8. அச்சேகசீவரஸிக்கா²பத³வண்ணனா

646. ‘‘அனுஜானாமி, பி⁴க்க²வே, அச்சேகசீவரம் படிக்³க³ஹேத்வா நிக்கி²பிது’’ந்தி, ‘‘யாவ பவாரணா பவாரிதா’’தி ச யம் வுத்தம், தே பன பி⁴க்கூ² தஸ்ஸ வசனஸ்ஸ அத்த²ம் மிச்சா² க³ஹேத்வா அச்சேகசீவரம் நிக்கி²பந்தா சீவரகாலஸமயம் அதிக்காமேஸும். கிமித³ம் விப⁴த்தம், உதா³ஹு அவிப⁴த்தந்தி? விப⁴த்தம், புக்³க³லிகம் வா. தேனேவ பரதோ ‘‘அம்ஹாகம், ஆவுஸோ, அச்சேகசீவரானீ’’தி வுத்தம், அவிப⁴த்தம் பன ஸங்கி⁴கத்தா ந கஸ்ஸசி நிஸ்ஸக்³கி³யம் கரோதி.

அபிச ‘‘அச்சேகசீவரம் படிக்³க³ஹேத்வா நிக்கி²பிது’’ந்தி இமினா ஸாமஞ்ஞவசனேன வஸ்ஸூபனாயிகதி³வஸதோ பட்டா²ய, பிட்டி²ஸமயதோ பட்டா²ய வா யாவ பவாரணா நிக்கி²பிதும் வட்டதி ஏவ ஸங்கி⁴கத்தா, புக்³க³லிகம்பி ‘‘வஸ்ஸம்வுத்த²காலே க³ண்ஹதா²’’தி தி³ன்னத்தா. தாதி³ஸஞ்ஹி யாவ வஸ்ஸம்வுத்தோ² ஹோதி, தாவ ந தஸ்ஸேவ, தா³யகஸ்ஸ ஸந்தகம் ஹோதி, ததா² இதோ ததியவஸ்ஸே, சதுத்த²வஸ்ஸே வா ‘‘பவாரணாய க³ண்ஹதா²’’திஆதி³னா தி³ன்னம்பி நிக்கி²பித்வா யதா²தா³னமேவ க³ஹேதப்³ப³ம். அயமத்தோ² அட்ட²கதா²யம் (பாரா. அட்ட². 2.646-9 ஆத³யோ) பாகடோ. தானி சீவரகாலஸமயாதிக்கமே ந நிஸ்ஸக்³கி³யானீதி சே? ந, உத்³தி³ஸ்ஸ தி³ன்னத்தா. யஸ்மா அயம் ஸமயோ ‘‘காலேபி ஆதி³ஸ்ஸ தி³ன்ன’’ந்தி ஏத்த² ‘‘காலோ’’தி ஆக³தோ, க³ணபோ⁴ஜனஸிக்கா²பதா³தீ³ஸு ‘‘ஸமயோ’’த்வேவ ஆக³தோ, தஸ்மா இத⁴ தேஸம் ஏகத்த²தாத³ஸ்ஸனத்த²ம் ஏகதோ ‘‘சீவரகாலஸமயோ’’தி வுத்தந்தி வேதி³தப்³ப³ம். மாதிகாயம் பனேத்த² தாதி³ஸம் சீவரம் அத்தனோ ஸந்தகபா⁴வம் உபக³தம் புக்³க³லிகம் ஸந்தா⁴ய வுத்தம், தேனேவாஹ ‘‘பி⁴க்கு²னோ பனேவ அச்சேகசீவரம் உப்பஜ்ஜேய்யா’’தி. அத்தனோ குடியா வஸ்ஸம்வுத்த²ஸ்ஸ பி⁴க்கு²னோ ஹி தா³தும் அலப⁴ந்தோ அந்தோவஸ்ஸே ஏவ தா³னகிச்சம் பரினிட்டா²பேத்வா க³ச்ச²தி, ததா² ஸங்க⁴ஸ்ஸ. தஸ்மா இத³ம் அச்சேகசீவரம் அத்தி² உப்பன்னகாலதோ பட்டா²ய ஸங்க⁴ஸ்ஸ வா புக்³க³லஸ்ஸ வா ஸந்தகபா⁴வம் உபக³ச்ச²ந்தம், யம் ந வஸ்ஸாவாஸிகபா⁴வேன தி³ன்னம், அத்தி² உப்பன்னகாலதோ பட்டா²ய அனுபக³ந்த்வா வஸ்ஸம்வுத்த²காலேயேவ புக்³க³லஸ்ஸ வா ஸங்க⁴ஸ்ஸ வா உபக³ச்ச²ந்தம், யம் வஸ்ஸாவாஸிகபா⁴வேன உப்பஜ்ஜித்வா ஸமயே தி³ன்னம், அத்தி² ஸமயே தி³ன்னம்பி