3. ததியபாராஜிகம்

பட²மபஞ்ஞத்தினிதா³னவண்ணனா

162. தீஹி ஸுத்³தே⁴னாதி ஏத்த² தீஹீதி நிஸ்ஸக்கவசனம் வா ஹோதி, கரணவசனம் வா. நிஸ்ஸக்கபக்கே² காயவசீமனோத்³வாரேஹி ஸுத்³தே⁴ன. ததா² து³ச்சரிதமலேஹி விஸமேஹி பபஞ்சேஹீதிஆதி³னா நயேன ஸப்³ப³கிலேஸத்திகேஹி போ³தி⁴மண்டே³ ஏவ ஸுத்³தே⁴னாதி யோஜேதப்³ப³ம். கரணபக்கே² தீஹீதி காயவசீமனோத்³வாரேஹி ஸுத்³தே⁴ன. ததா² தீஹி ஸுசரிதேஹி, தீஹி விமோக்கே²ஹி, தீஹி பா⁴வனாஹி, தீஹி ஸீலஸமாதி⁴பஞ்ஞாஹி ஸுத்³தே⁴னாதி ஸப்³ப³கு³ணத்திகேஹி யோஜேதப்³ப³ம். விபா⁴விதந்தி தே³ஸனாய வித்தா²ரிதம், விபூ⁴தம் வா கதம் விஹிதம், பஞ்ஞத்தம் வா ஹோதி. ஸம்வண்ணனாதி வத்தமானஸமீபே வத்தமானவசனம்.

ந கேவலம் ராஜக³ஹமேவ, இத³ம்பி நக³ரம். ஸபரிச்சே²த³ந்தி ஸபரியந்தந்தி அத்தோ². ஸபரிக்கே²பந்தி ஏகே. ‘‘ஹம்ஸவட்டகச்ச²த³னேனாதி ஹம்ஸபரிக்கே²பஸண்டா²னேனா’’தி லிகி²தம். காயவிச்சி²ந்த³னியகத²ந்தி அத்தனோ அத்தபா⁴வே, பரஸ்ஸ வா அத்தபா⁴வே ச²ந்த³ராக³ப்பஹானகரம் விச்சி²ந்த³னகரம் த⁴ம்மகத²ம் கதே²தி. அஸுபா⁴ சேவ ஸுபா⁴காரவிரஹிதத்தா. அஸுசினோ ச தோ³ஸனிஸ்ஸந்த³னபப⁴வத்தா. படிகூலா ச ஜிகு³ச்ச²னீயத்தா பித்தஸேம்ஹாதீ³ஸு ஆஸயதோ. அஸுபா⁴ய வண்ணந்தி அஸுபா⁴காரஸ்ஸ, அஸுப⁴கம்மட்டா²னஸ்ஸ வா வித்தா²ரம் பா⁴ஸதி. ஸாமிஅத்தே² ஹேதம் ஸம்பதா³னவசனம். அஸுப⁴ந்தி அஸுப⁴னிமித்தஸ்ஸ ஆவிபா⁴வாய பச்சுபட்டா²னாய வித்தா²ரகதா²ஸங்கா²தம் வண்ணம் பா⁴ஸபீ⁴தி அத்தோ². தேஸம்யேவ ஆதி³மஜ்ஜ²பரியோஸானானம் த³ஸஹி லக்க²ணேஹி ஸம்பன்னம் கிலேஸசோரேஹி அனபி⁴ப⁴வனீயத்தா ஜா²னசித்தம் மஞ்ஜூஸம் நாம.

தத்ரிமானீதி ஏத்தா²யம் பிண்ட³த்தோ² – யஸ்மிம் வாரே பட²மம் ஜா²னம் ஏகசித்தக்க²ணிகம் உப்பஜ்ஜதி, தம் ஸகலம்பி ஜவனவாரம் அனுலோமபரிகம்மஉபசாரகோ³த்ரபு⁴அப்பனாப்பபே⁴த³ம் ஏகத்தனயேன ‘‘பட²மம் ஜா²ன’’ந்தி க³ஹேத்வா தஸ்ஸ பட²மஜ்ஜா²னஸ்ஸ அப்பனாபடிபாதி³காய கி²ப்பாதி³பே⁴தா³ய அபி⁴ஞ்ஞாய அதி⁴க³தாய கிச்சனிப்ப²த்திம் உபாதா³ய ஆக³மனவஸேன படிபதா³விஸுத்³தி⁴ ஆதீ³தி வேதி³தப்³பா³. தத்ரமஜ்ஜ²த்துபேக்கா²ய கிச்சனிப்ப²த்திவஸேன உபேக்கா²னுப்³ரூஹனா மஜ்ஜே²தி வேதி³தப்³பா³. பரியோதா³பகஞாணஸ்ஸ கிச்சனிப்ப²த்திவஸேன ஸம்பஹம்ஸனா பரியோஸானந்தி வேதி³தப்³ப³ம். தத்த² ஆதி³சித்ததோ பட்டா²ய யாவ பட²மஜ்ஜா²னஸ்ஸ உப்பாத³க்க²ணம், ஏதஸ்மிம் அந்தரே படிபதா³விஸுத்³தீ⁴தி வேதி³தப்³பா³. உப்பாத³டி²திக்க²ணேஸு உபேக்கா²னுப்³ரூஹனா, டி²திப⁴ங்க³க்க²ணேஸு ஸம்பஹம்ஸனாதி வேதி³தப்³பா³. லக்கீ²யதி ஏதேனாதி லக்க²ணந்தி கத்வா ‘‘விஸுத்³தி⁴படிபத்திபக்க²ந்த³னே’’திஆதி³னா புப்³ப³பா⁴கோ³ லக்கீ²யதி, திவிதே⁴ன அஜ்ஜு²பேக்க²னேன மஜ்ஜ²ம் லக்கீ²யதி, சதுப்³பி³தா⁴ய ஸம்பஹம்ஸனாய பரியோஸானம் லக்கீ²யதீதி. தேன வுத்தம் ‘‘த³ஸ லக்க²ணானீ’’தி.

பாரிப³ந்த⁴கதோதி நீவரணஸங்கா²தபாரிப³ந்த⁴கதோ விஸுத்³த⁴த்தா கோ³த்ரபு⁴பரியோஸானம் புப்³ப³பா⁴க³ஜவனசித்தம் ‘‘சித்தவிஸுத்³தீ⁴’’தி வுச்சதி. ததா² விஸுத்³த⁴த்தா தம் சித்தம் மஜ்ஜி²மம் ஸமாதி⁴னிமித்தஸங்கா²தம் அப்பனாஸமாதி⁴ம் தத³த்தா²ய உபக³ச்ச²மானம் ஏகஸந்ததிவஸேன பரிணாமேந்தம் படிபஜ்ஜதி நாம. ஏவம் படிபன்னஸ்ஸ தஸ்ஸ தத்த² ஸமத²னிமித்தே பக்க²ந்த³னம் தப்³பா⁴வூபக³மனம் ஹோதீதி கத்வா ‘‘தத்த² சித்தபக்க²ந்த³ன’’ந்தி வுச்சதி. ஏவம் தாவ பட²மஜ்ஜா²னுப்பாத³க்க²ணே ஏவ ஆக³மனவஸேன படிபதா³விஸுத்³தி⁴ வேதி³தப்³பா³. ஏவம் விஸுத்³த⁴ஸ்ஸ அப்பனாப்பத்தஸ்ஸ புன விஸோத⁴னே ப்³யாபாராபா⁴வா அஜ்ஜு²பேக்க²னம் ஹோதி. ஸமத²ப்படிபன்னத்தா புன ஸமாதா⁴னே ப்³யாபாராபா⁴வா ச ஸமத²ப்படிபன்னஸ்ஸ அஜ்ஜு²பேக்க²னம் ஹோதி. கிலேஸஸம்ஸக்³க³ம் பஹாய ஏகந்தேன உபட்டி²தத்தா புன ஏகத்துபட்டா²னே ப்³யாபாராஸம்ப⁴வதோ ஏகத்துபட்டா²னஸ்ஸ அஜ்ஜு²பேக்க²னம் ஹோதி. தத்த² ஜாதானந்தி தஸ்மிம் சித்தே ஜாதானம் ஸமாதி⁴பஞ்ஞானம் யுக³னத்³த⁴பா⁴வேன அனதிவத்தனட்டே²ன நானாகிலேஸேஹி விமுத்தத்தா. ஸத்³தா⁴தீ³னம் இந்த்³ரியானம் விமுத்திரஸேனேகரஸட்டே²ன அனதிவத்தனேகஸபா⁴வானம் தேஸம் த்³வின்னம் உபக³தம் தஜ்ஜம் தஸ்ஸாருப்பம் தத³னுரூபம் வீரியம் ததா² சித்தம் யோகீ³ வாஹேதி பவத்தேதீதி கத்வா தது³பக³வீரியவாஹனட்டே²ன ச விஸேஸபா⁴கி³யபா⁴வத்தா ஆஸேவனட்டே²ன ச ஸம்பஹம்ஸனா ஹோதீதி அத்தோ² வேதி³தப்³போ³. அபிசேத்த² ‘‘அனந்தராதீதம் கோ³த்ரபு⁴சித்தம் ஏகஸந்ததிவஸேன பரிணாமேந்தம் படிபஜ்ஜதி நாமா’’தி லிகி²தம். தத்த² ஹி பரிணாமேந்தம் படிபஜ்ஜதீதி ஏதானி வசனானி அதீதஸ்ஸ ந ஸம்ப⁴வந்தி, யஞ்ச தத³னந்தரம் லிகி²தம் ‘‘அப்பனாஸமாதி⁴சித்தம் உபக³ச்ச²மானம் கோ³த்ரபு⁴சித்தம் தத்த² பக்க²ந்த³தி நாமா’’தி. இமினாபி தம் ந யுஜ்ஜதி, ‘‘படிபத்திக்க²ணே ஏவ அதீத’’ந்தி வுத்தத்தா ‘‘கோ³த்ரபு⁴சித்தம் தத்த² பக்க²ந்த³தீ’’தி வசனமேவ விருஜ்ஜ²தீதி ஆசரியோ. ‘‘ஏகசித்தக்க²ணிகம்பி லோகுத்தரசித்தம் ஆஸேவதி பா⁴வேதி ப³ஹுலீகரோதீ’’தி வுத்தத்தா ‘‘ஏகசித்தக்க²ணிகஸ்ஸாபி ஜா²னஸ்ஸ ஏதானி த³ஸ லக்க²ணானீ’’தி வுத்தம். ‘‘ததோ பட்டா²ய ஆஸேவனா பா⁴வனா ஏவா’’திபி வுத்தம். ‘‘அதி⁴ட்டா²னஸம்பன்னந்தி அதி⁴ட்டா²னேன ஸஹக³த’’ந்தி லிகி²தம். தஸ்ஸத்தோ² – யஞ்ச ‘‘ஆதி³மஜ்ஜ²பரியோஸானஸங்கா²த’’ந்தி வுத்தம், தம் தேஸம் திண்ணம்பி கல்யாணகதாய ஸமன்னாக³தத்தா திவித⁴கல்யாணகதஞ்ச. ஏவம் திவித⁴சித்தம் தத³தி⁴க³மமூலகானம் கு³ணானம், உபரிஜா²னாதி⁴க³மஸ்ஸ வா பத³ட்டா²னட்டே²ன அதி⁴ட்டா²னம் ஹோதி, தஸ்மா சித்தஸ்ஸ அதி⁴ட்டா²னபா⁴வேன ஸம்பன்னத்தா அதி⁴ட்டா²னஸம்பன்னம் நாமாதி.

அத்³த⁴மாஸம் படிஸல்லீயிதுந்தி ஏத்த² ஆசரியா ஏவமாஹு ‘‘பி⁴க்கூ²னம் அஞ்ஞமஞ்ஞவத⁴த³ஸ்ஸனஸவனஸம்ப⁴வே ஸத்து²னோ ஸதி தஸ்ஸ உபத்³த³வஸ்ஸ அபா⁴வே உபாயாஜானனதோ ‘அயம் அஸப்³ப³ஞ்ஞூ’தி ஹேதுபதிரூபகமஹேதும் வத்வா த⁴ம்மிஸ்ஸரஸ்ஸாபி ததா²க³தஸ்ஸ கம்மேஸ்வனிஸ்ஸரியம் அஸம்பு³ஜ்ஜ²மானா அஸப்³ப³த³ஸ்ஸிதமதி⁴ச்சமோஹா ப³ஹுஜனா அவீசிபராயனா ப⁴வேய்யும், தஸ்மா ஸோ ப⁴க³வா பகே³வ தேஸம் பி⁴க்கூ²னம் அஞ்ஞமஞ்ஞம் வத⁴மானபா⁴வம் ஞத்வா தத³பா⁴வோபாயாபா⁴வம் பன ஸுவினிச்சி²னித்வா தத்த² புது²ஜ்ஜனானம் ஸுக³திலாப⁴ஹேதுமேவேகம் கத்வா அஸுப⁴தே³ஸனாய வா ரூபஸத்³த³த³ஸ்ஸனஸவனேஹி நிப்பயோஜனேஹி விரமித்வா பகே³வ ததோ விரமணதோ, ஸுக³திலாப⁴ஹேதுகரணதோ, அவஸ்ஸம் பஞ்ஞாபிதப்³பா³ய ததியபாராஜிகபஞ்ஞத்தியா வத்தா²க³மத³ஸ்ஸனதோ ச அத்தனோ ஸப்³ப³த³ஸ்ஸிதம் பரிக்க²கானம் பகாஸேந்தோ விய தமத்³த⁴மாஸம் வேனேய்யஹிதனிப்ப²த்தியா ப²லஸமாபத்தியா அவகாஸம் கத்வா விஹரிதுகாமோ ‘இச்சா²மஹம், பி⁴க்க²வே, அத்³த⁴மாஸம் படிஸல்லீயிது’ந்திஆதி³மாஹா’’தி. ஆசரியா நாம பு³த்³த⁴மித்தத்தே²ரத⁴ம்மஸிரித்தே²ரஉபதிஸ்ஸத்தே²ராத³யோ க³ணபாமோக்கா², அட்ட²கதா²சரியஸ்ஸ ச ஸந்திகே ஸுதபுப்³பா³. ததோ அஞ்ஞே ஏகேதி வேதி³தப்³பா³. ‘‘ஸகேன காயேன அட்டீயந்தி…பே… ப⁴விஸ்ஸந்தீ’’தி இத³ம் பரதோ ‘‘யே தே பி⁴க்கூ² அவீதராகா³, தேஸம் தஸ்மிம் ஸமயே ஹோதி ஏவ ப⁴யம், ஹோதி லோமஹம்ஸோ, ஹோதி ச²ம்பி⁴தத்த’’ந்தி இமினா ந யுஜ்ஜதி, இத³ஞ்ச ப⁴க³வதோ அஸுப⁴கதா²ரம்மணப்பயோஜனேன ந ஸமேதீதி சே? ந, தத³த்தா²ஜானனதோ. ஸகேன காயேன அட்டீயந்தானம்பி தேஸம் அரியமக்³கே³ன அப்பஹீனஸினேஹத்தா கீ²ணாஸவானம் விய மரணம் படிச்ச அப⁴யம் ந ஹோதி, ப⁴யஞ்ச பன அஸுப⁴பா⁴வனானுயோகா³னுபா⁴வேன மந்தீ³பூ⁴தம் அனட்டீயந்தானம் விய ந மஹந்தம் ஹுத்வா சித்தம் மோஹேஸி. அபாயுபகே³ தே ஸத்தே நாகாஸீதி ஏவமத்தோ² வேதி³தப்³போ³. அத² வா இத³ம் புரிமஸ்ஸ காரணவசனம், யஸ்மா தேஸம் தஸ்மிம் ஸமயே ஹோதி ஏவ ப⁴யம், ச²ம்பி⁴தத்தம், லோமஹம்ஸோ ச, தஸ்மா ‘‘தேன கோ² பன ஸமயேன ப⁴க³வா அஸுப⁴கத²ம் கதே²தீ’’திஆதி³ வுத்தந்தி.

