ட²கம்மம் வட்டதீதி ஸேனாஸனபரிக்கா²ரத்தா’’தி வுத்தம். ராஜவல்லபா⁴தி ராஜகுலூபகா. ஸீமாதி இதா⁴தி⁴ப்பேதா பூ⁴மி, ப³த்³த⁴ஸீமா ச. ‘‘யேஸம் ஸந்தகா தேஸம் ஸீமா, தத்த² பரேஹி ந கத்தப்³ப³’’ந்தி அனுக³ண்டி²பதே³ வுத்தம். ‘‘பூ⁴மி ச ஸீமா ச யேஸம் ஸந்தகா, தேஹி ஏவ வாரேதப்³பா³. யேஸம் பன அஞ்ஞேஸம் பூ⁴மியம் ஸீமா கதா, தே வாரேதும் ந இஸ்ஸரா’’தி வத³ந்தி. ‘‘ஸங்க⁴பே⁴தா³தீ³னம் காரணத்தா ‘மா கரோதா²’தி படிஸேதே⁴தப்³பா³ ஏவா’’தி அந்த⁴கட்ட²கதா²யம் வுத்தம் கிர.

86-7. தா³ருகுடிகம் காதும், கத்துந்தி ச அத்தி². க²ண்டா³க²ண்டி³கந்தி ப²லாப²லம் விய த³ட்ட²ப்³ப³ம். ஆணாபேஹீதி வசனம் அனிட்டே² ஏவ வுச்சதீதி கத்வா ப³ந்த⁴ம் ஆணாபேஸி. இஸ்ஸரியமத்தாயாதி ஸமித்³தி⁴யம் மத்தாஸத்³தோ³தி ஞாபேதி.

88. ‘‘ஏவரூபம் வாசம் பா⁴ஸித்வா’’தி ச பாடோ². லோமேன த்வம் முத்தோ, மா புனபி ஏவரூபமகாஸீதி இத³ம் கிம் ப்³யாபாத³தீ³பகம், தா³ரூஸுபி லோப⁴க்க²ந்த⁴தீ³பகம் வசனம் ஸோதாபன்னஸ்ஸ ஸதோ தஸ்ஸ ராஜஸ்ஸ பதிரூபம். நனு நாம ‘‘புப்³பே³ கதம் ஸுகதம் ப⁴ந்தே, வதே³ய்யாத² புனபி யேனத்தோ²’’தி பவாரேத்வா அதீவ பீதிபாமோஜ்ஜம் உப்பாதே³தப்³ப³ம் தேன ஸியாதி? ஸச்சமேதம் ஸோதாபன்னத்தா அதீவ பு³த்³த⁴மாமகோ த⁴ம்மமாமகோ ஸங்க⁴மாமகோ ச, தஸ்மா பி⁴க்கூ²னம் அகப்பியம் அஸஹந்தோ, ஸிக்கா²பத³பஞ்ஞத்தியா ச ஓகாஸம் கத்துகாமோ ‘‘ஸுபயுத்தானி மே தா³ரூனீ’’தி துட்ட²சித்தோபி ஏவமாஹாதி வேதி³தப்³ப³ம். இமேஹி நாம ஏவரூபே டா²னே. ‘‘ஆக³தபதா³னுரூபேனாதி அஞ்ஞேஹி வா பதே³ஹி, இதோ தோ²கதரேஹி வா ஆக³தகாலே தத³னுரூபா யோஜனா காதப்³பா³’’தி க³ண்டி²பதே³ வுத்தம். ‘‘ந கேவலம் இமஸ்மிம்யேவ ஸிக்கா²பதே³, அஞ்ஞேஸுபி ஆக³ச்ச²ந்தி, தஸ்மா தத்த² தத்த² ஆக³தபதா³னுரூபேன யோஜனா வேதி³தப்³பா³’’தி அனுக³ண்டி²பதே³ வுத்தம். உஜ்ஜா²யனத்தோ² அதி³ன்னஸ்ஸாதி³ன்னத்தாவ, தே உஜ்ஜா²யிம்ஸு.

ருத்³ரதா³மகோ நாம ருத்³ரதா³மகாதீ³ஹி உப்பாதி³தோ. பா³ராணஸினக³ராதீ³ஸு தேஹி தேஹி ராஜூஹி போராணஸத்தா²னுரூபம் லக்க²ணஸம்பன்னா உப்பாதி³தா நீலகஹாபணா. தேஸம் கிர திபா⁴க³ம் அக்³க⁴தி ருத்³ரதா³மகோ, தஸ்மா தஸ்ஸ பாதோ³ து²ல்லச்சயவத்து² ஹோதி. மாஸகோ பன இத⁴ அப்பமாணம். கஹாபணோ கிஞ்சிகாலே ஊனவீஸதிமாஸகோ ஹோதி, கிஞ்சி காலே அதிரேகவீஸதிமாஸகோ. தஸ்மா தஸ்ஸ கஹாபணஸ்ஸ சதுத்த²பா⁴கோ³ பஞ்சமாஸகோ விய அதிரேகபஞ்சமாஸகோ வா ஊனபஞ்சமாஸகோ வா பாதோ³தி வேதி³தப்³ப³ம். இமஸ்ஸத்த²ஸ்ஸ தீ³பனத்த²ம் ‘‘ததா³ ராஜக³ஹே வீஸதிமாஸகோ கஹாபணோ ஹோதீ’’திஆதி³ வுத்தம். தத்த² ரஜதமயோ ஸுவண்ணமயோ தம்ப³மயோ ச கஹாபணோ ஹோதி. ஸுவண்ணபூ⁴மியம் விய பாதோ³பி யத்த² தம்ப³மயோவ கதோ ஹோதி, தத்த² ஸோவ பாதோ³தி ஆசரியோ. யஸ்மா பாதோ³ ஏகனீலகஹாபணக்³க⁴னகோ, தஸ்மா தஸ்ஸ பாத³ஸ்ஸ சதுத்த²பா⁴கோ³வ ஸியா பாதோ³தி ஏகே. இத³ம் ந யுஜ்ஜதி. யோ ச தத்த² பாதா³ரஹோ ப⁴ண்டோ³, தஸ்ஸ சதுத்த²பா⁴க³ஸ்ஸேவ பாராஜிகவத்து²பா⁴வப்பஸங்க³தோ. யதி³ பாதா³ரஹம் ப⁴ண்ட³ம் பாராஜிகவத்து², ஸித்³த⁴ம் ‘‘ஸோவ பாதோ³ பச்சி²மம் பாராஜிகவத்தூ²’’தி. ந ஹி ஸப்³ப³த்த² ப⁴ண்ட³ம் க³ஹேத்வா நீலகஹாபணக்³கே⁴ன அக்³கா⁴பேந்தி. யஸ்மா தஸ்ஸ தஸ்ஸேவ கஹாபணக்³கே⁴ன அக்³கா⁴பேந்தி, தஸ்மா தஸ்ஸ தஸ்ஸ ஜனபத³ஸ்ஸ பாதோ³வ பாதோ³தி தத³க்³க⁴னகமேவ பாத³க்³க⁴னகந்தி ஸித்³த⁴ம், ‘‘ஸோ ச கோ² போராணஸ்ஸ நீலகஹாபணஸ்ஸ வஸேன, ந இதரேஸந்தி யத்த² பன நீலகஹாபணா வளஞ்ஜம் க³ச்ச²ந்தி, தத்தே²வா’’தி கேசி வத³ந்தி, உபபரிக்கி²த்வா க³ஹேதப்³ப³ம்.

பத³பா⁴ஜனீயவண்ணனா

92. கா³மா வா அரஞ்ஞா வாதி லக்க²ணானுபஞ்ஞத்திகத்தா பட²மபஞ்ஞத்தியா ஆதி³ம்ஹி வுத்தா. யதோ வா அபக்கந்தா, ஸோ அமனுஸ்ஸோ நாம. ‘‘அமனுஸ்ஸகா³மம் அபாருபித்வா, கா³மப்பவேஸனஞ்ச அனாபுச்சா² பவிஸிதும் வட்டதீ’’தி அனுக³ண்டி²பதே³ வுத்தம். ‘‘யதோ கா³மதோ ஆக³ந்துகாமா ஏவ அபக்கந்தா, தம் கா³மம் ஏவம் பவிஸிதும் ந வட்டதீ’’தி வத³ந்தி ஏகே. கேசி பன ‘‘யக்க²பரிக்³க³ஹபூ⁴தோபி ஆபணாதீ³ஸு தி³ஸ்ஸமானேஸு ஏவ ‘கா³மோ’தி ஸங்க்²யம் க³ச்ச²தி, அதி³ஸ்ஸமானேஸு பவேஸனே அனாபத்தீ’’தி வத³ந்தி. ‘‘கா³மோ ஏவ உபசாரோ கா³மூபசாரோதி ஏவம் கம்மதா⁴ரயவஸேன க³ஹிதே குருந்த³ட்ட²கதா²தீ³ஸு வுத்தம்பி ஸுவுத்தமேவ ஹோதீ’’தி வத³ந்தி. ‘‘தஸ்ஸ க⁴ரூபசாரோ கா³மோதி ஆபஜ்ஜதீ’’தி வசனம் படிக்கி²பதி. ‘‘கா³மஸ்ஸுபசாரோ ச கா³மோ ச கா³மூபசாரோ சா’’தி வத³ந்தி, தம் விருஜ்ஜ²தி, ந. ‘‘இமேஸம் லாபா⁴தீ³ஸு லக்க²ணம் ஸந்தா⁴ய மஹாஅட்ட²கதா²யம் ‘க⁴ரம் க⁴ரூபசாரோ’திஆதி³ வுத்தம், தம் ந மயம் படிக்கி²பாமா’’தி ச வத³ந்தி. ‘‘கதபரிக்கே²போ சாதி க⁴ரஸ்ஸ ஸமந்ததோ தத்தகோ உபசாரோ நாமா’’தி க³ண்டி²பதே³ லிகி²தம். அனுக³ண்டி²பதே³ பன ‘‘யோ யோ அட்ட²கதா²வாதோ³ வா தே²ரவாதோ³ வா பச்சா² வுச்சதீதி இதோ அனாக³தம் ஸந்தா⁴ய வுத்தம், நாதீதம். யதி³ அதீதம்பி ஸந்தா⁴ய வுத்தம், மஹாபது³மதே²ரவாதோ³வ பமாணம் ஜாதந்தி ஆபஜ்ஜதி, தஸ்மா அனாக³தமேவ ஸந்தா⁴ய வுத்தந்தி ஆசரியா கத²யந்தீ’’தி வுத்தம். ஸேஸம்பீதி கா³மூபசாரலக்க²ணம்பி.

தத்ராயம் நயோதி தஸ்ஸ கா³மூபசாரஸ்ஸ க³ஹணே அயம் நயோ. விகாலேகா³மப்பவேஸனாதீ³ஸூதி ஏத்த² ‘‘கா³மப்பவேஸனஞ்ஹி ப³ஹி ஏவ ஆபுச்சி²தப்³ப³’’ந்தி க³ண்டி²பதே³ வுத்தம். ‘‘தம் அட்ட²கதா²ய ந ஸமேதீ’’தி வத³ந்தி. ‘‘கா³மஸங்கா²தூபசாரம் ஸந்தா⁴ய வுத்த’’ந்தி க³ஹிதே ஸமேதீதி மம தக்கோ. ‘‘ஆதி³-ஸத்³த³தோ க⁴ரே டி²தானம் தி³ன்னலாப⁴பா⁴ஜனாதீ³னீ’’தி க³ண்டி²பதே³ வுத்தம். ‘‘கா³மூபசாரே டி²தானம் பாபுணிதப்³ப³லாப⁴ம் ஸஞ்சிச்ச அதே³ந்தானம் பாராஜிக’’ந்தி அனுக³ண்டி²பதே³ வுத்தம். கிஞ்சாபி குருந்தி³ஆதீ³ஸு பாளியம் வுத்தவசனானுலோமவஸேன வுத்தத்தா ‘‘பமாத³லேகா²’’தி ந வத்தப்³ப³ம், மஹாஅட்ட²கதா²யம் வுத்தவினிச்ச²யோ ஸங்கீ³திதோ பட்டா²ய ஆக³தோ. ‘‘யஞ்சேதம் மஹாஅட்ட²கதா²ய’’ந்திஆதி³ ஸீஹளதீ³பே அட்ட²கதா²சரியேஹி வுத்தம் ‘‘வினிச்ச²யனயோ’’தி ச. லேட்³டு³பாதேனேவ பரிச்சி²ந்தி³தப்³போ³தி பரிக்கே²பாரஹட்டா²னம், ந உபசாரம். ஸோ ஹி ததோ அபரேன லேட்³டு³பாதேன பரச்சி²ன்னோ. இமஸ்மிம் அதி³ன்னாதா³னஸிக்கா²பதே³தி நியமேன அஞ்ஞத்த² அஞ்ஞதா²தி அத்த²தோ வுத்தம் ஹோதி. தேன வா நியமேன யதா²ருதவஸேனாபி அத்தோ² இத⁴ யுஜ்ஜதி. அபி⁴த⁴ம்மே பனாதிஆதி³னா அஞ்ஞதா²பி அத்தா²பத்திஸித்³த⁴ம் த³ஸ்ஸேதி.