புக்³க³லஸ்ஸ ஸந்தகபா⁴வம் அனுபக³ச்ச²ந்தம், ஸங்க⁴ஸந்தகபா⁴வம் வா தா³யகஸந்தகபா⁴வம் வா உபக³ச்ச²ந்தம், ஈதி³ஸம் ஸந்தா⁴ய ‘‘ஸஞ்ஞாணம் கத்வா நிக்கி²பிதப்³ப³’’ந்தி வுத்தம். இத³ம் அதிரேகஸம்வச்ச²ரம்பி நிக்கி²பிதும் லப⁴தி அத்தனோ ஸந்தகபா⁴வம் அனுபக³தத்தா, தஸ்மா ‘‘த³ஸாஹானாக³த’’ந்தி இதோ அஞ்ஞம் ஸந்தா⁴ய வுத்தந்தி ஸித்³த⁴மேதந்தி. த³ஸாஹதோ புரேதரம் லபி⁴த்வா யாவ பவாரணா நிக்கி²பிதும் ந லப⁴தி, தஸ்மா ஸகபா⁴வூபக³தமேவ அதி⁴ட்டா²தப்³ப³ம், தம்யேவ ஸந்தா⁴ய ‘‘த³ஸாஹானாக³த’’ந்தி வுத்தம், யதோ ‘‘அந்தோஸமயே அதி⁴ட்டே²தி, விகப்பேதீ’’தி அனாபத்திவாரே வுத்தம். ஸஞ்ஞாணம் கத்வா நிக்கி²பிதப்³ப³கம் பன பரஸ்ஸ தா³தப்³ப³தாய ஸகபா⁴வம் அனுபக³தம், ந ஹி தம் ஸந்தா⁴ய ‘‘அதி⁴ட்டே²தி, விகப்பேதீ’’தி ஸக்கா வத்தும், ந ச தம் இமஸ்மிம் அத்தே² நிஸ்ஸக்³கி³யம் ஹோதி ஸங்க⁴ஸ்ஸ நிஸ்ஸக்³கி³யாபா⁴வதோ, அட்ட²கதா²யம்பி அயமத்தோ² ஸுட்டு² பாகடோவ. கதமம் ஸஞ்ஞாணம் கத்வா நிக்கி²பிதப்³ப³ந்தி சே? பரஸந்தகம் சீவரம் ஸங்கி⁴கமேவ ஹோதி, ததோ ‘‘ஸல்லக்கே²த்வா ஸுக²ம் தா³தும் ப⁴விஸ்ஸதீ’’தி இமினா ஹி பரஸ்ஸ ஸந்தகபா⁴வோ த³ஸ்ஸிதோ.

‘‘ததோ பரம் ஏகதி³வஸம்பி பரிஹாரோ நத்தீ²தி த³ஸாஹபரமதோ உத்³த⁴ம் அனுபக³தத்தா’’தி லிகி²தம், இதோ ஸமயதோ உத்³த⁴மேவ த³ஸாஹஸ்ஸ அனுபக³தத்தா ஸமயதோ பரம் த³ஸாஹம் ந லப⁴தீதி கிரஸ்ஸ அதி⁴ப்பாயோ. ‘‘ஏதம் பரிஹாரம் லப⁴தியேவா’’தி ஏத்த² ‘‘ஏகாத³ஸமம் அருணம் சீவரமாஸே உட்டே²தீ’’தி காரணம் லிகி²தம். அனுக³ண்டி²பதே³ பன ‘‘அனதி⁴ட்ட²ஹித்வா ஏகாத³ஸதி³வஸே நிக்கி²பிதும் லப⁴தீ’தி வத³ந்தோ ப⁴க³வா இதரம்பி அனச்சேகசீவராதி³ம் அனுஜானாதி, அச்சேகசீவரமுகே²னாதி அபரே’’தி வுத்தம். ஏத்த² கதரம் ஸுபா⁴ஸிதம்? உப⁴யம்பீதி ஏகே. கத²ம்? பட²மம் ‘‘அச்சேகசீவரஸ்ஸ அனத்த²தே கதி²னே த³ஸதி³வஸாதி⁴கோ மாஸோ, அத்த²தே கதி²னே த³ஸதி³வஸாதி⁴கா பஞ்சமாஸா’’தி இமினா ஸமேதி, அனுக³ண்டி²பத³லத்³தி⁴யா ஹி ஏத்த² ‘‘ஏகாத³ஸதி³வஸாதி⁴கோ’’தி வத்தப்³ப³தம் ஆபஜ்ஜதி, து³தியம் ‘‘த³ஸாஹானாக³தந்தி…பே… த³ஸாஹேன அஸம்பத்தாதி அத்தோ²’’தி இமினா ஸமேதி. இமஸ்ஸ நயஸ்ஸ வஸேன ‘‘பஞ்சமிதோ பட்டா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதீ’’தி