அத² வா ஸகேன காயேன அட்டீயந்தானம்பி தேஸம் ஹோதி ஏவ ப⁴யம், மஹானுபா⁴வா வீதராகா³தி கீ²ணாஸவானம் மஹந்தம் விஸேஸம் த³ஸ்ஸேதி, அதிது³ப்பஸஹேய்யமித³ம் மரணப⁴யம், யதோ ஏவம்விதா⁴னம்பி அவீதராக³த்தா ப⁴யம் ஹோதீதிபி த³ஸ்ஸேதி. தத³ஞ்ஞே தேஸம் பி⁴க்கூ²னம் பஞ்சஸதானம் அஞ்ஞதரா. தேனேத³ம் தீ³பேதி ‘‘தம் ததா² ஆக³தம் அஸிஹத்த²ம் வத⁴கம் பஸ்ஸித்வா தத³ஞ்ஞேஸம்பி ஹோதி ஏவ ப⁴யம், பகே³வ தேஸந்தி கத்வா ப⁴க³வா பட²மமேவ தேஸம் அஸுப⁴கத²ம் கதே²ஸி, பரதோ தேஸம் நாஹோஸி. ஏவம் மஹானிஸம்ஸா நேஸம் அஸுப⁴கதா² ஆஸீ’’தி. யோ பனேத்த² பச்சி²மோ நயோ, ஸோ ‘‘தேஸு கிர பி⁴க்கூ²ஸு கேனசிபி காயவிகாரோ வா வசீவிகாரோ வா ந கதோ, ஸப்³பே³ ஸதா ஸம்பஜானா த³க்கி²ணேன பஸ்ஸேன நிபஜ்ஜிம்ஸூ’’தி இமினா அட்ட²கதா²வசனேன ஸமேதி.

அபரே பனாஹூதி குலத்³தி⁴படிஸேத⁴னத்த²ம் வுத்தம். ‘‘அயம் கிர லத்³தீ⁴’’தி வசனம் ‘‘மாரதே⁴ய்யம்னாதிக்கமிஸ்ஸதீ’’தி வசனேன விருஜ்ஜ²தீதி சே? ந விருஜ்ஜ²தி. கத²ம்? அயம் பி⁴க்கூ² அகா⁴தேந்தோ மாரவிஸயம் அதிக்கமிஸ்ஸதி அகுஸலகரணதோ ச. கா⁴தேந்தோ பன மாரதே⁴ய்யம் நாதிக்கமிஸ்ஸதி ப³லவத்தா கம்மஸ்ஸாதி ஸயம் மாரபக்கி²கத்தா ஏவம் சிந்தேத்வா பன ‘‘யே ந மதா, தே ஸம்ஸாரதோ ந முத்தா’’தி அத்தனோ ச லத்³தி⁴, தஸ்மா தம் தத்த² உப⁴யேஸம் மக்³கே³ நியோஜேந்தீ ஏவமாஹ, தேனேவ ‘‘மாரபக்கி²கா மாரேன ஸமானலத்³தி⁴கா’’தி அவத்வா ‘‘மாரஸ்ஸா நுவத்திகா’’தி வுத்தா. ‘‘இமினா கிம் வுத்தம் ஹோதி? யஸ்மா மாரஸ்ஸ அனுவத்தி, தஸ்மா ஏவம் சிந்தேத்வாபி அத்தனோ லத்³தி⁴வஸேன ஏவமாஹா’’தி கேசி லிக²ந்தி. மம ஸந்திகே ஏகதோ உபட்டா²னமாக³ச்ச²ந்தி, அத்தனோ அத்தனோ ஆசரியுபஜ்ஜா²யானம் ஸந்திகே உத்³தே³ஸாதி³ம் க³ண்ஹாதி.

ஆனாபானஸ்ஸதிஸமாதி⁴கதா²வண்ணனா

165. அயம்பி கோ², பி⁴க்க²வேதி இமினா கிம் த³ஸ்ஸேதி? யேஸம் ஏவமஸ்ஸ ‘‘ப⁴க³வதா ஆசிக்கி²தகம்மட்டா²னானுயோக³பச்சயா தேஸம் பி⁴க்கூ²னம் ஜீவிதக்க²யோ ஆஸீ’’தி, தேஸம் தம் மிச்சா²கா³ஹம் நிஸேதே⁴தி. கேவலம் தேஸம் பி⁴க்கூ²னம் புப்³பே³ கதகம்மபச்சயாவ ஜீவிதக்க²யோ ஆஸி, இத³ம் பன கம்மட்டா²னம் தேஸம் கேஸஞ்சி அரஹத்தப்பத்தியா, கேஸஞ்சி அனாகா³மிஸகதா³கா³மிஸோதாபத்திப²லப்பத்தியா, கேஸஞ்சி பட²மஜ்ஜா²னாதி⁴க³மாய, கேஸஞ்சி விக்க²ம்ப⁴னதத³ங்க³ப்பஹானேன அத்தஸினேஹபஅயாதா³னாய உபனிஸ்ஸயோ ஹுத்வா, கேஸஞ்சி ஸுக³தியம் உப்பத்தியா உபனிஸ்ஸயோ அஹோஸீதி ஸாத்தி²காவ மே அஸுப⁴கதா², கிந்து ‘‘ஸாது⁴, ப⁴ந்தே ப⁴க³வா, அஞ்ஞம் பரியாயம் ஆசிக்க²தூ’’தி ஆனந்தே³ன யாசிதத்தா அஞ்ஞம் பரியாயம் ஆசிக்கா²மி, யதா² வோ புப்³பே³ ஆசிக்கி²தஅஸுப⁴கம்மட்டா²னானுயோகா³, ஏவம் அயம்பி கோ² பி⁴க்க²வேதி யோஜனா வேதி³தப்³பா³. ‘‘அஸ்ஸாஸவஸேன உபட்டா²னம் ஸதீ’’தி வுத்தம். ஸா ஹி தம் அஸ்ஸாஸம், பஸ்ஸாஸம் வா ஆரம்மணம் கத்வா புப்³ப³பா⁴கே³, அபரபா⁴கே³ பன அஸ்ஸாஸபஸ்ஸாஸபப⁴வனிமித்தம் ஆரம்மணம் கத்வா உபட்டா²தீதி ச ததா² வுத்தா.

அஸுபே⁴ பவத்தம் அஸுப⁴ந்தி வா பவத்தம் பா⁴வனாகம்மம் அஸுப⁴கம்மம், ததே³வ அஞ்ஞஸ்ஸ புனப்புனம் உப்பஜ்ஜனகஸ்ஸ காரணட்டே²ன டா²னத்தா அஸுப⁴கம்மட்டா²னம், ஆரம்மணம் வா அஸுப⁴கம்மஸ்ஸ பத³ட்டா²னட்டே²ன டா²னந்தி அஸுப⁴கம்மட்டா²னந்தி இத⁴ அஸுப⁴ஜ்ஜா²னம், தேனேவ ‘‘ஓளாரிகாரம்மணத்தா’’தி வுத்தம். படிவேத⁴வஸேனாதி விதக்காதி³அங்க³படிலாப⁴வஸேன. ஆரம்மணஸந்ததாயாதி அனுக்கமேன ஸந்தகாலம் உபாதா³ய வுத்தகாயத³ரத²ப்படிபஸ்ஸத்³தி⁴வஸேன நிப்³பு³தோ. பரிகம்மம் வாதி கஸிணபரிகம்மம் கிர நிமித்துப்பாத³பரியோஸானம். ததா³ ஹி நிரஸ்ஸாத³த்தா அஸந்தம், அப்பணிஹிதஞ்ச. யதா² உபசாரே நீவரணவிக³மேன, அங்க³பாதுபா⁴வேன ச ஸந்ததா ஹோதி, ந ததா² இத⁴, இத³ம் பன ‘‘ஆதி³ஸமன்னாஹாரதோ’’தி வுத்தம். து³தியவிகப்பே அஸேசனகோதி அதித்திகரோ, தேன வுத்தம் ‘‘ஓஜவந்தோ’’தி. சேதஸிகஸுக²ம் ஜா²னக்க²ணேபி அத்தி², ஏவம் ஸந்தேபி ‘‘உபோ⁴பி ஜா²னா வுட்டி²தஸ்ஸேவ க³ஹேதப்³பா³’’தி வுத்தம். ஸமதே²ன ஸகஸந்தானே அவிக்க²ம்பி⁴தே. இதரதா² பாபகானம் ஜா²னேன ஸஹுப்பத்தி ஸியா. க²ந்தா⁴தீ³னம் லோகுத்தரபாத³கத்தா நிப்³பே³த⁴பா⁴கி³யம், விஸேஸேன யஸ்ஸ நிப்³பே³த⁴பா⁴கி³யம் ஹோதி, தம் ஸந்தா⁴ய வா. ‘‘அனிச்சானுபஸ்ஸீதிஆதி³சதுக்கவஸேன அனுபுப்³பே³ன அரியமக்³க³வுட்³டி⁴ப்பத்தோ ஸமுச்சி²ந்த³தி, ஸேஸானமேதம் நத்தீ²’’தி லிகி²தம்.

ததா²பா⁴வபடிஸேத⁴னோ சாதி ஸோளஸவத்து²கஸ்ஸ தித்தி²யானம் நத்தி²தாய வுத்தம். ஸப்³ப³பட²மானம் பன சதுன்னம் பதா³னம் வஸேன லோகியஜ்ஜா²னமேவ தேஸம் அத்தி², தஸ்மிம் லோகுத்தரபத³ட்டா²னம் நத்தி² ஏவ. ‘‘ப²லமுத்தமந்தி ப²லே உத்தம’’ந்தி வுத்தம். உதுத்தயானுகூலந்தி கி³ம்ஹே அரஞ்ஞே, ஹேமந்தே ருக்க²மூலே, வஸந்தகாலே ஸுஞ்ஞாகா³ரே க³தோ. ஸேம்ஹதா⁴துகஸ்ஸ அரஞ்ஞம், பித்ததா⁴துகஸ்ஸ ருக்க²மூலம், வாததா⁴துகஸ்ஸ ஸுஞ்ஞாகா³ரம் அனுகூலம். மோஹசரிதஸ்ஸ அரஞ்ஞம் அனுகூலம் மஹாஅரஞ்ஞே சித்தம் ந ஸங்குடதி, தோ³ஸசரிதஸ்ஸ ருக்க²மூலம், ராக³சரிதஸ்ஸ ஸுஞ்ஞாகா³ரம். டா²னசங்கமானி உத்³த⁴ச்சபக்கி²கானி, ஸயனம் லீனபக்கி²கம், பல்லங்காபு⁴ஜனேன நிஸஜ்ஜாய த³ள்ஹபா⁴வம், உஜுகாயம் பணிதா⁴னேன அஸ்ஸாஸபஸ்ஸாஸானம் பவத்தனஸுக²ம் ‘‘பரிமுக²ம் ஸதி’’ந்தி இமினா ஆரம்மணபரிக்³க³ஹூபாயம் த³ஸ்ஸேதி. காரீதி கரணஸீலோ. ஏதஸ்ஸ விப⁴ங்கே³ ‘‘அஸ்ஸஸதி பஸ்ஸஸதீ’’தி அவத்வா ‘‘ஸதோ காரீ’’தி வுத்தம். தஸ்மா ‘‘அஸ்ஸஸதி பஸ்ஸஸதீ’’தி வுத்தே ‘‘பட²மசதுக்கம் ஏவ லப்³ப⁴தி, ந ஸேஸானீ’’தி ச ‘‘தீ³க⁴ம்அஸ்ஸாஸவஸேனாதி அலோபஸமாஸம் கத்வா’’இதி ச ‘‘ஏகத்த²தாய அவிக்கே²ப’’ந்தி ச ‘‘அஸம்போ⁴க³வஸேன பஜானதோ’’தி ச ‘‘தேன ஞாணேனா’’தி ச ‘‘பஜானதோதி வுத்தஞாணேனா’’தி ச ‘‘ஸதோகாரீதி ஸதிஸம்பஜஞ்ஞாஹிகாரீ’’தி ச ‘‘படினிஸ்ஸக்³கா³னுபஸ்ஸினோ அஸ்ஸாஸாவ படினிஸ்ஸக்³கா³னுபஸ்ஸிஅஸ்ஸாஸா’’தி ச லிகி²தம். உப்படிபாடியா ஆக³தம்பி யுஜ்ஜதேவ, தேன டா²னேன படிஸித்³த⁴ம். தாலும் ஆஹச்ச நிப்³பா³யனதோ கிர போதகோ ஸம்பதிஜாதோவ கி²பிதஸத்³த³ம் கரோதி, ச²ந்த³பாமோஜ்ஜவஸேன ச² புரிமா தயோதி நவ. ஏகேனாகாரேனாதி அஸ்ஸாஸவஸேன வா பஸ்ஸாஸவஸேன வா ஏவம் ஆனாபானஸ்ஸதிம் பா⁴வயதோ காயே காயானுபஸ்ஸனாஸதிகம்மட்டா²னபா⁴வனா ஸம்பஜ்ஜதி.

காயோதி அஸ்ஸாஸபஸ்ஸாஸா. உபட்டா²னம் ஸதி. தீ³க⁴ந்தி ஸீக⁴ம் க³தம் அஸ்ஸாஸபஸ்ஸாஸம். அத்³தா⁴னஸங்கா²தேதி காலஸங்கா²தே விய காலகோட்டா²ஸேதி அத்தோ², தீ³க⁴காலே வாதி அத்தோ². ஏகோ ஹி அஸ்ஸாஸமேவூபலக்கே²தி, ஏகோ பஸ்ஸாஸம், ஏகோ உப⁴யம், தஸ்மா ‘‘விபா⁴க³ம் அகத்வா’’தி வா வுத்தம், ச²ந்தோ³தி ஏவம் அஸ்ஸாஸதோ, பஸ்ஸாஸதோ ச அஸ்ஸாதோ³ உப்பஜ்ஜதி, தஸ்ஸ வஸேன கத்துகம்யதாச²ந்தோ³ உப்பஜ்ஜதி. ததோ பாமோஜ்ஜந்தி. அஸ்ஸாஸபஸ்ஸாஸானம் து³விஞ்ஞேய்யவிஸயத்தா சித்தம் விவத்ததி, க³ணனம் பஹாய பு²ட்ட²ட்டா²னமேவ மனஸி கரோந்தஸ்ஸ கேவலம் உபேக்கா²வ ஸண்டா²தி. சத்தாரோ வண்ணாதி ‘‘பத்தஸ்ஸ தயோ வண்ணா’’திஆதீ³ஸு விய சத்தாரோ ஸண்டா²னாதி அத்தோ².

