1. பட²மபாராஜிகம்

ஸுதி³ன்னபா⁴ணவாரவண்ணனா

பட²மஸ்ஸேத்த² நிதா³னே, ட²த்வா பாராஜிகஸ்ஸ விஞ்ஞேய்யோ;

சோத³னாபரிஹாரனயோ, புக்³க³லவத்து²ப்பகாஸனேயேவ.

தத்த² ப⁴க³வா வேரஞ்ஜாயம் வுத்த²வஸ்ஸோ அனுபுப்³பே³ன சாரிகம் சரந்தோ கத்திகஜுண்ஹபக்கே² ஏவ வேஸாலிம் பாபுணித்வா யாவ பட²மபாராஜிகஸிக்கா²பத³பஞ்ஞாபனம், தாவ அட்ட² வஸ்ஸானி வேஸாலியம்யேவ விஹரந்தோ விய பாளிக்கமேன தி³ஸ்ஸதி, ந ச ப⁴க³வா தாவத்தகம் காலம் தத்தே²வ விஹாஸி. ஸோ ஹி ஸுதி³ன்னஸ்ஸ ஸாவகானம் ஸந்திகே பப்³ப³ஜ்ஜம் உபஸம்பத³ஞ்ச அனுஜானித்வா யதா²பி⁴ரந்தம் தத்த² விஹரித்வா சாரிகம் சரந்தோ பே⁴ஸகளாவனம் பத்வா தத்த² தேரஸமம் வஸ்ஸம் வஸி, தேனேவ அனுக்கமேன ஸாவத்தி²ம் பத்வா சுத்³த³ஸமம் வஸ்ஸம் வஸி, பன்னரஸமம் கபிலவத்து²ம்ஹி, ஸோளஸமம் ஆளவியம், ததோ வுத்த²வஸ்ஸோ சாரிகம் சரந்தோ ராஜக³ஹம் பத்வா ஸத்தரஸமம் வஸி, இமினா அனுக்கமேன அபரானிபி தீணி வஸ்ஸானி தத்தே²வ வஸி. ஏத்தாவதா ப⁴க³வா பரிபுண்ணவீஸதிவஸ்ஸோ ராஜக³ஹதோ அனுபுப்³பே³ன வேஸாலிம் பாபுணி, ததோ உபஸம்பதா³ய அட்ட²வஸ்ஸிகோ ஸுதி³ன்னோ வேஸாலியம்யேவ மேது²னம் த⁴ம்மம் அபி⁴விஞ்ஞாபேஸி, ததோ ப⁴க³வா தஸ்மிம் வத்து²ஸ்மிம் பட²மம் பாராஜிகம் பஞ்ஞபேஸீதி வேதி³தப்³ப³ம். தத்த² யஸ்மா உபாலித்தே²ரோ இதோ பட²மதரம் தத்த² வேஸாலியஞ்ச பஞ்ஞத்தஸிக்கா²பதா³னி அத³ஸ்ஸேதுகாமோ, வினயனிதா³னானந்தரம் பட²மபாராஜிகமேவ த³ஸ்ஸேதுகாமோ, தஸ்மா வேஸாலியம் பட²மம் நிவாஸம், பச்சா² இமஸ்ஸ ஸிக்கா²பத³ஸ்ஸ பஞ்ஞத்திகாலே நிவாஸஞ்ச ஏகதோ கத்வா ‘‘தத்ர ஸுத³ம் ப⁴க³வா வேஸாலிய’’ந்திஆதி³மாஹ, தேன வுத்தம் ‘‘பட²மஸ்ஸேத்த² நிதா³னே, ட²த்வா …பே… பகாஸனேயேவா’’தி. தஸ்மா இமஸ்மிம் பட²மபாராஜிகஸ்ஸ பஞ்ஞத்திட்டா²னஸங்கா²தே நிதா³னே ட²த்வா ‘‘தேன கோ² பன ஸமயேன வேஸாலியா அவிதூ³ரே கலந்த³கா³மோ நாம ஹோதி…பே… அஞ்ஞதரம் வஜ்ஜிகா³மம் உபனிஸ்ஸாய விஹரதீ’’தி ஏதஸ்மிம் இமஸ்ஸ ஸிக்கா²பத³ஸ்ஸ புக்³க³லப்பகாஸனே, ‘‘தேன கோ² பன ஸமயேன வஜ்ஜீ து³ப்³பி⁴க்கா² ஹோதி…பே… திக்க²த்தும் மேது²னம் த⁴ம்மம் அபி⁴விஞ்ஞாபேஸீ’’தி (பாரா. 30) இமஸ்மிம் வத்து²ப்பகாஸனே ச சோத³னானயோ, பரிஹாரனயோ ச வேதி³தப்³போ³தி வுத்தம் ஹோதி. தத்ராயம் பகாஸனா – கிமத்த²ம் தே²ரேன அஞ்ஞேஸம் ஸிக்கா²பதா³னம் புக்³க³லவத்தூ²னி விய ஸங்கே²பதோ அவத்வா யத்த² ச ஸோ உப்பன்னோ, யதா² ச த⁴ம்மே பஸன்னோ, யதா² ச பப்³ப³ஜிதோ, யதா² ச இமம் வத்து²ம் உப்பாதே³தி, தம் ஸப்³ப³ம் அனவஸேஸேத்வா புக்³க³லவத்தூ²னி வித்தா²ரதோ வுத்தானீதி சே? வுச்சதே –

ஏவம் ஸத்³தா⁴ய கிச்சே²ன, மஹந்தே போ⁴க³ஞாதகே;

ஹித்வா பப்³ப³ஜிதானம்பி, பேஸலானம்பி ஸப்³ப³ஸோ.

ஸப்³ப³லாமகத⁴ம்மாயம், மேது²னோ யதி³ ஸம்ப⁴வே;

ந த⁴ம்மதே³ஸனாயேவ, ஸித்³தா⁴ விரதி ஸப்³ப³ஸோ.

தஸ்மா நவங்க³ஸத்³த⁴ம்மே, ஸத்தா²ரா தே³ஸிதேபி ச;

வினயோ பஞ்ஞபேதப்³போ³, ததோ த⁴ம்மவிஸுத்³தி⁴ஹி.

வினயாபா⁴வதோ ஏவம், அஜ்ஜா²சாரோ ப⁴விஸ்ஸதி;

தஸ்மா வினயபஞ்ஞத்தி, ஸாத்தி²கா பேஸலஸ்ஸபி.

அனாதீ³னவத³ஸ்ஸாவீ, யஸ்மா யம் பாபமாசரி;

வினயோயேவ ஸத்³தா⁴னம், ஆதீ³னவவிபா⁴வினோ.

தஸ்மா ஸத்³தா⁴னுஸாரீனம், வினயோ ஸாத்த²கோவ யம்;

த⁴ம்மோ த⁴ம்மானுஸாரீனம், ததோ உப⁴யதே³ஸனா.

அபி ச யதி³ பண்ணத்திவீதிக்கமம் அகரோந்தஸ்ஸாபி யாவ ப்³ரஹ்மலோகா அயஸோ பத்த²டோ, பகே³வஞ்ஞேஸந்தி த³ஸ்ஸனத்த²ம் அஜ்ஜா²சாரஸ்ஸ பாகடபா⁴வதீ³பனம். கத²ம்? –

அப⁴ப்³போ³ அரஹத்தஸ்ஸ, ஸுதி³ன்னோ புத்தமாதரோ;

ப⁴ப்³பா³னுப்பன்னபஞ்ஞத்தி, தத³த்த²ம் ந கதா அயம்.

நனு மாக³ண்டி³கம் அஜ்ஜு²பேக்கி²த்வா மாதாபிதூனமஸ்ஸா ஹிதத்த²ம் த⁴ம்மம் தே³ஸேதீதி இமமத்த²ம் த³ஸ்ஸேதும் பீ³ஜகபீ³ஜகமாதூனம் அரஹத்துப்பத்தி தே²ரேன தீ³பிதா. ‘‘தேன கோ² பன ஸமயேன வேஸாலியா அவிதூ³ரே கலந்த³கா³மோ நாம ஹோதி, யேன ஸமயேன ஸுதி³ன்னோ புராணது³தியிகாய மேது²னம் த⁴ம்மம் படிஸேவீ’’தி வா ‘‘யேன ஸமயேன ப⁴க³வா பட²மபாராஜிகம் பஞ்ஞபேஸீ’’தி வா வசனம் இத⁴ ந யுஜ்ஜதி. கஸ்மா? ‘‘இத⁴ பன ஹேதுஅத்தோ² கரணத்தோ² ச ஸம்ப⁴வதீ’’தி வுத்தம் அட்ட²கதா²வசனஞ்ஹி இத⁴ ந லப்³ப⁴தி. சிரனிவிட்டோ² ஹி ஸோ கா³மோ, ந தஸ்மிம்யேவ ஸமயேதி. யஸ்மா பன ஸோ சிரனிவிட்டோ²பி ச கா³மோ அத்தனோ நிவிட்ட²காலதோ பட்டா²ய ஸப்³ப³காலமத்தீ²தி வத்தப்³ப³தம் அரஹதி, தேன பரியாயேன ‘‘தேன கோ² பன ஸமயேன வேஸாலியா அவிதூ³ரே கலந்த³கா³மோ நாம ஹோதீ’’தி வுத்தம்.

25-6. அனுஞ்ஞாதோஸி பன த்வந்தி ஸமணவத்தத³ஸ்ஸனத்த²ம் ப⁴க³வா புச்ச²தி. மாதாபிதூஹி அனனுஞ்ஞாதந்தி ஏத்த² ஜனகேஹேவ அனனுஞ்ஞாதத³ஸ்ஸனத்த²ம் புச்சீ²தி வுத்தம். ந கோ² ஸுதி³ன்ன ததா²க³தாதி ‘‘பப்³பா³ஜேது மம் ப⁴க³வா’’தி யாசனாவஸேன பனேவமாஹ, ந ப⁴க³வா ஸயம் ஸரணானி த³த்வா பப்³பா³ஜேஸி. து³க்க²ஸ்ஸாதி ஏத்த² ‘‘கலபா⁴க³ம்பீ’’தி பாட²ஸேஸோ. விகப்பத்³வயேபீதி து³தியததியவிகப்பேஸு. புரிமபத³ஸ்ஸாதி கிஞ்சீதி பத³ஸ்ஸ. உத்தரபதே³னாதி து³க்க²ஸ்ஸாதி பதே³ன. ஸமானவிப⁴த்தீதி ஸாமிவசனம். யதா² கிம்? ‘‘கஸ்ஸசி து³க்க²ஸ்ஸா’’தி வத்தப்³பே³ ‘‘கிஞ்சி து³க்க²ஸ்ஸா’’தி வுத்தந்தி வேதி³தப்³ப³ம். அகாமகா வினா ப⁴விஸ்ஸாமாதி தயா ஸத்³தி⁴ம் அமரித்வா அகாமா ஜீவிஸ்ஸாம. ஸசேபி ந மராம, அகாமகாவ தயா வியோக³ம் பாபுணிஸ்ஸாம, தயி ஜீவமானே ஏவ நோ மரணம் ப⁴வேய்ய, மரணேனபி நோ தயா வியோக³ம் மயம் அகாமகாவ பாபுணிஸ்ஸாம.

30. கதிபாஹம் ப³லம் கா³ஹேத்வாதி கஸ்மா பனாயம் ததா² பப்³ப³ஜ்ஜாய திப்³ப³ச்ச²ந்தோ³ அனுஞ்ஞாதோ ஸமானோ கதிபாஹம் க⁴ரேயேவ விலம்பி³த்வா காயப³லஞ்ச அக்³க³ஹேஸீதி? அனுமதிதா³னேன மாதாபிதூஸு ஸஹாயகேஸு ச துட்டோ² தேஸம் சித்ததுட்ட²த்த²ம். கேஸுசி அட்ட²கதா²போத்த²கேஸு கேசி ஆசரியா ‘‘அயம் ஸுதி³ன்னோ ஜீவகவத்து²தோ பச்சா² பம்ஸுகூலிகது⁴தங்க³வஸேன பம்ஸுகூலிகோ ஜாதோ’’தி ஸஞ்ஞாய ‘‘க³ஹபதிசீவரம் படிக்கி²பித்வா பம்ஸுகூலிகது⁴தங்க³வஸேன பம்ஸுகூலிகோ ஹோதீ’’தி லிக²ந்தி, தம் ‘‘அசிரூபஸம்பன்னோ’’தி வசனேன விருஜ்ஜ²தி. ‘‘ததா² ஸுதி³ன்னோ ஹி ப⁴க³வதோ த்³வாத³ஸமே வஸ்ஸே பப்³ப³ஜிதோ, வீஸதிமே வஸ்ஸே ஞாதிகுலம் பிண்டா³ய பவிட்டோ² ஸயம் பப்³ப³ஜ்ஜாய அட்ட²வஸ்ஸிகோ ஹுத்வா’’தி, ‘‘ப⁴க³வதோ ஹி பு³த்³த⁴த்தம் பத்ததோ பட்டா²ய யாவ இத³ம் வத்த²ம், ஏத்த²ந்தரே வீஸதி வஸ்ஸானி ந கோசி க³ஹபதிசீவரம் ஸாதி³யி, ஸப்³பே³ பம்ஸுகூலிகாவ அஹேஸு’’ந்தி ச வுத்தேன அட்ட²கதா²வசனேன விருஜ்ஜ²தி, பப்³ப³ஜ்ஜாய அட்ட²வஸ்ஸிகோ, ந உபஸம்பதா³ய. உபஸம்பத³ம் பன ஜீவகவத்து²தோ (மஹாவ. 326) பச்சா² அலத்த², தஸ்மா அவஸ்ஸிகோ ஞாதிகுலம் பிண்டா³ய பவிட்டோ² ஸியாதி சே? ந, ‘‘அலத்த² கோ² ஸுதி³ன்னோ கலந்த³புத்தோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³’’ந்தி ஏகதோ அனந்தரம் வுத்தத்தா. பப்³ப³ஜ்ஜானந்தரமேவ ஹி ஸோ உபஸம்பன்னோ தேரஸது⁴தங்க³கு³ணே ஸமாதா³ய வத்தந்தோ அட்ட² வஸ்ஸானி வஜ்ஜிகா³மே விஹரித்வா நிஸ்ஸயமுத்தத்தா ஸயம்வஸீ ஹுத்வா ‘‘ஏதரஹி கோ² வஜ்ஜீ து³ப்³பி⁴க்கா²’’திஆதி³தக்கவஸேன யேன வேஸாலீ தத³வஸரி, தஸ்மா ‘‘பம்ஸுகூலிகது⁴தங்க³வஸேன பம்ஸுகூலிகோ ஹோதீ’’தி ஏத்தகோயேவ பாடோ² யேஸு போத்த²கேஸு தி³ஸ்ஸதி, ஸோவ பமாணதோ க³ஹேதப்³போ³. ‘‘ஆரஞ்ஞிகோ ஹோதீ’’தி இமினா பஞ்ச ஸேனாஸனபடிஸம்யுத்தானி ஸங்க³ஹிதானி நேஸஜ்ஜிகங்க³ஞ்ச விஹாரஸபா⁴க³த்தா, ‘‘பிண்ட³பாதிகோ’’தி இமினா பஞ்ச பிண்ட³பாதபடிஸம்யுத்தானி, ‘‘பம்ஸுகூலிகோ’’தி இமினா த்³வே சீவரபடிஸம்யுத்தானி ஸங்க³ஹிதானீதி. ஞாதிக⁴ரூபக³மனகாரணதீ³பனாதி⁴ப்பாயதோ ஸபதா³னசாரிகங்க³ம் விஸும் வுத்தந்தி வேதி³தப்³ப³ம். ‘‘மா அதிஹராபேஸு’’ந்தி காலப்³யத்தயவஸேன வுத்தம். த⁴ம்மஸ்ஸந்தராயகரதரத்தா ‘‘இமம் நய’’ந்தி அனயோயேவ.

யேபு⁴ய்யேன ஹி ஸத்தானம், வினாஸே பச்சுபட்டி²தே;

அனயோ நயரூபேன, பு³த்³தி⁴மாக³ம்ம திட்ட²தி.

36. அபஞ்ஞத்தே ஸிக்கா²பதே³தி ஏத்த² து³வித⁴ம் ஸிக்கா²பத³பஞ்ஞாபனம். கத²ம்? ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’தி ஏவம் ஸஉத்³தே³ஸானுத்³தே³ஸபே⁴த³தோ து³வித⁴ம். தத்த² பாதிமோக்கே² ஸரூபதோ ஆக³தா பஞ்ச ஆபத்திக்க²ந்தா⁴ ஸஉத்³தே³ஸபஞ்ஞத்தி நாம. ஸாபி து³விதா⁴ ஸபுக்³க³லாபுக்³க³லனித்³தே³ஸபே⁴த³தோ. தத்த² யஸ்ஸா பஞ்ஞத்தியா அந்தோ ஆபத்தியா ஸஹ, வினா வா புக்³க³லோ த³ஸ்ஸிதோ, ஸா ஸபுக்³க³லனித்³தே³ஸா. இதரா அபுக்³க³லனித்³தே³ஸாதி வேதி³தப்³பா³. ஸபுக்³க³லனித்³தே³ஸாபி து³விதா⁴ த³ஸ்ஸிதாத³ஸ்ஸிதாபத்திபே⁴த³தோ. தத்த² அத³ஸ்ஸிதாபத்திகா நாம அட்ட² பாராஜிகா த⁴ம்மா. ‘‘பாராஜிகோ ஹோதி அஸம்வாஸோ’’தி ஹி புக்³க³லோவ தத்த² த³ஸ்ஸிதோ, நாபத்தி. த³ஸ்ஸிதாபத்திகா நாம பி⁴க்கு²னீபாதிமோக்கே² ‘‘ஸத்தரஸ ஸங்கா⁴தி³ஸேஸா த⁴ம்மா நிஸ்ஸாரணீயம் ஸங்கா⁴தி³ஸேஸ’’ந்தி ஹி தத்த² ஆபத்தி த³ஸ்ஸிதா ஸத்³தி⁴ம் புக்³க³லேன, ததா² அபுக்³க³லனித்³தே³ஸாபி த³ஸ்ஸிதாத³ஸ்ஸிதாபத்திதோவ து³விதா⁴. தத்த² அத³ஸ்ஸிதாபத்திகா நாம ஸேகி²யா த⁴ம்மா. ஸேஸா த³ஸ்ஸிதாபத்திகாதி வேதி³தப்³பா³. ஸாபி து³விதா⁴ அனித்³தி³ட்ட²காரகனித்³தி³ட்ட²காரகபே⁴த³தோ. தத்த² அனித்³தி³ட்ட²காரகா நாம ஸுக்கவிஸ்ஸட்டி² முஸாவாத³ ஓமஸவாத³ பேஸுஞ்ஞ பூ⁴தகா³ம அஞ்ஞவாத³க உஜ்ஜா²பனக க³ணபோ⁴ஜன பரம்பரபோ⁴ஜன ஸுராமேரய அங்கு³லிபதோத³க ஹஸத⁴ம்ம அனாத³ரிய தலகா⁴தகஜதுமட்ட²க ஸிக்கா²பதா³னம் வஸேன பஞ்சத³ஸவிதா⁴ ஹோந்தி. ஸேஸானம் புக்³க³லனித்³தே³ஸானம் வஸேன நித்³தி³ட்ட²காரகா வேதி³தப்³பா³.

அனுத்³தே³ஸபஞ்ஞத்திபி பத³பா⁴ஜனந்தராபத்திவினீதவத்து²படிக்கே²பபஞ்ஞத்திஅவுத்தஸித்³தி⁴வஸேன ச²ப்³பி³தா⁴ ஹோந்தி. தத்த² ‘‘யேபு⁴ய்யேன கா²யிதம் ஆபத்தி து²ல்லச்சயஸ்ஸா’’தி (பாரா. 61) ஏவமாதி³கா பத³பா⁴ஜனியே ஸந்தி³ஸ்ஸமானாபத்தி பத³பா⁴ஜனஸிக்கா²பத³ம் நாம. ‘‘ந த்வேவ நக்³கே³ன ஆக³ந்தப்³ப³ம், யோ ஆக³ச்சே²ய்ய, ஆபத்தி து³க்கடஸ்ஸா’’திஆதி³கா (பாரா. 517) அந்தராபத்திஸிக்கா²பத³ம் நாம. ‘‘அனுஜானாமி, பி⁴க்க²வே, தி³வா படிஸல்லீயந்தேன த்³வாரம் ஸம்வரித்வா படிஸல்லீயிது’’ந்தி (பாரா. 75) ஏவமாதி³கா வினீதவத்து²ஸிக்கா²பத³ம் நாம. ‘‘லோஹிதுப்பாத³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி (மஹாவ. 114) ஏவமாதி³கா படிக்கே²பஸிக்கா²பத³ம் நாம. க²ந்த⁴கேஸு பஞ்ஞத்தது³க்கடது²ல்லச்சயானி பஞ்ஞத்திஸிக்கா²பத³ம் நாம. ‘‘யா பன பி⁴க்கு²னீ நச்சம் வா கீ³தம் வா வாதி³தம் வா த³ஸ்ஸனாய க³ச்சே²ய்ய, பாசித்திய’’ந்தி (பாசி. 834) இமினா வுத்தேன ‘‘யா பன பி⁴க்கு²னீ நச்சேய்ய வா கா³யேய்ய வா வாதே³ய்ய வா பாசித்திய’’ந்தி ஏவமாதி³கம் யம் கிஞ்சி அட்ட²கதா²ய தி³ஸ்ஸமானம் ஆபத்திஜாதம், வினயகம்மம் வா அவுத்தஸித்³தி⁴ஸிக்கா²பத³ம் நாம. ச²ப்³பி³த⁴ம்பேதம் ச²ஹி காரணேஹி உத்³தே³ஸாரஹம் ந ஹோதீதி அனுத்³தே³ஸஸிக்கா²பத³ம் நாமாதி வேதி³தப்³ப³ம். ஸேய்யதி²த³ம் – பஞ்சஹி உத்³தே³ஸேஹி யதா²ஸம்ப⁴வம் விஸபா⁴க³த்தா து²ல்லச்சயது³ப்³பா⁴ஸிதானம், ஸபா⁴க³வத்து²கம்பி து³க்கடது²ல்லச்சயத்³வயம் அஸபா⁴கா³பத்திகத்தா, அந்தராபத்திபஞ்ஞத்திஸிக்கா²பதா³னம் நானாவத்து²காபத்திகத்தா, படிக்கே²பஸிக்கா²பதா³னம் கேஸஞ்சி வினீதவத்து²பஞ்ஞத்திஸிக்கா²பதா³னஞ்ச அத³ஸ்ஸிதாபத்திகத்தா, அத³ஸ்ஸிதவத்து²கத்தா பே⁴தா³னுவத்தகது²ல்லச்சயஸ்ஸ, அத³ஸ்ஸிதாபத்திவத்து²கத்தா அவுத்தஸித்³தி⁴ஸிக்கா²பதா³னந்தி. ஏத்தாவதா ‘‘து³வித⁴ம் ஸிக்கா²பத³பஞ்ஞாபனம் உத்³தே³ஸானுத்³தே³ஸபே⁴த³தோ’’தி யம் வுத்தம், தம் ஸமாஸதோ பகாஸிதம் ஹோதி.

தத்த² அபஞ்ஞத்தே ஸிக்கா²பதே³தி ஸஉத்³தே³ஸஸிக்கா²பத³ம் ஸந்தா⁴ய வுத்தந்தி வேதி³தப்³ப³ம். ஏகச்சே ஆசரியா ஏவம் கிர வண்ணயந்தி ‘‘சத்தாரோ பாராஜிகா கதிவஸ்ஸாபி⁴ஸம்பு³த்³தே⁴ன ப⁴க³வதா பஞ்ஞத்தாதிஆதி³னா புச்ச²ம் கத்வா தேஸு பட²மபாராஜிகோ வேஸாலியம் பஞ்ஞத்தோ பஞ்சவஸ்ஸாபி⁴ஸம்பு³த்³தே⁴ன ஹேமந்தானம் பட²மே மாஸே து³தியே பக்கே² த³ஸமே தி³வஸே அட்³ட⁴தேய்யபோரிஸாய சா²யாய புரத்தா²பி⁴முகே²ன நிஸின்னேன அட்³ட⁴தேரஸானம் பி⁴க்கு²ஸதானம் மஜ்ஜே² ஸுதி³ன்னம் கலந்த³புத்தம் ஆரப்³ப⁴ பஞ்ஞத்தோ’’தி, தம் ந யுஜ்ஜதி, கஸ்மா? –

யஸ்மா த்³வாத³ஸமம் வஸ்ஸம், வேரஞ்ஜாயம் வஸி ஜினோ;

தஸ்மிஞ்ச ஸுத்³தோ⁴ ஸங்கோ⁴தி, நேவ பாராஜிகம் ததா³.

தே²ரஸ்ஸ ஸாரிபுத்தஸ்ஸ, ஸிக்கா²பஞ்ஞத்தியாசனா;

தஸ்மிம் ஸித்³தா⁴தி ஸித்³தா⁴வ, க³ருகாபத்தி நோ ததா³.

ஓவாத³பாதிமோக்க²ஞ்ச, கிம் ஸத்தா² சதுவஸ்ஸிகோ;

படிக்கி²பி கிமாணஞ்ச, ஸமத்தம் அனுஜானி ஸோ.

அஜாதஸத்தும் நிஸ்ஸாய, ஸங்க⁴பே⁴த³மகாஸி யம்;

தே³வத³த்தோ ததோ ஸங்க⁴-பே⁴தோ³ பச்சி²மபோ³தி⁴யம்.

ஆராத⁴யிம்ஸு மம் புப்³பே³, பி⁴க்கூ²தி முனிபா⁴ஸிதம்;

ஸுத்தமேவ பமாணம் நோ, ஸோவ காலோ அனப்பகோதி.

யம் பன வுத்தம் ‘‘அத² ப⁴க³வா அஜ்ஜா²சாரம் அபஸ்ஸந்தோ பாராஜிகம் வா ஸங்கா⁴தி³ஸேஸம் வா ந பஞ்ஞபேஸீ’’தி, தம் ஸகலஸிக்கா²பத³ம் ஸந்தா⁴யாஹ. ந கேவலம் ஸஉத்³தே³ஸஸிக்கா²பத³மத்தம், தேன ஸஉத்³தே³ஸானுத்³தே³ஸபஞ்ஞத்திபே⁴த³ம் ஸகலம் பாராஜிகம் ஸந்தா⁴யாஹாதி வுத்தம் ஹோதி. கிஞ்சாபி நாபி⁴பராமஸனம்பி காயஸம்ஸக்³கோ³, ததா²பி ஏதம் விஸேஸனியமனதோ, அச்ச²ந்த³ராகா³தி⁴ப்பாயதோ ச விஸும் வுத்தம். ச²ந்த³ராக³ரத்தஸ்ஸேவ ஹி காயஸம்ஸக்³கோ³ இதா⁴தி⁴ப்பேதோ. அஸுசிபானே பன ஹத்தி²னியா தாபஸபஸ்ஸாவபானேன வாலகாப்³யோ நாம உப்பஜ்ஜதி, வாலகாப்³யஸ்ஸ வத்து² வத்தப்³ப³ம். மண்ட³ப்³யஸ்ஸ நாபி⁴யா பராமஸனேனேவ கிர. ரூபத³ஸ்ஸனே பன வேஜ்ஜகா ஆஹு –

‘‘தீ²னம் ஸந்த³ஸ்ஸனா ஸுக்கம், கதா³சி சலிதோவரே;

தம் கா³மத⁴ம்மகரணம், த்³வயஸமம் ஸங்க³மிய;

க³ப்³பா⁴தீ³தி அயம் நயோ, தீ²னம் புரிஸத³ஸ்ஸனாஸீத்யூபனேய்ய’’.

ததா²ப்யாஹு –

‘‘புப்பி²கே ஏதி⁴ய்ய ஸுத்³தே⁴, பஸ்ஸம் நரஞ்ச இத்தி² தம்;

க³ப்³ப⁴ஞ்ச நயேத்யுத்த-மிதி தஸ்மா காஸோ இதீ’’தி.

ராஜோரோதோ⁴ வியாதி ஸீஹளதீ³பே ஏகிஸ்ஸா இத்தி²யா ததா² அஹோஸி, தஸ்மா கிர ஏவம் வுத்தம். கிஞ்சாபி யாவ ப்³ரஹ்மலோகா ஸத்³தோ³ அப்³பு⁴க்³க³ச்சி², ந தம் மனுஸ்ஸானம் விஸயோ அஹோஸி தேஸம் ரூபம் விய. தேனேவ பி⁴க்கூ² புச்சி²ம்ஸு ‘‘கச்சி நோ த்வம் ஆவுஸோ ஸுதி³ன்ன அனபி⁴ரதோ’’தி.

39. கலீதி கோதோ⁴, தஸ்ஸ ஸாஸனம் கலிஸாஸனம், கலஹோ. கா³மத⁴ம்மந்தி ஏத்த² ஜனபத³த⁴ம்மம் ஜனபத³வாஸீனம் ஸித்³தி⁴ம். அத்தாதி சித்தம், ஸரீரஞ்ச. அஸுத்தந்தவினிப³த்³த⁴ந்தி வினயஸுத்தே அனாக³தம், ஸுத்தாபி⁴த⁴ம்மேஸுபி அனாக³தம், பாளிவினிமுத்தந்தி அத்தோ². குஸுமமாலந்தி நானாகு³ணம் ஸந்தா⁴யாஹ. ரதனதா³மந்தி அத்த²ஸம்பத்திம் ஸந்தா⁴ய வத³தி. படிக்கி²பனாதி⁴ப்பாயா ப⁴த்³தா³லி விய. பத³னிருத்திப்³யஞ்ஜனானி நாமவேவசனானேவ ‘‘நாமம் நாமகம்மம் நாமதே⁴ய்யம் நிருத்தீ’’திஆதீ³ஸு (த⁴. ஸ. 1315) விய. நிப்பரியாயேன விரதி ஸிக்கா²பத³ம் நாம. அகுஸலபக்கே² து³ஸ்ஸீல்யம் நாம சேதனா. குஸலபக்கே²பி சேதனாபரியாயதோ விப⁴ங்கே³ ‘‘ஸிக்கா²பத³’’ந்தி வுத்தம். ஸங்க⁴ஸுட்டு²தாயாதி ஏத்த² லோகவஜ்ஜஸ்ஸ பஞ்ஞாபனே ஸங்க⁴ஸுட்டு²தா ஹோதி பாகடாதீ³னவதோ. பஞ்ஞத்திவஜ்ஜஸ்ஸ பஞ்ஞாபனே ஸங்க⁴பா²ஸுதா ஹோதி பாகடானிஸம்ஸத்தா. தத்த² பட²மேன து³ம்மங்கூனம் நிக்³க³ஹோ, து³தியேன பேஸலானம் பா²ஸுவிஹாரோ. பட²மேன ஸம்பராயிகானம் ஆஸவானம் படிகா⁴தோ, து³தியேன தி³ட்ட²த⁴ம்மிகானம். ததா² பட²மேன அப்பஸன்னானம் பஸாதோ³, து³தியேன பஸன்னானம் பி⁴ய்யோபா⁴வோ. ‘‘புப்³பே³ கதபுஞ்ஞதாய சோதி³யமானஸ்ஸ ப⁴ப்³ப³குலபுத்தஸ்ஸா’’தி வுத்தத்தா ‘‘ஸுதி³ன்னோ தம் குக்குச்சம் வினோதே³த்வா அரஹத்தம் ஸச்சா²காஸி, தேனேவ பப்³ப³ஜ்ஜா அனுஞ்ஞாதா’’தி வத³ந்தி, உபபரிக்கி²தப்³ப³ம். ததா² பட²மேன ஸத்³த⁴ம்மட்டி²தி, து³தியேன வினயானுக்³க³ஹோ ஹோதீதி வேதி³தப்³போ³.