பாடோ² யுஜ்ஜதி. ததா² க³ண்டி²பத³லத்³தி⁴யா ‘‘நவாஹானாக³தம் கத்திகதேமாஸிகபுண்ணம’’ந்தி வத்தப்³ப³தம் ஆபஜ்ஜதி, தஸ்ஸ வஸேன ‘‘காமஞ்சேஸ த³ஸாஹபரமம் அதிரேகசீவரம் தா⁴ரேதப்³ப³ந்தி இமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பித’’ந்தி அயம் பாடோ² யுஜ்ஜதி. கோ பனேத்த² ஸாரோதி? யோ பச்சா² வுத்தோ, ஸோவ ஸாரோ. தேனேவ அட்ட²கதா²சரியேன ‘‘பஞ்சமிதோ பட்டா²யா’’தி வுத்தம். போராணக³ண்டி²பதே³ஹி அட்ட²கதா²ய ச ஸத்³தி⁴ம் ஸம்ஸந்த³னதோ, ‘‘த³ஸாஹானாக³த’’ந்தி பாளியா ஸம்ஸந்த³னதோ ச ஏத்த² க³ண்டி²பத³லத்³தி⁴பி பாளியா ஸமேதி.

கத²ம்? யஸ்மா பவாரணாதி³வஸே அருணுக்³க³மனே பி⁴க்கு² வஸ்ஸம்வுத்தோ² ஹோதி, தஸ்மா இமினா த³ஸமேன அஹேன ஸத்³தி⁴ம் ச²ட்டி²தோ பட்டா²ய நவதி³வஸா த³ஸ அஹானீதி த³ஸாஹம், தேன த³ஸாஹேன, ஸஹயோக³த்தே² கரணவசனம். கத்திகதேமாஸிகபுண்ணமா சீவரஸமயம் அஸம்பத்தாதி கத்வா ‘‘அனாக³தா’’தி வுச்சதி. யதா² அபரகத்திகபுண்ணமாய வஸ்ஸிகஸாடிகம் பச்சுத்³த⁴ரித்வா விகப்பேந்தோ ‘‘சாதுமாஸம் அதி⁴ட்டா²தும் ததோ பரம் விகப்பேது’’ந்தி வுச்சதி, ஏவம்ஸம்பத³மித³ந்தி. ஏத்த² வுச்சதீதி சே? ந, இமஸ்ஸ நிப்பயோஜனபா⁴வப்பஸங்க³தோ. அச்சேகசீவரபடிக்³க³ஹணகாலம் நியமிதந்தி சே? ந, ‘‘ச²ட்டி²தோ பட்டா²ய உப்பன்னசீவரம் அச்சேகமேவ ந ஹோதி. பட²மகதி²னேன ஸித்³த⁴த்தா’’தி போராணட்ட²கதா²க³ண்டி²பதே³ஸு வுத்தத்தா ததோ உபரி ‘‘அச்சேகசீவர’’ந்தி வுச்சதி, படிக்³க³ண்ஹந்தஸ்ஸ ஆபத்திஸங்க³ஹோ ச. ந ச ஸா ஆபத்தி பாளியா, அட்ட²கதா²ய, யுத்திதோ வா ஸம்ப⁴வதி. அட்டு²ப்பத்திமத்தவஸேன வுத்தந்தி சே? ந, த³ஸாஹாதி⁴ச்சகாரிகா அட்டு²ப்பத்திபாயம் ந தி³ஸ்ஸதி. ‘‘பி⁴க்கூ² அச்சேகசீவரம் படிக்³க³ஹேத்வா சீவரகாலஸமயம் அதிக்காமேந்தீ’’தி ஏத்த² ஏத்திகா ஏவ ஹி அட்டு²ப்பத்தி. ததா² ஹி பரிவாரே (பரி. 47-53) ‘‘கிஸ்மிம் வத்து²ஸ்மி’’ந்தி ஆரபி⁴த்வா ஏத்தகமேவ வுத்தந்தி வேதி³தப்³ப³ம். அச்சேகசீவரம் சீவரகாலம் நாதிக்காமேதப்³ப³ம், இதரம் அதிக்காமேதப்³ப³ந்தி த³ஸ்ஸனத்த²ம் இத³ம் பஞ்ஞத்தந்தி சே? ந, அச்சேகசீவரஸ்ஸேவ அபராத⁴த³ஸ்ஸனதோ, விஸேஸகாரணாபா⁴வா, ‘‘காமஞ்சேஸ த³ஸாஹபரமம் அதிரேகசீவரம் தா⁴ரேதப்³ப³ந்தி இமினாவ ஸித்³தோ⁴’’திஆதி³வசனவிரோத⁴தோ ச யதா²வுத்தவசனாஸம்ப⁴வதோ ச.