‘‘பரிச்சாகா³தி³ம்ஹி அகதே ‘இத³ம் மம ஸந்தக’ந்தி அவிதி³தம்பி பரபரிக்³க³ஹிதமேவ புத்தகானம் பிது அச்சயேன ஸந்தகம் விய, தம் அத்த²தோ அபரிச்சத்தே ஸங்க³ஹம் க³ச்ச²தீ’’தி க³ண்டி²பதே³ வுத்தம். ‘‘தே²னஸ்ஸ கம்மம் தே²ய்யம், தே²னேன க³ஹேதப்³ப³பூ⁴தம் ப⁴ண்ட³ம். தே²ய்யந்தி ஸங்கா²தந்தி தே²ய்யஸங்கா²த’’ந்தி போராணக³ண்டி²பதே³ வுத்தம். தம் தே²ய்யம் யஸ்ஸ தே²னஸ்ஸ கம்மம், ஸோ யஸ்மா தே²ய்யசித்தோ அவஹரணசித்தோ ஹோதி, தஸ்மா ‘‘தே²ய்யஸங்கா²த’’ந்தி பத³ம் உத்³த⁴ரித்வா ‘‘தே²ய்யசித்தோ அவஹரணசித்தோ’’தி பத³பா⁴ஜனம்பி தேஸம் போராணானம் யுஜ்ஜதேவ, ததா²பி அட்ட²கதா²யம் வுத்தனயேனேவ க³ஹேதப்³ப³ம். ‘‘யஞ்ச புப்³ப³பா⁴கே³ ‘அவஹரிஸ்ஸாமீ’தி பவத்தம் சித்தம், யஞ்ச க³மனாதி³ஸாத⁴கம், பராமஸனாதி³ஸாத⁴கம் வா மஜ்ஜே² பவத்தம், யஞ்ச டா²னாசாவனபயோக³ஸாத⁴கம், தேஸு அயமேவேகோ பச்சி²மோ சித்தகோட்டா²ஸோ இத⁴ அதி⁴ப்பேதோ ‘தே²னோ’தி அபரே’’தி அனுக³ண்டி²பதே³ வுத்தம். ஊனமாஸகமாஸபாதா³தீ³ஸு ‘‘அவஹரணசித்தேஸு ஏகசித்தகோட்டா²ஸோதி ஆசரியா வத³ந்தீ’’தி வுத்தம்.

பஞ்சவீஸதிஅவஹாரகதா²வண்ணனா

பஞ்சவீஸதி அவஹாரா நாம வசனபே⁴தே³னேவ பி⁴ன்னா, அத்த²தோ பன அபி⁴ன்னா. ஆகுலா து³விஞ்ஞேய்யவினிச்ச²யாதி ஆசரியானம் முகே² ஸந்திகே ஸப்³பா³காரேன அக்³க³ஹிதவினிச்ச²யானம் து³விஞ்ஞேய்யா. து³கதிகபட்டா²னபாளி (பட்டா². 5.1.1 ஆத³யோ, து³கதிகபட்டா²னபாளி) விய ஆகுலா து³விஞ்ஞேய்யவினிச்ச²யா, கேவலம் தம் ஆசரியா புப்³பா³பரவிரோத⁴மகத்வா ஸங்கீ³திதோ பட்டா²ய ஆக³தனயமவினாஸேத்வா வண்ணயந்தீதி ‘‘பட்டா²னபாளிமிவாதி அபரே வத³ந்தீ’’தி ச வுத்தா. போராணாதி ஸங்கீ³திஆசரியா. அயமேத்த² ஸாமீசி ஏவ, ஸசே ந தே³தி, ஆபத்தி நத்தி², பாராஜிகப⁴யா பன யதா² ஸிக்கா²காமோ தே³தி, ஏவம் தா³தப்³ப³மேவ. யானி பனேத்த² வத்தூ²னி, தானி ஸீஹளதீ³பே ஆசரியேஹி ஸங்கா⁴தீ³னமனுமதியா அட்ட²கதா²ஸு பக்கி²த்தானி, ‘‘அனாக³தே ப்³ரஹ்மசாரீனம் ஹிதத்தா²ய போத்த²காருள்ஹகாலதோ பச்சா²பீ’’தி வுத்தம். ஆணத்திகம் ஆணத்திக்க²ணேபி க³ண்ஹாதி, காலந்தரேனாபி அத்த²ஸாத⁴கோ, காலந்தரம் ஸந்தா⁴யாதி இத³மேதேஸம் நானத்தம். ப⁴ட்டே²தி அபக³தே. அந்தரஸமுத்³தே³ அதுருமுஹுதே³. ப²ரதி ஸாதே⁴தி. நவதோ⁴தோதி நவகதோ. பாஸாணஸக்க²ரந்தி பாஸாணஞ்ச ஸக்க²ரஞ்ச.

பூ⁴மட்ட²கதா²தி³வண்ணனா

94. மஹாஅட்ட²கதா²யம் பன ஸச்சேபி அலிகேபி து³க்கடமேவ வுத்தம், தம் பமாத³லிகி²தந்தி வேதி³தப்³ப³ந்தி யதே²தரஹி யுத்தியா க³ஹேதப்³பா³. தத்த² ‘‘சதுவக்³கே³ன ட²பேத்வா உபஸம்பத³பவாரணஅப்³பா⁴னாதி³ஸப்³ப³ம் ஸங்க⁴கம்மம் காதும் வட்டதி’’ச்சேவ வத்தப்³பே³ ‘‘உபஸம்பத³பவாரணகதி²னப்³பா⁴னாதீ³னீ’’தி லிக²ந்தீதி வேதி³தப்³ப³ம். தம் ஆசரியா ‘‘பமாத³லேகா²’’த்வேவ வண்ணயந்தி, தேன வுத்தம் ‘‘பமாத³லிகி²த’’ந்தி. யம் யம் வசனம் முஸா, தத்த² தத்த² பாசித்தியந்தி வுத்தம். து³க்கடஸ்ஸ வசனே பயோஜனாபா⁴வா ‘‘அதி³ன்னாதா³னஸ்ஸ புப்³ப³பயோகே³’’தி வுத்தம். அஞ்ஞேஸம்பி புப்³ப³பயோகே³ பாசித்தியட்டா²னே பாசித்தியமேவ. பமாத³லிகி²தந்தி ஏத்த² இத⁴ அதி⁴ப்பேதமேவ க³ஹேத்வா அட்ட²கதா²யம் வுத்தந்தி க³ஹிதே ஸமேதி விய. ஆசரியா பன ‘‘பாசித்தியட்டா²னே பாசித்திய’’ந்தி வத்வா து³க்கடே விஸும் வத்தப்³பே³ ‘‘ஸச்சாலிகே’’தி ஸாமஞ்ஞதோ வுத்தத்தா ‘‘பமாத³லேகா²’’தி வத³ந்தீதி வேதி³தப்³பா³தி. ‘‘குஸலசித்தேன க³மனே அனாபத்தீ’’தி வுத்தத்தா ‘‘தா³னஞ்ச த³ஸ்ஸாமீ’’தி வசனேன அனாபத்தி விய.

பாசித்தியட்டா²னே து³க்கடா ந முச்சதீதி பாசித்தியேன ஸத்³தி⁴ம் து³க்கடமாபஜ்ஜதி. ப³ஹுகாபி ஆபத்தியோ ஹோந்தூதி க²ணனப்³யூஹனுத்³த⁴ரணேஸு த³ஸ த³ஸ கத்வா ஆபத்தியோ ஆபன்னோ, தேஸு உத்³த⁴ரணே த³ஸ பாசித்தியோ தே³ஸேத்வா முச்சதி, ஜாதிவஸேன ‘‘ஏகமேவ தே³ஸேத்வா முச்சதீ’’தி குருந்தி³யம் வுத்தம், தஸ்மா புரிமேன ஸமேதி. ‘‘ஸமோதா⁴னேத்வா த³ஸ்ஸிதபயோகே³ ‘‘து³க்கட’’ந்தி வுத்தத்தா ஸமானபயோகா³ ப³ஹுது³க்கடத்தம் ஞாபேதி. க²ணனே ப³ஹுகானீதி ஸமானபயோக³த்தா ந படிப்பஸ்ஸம்ப⁴தி. அட்ட²கதா²சரியப்பமாணேனாதி யதா² பனேத்த², ஏவம் அஞ்ஞேஸுபி ஏவரூபானி அட்ட²கதா²ய ஆக³தவசனானி ஸங்கீ³திதோ பட்டா²ய ஆக³தத்தா க³ஹேதப்³பா³னீதி அத்தோ². ‘‘இத⁴ து³தியபாராஜிகே க³ஹேதப்³பா³, ந அஞ்ஞேஸூ’’தி த⁴ம்மஸிரித்தே²ரோ கிராஹ. க³ண்டி²பதே³ பன ‘‘புரிமக²ணனம் பச்சி²மம் பத்வா படிப்பஸ்ஸம்ப⁴தி, தேனேவ ஏகமேவ தே³ஸேத்வா முச்சதீ’’தி வுத்தம், ‘‘விஸபா⁴க³கிரியம் வா பத்வா புரிமம் படிப்பஸ்ஸம்ப⁴தீ’’தி ச வுத்தம்.

ஏவம் ஏகட்டா²னே டி²தாய கும்பி⁴யா டா²னாசாவனஞ்சேத்த² ச²ஹாகாரேஹி வேதி³தப்³ப³ந்தி ஸம்ப³ந்தோ⁴. கும்பி⁴யாதி பு⁴ம்மவசனம். உத்³த⁴ம் உக்கி²பந்தோ கேஸக்³க³மத்தம்பி பூ⁴மிதோ மோசேதி, பாராஜிகந்தி ஏத்த² முக²வட்டியா பு²ட்டோ²காஸம் பு³ந்தே³ன மோசிதே ‘‘டா²னாசாவனஞ்சேத்த² ச²ஹாகாரேஹி வேதி³தப்³ப³’’ந்தி இமினா ஸமேதி, ததா² அவத்வா ‘‘பூ⁴மிதோ முத்தே கேஸக்³க³மத்தம்பி அதிக்கந்தே பூ⁴மிதோ மோசிதம் நாம ஹோதீ’’தி த³ள்ஹம் கத்வா வத³ந்தி, உபபரிக்கி²த்வா க³ஹேதப்³ப³ம். ஏத்த² ஏகச்சே ஏவம் அத்த²ம் வத³ந்தி ‘‘புப்³பே³ க²ணந்தேன அவஸேஸட்டா²னானி வியோஜிதானி, தஸ்மிம் விமுத்தே பாராஜிக’’ந்தி. ஸங்கே²பமஹாபச்சரியாதீ³ஸு வுத்தவசனஸ்ஸ பமாத³லேக²பா⁴வோ ‘‘அத்தனோ பா⁴ஜனக³தம் வா கரோதி, முட்டி²ம் வா சி²ந்த³தீ’’தி வசனேன தீ³பிதோ.

யம் பன ‘‘பீதமத்தே பாராஜிக’’ந்தி வுத்தம், தம் யதே²தரஹி ‘‘பஞ்சவிஞ்ஞாணா உப்பன்னவத்து²கா உப்பன்னாரம்மணா’’தி பத³ஸ்ஸ ‘‘உப்பன்னவத்து²காஹி அனாக³தபடிக்கே²போ’’தி அட்ட²கதா²வசனம் ‘‘அஸம்பி⁴ன்னவத்து²கா அஸம்பி⁴ன்னாரம்மணா புரேஜாதவத்து²கா புரேஜாதாரம்மணா’’தி வசனமபேக்கி²த்வா அதீதானாக³தபடிக்கே²போதி பரிவத்தேதி, ததா² தாதி³ஸேஹி பரிவத்த’ந்தி வேதி³தப்³ப³ம். ந ஹி அட்ட²கதா²சரியா புப்³பா³பரவிருத்³த⁴ம் வத³ந்தி. யம் பன ஆசரியா ‘‘இத³ம் பமாத³லிகி²த’’ந்தி அபனேத்வா படிக்கி²பித்வா வசனகாலே வாசேந்தி, உத்³தி³ஸந்தி, தமேவ ச இமினாபி ஆசரியேன ‘‘பமாத³லிகி²த’’ந்தி படிக்கி²த்தம். யஞ்ச ஸுத்தம் த³ஸ்ஸேத்வா தே படிக்கி²பந்தி, தமேவ ச த³ஸ்ஸேந்தேன இமினா படிக்கி²த்தம், தேன வுத்தம் ‘‘தம் பன தத்தே²வா’’திஆதி³.