அபிசேத்த² வத்து²வீதிக்கமே யத்த² ஏகந்தாகுஸலபா⁴வேன, தம் ஸங்க⁴ஸுட்டு²பா⁴வாய பஞ்ஞத்தம் லோகவஜ்ஜதோ, யத்த² பஞ்ஞத்திஜானனே ஏவ அத்தா²பத்தி, ந அஞ்ஞதா³, தம் ஸத்³த⁴ம்மட்டி²தியா வாபி பஸாது³ப்பாத³பு³த்³தி⁴யா த⁴ம்மதே³ஸனாபடிஸம்யுத்தம், இதரஞ்ச ஸேகி²யம், இத³ம் லோகவஜ்ஜம் நாம. வத்து²னோ பஞ்ஞத்தியா வா வீதிக்கமசேதனாயாபா⁴வேபி படிக்கி²த்தஸ்ஸ கரணே, கத்தப்³ப³ஸ்ஸ அகரணே வா ஸதி யத்த² ஆபத்திப்பஸங்கோ³, தம் ஸப்³ப³ம் ட²பேத்வா ஸுராபானம் பண்ணத்திவஜ்ஜந்தி வேதி³தப்³ப³ம். ஆக³ந்துகவத்தம், ஆவாஸிக, க³மிக, அனுமோத³ன, ப⁴த்தக்³க³, பிண்ட³சாரிக, ஆரஞ்ஞக, ஸேனாஸன, ஜந்தாக⁴ர, வச்சகுடி, ஸத்³தி⁴விஹாரிக, உபஜ்ஜா²ய, அந்தேவாஸிக, ஆசரியவத்தந்தி ஏதானி அக்³க³ஹிதக்³க³ஹணனயேன க³ணியமானானி சுத்³த³ஸ, ஏதானி பன வித்தா²ரதோ த்³வேஅஸீதி மஹாவத்தானி நாம ஹோந்தி. ஸத்தஹி ஆபத்திக்க²ந்தே⁴ஹி ஸம்வரோ ஸம்வரவினயோ பஞ்ஞத்திஸிக்கா²பத³மேவ. தத்த² பஞ்ஞத்திவினயோ ஸமத²வினயத்தா²ய ஸமத²வினயோ ஸம்வரவினயத்தா²ய ஸம்வரவினயோ பஹானவினயத்தா²யாதி யோஜனா வேதி³தப்³பா³. யம் ஸங்க⁴ஸுட்டு², தம் ஸங்க⁴பா²ஸூதி ஏகமிவ வுத்தம் ஸங்க⁴ஸுட்டு²தாய ஸதி ஸங்க⁴பா²ஸு ப⁴விஸ்ஸதீதி தீ³பனத்த²ம். பகரீயந்தி ஏத்த² தே தே பயோஜனவிஸேஸஸங்கா²தா அத்த²வஸாதி அத்த²வஸம் ‘‘பகரண’’ந்தி வுச்சதி. த³ஸஸு பதே³ஸு ஏகேகம் மூலம் கத்வா த³ஸக்க²த்தும் யோஜனாய பத³ஸதம் வுத்தம். தத்த² பச்சி²மஸ்ஸ பத³ஸ்ஸ வஸேன அத்த²ஸதம் புரிமஸ்ஸ வஸேன த⁴ம்மஸதம் அத்த²ஜோதிகானம் நிருத்தீனம் வஸேன நிருத்திஸதம், த⁴ம்மபூ⁴தானம் நிருத்தீனம் வஸேன நிருத்திஸதந்தி த்³வே நிருத்திஸதானி, அத்த²ஸதே ஞாணஸதம், த⁴ம்மஸதே ஞாணஸதம் த்³வீஸு நிருத்திஸதேஸு த்³வே ஞாணஸதானீதி சத்தாரி ஞாணஸதானி வேதி³தப்³பா³னி. ஏத்த² ஸங்க⁴ஸுட்டு²தாதி த⁴ம்மஸங்க⁴ஸ்ஸ ஸுட்டு²பா⁴வோதி அத்தோ². ‘‘அத்த²பதா³னீதி அட்ட²கதா². த⁴ம்மபதா³னீதி பாளீ’’தி வுத்தம் கிர.

மேது²னம் த⁴ம்மந்தி ஏவம் ப³ஹுலனயேன லத்³த⁴னாமகம் ஸகஸம்பயோகே³ன, பரஸம்பயோகே³ன வா அத்தனோ நிமித்தஸ்ஸ ஸகமக்³கே³ வா பரமக்³கே³ வா பரனிமித்தஸ்ஸ ஸகமக்³கே³ ஏவ பவேஸபவிட்ட²டி²துத்³த⁴ரணேஸு யம் கிஞ்சி ஏகம் படிஸாதி³யனவஸேன ஸேவேய்ய பாராஜிகோ ஹோதி அஸம்வாஸோதி. கேசி பன ‘‘பவேஸாதீ³னி சத்தாரி வா தீணி வா த்³வே வா ஏகம் வா படிஸேவேய்ய, பாராஜிகோ ஹோதி. வுத்தஞ்ஹேதம் ‘ஸோ சே பவேஸனம் ஸாதி³யதி, பவிட்ட²ம், டி²தம், உத்³த⁴ரணம் ஸாதி³யதி, ஆபத்தி பாராஜிகஸ்ஸா’திஆதீ³’’தி (பாரா. 59) வத³ந்தி, தேஸம் மதேன சதூஸுபி சதஸ்ஸோ பாராஜிகாபத்தியோ ஆபஜ்ஜதி. தேயேவ ஏவம் வத³ந்தி ‘‘ஆபஜ்ஜது மேது²னத⁴ம்மபாராஜிகாபத்தி மேது²னத⁴ம்மபாராஜிகாபத்தியா தப்³பா⁴கி³யா’’தி, ‘‘அத்தனோ வீதிக்கமே பாராஜிகாபத்திம், ஸங்கா⁴தி³ஸேஸாபத்திஞ்ச ஆபஜ்ஜித்வா ஸிக்க²ம் பச்சக்கா²ய க³ஹட்ட²காலே மேது²னாதி³பாராஜிகம் ஆபஜ்ஜித்வா புன பப்³ப³ஜித்வா உபஸம்பஜ்ஜித்வா ஏகம் ஸங்கா⁴தி³ஸேஸாபத்திம் ஏகமனேகம் வா படிகரித்வாவ ஸோ புக்³க³லோ யஸ்மா நிராபத்திகோ ஹோதி, தஸ்மா ஸோ க³ஹட்ட²காலே ஸாபத்திகோவாதி அந்திமவத்து²ம் அஜ்ஜா²பன்னஸ்ஸாபி அத்தே²வ ஆபத்திவுட்டா²னம். வுட்டா²னதே³ஸனாஹி பன அஸுஜ்ஜ²னதோ ‘பயோகே³ பயோகே³ ஆபத்தி பாராஜிகஸ்ஸா’தி ந வுத்தம் க³ணனபயோஜனாபா⁴வதோ. கிஞ்சாபி ந வுத்தம், அத² கோ² பத³பா⁴ஜனே ‘ஆபத்தி பாராஜிகஸ்ஸா’தி வசனேனாயமத்தோ² ஸித்³தோ⁴’’தி யுத்திஞ்ச வத³ந்தி. யதி³ ஏவம் மாதிகாயம்பி ‘‘யோ பன பி⁴க்கு² மேது²னம் த⁴ம்மம் படிஸேவேய்ய பாராஜிக’’ந்தி வத்தப்³ப³ம் ப⁴வேய்ய, பாராஜிகஸ்ஸ அனவஸேஸவசனம்பி ந யுஜ்ஜேய்ய. ஸப்³பே³பி ஹி ஆபத்திக்க²ந்தே⁴ பி⁴க்கு²க³ணனஞ்ச அனவஸேஸேத்வா திட்ட²தீதி அனவஸேஸவசனந்தி கத்வா பவேஸேவ ஆபத்தி, ந பவிட்டா²தீ³ஸு, தமேவேகம் ஸந்தா⁴ய ‘‘யஸ்ஸ ஸியா ஆபத்தீ’’தி பாராஜிகாபத்திம்பி அந்தோ கத்வா நிதா³னுத்³தே³ஸே வசனம் வேதி³தப்³ப³ம். தஸ்மா மாதிகாயம் ‘‘பாராஜிக’’ந்தி அவத்வா ‘‘பாராஜிகோ ஹோதீ’’தி புக்³க³லனித்³தே³ஸவசனம் தேன ஸரீரப³ந்த⁴னேன உபஸம்பதா³ய அப⁴ப்³ப³பா⁴வதீ³பனத்த²ம். ‘‘ஆபத்தி பாராஜிகஸ்ஸா’’தி பத³பா⁴ஜனே வசனம் அந்திமவத்து²ம் அஜ்ஜா²பன்னஸ்ஸாபி பாராஜிகஸ்ஸ அஸம்வாஸஸ்ஸ ஸதோ புக்³க³லஸ்ஸ அதே²ய்யஸம்வாஸகபா⁴வதீ³பனத்த²ம். ந ஹி ஸோ ஸம்வாஸம் ஸாதி³யந்தோபி தே²ய்யஸம்வாஸகோ ஹோதி, தஸ்மா ‘‘உபஸம்பன்னோ பி⁴க்கு²’’த்வேவ வுச்சதி. தேனேவாஹ ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸா’’தி (பாரா. 389). அனுபஸம்பன்னஸ்ஸ தத³பா⁴வதோ ஸித்³தோ⁴ ஸோ ‘‘உபஸம்பன்னோ பி⁴க்கு²’’த்வேவ வுச்சதீதி. தேன பத³ஸோத⁴ம்மம் ஸஹஸேய்யஞ்ச ந ஜனேதி, பி⁴க்கு²பேஸுஞ்ஞாதி³ஞ்ச ஜனேதீதி வேதி³தப்³ப³ம். பி⁴க்கு²னீனம் ஸங்கா⁴தி³ஸேஸேஸு பன பி⁴க்கு²ஸங்கா⁴தி³ஸேஸதோ வுட்டா²னவிதி⁴விஸேஸத³ஸ்ஸனத்த²ம் ‘‘அயம்பி பி⁴க்கு²னீ…பே… ஆபன்னா’’தி (பாசி. 679) புக்³க³லனித்³தே³ஸம் கத்வாபி பாராஜிகதோ அதி⁴ப்பாயந்தரத³ஸ்ஸனத்த²ம் ‘‘நிஸ்ஸாரணீயம் ஸங்கா⁴தி³ஸேஸ’’ந்தி (பாசி. 679) ஆபத்தினாமக்³க³ஹணஞ்ச கதம். ஏத்தாவதா ஸபுக்³க³லனித்³தே³ஸே த³ஸ்ஸிதாத³ஸ்ஸிதாபத்திது³கம் வித்தா²ரிதம் ஹோதி. அபுக்³க³லனித்³தே³ஸேஸு ஸேகி²யேஸு ஆபத்தியா த³ஸ்ஸனகாரணம் ஸேகி²யானம் அட்ட²கதா²யமேவ வுத்தம். தத³பா⁴வதோ இதரேஸு ஆபத்தித³ஸ்ஸனம் கதம். அபுக்³க³லனித்³தே³ஸேஸுபி த³ஸ்ஸிதாத³ஸ்ஸிதாபத்திது³கஞ்ச வித்தா²ரிதம் ஹோதீதி.

பட²மபஞ்ஞத்திகதா²வண்ணனா நிட்டி²தா.

ஸுதி³ன்னபா⁴ணவாரம் நிட்டி²தம்.

மக்கடீவத்து²கதா²வண்ணனா

40-1. து³தியபஞ்ஞத்தியம் ‘‘இத⁴ மல்லா யுஜ்ஜ²ந்தீ’’திஆதீ³ஸு விய படிஸேவதீதி வத்தமானவசனம் பசுரபடிஸேவனவஸேன வுத்தம், ‘‘தஞ்ச கோ² மனுஸ்ஸித்தி²யா, நோ திரச்சா²னக³தாயா’’தி பரிபுண்ணத்த²ம்பி பட²மம் பஞ்ஞத்திம் அத்தனோ மிச்சா²கா³ஹேன வா லேஸஓட்³ட³னத்தா²ய வா ஏவமாஹ. பரிபுண்ணத்த²தம்யேவ நியமேதும் ‘‘நனு ஆவுஸோ ததே²வ தம் ஹோதீ’’தி வுத்தம், தேனேவ மக்கடீவத்து² வினீதவத்தூ²ஸு பக்கி²த்தம் அவிஸேஸத்தா, ததா² வஜ்ஜிபுத்தகவத்து². விசாரணா பனேத்த² ததியபஞ்ஞத்தியம் ஆவி ப⁴விஸ்ஸதி. ‘‘நனு, ஆவுஸோ, ப⁴க³வதா அனேகபரியாயேனா’’திஆதி³ ந கேவலம் ஸஉத்³தே³ஸஸிக்கா²பதே³னேவ ஸித்³த⁴ம், ‘‘திரச்சா²னக³தாதீ³ஸுபி பாராஜிக’’ந்தி அனுத்³தே³ஸஸிக்கா²பதே³னபி ஸித்³த⁴ந்தி த³ஸ்ஸனத்த²ம் வுத்தம். அத² வா யதி³ ஸஉத்³தே³ஸஸிக்கா²பத³ம் ஸாவஸேஸந்தி பஞ்ஞபேஸி, இமினா அனுத்³தே³ஸஸிக்கா²பதே³னாபி கிம் ந ஸித்³த⁴ந்தி த³ஸ்ஸனத்த²ம் வுத்தம். ‘‘தேன ஹி, பி⁴க்க²வே, பி⁴க்கூ²னம் ஸிக்கா²பத³ம் பஞ்ஞபேஸ்ஸாமீ’’தி ததே³வ ஸிக்கா²பத³ம் பட²மபஞ்ஞத்தமேவ லேஸத்தி²கானம் அலேஸோகாஸம் கத்வா ஆமேடி³தத்த²ம் கத்வா பஞ்ஞபேஸ்ஸாமீதி அத்தோ². அஞ்ஞதா² ‘‘அஞ்ஞவாத³கே விஹேஸகே பாசித்திய’’ந்திஆதீ³ஸு (பாசி. 101) விய வத்து²த்³வயேன ஆபத்தித்³வயம் ஆபஜ்ஜதி, ந சாபஜ்ஜதி, ஸோ ஏவத்தோ² அஞ்ஞேனாபி வசனேன ஸுப்பகாஸிதோ, ஸுபரிப்³யத்தகரணத்தே²ன த³ள்ஹதரோ கதோதி அதி⁴ப்பாயோ. ததியபஞ்ஞத்தியம்பி அஞ்ஞேஸு ச ஏவம் விஸுத்³தோ⁴.

யஸ்ஸ ஸசித்தகபக்கே²திஆதி³ம்ஹி பன க³ண்டி²பத³னயோ தாவ பட²மம் வுச்சதி, ஸசித்தகபக்கே²தி ஸுராபானாதி³அசித்தகே ஸந்தா⁴ய வுத்தம். ஸசித்தகேஸு பன யம் ஏகந்தமகுஸலேனேவ ஸமுட்டா²பிதஞ்ச. உப⁴யம் லோகவஜ்ஜம் நாம. ஸுராபானஸ்மிஞ்ஹி ‘‘ஸுரா’’தி வா ‘‘பாதும் ந வட்டதீ’’தி வா ஜானித்வா பிவனே அகுஸலமேவ, ததா² பி⁴க்கு²னீனம் க³ந்த⁴வண்ணகத்தா²ய லேபனே, பே⁴ஸஜ்ஜத்தா²ய லேபனே அதோ³ஸத்தா ‘‘அவிசாரணீய’’ந்தி ஏத்தகம் வுத்தம். தத்த² ந வட்டதீதி ‘‘ஜானித்வா’’தி வுத்தவசனம் ந யுஜ்ஜதி பண்ணத்திவஜ்ஜஸ்ஸாபி லோகவஜ்ஜபா⁴வப்பஸங்க³தோ. இமம் அனிட்ட²ப்பஸங்க³ம் பரிஹரிதுகாமதாய வஜிரபு³த்³தி⁴த்தே²ரஸ்ஸ க³ண்டி²பதே³ வுத்தம் ‘‘இத⁴ ஸசித்தகந்தி ச அசித்தகந்தி ச விசாரணா வத்து²விஜானனேயேவ ஹோதி, ந பஞ்ஞத்திவிஜானனே. யதி³ பஞ்ஞத்திவிஜானனே ஹோதி, ஸப்³ப³ஸிக்கா²பதா³னி லோகவஜ்ஜானேவ ஸியும், ந ச ஸப்³ப³ஸிக்கா²பதா³னி லோகவஜ்ஜானி, தஸ்மா வத்து²விஜானனேயேவ ஹோதீ’’தி, இத³ம் யுஜ்ஜதி. கஸ்மா? யஸ்மா ஸேகி²யேஸு பஞ்ஞத்திஜானனமேவ பமாணம், ந வத்து²மத்தஜானனந்தி, யம் பன தத்தே²வ வுத்தம் ‘‘பஸுத்தஸ்ஸ முகே² கோசி ஸுரம் பக்கி²பேய்ய, அந்தோ சே பவிஸேய்ய, ஆபத்தி, தத்த² யதா² பி⁴க்கு²னியா அத⁴க்க²கம் உப்³ப⁴ஜாணுமண்ட³லம் பரஸ்ஸ ஆமஸனாதி³காலே காயம் அசாலேத்வா சித்தேனேவ ஸாதி³யந்தியா ஆபத்தி ‘கிரியாவ ஹோதீ’தி வுத்தா யேபு⁴ய்யேன கிரியஸம்ப⁴வதோ, ததா² அயம்பி ததா³ கிரியாவ ஹோதீ’’தி, தம் ஸுவிசாரிதம் அனேகந்தாகுஸலபா⁴வஸாத⁴னதோ. ஸுராபானாபத்தியா ஏகந்தாகுஸலதா பன மஜ்ஜஸஞ்ஞினோபி ஸகிம் பயோகே³ன பிவதோ ஹோதீதி கத்வா வுத்தா.

அயம் பனேத்த² அத்தோ² – ஸிக்கா²பத³ஸீஸேன ஆபத்திம் க³ஹேத்வா யஸ்ஸ ஸிக்கா²பத³ஸ்ஸ ஸசித்தகஸ்ஸ சித்தம் அகுஸலமேவ ஹோதி, தம் லோகவஜ்ஜம். ஸசித்தகாசித்தகஸங்கா²தஸ்ஸ அசித்தகஸ்ஸ ச ஸசித்தகபக்கே² சித்தம் அகுஸலமேவ ஹோதி, தம்பி ஸுராபானாதி³ லோகவஜ்ஜந்தி இமமத்த²ம் ஸம்பிண்டே³த்வா ‘‘யஸ்ஸ ஸசித்தகபக்கே² சித்தம் அகுஸலமேவ ஹோதி, தம் லோகவஜ்ஜ’’ந்தி வுத்தம். ஸசித்தகபக்கே²தி ஹி இத³ம் வசனம் அசித்தகம் ஸந்தா⁴யாஹ. ந ஹி ஏகம்ஸதோ ஸசித்தகஸ்ஸ ஸசித்தகபக்கே²தி விஸேஸனே பயோஜனம் அத்தி². யஸ்மா பனேத்த² பண்ணத்திவஜ்ஜஸ்ஸ பஞ்ஞத்திஜானனசித்தேன ஸசித்தகபக்கே² சித்தம் அகுஸலமேவ, வத்து²ஜானனசித்தேன ஸசித்தகபக்கே² சித்தம் ஸியா குஸலம் ஸியா அகுஸலம் ஸியா அப்³யாகதம், தஸ்மா ‘‘தஸ்ஸ ஸசித்தகபக்கே² சித்தம் அகுஸலமேவா’’தி ந வுச்சதீதி ‘‘ஸேஸம் பண்ணத்திவஜ்ஜ’’ந்தி வுத்தம். அதி⁴மானே வீதிக்கமாபா⁴வா, ஸுபினந்தே அப்³போ³ஹாரிகத்தா ஸுபினந்தே விஜ்ஜமானாபி வீதிக்கமசா²யா அப்³போ³ஹாரிகபா⁴வேனாதி வுத்தம் ஹோதி. இத³ம் பன வசனம் த³ள்ஹீகம்மஸிதி²லகரணப்பயோஜனத்தா ச வுத்தம், தேன யம் வுத்தம் பா³ஹிரனிதா³னகதா²தி⁴காரே ‘‘த³ள்ஹீகம்மஸிதி²லகரணப்பயோஜனாதி யேபு⁴ய்யதாய வுத்த’’ந்திஆதி³, தம் ஸுவுத்தமேவாதி வேதி³தப்³ப³ம்.

மக்கடீவத்து²கதா²வண்ணனா நிட்டி²தா.

வஜ்ஜிபுத்தகவத்து²வண்ணனா

43-4. வஜ்ஜீஸு ஜனபதே³ஸு வஸந்தா வஜ்ஜினோ நாம, தேஸம் புத்தா. யாவத³த்த²ந்தி யாவதா அத்தோ² அதி⁴ப்பாயோதி வுத்தம் ஹோதி, தத்த² யம் வுத்தம் ‘‘ஸிக்க²ம் அப்பச்சக்கா²ய து³ப்³ப³ல்யம்அனாவிகத்வா’’தி, தம் காமம் ஸிக்கா²பச்சக்கா²னே, ததே³கட்டே² ச து³ப்³ப³ல்யாவிகரணே பஞ்ஞத்தே ஸதி யுஜ்ஜதி, ந அஞ்ஞதா². ததா²பி இதா³னி பஞ்ஞபேதப்³ப³ம் உபாதா³ய வுத்தம், கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகசீவரம் தா⁴ரேஸ்ஸந்தி (பாரா. 459), ஆளவகா பி⁴க்கூ² குடியோ காராபேந்தி அப்பமாணிகாயோ (பாரா. 342), பி⁴க்கு²னியோ த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் ஸிக்க²மானம் வுட்டா²பேந்தி (பாசி. 1077), ஸங்கே⁴ன அஸம்மதம் வுட்டா²பேந்தீதிஆதி³ (பாசி. 1084) விய த³ட்ட²ப்³ப³ம். ந ஹி ததோ புப்³பே³ அதி⁴ட்டா²னம் விகப்பனம் வா அனுஞ்ஞாதம். யத³பா⁴வா அதிரேகசீவரந்தி வதே³ய்ய, பமாணம் வா ந பஞ்ஞத்தம், யத³பா⁴வா அப்பமாணிகாயோதி வதே³ய்ய, ஏவம்ஸம்பத³மித³ம் த³ட்ட²ப்³ப³ம். ‘‘உல்லும்பது மம், ப⁴ந்தே, ஸங்கோ⁴ அனுகம்பம் உபாதா³யா’’தி (மஹாவ. 71, 126) உபஸம்பத³ம் யாசித்வா உபஸம்பன்னேன உபஸம்பன்னஸமனந்தரமேவ ‘‘உபஸம்பன்னேன பி⁴க்கு²னா மேது²னோ த⁴ம்மோ ந படிஸேவிதப்³போ³, அஸக்யபுத்தியோ’’தி (மஹாவ. 129) ச பஞ்ஞத்தேன அஸ்ஸமணாதி³பா⁴வம் உபக³ந்துகாமேன நனு பட²மம் அஜ்ஜு²பக³தா ஸிக்கா² பச்சக்கா²தப்³பா³, தத்த² து³ப்³ப³ல்யம் வா ஆவிகாதப்³ப³ம் ஸியா, தே பன ‘‘ஸிக்க²ம் அப்பச்சக்கா²ய து³ப்³ப³ல்யம் அனாவிகத்வா மேது²னம் த⁴ம்மம் படிஸேவிம்ஸூ’’தி அனுபஞ்ஞத்தியா ஓகாஸகரணத்த²ம் வா தம் வுத்தந்தி வேதி³தப்³ப³ம். ‘‘ஸோ ஆக³தோ ந உபஸம்பாதே³தப்³போ³’’தி கிஞ்சாபி ஏத்தே²வ வுத்தம், ததா²பி இதரேஸுபி பாராஜிகேஸு யதா²ஸம்ப⁴வம் வேதி³தப்³ப³ம். ந ஹி ஸிக்க²ம் அப்பச்சக்கா²ய து³ப்³ப³ல்யம் அனாவிகத்வா யோ பாராஜிகவத்து²ம் அதி³ன்னம் தே²ய்யஸங்கா²தம் ஆதி³யதி, மனுஸ்ஸவிக்³க³ஹம் வா ஜீவிதா வோரோபேதி, படிவிஜானந்தஸ்ஸ உத்தரிமனுஸ்ஸத⁴ம்மம் வா உல்லபதி, ஸோ ஆக³தோ ந உபஸம்பாதே³தப்³போ³. அனுபஞ்ஞத்தி ஹி த³ள்ஹீகம்மஸிதி²லகம்மகரணப்பயோஜனா. ஸா ஹி யஸ்ஸ பாராஜிகம் ஹோதி அஞ்ஞா வா ஆபத்தி, தஸ்ஸ நியமத³ஸ்ஸனப்பயோஜனாதிலக்க²ணானுபஞ்ஞத்திகத்தா. ஏவஞ்ஹி அந்தே அவத்வா ஆதி³ம்ஹி வுத்தா ‘‘கா³மா வா அரஞ்ஞா வா’’தி (பாரா. 91) அனுபஞ்ஞத்தி விய. பரிபுண்ணே பனேதஸ்மிம் ஸிக்கா²பதே³ –

‘‘நிதா³னா மாதிகாபே⁴தோ³, விப⁴ங்கோ³ தம்னியாமகோ;

ததோ ஆபத்தியா பே⁴தோ³, அனாபத்தி தத³ஞ்ஞதா²’’தி. –

அயம் நயோ வேதி³தப்³போ³. தத்த² ஸுதி³ன்னவத்து² மக்கடிவத்து² வஜ்ஜிபுத்தகவத்து² சாதி திப்பபே⁴த³ம் வத்து² இமஸ்ஸ ஸிக்கா²பத³ஸ்ஸ நிதா³னம் நாம, ததோ நிதா³னா ‘‘யோ பன, பி⁴க்கு², பி⁴க்கூ²னம் ஸிக்கா²ஸாஜீவஸமாபன்னோ…பே… அஸம்வாஸோ’’தி இமிஸ்ஸா மாதிகாய பே⁴தோ³ ஜாதோ. தத்த² ஹி ‘‘அந்தமஸோ திரச்சா²னக³தாயா’’தி இத்தி²லிங்க³வசனேன ‘‘ஸச்சம், ஆவுஸோ, ப⁴க³வதா ஸிக்கா²பத³ம் பஞ்ஞத்தம், தஞ்ச கோ² இத்தி²யா நோ புரிஸே நோ பண்ட³கே நோ உப⁴தோப்³யஞ்ஜனகே சா’’தி மக்கடிபாராஜிகோ விய அஞ்ஞோபி லேஸம் ஓட்³டே³தும் ஸக்கோதி, தஸ்மா தாதி³ஸஸ்ஸ அலேஸோகாஸஸ்ஸ த³ஸ்ஸனத்த²ம் இத³ம் வுச்சதி. மக்கடிவத்து²ஸங்கா²தா நிதா³னா ‘‘அந்தமஸோ திரச்சா²னக³தாயபீ’’தி மாதிகாவசனபே⁴தோ³ ந இத்தி²யா ஏவ மேது²னஸித்³தி⁴த³ஸ்ஸனதோ கதோ, தஸ்மா விப⁴ங்கோ³ தம்னியாமகோ தஸ்ஸா மாதிகாய அதி⁴ப்பேதத்த²னியாமகோ விப⁴ங்கோ³. விப⁴ங்கே³ ஹி ‘‘திஸ்ஸோ இத்தி²யோ. தயோ உப⁴தோப்³யஞ்ஜனகா. தயோ பண்ட³கா. தயோ புரிஸா. மனுஸ்ஸித்தி²யா தயோ மக்³கே³…பே… திரச்சா²னக³தபுரிஸஸ்ஸ த்³வே மக்³கே³’’திஆதி³னா (பாரா. 56) நயேன ஸப்³ப³லேஸோகாஸம் பித³ஹித்வா நியமோ கதோ.

ஏத்தா²ஹ – யதி³ ஏவம் ஸாதா⁴ரணஸிக்கா²பத³வஸேன வா லிங்க³பரிவத்தனவஸேன வா ந கேவலம் பி⁴க்கூ²னம், பி⁴க்கு²னீனம்பி ‘‘ஸிக்கா²ஸாஜீவஸமாபன்னோ’’தி விப⁴ங்கே³ வத்தப்³ப³ம் ஸியா. தத³வசனேன பி⁴க்கு²னீ புரிஸலிங்க³பாதுபா⁴வேன பி⁴க்கு²பா⁴வே டி²தா ஏவம் வதே³ய்ய ‘‘நாஹம் உபஸம்பத³காலே பி⁴க்கூ²னம் ஸிக்கா²ஸாஜீவஸமாபன்னா, தஸ்மா ந அப்பச்சக்கா²தஸிக்கா²பி மேது²னத⁴ம்மேன பாராஜிகா ஹோமீ’’தி? வுச்சதே – ததா² ந வத்தப்³ப³ம் அனிட்ட²ப்பஸங்க³தோ. பி⁴க்கு²னீனம்பி ‘‘ஸிக்கா²ஸாஜீவஸமாபன்னோ’’தி வுத்தே பி⁴க்கு²னீனம்பி ஸிக்கா²பச்சக்கா²னம் அத்தீ²தி ஆபஜ்ஜதி, தஞ்சானிட்ட²ம். இத³ம் அபரம் அனிட்ட²ப்பஸங்கோ³தி ‘‘ஸப்³ப³ஸிக்கா²பதா³னி ஸாதா⁴ரணானேவ, நாஸாதா⁴ரணானீ’’தி. அபிசாயம் பி⁴க்கூ²னம் ஸிக்கா²ஸாஜீவஸமாபன்னோவாதி த³ஸ்ஸனத்த²ம் ‘‘அனுஜானாமி, பி⁴க்க²வே, தம்யேவ உபஜ்ஜ²’’ந்திஆதி³ (பாரா. 69) வுத்தம், அபிச யோ ததா² லேஸம் ஓட்³டே³த்வா மேது²னம் த⁴ம்மம் படிஸேவந்தோ வஜ்ஜிபுத்தகா விய பாராஜிகோ ஹோதி. தே ஹி ‘‘பி⁴க்கூ²னம் ஸிக்கா²ஸாஜீவஸமாபன்னோ’’தி வசனாபா⁴வே ஸதி ‘‘ஆபத்திம் தும்ஹே, பி⁴க்க²வே, ஆபன்னா பாராஜிக’’ந்தி வுத்தா ப⁴க³வதா. ஏத்த² பன ‘‘பி⁴க்க²வே’’தி வுத்தத்தா கேசி பி⁴க்கு²லிங்கே³ டி²தா, ‘‘இதா³னி சேபி மயம், ப⁴ந்தே ஆனந்த³, லபே⁴ய்யாம ப⁴க³வதோ ஸந்திகே பப்³ப³ஜ்ஜம் லபே⁴ய்யாம உபஸம்பத³’’ந்தி வுத்தத்தா கேசி விப்³ப⁴ந்தாதி வேதி³தப்³பா³. ததோ ஆபத்தியா பே⁴தோ³தி ததோ விப⁴ங்க³தோ ‘‘அக்கா²யிதே ஸரீரே பாராஜிகம், யேபு⁴ய்யேன கா²யிதே து²ல்லச்சய’’ந்திஆதி³ ஆபத்தியா பே⁴தோ³ ஹோதி. அனாபத்தி தத³ஞ்ஞதா²தி ததோ ஏவ விப⁴ங்க³தோ யேனாகாரேன ஆபத்தி வுத்தா, ததோ அஞ்ஞேனாகாரேன அனாபத்திபே⁴தோ³வ ஹோதி. ‘‘ஸாதி³யதி ஆபத்தி பாராஜிகஸ்ஸ, ந ஸாதி³யதி அனாபத்தீ’’தி ஹி விப⁴ங்கே³ அஸதி ந பஞ்ஞாயதி. ஏத்தாவதா ஸமாஸதோ கா³தா²த்தோ² வுத்தோ ஹோதி. ஏத்த² ச பன –

‘‘நிதா³னமாதிகாபே⁴தோ³, விப⁴ங்க³ஸ்ஸ பயோஜனம்;

அனாபத்திபகாரோ ச, பட²மோ நிப்பயோஜனோ’’தி. –

இமம் நயம் த³ஸ்ஸேத்வாவ ஸப்³ப³ஸிக்கா²பதா³னம் அத்தோ² பகாஸிதப்³போ³. கத²ம்? ப⁴க³வதா பன யேனாகாரேன யம் ஸிக்கா²பத³ம் பஞ்ஞாபிதம், தஸ்ஸ ஆகாரஸ்ஸ ஸமத்த²ம் வா அஸமத்த²ம் வாதி து³வித⁴ம் நிதா³னம், அயம் நிதா³னபே⁴தோ³. மாதிகாபி நிதா³னாபேக்கா² நிதா³னானபேக்கா²தி து³விதா⁴. தத்த² சதுத்த²பாராஜிகாதி³ஸிக்கா²பதா³னி நிதா³னாபேக்கா²னி. ந ஹி வக்³கு³முதா³தீரியா பி⁴க்கூ² ஸயமேவ அத்தனோ அத்தனோ அஸந்தம் உத்தரிமனுஸ்ஸத⁴ம்மம் முஸாவாத³லக்க²ணம் பாபேத்வா பா⁴ஸிம்ஸு. அஞ்ஞமஞ்ஞஸ்ஸ ஹி தே உத்தரிமனுஸ்ஸத⁴ம்மஸ்ஸ கி³ஹீனம் வண்ணம் பா⁴ஸிம்ஸு, ந ச தாவதா பாராஜிகவத்து² ஹோதி. தத்த² தேன லேஸேன ப⁴க³வா தம் வத்து²ம் நிதா³னம் கத்வா பாராஜிகம் பஞ்ஞபேஸி, தேன வுத்தம் ‘‘நிதா³னாபேக்க²’’ந்தி. இமினா நயேன நிதா³னாபேக்கா²னி ஞத்வா தப்³பி³பரீதானி ஸிக்கா²பதா³னி நிதா³னானபேக்கா²னீதி வேதி³தப்³பா³னி, அயம் மாதிகாபே⁴தோ³.