ததா²பூ⁴தஸ்ஸாதி ஆனாபானஸ்ஸதிம் பா⁴வயதோ. ஸம்வரோதி ஸதிஸம்வரோ. அத² வா பட²மேன ஜா²னேன நீவரணானம், து³தியேன விதக்கவிசாரானம், ததியேன பீதியா, சதுத்தே²ன ஸுக²து³க்கா²னம், ஆகாஸானஞ்சாயதனஸமாபத்தியா ரூபஸஞ்ஞாய, படிக⁴ஸஞ்ஞாய, நானத்தஸஞ்ஞாய வா பஹானம். ‘‘ஸீலந்தி வேரமணி ஸீலம், சேதனா ஸீலம், ஸம்வரோ ஸீலம், அவீதிக்கமோ ஸீல’’ந்தி (படி. ம. 1.39 தோ²கம் விஸதி³ஸம்) வுத்தவிதி⁴னாபேத்த² அத்தோ² த³ட்ட²ப்³போ³. ‘‘அத்த²தோ ததா² ததா² பவத்தத⁴ம்மா உபதா⁴ரணஸமாதா⁴னஸங்கா²தேன ஸீலனட்டே²ன ஸீலந்தி வுச்சந்தீ’’தி வுத்தம். ததா² ‘‘அயம் இமஸ்மிம் அத்தே² அதி⁴ப்பேதா ஸிக்கா²’’தி ஏத்தா²பி சேதனாஸீலமேவ, கத்த²சி விரதிஸீலம்பீதி அத்தோ² த³ட்ட²ப்³போ³. அஞ்ஞதா² பண்ணத்திவஜ்ஜேஸுபி ஸிக்கா²பதே³ஸு விரதிப்பஸங்கோ³ அஹோஸி, பாதிமோக்க²ஸம்வரஸம்வுதோ விஹரதீதி கத்வா தஸ்ஸாபி விரதிப்பஸங்கோ³. தஸ்மிம் ஆரம்மணேதி ஆனாபானாரம்மணே. தாய ஸதியாதி தத்த² உப்பன்னஸதியா. ‘‘தேன மனஸிகாரேனாதி ஆவஜ்ஜனேனா’’தி லிகி²தம். ஏதேன நானாவஜ்ஜனப்பவத்திதீ³பனதோ நானாஜவனவாரேஹிபி ஸிக்க²தி நாமாதி தீ³பிதம் ஹோதி, யேன பன மனஸிகாரேன வா. ஞாணுப்பாத³னாதீ³ஸூதி ஏத்த² ஆதி³ஸத்³தே³ன யாவ பரியோஸானம் வேதி³தப்³ப³ம். ‘‘தத்ராதி தஸ்மிம் ஆனாபானாரம்மணே. ஏவந்தி இதா³னி வத்தப்³ப³னயேனா’’தி லிகி²தம். தத்ராதி தேஸம் அஸ்ஸாஸபஸ்ஸாஸானம் வா. தஞ்ஹி ‘‘புப்³பே³ அபரிக்³க³ஹிதகாலே’’தி இமினா ஸுட்டு² ஸமேதி. ‘‘பட²மவாதோ³ தீ³க⁴பா⁴ணகானம். தே ஹி ‘பட²மஜ்ஜா²னம் லபி⁴த்வா நானாஸனே நிஸீதி³த்வா து³தியத்தா²ய வாயாமதோ உபசாரே விதக்கவிசாரவஸேன ஓளாரிகசித்தப்பவத்திகாலே பவத்தஅஸ்ஸாஸபஸ்ஸாஸவஸேன ஓளாரிகா’தி வத³ந்தி. ‘மஜ்ஜி²மபா⁴ணகா ஜா²னலாபி⁴ஸ்ஸ ஸமாபஜ்ஜனகாலே, ஏகாஸனபடிலாபே⁴ ச உபரூபரி சித்தப்பவத்தியா ஸந்தபா⁴வதோ பட²மதோ து³தியஸ்ஸுபசாரே ஸுகு²மதம் வத³ந்தீ’’’தி லிகி²தம்.

விபஸ்ஸனாயம் பனாதி சதுதா⁴துவவத்தா²னமுகே²ன அபி⁴னிவிட்ட²ஸ்ஸ அயம் கமோ, அஞ்ஞஸ்ஸ சாதி வேதி³தப்³ப³ம். ஏத்தகம் ரூபம், ந இதோ அஞ்ஞந்தி த³ஸ்ஸனம் ஸந்தா⁴ய ‘‘ஸகலரூபபரிக்³க³ஹே’’தி வுத்தம். ரூபாரூபபரிக்³க³ஹேதி ஏத்த² அனிச்சதாதி³லக்க²ணாரம்மணிகப⁴ங்கா³னுபஸ்ஸனதோ பபு⁴தி ப³லவதீ விபஸ்ஸனா. புப்³பே³ வுத்தனயேனாதி ஸப்³பே³ஸம்யேவ பன மதேன அபரிக்³க³ஹிதகாலேதிஆதி³னா. ஸோத⁴னா நாம விஸ்ஸஜ்ஜனம். அஸ்ஸாதி ‘‘பஸ்ஸம்ப⁴யம் காயஸங்கா²ர’’ந்தி பத³ஸ்ஸ.

புரதோ நமனா ஆனமனா. திரியம் நமனா வினமனா. ஸுட்டு² நமனா ஸன்னமனா. பச்சா² நமனா பணமனா. ஜாணுகே க³ஹேத்வா டா²னம் விய இஞ்ஜனாதி ஆனமனாதீ³னம் ஆவிபா⁴வத்த²முத்தந்தி வேதி³தப்³ப³ம். யதா²ரூபேஹி ஆனமனாதி³ வா கம்பனாதி³ வா ஹோதி, ததா²ரூபே பஸ்ஸம்ப⁴யந்தி ஸம்ப³ந்தோ⁴. இதி கிராதி இதி சே. ஏவம் ஸந்தேதி ஸந்தஸுகு²மம்பி சே பஸ்ஸம்ப⁴தி. பபா⁴வனாதி உப்பாத³னம். அஸ்ஸாஸபஸ்ஸாஸானம் வூபஸந்தத்தா ஆனாபானஸ்ஸதிஸமாதி⁴ஸ்ஸ பா⁴வனா ந ஹோதி. யஸ்மா தம் நத்தி², தஸ்மா ந ஸமாபஜ்ஜதி, ஸமாபத்தியா அபா⁴வேன ந வுட்ட²ஹந்தி. இதி கிராதி ஏவமேதம் தாவ வசனந்தி ததே³தம். ஸத்³தோ³வ ஸத்³த³னிமித்தம், ‘‘ஸதோ அஸ்ஸஸதி ஸதோ பஸ்ஸஸதீ’’தி பதா³னி பதிட்ட²பேத்வா த்³வத்திம்ஸபதா³னி சத்தாரி சதுக்கானி வேதி³தப்³பா³னி.

அப்படிபீளனந்தி தேஸம் கிலேஸானம் அனுப்பாத³னம் கிஞ்சாபி சேதியங்க³ணவத்தாதீ³னிபி அத்த²தோ பாதிமோக்க²ஸம்வரஸீலே ஸங்க³ஹம் க³ச்ச²ந்தி ‘‘யஸ்ஸ ஸியா ஆபத்தீ’’தி (மஹாவ. 134) வசனதோ. ததா²பி ‘‘ந தாவ, ஸாரிபுத்த, ஸத்தா² ஸாவகானம் ஸிக்கா²பத³ம் பஞ்ஞபேதி உத்³தி³ஸதி பாதிமோக்க²ம், யாவ ந இதே⁴கச்சே ஆஸவட்டா²னீயா த⁴ம்மா ஸங்கே⁴ பாதுப⁴வந்தீ’’தி ஏத்த² அனதி⁴ப்பேதத்தா ‘‘ஆபி⁴ஸமாசாரிக’’ந்தி வுத்தம். ‘‘யம் பனேத்த² ஆபத்திட்டா²னியம் ந ஹோதி, தம் அமிஸ்ஸமேவா’’தி வுத்தம்.

யதா²வுத்தேனாதி யோகா³னுயோக³கம்மஸ்ஸ பத³ட்டா²னத்தா. ஸல்லஹுகவுத்தி அட்ட²பரிக்கா²ரிகோ. பஞ்சஸந்தி⁴கம் கம்மட்டா²னந்தி ஏத்த² ஜா²னம்பி நிமித்தம்பி தத³த்த²ஜோதிகாபி பரியத்தி இத⁴ கம்மட்டா²னம் நாம. க³மனாக³மனஸம்பன்னதாதி³ ஸேனாஸனம். ஸம்கிலிட்ட²சீவரதோ⁴வனாத³யோ கு²த்³த³கபலிபோ³தா⁴. ‘‘அந்தரா பதிதம் நு கோ²’’தி விகம்பதி.

அஜ்ஜ²த்தம் விக்கே²பக³தேனாதி நியகஜ்ஜ²த்தே விக்கே²பக³தேன. ஸாரத்³தா⁴ அஸமாஹிதத்தா. உபனிப³ந்த⁴னத²ம்ப⁴மூலம் நாம நாஸிகக்³க³ம், முக²னிமித்தம் வா. தத்தே²வாதி நாஸிகக்³கா³தி³னிமித்தே. ‘‘தோ³லாப²லகஸ்ஸ ஏகபஸ்ஸே ஏவ உபோ⁴ கோடியோ மஜ்ஜ²ஞ்ச பஸ்ஸதீ’’தி வத³ந்தி.

இத⁴ பனாதி ககசூபமே. தே³ஸதோதி பு²ஸனகட்டா²னதோ. ‘‘நிமித்தம் பட்ட²பேதப்³ப³ந்தி நிமித்தே ஸதி பட்ட²பேதப்³பா³’’தி வுத்தம். க³ரூஹி பா⁴வேதப்³ப³த்தா க³ருகபா⁴வனம். ஏகச்சே ஆஹூதி ஏகச்சே ஜா²யினோ ஆஹு.

‘‘ஸஞ்ஞானானதாயா’’தி வசனதோ ஏகச்சேஹி வுத்தம்பி பமாணமேவ, ஸங்கீ³திதோ பட்டா²ய அட்ட²கதா²ய அனாக³தத்தா ததா² வுத்தம். ‘‘மய்ஹம் தாரகரூபம் நு கோ² உபட்டா²தீ’’திஆதி³பரிகப்பே அஸதிபி தா⁴துனானத்தேன ஏதாஸம் தா⁴தூனம் உப்பத்தி விய கேவலம் பா⁴வயதோ ததா² ததா² உபட்டா²தி. ‘‘ந நிமித்த’ந்தி வத்தும் ந வட்டதி ஸம்பஜானமுஸாவாத³த்தா’’தி வுத்தம். கம்மட்டா²னந்தி இத⁴ வுத்தபடிபா⁴க³னிமித்தமேவ.

நிமித்தே படிபா⁴கே³. நானாகாரந்தி ‘‘சத்தாரோ வண்ணா வத்தந்தீ’’தி வுத்தனானாவித⁴தம். விபா⁴வயந்தி ஜானம் பகாஸயம். அஸ்ஸாஸபஸ்ஸாஸேதி ததோ ஸம்பூ⁴தே நிமித்தே, அஸ்ஸாஸபஸ்ஸாஸே வா நானாகாரம். நிமித்தே ஹி சித்தம் ட²பேந்தோவ நானாகாரதஞ்ச விபா⁴வேதி, அஸ்ஸாஸபஸ்ஸாஸே வா ஸகம் சித்தம் நிப³ந்த⁴தீதி வுச்சதி. தாரகரூபாதி³வண்ணதோ. கக்க²ளத்தாதி³லக்க²ணதோ.

அட்ட²கதா²ஸு படிக்கி²த்தந்தி ஆஸன்னப⁴வங்க³த்தாதி காரணம் வத்வா ஸீஹளட்ட²கதா²ஸு படிக்கி²த்தம். கஸ்மா? யஸ்மா ச²ட்டே², ஸத்தமே வா அப்பனாய ஸதி மக்³க³வீதி²யம் ப²லஸ்ஸ ஓகாஸோ ந ஹோதி, தஸ்மா. இத⁴ ஹோதூதி சே? ந, லோகியப்பனாபி ஹி அப்பனாவீதி²ம்ஹி லோகுத்தரேன ஸமானக³திகாவாதி படிலத்³த⁴ஜ்ஜா²னோபி பி⁴க்கு² தி³ட்ட²த⁴ம்மஸுக²விஹாரத்தா²ய ஜா²னம் ஸமாபஜ்ஜித்வா ஸத்தாஹம் நிஸீதி³துகாமோ சதுத்தே², பஞ்சமே வா அப்பேத்வா நிஸீத³தி, ந ச²ட்டே², ஸத்தமே வா. தத்த² ஹி அப்பனா. ததோ பரம் அப்பனாய ஆதா⁴ரபா⁴வம் ந க³ச்ச²தி. ஆஸன்னப⁴வங்க³த்தா சதுத்த²ம், பஞ்சமம் வா க³ச்ச²தி த²லே டி²தக⁴டோ விய ஜவனானமந்தரே டி²தத்தாதி கிர ஆசரியோ.

புது²த்தாரம்மணானி அனாவஜ்ஜித்வா ஜா²னங்கா³னேவ ஆவஜ்ஜனம் ஆவஜ்ஜனவஸீ நாம. ததோ பரம் சதுன்னம், பஞ்சன்னம் வா பச்சவேக்க²ணசித்தானம் உப்பஜ்ஜனம், தம் பச்சவேக்க²ணவஸீ நாம. தேனேவ ‘‘பச்சவேக்க²ணவஸீ பன ஆவஜ்ஜனவஸியா ஏவ வுத்தா’’தி வுத்தம். ஸமாபஜ்ஜனவஸீ நாம யத்தகம் காலம் இச்ச²தி தத்தகம் ஸமாபஜ்ஜனம், தம் பன இச்சி²தகாலபரிச்சே²த³ம் பதிட்டா²பேதும் ஸமத்த²தாதி. ‘‘அதி⁴ட்டா²னவஸியா வுட்டா²னவஸினோ அயம் நானத்தம் அதி⁴ட்டா²னானுபா⁴வேன ஜவனம் ஜவதி, வுட்டா²னானுபா⁴வேன பன அதி⁴ப்பேததோ அதி⁴கம் ஜவதீ’’திபி வத³ந்தி. அபிச பத²வீகஸிணாதி³ஆரம்மணம் ஆவஜ்ஜித்வா ஜவனஞ்ச ஜவித்வா புன ஆவஜ்ஜித்வா ததோ பஞ்சமம் ஜா²னம் சித்தம் ஹோதி, அயம் கிர உக்கட்ட²பரிச்சே²தோ³. ப⁴க³வதோ பன ஆவஜ்ஜனஸமனந்தரமேவ ஜா²னம் ஹோதீதி ஸப்³ப³ம் அனுக³ண்டி²பதே³ வுத்தம்.

‘‘வத்து²ந்தி ஹத³யவத்து²ம். த்³வாரந்தி சக்கா²தி³. ஆரம்மணந்தி ரூபாதீ³’’தி லிகி²தம். யதா²பரிக்³க³ஹிதரூபாரம்மணம் வா விஞ்ஞாணம் பஸ்ஸதி, அஞ்ஞதா²பி பஸ்ஸதி. கத²ம்? ‘‘யதா²பரிக்³க³ஹிதரூபவத்து²த்³வாராரம்மணம் வா’’தி வுத்தம். யதா²பரிக்³க³ஹிதரூபேஸு வத்து²த்³வாராரம்மணானி யஸ்ஸ விஞ்ஞாணஸ்ஸ, தம் விஞ்ஞாணம் யதா²பரிக்³க³ஹிதரூபவத்து²த்³வாராரம்மணம் தம்பி பஸ்ஸதி, ஏகஸ்ஸ வா ஆரம்மணஸத்³த³ஸ்ஸ லோபோ த³ட்ட²ப்³போ³தி ச மம தக்கோ விசாரேத்வாவ க³ஹேதப்³போ³.