அனாபத்திமத்தமேவ வுத்தந்தி நேவ அவஹாரோ ந கீ³வா அனாபத்தீதி ப்³யஞ்ஜனதோவ பே⁴தோ³, ந அத்த²தோதி த³ஸ்ஸனத்த²ம். தம் பமாத³லிகி²தம் கதரேஹீதி சே? புப்³பே³ வுத்தப்பகாரேஹி, லேக²கேஹி வா, ஏஸ நயோ ஸப்³ப³த்த². ‘‘ந ஹி ததே³வ ப³ஹூஸு டா²னேஸு யுத்ததோ பாராஜிகமஹுத்வா கத்த²சி ஹோதீ’’தி ஸப்³ப³ம் அனுக³ண்டி²பதே³ வுத்தம். து³ட்ட²பிதம் வா ட²பேதீதி ஏத்த² ததோ பக்³க⁴ரிஸ்ஸதீதி டா²னாசாவனம் ஸந்தா⁴ய கதத்தா பாராஜிகம் தம் பன க³ண்ஹது வா மா வா தத்தே²வ ‘‘பி⁴ந்த³தீ’’திஆதி³வசனதோ வேதி³தப்³ப³ம். ‘‘தத்தே²வாதி டா²னாசாவனம் அகரோந்தோவ டா²னா அசாவேதுகாமோவ கேவலம் ‘பி⁴ந்த³தீ’தி அட்ட²கதா²வசனதோ ச ஞாபேதப்³ப³’’ந்தி அஞ்ஞதரஸ்மிம் க³ண்டி²பதே³ வுத்தம். ததா² ‘‘பக்³க⁴ரிதேஹி திந்தபம்ஸும் க³ஹேத்வா உத³கே பக்கி²பித்வா பசித்வா க³ஹேதும் ஸக்கா, தஸ்மா க³ஹணமேவ ஸந்தா⁴ய வுத்த’’ந்தி அபரே. ‘‘ரித்தகும்பி⁴யா உபரி கரோதி, ப⁴ண்ட³தே³ய்ய’’ந்தி வுத்தம், தம் ஆணத்தியா விருஜ்ஜ²தி, ‘‘யதா³ ஸக்கோஸி, ததா³ தம் ப⁴ண்ட³ம் அவஹரா’’தி அத்த²ஸாத⁴கோ ஆணத்திகாலே ஏவ பாராஜிகம். அபிச ஆவாடகாதீ³னி தா²வரபயோகா³னி ச ஏத்த² ஸாத⁴கானி. நத்தி² காலகதபயோகா³னி பாராஜிகவத்தூ²னீதி தஸ்மா உபபரிக்கி²தப்³ப³ந்தி ஏகே. யத்த² யத்த² ‘‘அபரே’’தி வா ‘‘ஏகே’’தி வா வுச்சதி, தத்த² தத்த² ஸுட்டு² உபபரிக்கி²த்வா யுத்தம் க³ஹேதப்³ப³ம், இதரம் ச²ட்³டே³தப்³ப³ம். வத³ந்தீதி ஆசரியா வத³ந்தி. ந, அஞ்ஞதா² க³ஹேதப்³ப³த்த²தோதி பாளிபரிஹரணத்த²ம் வுத்தம். ஏவமேகே வத³ந்தீதி தம் ந க³ஹேதப்³ப³ம். கஸ்மா? ‘‘பஸ்ஸாவம் வா ச²ட்³டே³தீ’’தி ச ‘‘அபரிபோ⁴க³ம் வா கரோதீ’’தி ச அத்த²தோ ஏகத்தா, அட்ட²கதா²ய ‘‘முக்³க³ரேன போதே²த்வா பி⁴ந்த³தீ’’தி வுத்தத்தாபி.

அயம் பனேத்த² ஸாரோதிஆதி³கதா²ய ‘‘அம்ஹாகம் ஆசரியஸ்ஸ வசன’’ந்தி த⁴ம்மஸிரித்தே²ரோ ஆஹ. ஸங்க³ஹாசரியானம் வாதோ³தி ஏகே. புப்³பே³ வுத்தாபி தே ஏவ, தஸ்மா வோஹாரவஸேனாதி அச²ட்³டே³துகாமம்பி ததா² கரோந்தம் ‘‘ச²ட்³டே³தீ’’தி வோஹரந்தி. ஏவமேதேஸம் பதா³னம் அத்தோ² க³ஹேதப்³போ³தி ஏவம் ஸந்தே ‘‘டா²னாசாவனஸ்ஸ நத்தி²தாய து³க்கட’’ந்தி அட்ட²கதா²வசனேன அதிவிய ஸமேதி, தத்த² டா²னாசாவனசித்தஸ்ஸ நத்தி²தாய டா²னா சுதம்பி ந ‘‘டா²னா சுத’’ந்தி வுச்சதீதி அத்தோ² க³ஹேதப்³போ³. இதரதா²பீதி தே²ய்யசித்தாபா⁴வா டா²னா சாவேதுகாமஸ்ஸபி து³க்கடம் யுஜ்ஜதி.

96. ஸயமேவ பதிதமோரஸ்ஸேவ இதோ சிதோ ச கரோதோ து²ல்லச்சயம். ஆகாஸட்ட²வினிச்ச²யே தப்பஸங்கே³ன தஸ்மிம் வேஹாஸாதி³க³தேபி அஸம்மோஹத்த²ம் ஏவம் க³ஹேதப்³ப³ந்தி வுத்தம். ‘‘ஏவமஞ்ஞத்ராபி ஸாமிஸே’’தி க³ண்டி²பதே³ வுத்தம். ‘‘டா²னாசாவனம் அகரோந்தோ சாலேதீ’’தி வசனதோ டா²னாசாவனே து²ல்லச்சயம் நத்தீ²தி வுத்தம் ஹோதி. கேசி அப²ந்தா³பேத்வா டா²னாசாவனாசாவனேஹிபி து³க்கடது²ல்லச்சயே வத³ந்தி. ‘‘தே டா²னாசாவனம் அகரோந்தோதி இமம் அட்ட²கதா²வசனம் த³ஸ்ஸேத்வா படிஸேதே⁴தப்³பா³’’தி கேசி வத³ந்தி, வீமம்ஸிதப்³ப³ம்.

97. சே²த³னமோசனாதி³ உபரிபா⁴க³ம் ஸந்தா⁴ய வுத்தம். அவஸ்ஸம் டா²னதோ ஆகாஸக³தம் கரோதி. ஏத்த² ‘‘ஏககோடிம் நீஹரித்வா ட²பிதே வம்ஸே டி²தஸ்ஸ ஆகாஸகரணம் ஸந்தா⁴யா’’தி கேசி வத³ந்தி. தே பன அத² ‘‘மூலம் அச்சே²த்வா வலயம் இதோ சிதோ ச ஸாரேதி, ரக்க²தி. ஸசே பன மூலதோ அனீஹரித்வாபி ஹத்தே²ன க³ஹேத்வா ஆகாஸக³தம் கரோதி, பாராஜிக’’ந்தி அட்ட²கதா²வசனம் த³ஸ்ஸேத்வா படிஸேதே⁴தப்³பா³. பி⁴த்தினிஸ்ஸிதந்தி பி⁴த்தியா உபத்த²ம்பி⁴தம் ஸந்தா⁴ய வுத்தந்தி ஏகே. பி⁴த்திம் நிஸ்ஸாய ட²பிதந்தி நாக³த³ந்தாதீ³ஸு டி²தம் ஸந்தா⁴ய வுத்தம். சி²ன்னமத்தேதி உபரி உக்³க³ந்த்வா டி²தம் ஸந்தா⁴ய வுத்தம்.

98. உபரி டி²தஸ்ஸ பிட்டி²யாதி ஏத்த² அதோ⁴ ஓஸாரணம் ஸந்தா⁴ய வுத்தம். ஹேட்டா² ஓஸாரேந்தஸ்ஸ உபரிமஸ்ஸ பிட்டி²யா ஹேட்டி²மேன டி²தோகாஸம் அதிக்கந்தமத்தே பாராஜிகம், உத்³த⁴ம் உக்கி²பந்தஸ்ஸ உத³கதோ முத்தமத்தே. ‘‘ஏவம் க³ஹிதே பூ⁴மட்டே² வுத்தேன ஸமேதீ’’தி வத³ந்தி. மதமச்சா²னம் டி²தட்டா²னமேவ டா²னம் கிர. தே²ய்யசித்தேன மாரேத்வா க³ண்ஹதோ ஊனபாத³க்³க⁴னகே து³க்கடம், ஸஹபயோக³த்தா பாசித்தியம் நத்தீ²தி ஏகே. மத³னப²லவஸாதீ³னீதி ஏத்த² ஸீஹளபா⁴ஸா கிர வஸ இதி விஸந்தி அத்தோ², க³ருளாகாரேன கதுப்பேயிதம் வா.

99. புப்³பே³ பாஸே ப³த்³த⁴ஸூகரஉபமாய வுத்தா ஏவ. ‘‘த²லே ட²பிதாய நாவாய ந பு²ட்டோ²காஸமத்தமேவா’’தி பாடோ². ‘‘வாதோ ஆக³ம்மாதி வசனதோ வாதஸ்ஸ நத்தி²காலே பயோக³ஸ்ஸ கதத்தா அவஹாரோ நத்தி², அத்தி²காலே சே கதோ, அவஹாரோவா’’தி வத³ந்தி. ‘‘ப⁴ண்ட³தே³ய்யம் பன கேஸந்தி சே? யேஸம் ஹத்தே² கஹாபணானி க³ஹிதானி, தேஸம் வா, நாவாஸாமினா நாவாய அக்³க³ஹிதாய நாவாஸாமிகஸ்ஸ வா’’தி அனுக³ண்டி²பதே³ வுத்தம்.

104. நிரம்பி³த்வா உபரி. அகதம் வா பன பதிட்ட²பேதீதி அபுப்³ப³ம் வா பட்ட²பேதீதி அத்தோ².

106. கா³மட்டே² வா ‘‘கா³மோ நாமா’’தி ந வுத்தம் பட²மம் கா³மலக்க²ணஸ்ஸ ஸப்³ப³ஸோ வுத்தத்தா.

107. அரஞ்ஞட்டே² அரஞ்ஞம் நாமாதி புன ந கேவலம் புப்³பே³ வுத்தலக்க²ணஞ்ஞேவ அரஞ்ஞந்தி இதா⁴தி⁴ப்பேதம், கிந்து பரபரிக்³க³ஹிதமேவ சேதம் ஹோதி, தம் இதா⁴தி⁴ப்பேதந்தி த³ஸ்ஸனத்த²ம் வுத்தம். தேனேவ அத்தே²பி அரஞ்ஞக்³க³ஹணம் கதம். அக்³கே³பி மூலேபி சி²ன்னாதி ஏத்த² ‘‘ந வேடே²த்வா டி²தா, சி²ன்னமத்தே பதனகம் ஸந்தா⁴ய வுத்த’’ந்தி வத³ந்தி. தச்சே²த்வா ட²பிதோதி அரஞ்ஞஸாமிகேஹி பரேஹி லத்³தே⁴ஹி தச்சே²த்வா ட²பிதோ. அத்³த⁴க³தோபீதி சிரகாலிகோபி. ‘‘ந க³ஹேதப்³போ³தி அரஞ்ஞஸாமிகேஹி அனுஞ்ஞாதேனபீ’’தி க³ண்டி²பதே³ வுத்தம். ச²ல்லியா பரியோனத்³த⁴ம் ஹோதீதி இமினா ஸாமிகானம் நிரபேக்க²தம் தீ³பேதி. தேன வுத்தம் ‘‘க³ஹேதும் வட்டதீ’’தி. யதி³ ஸாமிகானம் ஸாபேக்க²தா அத்தி², ந வட்டதி.

108. தத்த² ‘‘பா⁴ஜனேஸு போக்க²ரணீதளாகேஸு ச கா³வோ பக்கோஸதீதி இதோ பட்டா²ய தயோ த³ஸ வாரா ஆதி³மேவ த³ஸ்ஸேத்வா ஸம்கி²த்தா’’தி அனுக³ண்டி²பதே³ வுத்தம். நிப்³ப³ஹனஉத³கம் நாம தளாகரக்க²ணத்தா²ய அதி⁴கோத³கனிக்க²மனத்³வாரேன நிக்க²மனஉத³கம். ‘‘க³ஹேதும் ந லப⁴தீதி ஸாமீசிகம்மம் ந ஹோதீ’’தி அனுக³ண்டி²பதே³ வுத்தம். இதோ பட்டா²ய ‘‘வுத்த’’ந்தி வுத்தே அனுக³ண்டி²பதே³தி க³ஹேதப்³ப³ம். அனிக்க²ந்தே உத³கேதி பாட²ஸேஸோ, ஸுக்க²மாதிகாபயோக³த்தா ப⁴ண்ட³தே³ய்யம்பி ந ஹோதீதி அதி⁴ப்பாயோ. தளாகம் நிஸ்ஸாய கே²த்தஸ்ஸ கதத்தாதி ‘‘ஸப்³ப³ஸாதா⁴ரணம் தளாகம் ஹோதீ’’தி பட²மம் வுத்தத்தா தம் ஸந்தா⁴ய வுத்தம். ‘‘யஸ்மா தளாகக³தம் உத³கம் ஸப்³ப³ஸாதா⁴ரணம்பி மாதிகாய ஸதி தம் அதிக்கமித்வா க³ஹேதும் ந வட்டதி, தஸ்மா தம் ஸந்தா⁴ய குருந்தி³யாதீ³ஸு அவஹாரோதி வுத்த’’ந்தி அபரே ஆஹூதி. இமினா லக்க²ணேன ந ஸமேதீதி யஸ்மா ஸப்³ப³ஸாதா⁴ரணதே³ஸோ நாம தஞ்ச தளாகம் ஸப்³ப³ஸாதா⁴ரணம், கதிகாபா⁴வா ச மஹாஅட்ட²கதா²யம் வுத்தமேவ யுத்தந்தி ஆஹாசரியோ.