நானப்பகாரதோ மூலாபத்திப்பஹோனகவத்து²பயோக³சித்தனியாமத³ஸ்ஸனவஸேன மாதிகாய விப⁴ஜனபா⁴வதீ³பனத்த²ம் தேஸம் அப்பஹோனகதாய வா தத³ஞ்ஞதரவேகல்லதாய வா வீதிக்கமே ஸதி ஆபத்திபே⁴த³த³ஸ்ஸனத்த²ம், அஸதி அனாபத்தித³ஸ்ஸனத்த²ஞ்சாதி ஸப்³ப³த்த² தயோ அத்த²வஸே படிச்ச மாதிகாய விப⁴ஜனம் விப⁴ங்கோ³ ஆரபீ⁴யதீதி வேதி³தப்³போ³. ஏத்த² பன ‘‘பி⁴க்க²கோதி பி⁴க்கு², பி⁴க்கா²சரியம் அஜ்ஜு²பக³தோதி பி⁴க்கு², பி⁴ன்னபடத⁴ரோதி பி⁴க்கூ²’’தி கேவலம் ப்³யஞ்ஜனத்த²தீ³பனவஸேன பவத்தோ வா, ‘‘ஸமஞ்ஞாய பி⁴க்கூ²’’தி பி⁴க்கு²பா⁴வஸம்ப⁴வம் அனபேக்கி²த்வாபி கேவலம் பி⁴க்கு² நாம பவத்திட்டா²னதீ³பனவஸேன பவத்தோ வா, ‘‘ஏஹி பி⁴க்கூ²தி பி⁴க்கு², ஸரணக³மனேஹி உபஸம்பன்னோதி பி⁴க்கு², ஞத்திசதுத்தே²ன கம்மேன உபஸம்பன்னோதி பி⁴க்கூ²’’தி உபஸம்பதா³னந்தரேனாபி பி⁴க்கு²பா⁴வஸித்³தி⁴தீ³பனவஸேன பவத்தோ வா, ‘‘ப⁴த்³ரோ பி⁴க்கு², ஸாரோ பி⁴க்கு², ஸேக்கோ² பி⁴க்கு², அஸேக்கோ² பி⁴க்கூ²’’தி பி⁴க்கு²கரணேஹி த⁴ம்மேஹி ஸமன்னாக³தபி⁴க்கு²தீ³பனவஸேன பவத்தோ வா விப⁴ங்கோ³ அஜ்ஜு²பேக்கி²தோ ஸப்³ப³ஸாமஞ்ஞபத³த்தா, ததா² அஞ்ஞபா⁴கி³யஸிக்கா²பதா³தீ³ஸு ஸத்³வாரவஸேன, அதி⁴கரணத³ஸ்ஸனாதி³வஸேன பவத்தோ ச அஜ்ஜு²பேக்கி²தோ இதரத்த² தத³பா⁴வதோதி வேதி³தப்³போ³.

தத்த² திஸ்ஸோ இத்தி²யோதிஆதி³ வத்து²னியமத³ஸ்ஸனவஸேன பவத்தோ, மனுஸ்ஸித்தி²யா தயோ மக்³கே³ மேது²னம் த⁴ம்மம் படிஸேவந்தஸ்ஸ ஆபத்தி பாராஜிகஸ்ஸாதிஆதி³ பயோக³னியமத³ஸ்ஸனவஸேன பவத்தோ, பி⁴க்கு²ஸ்ஸ ஸேவனசித்தம் உபட்டி²தேதிஆதி³ சித்தனியமத³ஸ்ஸனவஸேன பவத்தோ, ஸாதி³யதி ஆபத்தி பாராஜிகஸ்ஸ, ந ஸாதி³யதி அனாபத்தீதிஆதி³ வத்து²பயோக³னியமே ஸதி சித்தனியமபா⁴வாபா⁴வவஸேன ஆபத்தானாபத்தித³ஸ்ஸனத்த²ம் பவத்தோ, மதம் யேபு⁴ய்யேன கா²யிதம் ஆபத்தி து²ல்லச்சயஸ்ஸாதிஆதி³ வத்து²ஸ்ஸ அப்பஹோனகதாய வீதிக்கமே ஆபத்திபே⁴த³த³ஸ்ஸனத்த²ம் பவத்தோ, ந ஸாதி³யதி அனாபத்தீதி சித்தனியமவேகல்யேன வீதிக்கமாபா⁴வா அனாபத்தித³ஸ்ஸனத்த²ம் பவத்தோதி. ஏவம் இதரேஸுபி ஸிக்கா²பதே³ஸு யதா²ஸம்ப⁴வனயோ அயந்தி பயோஜனோ விப⁴ங்கோ³.

அனாபத்திவாரோ பன மூலாபத்திதோ, தத³ஞ்ஞேகதே³ஸதோ, ஸப்³பா³பத்திதோ ச அனாபத்திதீ³பனவஸேன திவிதோ⁴. தத்த² யோ பட²மோ, ஸோ விப⁴ங்கோ³ விய தயோ அத்த²வஸே படிச்ச பவத்தோ. கதமே தயோ? மாதிகாபதா³னம் ஸாத்த²கனிரத்த²கானம் தத³ஞ்ஞதா² உத்³த⁴ரணானுத்³த⁴ரணவஸேன ஸப்பயோஜனனிப்பயோஜனபா⁴வதீ³பனத்த²ம், தத³ஞ்ஞதா² படிபத்திக்கமத³ஸ்ஸனத்த²ம், ஆபத்திப்பஹோனகட்டா²னேபி விஸ்ஸஜ்ஜனத்த²ஞ்சாதி. கத²ம்? ஏளகலோமஸிக்கா²பதே³ ‘‘பி⁴க்கு²னோ பனேவ அத்³தா⁴னமக்³க³ப்படிபன்னஸ்ஸ ஏளகலோமானி உப்பஜ்ஜேய்யும், ஆகங்க²மானேன பி⁴க்கு²னா படிக்³க³ஹேதப்³பா³னீ’’தி (பாரா. 572) ஏதானி கேவலம் வத்து²மத்ததீ³பனபதா³னீதி நிரத்த²கானி நாம, தேஸம் அனாபத்தி. ‘‘அத்³தா⁴னமக்³க³ம் அப்படிபன்னஸ்ஸ உப்பன்னே ஏளகலோமே அனாபத்தி, ஆகங்க²மானேன படிக்³க³ஹிதே’’திஆதி³னா நயேன தத³ஞ்ஞதா² அனுத்³த⁴ரணேன நிப்பயோஜனபா⁴வோ தீ³பிதோ ஹோதி, யதி³த³ம் மாதிகாயம் ‘‘மேது²னம் த⁴ம்மம் படிஸேவேய்யா’’தி, இத³ம் ஸாத்த²கம். தஸ்ஸ ஸப்பயோஜனபா⁴வதீ³பனத்த²ம் ‘‘அனாபத்தி அஜானந்தஸ்ஸ அஸாதி³யந்தஸ்ஸா’’தி வுத்தம். யஸ்மா ஜானனஸாதி³யனபா⁴வேன ஆபத்தி, அஸேவந்தஸ்ஸ அனாபத்தி, தஸ்மா வுத்தம் மாதிகாயம் ‘‘யோ பன பி⁴க்கு² மேது²னம் த⁴ம்மம் படிஸேவேய்ய, பாராஜிகோ ஹோதி அஸம்வாஸோ’’தி அதி⁴ப்பாயோ. ‘‘பரபரிக்³க³ஹிதம் பரபரிக்³க³ஹிதஸஞ்ஞிதா க³ருபரிக்கா²ரோ தே²ய்யசித்தம் அவஹரண’’ந்தி வுத்தானம் பஞ்சன்னம்பி அங்கா³னம் பாரிபூரியா பேததிரச்சா²னக³தபரிக்³க³ஹிதே ஆபத்திப்பஹோனகட்டா²னேபி விஸ்ஸஜ்ஜனத்த²ம் ‘‘அனாபத்தி பேதபரிக்³க³ஹிதே’’திஆதி³ (கங்கா². அட்ட². து³தியபாராஜிகவண்ணனா) வுத்தம். அனாபத்தி இமம் ஜான, இமம் தே³ஹி, இமம் ஆஹர, இமினா அத்தோ², இமம் கப்பியம் கரோஹீதி ப⁴ணதீதிஆதி³ பன தத³ஞ்ஞதா² படிபத்திக்கமத³ஸ்ஸனத்த²ம் வுத்தந்தி வேதி³தப்³ப³ம். ஏத்தாவதா ‘‘நிதா³னமாதிகாபே⁴தோ³’’திஆதி³னா வுத்தகா³தா²ய அத்தோ² பகாஸிதோ ஹோதி.

ஏத்த² பட²மபஞ்ஞத்தி தாவ பட²மபோ³தி⁴ம் அதிக்கமித்வா பஞ்ஞத்தத்தா, ஆயஸ்மதோ ஸுதி³ன்னஸ்ஸ அட்ட²வஸ்ஸிககாலே பஞ்ஞத்தத்தா ச ரத்தஞ்ஞுமஹத்தம் பத்தகாலே பஞ்ஞத்தா. து³தியஅனுபஞ்ஞத்தி பா³ஹுஸச்சமஹத்தம் பத்தகாலே உப்பன்னா. ஸோ ஹாயஸ்மா மக்கடிபாராஜிகோ யதா² மாதுகா³மபடிஸம்யுத்தேஸு ஸிக்கா²பதே³ஸு திரச்சா²னக³தித்தீ² அனதி⁴ப்பேதா, ததா² இதா⁴பீதி ஸஞ்ஞாய ‘‘ஸச்சம், ஆவுஸோ, ப⁴க³வதா ஸிக்கா²பத³ம் பஞ்ஞத்தம், தஞ்ச கோ² மனுஸ்ஸித்தி²யா, நோ திரச்சா²னக³தித்தி²யா’’தி ஆஹ. ததியானுபஞ்ஞத்தி லாப⁴க்³க³மஹத்தம் பத்தகாலே உப்பன்னா. தே ஹி வஜ்ஜிபுத்தகா லாப⁴க்³க³மஹத்தம் பத்தா ஹுத்வா யாவத³த்த²ம் பு⁴ஞ்ஜித்வா ந்ஹாயித்வா வரஸயனேஸு ஸயித்வா ததியானுபஞ்ஞத்தியா வத்து²ம் உப்பாதே³ஸும், தே ச வேபுல்லமஹத்தம் பத்தே ஸங்கே⁴ உப்பன்னா, ஸயஞ்ச வேபுல்லமஹத்தம் பத்தாதி ‘‘வேபுல்லமஹத்தம்பேத்த² லப்³ப⁴தீ’’தி வுத்தம். இத³ம் பட²மபாராஜிகஸிக்கா²பத³ம் திவித⁴ம்பி வத்து²ம் உபாதா³ய சதுப்³பி³த⁴ம்பி தம் காலம் பத்வா பஞ்ஞத்தந்தி வேதி³தப்³ப³ம்.

தத்த² யோ பனாதி அனவஸேஸபரியாதா³னபத³ம். பி⁴க்கூ²தி தஸ்ஸ அதிப்பஸங்க³னியமபத³ம். பி⁴க்கூ²னம் ஸிக்கா²ஸாஜீவஸமாபன்னோதி தஸ்ஸ விஸேஸனவசனம். ந ஹி ஸப்³போ³பி பி⁴க்கு²னாமகோ யா ப⁴க³வதா யாய காயசி உபஸம்பதா³ய உபஸம்பன்னபி⁴க்கூ²னம் ஹேட்டி²மபரிச்சே²தே³ன ஸிக்கி²தப்³ப³ஸிக்கா² விஹிதா, ‘‘ஏத்த² ஸஹ ஜீவந்தீ’’தி யோ ச ஆஜீவோ வுத்தோ, தம் உப⁴யம் ஸமாபன்னோவ ஹோதி. கதா³ பன ஸமாபன்னோ அஹோஸி? யாய காயசி உபஸம்பதா³ய உபஸம்பன்னஸமனந்தரமேவ தது³ப⁴யம் ஜானந்தோபி அஜானந்தோபி தத³ஜ்ஜு²பக³தத்தா ஸமாபன்னோ நாம ஹோதி. ஸஹ ஜீவந்தீதி யாவ ஸிக்க²ம் ந பச்சக்கா²தி, பாராஜிகபா⁴வஞ்ச ந பாபுணாதி, யம் பன வுத்தம் அந்த⁴கட்ட²கதா²யம் ‘‘ஸிக்க²ம் பரிபூரேந்தோ ஸிக்கா²ஸமாபன்னோ ஸாஜீவம் அவீதிக்கமந்தோ ஸாஜீவஸமாபன்னோ ஹோதீ’’தி, தம் உக்கட்ட²பரிச்சே²த³வஸேன வுத்தம். ந ஹி ஸிக்க²ம் அபரிபூரேந்தோ காமவிதக்காதி³ப³ஹுலோ வா ஏகச்சம் ஸாவஸேஸம் ஸாஜீவம் வீதிக்கமந்தோ வா ஸிக்கா²ஸாஜீவஸமாபன்னோ நாம ந ஹோதி. உக்கட்ட²பரிச்சே²தே³ன பன சதுக்கம் லப்³ப⁴தி அத்தி² பி⁴க்கு² ஸிக்கா²ஸமாபன்னோ ஸீலானி பச்சவேக்க²ந்தோ ந ஸாஜீவஸமாபன்னோ அசித்தகம் ஸிக்கா²பத³ம் வீதிக்கமந்தோ, அத்தி² ந ஸிக்கா²ஸமாபன்னோ காமவிதக்காதி³ப³ஹுலோ ஸாஜீவஸமாபன்னோ நிராபத்திகோ, அத்தி² ந ஸிக்கா²ஸமாபன்னோ ந ச ஸாஜீவஸமாபன்னோ அனவஸேஸம் ஆபத்திம் ஆபன்னோ, அத்தி² ஸிக்கா²ஸமாபன்னோ ச ஸாஜீவஸமாபன்னோ ச ஸிக்க²ம் பரிபூரேந்தோ ஸாஜீவஞ்ச அவீதிக்கமந்தோ, அயமேவ சதுத்தோ² பி⁴க்கு² உக்கட்டோ² இத⁴ அதி⁴ப்பேதோ ஸியா. ந ஹி ப⁴க³வா அனுக்கட்ட²ம் வத்தும் யுத்தோதி சே? ந, ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’திவசனவிரோத⁴தோ. உக்கட்ட²க்³க³ஹணாதி⁴ப்பாயே ஸதி ‘‘ஸிக்கா²தி திஸ்ஸோ ஸிக்கா²’’தி ஏத்தகமேவ வத்தப்³ப³ந்தி அதி⁴ப்பாயோ. ஸிக்க²த்தயஸமாபன்னோ ஹி ஸப்³பு³க்கட்டோ²தி.

‘‘மேது²னம் த⁴ம்மம் படிஸேவேய்யா’’தி பரதோ வசனம் அபேக்கி²த்வா அதி⁴ஸீலஸிக்கா²வ வுத்தாதி சே? ந, தஸ்ஸாபி அப⁴ப்³ப³த்தா. ந ஹி அதி⁴ஸீலஸிக்க²ம் பரிபூரேந்தோ ஸாஜீவஞ்ச அவீதிக்கமந்தோ மேது²னம் த⁴ம்மம் படிஸேவிதும் ப⁴ப்³போ³, தம் ஸிக்க²ம் அபரிபூரேந்தோ ஸாஜீவஞ்ச வீதிக்கமந்தோ ஏவ ஹி படிஸேவேய்யாதி அதி⁴ப்பாயோ, தஸ்மா ஏவமேத்த² அத்தோ² க³ஹேதப்³போ³. யஸ்மா ஸிக்கா²பத³ஸங்கா²தோ ஸாஜீவோ அதி⁴ஸீலஸிக்க²மேவ ஸங்க³ண்ஹாதி, நேதரம் அதி⁴சித்தஸிக்க²ம் அதி⁴பஞ்ஞாஸிக்க²ம் வா, தஸ்மா ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி வுத்தம், தஸ்மா அதி⁴ஸீலஸிக்கா²ய ஸங்கா³ஹகோ ஸாஜீவோ ஸிக்கா²ஸாஜீவோதி வுத்தோ. இதி ஸாஜீவவிஸேஸனத்த²ம் ஸிக்கா²க்³க³ஹணம் கதம். தத³த்த²தீ³பனத்த²மேவ விப⁴ங்கே³ ஸிக்க²ம் அபராமஸித்வா ‘‘தஸ்மிம் ஸிக்க²தி, தேன வுச்சதி ஸாஜீவஸமாபன்னோ’’தி வுத்தம், தேன ஏகமேவித³ம் அத்த²பத³ந்தி தீ³பிதம் ஹோதி. தஞ்ச உபஸம்பதூ³பக³மனந்தரதோ பட்டா²ய ஸிக்க²னாதி⁴காரத்தா ‘‘ஸிக்க²தீ’’தி ச ‘‘ஸமாபன்னோ’’தி ச வுச்சதி. யோ ஏவம் ‘‘ஸிக்கா²ஸாஜீவஸமாபன்னோ’’தி ஸங்க்²யம் க³தோ, தாதி³ஸம் பச்சயம் படிச்ச அபரபா⁴கே³ ஸாஜீவஸங்கா²தமேவ ஸிக்க²ம் அப்பச்சக்கா²ய, தஸ்மிம்யேவ ச து³ப்³ப³ல்யம் அனாவிகத்வா மேது²னம் த⁴ம்மம் படிஸேவேய்யாதி அயமத்தோ² யுஜ்ஜதி. கிந்து அட்ட²கதா²னயோ படிக்கி²த்தோ ஹோதி. ஸோ ச ந படிக்கே²பாரஹோதி தேன தத³னுஸாரேன ப⁴விதப்³ப³ம்.

அதி⁴ப்பாயோ பனேத்த² பரியேஸிதப்³போ³, ஸோ தா³னி வுச்சதி – ஸப்³பே³ஸுபி ஸிக்கா²பதே³ஸு இத³மேவ பி⁴க்கு²லக்க²ணம் ஸாதா⁴ரணம், யதி³த³ம் ‘‘பி⁴க்கூ²னம் ஸிக்கா²ஸாஜீவஸமாபன்னோ’’தி. கீ²ணாஸவோபி ஸாவகோ ஆபத்திம் ஆபஜ்ஜதி அசித்தகம், ததா² ஸேக்கோ². புது²ஜ்ஜனோ பன ஸசித்தகம்பி, தஸ்மா ஸேக்கா²ஸேக்க²புது²ஜ்ஜனபி⁴க்கூ²னம் ஸாமஞ்ஞமித³ம் பி⁴க்கு²லக்க²ணந்தி கத்வா கேவலம் ஸிக்கா²ஸமாபன்னோ, கேவலம் ஸாஜீவஸமாபன்னோ ச உப⁴யஸமாபன்னோ சாதி ஸரூபேகதே³ஸேகஸேஸனயேன ‘‘ஸிக்கா²ஸாஜீவஸமஆபன்னோ’’த்வேவ ஸம்பிண்டே³த்வா உக்கட்ட²க்³க³ஹணேன அனுக்கட்டா²னம் க³ஹணஸித்³தி⁴தோ அட்ட²கதா²யம் உக்கட்டோ²வ வுத்தோ. தமேவ ஸம்பாதே³தும் ‘‘தஸ்மிம் ஸிக்க²தி, தேன வுச்சதி ஸாஜீவஸமாபன்னோ’’தி ஏத்த² ஸிக்கா²பத³ஸ்ஸ அவசனே பரிஹாரம் வத்வா யஸ்மா பன ஸோ அஸிக்க²ம்பி ஸமாபன்னோ, தஸ்மா ஸிக்கா²ஸமாபன்னோதிபி அத்த²தோ வேதி³தப்³போ³தி ச வத்வா ‘‘யம் ஸிக்க²ம் ஸமாபன்னோ தம் அப்பச்சக்கா²ய யஞ்ச ஸாஜீவம் ஸமாபன்னோ தத்த² து³ப்³ப³ல்யம் அனாவிகத்வா’’தி வுத்தந்தி அயமட்ட²கதா²யம் அதி⁴ப்பாயோ வேதி³தப்³போ³. ஏதஸ்மிம் பன அதி⁴ப்பாயே அதி⁴ஸீலஸிக்கா²ய ஏவ க³ஹணம் ஸப்³ப³த்தி²கத்தா, ஸீலாதி⁴காரதோ ச வினயஸ்ஸாதி வேதி³தப்³ப³ம். யதா² ச ஸிக்கா²பத³ம் ஸமாதி³யந்தோ ஸீலம் ஸமாதி³யதீதி வுச்சதி, ஏவம் ஸிக்கா²பத³ம் பச்சக்க²ந்தோ ஸீலஸங்கா²தம் ஸிக்க²ம் பச்சக்கா²தீதி வத்தும் யுஜ்ஜதி, தஸ்மா தத்த² வுத்தம் ‘‘யம் ஸிக்க²ம் ஸமாபன்னோ, தம் அப்பச்சக்கா²யா’’தி. ஸிக்க²ம் பச்சக்கா²ய படிஸேவிதமேது²னஸ்ஸ உபஸம்பத³ம் அனுஜானந்தோ ந ஸமூஹனதி நாம. ந ஹி ஸோ பி⁴க்கு² ஹுத்வா படிஸேவி, ‘‘யோ பன பி⁴க்கூ²’’தி ச பஞ்ஞத்தம். ஏத்தாவதா ஸமாஸதோ ‘‘ஸிக்கா²ஸாஜீவஸமான்னோ’’தி ஏத்த² வத்தப்³ப³ம் வுத்தம்.

கிம் இமினா விஸேஸவசனேன பயோஜனம், நனு ‘‘யோ பன பி⁴க்கு² ஸிக்க²ம் அப்பச்சக்கா²ய து³ப்³ப³ல்யம் அனாவிகத்வா…பே… அஸம்வாஸோ’’தி ஏத்தகமேவ வத்தப்³ப³ந்தி சே? ந வத்தப்³ப³ம் அனிட்ட²ப்பஸங்க³தோ. யோ பன ஸிக்கா²ஸாஜீவஸமாபன்னோ தே²ய்யஸம்வாஸாதி³கோ கேவலேன ஸமஞ்ஞாமத்தேன, படிஞ்ஞாமத்தேன வா பி⁴க்கு², தஸ்ஸாபி ஸிக்கா²பச்சக்கா²னம் அத்தி². ஸிக்க²ம் அப்பச்சக்கா²ய ச மேது²னம் த⁴ம்மம் படிஸேவந்தஸ்ஸ பாராஜிகாபத்தி. யோ வா பச்சா² பாராஜிகம் ஆபத்திம் ஆபஜ்ஜித்வா ந ஸிக்கா²ஸாஜீவஸமாபன்னோ தஸ்ஸ ச, யோ வா பக்க²பண்ட³கத்தா பண்ட³கபா⁴வூபக³மனேன ந ஸிக்கா²ஸாஜீவஸமாபன்னோ தஸ்ஸ ச தது³ப⁴யம் அத்தீ²தி ஆபஜ்ஜதி. ‘‘பண்ட³கபா⁴வபக்கே² ச பக்க²பண்ட³கோ உபஸம்பதா³ய ந வத்தூ²’’தி வுத்தம், தஸ்மா இதரஸ்மிம் பக்கே² வத்தூ²தி ஸித்³த⁴ம், தஸ்மிம் பக்கே² உபஸம்பன்னோ பண்ட³கபா⁴வபக்கே² பண்ட³கத்தா ந ஸிக்கா²ஸாஜீவஸமாபன்னோ, ஸோ பரிச்சஜிதப்³ப³ஸிக்கா²ய அபா⁴வேன ஸிக்க²ம் அப்பச்சக்கா²ய முகே²ன பரஸ்ஸ அங்க³ஜாதக்³க³ஹணாத³யோ மேது²னம் த⁴ம்மம் படிஸேவேய்ய, தஸ்ஸ குதோ பாராஜிகாபத்தீதி அதி⁴ப்பாயோ. அயம் நயோ அபண்ட³கபக்க²ம் அலப⁴மானஸ்ஸேவ பரதோ யுஜ்ஜதி, லப⁴ந்தஸ்ஸ பன அரூபஸத்தானம் குஸலானம் ஸமாபத்திக்க²ணே ப⁴வங்க³விச்சே²தே³ ஸதிபி அமரணம் விய பண்ட³கபா⁴வபக்கே²பி பி⁴க்கு²பா⁴வோ அத்தி². ஸம்வாஸம் வா ஸாதி³யந்தஸ்ஸ ந தே²ய்யஸம்வாஸகபா⁴வோ அத்தி² அந்திமவத்து²ம் அஜ்ஜா²பன்னஸ்ஸ விய. ந ச ஸஹஸேய்யாதி³கம் ஜனேதி. க³ணபூரகோ பன ந ஹோதி அந்திமவத்து²ம் அஜ்ஜா²பன்னோ விய, ந ஸோ ஸிக்கா²ஸாஜீவஸமாபன்னோ, இதரஸ்மிம் பன பக்கே² ஹோதி, அயம் இமஸ்ஸ ததோ விஸேஸோ. கிமயம் ஸஹேதுகோ, உதா³ஹு அஹேதுகோதி? ந அஹேதுகோ. யதோ உபஸம்பதா³ தஸ்ஸ அபண்ட³கபக்கே² அனுஞ்ஞாதா ஸஹேதுகபடிஸந்தி⁴கத்தா. பண்ட³கபா⁴வபக்கே²பி கிஸ்ஸ நானுஞ்ஞாதாதி சே? பண்ட³கபூ⁴தத்தா ஓபக்கமிகபண்ட³கஸ்ஸ விய.

அபிச ஸிக்கா²ஸாஜீவஸமாபன்னோதி இமினா தஸ்ஸ ஸிக்கா²ஸமாதா³னம் தீ³பேத்வா தம் ஸமாதி³ன்னஸிக்க²ம் அப்பச்சக்கா²ய தத்த² ச து³ப்³ப³ல்யம் அனாவிகத்வாதி வத்தும் யுஜ்ஜதி, ந அஞ்ஞதா²தி இமினா காரணேன யதா²வுத்தானிட்ட²ப்பஸங்க³தோ ‘‘யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அப்பச்சக்கா²யா’’திஆதி³ வுத்தம். யதா² சேத்த², ததா² ‘‘யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அப்பச்சக்கா²ய து³ப்³ப³ல்யம் அனாவிகத்வா கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யேய்ய (பாரா. 89), ஸுக³தசீவரப்பமாணம் சீவரம் காராபேய்ய அதிரேகம் வா, சே²த³னகம் பாசித்திய’’ந்திஆதி³னா (பாசி. 548) நயேன ஸப்³ப³த்த² யோஜேதப்³ப³ம். அந்தமஸோ திரச்சா²னக³தாயபீதி மனுஸ்ஸித்தி²ம் உபாதா³ய வுத்தம். ந ஹி ‘‘பகே³வ பண்ட³கே புரிஸே வா’’தி வத்தும் யுஜ்ஜதி. ஸேஸம் தத்த² தத்த² வுத்தனயமேவ.

அயம் பட²மபாராஜிகஸ்ஸ மாதிகாய தாவ வினிச்ச²யோ.