ததோ பரம் தீஸு சதுக்கேஸு த்³வே த்³வே பதா³னி ஏகமேகம் கத்வா க³ணேதப்³ப³ம். ஸமதே²ன ஆரம்மணதோ விபஸ்ஸனாவஸேன அஸம்மோஹதோ பீதிபடிஸம்வேத³னமேத்த² வேதி³தப்³ப³ம். ‘‘து³க்க²மேதம் ஞாண’’ந்திஆதீ³ஸு பன ‘‘ஆரம்மணதோ அஸம்மோஹதோ’’தி யம் வுத்தம், இத⁴ ததோ வுத்தனயதோ உப்படிபாடியா வுத்தம். தத்த² ஹி யேன மோஹேன தம் து³க்க²ம் படிச்ச²ன்னம், ந உபட்டா²தி, தஸ்ஸ விஹதத்தா வா ஏவம் பவத்தே ஞாணே யதா²ருசி பச்சவேக்கி²தும் இச்சி²திச்சி²தகாலே ஸமத்த²பா⁴வதோ வா து³க்கா²தீ³ஸு தீஸு அஸம்மோஹதோ ஞாணம் வுத்தம். நிரோதே⁴ ஆரம்மணதோ தம்ஸம்பயுத்தா பீதிபடிஸம்வேத³னா அஸம்மோஹதோ ந ஸம்ப⁴வதி மோஹப்பஹானாபா⁴வா, படிஸம்பி⁴தா³பாளிவிரோத⁴தோ ச. தத்த² ‘‘தீ³க⁴ம் அஸ்ஸாஸவஸேனா’’திஆதி³ ஆரம்மணதோ த³ஸ்ஸேதும் வுத்தம். தாய ஸதியா தேன ஞாணேன ஸா பீதி படிஸம்விதி³தா ஹோதி ததா³ரம்மணஸ்ஸ படிஸம்விதி³தத்தாதி ஏத்த² அதி⁴ப்பாயோ. ‘‘ஆவஜ்ஜதோ’’திஆதி³ அஸம்மோஹதோ பீதிபடிஸம்வேத³னம் த³ஸ்ஸேதும் வுத்தம். அனிச்சாதி³வஸேன ஜானதோ, பஸ்ஸதோ, பச்சவேக்க²தோ ச. தத³தி⁴முத்ததாவஸேன அதி⁴ட்ட²ஹதோ, அதி⁴முச்சதோ, ததா² வீரியாதி³ம் ஸமாத³ஹதோ க²ணிகஸமாதி⁴னா.

அபி⁴ஞ்ஞேய்யந்தி ஞாதபரிஞ்ஞாய. பரிஞ்ஞேய்யந்தி தீரணபரிஞ்ஞாய. ஸப்³ப³ஞ்ஹி து³க்க²ஸச்சம் அபி⁴ஞ்ஞேய்யம், பரிஞ்ஞேய்யஞ்ச. தத்ர சாயம் பீதீதி லிகி²தம். அபி⁴ஞ்ஞேய்யந்திஆதி³ மக்³க³க்க²ணம் ஸந்தா⁴யாஹாதி வுத்தம். மக்³கே³ன அஸம்மோஹஸங்கா²தவிபஸ்ஸனாகிச்சனிப்ப²த்திதோ மக்³கோ³பி அபி⁴ஞ்ஞேய்யாதி³ஆரம்மணம் கரோந்தோ விய வுத்தோ. விபஸ்ஸனாபூ⁴மித³ஸ்ஸனத்த²ந்தி ஸமதே² காயிகஸுகா²பா⁴வா வுத்தம். த்³வீஸு சித்தஸங்கா²ரபதே³ஸூதி சித்தஸங்கா²ரபடிஸம்வேதீ³…பே… ஸிக்க²தி பஸ்ஸம்ப⁴யம் சித்தஸங்கா²ரபடிஸம்வேதீ³…பே… ஸிக்க²தீதி ஏதேஸு. மோத³னாதி³ ஸப்³ப³ம் பீதிவேவசனம். அனிச்சானுபஸ்ஸனாதி³ கிலேஸே, தம்மூலகே க²ந்தா⁴பி⁴ஸங்கா²ரே. ஏவம் பா⁴விதோதி ந சதுக்கபஞ்சகஜ்ஜா²னனிப்³ப³த்தனேன பா⁴விதோ. ஏவம் ஸப்³பா³காரபரிபுண்ணம் கத்வா பா⁴விதோ. விபஸ்ஸனாமக்³க³பச்சவேக்க²ணகாலேஸுபி பவத்தஅஸ்ஸாஸமுகே²னேவ ஸப்³ப³ம் த³ஸ்ஸிதம் உபாயகுஸலேன ப⁴க³வதா.

168. கஸ்மா இத³ம் வுச்சதி அம்ஹேஹீதி அதி⁴ப்பாயோ.

பத³பா⁴ஜனீயவண்ணனா

172. உஸ்ஸுக்கவசனந்தி பாகடஸத்³த³ஸஞ்ஞா கிர, ஸமானகபத³ந்தி வுத்தம் ஹோதி. ‘‘ஸுத்வா பு⁴ஞ்ஜந்தீ’’தி ஏத்த² விய ஸஞ்சிச்ச வோரோபேதுகாமஸ்ஸ ஸஞ்சிச்சபத³ம் வோரோபனபத³ஸ்ஸ உஸ்ஸுக்கம், ஸஞ்சேதனா ச ஜீவிதா வோரோபனஞ்ச ஏகஸ்ஸேவாதி வுத்தம் ஹோதி. ந கேவலம் சேதஸிகமத்தேனேவ ஹோதி, பயோகோ³பி இச்சி²தப்³போ³ ஏவாதி த³ஸ்ஸேதும் வுத்தானீதி கிர உபதிஸ்ஸத்தே²ரோ. ‘‘ஜானித்வா ஸஞ்ஜானித்வா சேச்ச அபி⁴விதரித்வா’’தி வத்தப்³பே³ ‘‘ஜானந்தோ…பே… வீதிக்கமோ’’தி வோரோபனம்பி த³ஸ்ஸிதம், தஸ்மா ப்³யஞ்ஜனே ஆத³ரம் அகத்வா அத்தோ² த³ஸ்ஸிதோ. வீதிக்கமஸங்கா²தத்த²ஸித்³தி⁴யா ஹி புரிமசேதனா அத்த²ஸாதி⁴கா ஹோதி. ஸப்³ப³ஸுகு²மஅத்தபா⁴வந்தி ரூபம் ஸந்தா⁴ய வுத்தம், ந அரூபம். அத்தஸங்கா²தானஞ்ஹி அரூபானம் க²ந்த⁴விப⁴ங்கே³ (விப⁴. 1 ஆத³யோ) விய இத⁴ ஓளாரிகஸுகு²மதா அனதி⁴ப்பேதா. மாதுகுச்சி²ஸ்மிந்தி யேபு⁴ய்யவசனம், ஓபபாதிகமனுஸ்ஸேபி பாராஜிகமேவ, அரூபகாயே உபக்கமாபா⁴வா தக்³க³ஹணம் கஸ்மாதி சே? அரூபக்க²ந்தே⁴ன ஸத்³தி⁴ம் தஸ்ஸேவ ரூபகாயஸ்ஸ ஜீவிதிந்த்³ரியஸம்ப⁴வதோ. தேன ஸஜீவகோவ மனுஸ்ஸவிக்³க³ஹோபி நாம ஹோதீதி ஸித்³த⁴ம். ஏத்த² மாதுகுச்சி²ஸ்மிந்தி மனுஸ்ஸமாதுயா வா திரச்சா²னமாதுயா வா. வுத்தஞ்ஹி பரிவாரே (பரி. 480) –

‘‘இத்தி²ம் ஹனே ச மாதரம், புரிஸஞ்ச பிதரம் ஹனே;

மாதரம் பிதரம் ஹந்த்வா, ந தேனானந்தரம் பு²ஸே;

பஞ்ஹா மேஸா குஸலேஹி சிந்திதா’’தி.

பட²மந்தி படிஸந்தி⁴சித்தமேவ. ஏகப⁴வபரியாபன்னாய ஹி சித்தஸந்ததியா படிஸந்தி⁴சித்தம் பட²மசித்தம் நாம. சுதிசித்தம் பச்சி²மம் நாம. அஞ்ஞதா² அனமதக்³கே³ ஸம்ஸாரே பட²மசித்தம் நாம நத்தி² வினா அனந்தரஸமனந்தரனத்தி²விக³தபச்சயேஹி சித்துப்பத்தியா அபா⁴வதோ. பா⁴வே வா நவஸத்தபாதுபா⁴வதோ³ஸப்பஸங்கோ³. அயம் ஸப்³ப³பட²மோ மனுஸ்ஸவிக்³க³ஹோதி கிஞ்சாபி இமம் ஜீவிதா வோரோபேதும் ந ஸக்கா, தம் ஆதி³ம் கத்வா ஸந்ததியா யாவ மரணா உப்பஜ்ஜனகமனுஸ்ஸவிக்³க³ஹேஸு அபரிமாணேஸு ‘‘ஸப்³ப³பட²மோ’’தி தி³ஸ்ஸதி. யதா³ பன யோ மனுஸ்ஸவிக்³க³ஹோ புப்³பா³பரியவஸேன ஸந்ததிப்பத்தோ ஹோதி, ததா³ தம் ஜீவிதா வோரோபேதும் ஸக்கா. ஸந்ததிம் விகோபேந்தோ ஹி ஜீவிதா வோரோபேதி நாம. ஏத்த² ச நானத்தனயே அதி⁴ப்பேதே ஸதி ‘‘ஸப்³ப³பட²மோ’’தி வசனம் யுஜ்ஜதி, ந பன ஏகத்தனயே ஸந்ததியா ஏகத்தா. ஏகத்தனயோ ச இதா⁴தி⁴ப்பேதோ ‘‘ஸந்ததிம் விகோபேதீ’’தி வசனதோ, தஸ்மா ‘‘ஸப்³ப³பட²மோ’’தி வசனம் ந யுஜ்ஜதீதி சே? ந, ஸந்ததிபச்சுப்பன்னப³ஹுத்தா. யஸ்மா பன ஸந்ததி நாம அனேகேஸம் புப்³பா³பரியுப்பத்தி வுச்சதி, தஸ்மா ‘‘அயம் ஸப்³ப³பட²மோ’’தி வுத்தோ, ஏவமேத்த² த்³வேபி நயா ஸங்க³ஹம் க³ச்ச²ந்தி, அஞ்ஞதா² ‘‘ஸந்ததிம் விகோபேதீ’’தி இத³ம் வசனம் ந ஸிஜ்ஜ²தி. கிஞ்சாபி ஏத்த² ‘‘ஸந்ததிம் விகோபேதீ’’தி வசனதோ ஸந்ததிபச்சுப்பன்னமேவ அதி⁴ப்பேதம், ந அத்³தா⁴பச்சுப்பன்னம் விய தி³ஸ்ஸதி, ததா²பி யஸ்மா ஸந்ததிபச்சுப்பன்னே விகோபிதே அத்³தா⁴பச்சுப்பன்னம் விகோபிதமேவ ஹோதி, அத்³தா⁴பச்சுப்பன்னே பன விகோபிதே ஸந்ததிபச்சுப்பன்னம் விகோபிதம் ஹோதீதி ஏத்த² வத்தப்³ப³ம் நத்தி². தஸ்மா அட்ட²கதா²யம் ‘‘தது³ப⁴யம்பி வோரோபேதும் ஸக்கா, தஸ்மா ததே³வ ஸந்தா⁴ய ‘ஸந்ததிம் விகோபேதீ’தி இத³ம் வுத்தந்தி வேதி³தப்³ப³’’ந்தி ஆஹ. ‘‘ஸந்ததிம் விகோபேதீ’’தி வசனதோ பகதியா ஆயுபரியந்தம் பத்வா மரணகஸத்தே வீதிக்கமே ஸதி அனாபத்தி வீதிக்கமபச்சயா ஸந்ததியா அகோபிதத்தா. வீதிக்கமபச்சயா சே ஆயுபரியந்தம் அப்பத்வா அந்தராவ மரணகஸத்தே வீதிக்கமபச்சயா ஆபத்தி, கம்மப³த்³தோ⁴ சாதி நோ தக்கோதி ஆசரியோ. ‘‘மரணவண்ணம் வா ஸம்வண்ணேய்ய, மரணாய வா ஸமாத³பேய்ய, அயம்பி பாராஜிகோ ஹோதி அஸம்வாஸோ’’தி வசனதோ வா சேதனாக்க²ணே ஏவ பாராஜிகாபத்தி ஏகந்தாகுஸலத்தா, து³க்க²வேத³னத்தா, காயகம்மத்தா, வசீகம்மத்தா, கிரியத்தா சாதி வேதி³தப்³ப³ம்.

ஸத்தட்ட²ஜவனவாரமத்தந்தி ஸபா⁴கா³ரம்மணவஸேன வுத்தம், தேனேவ ‘‘ஸபா⁴க³ஸந்ததிவஸேனா’’திஆதி³ வுத்தம். அத்தனோ படிபக்கே²ன ஸமன்னாக³தத்தா ஸமனந்தரஸ்ஸ பச்சயம் ஹோந்தம் யதா² புரே விய அஹுத்வா து³ப்³ப³லஸ்ஸ. தந்தி ஜீவிதிந்த்³ரியவிகோபனம்.

ஈதிந்தி ஸத்தவித⁴விச்சி²காதீ³னி யுத்³தே⁴ ட³ம்ஸித்வா மாரணத்த²ம் விஸ்ஸஜ்ஜேந்தி. பஜ்ஜரகந்தி ஸரீரடா³ஹம். ஸூசிகந்தி ஸூலம். விஸூசிகந்தி ஸுக்க²மாதிஸாரம்வஸயம். பக்க²ந்தி³யந்தி ரத்தாதிஸாரம். த்³வத்திப்³யாமஸதப்பமாணே மஹாகாயே நிம்மினித்வா டி²தனாகு³த்³த⁴ரணம், குஜ்ஜி²த்வா ஓலோகிதே பரேஸம் காயே விஸமரணம் வா டா³ஹுப்பாத³னம் வா பயோகோ³ நாம.

கேசீதி மஹாஸங்கி⁴கா. அயம் இத்தீ². குலும்ப³ஸ்ஸாதி க³ப்³ப⁴ஸ்ஸ. கத²ம் ஸா இதரஸ்ஸாதி சே? தஸ்ஸ து³ட்டே²ன மனஸானுபக்கி²தே ஸோ ச க³ப்³போ⁴ ஸா ச இத்³தீ⁴தி உப⁴யம்பி ஸஹேவ நஸ்ஸதி, க⁴டக்³கீ³னம் பே⁴த³னிப்³பா³யனம் விய ஏகக்க²ணே ஹோதி. ‘‘தேஸம் ஸுத்தந்திகேஸு ஓசரியமானம் ந ஸமேதீ’’தி லிகி²தம், ‘‘தேஸம் மதம் க³ஹேத்வா ‘தா²வரீனம்பி அயம் யுஜ்ஜதீ’தி வுத்தே திகவஸேன படிஸேதி⁴தப்³ப³ந்தி அபரே’’தி வுத்தம். ஸாஹத்தி²கனிஸ்ஸக்³கி³யபயோகே³ஸு ஸன்னிட்டா²பகசேதனாய ஸத்தமாய ஸஹுப்பன்னகாயவிஞ்ஞத்தியா ஸாஹத்தி²கதா வேதி³தப்³பா³. ஆணத்திகே பன ஸத்தஹிபி சேதனாஹி ஸஹ வசீவிஞ்ஞத்திஸம்ப⁴வதோ ஸத்தஸத்த ஸத்³தா³ ஏகதோ ஹுத்வா ஏகேகக்க²ரபா⁴வம் க³ந்த்வா யத்தகேஹி அக்க²ரேஹி அத்தனோ அதி⁴ப்பாயம் விஞ்ஞாபேதி, தத³வஸானக்க²ரஸமுட்டா²பிகாய ஸத்தமசேதனாய ஸஹஜாதவசீவிஞ்ஞத்தியா ஆணத்திகதா வேதி³தப்³பா³. ததா² விஜ்ஜாமயபயோகே³. காயேனாணத்தியம் பன ஸாஹத்தி²கே வுத்தனயோவ. தா²வரபயோகே³ யாவதா பரஸ்ஸ மரணம் ஹோதி, தாவதா கம்மப³த்³தோ⁴, ஆபத்தி ச. ததோ பரம் அதிஸஞ்சரணே கம்மப³த்³தா⁴திப³ஹுத்தம் வேதி³தப்³ப³ம் ஸதி பரம் மரணே. பாராஜிகாபத்தி பனேத்த² ஏகா. அத்த²ஸாத⁴கசேதனா யஸ்மா ஏத்த² ச து³தியபாராஜிகே ச லப்³ப⁴தி, ந அஞ்ஞத்த², தஸ்மா த்³வின்னம்பி ஸாதா⁴ரணா இமா கா³தா²யோ –

‘‘பூ⁴தத⁴ம்மனியாமா யே, தே த⁴ம்மா நியதா மதா;

பா⁴வித⁴ம்மனியாமா யே, தேவ அனியதா இத⁴.