109. ‘‘ததோ பட்டா²ய அவஹாரோ நத்தீ²தி தே²ய்யாயபி க³ண்ஹதோ, தஸ்மா யதா²முண்ட³மஹாஜேதப்³ப³த்தா, அரக்கி²தப்³ப³த்தா, ஸப்³ப³ஸாதா⁴ரணத்தா ச அஞ்ஞம்பி ஸங்க⁴ஸந்தகம் இத³ம் ந ஹோதீ’’தி க³ண்டி²பதே³ வுத்தம்.

110. உஜுகமேவ திட்ட²தீதி ஏத்த² ‘‘ஸமீபே ருக்க²ஸாகா²தீ³ஹி ஸந்தா⁴ரிதத்தா ஈஸகம் க²லித்வா உஜுகமேவ திட்ட²தி சே, அவஹாரோ. சி²ன்னவேணு விய திட்ட²தி சே, அனாபத்தீ’’தி வுத்தம், தம் ஸுவுத்தம், தஸ்ஸ வினிச்ச²யே ‘‘ஸசே தானி ரக்க²ந்தீ’’தி வுத்தத்தா. நோ அஞ்ஞதா²தி ஸம்பத்தே சே வாதே வாதமுக²ஸோத⁴னம் கரோதி, பாராஜிகந்தி அத்தோ².

111. அஞ்ஞேஸு பன விசாரணா ஏவ நத்தீ²தி தேஸு அப்படிக்கி²பிதத்தா அயமேவ வினிச்ச²யோதி வுத்தம் ஹோதி. ‘‘ஏதேன து⁴ரனிக்கே²பம் கத்வாபி சோரேஹி ஆஹடம் சோதே³த்வா க³ண்ஹதோ அனாபத்தீதி தீ³பிதம் ஹோதீ’’தி வுத்தம்.

112. ஏஸேவ நயோதி உத்³தா⁴ரேயேவ பாராஜிகம், கஸ்மா? அஞ்ஞேஹி பத்தேஹி ஸாதா⁴ரணஸ்ஸ ஸஞ்ஞாணஸ்ஸ வுத்தத்தா. பத³வாரேனாதி சோரேன நீஹரித்வா தி³ன்னம் க³ஹேத்வா க³ச்ச²தோ. கா³மத்³வாரந்தி வோஹாரமத்தமேவ, கா³மந்தி அத்தோ² ஆணத்தியா த³ட்ட²ப்³ப³த்தா, த்³வின்னம்பி உத்³தா⁴ரே ஏவ பாராஜிகம். அஸுகம் நாம கா³மம் க³ந்த்வாதி வசனேன யாவ தஸ்ஸ கா³மஸ்ஸ பரதோ உபசாரோ, ஸப்³ப³மேதம் ஆணத்தமேவ ஹோதி. ‘‘ட²த்வா வா நிஸீதி³த்வா வா விஸ்ஸமித்வா புரிமதே²ய்யசித்தம் வூபஸமித்வா க³மனத்த²ஞ்சே ப⁴ண்ட³ம் ந நிக்கி²த்தம், யதா²க³ஹிதமேவ, பத³வாரேன காரேதப்³போ³தி, நிக்கி²த்தஞ்சே, உத்³தா⁴ரேனா’’தி ச லிகி²தம். கேவலம் ‘‘லிகி²த’’ந்தி வுத்தே க³ண்டி²பதே³ க³ஹேதப்³ப³ம். தே²ய்யசித்தேன பரிபு⁴ஞ்ஜந்தோதி டா²னாசாவனம் அகத்வா நிவத்த²பாருதனீஹாரேன ‘‘புப்³பே³வேத³ம் மயா க³ஹித’’ந்தி தே²ய்யசித்தேன பரிபு⁴ஞ்ஜந்தோ. ‘‘நட்டே² ப⁴ண்ட³தே³ய்யம் கிரா’’தி லிகி²தம். ‘‘அஞ்ஞோ வா’’தி வசனேன யேன ட²பிதம், தேன தி³ன்னே அனாபத்தீதி தீ³பிதம் ஹோதி கோ³பகஸ்ஸ தா³னே விய, ‘‘கேவலம் இத⁴ ப⁴ண்ட³தே³ய்யந்தி அபரே’’தி வுத்தம். ‘‘அஞ்ஞோ வா’’தி வசனதோ யேன ட²பிதம். ஸோ வாதிபி லப்³ப⁴தீதி விசாரேத்வா க³ஹேதப்³போ³. வா-ஸத்³தே³ன யஸ்ஸ ஹத்தே² ட²பிதம், ஸோ வா தே³தி ராஜக³ஹே க³ணகோ விய த⁴னியஸ்ஸ, தஸ்மா பாராஜிகம் யுத்தம் விய.

தவ தூ²லஸாடகோ லத்³தோ⁴தி வுத்தக்க²ணே முஸாவாதே³ து³க்கடம். தஸ்ஸ நாமம் லிகி²த்வாதி ஏத்த² ‘‘தேன ‘க³ஹேத்வா ட²பேய்யாஸீ’தி ஆணத்தத்தா நாமலேக²னகாலே அனாபத்தி குஸஸங்கமனஸதி³ஸம் ந ஹோதீ’’தி வுத்தம். ந ஜானந்தீதி ந ஸுணந்தீதி அத்தோ². ஸசே ஜானித்வாபி சித்தேன ந ஸம்படிச்ச²ந்தி ஏஸேவ நயோ. ஜானந்தேன பன ரக்கி²தும் அனிச்ச²ந்தே படிக்கி²பிதப்³ப³மேவ ஏதந்தி வத்தம் ஜானிதப்³ப³ம். உம்மக்³கே³னாதி புராபாணம் க²ணித்வா கதமக்³கே³னாதி அத்தோ².

நிஸ்ஸிதவாரிகஸ்ஸ பன ஸபா⁴கா³ ப⁴த்தம் தே³ந்தி, தஸ்மா யதா² விஹாரே பந்தி, ததே²வ காதப்³ப³ந்தி ஸம்பத்தவாரம் அக்³க³ஹேதும் ந லப⁴ந்தி, ‘‘தஸ்ஸ வா ஸபா⁴கா³ அதா³தும் ந லப⁴ந்தீ’’தி வுத்தம். அத்தது³தியஸ்ஸாதி ந ஹி ஏகேனானீதம் த்³வின்னம் பஹோதி, ஸசே பஹோதி பாபேதப்³போ³தி த³ஸ்ஸேதும் ‘‘யஸ்ஸ வா’’திஆதி³ வுத்தம். ‘‘பரிபுச்ச²ம் தே³தீதி புச்சி²தபஞ்ஹஸ்ஸ விஸ்ஸஜ்ஜனம் கரோதீ’’தி லிகி²தம். ஸங்க⁴ஸ்ஸ பா⁴ரம் நாம ‘‘ஸத்³த⁴ம்மவாசனா ஏவா’’தி வுத்தம், ‘‘நவகம்மிகோபி வுச்சதீ’’தி ச, ‘‘இதோ ப⁴ண்ட³தோ வட்டந்தம் புன அந்தோ பவிஸதீதி மஹாஅட்ட²கதா²பத³ஸ்ஸ குருந்தீ³ஸங்கே²பட்ட²கதா²ஹி அதி⁴ப்பாயோ விவரிதோ’’தி லிகி²தம்.

113. க³ச்ச²ந்தே யானே வாதி ஏத்த² ‘‘ஸுங்கட்டா²னஸ்ஸ ப³ஹி டி²தம் ஸந்தா⁴ய வுத்த’’ந்தி உபதிஸ்ஸத்தே²ரோ வத³தி கிர. ‘‘க³ச்ச²ந்தே யானே வாதிஆதி³ ஸுங்கட்டா²னப்³ப⁴ந்தரே க³ஹேதப்³ப³’’ந்தி வுத்தம். ப³ஹி டி²தஸ்ஸ வத்தப்³ப³மேவ நத்தி², ‘‘அந்தோ ட²த்வா’’தி அதி⁴காரே வுத்தத்தா சேதி யுத்தம் – யானாதீ³ஸு ட²பிதே தஸ்ஸ பயோக³ம் வினாயேவ க³தேஸு பாராஜிகோ ந ஹோதி. கஸ்மா ந ப⁴ண்ட³தே³ய்யந்தி சே? ஸுங்கட்டா²னஸ்ஸ ப³ஹி டி²தத்தா. அரஞ்ஞட்டே² ‘‘அஸ்ஸதியா அதிக்கமந்தஸ்ஸபி ப⁴ண்ட³தே³ய்யமேவா’’தி (பாரா. அட்ட². 1.107) வுத்தம் தேஸம் ஸபரிக்³க³ஹிதத்தா. இத⁴ பன ‘‘அத்ர பவிட்ட²ஸ்ஸா’’தி வசனதோ ந ப³ஹி டி²தஸ்ஸ, தம் கிர ஸுங்கஸங்கேதம். அஞ்ஞம் ஹராபேதீதி தத்த² ‘‘ஸஹத்தா²’’தி வசனதோ அனாபத்தி. நிஸ்ஸக்³கி³யானி ஹோந்தீதி அட்ட²கதா²தோ பாசித்தியம், உபசாரம் ஓக்கமித்வா பரிஹரணே ஸாதீ³னவத்தா து³க்கடம்.

ஸுங்கட்டா²னே ஸுங்கம் த³த்வாவ க³ந்தும் வட்டதீதி இத³ம் தா³னி வத்தப்³பா³னம் மாதிகாதி த⁴ம்மஸிரித்தே²ரோ. ‘‘அனுராத⁴புரஸ்ஸ சதூஸு த்³வாரேஸு ஸுங்கம் க³ண்ஹந்தி, தேஸு த³க்கி²ணத்³வாரஸ்ஸ புரதோ மக்³கோ³ தூ²பாராமதோ ஆனந்த³சேதியம் பத³க்கி²ணம் கத்வா ஜேதவனவிஹாரஸ்ஸந்தரபாகாரஸ்ஸாஸன்னே நிவிட்டோ², யோ ந கா³மம் பவிஸந்தோ உபசாரம் ஓக்கந்தோ ஹோதி. தூ²பாராமதோ ச மஹாசேதியம் பத³க்கி²ணம் கத்வா ராஜவிஹாரம் க³ச்ச²ந்தோ ந ஓக்கமதீ’’தி கிர மஹாஅட்ட²கதா²யம் ஆக³தம். ஏத்த² சாதி ஸுங்ககா⁴தே ‘‘த்³வீஹி லேட்³டு³பாதேஹீதி ஆசரியபரம்பராப⁴தா’’தி லிகி²தம். த்³வீஹி லேட்³டு³பாதேஹீதி ஸுங்ககா⁴தஸ்ஸ பரிச்சே²தே³ அட்ட²பிதே யுஜ்ஜதி, ட²பிதே பன அதிரேகயோஜனம்பி ஸுங்ககா⁴தம் ஹோதீதி ததோ பரம் த்³வே லேட்³டு³பாதா உபசாரோதி க³ஹேதப்³போ³. ஸோ பனேத்தா²பி து³விதோ⁴ பா³ஹிரப்³ப⁴ந்தரபே⁴த³தோ. தத்த² து³தியலேட்³டு³பாதஸங்கா²தம் பா³ஹிரோபசாரம் ஸந்தா⁴ய பாளியம், மஹாஅட்ட²கதா²யஞ்ச து³க்கடம் வுத்தம். அப்³ப⁴ந்தரம் ஸந்தா⁴ய குருந்தி³யந்தி நோ க²ந்தி. ‘‘அத்ர பவிட்ட²ஸ்ஸ ஸுங்கம் க³ண்ஹந்தூதி ஹி நியமிதட்டா²னம் ஏகந்ததோ பாராஜிககே²த்தம் ஹோதி, தஞ்ச பரிக்கி²த்தம், ஏகோ லேட்³டு³பாதோ து³க்கடகே²த்தம், அபரிக்கி²த்தஞ்சே, து³தியோ லேட்³டு³பாதோதி நோ அதி⁴ப்பாயோ’’தி ஆசரியோ வத³தி.