சதுப்³பி³த⁴வினயகதா²வண்ணனா

45. நீஹரித்வாதி ஏத்த² ஸாஸனதோ நீஹரித்வாதி அத்தோ². ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா நானுயுஞ்ஜிதப்³ப³ம். கதமேஹி பஞ்சஹி? ஸுத்தம் ந ஜானாதி, ஸுத்தானுலோமம் ந ஜானாதீ’’தி (பரி. 442) ஏவமாதி³தோ ஹி பரியத்திஸாஸனதோ ஸுத்தம், ஸுத்தானுலோமஞ்ச நீஹரித்வா பகாஸேஸும். ‘‘அனாபத்தி ஏவம் அம்ஹாகம் ஆசரியானம் உக்³க³ஹோ பரிபுச்சா²தி ப⁴ணதீ’’தி ஏவமாதி³தோ பரியத்திஸாஸனதோ ஆசரியவாத³ம் நீஹரித்வா பகாஸேஸும். பா⁴ருகச்ச²கவத்து²ஸ்மிம் ‘‘ஆயஸ்மா உபாலி ஏவமாஹ – அனாபத்தி, ஆவுஸோ, ஸுபினந்தேனா’’தி (பாரா. 78) ஏவமாதி³தோ பரியத்திஸாஸனதோ ஏவ அத்தனோமதிம் நீஹரித்வா பகாஸேஸும். தாய ஹி அத்தனோமதியா தே²ரோ ஏதத³க்³க³ட்டா²னம் லபி⁴. அபி ச வுத்தஞ்ஹேதம் ப⁴க³வதா ‘‘அனுபஸம்பன்னேன பஞ்ஞத்தேன வா அபஞ்ஞத்தேன வா வுச்சமானோ…பே… அனாத³ரியம் கரோதி, ஆபத்தி து³க்கடஸ்ஸா’’தி (பாசி. 343). தத்த² ஹி பஞ்ஞத்தம் நாம ஸுத்தம். ஸேஸத்தயம் அபஞ்ஞத்தம் நாம. தேனாயம் ‘‘சதுப்³பி³த⁴ஞ்ஹி வினயம், மஹாதே²ரா’’தி கா³தா² ஸுவுத்தா. யம் ஸந்தா⁴ய வுத்தம் நாக³ஸேனத்தே²ரேன. ஆஹச்சபதே³னாதி அட்ட² வண்ணட்டா²னானி ஆஹச்ச வுத்தேன பத³னிகாயேனாதி அத்தோ², உதா³ஹடேன கண்டோ²க்கந்தேன பத³ஸமூஹேனாதி அதி⁴ப்பாயோ. ரஸேனாதி தஸ்ஸ ஆஹச்சபா⁴ஸிதஸ்ஸ ரஸேன, ததோ உத்³த⁴டேன வினிச்ச²யேனாதி அத்தோ². ஸுத்தச்சா²யா விய ஹி ஸுத்தானுலோமம். ஆசரியவாதோ³ ‘‘ஆசரியவம்ஸோ’’தி வுத்தோ பாளியம் வுத்தானம் ஆசரியானம் பரம்பராய ஆப⁴தோவ பமாணந்தி த³ஸ்ஸனத்த²ம். அதி⁴ப்பாயோதி காரணோபபத்திஸித்³தோ⁴ உஹாபோஹனயப்பவத்தோ பச்சக்கா²தி³பமாணபதிரூபகோ. அதி⁴ப்பாயோதி ஏத்த² ‘‘அத்தனோமதீ’’தி கேசி அத்த²ம் வத³ந்தி.

பரிவாரட்ட²கதா²யம், இத⁴ ச கிஞ்சாபி ‘‘ஸுத்தானுலோமம் நாம சத்தாரோ மஹாபதே³ஸா’’தி வுத்தம், அத² கோ² மஹாபதே³ஸனயஸித்³த⁴ம் படிக்கி²த்தாபடிக்கி²த்தம் அனுஞ்ஞாதானனுஞ்ஞாதம் கப்பியாகப்பியந்தி அத்த²தோ வுத்தம் ஹோதி. தத்த² யஸ்மா டா²னம் ஓகாஸோ பதே³ஸோதி காரணவேவசனானி ‘‘அட்டா²னமேதம், ஆனந்த³, அனவகாஸோ’’திஆதி³ (பாரா. 43) ஸாஸனதோ, ‘‘நிக்³க³ஹட்டா²ன’’ந்தி ச ‘‘அஸந்தி³ட்டி²ட்டா²ன’’ந்தி ச ‘‘அஸந்தி³ட்டி² ச பன பதே³ஸோ’’தி ச லோகதோ, தஸ்மா மஹாபதே³ஸாதி மஹாகாரணானீதி அத்தோ². காரணம் நாம ஞாபகோ ஹேது இதா⁴தி⁴ப்பேதம். மஹந்தபா⁴வோ பன தேஸம் மஹாவிஸயத்தா மஹாபூ⁴தானம் விய. தே து³விதா⁴ வினயமஹாபதே³ஸா ஸுத்தந்திகமஹாபதே³ஸா சாதி. தத்த² வினயமஹாபதே³ஸா வினயே பயோக³ம் க³ச்ச²ந்தி, இதரே உப⁴யத்தா²பி, தேனேவ பரிவாரே அனுயோக³வத்தே ‘‘த⁴ம்மம் ந ஜானாதி, த⁴ம்மானுலோமம் ந ஜானாதீ’’தி (பரி. 442) வுத்தம். தத்த² த⁴ம்மந்தி ட²பேத்வா வினயபிடகம் அவஸேஸபிடகத்³வயம். த⁴ம்மானுலோமந்தி ஸுத்தந்திகே சத்தாரோ மஹாபதே³ஸே. தத்த² யோ த⁴ம்மம் த⁴ம்மானுலோமஞ்சேவ ஜானாதி, ந வினயம் வினயானுலோமஞ்ச, ஸோ ‘‘த⁴ம்மம் ரக்கா²மீ’’தி வினயம் உப்³பி³னயம் கரோதி, இதரோ ‘‘வினயம் ரக்கா²மீ’’தி த⁴ம்மம் உத்³த⁴ம்மம் கரோதி, உப⁴யம் ஜானந்தோ உப⁴யம்பி ஸம்பாதே³தி.

தத்ரித³ம் முக²மத்தம் – தத்த² பட²மோ ‘‘ஸோ சே பவேஸனம் ஸாதி³யதி, பவிட்ட²ம், டி²தம், உத்³த⁴ரணம் ஸாதி³யதி ஆபத்தி, ந ஸாதி³யதி அனாபத்தீ’’தி ஏத்த² விப்படிபஜ்ஜதி. ஸோ ஹாயஸ்மா ஸுக²வேத³னீயஸ்ஸ உபாதி³ன்னபோ²ட்ட²ப்³ப³ஸ்ஸ, காயிந்த்³ரியஸ்ஸ ச ஸமாயோகே³ ஸதி படிவிஜானந்தோ காயிகஸுக²வேத³னுப்பத்திமத்தேன ஸாதி³யதி நாமாதி பரிச்சி²ந்தி³த்வா தஸ்ஸ ஆபத்தி பாராஜிகஸ்ஸாதி அஸேவனாதி⁴ப்பாயஸ்ஸபி ஆபத்திப்பஸங்க³ம் கரோதி, ததா² யஸ்ஸ ஸந்த²தத்தா வா யோனிதோ³ஸவஸேன வா து³க்கா² அஸாதா வேத³னா, வாதோபஹடக³த்ததாய வா நேவ காயிகவேத³னா, தஸ்ஸ ஜானதோ அஜானதோபி ‘‘அனாபத்தி அஸாதி³யந்தஸ்ஸா’’தி (பாரா. 76) ஸுத்தந்தம் த³ஸ்ஸேத்வா ஸேவனாதி⁴ப்பாயஸ்ஸாபி அனாபத்திப்பஸங்க³ம் கரோதி, ததா² யதி³ மோசனராகே³ன உபக்கமதோ முத்தே ஸங்கா⁴தி³ஸேஸோ, பகே³வ மேது²னராகே³னாதி து³க்கடட்டா²னம் க³ஹேத்வா ஸங்கா⁴தி³ஸேஸட்டா²னம் கரோதி, ஏவம் வினயம் உப்³பி³னயம் கரோதி நாம. இதரோ ‘‘அனாபத்தி அஜானந்தஸ்ஸாதி வுத்தத்தா ஜானதோ ஜானனேனேவ ஸுக²வேத³னா ஹோது வா மா வா ஸாதி³யனா ஹோதீ’’தி வத்வா அஸேவனாதி⁴ப்பாயஸ்ஸபி ஜானதோ அனாபத்திட்டா²னே ஆபத்திம் கரோதி, அனவஜ்ஜம் ஸாவஜ்ஜம் கரோதீதி ஏவம் த⁴ம்மம் உத்³த⁴ம்மம் கரோதி. உப⁴யம் பன ஜானந்தோ ‘‘பி⁴க்கு²ஸ்ஸ ஸேவனசித்தம் உபட்டி²தேதி (பாரா. 57) வசனதோ ஸேவனசித்தமேவேத்த² பமாணம், தஸ்ஸ பா⁴வேன ஆபத்தி பாராஜிகஸ்ஸ, அபா⁴வேன அனாபத்தீ’’தி வத்வா உப⁴யம்பி ரக்க²தி ஸம்பாதே³தி. இமினா நயேன ஸப்³ப³ஸிக்கா²பதே³ஸு யதா²ஸம்ப⁴வம் ஸப்பயோஜனா காதப்³பா³.

ஸங்கீ³திம் ஆரோபேத்வா ட²பிதபாளிதோ வினிமுத்தம் கத்வா ட²பிதத்தா பாளிவினிமுத்தா அத்த²தோ, நயதோ, அனுலோமதோ ச பாளிஓக்கந்தவினிச்ச²யப்பவத்தா அனுபவிட்ட²வினிச்ச²யவஸேன பவத்தாதி அத்தோ². ‘‘ந ஸமூஹனிஸ்ஸதீ’’தி ஜானந்தோபி ப⁴க³வா கேவலம் ‘‘தேஸம் மதம் பச்சி²மா ஜனதா மம வசனம் விய பமாணம் கரோதூ’’தி த³ஸ்ஸனத்த²ஞ்ச பரினிப்³பா³னகாலே ஏவமாஹ ‘‘ஆகங்க²மானோ, ஆனந்த³, ஸங்கோ⁴ மமச்சயேன கு²த்³தா³னுகு²த்³த³கானி ஸிக்கா²பதா³னி ஸமூஹனதூ’’தி (தீ³. நி. 2.216), தேனேதம் ஸித்³த⁴ம் ‘‘பஞ்ஞத்தம்பி சே ஸிக்கா²பத³ம் ஸமூஹனிதும் யஸ்ஸ ஸங்க⁴ஸ்ஸ அனுஞ்ஞாதம் ப⁴க³வதா, தஸ்ஸ பஞ்ஞத்தானுலோமம் அதிரேகத்த²தீ³பனம், பகே³வானுஞ்ஞாதம் ப⁴க³வதா’’தி. கிஞ்ச பி⁴ய்யோ ஊனாதிரித்தஸிக்கா²பதே³ஸு ஆசரியகுலேஸு விவாதோ³ அஞ்ஞமஞ்ஞம் ந காதப்³போ³தி த³ஸ்ஸனத்த²ஞ்ச. கஸ்மா ஸங்கோ⁴ ந ஸமூஹனீதி? அஞ்ஞமஞ்ஞம் விவாத³ப்பஸங்க³த³ஸ்ஸனதோ. ப⁴க³வதா ச ‘‘ஸப்³பே³ஹேவ ஸமக்³கே³ஹி ஸம்மோத³மானேஹி அவிவத³மானேஹி ஸிக்கி²தப்³ப³’’ந்தி வுத்தம். தத்த² ச ஏகச்சே தே²ரா ஏவமாஹம்ஸூதி ச அஞ்ஞவாத³த³ஸ்ஸனதோ விவத³மானேஹி ஸிக்கி²தப்³ப³ம் ஜாதம், தத³பா⁴வத்தம்பி ஞத்திது³தியகம்மவாசம் ஸாவேத்வா அவிவத³மானேஹேவ ஸிக்கி²தப்³ப³ம் அகாஸி.

அபிசாதி அத்தனோ மதியா பாகடகரணத்த²ம் ஆரம்போ⁴. தத்த² ‘‘ஸுத்தந்தாபி⁴த⁴ம்மவினயட்ட²கதா²ஸூ’’தி வசனதோ பிடகத்தயஸ்ஸபி ஸாதா⁴ரணா ஏஸா கதா²தி வேதி³தப்³பா³, ‘‘அத² பனாயம் கப்பிய’’ந்திஆதி³ வினயஸ்ஸேவ. காரகஸங்க⁴ஸதி³ஸந்தி ஸங்கீ³திகாரகஸங்க⁴ஸதி³ஸம். ‘‘ஸுத்தாதி³சதுக்கம் அப்பச்சக்கா²ய தேன அவிருத்³த⁴ஸ்ஸ கம்மஸ்ஸ காரகஸங்க⁴ஸதி³ஸ’’ந்தி த⁴ம்மஸிரித்தே²ரஸ்ஸ க³ண்டி²பதே³ வுத்தம், தம் அயுத்தம், ‘‘ஸுத்தமேவ ப³லவதரம். ஸுத்தஞ்ஹி அப்படிவத்தியம் காரகஸங்க⁴ஸதி³ஸ’’ந்தி ஏதேஹி பதே³ஹி அயுத்தத்தா. பாகதிகே பன க³ண்டி²பதே³ ‘‘தமத்த²ம் வினிச்சி²னித்வா தஸ்ஸ காரகஸங்க⁴ஸதி³ஸ’’ந்தி வுத்தம். பரவாதீ³தி அம்ஹாகம் ஸமயவிஜானனகோ அஞ்ஞனிகாயிகோதி வுத்தம். பரவாதீ³ ஸுத்தானுலோமந்தி கத²ம்? ‘‘அஞ்ஞத்ர உத³கத³ந்தபோனா’’தி (பாசி. 266) ஸுத்தம் ஸகவாதி³ஸ்ஸ, தத³னுலோமதோ நாளிகேரப²லஸ்ஸ உத³கம்பி உத³கமேவ ஹோதீதி பரவாதீ³ ச.

‘‘நாளிகேரஸ்ஸ யம் தோயம், புராணம் பித்தப³ந்த⁴னம்;

தமேவ தருணம் தோயம், பித்தக⁴ம் ப³லப³ந்த⁴ன’’ந்தி. –

ஏவம் பரவாதி³னா வுத்தே ஸகவாதீ³ த⁴ஞ்ஞப²லஸ்ஸ க³திகத்தா, ஆஹாரத்த²ஸ்ஸ ச ப²ரணதோ ‘‘யாவகாலிகமேவ த’’ந்தி வத³ந்தோ படிக்கி²பதி. பரோ ஆசரியவாத³ந்தி ‘‘ஸுங்கம் பரிஹரதீதி ஏத்த² உபசாரம் ஓக்கமித்வா கிஞ்சாபி பரிஹரதி, அவஹாரோ ஏவா’’தி அட்ட²கதா²வசனதோ ‘‘ததா² கரோந்தோ பாராஜிகமாபஜ்ஜதீ’’தி பரவாதி³னா வுத்தே ஸகவாதீ³ ‘‘ஸுங்கம் பரிஹரதி, ஆபத்தி து³க்கடஸ்ஸா’’தி ஸுத்தம் தத்தே²வ ஆக³தமஹாஅட்ட²கதா²வசனேன ஸத்³தி⁴ம் த³ஸ்ஸேத்வா படிஸேதே⁴தி, ததா² கரோந்தஸ்ஸ து³க்கடமேவாதி. பரோ அத்தனோமதீதி ஏத்த² ‘‘புரேப⁴த்தம் பரஸந்தகம் அவஹராதி புரேப⁴த்தமேவ ஹரிஸ்ஸாமீதி வாயமந்தஸ்ஸ பச்சா²ப⁴த்தம் ஹோதி, புரேப⁴த்தபயோகோ³வ ஸோ, தஸ்மா மூலட்டோ² ந முச்சதீதி தும்ஹாகம் தே²ரவாத³த்தா மூலட்ட²ஸ்ஸ பாராஜிகமேவா’’தி பரவாதி³னா வுத்தே ஸகவாதீ³ ‘‘தம் ஸங்கேதம் புரே வா பச்சா² வா தம் ப⁴ண்ட³ம் அவஹரதி, மூலட்ட²ஸ்ஸ அனாபத்தீ’’தி (பாரா. 119) ஸுத்தம் த³ஸ்ஸேத்வா படிக்கி²பதி.

பரோ ஸுத்தந்தி ‘‘அனியதஹேதுத⁴ம்மோ ஸம்மத்தனியதஹேதுத⁴ம்மஸ்ஸ ஆரம்மணபச்சயேன பச்சயோ’’தி ஸுத்தம் பட்டா²னே லிகி²தம் த³ஸ்ஸேத்வா ‘‘அரியமக்³க³ஸ்ஸ ந நிப்³பா³னமேவாரம்மண’’ந்தி பரவாதி³னா வுத்தே ஸகவாதீ³ ‘‘ஆரம்மணத்திகாதி³ஸுத்தானுலோமே ந ஓதரதீ’’தி படிக்கி²பதி. ஸுத்தானுலோமே ஓதரந்தம்யேவ ஹி ஸுத்தம் நாம, நேதரம். தேன வுத்தம் பாளிஆக³தம் பஞ்ஞாயதீதி ஏத்தகேனபி ஸித்³தே⁴ திஸ்ஸோ ஸங்கீ³தியோ ஆருள்ஹபாளிஆக³தம் பஞ்ஞாயதீ’’திஆதி³. தாதி³ஸஞ்ஹி பமாத³லேக²ந்தி ஆசரியோ. ‘‘அப்பமாதோ³ அமதம் பத³ம், பமாதோ³ மச்சுனோ பத³’’ந்தி (த⁴. ப. 21; நேத்தி. 26) வசனதோ தி³ன்னபோ⁴ஜனே பு⁴ஞ்ஜித்வா பரிஸ்ஸயானி பரிவஜ்ஜித்வா ஸதிம் பச்சுபட்ட²பேத்வா விஹரந்தோ நிச்சோ ஹோதீதி. ஏவரூபஸ்ஸ அத்த²ஸ்ஸ வஸேன ஆருள்ஹம்பி ஸுத்தம் ந க³ஹேதப்³ப³ம், தேன வுத்தம் நோ சே ததா² பஞ்ஞாயதீதி ஸித்³தே⁴பி ‘‘நோ சே ததா² பஞ்ஞாயதி, ந ஓதரதி ந ஸமேதீ’’தி. ‘‘பா³ஹிரகஸுத்தம் வா’’தி வுத்தத்தா அத்தனோ ஸுத்தம்பி அத்தே²ன அஸமேந்தம் ந க³ஹேதப்³ப³ம். பரோ ஆசரியவாத³ந்திஆதீ³ஸு த்³வீஸு நயேஸு பமாத³லேக²வஸேன தத்த² தத்த² ஆக³தட்ட²கதா²வசனம் தே²ரவாதே³ஹி ஸத்³தி⁴ம் யோஜேத்வா வேதி³தப்³ப³ம்.

அத² பனாயம் ஆசரியவாத³ம். பரோ ஸுத்தந்தி பரவாதி³னா ‘‘மூலபீ³ஜம் நாம ஹலித்³தி³ ஸிங்கி³வேரம் வசா…பே… பீ³ஜே பீ³ஜஸஞ்ஞீ சி²ந்த³தி வா சே²தா³பேதி வா பி⁴ந்த³தி வா…பே… ஆபத்தி பாசித்தியஸ்ஸாதி (பாசி. 91) தும்ஹாகம் பாட²த்தா ஹலித்³தி³க³ண்டி²ம் சி²ந்த³ந்தஸ்ஸ பாசித்திய’’ந்தி வுத்தே ஸகவாதீ³ ‘‘யானி வா பனஞ்ஞானி அத்தி² மூலே ஸஞ்ஜாயந்தீ’’திஆதி³ம் த³ஸ்ஸேத்வா தஸ்ஸ அட்ட²கதா²ஸங்கா²தேன ஆசரியவாதே³ன படிக்கி²பதி. ந ஹி க³ண்டி²ம்ஹி க³ண்டி² ஜாயதீதி. பரோ ஸுத்தானுலோமந்தி பரவாதி³னா ‘‘அனாபத்தி ஏவம் அம்ஹாகம் ஆசரியானம் உக்³க³ஹோதி வசனஸ்ஸானுலோமதோ ‘அம்ஹாகம் போராணபி⁴க்கூ² ஏகபாஸாதே³ க³ப்³ப⁴ம் த²கேத்வா அனுபஸம்பன்னேன ஸயிதும் வட்டதீதி ததா² கத்வா ஆக³தா, தஸ்மா அம்ஹாகம் வட்டதீ’தி தும்ஹேஸு ஏவ ஏகச்சேஸு வத³ந்தேஸு தும்ஹாகம் ந கிஞ்சி வத்தும் ஸக்கா’’தி வுத்தே ஸகவாதீ³ ‘‘ஸுத்தம் ஸுத்தானுலோமஞ்ச உக்³க³ஹிதகானம்யேவ ஆசரியானம் உக்³க³ஹோ பமாண’’ந்திஆதி³அட்ட²கதா²வசனம் த³ஸ்ஸேத்வா படிஸேதே⁴தி. பரோ அத்தனோமதிந்தி ‘‘த்³வாரம் விவரித்வா அனாபுச்சா² ஸயிதேஸு கே முச்சந்தீ’’தி ஏத்த² பன த்³வேபி ஜனா முச்சந்தி யோ ச யக்க²க³ஹிதகோ, யோ ச ப³ந்தி⁴த்வா நிபஜ்ஜாபிதோதி தும்ஹாகம் தே²ரவாத³த்தா அஞ்ஞே ஸப்³பே³பி யதா² ததா² வா நிபன்னாத³யோபி முச்சந்தீதி படிஸேதே⁴தி.

அத² பனாயம் அத்தனோமதிம். பரோ ஸுத்தந்தி ‘‘ஆபத்திம் ஆபஜ்ஜந்தீ’’தி பரவாதி³னா கு³த்தே ஸகவாதீ³ ‘‘தி³வா கிலந்தரூபோ மஞ்சே நிஸின்னோ பாதே³ பூ⁴மிதோ அமோசேத்வாவ நித்³தா³வஸேன நிபஜ்ஜதி, தஸ்ஸ அனாபத்தீ’’திஆதி³அட்ட²கதா²வசனம் (பாரா. அட்ட². 1.77) த³ஸ்ஸேத்வா ஏகப⁴ங்கே³ன நிபன்னாத³யோபி முச்சந்தீதி படிஸேதே⁴தி. அதா²யம் அத்தனோமதிம். பரோ ஸுத்தானுலோமந்தி ‘‘தோ³மனஸ்ஸம் பாஹம், தே³வானமிந்த³, து³விதே⁴ன வதா³மி ஸேவிதப்³ப³ம்பி அஸேவிதப்³ப³ம்பீதிஆதி³வசனேஹி (தீ³. நி. 2.360) ஸம்ஸந்த³னதோ ஸதா³ரபோஸே தோ³ஸோ தும்ஹாகம் நத்தி², தேன வுத்தம் ‘புத்ததா³ரஸ்ஸ ஸங்க³ஹோ’’’தி (கு². பா. 5.6; ஸு. நி. 265) பரவாதி³னா வுத்தே கிஞ்சாபி ஸகவாதீ³ ப³ஹுஸ்ஸுதோ ந ஹோதி, அத² கோ² ராக³ஸஹிதேனேவ அகுஸலேன ப⁴விதப்³ப³ந்தி படிக்கி²பதி. ஸேஸேஸுபி இமினா நயேன அஞ்ஞதா²பி அனுரூபதோ யோஜேதப்³ப³ம். இத³ம் ஸப்³ப³ம் உபதிஸ்ஸத்தே²ராத³யோ ஆஹு. த⁴ம்மஸிரித்தே²ரோ பன ‘‘ஏத்த² பரோதி வுத்தோ அஞ்ஞனிகாயிகோ, ஸோ பன அத்தனோ ஸுத்தாதீ³னியேவ ஆஹரதி. தானி ஸகவாதீ³ அத்தனோ ஸுத்தாதி³ம்ஹி ஓதாரேத்வா ஸசே ஸமேதி க³ண்ஹாதி, நோ சே படிக்கி²பதீ’’தி வத³தி.

சதுப்³பி³த⁴வினயகதா²வண்ணனா நிட்டி²தா.

பத³பா⁴ஜனீயவண்ணனா

ஸிக்கா²பத³விப⁴ங்கே³ பன கிஞ்சாபி யோ பனாதி அனவஸேஸபரியாதா³னபத³ம், ததா²பி பி⁴க்கூ²தி இமினா பரபதே³ன ஸமானாதி⁴கரணத்தா தத³னுரூபானேவஸ்ஸ விப⁴ங்க³பதா³னி வுத்தானி. பி⁴க்கு²னிப்³ப³சனபதா³னி தீணி கிஞ்சாபி ஸபி⁴க்கு²பா⁴வஸ்ஸ, அபி⁴க்கு²பா⁴வஸ்ஸ சாதி யஸ்ஸ கஸ்ஸசி பப்³ப³ஜிதஸ்ஸ ஸாதா⁴ரணானி, ததா²பி ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸா’’தி ஏவமாதி³ஸுத்தம் நிப்³ப³சனத்த²யுத்தோவ புக்³க³லோ ‘‘ஆபத்தி ஸங்கா⁴தி³ஸேஸேன து³க்கடஸ்ஸா’’தி (பாரா. 389) ஏத்த² வத்து², ந இதரோ கி³ஹிபூ⁴தோதி த³ஸ்ஸனத்த²ம் வுத்தம். ஸப்³ப³ஸ்ஸபி வினயபிடகஸ்ஸ ஸாதா⁴ரணம் பி⁴க்கு²லக்க²ணம் வத்து²ஞ்ஹி ப⁴க³வா ஆரபி⁴. யோ பன ஸுத்³தோ⁴ ஏவ ஸமானோ கேனசி காரணேன கி³ஹிலிங்கே³ டி²தோ, ஸோ அத்தனோ ஸபி⁴க்கு²பா⁴வத்தா ஏவ வத்து² ஹோதி, அஸுத்³தோ⁴பி பி⁴க்கு²லிங்கே³ டி²தத்தாதி அயமத்தோ² த³ஸ்ஸிதோ ஹோதி. அஸுத்³தோ⁴பி ஞாதகேஹி, பச்சத்தி²கேஹி வா ராஜப⁴யாதி³காரணேன வா காஸாவேஸு ஸஉஸ்ஸாஹோவ அபனீதகாஸாவோ வத்து² ஏவ புன காஸாவக்³க³ஹணேன தே²ய்யஸம்வாஸகபா⁴வானுபக³மனதோ, பி⁴க்கு²னிப்³ப³சனத்தே² அனிக்கி²த்தது⁴ரத்தாதி வுத்தம் ஹோதி. யோ பன லிங்க³த்தே²னகோ பி⁴க்கு²னிப்³ப³சனத்த²ம் ஸயஞ்ச அஜ்ஜு²பக³தோ, ஸம்வாஸம் தே²னேந்தோ, தஞ்சே ஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸாதி அயம்பி அத்தோ² த³ஸ்ஸிதோ ஹோதி.

‘‘ஸமஞ்ஞாய பி⁴க்கு² படிஞ்ஞாய பி⁴க்கூ²’’தி வசனத்³வயம் யதா²வுத்தஞ்ச அத்த²ம் உபப்³ரூஹேதி, அந்தரா உப்பன்னாய நியதாய மிச்சா²தி³ட்டி²யா உபச்சி²ன்னகுஸலமூலோ கேவலாய ஸமஞ்ஞாய, படிஞ்ஞாய ச ‘‘பி⁴க்கூ²’’தி வுச்சதி, ந பரமத்த²தோதி இமம் அதிரேகத்த²ம் தீ³பேதி. கிம் வுத்தம் ஹோதி? ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி, யம் ஏவம் மஹாஸாவஜ்ஜம் யத²யித³ம், பி⁴க்க²வே, மிச்சா²தி³ட்டி². மிச்சா²தி³ட்டி²பரமானி, பி⁴க்க²வே, மஹாவஜ்ஜானீ’’தி ஆஹச்சபா⁴ஸிதம் ஸங்கீ³தித்தயாருள்ஹம் ஸுத்தம், அட்ட²கதா²யம்பிஸ்ஸ ‘‘மிச்சா²தி³ட்டி²பரமா ஏதேஸந்தி மிச்சா²தி³ட்டி²பரமானீ’’தி (அ. நி. 1.310) வுத்தம். பஞ்ச ஆனந்தரியகம்மானி மஹாஸாவஜ்ஜானி, மிச்சா²தி³ட்டி² பன மஹாஸாவஜ்ஜதராதி அதி⁴ப்பாயோதி. கஸ்மா? தேஸஞ்ஹி பரிச்சே²தோ³ அத்தி², ஸப்³ப³ப³லவம்பி கப்பட்டி²திகமேவ ஹோதி, நியதமிச்சா²தி³ட்டி²யா பன பரிச்சே²தோ³ நத்தி², தாய ஸமன்னாக³தஸ்ஸ ப⁴வதோ வுட்டா²னம் நத்தி², தஸ்மா ‘‘இமஸ்ஸ பி⁴க்கு²கரணா குஸலா த⁴ம்மா ஸம்விஜ்ஜந்தீ’’தி வா ‘‘ஸுத்³தோ⁴வாய’’ந்தி வா ந ஸக்கா வத்தும். ‘‘தி³ட்டி²விபத்திபச்சயா த்³வே ஆபத்தியோ ஆபஜ்ஜதீ’’தி வுத்தத்தா ந ஸக்கா ‘‘அஸுத்³தோ⁴’’தி வா ‘‘அஞ்ஞதரம் பாராஜிகம் த⁴ம்மம் அஜ்ஜா²பன்னோ’’தி வா வத்தும். ஏஸ ஹி உபோ⁴பி பக்கே² ந ப⁴ஜதி, தேன வுத்தம் ‘‘ஸமஞ்ஞாய, படிஞ்ஞாய ச பி⁴க்கு², ந பரமத்த²தோ’’தி.

கிமத்த²ம் பனேவம் மஹாஸாவஜ்ஜாய நியதமிச்சா²தி³ட்டி²யா பாராஜிகம் ப⁴க³வா ந பஞ்ஞபேஸீதி? து³ப்³பி³ஜானத்தா. பகதியாபேஸா தி³ட்டி² நாம ‘‘ஸம்மா’’தி வா ‘‘மிச்சா²’’தி வா து³விஞ்ஞேய்யா, பகே³வ ‘‘நியதா’’தி வா ‘‘அனியதா’’தி வாதி. தத்த² பாராஜிகாபத்தியா பஞ்ஞத்தாய பி⁴க்கூ² அஞ்ஞமஞ்ஞம் அஸமதி³ட்டி²கம் பாராஜிகம் மஞ்ஞமானா உபோஸதா²தீ³னி அகத்வா அசிரேனேவ ஸாஸனம் வினாஸேய்யும், ஸயஞ்ச அபுஞ்ஞம் பஸவேய்யும் ஸுத்³தே⁴ஸுபி பி⁴க்கூ²ஸு விப்படிபத்தியா படிபஜ்ஜனேன. தஸ்மா உபாயகுஸலதாய பாராஜிகம் அபஞ்ஞாபேத்வா தஸ்ஸ உக்கே²பனீயகம்மம், ஸம்மாவத்தஞ்ச பஞ்ஞாபேத்வா தம் ஸங்கே⁴ன அஸம்போ⁴க³ம், அஸம்வாஸஞ்ச அகாஸி. ப⁴க³வா ஹி தஸ்ஸ சே ஏஸா தி³ட்டி² அனியதா, ஸம்மாவத்தம் பூரேத்வா ஓஸாரணம் லபி⁴த்வா பகதத்தோ ப⁴வேய்ய. நியதா சே, அட்டா²னமேதம் அனவகாஸோ, யம் ஸோ நியதமிச்சா²தி³ட்டி²கோ ஸம்மாவத்தம் பூரேத்வா ஓஸாரணம் லபி⁴த்வா பகதத்தோ ப⁴வேய்ய. கேவலம் ‘‘ஸமஞ்ஞாயபி⁴க்கு² படிஞ்ஞாயபி⁴க்கூ²’’தி நாமமத்ததா⁴ரகோ ஹுத்வா பரம் மரணா அரிட்டோ² விய ஸம்ஸாரகா²ணுகோவ ப⁴விஸ்ஸதீதி இமம் நயம் அத்³த³ஸ.