‘‘பூ⁴தத⁴ம்மனியாமானம், டி²தாவ ஸா பச்சயட்டி²தி;

பா⁴வித⁴ம்மனியாமானம், ஸாபேக்கா² பச்சயட்டி²தி.

‘‘தேனஞ்ஞா ஹேதுயா அத்தி², ஸாபி த⁴ம்மனியாமதா;

தஸ்ஸா ப²லம் அனியதம், ப²லாபேக்கா² நியாமதா.

‘‘ஏவஞ்ஹி ஸப்³ப³த⁴ம்மானம், டி²தா த⁴ம்மனியாமதா;

லத்³த⁴த⁴ம்மனியாமா யா, ஸாத்த²ஸாத⁴கசேதனா.

‘‘சேதனாஸித்³தி⁴தோ புப்³பே³, பச்சா² தஸ்ஸாத்த²ஸித்³தி⁴தோ;

அவிஸேஸேன ஸப்³பா³பி, ச²ப்³பி³தா⁴ அத்த²ஸாதி⁴கா.

‘‘ஆணத்தியம் யதோ ஸக்கா, விபா⁴வேதும் விபா⁴க³தோ;

தஸ்மா ஆணத்தியம்யேவ, வுத்தா ஸா அத்த²ஸாதி⁴கா.

‘‘மிச்ச²த்தே வாபி ஸம்மத்தே, நியதானியதா மதா;

அபி⁴த⁴ம்மே ந ஸப்³ப³த்தி², தத்த² ஸா நியதா ஸியா.

‘‘யா தே²ய்யசேதனா ஸப்³பா³, ஸஹத்தா²ணத்திகாபி வா;

அபி⁴த⁴ம்மனயேனாயம், ஏகந்தனியதா ஸியா.

‘‘பாணாதிபாதம் நிஸ்ஸாய, ஸஹத்தா²ணத்திகாதி³கா;

அபி⁴த⁴ம்மவஸேனேஸா, பச்சேகம் தம் து³கம் ப⁴ஜே.

‘‘ஜீவிதிந்த்³ரியுபச்சே²தோ³, சேதனா சேதி தம் த்³வயம்;

ந ஸாஹத்தி²ககம்மேன, பகே³வாணத்திகாஸமம்.

‘‘ஜீவிதிந்த்³ரியுபச்சே²தோ³, சேதனா சேதி தம் த்³வயம்;

ந ஸாஹத்தி²ககம்மேன, பகே³வாணத்திகாஸமம்.

‘‘ஜீவிதிந்த்³ரியுபச்சே²த³க்க²ணே வத⁴கசேதனா;

சிராடி²தாதி கோ த⁴ம்மோ, நியாமேதி ஆபத்திகம்.

‘‘ஜீவிதிந்த்³ரியுபச்சே²த³க்க²ணே சே வத⁴கோ ஸியா;

மதோ ஸுத்தோ பபு³த்³தோ⁴ வா, குஸலோ வத⁴கோ ஸியா.

‘‘குஸலத்திகபே⁴தோ³ ச, வேத³னாத்திகபே⁴தோ³பி;

ஸியா ததா² க³தோ ஸித்³தோ⁴, ஸஹத்தா² வத⁴கசேதனா’’தி.

யானி பன பீ³ஜஉதுகம்மத⁴ம்மசித்தனியாமானி பஞ்ச அட்ட²கதா²ய ஆனேத்வா நித³ஸ்ஸிதானி, தேஸு அயமத்த²ஸாத⁴கசேதனா யோக³ம் க³ச்ச²தீதி மஞ்ஞே ‘‘அயம் அத்த²ஸாத⁴கசேதனானியமோ நத்தீ²’’தி சேதனானம் மிச்ச²த்தஸம்மத்தனியதானம்பி நத்தி²பா⁴வப்பஸங்க³தோ. ப⁴ஜாபியமானா யேன, தேன ஸப்³பே³பி யதா²ஸம்ப⁴வம் கம்மசித்தனியாமே ப⁴ஜந்தி க³ச்ச²ந்தீதி வேதி³தப்³ப³ம். ஜீவிதே ஆதீ³னவோ மரணவண்ணத³ஸ்ஸனே ந விப⁴த்தோவ, இத⁴ பன ஸங்கப்பபதே³ அத்த²தோ ‘‘மரணஸஞ்ஞீ மரணசேதனோ மரணாதி⁴ப்பாயோ’’தி ஏவம் அவிபூ⁴தத்தா விப⁴த்தோ, அபாகடத்தா, அனோளாரிகத்தா வா அவிபா⁴கா³ காரிதா வா. நயித³ம் விதக்கஸ்ஸ நாமந்தி ந விதக்கஸ்ஸேவ நாமம், கிந்து ஸஞ்ஞாசேதனானம்பி நாமந்தி க³ஹேதப்³ப³ம். கங்கா²விதரணியம்பி ஏவமேவ வுத்தம்.

174. காயதோதி வுத்தத்தா ‘‘ஸத்திஞஸூ’’தி வத்தப்³பே³ வசனஸிலிட்ட²த்த²ம் ‘‘உஸுஸத்திஆதி³னா’’தி வுத்தம். அனுத்³தே³ஸிகே கம்மஸ்ஸாரம்மணம் ஸோ வா ஹோதி, அஞ்ஞோ வா. உப⁴யேஹீதி கிஞ்சாபி பட²மப்பஹாரோ ந ஸயமேவ ஸக்கோதி, து³தியம் லபி⁴த்வா பன ஸக்கோந்தோ ஜீவிதவினாஸனஹேது அஹோஸி, தத³த்த²மேவ ஹி வத⁴கேன ஸோ தி³ன்னோ, து³தியோ பன அஞ்ஞேன சித்தேன தி³ன்னோ, தேன ஸுட்டு² வுத்தம் ‘‘பட²மப்பஹாரேனேவா’’தி, ‘‘சேதனா நாம தா³ருணாதி க³ரும் வத்து²ம் ஆரப்³ப⁴ பவத்தபுப்³ப³பா⁴க³சேதனா பகதிஸபா⁴வவத⁴கசேதனா, நோ தா³ருணா ஹோதீ’’தி ஆசரியேன லிகி²தம். ‘‘புப்³ப³பா⁴க³சேதனா பரிவாரா, வத⁴கசேதனாவ தா³ருணா ஹோதீ’’தி வுத்தம். யதா²தி⁴ப்பாயந்தி உபோ⁴பி படிவிஜ்ஜ²தி, ஸாஹத்தி²கோபி ஸங்கேதத்தா ந முச்சதி கிர.

கிரியாவிஸேஸோ அட்ட²கதா²ஸு அனாக³தோ. ‘‘ஏவம் விஜ்ஜ², ஏவம் பஹர, ஏவம் கா⁴ஹேஹீ’தி பாளியா ஸமேதீதி ஆசரியேன க³ஹிதோ’’தி வத³ந்தி. புரதோ பஹரித்வாதிஆதி³ வத்து²விஸங்கேதமேவ கிர. ஏதம் கா³மே டி²தந்தி புக்³க³லோவ நியமிதோ. யோ பன லிங்க³வஸேன ‘‘தீ³க⁴ம்…பே… மாரேஹீ’’தி ஆணாபேதி அனியமேத்வா. யதி³ நியமேத்வா வத³தி, ‘‘ஏதம் தீ³க⁴’’ந்தி வதே³ய்யாதி அபரே. ஆசரியா பன ‘‘தீ³க⁴ந்தி வுத்தே நியமிதம் ஹோதி, ஏவம் அனியமேத்வா வத³தி, ந பன ஆணாபகோ தீ³கா⁴தீ³ஸு அஞ்ஞதரம் மாரேஹீதி அதி⁴ப்பாயோ’’தி வத³ந்தி கிர. ‘‘அத்தோ² பன சித்தேன ஏகம் ஸந்தா⁴யபி அனியமேத்வா ஆணாபேதீ’’தி லிகி²தம். ‘‘இதரோ அஞ்ஞம் தாதி³ஸம் மாரேதி, ஆணாபகோ முச்சதீ’’தி வுத்தம் யதா²தி⁴ப்பாயம் ந க³தத்தா. ‘‘ஏவம் தீ³கா⁴தி³வஸேனாபி சித்தேன அனியமிதஸ்ஸேவாதி யுத்தம் விய தி³ஸ்ஸதீ’’தி அஞ்ஞதரஸ்மிம் க³ண்டி²பதே³ லிகி²தம், ஸுட்டு² வீமம்ஸித்வா ஸப்³ப³ம் க³ஹேதப்³ப³ம், ஓகாஸஸ்ஸ நியமிதத்தாதி ஏத்த² ஓகாஸனியமம் கத்வா நித்³தி³ஸந்தோ தஸ்மிம் ஓகாஸே நிஸின்னம் மாரேதுகாமோவ ஹோதி, ஸயம் பன ததா³ தத்த² நத்தி². தஸ்மா ஓகாஸேன ஸஹ அத்தனோ ஜீவிதிந்த்³ரியம் ஆரம்மணம் ந ஹோதி, தேன அத்தனா மாராபிதோ பரோ ஏவ மாராபிதோ. கத²ம்? ஸயம் ரஸ்ஸோ ச தனுகோ ச ஹுத்வா புப்³ப³பா⁴கே³ அத்தானம் ஸந்தா⁴ய ஆணத்திக்க²ணே ‘‘தீ³க⁴ம் ரஸ்ஸம் தூ²லம் ப³லவந்தம் மாரேஹீ’’தி ஆணாபேந்தஸ்ஸ சித்தம் அத்தனி தஸ்ஸாகாரஸ்ஸ நத்தி²தாய அஞ்ஞஸ்ஸ தாதி³ஸஸ்ஸ ஜீவிதிந்த்³ரியம் ஆரம்மணம் கத்வா பவத்ததி, தேன மூலட்ட²ஸ்ஸ கம்மப³த்³தோ⁴. ஏவம்ஸம்பத³மித³ந்தி த³ட்ட²ப்³ப³ம்.

தூ³தபரம்பரானித்³தே³ஸே ஆணாபேதி, ஆபத்தி து³க்கடஸ்ஸ. இதரஸ்ஸ ஆரோசேதி, ஆபத்தி து³க்கடஸ்ஸாதி ஆசரியந்தேவாஸீனம் யதா²ஸம்ப⁴வம் ஆரோசனே, படிக்³க³ண்ஹனே து³க்கடம் ஸந்தா⁴ய வுத்தம். ந வத⁴கோ படிக்³க³ண்ஹாதி, தஸ்ஸ து³க்கடந்தி ஸித்³த⁴ம் ஹோதி. தம் பன ஓகாஸாபா⁴வதோ ந வுத்தம். மூலட்டே²ன ஆபஜ்ஜிதப்³பா³பத்தியா ஹி தஸ்ஸ ஓகாஸோ அபரிச்சி²ன்னோ, தேனஸ்ஸ தஸ்மிம் ஓகாஸே து²ல்லச்சயம் வுத்தம். வத⁴கோ சே படிக்³க³ண்ஹாதி, மூலட்டோ² ஆசரியோ புப்³பே³ ஆபன்னது³க்கடேன ஸஹ து²ல்லச்சயம்பி ஆபஜ்ஜதி. கஸ்மா? மஹாஜனோ ஹி தேன பாபே நியோஜிதோதி. இத³ம் பன து³க்கடது²ல்லச்சயம் வத⁴கோ சே தமத்த²ம் ந ஸாவேதி ஆபஜ்ஜதி. யதி³ ஸாவேதி, பாராஜிகமேவாபஜ்ஜதி. கஸ்மா? அத்த²ஸாத⁴கசேதனாய அபா⁴வா. அனுக³ண்டி²பதே³ பன ‘‘படிக்³க³ண்ஹதி, தம் து³க்கடம் ஹோதி. யதி³ ஏவம் கஸ்மா பாடே² ந வுத்தந்தி சே? வத⁴கோ பன ‘ஸாது⁴ கரோமீ’தி படிக்³க³ண்ஹித்வா தம் ந கரோதி. ஏவஞ்ஹி நியமே ‘மூலட்ட²ஸ்ஸ கிம் நாம ஹோதி, கிமஸ்ஸ து³க்கடாபத்தீ’தி ஸஞ்ஜாதகங்கா²னம் தத³த்த²தீ³பனத்த²ம் ‘மூலட்ட²ஸ்ஸ ஆபத்தி து²ல்லச்சயஸ்ஸா’’’தி வுத்தம். ‘‘வத⁴கோ படிக்³க³ண்ஹாதி ஆபத்தி து³க்கடஸ்ஸ, மூலட்ட²ஸ்ஸ ச ஆபத்தி து²ல்லச்சயஸ்ஸா’’தி வுத்தம் ந ஸிலிஸ்ஸதி, மூலட்டே²ன ஆபஜ்ஜிதப்³பா³பத்தித³ஸ்ஸனாதி⁴காரத்தா வத⁴கோ படிக்³க³ண்ஹாதி, ஆபத்தி து³க்கடஸ்ஸாதி வுத்தம்.

விஸக்கியதூ³தபத³னித்³தே³ஸே ‘‘வத்துகாமதாய ச கிச்சே²னேத்த² வத்வா பயோஜனம் நத்தீ²தி ப⁴க³வதா ந வுத்த’’ந்தி வுத்தம். யம் பன ‘‘மூலட்ட²ஸ்ஸேவ து³க்கட’’ந்தி அட்ட²கதா²யம் வுத்தம். தத்ராயம் விசாரணா – ஆசரியேன ஆணத்தேன பு³த்³த⁴ரக்கி²தேன தத³த்தே² ஸங்க⁴ரக்கி²தஸ்ஸேவ ஆரோசிதே கிஞ்சாபி யோ ‘‘ஸாதூ⁴’’தி படிக்³க³ண்ஹாதி, அத² கோ² ஆசரியஸ்ஸேவேதம் து³க்கடம் விஸங்கேதத்தா, ந பு³த்³த⁴ரக்கி²தஸ்ஸ, கஸ்மா? அத்த²ஸாத⁴கசேதனாய ஆபன்னத்தா. தேனேவ ‘‘ஆணாபகஸ்ஸ ச வத⁴கஸ்ஸ ச ஆபத்தி பாராஜிகஸ்ஸா’’தி பாளியம் வுத்தம், தம் பன மூலட்டே²ன ஆபஜ்ஜிதப்³ப³து³க்கடம் ‘‘மூலட்ட²ஸ்ஸ அனாபத்தீ’’தி இமினா அபரிச்சி²ன்னோகாஸத்தா ந வுத்தம்.