114. த⁴னம் பன க³தட்டா²னே வட்³ட⁴தீதி ஏத்த² ‘‘வட்³டி⁴யா ஸஹ அவஹாரகஸ்ஸ ப⁴ண்ட³தே³ய்ய’’ந்தி லிகி²தம். ‘‘தம் வட்³டி⁴ம் த³ஸ்ஸாமீ’’தி அக்³க³ஹேஸி, தத்த² கம்மம் அகரோந்தஸ்ஸ வட்³ட⁴தீதி கத்வா வுத்தம். கேவலம் ஆட²பிதகே²த்தஸ்ஸ ந வட்³ட⁴தி. ‘‘யம் த⁴னம் வட்³டி⁴, தம் தே³ந்தஸ்ஸ அவஹாரகஸ்ஸ வட்³டி⁴யா அதா³னே பாராஜிகம் ஹோதீ’’தி வத³ந்தி.

நாமேனாதி ஸப்பனாமேன வா ஸாமிகேன கதேன வா.

116. ராஜக⁴ரஸ்ஸ அந்தோவத்து²ம்ஹி, பரிக்கி²த்தராஜங்க³ணம் வா அந்தோவத்து². அபரிக்கி²த்தே ராஜங்க³ணே டி²தஸ்ஸ ஸகலனக³ரம் டா²னம். கோ³ணஸ்ஸ ‘‘அபரிக்கி²த்தே டி²தஸ்ஸ அக்கந்தட்டா²னமேவ டா²ன’’ந்தி வுத்தத்தா க²ண்ட³த்³வாரந்தி அத்தனா க²ண்டி³தச்சி²த்³த³ம். தத்தே²வ கா⁴தேதீதி ‘‘ஜீவிதிந்த்³ரியாரம்மணத்தா வத⁴கசித்தஸ்ஸ பாசித்தியம் ஹோதீதி? ந ஹோதி. கஸ்மா? அதி³ன்னாதா³னபயோக³த்தா. தம்பி தே²ய்யசித்தம் ஸங்கா²ராரம்மணம்வ ஹோதி. இத⁴ தது³ப⁴யம் லப⁴தி ஸத்³தி⁴ம் புப்³ப³பா⁴கா³பரபா⁴கே³ஹீ’’தி வுத்தம்.

118. தஸ்ஸுத்³தா⁴ரே ஸப்³பே³ஸம் பாராஜிகந்தி யதி³ யோ ஆணத்தோ அவஸ்ஸம் தம் ப⁴ண்ட³ம் ஹரதி, ஆணத்திக்க²ணே ஏவ பாராஜிகம். ‘‘இத⁴ திண்ணம் கஸ்மா பாராஜிகம், நனு ‘தும்ஹே, ப⁴ந்தே, தயோ ஹரதா²’தி வுத்தத்தா து²ல்லச்சயம், இதரேஸஞ்ச படிபாடியா ஏகேகஸ்ஸாணத்தத்தா ஏகேகேன ச து³க்கடேன ப⁴விதப்³ப³ம். கத²ம், ஏகோ கிர மாஸக்³க⁴னகம் பரிஸ்ஸாவனம் தே²னேத்வா தே³ஸேத்வா நிருஸ்ஸாஹோ ஏவ வா ஹுத்வா புன மாஸக்³க⁴னகம் ஸூசிம் ததே²வ கத்வா புன மாஸக்³க⁴னகந்தி ஏவம் ஸியாதி? ந ஏவம், தம் யதா² உப்பலதே²னகோ யேன வத்து² பூரதி தாவ ஸஉஸ்ஸாஹத்தா பாராஜிகோ ஆஸி, ஏவமிமே ஸஉஸ்ஸாஹாவ ந தே³ஸயிம்ஸு வா’’தி லிகி²தம், பாளியம், அட்ட²கதா²யஞ்ச ஸம்வித³ஹித்வா க³தேஸு ஏகஸ்ஸுத்³தா⁴ரே ஸப்³பே³ஸம் பாராஜிகம் வினா விய ஆணத்தியா கிஞ்சாபி வுத்தம், அத² கோ² ‘‘தஸ்ஸாயம் அத்தோ²’’தி வத்வா பச்சா² வுத்தவினிச்ச²யேஸு ச ஏகப⁴ண்ட³ஏகட்டா²னாதீ³ஸு ச ஸம்ப³ஹுலா ஏகம் ஆணாபேந்தீதி ஆணத்திமேவ நியமேத்வா வுத்தம், தஸ்மா ஆணத்தி இச்சி²தப்³பா³ விய, வீமம்ஸிதப்³ப³ம். ‘‘‘ஏகப⁴ண்ட³ம் ஏகட்டா²ன’ந்தி ச பாடோ² ‘ஏககுலஸ்ஸ ப⁴ண்ட³’ந்தி வசனதோ’’தி வத³ந்தி.

119-120. ஓசரகே வுத்தனயேனேவாதி அவஸ்ஸம்ஹாரியே ப⁴ண்டே³. தம் ஸங்கேதந்தி தஸ்ஸ ஸங்கேதஸ்ஸ. அத² வா தம் ஸங்கேதம் அதிக்கமித்வா பச்சா² வா. அபத்வா புரே வா. ஏஸ நயோ தம் நிமித்தந்தி ஏத்தா²பி. அக்கி²னிக²ணனாதி³கம்மம் லஹுகம் இத்தரகாலம், தங்க²ணே ஏவ ப⁴ண்ட³ம் அவஹரிதும் ந ஸக்கா, கிஞ்சி ப⁴ண்ட³ம் தூ³ரம் ஹோதி, கிஞ்சி பா⁴ரியம், தம் க³ஹேதும் யாவ க³ச்ச²தி யாவ உக்கி²பதி, தாவ நிமித்தஸ்ஸ பச்சா² ஹோதி. ஸசே தம் ப⁴ண்ட³ம் அதி⁴க³தம் விய ஆஸன்னம், லஹுகஞ்ச, ஸக்கா நிமித்தக்க²ணே அவஹரிதும், தமேவ ஸந்தா⁴ய வுத்தம் கிந்தி? ந, புப்³பே³ வுத்தம்பி ‘‘ததோ பட்டா²ய தேனேவ நிமித்தேன அவஹரதீ’’தி வுச்சதி ஆரத்³த⁴த்தா. யதி³ ஏவம் ‘‘புரேப⁴த்தபயோகோ³ ஏஸோ’’தி வாரோ பமாணம் ஹோதி, ந ச தம் பமாணம் மஹாபது³மத்தே²ரவாத³ஸ்ஸ பச்சா² வுத்தத்தா, ந ஸங்கேதகம்மம் விய நிமித்தகம்மம் த³ட்ட²ப்³ப³ம். தத்த² ஹி காலபரிச்சே²தோ³ அத்தி², இத⁴ நத்தி², இத³மேவ தேஸம் நானத்தம்.

121. தஞ்ச அஸம்மோஹத்த²ந்தி ஏகோ ‘‘புரேப⁴த்தாதீ³ஸு வா, அக்கி²னிக²ணனாதீ³னி வா தி³ஸ்வா க³ண்ஹா’’தி, ஏகோ க³ஹேதப்³ப³ம் ப⁴ண்ட³னிஸ்ஸிதம் கத்வா ‘‘புரேப⁴த்தம் ஏவம் வண்ணஸண்டா²னம் ப⁴ண்ட³ம் க³ண்ஹா’’தி வத³தி, ஏவம்விதே⁴ஸு அஸம்மோஹத்த²ம் ஏவம்வித⁴ம் ஸங்கேதம் நிமித்தஞ்ச த³ஸ்ஸேதுந்தி ச, யதா²தி⁴ப்பாயந்தி து³தியோ ததியஸ்ஸ ததியோ சதுத்த²ஸ்ஸாதி ஏவம் படிபாடியா சே வத³ந்தீதி அத்தோ². ஸசே து³தியோ சதுத்த²ஸ்ஸ வதே³தி, ந யதா²தி⁴ப்பாயோதி ச. ‘‘படிக்³க³ஹிதமத்தேதி அவஸ்ஸம் சே படிக்³க³ண்ஹாதி, புப்³பே³வ து²ல்லச்சய’’ந்தி ச லிகி²தம். படிக்³க³ண்ஹகானம் து³க்கடம் ஸப்³ப³த்தோ²காஸாபா⁴வதோ ந வுத்தம். பாராஜிகாபஜ்ஜனேனேதம் து³க்கடம் ஆபஜ்ஜித்வா ஆபஜ்ஜந்தி கிர. அத்த²ஸாத⁴காணத்திசேதனாக²ணே ஏவ பாராஜிகோ ஹோதீதி அதி⁴ப்பாயோ. தத்த² மக்³க³ட்டா²னியம் கதரம், கதரம் ப²லட்டா²னியந்தி ‘‘அத்த²ஸாத⁴கசேதனா நாம மக்³கா³னந்தரப²லஸதி³ஸா’’தி வுத்தத்தா ப²லட்டா²னியா சேதனாதி ஸித்³த⁴ம். ஆணத்தி சே மக்³க³ட்டா²னியா ஸியா, சேதனாஸஹஜத்தா ந ஸம்ப⁴வதி, ததா² ப⁴ண்ட³ஸ்ஸ அவஸ்ஸம்ஹாரிதா ச ந ஸம்ப⁴வதி. ஆணத்திக்க²ணே ஏவ ஹி தம் அவஸ்ஸம்ஹாரிதம் ஜாதந்தி அவஹாரகஸ்ஸ படிக்³க³ண்ஹஞ்சே, தம்பி ந ஸம்ப⁴வதி அனாக³தத்தா. சேதனா சே மக்³க³ட்டா²னியா ஹோதி, ஆணத்திஆதீ³ஸு அஞ்ஞதரம், ப⁴ண்ட³ஸ்ஸ அவஸ்ஸம்ஹாரிதா ஏவ வா ப²லட்டா²னியா சே, அத்தோ² ந ஸம்ப⁴வதி. பாராஜிகாபத்தி ஏவ ஹி ப²லட்டா²னியா ப⁴விதுமரஹதி, ந அஞ்ஞந்தி ஏவம் தாவ இத⁴ ஓபம்மஸம்ஸந்த³னம் ஸம்ப⁴வதி சேதனா மக்³க³ட்டா²னியா, தஸ்ஸா பாராஜிகாபத்திபா⁴வோ ப²லட்டா²னியோ. யதா² கிம்? யதா² படிஸம்பி⁴தா³மக்³கே³ ‘‘ஸத்³தா⁴ய ஞாணம் த⁴ம்மபடிஸம்பி⁴தா³. ஸத்³தா⁴ய ஸத்³த³த்தே² ஞாணம் அத்த²படிஸம்பி⁴தா³’’தி ஏத்த² அஞ்ஞோ ஸத்³தோ⁴, அஞ்ஞோ ஸத்³தா⁴ய ஸத்³த³த்தோ²தி ஸித்³த⁴ம், யதா² ச ‘‘ஏகோ அமோஹஸங்கா²தோ த⁴ம்மோ ஸம்பயுத்தகானம் த⁴ம்மானம் ஹேதுபச்சயேன பச்சயோ அதி⁴பதிஸஹஜாதஅஞ்ஞமஞ்ஞனிஸ்ஸயஇந்த்³ரியமக்³க³ஸம்பயுத்தஅத்தி²அவிக³தபச்சயேன பச்சயோ’’தி ஏத்த² அமோஹோ த⁴ம்மோ அஞ்ஞோ, அஞ்ஞே தஸ்ஸ ஹேதுபச்சயதாத³யோதி ஸித்³த⁴ம். யதா² ச வினயபிடகே யானி ச² ஆபத்திஸமுட்டா²னானி, ஏவம் யதா²ஸம்ப⁴வம் ‘‘ஸத்த ஆபத்திக்க²ந்தா⁴’’தி வுச்சந்தி, தேஸம் அஞ்ஞா ஆபத்திஸமுட்டா²னதா, அஞ்ஞோ ஆபத்திக்க²ந்த⁴பா⁴வோதி ஸித்³த⁴ம். இமினா ஆபத்திக்க²ந்த⁴னயேன ஆபத்தாதி⁴கரணஸ்ஸ கதி டா²னானீதி? ஸத்த ஆபத்திக்க²ந்தா⁴ டா²னானீதி. கதி வத்தூ²னீதி? ஸத்த ஆபத்திக்க²ந்தா⁴ வத்தூ²னீதி. கதி பூ⁴மியோதி? ஸத்த ஆபத்திக்க²ந்தா⁴ பூ⁴மியோதி ஏவமாத³யோபி த³ஸ்ஸேதப்³பா³. ததா² ஹி தஸ்ஸா ஏவம் மக்³க³ட்டா²னியாய அத்த²ஸாதி⁴காய சேதனாய யஸ்மா அஞ்ஞா பாராஜிகாபத்திதா அனத்த²ந்தரபூ⁴தா ஆகாரவிஸேஸஸங்கா²தா ப²லட்டா²னியா அத்தி², தஸ்மா ‘‘அத்த²ஸாத⁴கசேதனா நாம மக்³கா³னந்தரப²லஸதி³ஸா’’தி வுத்தாதி வேதி³தப்³ப³ம். அத² வா கேவலம் த⁴ம்மனியாமத்தம்யேவ உபமத்தேன ஆசரியேன ஏவம் வுத்தந்திபி ஸம்ப⁴வதீதி ந தத்த² ஓபம்மஸம்ஸந்த³னம் பரியேஸிதப்³ப³ம், ‘‘இத³ம் ஸப்³ப³ம் கேவலம் தக்கவஸேன வுத்தத்தா விசாரேத்வா க³ஹேதப்³ப³’’ந்தி ஆசரியோ.