அட்ட²ஸு உபஸம்பதா³ஸு திஸ்ஸோவேத்த² வுத்தா, ந இதரா பாடிபுக்³க³லத்தா, பி⁴க்கூ²னம் அஸந்தகத்தா ச. தத்த² ஹி ஓவாத³படிக்³க³ஹணபஞ்ஹப்³யாகரணூபஸம்பதா³ த்³வின்னம் தே²ரானம் ஏவ, ஸேஸா திஸ்ஸோ பி⁴க்கு²னீனம் ஸந்தகாதி இத⁴ நாதி⁴ப்பேதா, திஸ்ஸன்னம்பி உபஸம்பதா³னம் மஜ்ஜே² ‘‘ப⁴த்³ரோ பி⁴க்கூ²’’திஆதீ³னி சத்தாரி பதா³னி வுத்தானி திஸ்ஸன்னம் ஸாதா⁴ரணத்தா. ஏஹிபி⁴க்கு²பா⁴வேன வா ஸரணக³மனஞத்திசதுத்தே²ன வா உபஸம்பன்னோ ஹி ப⁴த்³ரோ ச ஸாரோ ச ஸேக்கோ² ச அஸேக்கோ² ச ஹோதி, உபஸம்பத³வசனம் பன நேஸம் ஸாவகபா⁴வதீ³பனத்த²ம். இமே ஏவ ஹி ஆபத்திம் ஆபஜ்ஜந்தி, ந ஸம்மாஸம்பு³த்³தா⁴, பச்சேகபு³த்³தா⁴ ச.

அயம் இமஸ்மிம் அத்தே² அதி⁴ப்பேதோதி ஏத்த² ச ஆபத்திம் ஆபஜ்ஜிதும் ப⁴ப்³பா³ ஞத்திசதுத்தே²னேவ கம்மேன உபஸம்பன்னா. ந ஹி அஞ்ஞே ஏஹிபி⁴க்கு²ஸரணக³மனஓவாத³படிக்³க³ஹணபஞ்ஹப்³யாகரணாஹி உபஸம்பன்னா ஆபத்திம் ஆபஜ்ஜிதும் ப⁴ப்³பா³, தேனேதே படிக்கி²பித்வா ‘‘அயம் இமஸ்மிம் அத்தே² அதி⁴ப்பேதோ பி⁴க்கூ²’’தி அந்திமோவ வுத்தோதி கிர த⁴ம்மஸிரித்தே²ரோ, தம் அயுத்தம். ‘‘த்³வே புக்³க³லா அப⁴ப்³பா³ ஆபத்திம் ஆபஜ்ஜிதும் பு³த்³தா⁴ ச பச்சேகபு³த்³தா⁴ சா’’தி (பரி. 322) ஏத்தகமேவ வுத்தந்தி. அஞ்ஞதா² ஏஹிபி⁴க்கு²ஆத³யோபி வத்தப்³பா³ ஸியும். கிஞ்ச பி⁴ய்யோ ‘‘த்³வே புக்³க³லா ப⁴ப்³பா³ ஆபத்திம் ஆபஜ்ஜிதும் பி⁴க்கூ² ச பி⁴க்கு²னியோ சா’’தி ஸாமஞ்ஞேன வுத்தத்தா ச, அபிச ஆபத்திப⁴யட்டா²னத³ஸ்ஸனதோ ச. கத²ம்? ஆயஸ்மா ஸாரிபுத்தோ ஆவஸத²பிண்ட³ம் குக்குச்சாயந்தோ ந படிக்³க³ஹேஸி, சீவரவிப்பவாஸப⁴யா ச ஸப்³ப³ம் திசீவரம் க³ஹேத்வா நதி³ம் தரந்தோ மனம் வுள்ஹோ அஹோஸி மஹாகஸ்ஸபோ. கிஞ்ச ஸரணக³மனூபஸம்பதா³ய உபஸம்பன்னே ஆரப்³ப⁴ ஸத்³தி⁴விஹாரிகவத்தாதீ³னி அஸம்மாவத்தந்தானம் நேஸம் து³க்கடானி ச பஞ்ஞத்தானி தி³ஸ்ஸந்தி, தஸ்மா து³ப்³பி³சாரிதமேதம். அயம் இமஸ்மிம் அத்தே² அதி⁴ப்பேதோ பி⁴க்கூ²தி படிக்கி²த்தாய ஸரணக³மனூபஸம்பதா³ய அனுஞ்ஞாதப்பஸங்க³ப⁴யாதி உபதிஸ்ஸத்தே²ரோ, ஆபத்தியா ப⁴ப்³ப³தம் ஸந்தா⁴ய தஸ்மிம்பி வுத்தே புப்³பே³ படிக்கி²த்தாபி ஸா புன ஏவம் வத³ந்தேன அனுஞ்ஞாதாதி பி⁴க்கூ²னம் மிச்சா²கா³ஹோ வா விமதி வா உப்பஜ்ஜதி, தஸ்மா ந வுத்தாதி வுத்தம் ஹோதி, தம் ‘‘பி⁴க்கு²னீ நாம உப⁴தோஸங்கே⁴ உபஸம்பன்னா’’தி (பாசி. 161) இமினா ஸமேதி. இத³ஞ்ஹி ஸாகியாதீ³னம் அனுஞ்ஞாதஉபஸம்பதா³ய அனுப்பப³ந்த⁴ப⁴யா வுத்தம்.

அயம் பனேத்த² அம்ஹாகம் க²ந்தி – பி⁴க்கு²-பத³னித்³தே³ஸத்தா யத்தகானி தேன பதே³ன ஸங்க³ஹம் க³ச்ச²ந்தி, யே ச வினயபிடகே தத்த² தத்த² ஸந்தி³ஸ்ஸந்தி ஸயம் ஆபத்தாபஜ்ஜனட்டே²ன வா து³ட்டு²ல்லாரோசனபடிச்சா²த³னாதீ³ஸு பரேஸம் ஆபத்திகரணட்டே²ன வா, தே ஸப்³பே³பி த³ஸ்ஸேத்வா இதா³னி யதி³த³ம் தஸ்ஸ பி⁴க்கு²-பத³ஸ்ஸ விஸேஸனத்த²ம் வுத்தம் பரபத³ம் ‘‘ஸிக்கா²ஸாஜீவஸமாபன்னோ’’தி, தஸ்ஸ வஸேன இத³ம் வுத்தம் ‘‘அயம் இமஸ்மிம் அத்தே² அதி⁴ப்பேதோ பி⁴க்கூ²’’தி. ஸோ ஏவ ஹி கம்மவாசானந்தரமேவ ஸிக்கா²ஸாஜீவஸமாபன்னோ ஹோதி ததோ பட்டா²ய ஸஉத்³தே³ஸஸிக்கா²பதா³னம் உப்பத்தித³ஸ்ஸனதோ, தஸ்ஸேவ ச ஸிக்கா²பச்சக்கா²னம் தி³ஸ்ஸதி, நேதரஸ்ஸ. தஸ்ஸேவ ச ஸிக்கா²பச்சக்கா²னம் ஸம்ப⁴வதி ‘‘உல்லும்பது மம், ப⁴ந்தே, ஸங்கோ⁴ அனுகம்பம் உபாதா³யா’’தி (மஹாவ. 71, 126) வத்வா ஸமாதி³ன்னத்தா, தஸ்ஸேவ ச உபஸம்பன்னஸமனந்தரமேவ அகரணீயனிஸ்ஸயாசிக்க²னத³ஸ்ஸனதோ, வினயம் பாதிமோக்க²ம் உத்³தே³ஸம் பச்சக்கா²மீதிஆதி³ஸிக்கா²பச்சக்கா²னலக்க²ணபாரிபூரிதோ சாதி ஸிக்கா²பச்சக்கா²னம் உபாதா³ய ஸோ ஏவ இதா⁴தி⁴ப்பேதோதி வுத்தம் ஹோதி.

யஸ்மா பனஸ்ஸ ஸிக்கா²பச்சக்கா²னம் ஸப்³ப³தா² யுஜ்ஜதி, தஸ்மா ‘‘ஸிக்க²ம் பச்சக்கா²ய தம் தம் வத்து²ம் வீதிக்கமந்தஸ்ஸ ததோ ததோ ஆபத்திதோ அனாபத்தி, இதரஸ்ஸ ஆபத்தீ’’தி வத்தும் யுஜ்ஜதி, தஸ்மா ‘‘யத்த² யத்த² ஸாவஜ்ஜபஞ்ஞத்தி, அனவஜ்ஜபஞ்ஞத்தி வா, அயம் இமஸ்மிம் அத்தே² அதி⁴ப்பேதோ பி⁴க்கூ²தி வுச்சதி, தத்த² தத்த² தத³ஜ்ஜா²சாரத்தே²னாயமேவ ஞத்திசதுத்தே²ன உபஸம்பன்னோ அதி⁴ப்பேதோ நாமா’’தி வத்தும் யுஜ்ஜதீதி வேதி³தப்³ப³ம். ஏவம் ஸந்தே யம் வுத்தம் ‘‘யாய காயசி உபஸம்பதா³ய அயம் இமஸ்மிம் ‘மேது²னம் த⁴ம்மம் படிஸேவித்வா பாராஜிகோ ஹோதீ’தி அத்தே² பி⁴க்கூ²தி அதி⁴ப்பேதோ’’தி, தம்பி ந வத்தப்³ப³மேவ. கத²ம் ஹோதி? விரோத⁴தோ³ஸோபி பரிஹதோ ஹோதி. கத²ம்? ஸசே ஞத்திசதுத்தே²ன உபஸம்பன்னோ ஏவ இதா⁴தி⁴ப்பேதோ ‘‘பி⁴க்கூ²’’தி ச ‘‘உபஸம்பன்னோ’’தி ச, தேன ந உபஸம்பன்னோ அனுபஸம்பன்னோ நாமாதி கத்வா ஞத்திசதுத்த²கம்மதோ அஞ்ஞதா² உபஸம்பன்னா நாம மஹாகஸ்ஸபத்தே²ராத³யோ இதரேஸம் அனுபஸம்பன்னட்டா²னே ட²த்வா ஸஹஸேய்யபத³ஸோத⁴ம்மாபத்திம் ஜனேய்யும், ஓமஸனாதி³காலே ச து³க்கடமேவ ஜனேய்யுந்தி ஏவமாதி³கோ விரோத⁴தோ³ஸோ பரிஹதோ ஹோதீதி ஸப்³ப³ம் ஆசரியோ வத³தி. மங்கு³ரச்ச²வி நாம ஸாமோ.

யஸ்மா தே அதிமஹந்தோ ஜாதிமதோ³ சித்தம் பரியுட்டா²தி, தஸ்மா தும்ஹேஹி மம ஸாஸனே ஏவம் ஸிக்கி²தப்³ப³ம். ‘‘ஸாதஸஹக³தா பட²மஜ்ஜா²னஸுக²ஸஹக³தா அஸுபே⁴ ச ஆனாபானே சா’’தி க³ண்டி²பதே³ வுத்தம். உத்³து⁴மாதகஸஞ்ஞாதி உத்³து⁴மாதகனிமித்தே படிலத்³த⁴பட²மஜ்ஜா²னஸஞ்ஞா. ரூபஸஞ்ஞாதி பத²வீகஸிணாதி³ரூபாவசரஜ்ஜா²னஸஞ்ஞா. ஸோ தம் ப்³யாகாஸி ‘‘அவிபூ⁴தா, ப⁴ந்தே, உத்³து⁴மாதகஸஞ்ஞா அவட்³டி⁴தப்³ப³த்தா அஸுபா⁴னம், விபூ⁴தா, ப⁴ந்தே, ரூபஸஞ்ஞா வட்³டி⁴தப்³ப³த்தா கஸிணான’’ந்தி. பஞ்சஉபஸம்பத³க்கமோ மஹாவக்³கா³ க³ஹிதோ. ஞத்திசதுத்தே²னாதி ஏத்த² கிஞ்சாபி ஞத்தி ஸப்³ப³பட²மம் வுச்சதி, திஸ்ஸன்னம் பன அனுஸ்ஸாவனானம் அத்த²ப்³யஞ்ஜனபே⁴தா³பா⁴வதோ அத்த²ப்³யஞ்ஜனபி⁴ன்னா ஞத்திதாஸம் சதுத்தா²தி கத்வா ‘‘ஞத்திசதுத்த²’’ந்தி வுச்சதி. ப்³யஞ்ஜனானுரூபமேவ அட்ட²கதா²ய ‘‘தீஹி அனுஸ்ஸாவனாஹி ஏகாய ச ஞத்தியா’’தி வுத்தம், அத்த²பவத்திக்கமேன பதே³ன பன ‘‘ஏகாய ஞத்தியா தீஹி அனுஸ்ஸாவனாஹீ’’தி வத்தப்³ப³ம். யஸ்மா பனேத்த² ‘‘சத்தாரிமானி, பி⁴க்க²வே, கம்மானி (மஹாவ. 384), ச² இமானி, பி⁴க்க²வே, கம்மானி அத⁴ம்மகம்மம் வக்³க³கம்ம’’ந்தி (மஹாவ. 387) வசனதோ குப்பகம்மம்பி கத்த²சி ‘‘கம்ம’’ந்தி வுச்சதி தஸ்மா ‘‘அகுப்பேனா’’தி வுத்தம்.

யஸ்மா அகுப்பம்பி ஏகச்சம் ந டா²னாரஹம், யேன அப்பத்தோ ஓஸாரணம் ‘‘ஸோஸாரிதோ’’தி சம்பேய்யக்க²ந்த⁴கே (மஹாவ. 395 ஆத³யோ) வுச்சதி, தஸ்மா ‘‘டா²னாரஹேனா’’தி வுத்தம். யதி³ ஏவம் ‘‘டா²னாரஹேனா’’தி இத³மேவ பத³ம் வத்தப்³ப³ம், ந புப்³ப³பத³ம் இமினா அகுப்பஸித்³தி⁴தோதி சே? தம் ந, அட்டா²னாரஹேன அகுப்பேன உபஸம்பன்னோ இமஸ்மிம் அத்தே² அனதி⁴ப்பேதோதி அனிட்ட²ப்பஸங்க³தோ. த்³வீஹி பனேதேஹி ஏகதோ வுத்தேஹி அயமத்தோ² பஞ்ஞாயதி ‘‘கேவலம் தேன அகுப்பேன உபஸம்பன்னோ அயம்பி இமஸ்மிம் அத்தே² அதி⁴ப்பேதோ ‘பி⁴க்கூ²’தி, டா²னாரஹேன ச உபஸம்பன்னோ அயம்பி இமஸ்மிம் அத்தே² அதி⁴ப்பேதோ ‘பி⁴க்கூ²’தி, குப்பேன உபஸம்பன்னோ நாதி⁴ப்பேதோ’’தி. தேனாயம்பி அத்தோ² ஸாதி⁴தோ ஹோதி ‘‘யோ பன, பி⁴க்கு², ஜானம் ஊனவீஸதிவஸ்ஸம் புக்³க³லம் உபஸம்பாதே³ய்ய, ஸோ ச புக்³க³லோ அனுபஸம்பன்னோ’’தி (பாசி. 403) வசனதோ யாவ ந ஞாயதி, தாவ ஸமஞ்ஞாயபி⁴க்கு²படிஞ்ஞாயபி⁴க்கு²பா⁴வம் உபக³தோபி ந புப்³பே³ த³ஸ்ஸிதஸமஞ்ஞாயபி⁴க்கு²படிஞ்ஞாயபி⁴க்கு² விய அஞ்ஞேஸம் பி⁴க்கூ²னம் உபஸம்பன்னட்டா²னே ட²த்வா ஓமஸனபாசித்தியாதி³வத்து² ஹோதி, கேவலம் அனுபஸம்பன்னட்டா²னே ட²த்வா ‘‘அனுபஸம்பன்னே உபஸம்பன்னஸஞ்ஞீ பத³ஸோ த⁴ம்மம் வாசேதி, ஆபத்தி பாசித்தியஸ்ஸா’’திஆதி³ (பாசி. 47) ஆபத்திவத்து²மேவ ஹுத்வா திட்ட²தி. அகுப்பேன உபஸம்பன்னோ பன பச்சா² பாராஜிகோபி ஜாதிதோ உபஸம்பன்னட்டா²னே திட்ட²தீதி ‘‘பண்ட³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’திஆதி³னா (மஹாவ. 109) நயேன வுத்தேஸு பன வஜ்ஜனீயபுக்³க³லேஸு கோசி புக்³க³லோ ‘‘உபஸம்பன்னோ’’தி வுச்சதி, நோபி உபஸம்பன்னட்டா²னே திட்ட²தி, கோசி திட்ட²தீதி வேதி³தப்³ப³ம்.

ஏத்த² பன அத்தி² கம்மம் அகுப்பம் டா²னாரஹம், அத்தி² டா²னாரஹம் நாகுப்பம், அத்தி² அகுப்பஞ்சேவ ந டா²னாரஹஞ்ச, அத்தி² நாகுப்பம் ந ச டா²னாரஹந்தி இத³ம் சதுக்கம் வேதி³தப்³ப³ம். தத்த² பட²மம் தாவ வுத்தம், ததியசதுத்தா²னி பாகடானி. து³தியம் பரியாயேன பி⁴க்கு²னிஸங்க⁴தோ ஏகதோஉபஸம்பன்னாய லிங்க³பரிவத்தே ஸதி லப்³ப⁴தி. தஸ்ஸ ஹி புக்³க³லஸ்ஸ புப்³பே³ ஸிக்க²மானகாலே லத்³த⁴ம் ஞத்திசதுத்த²உபஸம்பதா³கம்மம் கிஞ்சாபி அகுப்பஞ்சேவ டா²னாரஹஞ்ச, புரிஸலிங்கே³ பன பாதுபூ⁴தே ‘‘அனுஜானாமி, பி⁴க்க²வே, தம்யேவ உபஜ்ஜ²ம் தமேவ உபஸம்பத³’’ந்தி (பாரா. 69) ஏத்த² அபரியாபன்னத்தா தஸ்ஸ புக்³க³லஸ்ஸ கேவலம் ஸாமணேரபா⁴வாபத்திதோ கம்மம் தா³னி குப்பம் ஜாதந்தி வுச்சதி. லிங்க³பரிவத்தேன சீவரஸ்ஸ அதி⁴ட்டா²னவிஜஹனம் விய தஸ்ஸ புக்³க³லஸ்ஸ பி⁴க்கு²னிஸங்கே⁴ன கதாய உபஸம்பதா³ய விஜஹனம் ஹோதீதி வேதி³தப்³ப³ம், அஞ்ஞதா² ஸோ புக்³க³லோ உபஸம்பன்னோ பி⁴க்கூ²தி ஆபஜ்ஜதி. அத² வா லிங்க³பரிவத்தே அஸதிபிதம் ஏகதோஉபஸம்பதா³கம்மம் குப்பதி, யதா²டா²னே ந திட்ட²தி. தஸ்மா ந தாவ ஸா ‘‘பி⁴க்கு²னீ’’தி ஸங்க்²யம் க³ச்ச²தி. யஸ்மா அஞ்ஞதரம் பாராஜிகம் த⁴ம்மம் ஆபஜ்ஜித்வாபி அனாபஜ்ஜித்வாபி உப்பப்³ப³ஜிதுகாமதாய கி³ஹிலிங்க³ம் ஸாதி³யந்தியா புனபி உபஸம்பதா³ உப⁴தோஸங்கே⁴ லப்³ப⁴தி, தஸ்மா தேன பரியாயேன ‘‘குப்பதீதி குப்ப’’ந்தி வுச்சதி, யதா²வுத்தகம்மதோ³ஸாபா⁴வதோ பன ‘‘டா²னாரஹ’’ந்தி. பி⁴க்கு²னீ பன கி³ஹிலிங்க³ம் ஸாதி³யந்திகாலே ந புரிஸலிங்க³பாதுபா⁴வே ஸதி பி⁴க்கூ²ஸு உபஸம்பத³ம் லப்³ப⁴தீதி ஸாத⁴கம் காரணம் ந தி³ஸ்ஸதி, ஸிக்க²ம் பச்சக்கா²ய உப்பப்³ப³ஜிதா சே, லப⁴தீதி ஏகே, தம் பனாயுத்தம் பி⁴க்கு²னியா ஸிக்கா²பச்சக்க²னாபா⁴வதோதி அம்ஹாகம் க²ந்தீதி ஆசரியோ. ‘‘யதா² ‘கத்தப்³ப³’ந்தி வுத்தம், ததா² அகதே குப்பதீதி கத்வா கரணம் ஸத்து²ஸாஸன’’ந்தி க³ண்டி²பதே³ வுத்தம். யத்த² யத்த² ‘‘க³ண்டி²பதே³’’தி வுச்சதி, தத்த² தத்த² ‘‘த⁴ம்மஸிரித்தே²ரஸ்ஸ க³ண்டி²பதே³’’தி க³ஹேதப்³ப³ம்.

ஸாஜீவபத³பா⁴ஜனீயவண்ணனா

‘‘மஹாபோ³தி⁴ஸத்தா நியதா’’தி வுத்தம் அனுக³ண்டி²பதே³. யத்த² ‘‘அனுக³ண்டி²பதே³’’தி, தத்த² ‘‘வஜிரபு³த்³தி⁴த்தே²ரஸ்ஸா’’தி க³ஹேதப்³ப³ம். ஸாவகபோ³தி⁴பச்சேகபோ³தி⁴ஸம்மாஸம்போ³தீ⁴தி வா தீஸு போ³தீ⁴ஸு ஸம்மாஸம்போ³தி⁴யம் ஸத்தா போ³தி⁴ஸத்தா மஹாபோ³தி⁴ஸத்தா நாம. பாதிமோக்க²ஸீலப³ஹுகத்தா, பி⁴க்கு²ஸீலத்தா, கிலேஸபித³ஹனவஸேன வத்தனதோ, உத்தமேன ப⁴க³வதா பஞ்ஞத்தத்தா ச அதி⁴கம், பு³த்³து⁴ப்பாதே³யேவ பவத்தனதோ உத்தமந்தி அஞ்ஞதரஸ்மிம் க³ண்டி²பதே³. கிஞ்சாபி பச்சேகபு³த்³தா⁴பி த⁴ம்மதாவஸேன பாதிமோக்க²ஸம்வரஸீலேன ஸமன்னாக³தாவ ஹோந்தி, ததா²பி ‘‘பு³த்³து⁴ப்பாதே³யேவ பவத்ததீ’’தி நியமிதம் தேன பரியாயேனாதி. தேனாஹ ‘‘ந ஹி தம் பஞ்ஞத்திம் உத்³த⁴ரித்வா’’திஆதி³. பாதிமோக்க²ஸம்வரதோபி ச மக்³க³ப²லஸம்பயுத்தமேவ ஸீலம் அதி⁴ஸீலம், தம் பன இத⁴ அனதி⁴ப்பேதம். ந ஹி தம் பாதிமோக்கு²த்³தே³ஸேன ஸங்க³ஹிதந்தி. ஸமந்தப⁴த்³ரகம் காரணவசனம் ஸப்³ப³ஸிக்கா²பதா³னம் ஸாதா⁴ரணலக்க²ணத்தா இமிஸ்ஸா அனுபஞ்ஞத்தியா அரியபுக்³க³லா ச ஏகச்சம் ஆபத்திம் ஆபஜ்ஜந்தீதி ஸாதி⁴தமேதம், தஸ்மா ‘‘ந ஹி தம் ஸமாபன்னோ மேது²னம் த⁴ம்மம் படிஸேவதீ’’தி அட்ட²கதா²வசனம் அஸமத்த²ம் விய தி³ஸ்ஸதீதி? நாஸமத்த²ம், ஸமத்த²மேவ யஸ்மிம் யஸ்மிம் ஸிக்கா²பதே³ ஸாஸா விசாரணா, தஸ்ஸ தஸ்ஸேவ வஸேன அட்ட²கதா²ய பவத்திதோ. ததா² ஹி கங்கா²விதரணியம் (கங்கா². அட்ட². நிதா³னவண்ணனா) உத³குக்கே²பஸீமாதி⁴காரே ‘‘திமண்ட³லம் படிச்சா²தே³த்வா அந்தரவாஸகம் அனுக்கி²பித்வா உத்தரந்தியா பி⁴க்கு²னியா’’தி வுத்தம் பி⁴க்கு²னிவிப⁴ங்கே³ ஆக³தத்தா. ஏஸேவ நயோ அஞ்ஞேபி ஏவரூபேஸு. கிமத்த²ந்தி சே தம்? பாளிக்கமானுவத்தனேன பாளிக்கமத³ஸ்ஸனத்த²ம். தத்ரித³ம் ஸமாஸதோ அதி⁴ப்பாயதீ³பனம் – பத³ஸோத⁴ம்மஸிக்கா²பத³ஸ்ஸ திகபரிச்சே²தே³ உபஸம்பன்னே உபஸம்பன்னஸஞ்ஞீ, அனாபத்தி, அகடானுத⁴ம்மஸிக்கா²பத³வஸேன உபஸம்பன்னே உக்கி²த்தகே ஸியா ஆபத்தி, ததா² ஸஹஸேய்யஸிக்கா²பதே³தி ஏவமாதி³. அத்தோ² பனேத்த² பரதோ ஆவி ப⁴விஸ்ஸதி.

யம் வுத்தம் அட்ட²கதா²யம் ‘‘ததோபி ச மக்³க³ப²லசித்தமேவ அதி⁴சித்தம், தம் பன இத⁴ அனதி⁴ப்பேத’’ந்தி ச, ‘‘ததோபி ச மக்³க³ப²லபஞ்ஞாவ அதி⁴பஞ்ஞா, ஸா பன இத⁴ அனதி⁴ப்பேதா. ந ஹி தம்ஸமாபன்னோ பி⁴க்கு² மேது²னம் த⁴ம்மம் படிஸேவதீ’’தி. ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி இமாய பாளியா விருஜ்ஜ²தி. அயஞ்ஹி பாளி அதி⁴ஸீலஸிக்கா²வ இத⁴ அதி⁴ப்பேதா, ந இதராதி தீ³பேதி. அட்ட²கதா²வசனம் தாஸம்பி திண்ணம் லோகியானம் அதி⁴ப்பேததம் தீ³பேதி. அயம் பனேத்த² அட்ட²கதா²தி⁴ப்பாயோ – திஸ்ஸோபி லோகியா ஸிக்கா² இமஸ்மிம் பட²மபாராஜிகே ஸம்ப⁴வந்தி, காலேனாபி அதி⁴சித்தபஞ்ஞாலாபீ⁴ பி⁴க்கு² ததா²ரூபம் அஸப்பாயம் பச்சயம் படிச்ச ததோ ததோ அதி⁴சித்ததோ, அதி⁴பஞ்ஞாதோ ச ஆவத்தித்வா ஸீலபே⁴த³ம் பாபுணேய்யாதி டா²னமேதம் விஜ்ஜதி, ந லோகுத்தரசித்தபஞ்ஞாலாபீ⁴, அயம் நயோ இதரேஸுபி ஸப்³பே³ஸு அதி³ன்னாதா³னாதீ³ஸு ஸசித்தகேஸு லப்³ப⁴தி, அசித்தகேஸு பன இதரோபி. ததா²பி கேவலம் வினயபிடகஸ்ஸ, பாதிமோக்க²ஸீலஸ்ஸ ச ஸங்கா³ஹகத்தா ‘‘ஸிக்க²ம் அப்பச்சக்கா²யா’’தி இமஸ்மிம் உத்தரபதே³ பச்சக்கா²னாரஹா அதி⁴ஸீலஸிக்கா²வ லோகியாதி த³ஸ்ஸனத்த²ம் பாளியம் ‘‘தத்ர யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி வுத்தந்தி வேதி³தப்³ப³ம்.

ஏத்த² ஸிக்கா²தி காயவசீது³ச்சரிததோ விரதீ ச சேதனா ச, அஞ்ஞத்ர சேதனாயேவ வேதி³தப்³பா³. ஸிக்கா²பத³ந்தி ஸஉத்³தே³ஸஸிக்கா²பத³ம், ஏகச்சம் அனுத்³தே³ஸஸிக்கா²பத³ஞ்ச லப்³ப⁴தி. சித்தஸ்ஸ அதி⁴கரணம் கத்வாதி தஸ்மிம் ஸிக்க²தீதி அதி⁴கரணத்தே² பு⁴ம்மந்தி த³ஸ்ஸனத்த²ம் வுத்தம். யதா²ஸிக்கா²பத³ந்தி பச்சவேக்க²ணவஸேன வுத்தம். ஸீலபச்சவேக்க²ணாபி ஹி ஸீலமேவ, தஸ்மா ஸுப்படிச்ச²ன்னாதி³சாரித்தேஸு விரதிவிப்பயுத்தசேதனம் பவத்தேந்தோபி ஸிக்க²ம் பரிபூரேந்தோத்வேவ ஸங்க்²யம் க³ச்ச²தி. ‘‘ஸம்பஜானமுஸாவாதே³ பாசித்திய’’ந்தி (பாசி. 2) வுத்தமரியாத³ம் அவீதிக்கமந்தோ ‘‘தஸ்மிஞ்ச ஸிக்கா²பதே³ ஸிக்க²தீ’’தி வுச்சதி. அஞ்ஞதரஸ்மிம் பன க³ண்டி²பதே³ வுத்தம் ‘‘ஸிக்கா²தி தம் ஸிக்கா²பத³ம் ஸிக்க²னபா⁴வேன பவத்தசித்துப்பாதோ³. ஸாஜீவந்தி பஞ்ஞத்தி. தத³த்த²த³ஸ்ஸனத்த²ம் புப்³பே³ மேது²னஸம்வரஸ்ஸேதம் அதி⁴வசன’’ந்தி. யஸ்மா ஸிக்கா²ய கு³ணஸம்மதாய புஞ்ஞஸம்மதாய தந்தியா அபா⁴வதோ லோகஸ்ஸ து³ப்³ப³ல்யாவிகம்மம் தத்த² ந ஸம்ப⁴வதி. பத்த²னீயா ஹி ஸா, தஸ்மா ‘‘யஞ்ச ஸாஜீவம் ஸமாபன்னோ, தத்த² து³ப்³ப³ல்யம் அனாவிகத்வா’’தி வுத்தம். ஆணாய ஹி து³ப்³ப³ல்யம் ஸம்ப⁴வதீதி ஆயஸ்மா உபதிஸ்ஸோ.

ஸிக்கா²பச்சக்கா²னகதா²வண்ணனா

ஏத்த² யாமீதி அமுகஸ்மிம் தித்தா²யதனே, க⁴ராதி³ம்ஹி வா. பா⁴வவிகப்பாகாரேனாதி ‘‘அஹம் அஸ்ஸ’’ந்தி ஆக³தத்தா யம் யம் ப⁴விதுகாமோ, தஸ்ஸ தஸ்ஸ பா⁴வஸ்ஸ விகப்பாகாரேன, பி⁴க்கு²பா⁴வதோ அஞ்ஞபா⁴வவிகப்பாகாரேனாதி அதி⁴ப்பாயோ.

46. ஹந்தா³தி வசஸாயேவ. கி³ஹிபா⁴வம் பத்த²யமானோதிஆதி³பதே³ஹி சித்தனியமம் த³ஸ்ஸேதி. ஏகேனேவ சித்தேன ஸிக்கா²பச்சக்கா²னம் ஹோதி, ந தத³பா⁴வேனாதி.