அவிஸங்கேதே ‘‘மூலட்ட²ஸ்ஸ ஆபத்தி து²ல்லச்சயஸ்ஸா’’தி வுத்தத்தா விஸங்கேதே ஆபத்தி து³க்கடஸ்ஸாதி ஸித்³த⁴ந்தி வேதி³தப்³ப³ம். ‘‘வத⁴கோ படிக்³க³ண்ஹாதி, ஆபத்தி து³க்கடஸ்ஸா’’தி இத³ம் பன து³க்கடம் வத⁴கஸ்ஸேவ. ஸோ ஹி பட²மம் ஆணாபகம் பு³த்³த⁴ரக்கி²தம் பாராஜிகாபத்திம் பாபேத்வா ஸயம் ஜீவிதா வோரோபேத்வா ஆபஜ்ஜிஸ்ஸதீதி கிஞ்சாபி பாளியம் ‘‘ஸோ தம் ஜீவிதா வோரோபேதி, ஆணாபகஸ்ஸ ச வத⁴கஸ்ஸ ச ஆபத்தி பாராஜிகஸ்ஸா’’தி ந வுத்தம், ததா²பி தம் அத்த²தோ வுத்தமேவ, ‘‘யதோ பாராஜிகம் பஞ்ஞத்த’’ந்தி புப்³பே³ வுத்தனயத்தா ச தம் ந வுத்தம். ‘‘ஸோ தம் ஜீவிதா வோரோபேதி, ஆபத்தி ஸப்³பே³ஸம் பாராஜிகஸ்ஸா’’தி ஹி புப்³பே³ வுத்தம். ஏத்த² புப்³பே³ ஆசரியந்தேவாஸிகானம் வுத்தது³க்கடது²ல்லச்சயாபத்தியோ பட²மமேவ அனாபன்னா பாராஜிகாபத்தியா ஆபன்னத்தா. ததா²பி வத⁴கஸ்ஸ பாராஜிகாபத்தியா தேஸம் பாராஜிகபா⁴வோ பாகடோ ஜாதோதி கத்வா ‘‘ஆபத்தி ஸப்³பே³ஸம் பாராஜிகஸ்ஸா’’தி ஏகதோ வுத்தம், ந ததா² ‘‘ஆணாபகஸ்ஸ, வத⁴கஸ்ஸ ச ஆபத்தி பாராஜிகஸ்ஸா’’தி ஏத்த². கஸ்மா? வத⁴கஸ்ஸ து³க்கடாபத்தியா ஆபன்னத்தா. ஸோ ஹி பட²மம் து³க்கடாபத்திம் ஆபஜ்ஜித்வா பச்சா² பாராஜிகம் ஆபஜ்ஜதி. யதி³ பன அந்தேவாஸிகா கேவலம் ஆசரியஸ்ஸ க³ருகதாய ஸாஸனம் ஆரோசேந்தி ஸயம் அமரணாதி⁴ப்பாயா ஸமானா பாராஜிகேன அனாபத்தி. அகப்பியஸாஸனஹரணபச்சயா து³க்கடாபத்தி ஹோதி ஏவ, இமஸ்ஸத்த²ஸ்ஸ ஸாத⁴னத்த²ம் த⁴ம்மபத³வத்தூ²ஹி மிக³லுத்³த³கஸ்ஸ ப⁴ரியாய ஸோதாபன்னாய த⁴னுஉஸுஸூலாதி³தா³னம் நித³ஸ்ஸனம் வத³ந்தி ஏகே. தம் தித்திரஜாதகேன (ஜா. 1.4.73 ஆத³யோ) ஸமேதி, தஸ்மா ஸுத்தஞ்ச அட்ட²கத²ஞ்ச அனுலோமேதீதி நோ தக்கோதி ஆசரியோ. இத⁴ பன தூ³தபரம்பராய ச ‘‘இத்த²ன்னாமஸ்ஸ பாவத³, இத்த²ன்னாமோ இத்த²ன்னாமம் பாவத³தூ’’தி ஏத்த² அவிஸேஸேத்வா வுத்தத்தா வாசாய வா ஆரோசேது, ஹத்த²முத்³தா³ய வா, பண்ணேன வா, தூ³தேன வா ஆரோசேது, விஸங்கேதோ நத்தி². ஸசே விஸேஸேத்வா மூலட்டோ², அந்தராதூ³தோ வா வத³தி, தத³திக்கமே விஸங்கேதோதி வேதி³தப்³ப³ம்.

இதா³னி இமஸ்மிம்யேவ அதி⁴காரத்³வயே அனுக³ண்டி²பதே³ வுத்தனயோ வுச்சதி – ‘‘வத⁴கோ படிக்³க³ண்ஹாதி, ஆபத்தி து³க்கடஸ்ஸா’’தி வத⁴கஸ்ஸேவ ஆபத்தி, ந ஆணாபகஸ்ஸ பு³த்³த⁴ரக்கி²தஸ்ஸ. யதி³ பன ஸோ வஜ்ஜ²மரணாமரணேஸு அவஸ்ஸமஞ்ஞதரம் கரோதி, பு³த்³த⁴ரக்கி²தஸ்ஸாணத்திக்க²ணே ஏவ பாராஜிகது³க்கடேஸு அஞ்ஞதரம் ஸியா. ‘‘இதி சித்தமனோ’’தி அதி⁴காரதோ ‘‘சித்தஸங்கப்போ’’தி ஏத்தா²பி இதி-ஸத்³தோ³ விய ‘‘வத⁴கோ படிக்³க³ண்ஹாதி, மூலட்ட²ஸ்ஸ ஆபத்தி து²ல்லச்சயஸ்ஸா’’தி அதி⁴காரதோ ‘‘மூலட்ட²ஸ்ஸ ஆபத்தி து³க்கடஸ்ஸா’’தி வுத்தமேவ ஹோதி. கஸ்மா ஸரூபேன ந வுத்தந்தி சே? ததோ சுத்தரி நயதா³னத்த²ம். ‘‘மூலட்ட²ஸ்ஸ ஆபத்தி து³க்கடஸ்ஸா’’தி ஹி வுத்தே மூலட்ட²ஸ்ஸேவ வஸேன நியமிதத்தா ‘‘படிக்³க³ண்ஹந்தஸ்ஸ து³க்கடம் ஹோதீ’’தி ந ஞாயதி. ‘‘வத⁴கோ படிக்³க³ண்ஹாதி, ஆபத்தி து³க்கடஸ்ஸா’’தி ஹி அனியமேத்வா வுத்தே ஸக்கா உப⁴யேஸம் வஸேன து³க்கடே யோஜேதும். தஸ்மா ஏவ ஹி அட்ட²கதா²சரியேஹி அதி⁴காரம் க³ஹேத்வா ‘‘ஸங்க⁴ரக்கி²தேன ஸம்படிச்சி²தே மூலட்ட²ஸ்ஸேவ து³க்கடந்தி வேதி³தப்³ப³’’ந்தி வுத்தம். படிக்³க³ண்ஹந்தஸ்ஸ நேவ அனுஞ்ஞாதம், ந படிக்கி²த்தம், கேவலந்து பு³த்³த⁴ரக்கி²தஸ்ஸ அனியமிதத்தா படிக்கி²த்தம், தஸ்ஸ பன பாராஜிகது³க்கடேஸு அஞ்ஞதரம் ப⁴வேய்யாதி அயமத்தோ² தீ³பிதோ, தஸ்மா தம்பி ஸுவுத்தம். யஸ்மா உப⁴யேஸம் வஸேன யோஜேதும் ஸக்கா, தஸ்மா ஆசரியேஹி ‘‘படிக்³க³ண்ஹந்தஸ்ஸேவேதம் து³க்கட’’ந்தி வுத்தம். தத்த² மூலட்டோ² நேவ அனுஞ்ஞாதோ ‘‘மூலட்ட²ஸ்ஸா’’தி வசனாபா⁴வதோ, ந ச படிக்கி²த்தோ ‘‘படிக்³க³ண்ஹந்தஸ்ஸ ஆபத்தி து³க்கடஸ்ஸா’’தி பாளியா அபா⁴வதோ, படிக்³க³ண்ஹனபச்சயா வத⁴கஸ்ஸ து³க்கடம் ஸியாதி நயம் தா³தும் ‘‘மூலட்ட²ஸ்ஸா’’தி பாளியம் அவுத்தத்தா ‘‘தம் படிக்³க³ண்ஹந்தஸ்ஸேவேதம் து³க்கட’’ந்தி யம் வுத்தம், தம்பி ஸுவுத்தம். தத்ர ஹி பு³த்³த⁴ரக்கி²தஸ்ஸ படிக்கி²த்தம், வுத்தனயேன பன தஸ்ஸ ஆபத்தி அனியதாதி. கஸ்மா பன அட்ட²கதா²யம் அனுத்தானம் படிக்³க³ண்ஹனபச்சயா வத⁴கஸ்ஸ து³க்கடம் அவத்வா மூலட்ட²ஸ்ஸேவ வஸேன து³க்கடம் வுத்தந்தி சே? அனிட்ட²னிவாரணத்த²ம். ‘‘ஸங்க⁴ரக்கி²தேன ஸம்படிச்சி²தே படிக்³க³ண்ஹனபச்சயா தஸ்ஸ து³க்கட’’ந்தி ஹி வுத்தே அனந்தரனயேன ஸரூபேன வுத்தத்தா இதா⁴பி மூலட்ட²ஸ்ஸ து²ல்லச்சயம் அட்ட²கதா²யம் வுத்தமேவ ஹோதீதி ஆபஜ்ஜதி. இதி தம் ஏவம் ஆபன்னம் து²ல்லச்சயம் உத்தானந்தி தம் அவத்வா படிக்³க³ண்ஹந்தஸ்ஸ து³க்கடம் வுத்தம். அனுத்தானத்தா அட்ட²கதா²யந்தி இமம் அனிட்ட²க்³க³ஹணம் நிவாரேதும் ‘‘மூலட்ட²ஸ்ஸேவேதம் து³க்கட’’ந்தி வுத்தம். ஆசரியேன ஹி வுத்தனயேன படிக்³க³ண்ஹந்தஸ்ஸ து³க்கடம்பி உத்தானமேவ. உத்தானஞ்ச கஸ்மா அம்ஹாகம் க²ந்தீதி வுத்தந்தி சே? படிபத்திதீ³பனத்த²ம். ‘‘பிடகத்தயாதீ³ஸு அப்படிஹதபு³த்³தி⁴யோபி ஆசரியா ஸரூபேன பாளியம் அட்ட²கதா²யஞ்ச அவுத்தத்தா ஏவரூபேஸு நாம டா²னேஸு ஏவம் படிபஜ்ஜந்தி, கிமங்க³ம் பன மாதி³ஸோதி ஸுஹத³யா குலபுத்தா அனாக³தே வுத்தனயமனதிக்கமித்வா ஸங்கரதோ³ஸம் விவஜ்ஜேத்வா வண்ணனாவேலஞ்ச அனதிக்கம்ம படிபஜ்ஜந்தீ’’தி ச அபரேஹி வுத்தம். அயம் பன அட்ட²கதா²ய வா அவுத்தத்தா ஏவரூபேஸு நாம பாடோ² ஆசரியேன பச்சா² நிக்கி²த்தத்தா கேஸுசி போத்த²கேஸு ந தி³ஸ்ஸதீதி கத்வா ஸப்³ப³ம் லிகி²ஸ்ஸாம. ஏவம் ஸந்தே படிக்³க³ஹணே ஆபத்தியேவ ந ஸியா, ஸஞ்சரித்தபடிக்³க³ஹணமரணாபி⁴னந்த³னேஸுபி ச ஆபத்தி ஹோதி, மாரணபடிக்³க³ஹணே கத²ம் ந ஸியா, தஸ்மா படிக்³க³ண்ஹந்தஸ்ஸேவேதம் து³க்கடம், தேனேவேத்த² ‘‘மூலட்ட²ஸ்ஸா’’தி ந வுத்தம். புரிமனயேபி சேதம் படிக்³க³ண்ஹந்தஸ்ஸ வேதி³தப்³ப³மேவ, ஓகாஸாபா⁴வேன பன ந வுத்தம். தஸ்மா யோ யோ படிக்³க³ண்ஹாதி, தஸ்ஸ தஸ்ஸ தப்பச்சயா ஆபத்தியேவாதி அயமேத்த² அம்ஹாகம் க²ந்தி. யதா² சேத்த², ஏவம் அதி³ன்னாதா³னேபீதி.

175. அரஹோ ரஹோஸஞ்ஞீனித்³தே³ஸாதீ³ஸு கிஞ்சாபி பாளியம், அட்ட²கதா²யஞ்ச து³க்கடமேவ வுத்தம், ததா²பி தத்த² பரம்பராய ஸுத்வா மரதூதி அதி⁴ப்பாயேன உல்லபந்தஸ்ஸ உத்³தே³ஸே ஸதி உத்³தி³ட்ட²ஸ்ஸ மரணேன ஆபத்தி பாராஜிகஸ்ஸ, அஸதி யஸ்ஸ கஸ்ஸசி மரணேன ஆபத்தி பாராஜிகஸ்ஸ. ‘‘இத்த²ன்னாமோ ஸுத்வா மே வஜ்ஜ²ஸ்ஸ ஆரோசேதூ’’தி உத்³தி³ஸித்வா உல்லபந்தஸ்ஸ விஸங்கேததா தூ³தபரம்பராய வுத்தத்தா வேதி³தப்³பா³. ஸசே ‘‘யோ கோசி ஸுத்வா வத³தூ’’தி உல்லபதி, வஜ்ஜோ² ஸயமேவ ஸுத்வா மரதி, விஸங்கேதத்தா ந பாராஜிகம். யோ கோசி ஸுத்வா வத³தி, ஸோ சே மரதி, பாராஜிகம். ‘‘யோ கோசி மம வசனம் ஸுத்வா தம் மாரேதூ’’தி உல்லபதி, யோ கோசி ஸுத்வா மாரேதி, பாராஜிகம், ஸயமேவ ஸுத்வா மாரேதி, விஸங்கேதத்தா ந பாராஜிகந்தி ஏவம் யதா²ஸம்ப⁴வோ வேதி³தப்³போ³.