பூ⁴மட்ட²கதா²தி³வண்ணனா நிட்டி²தா.

ஆபத்திபே⁴த³வண்ணனா

122. ‘‘விப⁴ங்க³னயத³ஸ்ஸனதோ’’தி வுத்தத்தா தம் ஸம்பாதே³தும் ‘‘இதா³னி தத்த² தத்தா²’’திஆதி³ ஆரத்³த⁴ம். தத்த² அங்க³வத்து²பே⁴தே³ன சாதி அவஹாரங்க³ஜானனபே⁴தே³ன வத்து²ஸ்ஸ ஹரிதப்³ப³ப⁴ண்ட³ஸ்ஸ க³ருகலஹுகபா⁴வபே⁴தே³னாதி அத்தோ². அத² வா அங்க³ஞ்ச வத்து²பே⁴தே³ன ஆபத்திபே⁴த³ஞ்ச த³ஸ்ஸேந்தோதி அத்தோ². அதிரேகமாஸகோ ஊனபஞ்சமாஸகோதி ஏத்த² வா-ஸத்³தோ³ ந வுத்தோ, தீஹிபி ஏகோ ஏவ பரிச்சே²தோ³ வுத்தோதி. அனஜ்ஜா²வுட்ட²கம் நாம அரஞ்ஞபாலகாதி³னா ந கேனசி மமாயிதம். ச²ட்³டி³தம் நாம அனத்தி²கபா⁴வேன அதிரேகமத்தாதி³னா ஸாமிகேன ச²ட்³டி³தம். நட்ட²ம் பரியேஸித்வா சி²ன்னாலயத்தா சி²ன்னமூலகம். அஸ்ஸாமிகவத்தூ²தி அச்சி²ன்னமூலகம்பி யஸ்ஸ ஸாமிகோ கோசி நோ ஹோதி, நிரபேக்கா² வா பரிச்சஜந்தி, யம் வா பரிச்சத்தம் தே³வதாதீ³னம், இத³ம் ஸப்³ப³ம் அஸ்ஸாமிகவத்து² நாம. தே³வதாதீ³னம் வா பு³த்³த⁴த⁴ம்மானம் வா பரிச்சத்தம் பரேஹி சே ஆரக்க²கேஹி பரிக்³க³ஹிதம், பரபரிக்³க³ஹிதமேவ. ததா²ரூபே ஹி அதி³ன்னாதா³னே ராஜானோ சோரம் க³ஹேத்வா ஹனனாதி³கம் கரேய்யும், அனாரக்க²கே பன ஆவாஸே, அபி⁴க்கு²கே அனாராமிகாதி³கே ச யம் பு³த்³த⁴த⁴ம்மஸ்ஸ ஸந்தகம், தம் ‘‘ஆக³தாக³தேஹி பி⁴க்கூ²ஹி ரக்கி²தப்³ப³ம் கோ³பேதப்³ப³ம் மமாயிதப்³ப³’’ந்தி வசனதோ அபி⁴க்கு²காவாஸஸங்க⁴ஸந்தகம் விய பரபரிக்³க³ஹிதஸங்க்²யமேவ க³ச்ச²தீதி சா²யா தி³ஸ்ஸதி. இஸ்ஸரோ ஹி யோ கோசி பி⁴க்கு² தாதி³ஸே பரிக்கா²ரே சோரேஹிபி க³ய்ஹமானே வாரேதும் படிப³லோ சே, ப³லக்காரேன அச்சி²ந்தி³த்வா யதா²டா²னே ட²பேதுந்தி. அபரிக்³க³ஹிதே பரஸந்தகஸஞ்ஞிஸ்ஸ ச²ஸு ஆகாரேஸு விஜ்ஜமானேஸுபி அனாபத்தி விய தி³ஸ்ஸதி, ‘‘யம் பரபரிக்³க³ஹிதஞ்ச ஹோதீ’’தி அங்க³பா⁴வோ கிஞ்சாபி தி³ஸ்ஸதி, பரஸந்தகே ததா² படிபன்னகே ஸந்தா⁴ய வுத்தந்தி க³ஹேதப்³ப³ம். அத்தனோ ஸந்தகம் சோரேஹி ஹடம், சோரபரிக்³க³ஹிதத்தா பரபரிக்³க³ஹிதம் ஹோதி, தஸ்மா பரோ சேதம் தே²ய்யசித்தோ க³ண்ஹதி, பாராஜிகம். ஸாமிகோ ஏவ சே க³ண்ஹதி, ந பாராஜிகம், யஸ்மா சோதே³த்வா, அச்சி²ந்தி³த்வா ச ஸோ ‘‘மம ஸந்தகம் க³ண்ஹாமீ’’தி க³ஹேதும் லப⁴தி. பட²மம் து⁴ரம் நிக்கி²பித்வா சே பச்சா² தே²ய்யசித்தோ க³ண்ஹதி, ஏஸ நயோ. ஸாமிகேன து⁴ரம் நிக்கி²த்தகாலே ஸோ சே சோரோ காலம் கரோதி, அஞ்ஞோ தே²ய்யசித்தேன க³ண்ஹதி, ந பாராஜிகோ. அனிக்கி²த்தகாலே ஏவ சே காலம் கரோதி, தம் தே²ய்யசித்தேன க³ண்ஹந்தஸ்ஸ பி⁴க்கு²னோ பாராஜிகம் மூலபி⁴க்கு²ஸ்ஸ ஸந்தகபா⁴வே டி²தத்தா. சோரபி⁴க்கு²ம்ஹி மதே ‘‘மதகபரிக்கா²ர’’ந்தி ஸங்கோ⁴ விப⁴ஜித்வா சே தம் க³ண்ஹதி, மூலஸாமிகோ ‘‘மம ஸந்தகமித³’’ந்தி க³ஹேதும் லப⁴தி.

ஏத்தா²ஹ – பூ⁴மட்டா²தி³னிமித்தகம்மபரியோஸானா ஏவ அவஹாரபே⁴தா³, உதா³ஹு அஞ்ஞேபி ஸந்தீதி. கிஞ்சேத்த² யதி³ அஞ்ஞேபி ஸந்தி, தேபி வத்தப்³பா³. ந ஹி ப⁴க³வா ஸாவஸேஸம் பாராஜிகம் பஞ்ஞபேதி. நோ சே ஸந்தி, யே இமே துலாகூடகம்ஸகூடமானகூடஉக்கோடனவஞ்சனனிகதிஸாசியோக³விபராமோஸஆலோபஸாஹஸாகாரா ச ஸுத்தங்கே³ஸு ஸந்தி³ஸ்ஸமானா, தே இத⁴ ஆக³தேஸு ஏத்த² ஸமோதா⁴னம் க³ச்ச²ந்தீதி ச லக்க²ணதோ வா தேஸம் ஸமோதா⁴னக³தபா⁴வோ வத்தப்³போ³தி? வுச்சதே – லக்க²ணதோ ஸித்³தோ⁴வ. கத²ம்? ‘‘பஞ்சஹி ஆகாரேஹீ’’திஆதி³னா நயேன அங்க³வத்து²பே⁴தே³ன. ஆபத்திபே⁴தோ³ ஹி பாளியம் (பாரா. 128-130) வுத்தோ ஏவ, அட்ட²கதா²யஞ்ச ‘‘கூடமானகூடகஹாபணாதீ³ஹி வா வஞ்சேத்வா க³ண்ஹதி, தஸ்ஸேவம் க³ண்ஹதோ அவஹாரோ தே²ய்யாவஹாரோ’’தி (பாரா. அட்ட². 1.138; கங்கா². அட்ட². து³தியபாராஜிகவண்ணனா) ஆக³தத்தா துலாகூடக³ஹணாத³யோ தே²ய்யாவஹாரே ஸமோதா⁴னம் க³தாதி ஸித்³த⁴ம். விபராமோஸஆலோபஸாஹஸாகாரா ச அட்ட²கதா²யாக³தே பஸய்ஹாவஹாரே ஸமோதா⁴னம் க³ச்ச²ந்தி. இமம்யேவ வா பஸய்ஹாவஹாரம் த³ஸ்ஸேதும் ‘‘கா³மட்ட²ம் அரஞ்ஞட்ட²’’ந்தி மாதிகம் நிக்கி²பித்வா ‘‘கா³மட்ட²ம் நாம ப⁴ண்ட³ம் சதூஹி டா²னேஹி நிக்கி²த்தம் ஹோதீ’’திஆதி³னா நயேன விபா⁴கோ³ வுத்தோ. தேனேத³ம் வுத்தம் ஹோதி – க³ஹணாகாரபே⁴த³ஸந்த³ஸ்ஸனத்த²ம் விஸும் கதம். ந ஹி பூ⁴மிதலாதீ³ஹி கா³மாரஞ்ஞட்ட²ம் யம் கிஞ்சீதி. தத்த² யம் துலாகூடம், தம் ரூபகூடங்க³க³ஹணபடிச்ச²ன்னகூடவஸேன சதுப்³பி³த⁴ம்பி வேஹாஸட்டே² ஸமோதா⁴னம் க³ச்ச²தி. ஹத³யபே⁴த³ஸிகா²பே⁴த³ரஜ்ஜுபே⁴த³வஸேன திவிதே⁴ மானகூடே ‘‘ஸ்வாயம் ஹத³யபே⁴தோ³ மரியாத³ம் சி²ந்த³தீ’’தி ஏத்த² ஸமோதா⁴னம் க³ச்ச²தி. ஹத³யபே⁴தோ³ ஹி ஸப்பிதேலாதி³மினனகாலே லப்³ப⁴தி. ‘‘ப²ந்தா³பேதி அத்தனோ பா⁴ஜனக³தம் கரோதீ’’தி ஏத்த² ஸிகா²பே⁴தோ³பி லப்³ப⁴தி. ஸோ ‘‘திலதண்டு³லாதி³மினனகாலே லப்³ப⁴தீ’’தி வுத்தம். கே²த்தமினனகாலே ரஜ்ஜுபே⁴தோ³ ஸமோதா⁴னம் க³ச்ச²தி. ‘‘த⁴ம்மம் சரந்தோ ஸாமிகம் பராஜேதீ’’தி ஏத்த² உக்கோடனம் ஸமோதா⁴னம் க³ச்ச²தீதி தே ச ததா² வஞ்சனனிகதியோபி.

ஆபத்திபே⁴த³வண்ணனா நிட்டி²தா.

அனாபத்திபே⁴த³வண்ணனா

131. ந ச க³ஹிதே அத்தமனோ ஹோதி, தஸ்ஸ ஸந்தகம் விஸ்ஸாஸகா³ஹேன க³ஹிதம்பி புன தா³தப்³ப³ந்தி இத³ம் ‘‘தேன கோ² பன ஸமயேன த்³வே பி⁴க்கூ² ஸஹாயகா ஹோந்தி. ஏகோ கா³மம் பிண்டா³ய பாவிஸி…பே… அனாபத்தி, பி⁴க்கு², விஸ்ஸாஸக்³கா³ஹே’’தி (பாரா. 146) இமினா அஸமேந்தம் விய தி³ஸ்ஸதி. ஏத்த² ஹி ‘‘ஸோ ஜானித்வா தம் சோதே³ஸி அஸ்ஸமணோஸி த்வ’’ந்தி வசனேன அனத்தமனதா தீ³பிதா. புன ‘‘அனாபத்தி, பி⁴க்கு², விஸ்ஸாஸக்³கா³ஹே’’தி வசனேன அத்தமனதாயபி ஸதி விஸ்ஸாஸக்³கா³ஹோ ருஹதீதி தீ³பிதந்தி சே? தம் ந, அஞ்ஞதா² க³ஹேதப்³ப³த்த²தோ. அயஞ்ஹேத்த² அத்தோ² – பாராஜிகாபத்தியா அனாபத்தி விஸ்ஸாஸஸஞ்ஞாய கா³ஹே ஸதி, ஸோபி பி⁴க்கு² ஸஹாயகத்தா ந குத்³தோ⁴ சோதே³ஸி, பியோ ஏவ ஸமானோ ‘‘கச்சி அஸ்ஸமணோஸி த்வம், க³ச்ச², வினிச்ச²யம் கத்வா ஸுத்³த⁴ந்தே திட்டா²ஹீ’’தி சோதே³ஸி. ஸசேபி ஸோ குத்³தோ⁴ ஏவ சோதே³ய்ய, ‘‘அனாபத்தீ’’தி இத³ம் கேவலம் பாராஜிகாபா⁴வம் தீ³பேதி, ந விஸ்ஸாஸக்³கா³ஹஸித்³த⁴ம். யோ பன பரிஸமஜ்ஜே² லஜ்ஜாய அதி⁴வாஸேதி, ந கிஞ்சி வத³தீதி அத்தோ². ‘‘புனவத்துகாமதாதி⁴ப்பாயே பன ஸோபி பச்சாஹராபேதும் லப⁴தீ’’தி வுத்தம். ஸசே சோரோ பஸய்ஹ க³ஹேதுகாமோபி ‘‘அதி⁴வாஸேத², ப⁴ந்தே, இத⁴ மே சீவரானீ’’தி வத்வா சீவரானி தே²ரேன தி³ன்னானி, அதி³ன்னானி வா ஸயம் க³ஹேத்வா க³ச்ச²தி, தே²ரோ புன பக்க²ம் லபி⁴த்வா சோதே³தும் லப⁴தி, புப்³பே³ அதி⁴வாஸனா அதி⁴வாஸனஸங்க்²யம் ந க³ச்ச²தி ப⁴யேன துண்ஹீபூ⁴தத்தா, ‘‘யம் சீவரம் இத⁴ ஸாமிகோ பச்சாஹராபேதும் லப⁴தீ’’தி வுத்தம். ஸாமிகஸ்ஸ பாகதிகம் காதப்³ப³ம், ‘‘இத³ம் கிர வத்த’’ந்தி வுத்தம். ஸசே ஸங்க⁴ஸ்ஸ ஸந்தகம் கேனசி பி⁴க்கு²னா க³ஹிதம், தஸ்ஸ தேன ஸங்க⁴ஸ்ஸ வா த⁴ம்மஸ்ஸ வா உபகாரிதா அத்தி², க³ஹிதப்பமாணம் அபலோகேத்வா தா³தப்³ப³ம். ‘‘ஸோ தேன யதா²க³ஹிதம் பாகதிகம் கத்வா அனணோ ஹோதி, கி³லானாதீ³னம்பி ஏஸேவ நயோ’’தி வுத்தம்.