51. பு³த்³த⁴ம் த⁴ம்மந்திஆதி³பதே³ஹி கே²த்தனியமம் த³ஸ்ஸேதி. தத்த² ஆதி³தோ சுத்³த³ஸஹி பதே³ஹி ஸபா⁴வபரிச்சாகோ³, பச்சி²மேஹி அட்ட²ஹி பா⁴வந்தராதா³னஞ்ச த³ஸ்ஸிதம் ஹோதி. பச்சக்கா²மி தா⁴ரேஹீதி ஏதேஹி காலனியமம் த³ஸ்ஸேதி. வத³தீதி இமினா பதே³ன பயோக³னியமம் த³ஸ்ஸேதி. விஞ்ஞாபேதீதி இமினா விஜானனனியமம் த³ஸ்ஸேதி. உம்மத்தகோ ஸிக்க²ம் பச்சக்கா²தி, உம்மத்தகஸ்ஸ ஸந்திகே ஸிக்க²ம் பச்சக்கா²தீதிஆதீ³ஹி புக்³க³லனியமம் த³ஸ்ஸேதி. அரியகேன மிலக்க²ஸ்ஸ ஸந்திகே ஸிக்க²ம் பச்சக்கா²தீதிஆதீ³ஹி பன புக்³க³லாதி³னியமேபி ஸதி விஜானனனியமாஸம்ப⁴வம் த³ஸ்ஸேதி. தத்த² ‘‘யாய மிலக்க²பா⁴ஸாய காலனியமோ நத்தி², தாயபி பா⁴ஸாய காலனியமத்த²தீ³பனே ஸதி ஸிக்கா²பச்சக்கா²னம் ருஹதீதி நோ மதீ’’தி ஆசரியோ. த³வாயாதிஆதீ³ஹி கே²த்தாதி³னியமே ஸதிபி சித்தனியமாபா⁴வேன ந ருஹதீதி த³ஸ்ஸேதி. ஸாவேதுகாமோ ந ஸாவேதீதி சித்தனியமேபி ஸதி பயோக³னியமாபா⁴வேன ந ருஹதீதி த³ஸ்ஸேதி. அவிஞ்ஞுஸ்ஸஸாவேதி, விஞ்ஞுஸ்ஸ ந ஸாவேதீதி சித்தகே²த்தகாலபயோக³புக்³க³லவிஜானனனியமேபி ஸதி யம் புக்³க³லம் உத்³தி³ஸ்ஸ ஸாவேதி, தஸ்ஸேவ ஸவனே ந ருஹதி, ந அஞ்ஞஸ்ஸாதி த³ஸ்ஸனத்த²ம் வுத்தம், தேன வுத்தம் அட்ட²கதா²யம் ‘‘யதி³ அயமேவ ஜானாதூதி ஏகம் நியமேத்வா ஆரோசேதி, தஞ்சே ஸோ ஏவ ஜானாதி, பச்சக்கா²தா ஹோதி ஸிக்கா². அத² ஸோ ந ஜானாதி…பே… அப்பச்சக்கா²தா ஹோதி ஸிக்கா²’’தி. ஸப்³ப³ஸோ வா பன ந ஸாவேதி, அப்பச்சக்கா² ஹோதி ஸிக்கா²தி சித்தாதி³னியமேனேவ ஸிக்கா² பச்சக்கா²தா ஹோதி, ந அஞ்ஞதா²தி த³ஸ்ஸனத்த²ம் வுத்தம். ஏத்தாவதா ‘‘ஸிக்கா²…பே… து³ப்³ப³ல்யம் அனாவிகத்வா’’தி பத³ஸ்ஸ பத³பா⁴ஜனம் தீஹி ஆகாரேஹி த³ஸ்ஸிதம் ஹோதி. தத்த² த்³வே அமிஸ்ஸா, பச்சி²மோ ஏகோ மிஸ்ஸோதி வேதி³தப்³போ³. தேனேவ வசீபே⁴தே³னாதி தத³த்த²தீ³பனமத்தம் வசனம் ஸுத்வாவ தேனேவ வசீபே⁴தே³ன ஜானாபேதீதி அத்தோ². சித்தஸம்பயுத்தந்தி பச்சக்கா²துகாமதாசித்தஸம்பயுத்தம். ஸமயஞ்ஞூ நாம தத³தி⁴ப்பாயஜானனமத்தேன ஹோதி.

53. வண்ணபட்டா²னம் பு³த்³த⁴கு³ணதீ³பகம் ஸுத்தம். உபாலிக³ஹபதினா வுத்தா கிர உபாலிகா³தா². பஞ்ஞாணம் ஸஞ்ஞாணந்தி அத்த²தோ ஏகம், தஸ்மா போ³தி⁴பஞ்ஞாணந்தி போ³தி⁴ஸஞ்ஞாணம், போ³தி⁴பீ³ஜந்தி வுத்தம் ஹோதி.

த்³வின்னம்பி நியமேத்வாதி ஏத்த² ‘‘த்³வீஸுபி ஜானந்தேஸு ஏவ பச்சக்கா²மீதி அதி⁴ப்பாயேன வுத்தே தேஸு ஏகோ சே ஜானாதி, ந பச்சக்கா²தா ஹோதீ’’தி அஞ்ஞதரஸ்மிம்பி க³ண்டி²பதே³ வுத்தம், தம் அட்ட²கதா²ய ந ஸமேதி. ‘‘கி³ஹீ ஹோமீ’’தி வா ‘‘கி³ஹிம்ஹீ’’தி வா வுத்தே கிஞ்சாபி வத்தமானவசனம் ஹோதி. ‘‘தா⁴ரேஹீ’’தி அத்தா²பா⁴வா ச ‘‘தா⁴ரேஹீ’’தி வுத்தே ச பரஸ்ஸுபரி க³ச்ச²தி, தஸ்மா ந ஹோதி. ஸந்தி³ட்டி²கம் த⁴ம்மந்தி ஸப்³ப³த்த² த⁴ம்மவசனம் வுத்தம் யம் ஸந்தா⁴ய ‘‘ஸந்தி³ட்டி²க’’ந்தி வத³தி, தம் பகாஸேதும். அஞ்ஞதா² ‘‘விஜிதவிஜயம் பச்சக்கா²மீ’’தி வுத்தே சக்கவத்திஆதீ³ஸுபி தப்பஸங்க³தோ பு³த்³த⁴ஸத்³தோ³பி அவஸானே வத்தப்³போ³ ப⁴வேய்ய. ஆசரியவேவசனேஸு பன யோ மம் பப்³பா³ஜேஸீதிஆதி³ உபஜ்ஜ²ம் அக்³க³ஹேத்வா, பரம் வா உத்³தி³ஸ்ஸ பப்³ப³ஜிதம் ஸந்தா⁴ய வுத்தந்தி. ஓகல்லகோதி கபணாதி⁴வசனம். மோளிப³த்³தோ⁴தி ஸிகா²ப³த்³தோ⁴, ஓமுக்கமகுடோ வா. சேல்லகோ அதே²ரோ. சேடகோ மஜ்ஜி²மோ. மோளிக³ல்லோ மஹாஸாமணேரோ. மனுஸ்ஸவிக்³க³ஹனாகா³தீ³னம் நாக³ரூபாதீ³னம் வா ஸந்திகே, பா⁴ஸாஜானனகின்னராதீ³னம் வா. ‘‘தே³வதா நாம மஹாபஞ்ஞா’’தி கிர பாடோ². த³வாயாதி ஸஹஸா. ரவாப⁴ஞ்ஞேனாதி க²லிதப⁴ஞ்ஞேன. அக்க²ரஸமயானஞ்ஹி நாபி⁴ஞ்ஞாதாய வா கரணானம் அவிஸத³தாய வா ஹோதி ரவாப⁴ஞ்ஞம். அவிதே⁴ய்யிந்த்³ரியதாய ‘‘போத்த²கரூபஸதி³ஸஸ்ஸா’’தி வுத்தம், க³ருமேத⁴ஸ்ஸ மந்த³பஞ்ஞஸ்ஸ. கித்தாவதா பன க³ருமேதோ⁴ ஹோதீதி சே? ஸமயே அகோவித³தாய.

ஸிக்கா²பச்சக்கா²னகதா²வண்ணனா நிட்டி²தா.

மூலபஞ்ஞத்திகதா²வண்ணனா

55. ‘‘படிஸேவதினாமா’’தி பத³ம் மாதிகாயம் நத்தி², தஸ்மா ‘‘படிஸேவேய்யாதி ஏத்தா²’’திஆதி³மாஹ. ‘‘ஏஸோ மேது²னத⁴ம்மோ நாமா’’தி ஸப்³ப³பாளிபோத்த²கேஸு, அட்ட²கதா²யம் ‘‘ஏஸோ வுச்சதி மேது²னத⁴ம்மோ நாமா’’தி உத்³த⁴டா. இத்தி²யா நிமித்தேன அத்தனோ நிமித்தந்தி து³விஞ்ஞேய்யமேதம் த³ஸ்ஸிதம். அத்தனோ நிமித்தேன இத்தி²யா நிமித்தம் ஸுவிஞ்ஞேய்யத்தா ந த³ஸ்ஸிதம். சத்தாரி டா²னானி முஞ்சித்வாதி ஏத்த² அப்³ப⁴ந்தரதலம் சு²பந்தம்யேவ ஸந்தா⁴ய வுத்தம், அச்சு²பந்தம் நீஹரந்தஸ்ஸ அனாபத்தி. மஜ்ஜ²ந்தி அக்³க³ப்பதே³ஸம். உபரிபா⁴க³மஜ்ஜ²ந்தி உபரிபா⁴க³ஸ்ஸ அக்³க³ப்பதே³ஸம். நட்ட²காயப்பஸாத³ந்தி ஏத்த² உபஹதிந்த்³ரியஸ்ஸ ஆபத்திஸம்ப⁴வதோ இதா⁴பி ஆபத்தீதி சே? நேதி த³ஸ்ஸனத்த²ம் ‘‘மதசம்மம் வா’’திஆதி³ வுத்தம். மதசம்மஞ்ஹி அனுபாதி³ன்னம், உபாதி³ன்னே ஏவ பாராஜிகாபத்தி. அபிதா⁴ய அப்படிச்சா²தே³த்வா. யதா² த³ந்தா ந தி³ஸ்ஸந்தி, ததா² பிதா⁴யேவ நிஸீதி³தப்³ப³ந்தி அதி⁴ப்பாயோ.

கோ³னஸோதி கோ³ணபிட்டி²கோ மண்ட³லஸப்போ, யஸ்ஸ பிட்டே² லோஹிதகானி மண்ட³லானி தி³ஸ்ஸந்தி. கலலபரிசயவாரிசாரமச்ச²க்³க³ஹணேன கிஞ்சாபி ஸமுத்³தே³ மஹாமுகா² ஹத்தி²ஸரீரம்பி ஏகப்பஹாரேன கி³லிதும் ஸமத்தா² ததோ மஹந்ததரா ச க³ஹிதா ஹோந்தி, தேஸம் முகா²தீ³ஸு மேது²னத⁴ம்மோ ந ஸம்ப⁴வதீதி தத்த² டா²னபரிச்சே²தோ³ நத்தீ²தி ஏகே, விசாரேத்வா க³ஹேதப்³ப³ம். ஏதமேவ ஹீதி அனந்தரம் ஸந்தா⁴ய. ஸத்³தி⁴ம் யோஜனாய அக்க²ரயோஜனாய. ‘‘பஞ்ஞத்தம் பன ஸிக்கா²பத³ம் ஸப்³பே³ஹிபி லஜ்ஜீபுக்³க³லேஹி ஸமம் ஸிக்கி²தப்³ப³பா⁴வதோ ஸமஸிக்க²தா நாமாதி வுத்தத்தா ஸப்³ப³ஸிக்கா²பத³ம் ஸப்³ப³பி⁴க்கூ²ஹி ஸிக்கி²தப்³ப³ம். ந ஹி கஸ்ஸசி ஊனமதி⁴கம் வா அத்தீ²’’தி தஸ்ஸ க³ண்டி²பதே³ வுத்தம். பரிவாரே பன –

‘‘ந உக்கி²த்தகோ ந ச பன பாரிவாஸிகோ,

ந ஸங்க⁴பி⁴ன்னோ ந ச பன பக்க²ஸங்கந்தோ;

ஸமானஸம்வாஸகபூ⁴மியா டி²தோ,

கத²ம் நு ஸிக்கா²ய அஸாதா⁴ரணோ ஸியா’’தி. (பரி. 479) –

வுத்தம். தத³ட்ட²கதா²ய ச ‘‘அயம் பஞ்ஹா நஹாபிதபுப்³ப³கம் ஸந்தா⁴ய வுத்தா. அயஞ்ஹி கு²ரப⁴ண்ட³ம் பரிஹரிதும் ந லப⁴தி, அஞ்ஞே லப⁴ந்தி. தஸ்மா ஸிக்கா²ய அஸாதா⁴ரணோ’’தி வுத்தம். தம் ஸப்³ப³ம் யதா² ஸம்ஸந்த³தி ஸமேதி, ததா² வேதி³தப்³ப³ம். பி⁴க்கு²னீனம்யேவ ஸாதா⁴ரணானி ஸிக்கா²பதா³னிபி பி⁴க்கு² ஸிக்க²தி, ஏவமஞ்ஞோபி அன்ஹாபிதபுப்³ப³கோ பி⁴க்கு² தம் ஸிக்கா²பத³ம் ஸிக்க²தி ஏவ தத³த்த²கோஸல்லத்த²ந்தி கத்வா ஸப்³ப³ம்பி ஸிக்கா²பத³ம் ஸமஸிக்க²தா நாமாதி. யம் தம் வுத்தந்தி ஸம்ப³ந்தோ⁴. ‘‘திஸ்ஸோ இத்தி²யோ’’திஆதி³விப⁴ங்கோ³தம்னியாமகோதிலக்க²ணத்தா வத்து²னியமனத்த²ம் வுத்தம். தேன அமனுஸ்ஸித்தி²ப்பஸங்கே³ன கதே ஸுவண்ணரஜதாதி³மயே படிக்கி²பதி. இதோ பட்டா²ய யே ச ‘‘தயோ அத்த²வஸே படிச்ச விப⁴ங்கோ³ பவத்ததீ’’தி புப்³பே³ வுத்தா, தே யதா²ஸம்ப⁴வம் யோஜேத்வா வேதி³தப்³பா³.

பட²மசதுக்ககதா²வண்ணனா

57. ஆபத்தி பாராஜிகா அஸ்ஸ ஹோதீதி ஏத்த² யஸ்மா ஸா அகுஸலா ஆபத்தி தஸ்ஸ பி⁴க்கு²னோ ஸீலஸம்ப⁴வம் அபி⁴ப⁴வதி, ராகா³பி⁴ப⁴வே தஸ்மிம் பாராஜிகாதி லத்³த⁴னாமா புப்³ப³பா⁴கே³ ஆபன்னா து³க்கடது²ல்லச்சயாத³யோ ஆபத்தியோ அபி⁴ப⁴வித்வா வினாஸேத்வா ஸயமேவேகா அஸ்ஸ. வத்து²னா ஸபா⁴கா³ஹி வா அஸபா⁴கா³ஹி வா அஞ்ஞாஹி பாராஜிகத்தேன ஸமானஜாதிகாஹி ஆபத்தீஹி ஸயம் நாபி⁴ப⁴வீயதீதி ஏகே. தம் தம் புப்³பே³ விசாரிதமேவ. யதா³ பன சதஸ்ஸோபி பாராஜிகாபத்தியோ ஏகதோ ஹோந்தி, ததா³ தா தஸ்ஸ பி⁴க்கு²னோ பி⁴க்கு²பா⁴வம் அபி⁴ப⁴வந்தி, அபி⁴க்கு²ம் கரோந்தி, அனுபஸம்பன்னம் கரோந்தி, ஸமஞ்ஞாயபி பி⁴க்கு² ந ஹோதி. ஓமஸவாத³பாசித்தியம் ந ஜனேதீதி ஏகே. து³தியேன அத்த²விகப்பேன பாராஜிகஸ்ஸ த⁴ம்மஸ்ஸ பத்தி ஸம்பத்தி ஆபத்தீதி அத்தோ² ஸங்க³ஹிதோ ஹோதீதி கத்வா ஆபத்திஸம்பத்திவாதீ³னம் ஸங்க³ஹிதோ ஹோதி, யுஜ்ஜதி சேஸா பரஸாபேக்கா². ஸாபத்திகோ நாம ஸோ பி⁴க்கு² ஹோதி, அஞ்ஞதா² தஸ்ஸ க²ணப⁴ங்கே³ன அனாபத்திகோ ப⁴வேய்ய, ந ச ஹோதீதி. கதா³ பன ஹோதீதி? யதா³ காலம் கரோதி, யதா³ ச ஸிக்க²ம் பச்சக்கா²ய ஸாமணேராதி³பூ⁴மியம் திட்ட²தி. யதி³ ஏவம் ஸிக்கா²ய பச்சக்கா²தாய பாராஜிகாபத்தி பச்சக்கா²தா ஹோதி ஸிக்கா² சாதி உப⁴யம் தஸ்ஸ ஏகதோ அத்தி², ஸங்கா⁴தி³ஸேஸாதி³ஆபத்தி ஸிக்கா²பச்சக்கா²னேன கிம் ந பச்சக்கா²தா, புன உபஸம்பன்னேன தே³ஸாபேதப்³பா³. ஸிக்கா²பச்சக்கா²னம் ஆபத்திவுட்டா²னம் ஜாதம், அபி⁴க்கு² ஆபத்திதோ வுட்டா²தி, க³ஹட்டோ² வுட்டா²தி, ஸாமணேரோ வுட்டா²தி, ததோ வினயவிரோதா⁴ ந வுட்டா²தி. ஹஞ்சி பன வுட்டா²தி க³ஹட்டோ², ஸாமணேரோ வா ஸீலஸம்பன்னோவ ஜா²னலாபீ⁴ அஸ்ஸ, ஸோதாபத்திப²லஸ்ஸ வா அரஹத்தப²லஸ்ஸ வா லாபீ⁴ அஸ்ஸ, பாராஜிகாபத்தியா ஸாபத்திகோ அரஹா அஸ்ஸ. உக்கி²த்தகோ உப்பப்³ப³ஜிதோ வா பரிவாஸாரஹோ மானத்தாரஹோ உப்பப்³ப³ஜிதோ வா ஸீலஸம்பன்னோ ஜா²னலாபீ⁴ அஸ்ஸ, ஸோதாபத்திப²லஸ்ஸ, அரஹத்தப²லஸ்ஸ வா லாபீ⁴ அஸ்ஸ, ஸாபத்திகோ ஸந்தராயிகோ அரஹா அஸ்ஸ, ஸோ புன உபஸம்பன்னோ பரிவாஸம், மானத்தம் வா த³த்வா அப்³பே⁴தப்³போ³ உக்கி²த்தகோ ஓஸாரேதப்³போ³தி ஸமானோ அயம் உபலப்³போ⁴தி.

அயம் பனேத்த² வினிச்ச²யோ – பாராஜிகம் த⁴ம்மம் ஆபன்னோ யாவ பி⁴க்கு²பா⁴வம் படிஜானாதி ஸாதி³யதி ஸம்வாஸம், ஸந்தராயிகத்தா உபோஸத²தி³வஸாதீ³ஸு க³ஹட்ட²ஸ்ஸ விய ஸயமேவ ஸீலம் ஸமாதி³யந்தஸ்ஸபி ந ஸீலஸமாதா³னம் ருஹதி, பகே³வ ஜா²னாதீ³னி. ஸோ சே பி⁴க்கு²பா⁴வம் ந ஸாதி³யதி ந படிஜானாதி ஸம்வாஸம் ந ஸாதி³யதி, கேவலம் பி⁴க்கூ²னம் ஆவிகத்வா ராஜவேரிசோராதி³ப⁴யேன காஸாவம் ந பரிச்சஜதி, அனுபஸம்பன்னோவ ஹோதி ஸஹஸேய்யாதி³ம் ஜனேதி, ஸீலஸ்ஸ ச ஜா²னாதீ³னஞ்ச பா⁴கீ³ ஹோதி. வுத்தஞ்ஹேதம் ப⁴க³வதா –

‘‘ஆபன்னேன விஸுத்³தா⁴பேக்கே²ன ஸந்தீ ஆபத்தி ஆவிகாதப்³பா³, ஆவிகதா ஹிஸ்ஸ பா²ஸு ஹோதி, பட²மஸ்ஸ ஜா²னஸ்ஸ அதி⁴க³மாயா’’திஆதி³ (மஹாவ. 134-135).

தத்த² ஸந்தீ ஆபத்தீதி ஸாவஸேஸானவஸேஸப்பபே⁴தா³ ஸப்³பா³பி ஆபத்தி ஆபன்னா அதி⁴ப்பேதா. ஏவம் ஸந்தேபி பகே³வ க³ஹட்டா²தி³பூ⁴மியம் டி²தோ ஜா²னாதீ³னம் பா⁴கீ³ அஸ்ஸ ஸுத்³த⁴ந்தே டி²தத்தா, யோ பன உக்கி²த்தகோ அனோஸாரிதோ, க³ருத⁴ம்மம் வா ஆபஜ்ஜித்வா அவுட்டி²தோ ஸிக்க²ம் பச்சக்கா²ய க³ஹட்டா²தி³பூ⁴மியம் டி²தோ, ந ஸோ ஜா²னாதீ³னம் பா⁴கீ³யேவ ப⁴வதி ந ஸுத்³த⁴ந்தே டி²தத்தா, ஸகரணீயத்தா ச, தேனேவ ப⁴க³வதா ‘‘ஸோ புன உபஸம்பன்னோ ஓஸாரேதப்³போ³’’தி வுத்தம், தஸ்மா தஸ்ஸ புக்³க³லஸ்ஸ தே பி⁴க்கு²காலே ஆபன்னா அந்தராயிகா த⁴ம்மா விப்படிஸாரம் ஜனயித்வா அவிப்படிஸாரமூலகானம் பாமோஜ்ஜாதீ³னம் ஸம்ப⁴வம் நிவாரேந்தி, நோ ஸகாஸாவேஸுயேவ. நோ சே நிவாரேந்தி, ஸம்ப⁴வதி. க³ருகம் ஆபஜ்ஜித்வா பி⁴க்கூ²னம் ஆவிகத்வா சே உப்பப்³ப³ஜிதோ, பகதத்தோ ஹுத்வா உப்பப்³ப³ஜிதோதி கத்வா ஜா²னாதீ³னம் பா⁴கீ³ அஸ்ஸ ‘‘ஆவிகதா ஹிஸ்ஸ பா²ஸு ஹோதீ’’தி வுத்தத்தா. பகே³வ பி⁴க்கு²காலே, ந த்வேவ உக்கி²த்தகோ ஸகரணீயத்தாதி ஏகே. தத³னுவத்தனகோ பன தம் லத்³தி⁴ம் பஹாய பா⁴கீ³ அஸ்ஸ. ந, பி⁴க்க²வே, ஸக³ஹட்டா²ய பரிஸாய (மஹாவ. 154) ஸிக்கா²பச்சக்கா²தகஸ்ஸ அந்திமவத்து²ம் அஜ்ஜா²பன்னகஸ்ஸ நிஸின்னபரிஸாயாதி (மஹாவ. 183) ஏத்த² க³ஹட்டோ² நாம பகதியா கி³ஹிலிங்கே³ டி²தோ. ஸிக்க²ம் பச்சக்கா²ய பி⁴க்கு²லிங்கே³ டி²தோ ஸிக்கா²பச்சக்கா²தகோ. ஸோ ஸகாஸாவேஸு ஸாபேக்க²த்தா ஸாமணேரபா⁴வம் பத்த²யமானோ தேனேவ லிங்கே³ன தீஹி ஸரணக³மனேஹி ஸாமணேரோ ஹோதி. அந்திமவத்து²ம் அஜ்ஜா²பன்னோ ஸம்வாஸம் ஸாதி³யந்தோபி பச்சா² புப்³பே³ வுத்தக்கமேன அஸாதி³யித்வா ஸாமணேரபா⁴வம் பத்த²யமானோ ஸிக்கா²பச்சக்கா²தகோ விய தீஹி ஸரணக³மனேஹி ஸாமணேரோ ஹோதி, ந புன காஸாவம் படிக்³கா³ஹாபேதப்³போ³ பி⁴க்கூ²ஹி பட²மம் தி³ன்னலிங்கே³யேவ டி²தத்தா. யோ பன பாராஜிகோ சோதி³யமானோ பராஜித்வா ‘‘ஹந்த³, ப⁴ந்தே, ஸாமணேரோ ப⁴வாமி, ஸரணானி தே³தா²’’தி வத³தி, ‘‘ஸாது⁴ க³ண்ஹாஹீ’’தி ந வத்தப்³போ³, கி³ஹிலிங்கே³ ட²பேத்வா புன காஸாயானி படிக்³கா³ஹாபேத்வா பப்³பா³ஜேதப்³போ³. ‘‘இத³ம் பன ஸப்³ப³ம் அத்தனோ மதியா வுத்தத்தா விசாரேத்வா க³ஹேதப்³ப³’’ந்தி ஆசரியோ வத³தி. பவேஸனம் நாம அங்க³ஜாதம் பவேஸேந்தஸ்ஸ அங்க³ஜாதேன ஸம்பு²ஸனம். பவிட்ட²ம் நாம யாவ மூலா பவேஸேந்தஸ்ஸ விப்பகதகாலே வாயாமகாலோ. ஸுக்கவிஸ்ஸட்டி²ஸமயே அங்க³ஜாதம் டி²தம் நாம. உத்³த⁴ரணம் நாம நீஹரணகாலோ. க³ண்டி²பதே³ பன ‘‘வாயாமதோ ஓரமித்வா டா²னம் டி²தம் நாமா’’தி வுத்தம், தம் அஸங்கரதோ த³ஸ்ஸனத்த²ம் வுத்தம். பவேஸனபவிட்ட²உத்³த⁴ரணகாலேஸுபி ஸுக்கவிஸ்ஸட்டி² ஹோதியேவ.

பட²மசதுக்ககதா²வண்ணனா நிட்டி²தா.

ஏகூனஸத்ததித்³விஸதசதுக்ககதா²வண்ணனா

59-60. ‘‘மதம் யேபு⁴ய்யேன அக்கா²யித’’ந்தி வசனதோ அமதம் யேபு⁴ய்யேன கா²யிதம்பி பாராஜிகவத்து²மேவாதி த³ஸ்ஸேதி. ஸப்³ப³ஸோ கா²யிதம், உப்பாடிதம் வா து²ல்லச்சயவத்து²மேவாதி த³ஸ்ஸேதி, ததா² ‘‘யேபு⁴ய்யேன கா²யித’’ந்தி வசனதோ மதம் ஸப்³ப³கா²யிதம், உப்பாடிதம் வா து³க்கடவத்தூ²தி த³ஸ்ஸேதி. ந ச ஸாவஸேஸம் பஞ்ஞபேந்தி. கிம் காரணா? இத³ஞ்ஹி ஸிக்கா²பத³ம் லோகவஜ்ஜம், ந பண்ணத்திவஜ்ஜம். தத்த² ஸிக்கா²பத³ந்தி பாராஜிகம் அதி⁴ப்பேதம். தத்த² து²ல்லச்சயம்பி ஹி லோகவஜ்ஜம், ந பண்ணத்திவஜ்ஜம். அத² வா உப⁴யம்பி அனவஸேஸம் பஞ்ஞத்தம். பாராஜிககே²த்தே ஹி ஹேட்டி²மகோடிம் பாபேத்வா ட²பிதே ததோ பரம் து²ல்லச்சயந்தி பஞ்ஞத்தமேவ ஹோதி. தத்த² து²ல்லச்சயகே²த்தம்பி பாராஜிககே²த்தம் விய ஹேட்டி²மபரிச்சே²தே³ன வுத்தந்தி வேதி³தப்³ப³ம். உபட்³ட⁴க்கா²யிதே து²ல்லச்சயந்தி யத்த² நிமித்தம் கா²யிதம், தம் து³க்கடவத்தூ²தி வேதி³தப்³ப³ம். ஏத்தா²ஹ – பண்ணத்திவஜ்ஜம் கிம் ஸாவஸேஸமேவ ப⁴க³வா பஞ்ஞாபேதீதி? ந. ஏகம்ஸதோ பன யதா²ஸம்ப⁴வம் தத்த² தத்த² பகாஸயிஸ்ஸாம, கிமத்த²ம் பன ப⁴க³வா உபட்³ட⁴க்கா²யிதே பாராஜிகம் ந பஞ்ஞாபேஸீதி அயம் தாவ அபுச்சா² பு³த்³த⁴விஸயத்தா வினயபஞ்ஞத்தியா. இத³ம் பனேத்த² காரணபதிரூபகம் ‘‘உபட்³ட⁴பா⁴வஸ்ஸ து³ப்³பி³னிச்ச²யத்தா’’தி. யேபு⁴ய்யேன கா²யிதம் நாம வச்சமக்³க³பஸ்ஸாவமக்³க³முகா²னம் சதூஸு கோட்டா²ஸேஸு த்³வே கோட்டா²ஸே அதிக்கம்ம யாவ ததியகோட்டா²ஸபரியோஸானா கா²தி³தம், ததியகோட்டா²ஸம் அதிக்கம்ம யாவ சதுத்த²கோட்டா²ஸபரியோஸானா து³க்கடவத்து².

யதி³பி நிமித்தம் ஸப்³ப³ஸோ கா²யிதந்தி ‘‘ஜீவமானகஸரீரம்யேவ ஸந்தா⁴ய வுத்த’’ந்தி வத³ந்தி, தம் வீமம்ஸித்வா க³ஹேதப்³ப³ம். அல்லஸரீரேதி அபி⁴னவே, அகுதி²தே வா மனுஸ்ஸானம் ஜீவமானஸரீரே அக்கி²னாஸாதீ³ஸு து²ல்லச்சயமேவ. திரச்சா²னக³தானம் ஹத்தி²அஸ்ஸாதீ³னம் நாஸாய வத்தி²கோஸே ச து²ல்லச்சயந்தி ‘‘அமக்³கே³ன அமக்³க³ம் பவேஸேதி, ஆபத்தி து²ல்லச்சயஸ்ஸா’’தி இமாய பாளியா அத்த²விஸேஸேனேத்த² வுத்தம். உபகச்ச²காதீ³ஸு து³க்கடம், ஸப்³பே³ஸம்பி திரச்சா²னக³தானம் அக்கி²கண்ணவணேஸு து³க்கடம், அவஸேஸஸரீரேபி து³க்கடமேவாதி இத³ம் வினீதவத்து²ஸ்மிம் ‘‘ஏஹி, ப⁴ந்தே, மேது²னம் த⁴ம்மம் படிஸேவா’’தி. ‘‘அலம் ப⁴கி³னி நேதம் கப்பதீ’’தி (பாரா. 79) இமினா தாவ மேது²னராகா³பா⁴வோ த³ஸ்ஸிதோ ஹோதி. ‘‘ஏஹி, ப⁴ந்தே, ஊருந்தரிகாய க⁴ட்டேஹி…பே… ஸோ பி⁴க்கு² ததா² அகாஸீ’’தி இமினா தாவ மோசனஸ்ஸாதோ³ த³ஸ்ஸிதோ ஹோதி, தேனேவாஹ ப⁴க³வா ‘‘ஆபத்தி ஸங்கா⁴தி³ஸேஸஸ்ஸா’’தி. ‘‘யோ பன மேது²னராகே³ன ஊருந்தரிகாய க⁴ட்டேதி, தஸ்ஸ து³க்கட’’ந்தி ஸித்³த⁴ந்தி கத்வா வுத்தம்.