176. மூலம் த³த்வா முச்சதீதி ஏத்த² பி⁴ந்தி³த்வா, ப⁴ஞ்ஜித்வா, சவித்வா, சுண்ணேத்வா, அக்³கி³ம்ஹி பக்கி²பித்வா வா பகே³வ முச்சதீதி அத்த²தோ வுத்தமேவ ஹோதி. யேஸம் ஹத்த²தோ மூலம் க³ஹிதந்தி யேஸம் ஞாதகபரிவாரிதானம் ஹத்த²தோ மூலம் தேன பி⁴க்கு²னா க³ஹிதம், போத்த²கஸாமிகஹத்த²தோ புப்³பே³ தி³ன்னமூலம் புன க³ஹேத்வா தேஸஞ்ஞேவ ஞாதகாதீ³னம் த³த்வா முச்சதி, ஏவம் போத்த²கஸாமிகஸ்ஸேவ ஸந்தகம் ஜாதம் ஹோதி. அனுக³ண்டி²பதே³ பன ‘‘ஸசேபி ஸோ விப்படிஸாரீ ஹுத்வா ஸீக⁴ம் தேஸம் மூலம் த³த்வா முச்சதீ’’தி வுத்தம், தம் யேன த⁴னேன போத்த²கோ கீதோ, தஞ்ச த⁴னம் ஸந்தா⁴ய வுத்தம். கஸ்மா? போத்த²கஸாமிகஹத்த²தோ த⁴னே க³ஹிதே போத்த²கே அதி³ன்னேபி முச்சனதோ. ஸசே அஞ்ஞம் த⁴னம் ஸந்தா⁴ய வுத்தம், ந யுத்தம் போத்த²கஸ்ஸ அத்தனியபா⁴வதோ அமோசிதத்தா. ஸசே போத்த²கம் ஸாமிகானம் த³த்வா மூலம் ந க³ண்ஹாதி, ந முச்சதி அத்தனியபா⁴வதோ அமோசிதத்தா. ஸசே போத்த²கம் மூலட்டே²ன தி³ய்யமானம் ‘‘தவேவ ஹோதூ’’தி அப்பேதி, முச்சதி அத்தனியபா⁴வதோ மோசிதத்தா. ஏத்தா²யம் விசாரணா – யதா² சேதியம் வா படிமம் போக்க²ரணிம் ஸேதும் வா கிணித்வா க³ஹிதம்பி காரகஸ்ஸேவேதம் புஞ்ஞம், ந கிணித்வா க³ஹிதஸ்ஸ, ததா² பாபம்பி யேன போத்த²கோ லிகி²தோ, தஸ்ஸேவ யுஜ்ஜதி, ந இதரஸ்ஸாதி சே? ந, ‘‘ஸத்த²ஹாரகம் வாஸ்ஸ பரியேஸேய்யா’’தி வசனதோ. பரேன ஹி கதஸத்த²ம் லபி⁴த்வா உபனிக்கி²பந்தஸ்ஸ பாராஜிகந்தி ஸித்³த⁴ம். ஏவம் பரேன லிகி²தம்பி போத்த²கம் லபி⁴த்வா யதா² வஜ்ஜோ² தம் பஸ்ஸித்வா மரதி, ததா² உபனிக்கி²பேய்ய பாராஜிகந்தி ஸித்³த⁴ம் ஹோதீதி. சேதியாதீ³தி ஏதமனித³ஸ்ஸனம் கரணபச்சயம் ஹி தம் கம்மம் இத³ம்மரணபச்சயந்தி ஏவம் ஆசரியேன விசாரிதம். மம பன சேதியாதி³னித³ஸ்ஸனேனேவ ஸோபி அத்தோ² ஸாதே⁴தப்³போ³ விய படிபா⁴தி.

தத்தகா பாணாதிபாதாதி ‘‘ஏகாபி சேதனா கிச்சவஸேன ‘தத்தகா’தி வுத்தா ஸதிபட்டா²னஸம்மப்பதா⁴னானம் சதுக்கதா வியா’’தி லிகி²தம். பமாணே ட²பேத்வாதி அத்தனா அதி⁴ப்பேதப்பமாணே. ‘‘கதம் மயா ஏவரூபே ஆவாடே க²ணிதே தஸ்மிம் பதித்வா மரதூ’’தி அதி⁴ப்பாயேன வத⁴கோ ஆவாடப்பமாணம் நியமேத்வா ஸசே க²ணி, தம் ஸந்தா⁴ய வுத்தம் ‘‘இமஸ்மிம் ஆவாடே’’தி. இதா³னி க²ணிதப்³ப³ம் ஸந்தா⁴ய ஏத்தகப்பமாணஸ்ஸ அனியமிதத்தா ‘‘ஏகஸ்மிம்பி குதா³லப்பஹாரே’’திஆதி³ வுத்தம், ஸுத்தந்திகத்தே²ரேஹி கிஞ்சாபி உபட²தம், ததா²பி ஸன்னிட்டா²பகசேதனா உப⁴யத்த² அத்தே²வாதி ஆசரியா. ப³ஹூனம் மரணே ஆரம்மணனியமே கத²ந்தி சே? வஜ்ஜே²ஸு ஏகஸ்ஸ ஜீவிதிந்த்³ரியே ஆலம்பி³தே ஸப்³பே³ஸமாலம்பி³தமேவ ஹோதி. ஏகஸ்ஸ மரணேபி ந தஸ்ஸ ஸகலம் ஜீவிதம் ஸக்கா ஆலம்பி³தும் ந உப்பஜ்ஜமானம், உப்பன்னம், நிருஜ்ஜ²மானம், அத்தி²தாயபாணாதிபாதசேதனாவ பச்சுப்பன்னாரம்மணா, புரேஜாதாரம்மணா ச ஹோதி, தஸ்மா தம்பி யுஜ்ஜதி. பச்சி²மகோடியா ஏகசித்தக்க²ணே புரேஜாதம் ஹுத்வா டி²தம் தம் ஜீவிதமாலம்ப³ணம் கத்வா ஸத்தமஜவனபரியாபன்னசேதனாய ஓபக்கமே கதே அத்த²தோ தஸ்ஸ ஸத்தஸ்ஸ ஸப்³ப³ம் ஜீவிதிந்த்³ரியமாலம்பி³தம், வோரோபிதஞ்ச ஹோதி, இதோ பனஞ்ஞதா² ந ஸக்கா; ஏவமேவ புப்³ப³பா⁴கே³ ‘‘ப³ஹூபிஸத்தே மாரேமீ’’தி சிந்தேத்வா ஸன்னிட்டா²னகாலே விஸபக்கி²பனாதீ³ஸு ஏகம் பயோக³ம் ஸாத⁴யமானா வுத்தப்பகாரசேதனா தேஸு ஏகஸ்ஸ வுத்தப்பகாரம் ஜீவிதிந்த்³ரியம் ஆலம்ப³ணம் கத்வா உப்பஜ்ஜதி, ஏவம் உப்பன்னாய பனேகாய ஸப்³பே³பி தே மாரிதா ஹோந்தி தாய ஏவ ஸப்³பே³ஸம் மரணஸித்³தி⁴தோ, அஞ்ஞதா² ந ஸக்கா வோரோபேதும், ஆலம்பி³தும் வா. தத்த² ஏகாய சேதனாய ப³ஹூனம் மரணே அகுஸலராஸி கத²ந்தி சே? விஸும் விஸும் மரணே பவத்தசேதனானம் கிச்சகரணதோ. கத²ம்? தா பன ஸப்³பா³ உபபஜ்ஜவேத³னீயாவ ஹோந்தி, தஸ்மா தாஸு யாய காயசி தி³ன்னாய படிஸந்தி⁴யா இதரா ஸப்³பா³பி ‘‘ததோ ப³லவதரகுஸலபடிபா³ஹிதா அஹோஸிகம்ம’’ந்திஆதி³கோட்டா²ஸம் ப⁴ஜந்தி, புனபி விபாகம் ஜனிதும் ந ஸக்கோந்தி. அபராபரியவேத³னீயாபி விய தம் படிபா³ஹித்வா குஸலசேதனா படிஸந்தி⁴ம் தே³தி, ததா² அயம்பி சேதனா அனந்தரப⁴வே ஏவ படிஸந்தி⁴தா³னாதி³வஸேன தாஸம் கிச்சலேஸகரணதோ ஏகாபி ஸமானா ‘‘ராஸீ’’தி வுத்தா. தாய பன தி³ன்னாய படிஸந்தி⁴யா அதிதிக்கோ² விபாகோ ஹோதி. அயமேத்த² விஸேஸோதிஆதி³ அனுக³ண்டி²பதே³ பபஞ்சிதம்.

அமரிதுகாமா வாதி அதி⁴ப்பாயத்தா ஓபபாதிகமரணேபி ஆபத்தி. ‘‘‘நிப்³ப³த்தித்வா’தி வுத்தத்தா பதனம் ந தி³ஸ்ஸதீதி சே? ஓபபாதிகத்தம், பதனஞ்ச ஏகமேவா’’தி லிகி²தம். அத² வா ‘‘ஸப்³ப³தா²பி அனுத்³தி³ஸ்ஸேவா’’தி வசனதோ ஏத்த² மரதூதி அதி⁴ப்பாயஸம்ப⁴வதோ ‘‘உத்தரிதும் அஸக்கோந்தோ மரதி பாராஜிகமேவா’’தி ஸுவுத்தம். ஸசே ‘‘பதித்வா மரதூ’’தி நியமேத்வா க²ணிதோ ஹோதி, ஓபபாதிகமனுஸ்ஸோ ச நிப்³ப³த்தித்வா டி²தனியமேனேவ ‘‘உத்தரிதும் ந ஸக்கா’’தி சிந்தேத்வா மரதீதி பாராஜிகச்சா²யா ந தி³ஸ்ஸதி, தேன வுத்தம் ‘‘உத்தரிதும் அஸக்கோந்தோ’’தி. ஸோ ஹி உத்தரிதும் அஸக்கோந்தோ புனப்புனம் பதித்வா மரதி, தேன பாதோபி தஸ்ஸ ஸித்³தோ⁴ ஹோதீதி அதி⁴ப்பாயோ. தத்த² ஸியா – யோ பன ‘‘உத்தரிதும் அஸக்கோந்தோ மரதீ’’தி வுத்தோ, ஸோ ஓபாதக²ணனக்க²ணே அரூபலோகே ஜீவதி. வத⁴கசேதனா ச ‘‘அனியதோ த⁴ம்மோ மிச்ச²த்தனியதஸ்ஸ த⁴ம்மஸ்ஸ ஆரம்மணபச்சயேன பச்சயோ, ரூபஜீவிதிந்த்³ரியம் மாதுகா⁴திகம்மஸ்ஸ பிதுகா⁴திகம்மஸ்ஸ அரஹந்தகா⁴திகம்மஸ்ஸ ருஹிருப்பாத³கம்மஸ்ஸ ஆரம்மணபச்சயேன பச்சயோ’’தி (பட்டா². 2.15.38 மிச்ச²த்தனியதத்திக) வசனதோ ரூபஜீவிதிந்த்³ரியாரம்மணம் ஹோதி, ந ச தம் அரூபாவசரஸத்தஸ்ஸத்தி², ந ச ஸா சேதனா ‘‘அனியதோ த⁴ம்மோ மிச்ச²த்தனியதஸ்ஸ த⁴ம்மஸ்ஸ புரேஜாதபச்சயேன பச்சயோ, ஆரம்மணபுரேஜாதம் வத்து²புரேஜாதம் ஆரம்மணபுரேஜாதம். ரூபஜீவிதிந்த்³ரியம் மாதுகா⁴திகம்மஸ்ஸ புரேஜாதபச்சயேன பச்சயோ’’தி (பட்டா². 2.15.48 மிச்ச²த்தனியதத்திக) வசனதோ அனாக³தாரம்மணா ஹோதி. அஞ்ஞோ இத⁴ பதித்வா மரணகஸத்தோ நத்தி², ஏவம் ஸந்தே வத⁴கசேதனாய கிம் ஆரம்மணந்தி சே? யஸ்ஸ கஸ்ஸசி இத⁴ ஜீவனகஸத்தஸ்ஸ பச்சுப்பன்னம் ஜீவிதிந்த்³ரியம் ஆரம்மணம். கிஞ்சாபி ஸோ ந மரதி, அத² கோ² பாணாதிபாதோ ஹோதி ஏவ. யதா² கிம் ‘‘யதா²க்கமேன டி²தே ஸத்த ஜனே ஏகேன கண்டே³ன விஜ்ஜி²த்வா மாரேமீ’’தி புப்³ப³பா⁴கே³ சிந்தேத்வா ஸன்னிட்டா²னகாலே தேஸு ஏகஸ்ஸ ஜீவிதமாரம்மணம் கத்வா கண்ட³ம் விஸ்ஸஜ்ஜேதி, கண்டோ³ தம் விரஜ்ஜி²த்வா இதரே ச² ஜனே மாரேதி, ஏவம் ஸந்தேபி அயம் பாணாதிபாதீ ஏவ ஹோதி, ஏவமிதா⁴பி ‘‘யோ கோசீ’’தி விகப்பேந்தஸ்ஸ வத⁴கசேதனா யஸ்ஸ கஸ்ஸசி ஜீவிதாரம்மணம் கத்வா பவத்ததி, தஸ்மிம் அமதேபி இதரஸ்ஸ வஸேன பாணாதிபாதீ. ஸசே அரஹா ஹுத்வா பரினிப்³பா³யதி, அரஹந்தகா⁴தகோவ ஹோதி. ஏஸ நயோ ஸப்³ப³த்த² ஏவரூபேஸு. அயமேவ ஹேத்த² ஆசரியபரம்பராக³தா யுத்தி வினிச்ச²யகதா²தி வுத்தம்.

பதனரூபம் பமாணந்தி ஏத்த² யதா² மாதுயா பதித்வா பரிவத்தலிங்கா³ய மதாய ஸோ மாதுகா⁴தகோ ஹோதி, ந கேவலம் புரிஸகா⁴தகோ, தஸ்மா பதனஸ்ஸேவ வஸேன ஆபத்தி. கஸ்மா? பதனரூபமரணரூபானம் ஏகஸந்தானத்தா, ததே³வ ஹிஸ்ஸ ஜீவிதிந்த்³ரியம், தஸ்ஸ ஹி பரிவத்தனம் நத்தி², இத்தி²புரிஸிந்த்³ரியானேவ பவத்தியம் நிருஜ்ஜ²னுப்பஜ்ஜனகானி, இத்தி²புரிஸோதி ச தத்த² வோஹாரமத்தமேவ, தஸ்மா மாதுகா⁴தகோவ, ந புரிஸகா⁴தகோதி, யதா² தஸ்ஸ பதனரூபவஸேனாபத்தி, ததா² இதா⁴பி பதனரூபவஸேன து²ல்லச்சயம் ஏகஸந்தானத்தாதி அயம் பட²மதே²ரவாதே³ யுத்தி. து³தியே கிஞ்சாபி பேதோ பதிதோ, யக்கோ² ச, அத² கோ² அஹேதுகபடிஸந்தி⁴கத்தா அகுஸலவிபாகஸ்ஸ ‘‘வாமேன ஸூகரோ ஹோதீ’’தி (தீ³. நி. அட்ட². 2.296; மஹானி. அட்ட². 166) ஏத்த² வுத்தயக்கா²னம் படிஸந்தி⁴ விய ஸப்³ப³ரூபானம் ஸாதா⁴ரணத்தா, அமனுஸ்ஸஜாதிகத்தா ச திரச்சா²னரூபேன மதே மரணரூபவஸேன பாசித்தியம், வத்து²வஸேன லஹுகாபத்தியா பரிவத்தனா ஹோதி ஏவ தத்த²ஜாதகருக்கா²தி³சே²த³னபாசித்தியபரிவத்தனம் விய. அயமேவ யுத்ததரோ, தஸ்மா பச்சா² வுத்தோ. பாராஜிகஸ்ஸ பன மனுஸ்ஸஜாதிகோ யதா² ததா² வா பதித்வா யதா² ததா² வா மரது, பாராஜிகமேவ க³ருகத்தா. க³ருகாபத்தியா ஹி விபரிவத்தனா நத்தீ²தி வுத்தம்.

து²ல்லச்சயம் திரச்சா²னே, மதே பே⁴த³ஸ்ஸ காரணம்;

ஸரூபமரணம் திஸ்ஸோ, பு²ஸ்ஸோ மஞ்ஞேதி அஞ்ஞதா².

க³ண்டி²பதே³ பன ‘‘து³தியவாதே³ புது²ஜ்ஜனஸ்ஸ பதித்வா அரஹத்தம் பத்வா மரந்தஸ்ஸ வஸேன வுத்தோ’’தி லிகி²தம். ‘‘திரச்சா²னே’’தி ஏத்த² கேசி வத³ந்தி ‘‘தே³வா அதி⁴ப்பேதா’’தி. ‘‘ஸகஸகரூபேனேவ மரணம் ப⁴வதி நாஞ்ஞதா²’’தி ச வத³ந்தி. யக்க²பேதரூபேன மதேபி ஏஸேவ நயோதி து²ல்லச்சயந்தி அத்தோ². ‘‘திரச்சா²னக³தமனுஸ்ஸவிக்³க³ஹமரணே வியா’’தி லிகி²தம். பஹாரம் லத்³தா⁴தி ஸத்தானம் மாரணத்தா²ய கதத்தா வுத்தம்.