பத³பா⁴ஜனீயவண்ணனா நிட்டி²தா.

பகிண்ணககதா²வண்ணனா

ஸாஹத்தி²காணத்திகந்தி ஏகப⁴ண்ட³ம் ஏவ. ‘‘பா⁴ரியஞ்ஹித³ம் த்வம்பி ஏகபஸ்ஸம் க³ண்ஹ, அஹம்பி ஏகபஸ்ஸம் க³ண்ஹாமீதி ஸம்வித³ஹித்வா உப⁴யேஸம் பயோகே³ன டா²னாசாவனே கதே காயவாசாசித்தேஹி ஹோதி. அஞ்ஞதா² ‘ஸாஹத்தி²கம் வா ஆணத்திகஸ்ஸ அங்க³ம் ந ஹோதி, ஆணத்திகம் வா ஸாஹத்தி²கஸ்ஸா’தி இமினா விருஜ்ஜ²தீ’’தி லிகி²தம். த⁴ம்மஸிரித்தே²ரோ பன ‘‘ந கேவலம் பா⁴ரியே ஏவ வத்து²ம்ஹி அயம் நயோ லப்³ப⁴தி, பஞ்சமாஸகமத்தம்பி த்³வே சே ஜனா ஸம்வித³ஹித்வா க³ண்ஹந்தி, த்³வின்னம்பி பாடேக்கம், ஸாஹத்தி²கம் நாம தம் கம்மம், ஸாஹத்தி²கபயோக³த்தா ஏகஸ்மிம்யேவ ப⁴ண்டே³, தஸ்மா ‘ஸாஹத்தி²கம் ஆணத்திகஸ்ஸ அங்க³ம் ந ஹோதீ’தி வசனமிமம் நயம் ந படிபா³ஹதி. ‘ஸாஹத்தி²கவத்து²அங்க³ந்தி ஸாஹத்தி²கஸ்ஸ வத்து²ஸ்ஸ அங்க³ம் ந ஹோதீ’தி தத்த² வுத்தம். இத⁴ பன பயோக³ம் ஸந்தா⁴ய வுத்தத்தா யுஜ்ஜதீ’’தி ஆஹ கிர, தம் அயுத்தம் காயவசீகம்மந்தி வசனாபா⁴வா, தஸ்மா ஸாஹத்தி²காணத்திகேஸு பயோகே³ஸு அஞ்ஞதரேன வாயமாபத்தி ஸமுட்டா²தி, ததா²பி துரிததுரிதா ஹுத்வா விலோபனாதீ³ஸு க³ஹணகா³ஹாபனவஸேனேதம் வுத்தம். யதா² காலேன அத்தனோ காலேன பரஸ்ஸ த⁴ம்மம் ஆரப்³ப⁴ ஸீக⁴ம் ஸீக⁴ம் உப்பத்திம் ஸந்தா⁴ய ‘‘அஜ்ஜ²த்தப³ஹித்³தா⁴ரம்மணா த⁴ம்மா’’தி (த⁴. ஸ. திகமாதிகா 21) வுத்தா, ஏவம்ஸம்பத³மித³ந்தி த³ட்ட²ப்³ப³ம்.

தத்த²பி யே அனுத்தராத³யோ ஏகந்தப³ஹித்³தா⁴ரம்மணா விஞ்ஞாணஞ்சாயதனாத³யோ ஏகந்தஅஜ்ஜ²த்தாரம்மணா, இதரே அனியதாரம்மணத்தா ‘‘அஜ்ஜ²த்தப³ஹித்³தா⁴ரம்மணா’’தி வுச்சந்தி, ந ஏகக்க²ணே உப⁴யாரம்மணத்தா. அயம் பன ஆபத்தி யதா²வுத்தனயேன ஸாஹத்தி²கா ஆணத்திகாபி ஹோதியேவ, தஸ்மா அனித³ஸ்ஸனமேதந்தி அயுத்தம். ‘‘யதா² அனியதாரம்மணத்தா ‘அஜ்ஜ²த்தப³ஹித்³தா⁴ரம்மணா’தி வுத்தா, ததா² அனியதபயோக³த்தா அயம்பி ஆபத்தி ‘ஸாஹத்தி²காணத்திகா’தி வுத்தாதி நித³ஸ்ஸனமேவேத’’ந்தி ஏகச்சே ஆசரியா ஆஹு. ‘‘இமே பனாசரியா உபி⁴ன்னம் ஏகதோ ஆரம்மணகரணம் நத்தி². அத்தி² சே, ‘அஜ்ஜ²த்தப³ஹித்³தா⁴ரம்மணம் த⁴ம்மம் படிச்ச அஜ்ஜ²த்தப³ஹித்³தா⁴ரம்மணோ த⁴ம்மோ உப்பஜ்ஜதி ஹேதுபச்சயா’திஆதி³னா (பட்டா². 2.21.1 அஜ்ஜ²த்தாரம்மணதிக) பட்டா²னபாடே²ன ப⁴விதப்³ப³ந்தி ஸஞ்ஞாய ஆஹம்ஸு, தேஸம் மதேன ‘ஸியா அஜ்ஜ²த்தப³ஹித்³தா⁴ரம்மணா’தி வசனம் நிரத்த²கம் ஸியா, ந ச நிரத்த²கம், தஸ்மா அத்தே²வ ஏகதோ அஜ்ஜ²த்தப³ஹித்³தா⁴ரம்மணோ த⁴ம்மோ. புன ‘அயம் ஸோ’தி நியமேன அஜ்ஜ²த்தப³ஹித்³தா⁴ரம்மணா த⁴ம்மா விய நித்³தி³ஸிதப்³பா³பா⁴வதோ ந உத்³த⁴டோ ஸியா. தத்த² அனுத்³த⁴டத்தா ஏவ த⁴ம்மஸங்க³ஹட்ட²கதா²யம் உபி⁴ன்னம்பி அஜ்ஜ²த்தப³ஹித்³தா⁴த⁴ம்மானம் ஏகதோ ஆரம்மணகரணத⁴ம்மவஸேன ‘அஜ்ஜ²த்தப³ஹித்³தா⁴ரம்மணா’தி அவத்வா ‘காலேன அஜ்ஜ²த்தப³ஹித்³தா⁴ பவத்தியம் அஜ்ஜ²த்தப³ஹித்³தா⁴ரம்மண’ந்தி வுத்தம், தஸ்மா க³ண்டி²பதே³ வுத்தனயோவ ஸாரோதி நோ தக்கோ’’தி ஆசரியோ. தத்த² ‘‘காயவசீகம்ம’’ந்தி அவசனம் பனஸ்ஸ ஸாஹத்தி²கபயோக³த்தா ஏகபயோக³ஸ்ஸ அனேககம்மத்தாவ, யதி³ ப⁴வேய்ய, மனோகம்மம்பி வத்தப்³ப³ம் ப⁴வேய்ய, யதா² தத்த² மனோகம்மம் விஜ்ஜமானம்பி அப்³போ³ஹாரிகம் ஜாதம், ஏவம் தஸ்மிம் ஸாஹத்தி²காணத்திகே வசீகம்மம் அப்³போ³ஹாரிகந்தி வேதி³தப்³ப³ம், தம் பன கேவலம் காயகம்மஸ்ஸ உபனிஸ்ஸயம் ஜாதம், சித்தம் விய தத்த² அங்க³மேவ ஜாதம், தஸ்மா வுத்தம் ‘‘ஸாஹத்தி²கபயோக³த்தா’’தி, ‘‘அங்க³பா⁴வமத்தமேவ ஹி ஸந்தா⁴ய ‘ஸாஹத்தி²காணத்திக’ந்தி வுத்தந்தி நோ தக்கோ’’தி ச, விசாரேத்வா க³ஹேதப்³ப³ம்.

காயவாசா ஸமுட்டா²னா, யஸ்ஸா ஆபத்தியா ஸியும்;

தத்த² கம்மம் ந தம் சித்தம், கம்மம் நஸ்ஸதி கீ²யதி.

கிரியாகிரியாதி³கம் யஞ்ச, கம்மாகம்மாதி³கம் ப⁴வே;

ந யுத்தம் தம் விருத்³த⁴த்தா, கம்மமேகம்வ யுஜ்ஜதி.

வினீதவத்து²வண்ணனா

132. அனாபத்தி, பி⁴க்கு², சித்துப்பாதே³தி ஏத்த² கேவலம் சித்தம், தஸ்ஸேவ உப்பாதே³தப்³பா³பத்தீஹி அனாபத்தீதி அத்தோ². ஏத்தா²ஹ – உபனிக்கி²த்தஸாதி³யனாதீ³ஸு, ஸப்³பே³ஸு ச அகிரியஸிக்கா²பதே³ஸு ந காயங்க³சோபனம் வா வாசங்க³சோபனம் வா, அபிசாபத்தி, கஸ்மா இமஸ்மிம்யேவ ஸிக்கா²பதே³ அனாபத்தி, ந ஸப்³பா³பத்தீஹீதி? ந, கஸ்மா.

கத்தப்³பா³ ஸாதி⁴கம் ஸிக்கா², விஞ்ஞத்திம் காயவாசிகம்;

அகத்வா காயவாசாஹி, அவிஞ்ஞத்தீஹி தம் பு²ஸே.

ந லேஸபா⁴வத்தா. ஸப்பாயே ஆரம்மணே அட்ட²த்வா படிலத்³தா⁴ஸேவனம் ஹுத்வா ததோ பரம் ஸுட்டு² தா⁴வதீதி ஸந்தா⁴வதி. ததோ அபி⁴ஜ்ஜா²ய ஸஹக³தம், ப்³யாபாத³ஸஹக³தம் வா ஹுத்வா விஸேஸதோ தா⁴வதீதி விதா⁴வதி.

137. வணம் கத்வா க³ஹேதுந்தி ஏத்த² கிஞ்சாபி இமினா ஸிக்கா²பதே³ன அனாபத்தி, இத்தி²ரூபஸ்ஸ நாம யத்த² ஆமஸந்தஸ்ஸ து³க்கடந்தி கேசி. ‘‘காயபடிப³த்³த⁴க்³க³ஹணம் யுத்தம், தம் ஸந்தா⁴ய வட்டதீதி வுத்த’’ந்தி வத³ந்தி. உப⁴யம் விசாரேத்வா க³ஹேதப்³ப³ம்.