மனுஸ்ஸானம் அக்கி²கண்ணவணாதி³ து²ல்லச்சயவத்து², திரச்சா²னக³தானம் து³க்கடவத்தூ²தி ஏத்த² து³விஞ்ஞேய்யோ பாளிலேஸோ, தஸ்மா ‘‘ந ச, பி⁴க்க²வே, ரத்தசித்தேன அங்க³ஜாதம் சு²பிதப்³ப³ம், யோ சு²பேய்ய, ஆபத்தி து²ல்லச்சயஸ்ஸா’’தி வசனதோ ரத்தசித்தேன அக்கி²கண்ணவணம் சு²பந்தஸ்ஸ து³க்கடந்தி ஸித்³த⁴ந்தி அயம் சம்மக்க²ந்த⁴கே பாளிலேஸோதி வேதி³தப்³போ³. ‘‘ஜீவமானகபுரிஸஸ்ஸாதி ஜீவமானகஸத்³தோ³ மதே வத்தப்³ப³மேவ நத்தீ²தி ஞாபனத்த²ம் வுத்தோ’’தி வத³ந்தி. மஹாஅட்ட²கதா²யம் பனாதி இத³ம் கிஞ்சாபி ‘‘கத்வா மஹாஅட்ட²கத²ம் ஸரீர’’ந்தி வுத்தம், அத² கோ² ஸேஸஅட்ட²கதா²ஸு ‘‘மேது²னராகே³ன முகே²னா’’தி வசனாபா⁴வதோ தத்தே²வ பா⁴வதோ தம் வசனம் பாளிவசனேன ஸம்ஸந்தி³த்வா த³ஸ்ஸனத்த²ம் வுத்தம். அனுக³ண்டி²பதே³ பன ‘‘தம் ஸப்³ப³ம்பீதி மஹாஅட்ட²கதா²யமேவ மேது²னராகே³ன இத்தி²யா நிமித்தம் அப்பவேஸேந்தோ சு²பதி, து²ல்லச்சய’’ந்தி ச வுத்தம். ‘‘மேது²னராகே³ன முகே²னா’’திபி கத்த²சி, பாளியம் அவிஸேஸேன ‘‘ந ச, பி⁴க்க²வே, ரத்தசித்தேன அங்க³ஜாதம் சு²பிதப்³ப³’’ந்தி வுத்தம், தஸ்மா ‘‘தம் ஸப்³ப³’’ந்தி வுத்தம். புரிமம் பஸம்ஸந்தீதி திரச்சா²னக³தி…பே… வுத்தனயேனேவ து²ல்லச்சயம், காயஸம்ஸக்³க³ராகே³ன து³க்கடந்திஆதி³அட்ட²கதா²வசனேஹி ஸம்ஸந்த³னதோ. ‘‘தம் ஸப்³ப³ம்பி…பே… புரிமம் பஸம்ஸந்தீ’’தி இத³ம் ஸங்கீ³திதோ பச்சா² ஸீஹளதீ³பகேஹி ஆசரியேஹி பாளியா, அட்ட²கதா²யஞ்ச வுத்தவசனம் ஸம்ஸந்தி³த்வா வுத்தவினிச்ச²யோதி வுத்தம். ஏத்த² இதரதா² ஹீதி பகதிமுகே²ன. கஸ்மா து³க்கடந்தி சே? ‘‘அங்கு³லிபீ³ஜாதீ³னி பவேஸேந்தஸ்ஸ து³க்கட’’ந்தி வுத்தத்தா யுத்தம். திரச்சா²னக³தித்தி²யா பஸ்ஸாவமக்³க³ந்தி ஏத்த² மஹாஅட்ட²கதா²யம்பி புப்³பே³ ‘‘நிமித்த’’ந்தி வத்வா ஏத்த² ‘‘பஸ்ஸாவமக்³க³’’ந்தி வுத்தத்தா அவஸேஸனிமித்தே து³க்கடந்தி யுத்தம் விய தி³ஸ்ஸதி. வுத்தனயேனேவாதி மேது²னராகே³ன. து²ல்லச்சயந்தி ச க²ந்த⁴கே பஸ்ஸாவனிமித்தவஸேனேவாக³தத்தா உபபரிக்கி²த்வா க³ஹேதப்³ப³ம்.

ஏகூனஸத்ததித்³விஸதசதுக்ககதா²வண்ணனா நிட்டி²தா.

ஸந்த²தசதுக்கபே⁴த³ககதா²வண்ணனா

61-2. இத்தி²னிமித்தம் கா²ணும் கத்வாதி இத்தி²னிமித்தஸ்ஸ அந்தோ கா²ணும் பவேஸேத்வா ஸமதலம் வா கத்வா அதிரித்தம் வா கா²ணும் க⁴ட்டேந்தஸ்ஸ து³க்கடம் பவேஸாபா⁴வா. ஈஸகம் அந்தோ பவேஸேத்வா டி²தம் கா²ணுமேவ சே அங்க³ஜாதேன சு²பதி, பாராஜிகம். ‘‘உப்பலக³ந்தா⁴ உப்பலபா⁴வா’’திபி தீ³பவாஸினோ பட²ந்தி கிர. ஸுத்தம் பி⁴க்கு²ம்ஹீதி ஸேவனசித்தம் உபட்டி²தேதி (பாரா. 57) ஏத்த² விய. ‘‘ஸுத்தபி⁴க்கு²ம்ஹீ’’தி ச பட²ந்தி, தம் உஜுகமேவ.

ஸந்த²தசதுக்கபே⁴த³ககதா²வண்ணனா நிட்டி²தா.

பத³பா⁴ஜனீயவண்ணனா நிட்டி²தா.

பகிண்ணககதா²வண்ணனா

பகிண்ணகே யானி ஸிக்கா²பதா³னி ‘‘கிரியானீ’’தி வுச்சந்தி, தேஸம் வஸேன காயோ, வாசா ச ஸஹ விஞ்ஞத்தியா வேதி³தப்³பா³. அகிரியானம் வஸேன வினா விஞ்ஞத்தியா வேதி³தப்³பா³, சித்தம் பனேத்த² அப்பமாணம் பூ⁴தாரோசனஸமுட்டா²னஸ்ஸ கிரியத்தா, அசித்தகத்தா ச. தத்த² கிரியா ஆபத்தியா அனந்தரசித்தஸமுட்டா²னா வேதி³தப்³பா³. அவிஞ்ஞத்திஜனகம்பி ஏகச்சம் பா³ஹுல்லனயேன ‘‘கிரிய’’ந்தி வுச்சதி, யத²யித³ம் பட²மபாராஜிகம் விஞ்ஞத்தியா அபா⁴வேபி ‘‘ஸோ சே ஸாதி³யதி, ஆபத்தி பாராஜிகஸ்ஸா’’தி ஹி வுத்தம் ‘‘ந ஸாதி³யதி அனாபத்தீ’’தி ச. விஞ்ஞத்திஸங்கா²தாபி கிரியா வினா ஸேவனசித்தேன ந ஹோதி சித்தஜத்தா, விகாரரூபத்தா, சித்தானுபரிவத்திகத்தா ச. தஸ்மா கிரியாஸங்கா²தமித³ம் விஞ்ஞத்திரூபம் இதரம் சித்தஜரூபம் விய ஜனகசித்தேன வினா ந திட்ட²தி, இதரம் ஸத்³தா³யதனம் திட்ட²தி, தஸ்மா கிரியாய ஸதி ஏகந்ததோ தஜ்ஜனகம் ஸேவனசித்தம் அத்தி²யேவாதி கத்வா ந ஸாதி³யதி அனாபத்தீதி ந யுஜ்ஜதி. யஸ்மா விஞ்ஞத்திஜனகம்பி ஸமானம் ஸேவனசித்தம் ந ஸப்³ப³காலம் விஞ்ஞத்திம் ஜனேதி, தஸ்மா வினாபி விஞ்ஞத்தியா ஸயம் உப்பஜ்ஜதீதி கத்வா ‘‘ஸாதி³யதி, ஆபத்தி பாராஜிகஸ்ஸா’’தி வுத்தம். நுப்பஜ்ஜதி சே, ந ஸாதி³யதி நாம, தஸ்ஸ அனாபத்தி, தேனேவ ப⁴க³வா ‘‘கிம்சித்தோ த்வம் பி⁴க்கூ²’’தி சித்தேனேவ ஆபத்திம் பரிச்சி²ந்த³தி, ந கிரியாயாதி வேதி³தப்³ப³ம். ஏத்தாவதா ச² ஆபத்திஸமுட்டா²னானி, தானி ஏவ ஆபத்திகரா த⁴ம்மா நாமாதி ச, சதூஹாகாரேஹி ஆபத்திம் ஆபஜ்ஜதி காயேன வாசாய காயவாசாஹி கம்மவாசாய ஆபஜ்ஜதீதி ச ஏதானி ஸுத்தபதா³னி அவிரோதி⁴தானி ஹோந்தி, அஞ்ஞதா² விரோதி⁴தானி. கத²ம்? யஞ்ஹி ஆபத்திம் கம்மவாசாய ஆபஜ்ஜதி, ந தத்த² காயாத³யோதி ஆபன்னம், ததோ கம்மவாசாய ஸத்³தி⁴ம் ஆபத்திகரா த⁴ம்மா ஸத்தாதி ஆபஜ்ஜதி, அத² தத்தா²பி காயாத³யோ ஏகதோ வா நானாதோ வா லப்³ப⁴ந்தி. ‘‘சதூஹி ஆகாரேஹீ’’தி ந யுஜ்ஜதி, ‘‘தீஹாகாரேஹி ஆபத்திம் ஆபஜ்ஜதீ’’தி வத்தப்³ப³ம் ஸியாதி ஏவம் விரோதி⁴தானி ஹோந்தி. கத²ம் அவிரோதி⁴தானீதி? ஸவிஞ்ஞத்திகாவிஞ்ஞத்திகபே⁴த³பி⁴ன்னத்தா காயாதீ³னம். யா கிரியா ஆபத்தி, தம் ஏகச்சம் காயேன ஸவிஞ்ஞத்திகேன ஆபஜ்ஜதி, ஏகச்சம் ஸவிஞ்ஞத்தியா வாசாய, ஏகச்சம் ஸவிஞ்ஞத்திகாஹி காயவாசாஹி ஆபஜ்ஜதி. யா பன அகிரியா ஆபத்தி, தம் ஏகச்சம் கம்மவாசாய ஆபஜ்ஜதி, தஞ்ச கோ² அவஸிட்டா²ஹி அவிஞ்ஞத்திகாஹி காயவாசாஹியேவ, ந வினா ‘‘நோ சே காயேன வாசாய படினிஸ்ஸஜ்ஜதி, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸா’’தி (பாரா. 414, 421) வசனதோ. அவிஸேஸேன வா ஏகச்சம் ஆபத்திம் காயேன ஆபஜ்ஜதி, ஏகச்சம் வாசாய, ஏகச்சம் காயவாசாஹி. யம் பனேத்த² காயவாசாஹி, தம் ஏகச்சம் கேவலாஹி காயவாசாஹி ஆபஜ்ஜதி, ஏகச்சம் கம்மவாசாய ஆபஜ்ஜதீதி அயமத்தோ² வேதி³தப்³போ³தி ஏவம் அவிரோதி⁴தானி ஹோந்தி.

தத்ராயம் ஸமாஸதோ அத்த²விபா⁴வனா – காயேன ஆபஜ்ஜதீதி காயேன ஸவிஞ்ஞத்திகேன அகத்தப்³ப³ம் கத்வா ஏகச்சம் ஆபஜ்ஜதி, அவிஞ்ஞத்திகேன கத்தப்³ப³ம் அகத்வா ஆபஜ்ஜதி, தது³ப⁴யம்பி காயகம்மம் நாம. அகதம்பி ஹி லோகே ‘‘கத’’ந்தி வுச்சதி ‘‘இத³ம் து³க்கடம் மயா, யம் மயா புஞ்ஞம் ந கத’’ந்தி ஏவமாதீ³ஸு, ஸாஸனே ச ‘‘இத³ம் தே, ஆவுஸோ ஆனந்த³, து³க்கடம், யம் த்வம் ப⁴க³வந்தம் ந புச்சீ²’’திஆதீ³ஸு (சூளவ. 443), ஏவமித⁴ வினயபரியாயே காயேன அகரணீயம்பி ‘‘காயகம்ம’’ந்தி வுச்சதி, அயமேவ நயோ வாசாய ஆபஜ்ஜதீதிஆதீ³ஸு. தத்த² ஸமுட்டா²னக்³க³ஹணம் கத்தப்³ப³தோ வா அகத்தப்³ப³தோ வா காயாதி³பே⁴தா³பேக்க²மேவ ஆபத்திம் ஆபஜ்ஜதி, ந அஞ்ஞதா²தி த³ஸ்ஸனத்த²ம். கிரியாக்³க³ஹணம் காயாதீ³னம் ஸவிஞ்ஞத்திகாவிஞ்ஞத்திகபே⁴த³த³ஸ்ஸனத்த²ம். ஸஞ்ஞாக்³க³ஹணம் ஆபத்தியா அங்கா³னங்க³சித்தவிஸேஸத³ஸ்ஸனத்த²ம், தேன யம் சித்தம் கிரியாலக்க²ணே, அகிரியாலக்க²ணே வா ஸன்னிஹிதம், யதோ வா கிரியா வா அகிரியா வா ஹோதி, ந தம் அவிஸேஸேன ஆபத்தியா அங்க³ம் வா அனங்க³ம் வா ஹோதி, கிந்து யாய ஸஞ்ஞாய ‘‘ஸஞ்ஞாவிமோக்க²’’ந்தி வுச்சதி, தாய ஸம்பயுத்தம் சித்தம் அங்க³ம், இதரம் அனங்க³ந்தி த³ஸ்ஸிதம் ஹோதி. இதா³னி யேன சித்தேன ஸிக்கா²பத³ம் ஸசித்தகம் ஹோதி, யத³பா⁴வா அசித்தகம், தேன தஸ்ஸ அவிஸேஸேன ஸாவஜ்ஜத்தா லோகவஜ்ஜபா⁴வோவ வுச்சதி, கிந்து ஸாவஜ்ஜம்யேவ ஸமானம் ஏகச்சம் லோகவஜ்ஜம் ஏகச்சம் பண்ணத்திவஜ்ஜந்தி த³ஸ்ஸனத்த²ம் லோகவஜ்ஜக்³க³ஹணம். சித்தமேவ யஸ்மா ‘‘லோகவஜ்ஜ’’ந்தி வுச்சதி, தஸ்மா மனோகம்மம்பி ஸியா ஆபத்தீதி அனிட்ட²ப்பஸங்க³னிவாரணத்த²ம் கம்மக்³க³ஹணம். யம் பனேத்த² அகிரியாலக்க²ணம் கம்மம், தம் குஸலத்திகவினிமுத்தம் ஸியாதி அனிட்ட²ப்பஸங்க³னிவாரணத்த²ம் குஸலத்திகக்³க³ஹணம். யா பனேத்த² அப்³யாகதா ஆபத்தி, தம் ஏகச்சம் அவேத³னம்பி ஸஞ்ஞாவேத³யிதனிரோத⁴ஸமாபன்னோ ஆபஜ்ஜதீதி கத்வா வேத³னாத்திகம் ஏத்த² ந லப்³ப⁴தீதி அனிட்ட²ப்பஸங்க³னிவாரணத்த²ம் வேத³னாத்திகக்³க³ஹணம் கதந்தி வேதி³தப்³ப³ம். ஸிக்கா²பத³ஞ்ஹி ஸசித்தகபுக்³க³லவஸேன ‘‘திசித்தம் திவேத³ன’’ந்தி லத்³த⁴வோஹாரம் அசித்தகேனாபன்னம்பி ‘‘திசித்தம் திவேத³ன’’மிச்சேவ வுச்சதி. தத்ரித³ம் ஸுத்தம் ‘‘அத்தா²பத்தி அசித்தகோ ஆபஜ்ஜதி அசித்தகோ வுட்டா²தி (பரி. 324). அத்தா²பத்தி குஸலசித்தோ ஆபஜ்ஜதி குஸலசித்தோ வுட்டா²தீ’’திஆதி³ (பரி. 470). அனுக³ண்டி²பதே³ பன ‘‘ஸஞ்ஞா ஸதா³ அனாபத்திமேவ கரோதி, சித்தம் ஆபத்திமேவ, அசித்தகம் நாம வத்து²அவிஜானனம், நோஸஞ்ஞாவிமோக்க²ம் வீதிக்கமஜானனம், இத³மேதேஸம் நானத்த’’ந்தி வுத்தம்.

ஸப்³ப³ஸங்கா³ஹகவஸேனாதி ஸப்³ப³ஸிக்கா²பதா³னம் ஸங்க³ஹவஸேன. பி⁴க்கு²னியா சீவரதா³னாதி³ கிரியாகிரியதோ. ஜாதரூபரஜதபடிக்³க³ஹணாதி³ ஸியா கிரியதோ. உபனிக்கி²த்தாபடிக்கே²பே ஸியா அகிரியதோ. தே³ஸிதவத்து²கபமாணாதிக்கந்தகுடிகரணே ஸியா கிரியதோ, அதே³ஸிதவத்து²கபமாணாதிக்கந்தகரணே ஸியா கிரியாகிரியதோ. யம் சித்தங்க³ம் லப⁴தியேவாதி காயசித்தம் வாசாசித்தந்தி ஏவம். வினாபி சித்தேனாதி ஏத்த² வினாபி சித்தேன ஸஹாபி சித்தேனாதி அதி⁴ப்பாயோ. யோ ஸோ ஸவிஞ்ஞத்திகோ, அவிஞ்ஞத்திகோ ச வுத்தோ காயோ, தஸ்ஸ கம்மம் காயகம்மம், ததா² வசீகம்மம். தத்த² ஸவிஞ்ஞத்திகோ காயோ உப்பத்தியா கம்மம் ஸாதே⁴தி, இதரோ அனுப்பத்தியா. ததா² வாசாதி வேதி³தப்³ப³ம், ஸிக்கா²பத³ந்தி ‘‘யோ தத்த² நாமகாயோ பத³காயோ’’தி வசனதோ வீதிக்கமே யுஜ்ஜதீதி வுத்தம். ‘‘ஹஸிதுப்பாத³வோட்ட²ப்³ப³னானிபி ஆபத்திஸமுட்டா²பகசித்தானி. இத³ம்பி ந மயா பரிச்சி²ன்னந்தி ஹஸமானோ பஸ்ஸதி யதா³, ததா³ வோட்ட²ப்³ப³னம் ஜவனக³திக’’ந்தி அனுக³ண்டி²பதே³ வுத்தம். அபி⁴ஞ்ஞாசித்தானி பஞ்ஞத்திம் அஜானித்வா இத்³தி⁴விகுப்³ப³னாதி³காலே க³ஹேதப்³பா³னி.

ஏத்த² பன யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ…பே… மேது²னம் த⁴ம்மம் படிஸேவந்தோ அத்தி² கோசி பாராஜிகோ ஹோதி அஸம்வாஸோ, அத்தி² கோசி ந பாராஜிகோ ஹோதி அஸம்வாஸோ. து³க்கடது²ல்லச்சயவத்தூ²ஸு படிஸேவந்தோ அத்தி² கோசி ந பாராஜிகோ. பக்க²பண்ட³கோ அபண்ட³கபக்கே² உபஸம்பன்னோ பண்ட³கபக்கே² மேது²னம் த⁴ம்மம் படிஸேவந்தோ ஸோ பாராஜிகம் ஆபத்திம் நாபஜ்ஜதீதி ந பாராஜிகோ நாம. ந ஹி அபி⁴க்கு²னோ ஆபத்தி நாம அத்தி². ஸோ அனாபத்திகத்தா அபண்ட³கபக்கே² ஆக³தோ கிம் அஸம்வாஸோ ஹோதி ந ஹோதீதி? ஹோதி, ‘‘அப⁴ப்³போ³ தேன ஸரீரப³ந்த⁴னேனா’’தி (பாரா. 55; மஹாவ. 129) ஹி வுத்தம். ‘‘யோ பன, பி⁴க்கு², பி⁴க்கூ²னம்…பே… அஸம்வாஸோ’’தி (பாரா. 44) வுத்தத்தா யோ பன பி⁴க்கு²பா⁴வேன மேது²னம் த⁴ம்மம் படிஸேவதி, ஸோ ஏவ அப⁴ப்³போ³. நாயம் அபாராஜிகத்தாதி சே? ந, ‘‘ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³’’தி (மஹாவ. 86) வுத்தட்டா²னே யதா² அபி⁴க்கு²னா கம்மவாசாய ஸாவிதாயபி கம்மம் ருஹதி கம்மவிபத்தியா அஸம்ப⁴வதோ, ஏவம்ஸம்பத³மித³ம் த³ட்ட²ப்³ப³ம். தத்ரித³ம் யுத்தி – உபஸம்பன்னபுப்³போ³ ஏவ சே கம்மவாசம் ஸாவேதி, ஸங்கோ⁴ ச தஸ்மிம் உபஸம்பன்னஸஞ்ஞீ, ஏவஞ்சே கம்மம் ருஹதி, ந அஞ்ஞதா²தி நோ க²ந்தீதி ஆசரியோ. க³ஹட்டோ² வா தித்தி²யோ வா பண்ட³கோ வா அனுபஸம்பன்னஸஞ்ஞீ கம்மவாசம் ஸாவேதி, ஸங்கே⁴ன கம்மவாசா ந வுத்தா ஹோதி, ‘‘ஸங்கோ⁴ உபஸம்பாதே³ய்ய, ஸங்கோ⁴ உபஸம்பாதே³தி, உபஸம்பன்னோ ஸங்கே⁴னா’’தி (மஹாவ. 127) ஹி வசனதோ ஸங்கே⁴ன கம்மவாசாய வத்தப்³பா³ய ஸங்க⁴பரியாபன்னேன, ஸங்க⁴பரியாபன்னஸஞ்ஞிதேன வா ஏகேன வுத்தா ஸங்கே⁴ன வுத்தாவ ஹோதீதி வேதி³தப்³போ³, அயமேவ ஸப்³ப³கம்மேஸு யுத்தி. ததா² அத்தி² மேது²னம் த⁴ம்மம் படிஸேவந்தோ கோசி நாஸேதப்³போ³ ‘‘யோ பி⁴க்கு²னீதூ³ஸகோ, அயம் நாஸேதப்³போ³’’தி வுத்தத்தா ஏவ, ஸோ அனுபஸம்பன்னோவ, ஸஹஸேய்யாபத்திஆதி³ம் ஜனேதி, தஸ்ஸ ஓமஸனே ச து³க்கடம் ஹோதி. அபி⁴க்கு²னியா மேது²னம் த⁴ம்மம் படிஸேவந்தோ ந நாஸேதப்³போ³ ‘‘அந்திமவத்து²ம் அஜ்ஜா²பன்னோ, பி⁴க்க²வே, அனுபஸம்பன்னோ…பே… நாஸேதப்³போ³’’தி பாளியா அபா⁴வதோ. தேனேவ ஸோ உபஸம்பன்னஸங்க்²யம் க³ச்ச²தி, ந ஸஹஸேய்யாபத்தாதி³ம் ஜனேதி, கேவலம் அஸம்வாஸோதி கத்வா க³ணபூரகோ ந ஹோதி, ஏககம்மம் ஏகுத்³தே³ஸோபி ஹி ஸம்வாஸோதி வுத்தோ. ஸமஸிக்க²தாபி ஸம்வாஸோதி கத்வா ஸோ தேன ஸத்³தி⁴ம் நத்தீ²தி பத³ஸோத⁴ம்மாபத்திம் பன ஜனேதீதி காரணச்சா²யா தி³ஸ்ஸதி. யதா² பி⁴க்கு²னியா ஸத்³தி⁴ம் பி⁴க்கு²ஸங்க⁴ஸ்ஸ ஏககம்மாதி³னோ ஸம்வாஸஸ்ஸ அபா⁴வா பி⁴க்கு²னீ அஸம்வாஸா பி⁴க்கு²ஸ்ஸ, ததா² பி⁴க்கு² ச பி⁴க்கு²னியா, பத³ஸோத⁴ம்மாபத்திம் பன ஜனேதி. ததா² ‘‘அந்திமவத்து²ம் அஜ்ஜா²பன்னோபி ஏகச்சோ யோ நாஸேதப்³போ³’’தி அவுத்தோதி இமினா நித³ஸ்ஸனேன ஸா காரணச்சா²யா க³ஹணம் ந க³ச்ச²தி.

அபி ச ‘‘பி⁴க்கு² ஸுத்தபி⁴க்கு²ம்ஹி விப்படிபஜ்ஜதி, படிபு³த்³தோ⁴ ஸாதி³யதி, உபோ⁴ நாஸேதப்³பா³’’தி (பாரா. 66) ச, ‘‘தேன ஹி, பி⁴க்க²வே, மேத்தியம் பி⁴க்கு²னிம் நாஸேதா²’’தி (பாரா. 384) ச வசனதோ யோ ஸங்க⁴மஜ்ஜ²ம் பவிஸித்வா அனுவிஜ்ஜகேன அனுவிஜ்ஜியமானோ பராஜாபிதோ, ஸோபி அனுபஸம்பன்னோவ, ந ஓமஸவாத³பாசித்தியம் ஜனேதீதி வேதி³தப்³ப³ம். கிஞ்சாபி ‘‘உபஸம்பன்னம் உபஸம்பன்னஸஞ்ஞீ கு²ம்ஸேதுகாமோ’’தி பாளி நத்தி², கிஞ்சாபி கங்கா²விதரணியம் ‘‘யம் அக்கோஸதி, தஸ்ஸ உபஸம்பன்னதா, அனஞ்ஞாபதே³ஸேன ஜாதிஆதீ³ஹி அக்கோஸனம், ‘மம் அக்கோஸதீ’தி ஜானனா, அத்த²புரேக்கா²ரதாதீ³னம் அபா⁴வோதி இமானேத்த² சத்தாரி அங்கா³னீ’’தி (கங்கா². அட்ட². ஓமஸவாத³ஸிக்கா²பத³வண்ணனா) வுத்தம், ததா²பி து³ட்ட²தோ³ஸஸிக்கா²பதே³ ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸா’’தி (பாரா. 389) வசனதோ அஸுத்³தே⁴ உபஸம்பன்னஸஞ்ஞாய ஏவ ஓமஸந்தஸ்ஸ பாசித்தியம். அஸுத்³த⁴தி³ட்டி²ஸ்ஸ து³க்கடம். ‘‘ஸுத்³தோ⁴ ஹோதி புக்³க³லோ, அஞ்ஞதரம் பாராஜிகம் த⁴ம்மம் அனஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸா’’தி (பாரா. 389) வசனதோ பன கங்கா²விதரணியம் ‘‘தஸ்ஸ உபஸம்பன்னதா உபஸம்பன்னஸஞ்ஞிதா’’தி ந வுத்தம் அனேகம்ஸிகத்தா தஸ்ஸ அங்க³ஸ்ஸாதி வேதி³தப்³ப³ம்.

அபி சேத்த² ஸிக்கா²பச்சக்கா²தகசதுக்கம் வேதி³தப்³ப³ம், அத்தி² புக்³க³லோ ஸிக்கா²பச்சக்கா²தகோ ந ஸிக்கா²ஸாஜீவஸமாபன்னோ, அத்தி² ஸிக்கா²ஸாஜீவஸமாபன்னோ ந ஸிக்கா²பச்சக்கா²தகோ, அத்தி² ஸிக்கா²பச்சக்கா²தகோ சேவ ஸிக்கா²ஸாஜீவஸமாபன்னோ ச, அத்தி² நேவ ஸிக்கா²பச்சக்கா²தகோ ந ஸிக்கா²ஸாஜீவஸமாபன்னோ. தத்த² ததியோ பி⁴க்கு²னீஸிக்கா²பச்சக்கா²தகோ வேதி³தப்³போ³. ஸா ஹி யாவ ந லிங்க³ம் பரிச்சஜதி, காஸாவே ஸஉஸ்ஸாஹாவ ஸமானா ஸாமஞ்ஞா சவிதுகாமா ஸிக்க²ம் பச்சக்க²ந்தீபி பி⁴க்கு²னீ ஏவ ஸிக்கா²ஸாஜீவஸமாபன்னாவ. வுத்தஞ்ஹி ப⁴க³வதா ‘‘ந, பி⁴க்க²வே, பி⁴க்கு²னியா ஸிக்கா²பச்சக்கா²ன’’ந்தி (சூளவ. 434). கதா³ ச பன ஸா அபி⁴க்கு²னீ ஹோதீதி? யதா³ ஸாமஞ்ஞா சவிதுகாமா கி³ஹினிவாஸனம் நிவாஸேதி, ஸா ‘‘விப்³ப⁴ந்தா’’தி ஸங்க்²யம் க³ச்ச²தி. வுத்தஞ்ஹி ப⁴க³வதா ‘‘யதே³வ ஸா விப்³ப⁴ந்தா, ததே³வ அபி⁴க்கு²னீ’’தி (சூளவ. 434). கித்தாவதா பன விப்³ப⁴ந்தா ஹோதீதி? ஸாமஞ்ஞா சவிதுகாமா காஸாவேஸு அனாலயா காஸாவம் வா அபனேதி, நக்³கா³ வா க³ச்ச²தி, திணபண்ணாதி³னா வா படிச்சா²தே³த்வா க³ச்ச²தி, காஸாவம்யேவ வா கி³ஹினிவாஸனாகாரேன நிவாஸேதி, ஓதா³தம் வா வத்த²ம் நிவாஸேதி, ஸலிங்கே³னேவ வா ஸத்³தி⁴ம் தித்தி²யேஸு பவிஸித்வா கேஸலுஞ்சனாதி³வதம் ஸமாதி³யதி, தித்தி²யலிங்க³ம் வா ஸமாதி³யதி, ததா³ விப்³ப⁴ந்தா நாம ஹோதி. தத்த² யா பி⁴க்கு²னிலிங்கே³ டி²தாவ தித்தி²யவதம் ஸமாதி³யதி, ஸா தித்தி²யபக்கந்தகோ பி⁴க்கு² விய பச்சா² பப்³ப³ஜ்ஜம்பி ந லப⁴தி, ஸேஸா பப்³ப³ஜ்ஜமேவேகம் லப⁴ந்தி, ந உபஸம்பத³ம். பாளியம் கிஞ்சாபி ‘‘யா ஸா, பி⁴க்க²வே, பி⁴க்கு²னீ ஸகாஸாவா தித்தா²யதனம் ஸங்கந்தா, ஸா ஆக³தா ந உபஸம்பாதே³தப்³பா³’’தி வசனதோ யா பட²மம் விப்³ப⁴மித்வா பச்சா² தித்தா²யதனம் ஸங்கந்தா, ஸா ஆக³தா உபஸம்பாதே³தப்³பா³தி அனுஞ்ஞாதம் விய தி³ஸ்ஸதி. ஸங்கீ³திஆசரியேஹி பன ‘‘சதுவீஸதி பாராஜிகானீ’’தி வுத்தத்தா ந புன ஸா உபஸம்பாதே³தப்³பா³, தஸ்மா ஏவ ஸிக்கா²பச்சக்கா²னம் நானுஞ்ஞாதம் ப⁴க³வதா. அந்திமவத்து²அஜ்ஜா²பன்னா பன பி⁴க்கு²னீ ஏவ. பக்க²பண்ட³கீபி பி⁴க்கு²னீ ஏவ. கிந்தி புச்சா².