177. ஸாது⁴ ஸுட்டு² மரதூதி வசீபே⁴த³ம் கரோதி. விஸபா⁴க³ரோகோ³தி ஸரீரட்டோ² க³ண்ட³பீளகாதி³.

178. காளானுஸாரீதி ஏகிஸ்ஸா லதாய மூலம் கிர. மஹாகச்ச²பேன கதபுப்ப²ம் வா. ஹம்ஸபுப்ப²ந்தி ஹம்ஸானம் பக்க²பத்தம். ஹேட்டா² வுத்தனயேன ஸாஹத்தி²காணத்திகனயஞ்ஹேத்த² யோஜேத்வா காயவாசாசித்ததோ ஸமுட்டா²னவிதி⁴ த³ஸ்ஸேதப்³போ³.

பத³பா⁴ஜனீயவண்ணனா நிட்டி²தா.

வினீதவத்து²வண்ணனா

180. மரணத்தி²காவ ஹுத்வாதி இமஸ்ஸ காயஸ்ஸ பே⁴தே³ன ஸக்³க³பாபனாதி⁴ப்பாயத்தா அத்த²தோ மரணத்தி²காவ ஹுத்வா ஏவம்அதி⁴ப்பாயினோ மரணத்தி²கா நாம ஹோந்தீதி அத்தனோ மரணத்தி²கபா⁴வம் அஜானந்தா ஆபன்னா பாராஜிகம். ந ஹி தே ‘‘அத்தனோ சித்தப்பவத்திம் ந ஜானந்தீ’’தி வுச்சந்தி. வோஹாரவஸேனாதி புப்³ப³பா⁴க³வோஹாரவஸேன. ஸன்னிட்டா²னே பனேதம் நத்தி². பாஸே ப³த்³த⁴ஸூகரமோசனே விய ந ஹோதி. யதா²னுஸந்தி⁴னாதி அந்தரா அமரித்வாதி அத்தோ². அப்படிவேக்கி²த்வாதி அவிசாரேத்வா. ஹேட்டி²மபா⁴கே³ ஹி கிஸ்மிஞ்சி விஜ்ஜமானே வலி பஞ்ஞாயதி. த³ஸ்ஸிதேதி உத்³த⁴ரித்வா ட²பிதே. படிப³ந்த⁴ந்தி தயா படிப³ந்த⁴ம், பரிபோ⁴க³ந்தராயம் ஸங்க⁴ஸ்ஸ மா அகாஸீதி அத்தோ².

181-2. யஸ்மா கிரியம் தா³தும் ந ஸக்கா, தஸ்மா ‘‘பட²மம் லத்³த⁴’’ந்தி வுத்தம். புப்³பே³பி அத்தனா லத்³த⁴பிண்ட³பாததோ பணீதபணீதம் தே³ந்தோ தத்த²பி அத்தகாரியம் அதா³ஸி. அஸஞ்சிச்சாதி ஏத்த² அஞ்ஞம் ஆகட்³ட⁴ந்தஸ்ஸ அஞ்ஞஸ்ஸ பதனே ஸப்³பே³ன ஸப்³ப³ம் அபி⁴ஸந்தி⁴ நத்தி². ந மரணாதி⁴ப்பாயஸ்ஸாதி படிகோ⁴ ச பயோகோ³ ச அத்தி², வத⁴கசேதனா நத்தி². அஜானந்தஸ்ஸாதி ஏத்த² ‘‘வத்து²அஜானனவஸேன அஜானந்தஸ்ஸ தோ³ஸோ நத்தி², இத³ம் கிர தேஸம் நானத்தம். ‘அஸஞ்சிச்சோ அஹ’ந்தி பாளியம் ந தி³ஸ்ஸதி. அட்ட²கதா²யம் வுத்தத்தா ததா²ரூபாய பாளியா ப⁴விதப்³ப³’’ந்தி வத³ந்தி. நோ சே, து²ல்லச்சயந்தி ஏத்த² ‘‘து³க்க²வேத³னா சே நுப்பஜ்ஜதி, து³க்கடமேவா’’தி வத³ந்தி, வீமம்ஸிதப்³ப³ம். ‘‘முக்³க³ரா நாம கா²த³னத³ண்ட³கா. வேமா நாம தேஸம் கா²த³னத³ண்ட³கானம் ஹேட்டா² ச உபரி ச திரியம் ப³ந்தி⁴தப்³ப³த³ண்டா³’’தி லிகி²தம். ஹேட்டா²வ து³விதா⁴பி பட²ந்தி. ஹத்த²ப்பத்தோ விய தி³ஸ்ஸதி ‘‘தஸ்ஸ விக்கே²போ மா ஹோதூ’’தி உபச்சி²ந்த³தி. விஸேஸாதி⁴க³மம் ப்³யாகரித்வா தப்பப⁴வம் ஸக்காரம் லஜ்ஜீயந்தோ ஆஹாரம் உபச்சி²ந்த³தி ஸபா⁴கா³னம் ப்³யாகதத்தா. தே ஹி கப்பியகே²த்தம் ஆரோசேந்தி.

186. அகதவிஞ்ஞத்தியாதி ந விஞ்ஞத்தியா. ஸா ஹி அனுஞ்ஞாதத்தா கதாபி அகதா வியாதி அகதவிஞ்ஞத்தி. ‘‘‘வதே³ய்யாத², ப⁴ந்தே யேனத்தோ²’தி ஏவம் அகதட்டா²னே விஞ்ஞத்தி அகதவிஞ்ஞத்தீ’’தி லிகி²தம். தித்தி²யபூ⁴தானம் மாதாபிதூனம் ஸஹத்தா² தா³தும் ந வட்டதீதி. பிதுச்சா² நாம பிதுப⁴கி³னீ. ஸசேபி ந யாசந்தி ‘‘யாசிதும் து³க்க²’’ந்தி, ஸயம் வா ஏவம் வத்துமஸக்கோந்தா. ‘‘யதா³ தேஸம் அத்தோ² ப⁴விஸ்ஸதீ’’தி ஆபோ⁴க³ம் கத்வா வா. ‘‘‘வேஜ்ஜகம்மம் வா ந ஹோதீ’தி வசனதோ யாவ ஸத்தமோ குலபரிவட்டோ, தாவ பே⁴ஸஜ்ஜம் காதும் வட்டதீ’’தி வத³ந்தி. ஸப்³ப³பதே³ஸூதி மஹாமாதுயாசூளமாதுயாதிஆதீ³னம்.

வுத்தனயேன பரியேஸித்வாதி ‘‘ஸாமணேரேஹி வா’’திஆதி³னா. ‘‘ந அகதவிஞ்ஞத்தியா’’தி வத³ந்தி. ‘‘பச்சாஸீஸதி ஸசே, து³க்கட’’ந்தி வத³ந்தி. கப்பியவஸேனாதி புப்ப²ம் ஆனேதா²திஆதி³னா. ‘‘பூஜம் அகாஸீ’தி வுத்தத்தா ஸயம் க³ஹேதும் ந வட்டதீ’’தி வத³ந்தி.

‘‘ப⁴ணதா²’’தி வுத்தே பன காதப்³ப³ம். த⁴ம்மஞ்ஹி வத்தும் வட்டதி. நோ சே ஜானந்தி, ந பாதா³ அபனேதப்³பா³. அவமங்க³லந்தி ஹி க³ண்ஹந்தி.

சோரனாக³ஸ்ஸ ஹி ஆமட்ட²ம் தி³ன்னே குஜ்ஜி²ஸ்ஸதி, அனாமட்ட²ம் ந வட்டதீதி அங்கு³லந்தரே தோ²கம் ப⁴த்தம் க³ஹேத்வா பத்தே ப⁴த்தம் ஸப்³ப³ம் அதா³ஸி, ஸோ தேன துஸ்ஸி. வரபோத்த²கசித்தத்த²ரணந்தி ஸிப்³பி³த்வா காதப்³ப³த்த²ரணவிகதி. பிதுராஜா த³மிளஸ்ஸ பராஜிதோ ரோஹணே ஸோளஸவஸ்ஸானி வஸித்வா மித்தாமச்சபரிவுதோ ‘‘ரஜ்ஜம் க³ண்ஹாமீ’’தி ஆக³ந்த்வா அந்தராமக்³கே³ அப்பமத்தகஸ்ஸ காரணா ஏகம் அமச்சம் கா⁴தாபேஸி. ஸேஸா ப⁴யேன பலாயந்தா அரஞ்ஞே அந்தராமக்³கே³ சோரேஹி விலுத்தா ஹம்பு³க³ல்லகவிஹாரம் க³ந்த்வா தத்த² சாதுனிகாயிகதிஸ்ஸத்தே²ரோ தேஸம் ஸங்க³ஹம் கத்வா புன ஆனேத்வா ரஞ்ஞோ த³ஸ்ஸேஸி, தேஹி ஸத்³தி⁴ம் ரஜ்ஜம் க³ஹேத்வா ராஜா ஹம்பு³க³ல்லகதிஸ்ஸத்தே²ரஸ்ஸ அப⁴யகி³ரிவிஹாரம் அகாஸி. ஸேஸாபி ஏகேகவிஹாரம் காராபேஸும் கிர.

187. சோரஸமீபம் பேஸேந்தோ ‘‘வாளயக்க²விஹாரம் பேஸேதீ’’தி இமினா ஸதி³ஸோ. கஸ்மா? மரணாதி⁴ப்பாயத்தா. தளாகாதீ³ஸு மச்சா²தி³க்³க³ஹணத்த²ம் கேவட்டம் அஞ்ஞாபதே³ஸேன ‘‘தளாகதீரம் க³ச்சா²’’தி பஹிணந்தஸ்ஸ பாணாதிபாதேன ப⁴விதப்³ப³ம், ‘‘வாளயக்க²விஹாரம் பாஹேஸீ’’தி இமஸ்ஸ ஸதி³ஸோ. கஸ்மா? ‘‘மரணாதி⁴ப்பாயத்தா’’தி வசனஸ்ஸானுலோமதோ, அட்ட²கதா²யம்பி ‘‘ஏவம் வாளயக்க²ம்பீ’’தி வுத்தத்தா.

189. தம் தத்ரட்டி²தம் சி²ந்த³ந்தந்தி தம்-ஸத்³தோ³ ஏகச்சேஸு நத்தி². இதரேஸு பாராஜிகது²ல்லச்சயம் ஆபன்னாதி அத்தோ². ‘‘இமம் சி²ந்தி³த்வா ஸீக⁴ம் க³ந்த்வா ஸங்க⁴ஸ்ஸ பத்தசீவரம் த³ஸ்ஸாமீ’’தி குஸலசித்தேனபி சி²ந்தி³தும் ந வட்டதி அனனுஞ்ஞாதத்தா. அஞ்ஞஸ்ஸ பன பி⁴க்கு²னோ வட்டதி அனுஞ்ஞாதத்தா.

190. கத²ம்? குடிரக்க²ணத்த²ஞ்ஹி ப⁴க³வதா படக்³கி³தா³னாதி³ அனுஞ்ஞாதம், குடி நாமேஸா பி⁴க்கூ²னம் அத்தா²ய. தஸ்மா ‘‘பி⁴க்கு²ரக்க²ணத்த²ம் அஞ்ஞஸ்ஸ பி⁴க்கு²ஸ்ஸ வட்டதீ’தி வத்தப்³ப³மேத்த² நத்தீ²’’தி வுத்தம். யதி³ ஏவம் அச்சி²ன்னசீவரஸ்ஸ நக்³க³பா⁴வப்படிச்சா²த³னத்த²ம் பூ⁴தகா³மபாதப்³யதா ப⁴க³வதா அனுஞ்ஞாதா, ஜீவிதரக்க²ணத்த²ஞ்ச ஸப்பத³ட்ட²காலே அனுஞ்ஞாதம், தஸ்மா ‘‘அபி ஜீவிதம் பரிச்சஜிதப்³ப³ம், ந ச ருக்கோ² வா சி²ந்தி³தப்³போ³’’திஆதி³ ந வத்தப்³ப³ம் ஸியா, தஸ்மா தம் நித³ஸ்ஸனம் அப்பமாணம், அட்ட²கதா²சரியோ ஏவேத்த² பமாணம். ஏத்த² பனாயம் ஆசரியஸ்ஸ தக்கோ – அரியபுக்³க³லேஸுபி ஸத்தா நக்³கி³யம் பஸ்ஸித்வா அப்பஸாத³ம் கத்வா நிரயூபகா³ ப⁴விஸ்ஸந்தி, ததா² ஸப்பா ச ட³ம்ஸித்வா, தேஸம் பாபவிமோசனத்த²ம் பூ⁴தகா³மபாதப்³யதா அனுஞ்ஞாதா. தா³னபதீனம் சித்தரக்க²ணத்த²ம் படக்³கி³தா³னாதி³. அஞ்ஞதா² லோகஸ்ஸ புஞ்ஞந்தராயோ, ஸங்க⁴ஸ்ஸ ச லாப⁴ந்தராயோ ஹோதி. வத⁴கஸ்ஸ பன சித்தஹிதகரணம் நத்தி², தம் பன அவீதிக்கமம், ஜீவிதபரிச்சஜனம் பஸ்ஸித்வா வா ‘‘அஹோ து³க்கரம் கத’’ந்தி பஸாத³மேவ லபே⁴ய்யுந்தி அத்தனோ ந வட்டதி, அஞ்ஞஸ்ஸ வட்டதி. அஞ்ஞதா² தித்தி²யானம் அஸத்³த⁴ம்மஸித்³தி⁴யாதி. க³ண்டி²பதே³ பன ‘‘ஜீவிதத்தா²ய ருக்க²ம் சி²ந்த³ந்தஸ்ஸ அத்தஸினேஹவஸேன சி²ந்த³னதோ அகுஸலத்தா ந வட்டதி, அஞ்ஞஸ்ஸ வட்டதீ’’தி லிகி²தம். அனேகேஸு ருக்கே²ன ஓத்த²தேஸு, ஓபாதே வா பதிதேஸு அஞ்ஞேன அஞ்ஞஸ்ஸத்தா²ய ருக்க²சே²த³னாதி³ காதும் வட்டதி, கஸ்மா? பரபரித்தாணாதி⁴ப்பாயதோதி. பரித்தந்தி ரக்க²ணம், தம் த³ஸ்ஸேதும் ‘‘ஸமந்தா பூ⁴மிதச்ச²ன’’ந்திஆதி³ வுத்தம்.

191. தீஹி மாரிதே பன விஸங்கேதந்தி ஏத்த² தீஸு ஏகேன மாரிதேபி ‘‘கே²த்தமேவ ஓதிண்ணத்தா பாராஜிக’’ந்தி வுத்தத்தா தயோபி ஏகதோ ஹுத்வா மாரேந்தி சே, ஆபஜ்ஜதி, தேனேவ வுத்தம் ‘‘பரிச்சே²த³ப்³ப⁴ந்தரே வா அவிஸங்கேத’’ந்தி. ‘‘பரிச்சே²தா³திக்கமே பன ஸப்³ப³த்த² விஸங்கேதம் ஹோதீ’’தி வுத்தத்தா த்³வின்னம் ப³லம் க³ஹேத்வா ததியோ சே மாரேதி ஆபஜ்ஜதி விய தி³ஸ்ஸதி, வீமம்ஸிதப்³ப³ம். ‘‘த்³வே மாரேந்தூ’’தி வுத்தே ஏகேன வா த்³வீஹி வா மாரிதே பாராஜிகந்தி ‘‘த்³வின்னம் பஹாரானம் மரணே ஸதி த்³வே மாரிதா நாம ஹோந்தி, அஸதி ஏகோவ ஹோதி, தஸ்மா விஜானிதப்³ப³’’ந்தி வத³ந்தி.

ததியபாராஜிகவண்ணனா நிட்டி²தா.