குஸஸங்காமனவத்து²கதா²வண்ணனா

138. மஹாபச்சரியாதீ³ஸு யம் வுத்தம் ‘‘பது³த்³தா⁴ரேனேவ காரேதப்³போ³’’தி, தம் ஸுவுத்தம். கிந்து தஸ்ஸ பரிகப்பாவஹாரகமத்தம் ந தி³ஸ்ஸதீதி த³ஸ்ஸனத்த²ம் இத³ம் வுத்தம். உத்³தா⁴ரே வாயம் ஆபன்னோ, தஸ்மா தி³ஸ்வா க³ச்ச²ந்தோ ‘‘பது³த்³தா⁴ரேனேவ காரேதப்³போ³’’தி இத³ம் தத்த² து³வுத்தந்தி வுத்தம் ஹோதி. கத²ம்? ‘‘ஸாடகத்தி²கோ ஸாடகபஸிப்³ப³கமேவ க³ஹேத்வா ப³ஹி நிக்க²மித்வா ஸாடகபா⁴வம் ஞத்வா ‘பச்சா² க³ண்ஹிஸ்ஸாமீ’தி ஏவம் பரிகப்பேத்வா க³ண்ஹதி, ந உத்³தா⁴ரே ஏவாபஜ்ஜதி. யதா³ ப³ஹி ட²த்வா ‘ஸாடகோ அய’ந்தி தி³ஸ்வா க³ச்ச²தி, ததா³ பது³த்³தா⁴ரேனேவ காரேதப்³போ³’’தி ந வுத்தமேதம், கிந்து கிஞ்சாபி பரிகப்போ தி³ஸ்ஸதி, புப்³ப³பா⁴கே³ அவஹாரக்க²ணே ந தி³ஸ்ஸதீதி ந ஸோ பரிகப்பாவஹாரோ, அயமத்தோ² மஹாஅட்ட²கதா²யம் வுத்தோவ, தஸ்மா ‘‘ஞாயமேவா’’தி வத³ந்தி. கம்மந்தஸாலா நாம கஸ்ஸகானம் வனச்சே²த³கானம் கே³ஹானி. அயம் தாவாதி ஸசே உபசாரஸீமந்திஆதி³ யாவ தே²ரவாதோ³ மஹாஅட்ட²கதா²னயோ, தத்த² கேசி பனாதிஆதி³ ந க³ஹேதப்³ப³ம் தே²ரவாத³த்தா யுத்திஅபா⁴வதோ, ந ஹி ஸாஹத்தி²கே ஏவம்விதா⁴ அத்த²ஸாத⁴கசேதனா ஹோதி. ஆணத்திகே ஏவ அத்த²ஸாத⁴கசேதனா. ‘‘ஸேஸம் மஹாபச்சரியம் வுத்தேனத்தே²ன ஸமேதீ’’தி வுத்தம்.

குஸஸங்காமனகரணே ஸசே பரோ ‘‘நாயம் மம ஸந்தகோ’’தி ஜானாதி, இதரஸ்ஸ ஹத்த²தோ முத்தமத்தே பாராஜிகாபத்தி கீ²லஸங்காமனே விய. ‘‘அத்தனோ ஸந்தகம் ஸசே ஜானாதி, ந ஹோதீ’’தி வத³ந்தி. ஏவம் ஸந்தே பஞ்சகானி ஸங்கரானி ஹோந்தீதி உபபரிக்கி²தப்³ப³ம்.

140. பரானுத்³த³யதாயாதி ஏத்த² பரானுத்³த³யதாய கோடிப்பத்தேன ப⁴க³வதா கஸ்மா ‘‘அனாபத்தி பேதபரிக்³க³ஹே திரச்சா²னக³தபரிக்³க³ஹே’’தி (பாரா. 131) வுத்தந்தி சே? பரானுத்³த³யதாய ஏவ. யஸ்ஸ ஹி பரிக்கா²ரஸ்ஸ ஆதா³னே ராஜானோ சோரம் க³ஹேத்வா ந ஹனனாதீ³னி கரேய்யும், தஸ்மிம்பி நாம ஸமணோ கோ³தமோ பாராஜிகம் பஞ்ஞபேத்வா பி⁴க்கு²ம் அபி⁴க்கு²ம் கரோதீதி மஹாஜனோ ப⁴க³வதி பஸாத³ஞ்ஞத²த்தம் ஆபஜ்ஜித்வா அபாயுபகோ³ ஹோதி. அபேதபரிக்³க³ஹிதா ருக்கா²தீ³ ச து³ல்லபா⁴, ந ச ஸக்கா ஞாதுந்தி ருக்கா²தீ³ஹி பாபபீ⁴ருகோ உபாஸகஜனோ படிமாக⁴ரசேதியபோ³தி⁴க⁴ரவிஹாராதீ³னி அகத்வா மஹதோ புஞ்ஞக்க²ந்த⁴தோ பரிஹாயேய்ய. ‘‘ருக்க²மூலஸேனாஸனம் பம்ஸுகூலசீவரம் நிஸ்ஸாய பப்³ப³ஜ்ஜா’’தி (மஹாவ. 128) வுத்தனிஸ்ஸயா ச அனிஸ்ஸயா ஹோந்தி. பரபரிக்³க³ஹிதஸஞ்ஞினோ ஹி பி⁴க்கூ² ருக்க²மூலபம்ஸுகூலானி ந ஸாதி³யிஸ்ஸந்தீதி, பப்³ப³ஜ்ஜா ச ந ஸம்ப⁴வேய்யும், ஸப்பத³ட்ட²காலே சா²ரிகத்தா²ய ருக்க²ம் அக்³க³ஹேத்வா மரணம் வா நிக³ச்சே²ய்யும், அச்சி²ன்னசீவராதி³காலே ஸாகா²ப⁴ங்கா³தி³ம் அக்³க³ஹேத்வா நக்³கா³ ஹுத்வா தித்தி²யலத்³தி⁴மேவ ஸுலத்³தி⁴ விய தீ³பேந்தா விசரேய்யும், ததோ தித்தி²யேஸ்வேவ லோகோ பஸீதி³த்வா தி³ட்டி²க்³க³ஹணம் பத்வா ஸம்ஸாரகா²ணுகோ ப⁴வேய்ய, தஸ்மா ப⁴க³வா பரானுத்³த³யதாய ஏவ ‘‘அனாபத்தி பேதபரிக்³க³ஹே’’திஆதி³மாஹாதி வேதி³தப்³ப³ம்.

141. அபரம்பி பா⁴க³ம் தே³ஹீதி ‘‘க³ஹிதம் விஞ்ஞத்திஸதி³ஸத்தா நேவ ப⁴ண்ட³தே³ய்யம் ந பாராஜிக’’ந்தி லிகி²தம், இத³ம் பகதிஜனே யுஜ்ஜதி. ‘‘ஸசே பன ஸாமிகோ வா தேன ஆணத்தோ வா ‘அபரஸ்ஸ ஸஹாயபி⁴க்கு²ஸ்ஸ பா⁴க³ம் ஏஸ க³ண்ஹாதி யாசதி வா’தி யம் அபரபா⁴க³ம் தே³தி, தம் ப⁴ண்ட³தே³ய்ய’’ந்தி வத³ந்தி.

148-9. கா²த³ந்தஸ்ஸ ப⁴ண்ட³தே³ய்யந்தி சோரஸ்ஸ வா ஸாமிகஸ்ஸ வா ஸம்பத்தஸ்ஸ தி³ன்னம் ஸுதி³ன்னமேவ கிர. அவிஸேஸேனாதி ‘‘உஸ்ஸாஹக³தானம் வா’’தி அவத்வா வுத்தம், ந ஹி கதிபயானம் அனுஸ்ஸாஹதாய ஸங்கி⁴கமஸங்கி⁴கம் ஹோதி. மஹாஅட்ட²கதா²யம்பி ‘‘யதி³ ஸஉஸ்ஸாஹாவ க³ச்ச²ந்தி, தே²ய்யசித்தேன பரிபு⁴ஞ்ஜதோ அவஹாரோ ஹோதீ’’தி வுத்தத்தா தது³ப⁴யமேகம். ச²ட்³டி³தவிஹாரே உபசாரஸீமாய பமாணம் ஜானிதும் ந ஸக்கா, அயம் பன பி⁴க்கு² உபசாரஸீமாய ப³ஹி ட²த்வா க⁴ண்டிபஹரணாதி³ம் கத்வா பரிபு⁴ஞ்ஜதி கா²த³தி, தேன ஏவம் கா²தி³தம் ஸுகா²தி³தந்தி அத்தோ². ‘‘இதரவிஹாரே தத்த² தி³த்தவிதி⁴னாவ படிபஜ்ஜிதப்³ப³’’ந்தி வுத்தம். ‘‘ஸுகா²தி³தம் அந்தோவிஹாரத்தா’’தி லிகி²தம், ஆக³தானாக³தானம் ஸந்தகத்தாதி ‘‘சாதுத்³தி³ஸஸ்ஸ ஸங்க⁴ஸ்ஸ தே³மீ’’தி தி³ன்னத்தா வுத்தம். ஏவம் அவத்வா ‘‘ஸங்க⁴ஸ்ஸ தே³மீ’’தி தி³ன்னம்பி தாதி³ஸமேவ. ததா² ஹி ப³ஹி டி²தோ லாப⁴ம் ந லப⁴தி ப⁴க³வதோ வசனேனாதி வேதி³தப்³ப³ம்.

153. ‘‘மதஸூகரோ’’தி வசனதோ தமேவ ஜீவந்தம் ப⁴ண்ட³தே³ய்யந்தி கத்வா தா³தும் ந லப⁴தி. வஜ்ஜ²ம் வட்டதீதி தீ³பிதம் ஹோதி. மத்³த³ந்தோ க³ச்ச²தி, ப⁴ண்ட³தே³ய்யந்தி ஏத்த² கித்தகம் ப⁴ண்ட³தே³ய்யம், ந ஹி ஸக்கா ‘‘ஏத்தகா ஸூகரா மத்³தி³த்வா க³தா க³மிஸ்ஸந்தீ’’தி ஜானிதுந்தி? யத்தகே ஸாமிகானம் தி³ன்னே தே ‘‘தி³ன்னம் மம ப⁴ண்ட³’’ந்தி துஸ்ஸந்தி, தத்தகம் தா³தப்³ப³ம். நோ சே துஸ்ஸந்தி, அதிக்கந்தஸூகரமூலம் த³த்வா கிம் ஓபாதோ க²ணித்வா தா³தப்³போ³தி? ந தா³தப்³போ³. அத² கிம் சோதி³யமானஸ்ஸ உபி⁴ன்னம் து⁴ரனிக்கே²பேன பாராஜிகம் ஹோதீதி? ந ஹோதி, கேவலம் கப்பியபரிக்கா²ரம் த³த்வா தோஸேதப்³போ³வ ஸாமிகோ, ஏஸேவ நயோ அஞ்ஞேஸுபி ஏவரூபேஸூதி நோ தக்கோதி ஆசரியோ. ‘‘தத³ஹேவ வா து³தியதி³வஸே வா மத்³த³ந்தோ க³ச்ச²தீ’’தி வுத்தம். கு³ம்பே³ கி²பதி, ப⁴ண்ட³தே³ய்யமேவாதி அவஸ்ஸம் பவிஸனகே ஸந்தா⁴ய வுத்தம். ஏத்த² ஏகஸ்மிம் விஹாரே பரசக்காதி³ப⁴யம் ஆக³தம். மூலவத்து²ச்சே²த³ந்தி ‘‘ஸப்³ப³ஸேனாஸனம் ஏதே இஸ்ஸரா’’தி வசனதோ இதரே அனிஸ்ஸராதி தீ³பிதம் ஹோதி.

156. ஆராமரக்க²காதி விஸ்ஸட்ட²வஸேன க³ஹேதப்³ப³ம். அதி⁴ப்பாயம் ஞத்வாதி ஏத்த² யஸ்ஸ தா³னம் படிக்³க³ண்ஹந்தம் பி⁴க்கு²ம், பா⁴க³ம் வா ஸாமிகா ந ரக்க²ந்தி ந த³ண்டே³ந்தி, தஸ்ஸ தா³னம் அப்படிச்சா²தே³த்வா க³ஹேதும் வட்டதீதி இத⁴ ஸன்னிட்டா²னம். தம்பி ‘‘ந வட்டதி ஸங்கி⁴கே’’தி வுத்தம். அயமேவ பி⁴க்கு² இஸ்ஸரோதி யத்த² ஸோ இச்ச²தி, தத்த² அத்தஞாதஹேதும் லப⁴தி கிர அத்தோ². அபிச ‘‘த³ஹரோ’’தி வத³ந்தி. ஸவத்து²கந்தி ஸஹ பூ⁴மியாதி வுத்தம் ஹோதி. ‘‘க³ருப⁴ண்ட³ம் ஹோதீ’’தி வத்வா ‘‘திணமத்தம் பன ந தா³தப்³ப³’’ந்தி வுத்தம், தம் கிந்து க³ருப⁴ண்ட³ந்தி சே, அரக்கி²யஅகோ³பியட்டா²னே, வினஸ்ஸனகபா⁴வே ச டி²தம் ஸந்தா⁴ய வுத்தம். கப்பியேபி சாதி வத்வா, அவத்வா வா க³ஹணயுத்தே மாதாதி³ஸந்தகேபி தே²ய்யசித்துப்பாதே³ன. இத³ம் பன ஸிக்கா²பத³ம் ‘‘ராஜாபிமேஸம் அபி⁴ப்பஸன்னோ’’தி (பாரா. 86) வசனதோ லாப⁴க்³க³மஹத்தம், வேபுல்லமஹத்தஞ்ச பத்தகாலே பஞ்ஞத்தந்தி ஸித்³த⁴ம்.

து³தியபாராஜிகவண்ணனா நிட்டி²தா.