வினீதவத்து²வண்ணனா

67. வினீதானி வினிச்சி²தானி வத்தூ²னி வினீதவத்தூ²னி. தேஸம் தேஸம் ‘‘தேன கோ² பன ஸமயேன அஞ்ஞதரோ பி⁴க்கூ²’’திஆதீ³னம் வத்தூ²னம் பாடேக்கம் நாமக³ணனம் உத்³த⁴ரித்வா உத்³த⁴ரித்வா ஊனாதி⁴கதோ³ஸஸோத⁴னட்டே²ன உத்³தா³னா ச தா மத்ராதி³ஸித்³தி⁴கா³தா²ஹி ச²ந்தோ³விசிதிலக்க²ணேன கா³தா² சாதி ‘‘உத்³தா³னகா³தா² நாமா’’தி வுத்தம், தே³, ஸோத⁴னே இதி தா⁴துஸ்ஸ ரூபம் உத்³தா³னாதி வேதி³தப்³ப³ம். இமா பன உத்³தா³னகா³தா² த⁴ம்மஸங்கா³ஹகத்தே²ரேஹி ஸங்கீ³திகாலே ட²பிதா, கத்தா²தி சே? பத³பா⁴ஜனீயாவஸானே. ‘‘வத்து²கா³தா² நாம ‘தேன கோ² பன ஸமயேன அஞ்ஞதரோ பி⁴க்கூ²’திஆதீ³னம் இமேஸம் வினீதவத்தூ²னம் நிதா³னானீ’’தி க³ண்டி²பதே³ வுத்தம், தஸ்மா தத்த² வுத்தனயேன வினீதவத்தூ²னி ஏவ ‘‘வத்து²கா³தா²’’தி வுத்தாதி வேதி³தப்³ப³ம். இத³மேத்த² ஸமாஸதோ அதி⁴ப்பாயனித³ஸ்ஸனம் – ‘‘ஆபத்திம் த்வம், பி⁴க்கு², ஆபன்னோ பாராஜிக’’ந்தி மூலாபத்தித³ஸ்ஸனவஸேன வா, ‘‘அனாபத்தி, பி⁴க்கு², பாராஜிகஸ்ஸ, ஆபத்தி ஸங்கா⁴தி³ஸேஸஸ்ஸ, து³க்கடஸ்ஸா’’தி ஆபத்திபே⁴த³த³ஸ்ஸனவஸேன வா, ‘‘அனாபத்தி, பி⁴க்கு², அஸாதி³யந்தஸ்ஸா’’தி அனாபத்தித³ஸ்ஸனவஸேன வா யானி வத்தூ²னி வினீதானி வினிச்சி²தானி, தானி வினீதவத்தூ²னி நாம. தேஸம் வினீதவத்தூ²னம் நிதா³னவத்து²தீ³பிகா தந்தி வத்து²கா³தா² நாம. உத்³தா³னகா³தா²வ ‘‘வத்து²கா³தா²’’தி வுத்தாதி ஏகே. தேஸம் ‘‘இமினா லக்க²ணேன ஆயதிம் வினயத⁴ரா வினயம் வினிச்சி²னிஸ்ஸந்தீ’’தி வசனேன விருஜ்ஜ²தி. ந ஹி உத்³தா³னகா³தா²யம் கிஞ்சிபி வினிச்ச²யலக்க²ணம் தி³ஸ்ஸதி, உத்³தா³னகா³தா²னம் விஸும் பயோஜனம் வுத்தம் ‘‘ஸுக²ம் வினயத⁴ரா உக்³க³ண்ஹிஸ்ஸந்தீ’’தி, தஸ்மா பயோஜனனானத்ததோபேதம் நானத்தம் வேதி³தப்³ப³ம். தத்தா²யம் விக்³க³ஹோ – வத்தூ²னி ஏவ கா³தா² வத்து²கா³தா². வினீதவத்து²தோ விஸேஸனத்த²மேத்த² கா³தா²க்³க³ஹணம். உத்³தா³னகா³தா²தோ விஸேஸனத்த²ம் வத்து²க்³க³ஹணந்தி வேதி³தப்³ப³ம். கேசி பன ‘‘கா³தா²னம் வத்தூ²னீதி வத்தப்³பே³ வத்து²கா³தா²தி வுத்த’’ந்தி வத³ந்தி. மக்கடிவத்து²ம் அஞ்ஞே தத்த² பி⁴க்கூ² ஆரோசேஸும், இத⁴ ஸயமேவ. தத்த² காரணஸ்ஸ ‘‘ப⁴க³வதா ஸிக்கா²பத³ம் பஞ்ஞத்த’’ந்தி வுத்தத்தா வஜ்ஜிபுத்தகாபி அஞ்ஞே ஏவ. ‘‘தத்த² ஆனந்த³த்தே²ரோ, இத⁴ தே ஏவா’’தி அஞ்ஞதரஸ்மிம் க³ண்டி²பதே³ வுத்தம். ஆசரியஸ்ஸ அதி⁴ப்பாயோ புப்³பே³ வுத்தோ, தஸ்மா உபபரிக்கி²தப்³ப³ம்.

67-8. ஞத்வாதி அபுச்சி²த்வா ஸயமேவ ஞத்வா. போக்க²ரந்தி ஸரீரம் பே⁴ரிபோக்க²ரம் விய. லோகியா அவிகலம் ‘‘ஸுந்த³ர’’ந்தி வத³ந்தி, தஸ்மா வண்ணபோக்க²ரதாயாதி பட²மேனத்தே²ன விஸிட்ட²காயச்ச²விதாயாதி அத்தோ², து³தியேன வண்ணஸுந்த³ரதாயாதி. ‘‘உப்பலக³ப்³ப⁴வண்ணத்தா ஸுவண்ணவண்ணா, தஸ்மா உப்பலவண்ணாதி நாமம் லபீ⁴’’தி க³ண்டி²பதே³ வுத்தம். நீலுப்பலவண்ணா காயச்ச²வீதி வசனம் பன ஸாமச்ச²விம் தீ³பேதி. லோகே பன ‘‘உப்பலஸமா பஸத்த²ஸாமா’’தி வசனதோ ‘‘யா ஸாமா ஸாமவண்ணா ஸாமதனுமஜ்ஜா², ஸா பாரிசரியா ஸக்³கே³ மம வாஸோ’’தி வசனதோ ஸாமச்ச²விகா இத்தீ²னம் பஸத்தா². ‘‘யாவஸ்ஸா நம் அந்த⁴கார’’ந்திபி பாடோ². கிலேஸகாமேஹி வத்து²காமேஸு யோ ந லிம்பதி.

69. இத்தி²லிங்க³ம் பாதுபூ⁴தந்தி இத்தி²ஸண்டா²னம் பாதுபூ⁴தம், தஞ்ச கோ² புரிஸிந்த்³ரியஸ்ஸ அந்தரதா⁴னேன இத்தி²ந்த்³ரியஸ்ஸ பாதுபா⁴வேன. ஏவம் புரிஸிந்த்³ரியபாதுபா⁴வேபி. ஏதேன யதா² ப்³ரஹ்மானம் புரிஸிந்த்³ரியம் நுப்பஜ்ஜதி, கேவலம் புரிஸஸண்டா²னமேவ உப்பஜ்ஜதி, யதா² ச கஸ்ஸசி பண்ட³கஸ்ஸ வினாபி புரிஸிந்த்³ரியேன புரிஸஸண்டா²னம் உப்பஜ்ஜதி, ந ததா² தேஸந்தி த³ஸ்ஸிதம் ஹோதி, தம் பன இத்தி²ந்த்³ரியம், புரிஸிந்த்³ரியம் வா அந்தரதா⁴யந்தம் மரந்தானம் விய படிலோமக்கமேன ஸத்தரஸமசித்தக்க²ணதோ பட்டா²ய அந்தரதா⁴யதி. பச்சுப்பன்னே இந்த்³ரியே நிருத்³தே⁴ இதரம் விஸபா⁴கி³ந்த்³ரியம் பாதுப⁴வதி. யஸ்மா மஹானித்³த³ம் ஓக்கந்தஸ்ஸேவ கிரஸ்ஸ விஸபா⁴கி³ந்த்³ரியம் பாதுப⁴வதி, தஸ்மா ‘‘ரத்திபா⁴கே³ நித்³த³ம் ஓக்கந்தஸ்ஸா’’தி வுத்தம். ‘‘அனுஜானாமி, பி⁴க்க²வே, தம்யேவ உபஜ்ஜ²ம் தமேவ உபஸம்பத³’’ந்தி வசனதோ பவத்தினீயேவ உபஜ்ஜா²யா, உபஸம்பதா³சரியா பி⁴க்கு²னீயேவ ஆசரியாதி கத்வா தாஸம் உபஜ்ஜா²யவத்தம், ஆசரியவத்தஞ்ச இமினா பி⁴க்கு²னாஸதா³ஸாயம் பாதம் பி⁴க்கு²னுபஸ்ஸயம் க³ந்த்வா காதப்³ப³ம், தாஹி ச இமஸ்ஸ விஹாரம் ஆக³ம்ம ஸத்³தி⁴விஹாரிகவத்தாதி³ காதப்³ப³ம் நு கோ²தி சே? ‘‘அனுஜானாமி, பி⁴க்க²வே, பி⁴க்கு²னீஹி ஸங்க³மிது’’ந்தி வசனேன வினாபா⁴வதீ³பனதோ கேவலம் ந புன உபஜ்ஜா² க³ஹேதப்³பா³, ந ச உபஸம்பதா³ காதப்³பா³தி த³ஸ்ஸனத்த²மேவ ‘‘அனுஜானாமி, பி⁴க்க²வே, தம்யேவ உபஜ்ஜ²’’ந்திஆதி³ வுத்தந்தி வேதி³தப்³ப³ம். தத்த² பி⁴க்கு²னீஹி ஸங்க³மிதுந்தி பி⁴க்கூ²ஹி வினா ஹுத்வா பி⁴க்கு²னீஹி ஏவ ஸத்³தி⁴ம் ஸமங்கீ³ ப⁴விதும் அனுஜானாமீதி அத்தோ², தஸ்மா இமினா பாளிலேஸேன ‘‘தஸ்ஸா ஏவ கா³மந்தராதீ³ஹி அனாபத்தீ’’தி அட்ட²கதா²வசனம் ஸித்³த⁴ம் ஹோதி, ஆக³ந்த்வா ஸங்க³மிதும் ஸக்கா, யஞ்ச ப⁴க³வதா க³மனம் அனுஞ்ஞாதம், தம் நிஸ்ஸாய குதோ கா³மந்தராதி³பச்சயா ஆபத்தி. ந ஹி ப⁴க³வா ஆபத்தியம் நியோஜேதீதி யுத்தமேவ தம், அஞ்ஞதா² ‘‘யா ஆபத்தியோ பி⁴க்கூ²னம் பி⁴க்கு²னீஹி அஸாதா⁴ரணா, தாஹி ஆபத்தீஹி அனாபத்தீ’’தி பாளிவசனதோ ந கா³மந்தராதீ³ஹி அனாபத்தீதி ஆபஜ்ஜதி. ஸாதா⁴ரணதா ஆபத்தியேவ ‘‘யா ஆபத்தியோ பி⁴க்கூ²னம் பி⁴க்கு²னீஹி அஸாதா⁴ரணா, யா ச பி⁴க்கு²னீஹி ஸங்க³மந்தியா கா³மந்தரனதீ³பாரரத்திவிப்பவாஸக³ணஓஹீயனாபத்தியோ, தாஹி ஆபத்தீஹி அனாபத்தீ’’தி ந வுத்தத்தாதி சே? ந வுத்தம் அனிட்ட²ப்பஸங்க³தோ. பி⁴க்கு²னீஹி ஸத்³தி⁴ம் ஸங்கந்தாயபி தஸ்ஸா தா பஹாய அஞ்ஞாஹி ஸங்க³மந்தியா கா³மந்தராதீ³ஹி அனாபத்தி ஏவ ஸப்³ப³காலந்தி இமஸ்ஸ அனிட்ட²ப்பஸங்க³தோ ததா² ந வுத்தந்தி அத்தோ². தத்த² கா³மந்தராபத்தாதி³வத்து²ம் ஸஞ்சிச்ச தஸ்மிம் காலே அஜ்ஜா²சரந்தீபி ஸா லிங்க³பாதுபா⁴வேன காரணேன அனாபஜ்ஜனதோ அனாபத்தி. அனாபஜ்ஜனட்டே²னேவ வுட்டா²தி நாமாதி வேதி³தப்³பா³. ததா² யோகீ³ அனுப்பன்னே ஏவ கிலேஸே நிரோதே⁴தி. அப³ந்த⁴னோபி பத்தோ ‘‘ஊனபஞ்சப³ந்த⁴னோ’’தி வுச்சதி, ஸப்³ப³ஸோ வா பன ந ஸாவேதி அப்பச்சக்கா²தா ஹோதி ஸிக்கா², ஏவமித⁴ அனாபன்னாபி ஆபத்தி வுட்டி²தா நாம ஹோதீதி வேதி³தப்³பா³.

யஸ்மா பன ஸா புரிஸேன ஸஹஸேய்யாபத்திம் அனாபஜ்ஜந்தீபி ஸக்கோதி பி⁴க்கு²னீஹி ஸங்க³மிதும், தஸ்மா அனாபத்தீதி கத்வா அட்ட²கதா²யம் ‘‘உபி⁴ன்னம்பி ஸஹஸேய்யாபத்தி ஹோதீ’’தி வுத்தம். வுத்தஞ்ஹேதம் பரிவாரே ‘‘அபரேஹிபி சதூஹாகாரேஹி ஆபத்திம் ஆபஜ்ஜதி ஸங்க⁴மஜ்ஜே² க³ணமஜ்ஜே² புக்³க³லஸ்ஸ ஸந்திகே லிங்க³பாதுபா⁴வேனா’’தி (பரி. 324). யம் பன வுத்தம் பரிவாரே ‘‘அத்தா²பத்தி ஆபஜ்ஜந்தோ வுட்டா²தி வுட்ட²ஹந்தோ ஆபஜ்ஜதீ’’தி (பரி. 324), தஸ்ஸ ஸஹஸேய்யாதி³ம் ஆபஜ்ஜதி அஸாதா⁴ரணாபத்தீஹி வுட்டா²தி, தது³ப⁴யம்பி ஸந்தா⁴ய வுத்தந்தி வேதி³தப்³ப³ம். தூ³ரே விஹாரோ ஹோதி பஞ்சத⁴னுஸதிகம் பச்சி²மம், விஹாரதோ பட்டா²ய கா³மம் பவிஸந்தியா கா³மந்தரம் ஹோதீதி அத்தோ². ஸம்வித³ஹனம் பரிமோசேத்வாதி அத்³தா⁴னக³மனஸம்வித³ஹனம் அகத்வாதி அத்தோ². தா கோபேத்வாதி பரிச்சஜித்வாதி அத்தோ². ‘‘பரிபுண்ணவஸ்ஸஸாமணேரேனாபீ’’தி வசனதோ அபரிபுண்ணவஸ்ஸஸ்ஸ உபஜ்ஜா²யக்³க³ஹணம் நத்தீ²தி விய தி³ஸ்ஸதி. வினயகம்மம் கத்வா ட²பிதோதி விகப்பேத்வா ட²பிதோ. அவிகப்பிதானம் த³ஸாஹாதிக்கமே நிஸ்ஸக்³கி³யதா வேதி³தப்³பா³. புன படிக்³க³ஹேத்வா ஸத்தாஹம் வட்டதீதி பன ‘‘அனுஜானாமி, பி⁴க்க²வே, பி⁴க்கூ²னம் ஸன்னிதி⁴ம் பி⁴க்கு²னீஹி படிக்³கா³ஹாபேத்வா பரிபு⁴ஞ்ஜிது’’ந்தி (சூளவ. 421) வசனதோ வுத்தம். அனபேக்க²விஸ்ஸஜ்ஜனேனாதி வத்து²ம் அனபேக்க²விஸ்ஸஜ்ஜனேன வா படிக்³க³ஹணேன வா புன படிக்³க³ஹேத்வா பரிபு⁴ஞ்ஜிஸ்ஸாமீதி. பக்க²மானத்தகாலே புனதே³வ லிங்க³ம் பரிவத்ததி சா²ரத்தம் மானத்தமேவ தா³தப்³ப³ந்தி ஸசே, பி⁴க்கு²காலே அப்படிச்ச²ன்னாய ஆபத்தியா, நோ படிச்ச²ன்னாயாதி நோ லத்³தீ⁴தி ஆசரியோ.

பரிவாஸதா³னம் பன நத்தீ²தி பி⁴க்கு²னியா சா²த³னாஸம்ப⁴வதோ வுத்தந்தி வேதி³தப்³ப³ம். ஸசே பி⁴க்கு²னீ அஸாதா⁴ரணம் பாராஜிகாபத்திம் ஆபஜ்ஜித்வா புரிஸலிங்க³ம் படிலப⁴தி, பி⁴க்கூ²ஸு உபஸம்பத³ம் ந லப⁴தி, பப்³ப³ஜ்ஜம் லப⁴தி, அனுபப்³ப³ஜித்வா பி⁴க்கு²பா⁴வே டி²தோ ஸஹஸேய்யாபத்திம் ந ஜனேதி. விப்³ப⁴ந்தாய பி⁴க்கு²னியா புரிஸலிங்கே³ பாதுபூ⁴தே பி⁴க்கூ²ஸு உபஸம்பத³ம் ந லப⁴தி, பாராஜிகம். அவிப்³ப⁴ந்தமானஸ்ஸ க³ஹட்ட²ஸ்ஸேவ ஸதோ பி⁴க்கு²னீதூ³ஸகஸ்ஸ ஸசே இத்தி²லிங்க³ம் பாதுப⁴வதி, நேவ பி⁴க்கு²னீஸு உபஸம்பத³ம் லப⁴தி, ந புன லிங்க³பரிவத்தே ஜாதே பி⁴க்கூ²ஸு வாதி. பி⁴க்கு²னியா லிங்க³பரிவத்தே ஸதி பி⁴க்கு² ஹோதி, ஸோ சே ஸிக்க²ம் பச்சக்கா²ய விப்³ப⁴மித்வா இத்தி²லிங்க³ம் படிலபே⁴ய்ய, பி⁴க்கு²னீஸு உபஸம்பத³ம் படிலப⁴தி உப⁴யத்த² புப்³பே³ பாராஜிகபா⁴வம் அப்பத்தத்தா. யா பன பி⁴க்கு²னீ பரிபுண்ணத்³வாத³ஸவஸ்ஸா புரிஸலிங்க³ம் படிலபே⁴ய்ய, உபஸம்பன்னோ பி⁴க்கு² ஏவ. புன ஸிக்க²ம் பச்சக்கா²ய ஆக³தோ ந உபஸம்பாதே³தப்³போ³ அபரிபுண்ணவீஸதிவஸ்ஸத்தா. புன லிங்க³பரிவத்தே ஸதி பி⁴க்கு²னீஸு உபஸம்பத³ம் லப⁴தி. ஏவம் சே கதத்³வாத³ஸஸங்க³ஹஸ்ஸ தா³ரகஸ்ஸ லிங்க³பரிவத்தே ஸதி கி³ஹிக³தா இத்தீ² ஹோதி, பரிபுண்ணத்³வாத³ஸவஸ்ஸா உபஸம்பாதே³தப்³பா³ கிர. பி⁴க்கு²னியா இத்தி²லிங்க³ந்தரதா⁴னேன, பி⁴க்கு²ஸ்ஸ வா புரிஸலிங்க³ந்தரதா⁴னேன பக்க²பண்ட³கபா⁴வோ ப⁴வேய்ய, ந ஸா பி⁴க்கு²னீ பி⁴க்கு²னீஹி நாஸேதப்³பா³ பி⁴க்கு² வா பி⁴க்கூ²ஹி புன பகதிபா⁴வாபத்திஸம்ப⁴வா. பகதிபண்ட³கம் பன ஸந்தா⁴ய ‘‘பண்ட³கோ நாஸேதப்³போ³’’தி வுத்தம். பக்க²பண்ட³கோ ஹி ஸம்வாஸனாஸனாய நாஸேதப்³போ³, இதரோ உப⁴யனாஸனாயாதி அத்தோ². யதி³ தேஸம் புன பகதிபா⁴வோ ப⁴வேய்ய, ‘‘அனுஜானாமி, பி⁴க்க²வே, தம்யேவ உபஜ்ஜ²ம் தமேவ உபஸம்பத³ம் தானியேவ வஸ்ஸானி பி⁴க்கு²னீஹி ஸங்க³மிது’’ந்தி அயம் விதி⁴ ஸம்ப⁴வதி. ஸசே நேஸம் லிங்க³ந்தரம் பாதுப⁴வேய்ய, ஸோ ச விதி⁴, யா ஆபத்தியோ பி⁴க்கூ²னம் பி⁴க்கு²னீஹி ஸாதா⁴ரணா, தா ஆபத்தியோ பி⁴க்கு²னீனம் ஸந்திகே வுட்டா²தும் அஸாதா⁴ரணாஹி அனாபத்தீதி அயம்பி விதி⁴ ஸம்ப⁴வதி. யம் வுத்தம் பரிவாரே ‘‘ஸஹ படிலாபே⁴ன புரிமம் ஜஹதி, பச்சி²மே பதிட்டா²தி, விஞ்ஞத்தியோ படிப்பஸ்ஸம்ப⁴ந்தி, பஞ்ஞத்தியோ நிருஜ்ஜ²ந்தி, ஸஹ படிலாபே⁴ன பச்சி²மம் ஜஹதி, புரிமே பதிட்டா²தி, விஞ்ஞத்தியோ’’திஆதி³, தம் யதா²வுத்தவிதி⁴ம் ஸந்தா⁴ய வுத்தந்தி அம்ஹாகம் க²ந்தீதி ஆசரியோ. இத்தி²லிங்க³ம், புரிஸலிங்க³ம் வா அந்தரதா⁴யந்தம் கிம் ஸகலம்பி ஸரீரம் க³ஹேத்வா அந்தரதா⁴யதி, உதா³ஹு ஸயமேவ. கிஞ்சேத்த² – யதி³ தாவ ஸகலம் ஸரீரம் க³ஹேத்வா அந்தரதா⁴யதி, அயம் புக்³க³லோ சுதோ ப⁴வேய்ய. தஸ்மா ஸாமஞ்ஞா சுதோ ப⁴வேய்ய, புன உபஸம்பஜ்ஜந்தோ ஓபபாதிகோ ப⁴வேய்ய. அத² ஸயமேவ அந்தரதா⁴யதி, ஸோபி பா⁴வோ தஸ்ஸ விருஜ்ஜ²தி. இத்தி²ந்த்³ரியாதீ³னி ஹி ஸகலம்பி ஸரீரம் ப்³யாபேத்வா டி²தானீதி க²ணனிரோதோ⁴ விய தேஸம் அந்தரதா⁴னம் வேதி³தப்³ப³ம், தஸ்மா யதா²வுத்ததோ³ஸப்பஸங்கா³பா⁴வோ வேதி³தப்³போ³. அஞ்ஞமஞ்ஞம் ஸம்ஸட்ட²ப்பபா⁴னம் தீ³பானம் ஏகப்பபா⁴னிரோதே⁴பி இதரிஸ்ஸா டா²னம் விய ஸேஸஸரீரட்டா²னம் தத்த² ஹோதீதி வேதி³தப்³ப³ம்.

71-2. முச்சது வா மா வா து³க்கடமேவாதி மோசனராகா³பா⁴வதோ. அவிஸயோதி அஸாதி³யனம் நாம ஏவரூபே டா²னே து³க்கரந்தி அத்தோ². மேது²னத⁴ம்மோ நாம உபி⁴ன்னம் வாயாமேன நிபஜ்ஜதி ‘‘தஸ்ஸ த்³வயம்த்³வயஸமாபத்தீ’’தி வுத்தத்தா, தஸ்மா த்வம் மா வாயாம, ஏவம் தே அனாபத்தி ப⁴விஸ்ஸதி, கிரியஞ்ஹேதம் ஸிக்கா²பத³ந்தி வுத்தம் ஹோதி, ‘‘ஆபத்திம் த்வம் பி⁴க்கு² ஆபன்னோ பாராஜிக’’ந்தி வசனதோ அகிரியம்பேதம் ஸிக்கா²பத³ம் யேபு⁴ய்யேன ‘‘கிரிய’’ந்தி வுச்சதீதி ஸித்³த⁴ம் ஹோதி.

73-4. ‘‘பாராஜிகப⁴யேன ஆகாஸக³தமேவ கத்வா பவேஸனாதீ³னி கரோந்தஸ்ஸ ஸஹஸா தாலுகம் வா பஸ்ஸம் வா அங்க³ஜாதம் சு²பதி சே, து³க்கடமேவா’’தி வத³ந்தி. கஸ்மா? ந மேது²னராக³த்தாதி, வீமம்ஸிதப்³ப³ம். த³ந்தானம் பா³ஹிரபா⁴வோ ஓட்டா²னம் பா³ஹிரபா⁴வோ விய து²ல்லச்சயவத்து² ஹோதீதி வுத்தம் ‘‘ப³ஹி நிக்க²ந்தத³ந்தே ஜிவ்ஹாய ச து²ல்லச்சய’’ந்தி. தம் புக்³க³லம் விஸஞ்ஞிம் கத்வாதி வசனேன ஸோ புக்³க³லோ கி²த்தசித்தோ நாம ஹோதீதி த³ஸ்ஸிதம் ஹோதி. யோ பன புக்³க³லோ ந விஸஞ்ஞீகதோ, ஸோ சே அத்தனோ அங்க³ஜாதஸ்ஸ தா⁴துக⁴ட்டனசரிணிஜ்ஜி²ணிகாதி³ஸஞ்ஞாய ஸாதி³யதி, மேது²னஸஞ்ஞாய அபா⁴வதோ விஸஞ்ஞீபக்க²மேவ ப⁴ஜதீதி தஸ்ஸ அனாபத்திச்சா²யா தி³ஸ்ஸதி. ‘‘மேது²னமேதம் மஞ்ஞே கஸ்ஸசி அமனுஸ்ஸஸ்ஸா’’தி ஞத்வா ஸாதி³யந்தஸ்ஸ ஆபத்தி ஏவ. பண்ட³கஸ்ஸ மேது²னத⁴ம்மந்தி பண்ட³கஸ்ஸ வச்சமக்³கே³ வா முகே² வா, பு⁴ம்மத்தே² வா ஸாமிவசனம். அவேத³யந்தஸ்ஸபி ஸேவனசித்தவஸேன ஆபத்தி ஸந்த²தேனேவ ஸேவனே விய.

உபஹதிந்த்³ரியவத்து²ஸ்மிம் ‘‘ஏதமத்த²ம் ஆரோசேஸும், ஸோ ஆரோசேஸீ’’தி து³விதோ⁴ பாடோ² அத்தி². தத்த² ‘‘ஆரோசேஸு’’ந்தி வுத்தபாடோ² ‘‘வேதி³யி வா ஸோ பி⁴க்க²வே’’தி வுத்தத்தா ஸுந்த³ரம், அஞ்ஞதா² ‘‘ஆபத்திம் த்வம் பி⁴க்கூ²’’தி வத்தப்³ப³ம் ஸியா. ‘‘வேதி³யா வா’’தி தீ³பவாஸினோ பட²ந்தி கிர, மேது²னத⁴ம்மஸ்ஸ புப்³ப³பயோகா³ ஹத்த²க்³கா³ஹாத³யோ, தஸ்மா ‘‘து³க்கடமேவஸ்ஸ ஹோதீ’’தி இமினா புரிமபதே³ன ஸம்ப³ந்தோ⁴. யஸ்மா பன து³க்கடமேவஸ்ஸ ஹோதி, தஸ்மா யாவ ஸீஸம் ந பாபுணாதி புக்³க³லோ, தாவ து³க்கடே திட்ட²தீதி ஸம்ப³ந்தோ⁴ வேதி³தப்³போ³. ஸீஸம் நாம மக்³க³படிபாத³னம். ‘‘ஸீஸம் ந பாபுணாதீதி பாராஜிகம் ந ஹோதி தாவ புப்³ப³பயோக³து³க்கடே திட்ட²தீ’’தி அஞ்ஞதரஸ்மிம் க³ண்டி²பதே³ லிகி²தம். உச்சாலிங்க³பாணகத³ட்டே²னாதி ஏத்த² பா⁴வனிட்டா²பச்சயோ வேதி³தப்³போ³. த³ட்டே²ன த³ம்ஸேன கா²த³னேனாதி ஹி அத்த²தோ ஏகம்.

76-7. ஸங்கா³மஸீஸே யுத்³த⁴முகே² யோத⁴புரிஸோ வியாயம் பி⁴க்கூ²தி ‘‘ஸங்கா³மஸீஸயோதோ⁴ பி⁴க்கூ²’’தி வுச்சதி. ருக்க²ஸூசித்³வாரம் உபிலவாய, ஏகேன வா ப³ஹூஹி வா கண்டகேஹி த²கிதப்³ப³ம் கண்டகத்³வாரம். து³ஸ்ஸத்³வாரம் ஸாணித்³வாரஞ்ச து³ஸ்ஸஸாணித்³வாரம். ‘‘கிலஞ்ஜஸாணீ’’திஆதி³னா வுத்தம் ஸப்³ப³ம்பி து³ஸ்ஸஸாணியமேவ ஸங்க³ஹேத்வா வுத்தம். ஏகஸதி³ஸத்தா ‘‘ஏக’’ந்தி வுத்தம். ஆகாஸதலேதி ஹம்மியதலேதி அத்தோ². அயஞ்ஹேத்த² ஸங்கே²போதி இதா³னி வத்தப்³ப³ம் ஸந்தா⁴ய வுத்தம். ‘‘கிஞ்சி கரோந்தா நிஸின்னா ஹோந்தீதி வுத்தத்தா நிபன்னானம் ஆபுச்ச²னம் ந வட்டதீ’’தி வத³ந்தி. ‘‘யதா²பரிச்சே²த³மேவ ச ந உட்டா²தி, தஸ்ஸ ஆபத்தியேவா’’தி கிஞ்சாபி அவிஸேஸேன வுத்தம், அனாத³ரியது³க்கடாபத்தி ஏவ தத்த² அதி⁴ப்பேதா. கத²ம் பஞ்ஞாயதீதி? ‘‘ரத்திம் த்³வாரம் விவரித்வா நிபன்னோ அருணே உக்³க³தே உட்ட²ஹதி, அனாபத்தீ’’தி வுத்தத்தா, மஹாபச்சரியம் விஸேஸேத்வா ‘‘அனாத³ரியது³க்கடாபி ந முச்சதீ’’தி வுத்தத்தா ச, தேன இதரஸ்மா து³க்கடா முச்சதீதி அதி⁴ப்பாயோ. யதா²பரிச்சே²த³மேவ ச ந உட்டா²தி, தஸ்ஸ ஆபத்தியேவாதி ஏத்த² ந அனாத³ரியது³க்கடம் ஸந்தா⁴ய வுத்தம். யதா²பரிச்சே²த³மேவாதி அவதா⁴ரணத்தா பரிச்சே²த³தோ அப்³ப⁴ந்தரே ந ஹோதீதி வுத்தம் ஹோதி. புன ‘‘ஸுபதீ’’தி வுத்தட்டா²னே விய ஸன்னிட்டா²னம் க³ஹேத்வா வுத்தம். ஏவம் நிபஜ்ஜந்தோதி நிபஜ்ஜனகாலே ஆபஜ்ஜிதப்³ப³து³க்கடமேவ ஸந்தா⁴ய வுத்தம், தஸ்மா யதா²பரிச்சே²தே³ன உட்ட²ஹந்தஸ்ஸ த்³வே து³க்கடானீதி வுத்தம் ஹோதீதி. அந்த⁴கட்ட²கதா²யம்பி ‘‘யதி³ ரத்திம் த்³வாரம் அஸம்வரித்வா நிபன்னோ ‘தி³வா வுட்ட²ஹிஸ்ஸாமீ’தி, அனாத³ரியே ஆபத்தி து³க்கடஸ்ஸா’’தி வுத்தம், ஏத்தா²பி ‘‘நிபன்னோ’’தி வுத்தத்தா ‘‘அருணே உட்டி²தே உட்டா²ஹீ’’தி ந வுத்தத்தா ச ஜானிதப்³ப³ம். ‘‘மஹாபச்சரியம் அனாத³ரியது³க்கடமேவ ஸந்தா⁴ய வுத்தம், ந அட்ட²கதா²யம் வுத்தது³க்கட’’ந்தி ஏகே வத³ந்தி. தஸ்ஸ அனாபத்தீதி அத்த²தோ அனிபன்னத்தா வுத்தம். ‘‘ஸசே பன ரத்திம் ஸம்வரித்வா நிபன்னோ, அருணுட்டா²னஸமயே கோசி விவரதி, த்³வாரஜக்³க³னாதீ³னி அகத்வா நிபன்னஸ்ஸ ஆபத்தியேவ. கஸ்மா? ஆபத்திகே²த்தத்தா’’தி வத³ந்தி.