கத²ம்? த³ஸாஹேன ஸஹ கத்திகபுண்ணமா ‘‘அனாக³தா’’தி ஹி வுத்தே த³ஸாஹதோ அஞ்ஞா ஸா புண்ணமாதி ஆபஜ்ஜதி. அனஞ்ஞா சே, ஸஹ-ஸத்³தோ³ ந ஸம்ப⁴வதி, ந ஹி அத்தனாவ அத்தனோ யோகோ³ ஸம்ப⁴வதி, அனாக³த-ஸத்³தோ³ ச ந ஸம்ப⁴வதி. ஆக³தா ஸம்பத்தா ஏவ ஹி ஸா புண்ணமா. சீவரஸமயஸ்ஸ அனந்தரத்தா ஏகீபா⁴வம் அனாக³தத்தா அனாக³தாயேவாதி சே? ந, ததா²பி அனாக³த-ஸத்³த³ஸ்ஸ ஸம்ப⁴வதோ, ஆக³மனஸம்ப⁴வே ஸதியேவ ஹி அனாக³த-ஸத்³தோ³ ஸம்ப⁴வதி, ந ஹி நிப்³பா³னம், பஞ்ஞத்தி வா ‘‘அனாக³தா’’தி வுச்சதி. நிப்³பா³னம் விய க²ணத்தயம், ஸா ச புண்ணமா ந கதா³சி ஸமயபா⁴வம் பாபுணாதீதி அயுத்தமேவ. ‘‘ததோ பரம் விகப்பேது’’ந்தி பன வசனம் பிட்டி²ஸமயம் க³ஹேத்வா டி²தத்தா ஸம்ப⁴வதி. அபிச பவாரணாயம் அருணே ச உட்டி²தே ஸா புண்ணமா சீவரஸமயம் ஏகாஹானாக³தா ஏவாபஜ்ஜதி புப்³பே³ ஸஹயோக³பத்தத்தா. ஏவம் ஸந்தே ஏகீபா⁴வக³தாபி ஸா சீவரஸமயம் அனாக³தா ஏவ ஜாதாதி ஸப்³ப³தா³ ந ததா²விக்³க³ஹகரணவசனத்த²ம் கோசிதே³வ வசனதோ தீ³பேதீதி வேதி³தப்³ப³ம்.

கிமத்த²ம் பனேத்த² ‘‘த³ஸதி³வஸாதி⁴கோ மாஸோ’’திஆதி³ வுத்தந்தி? தம் பாரிபூரிஸம்ப⁴வதோ. பஞ்சமியஞ்ஹி புரே அருணம் உப்பன்னஅச்சேகசீவரஸ்ஸ த³ஸதி³வஸாதி⁴கோ மாஸோயேவ பரிபூரோதி கத்வா ததா² வுத்தம். அபிச தஸ்ஸா பஞ்சமியா தி³வஸபா⁴கோ³பி ஸம்பத்தாய ரத்தியா ‘‘ஹிய்யோ’’தி வுச்சதி, பகே³வ புரே அருணம், தேனேவாஹ ‘‘ஹிய்யோ கோ², ஆவுஸோ, அம்ஹாக’’ந்திஆதி³. ‘‘ஏவம் ஸந்தே ‘ச²ட்டி²தோ பட்டா²யா’தி வுத்தபட²மபாட²ஸ்ஸ வஸேன ‘அனச்சேகசீவரம்பி பச்சுத்³த⁴ரித்வா ட²பிதம் திசீவரம்பி ஏதம் பரிஹாரம் லப⁴தியேவா’’’தி ச ‘‘த³ஸதி³வஸாதி⁴கோ மாஸோ’’திஆதி³ ச யம் லிகி²தம். தம் ந, ‘‘பஞ்சமிதோ பட்டா²யா’’தி பாடே² ஸஜ்ஜிதேவ ஏதேன பரியாயேன யதா²வுத்தஅத்த²ஸம்ப⁴வதோ, ந தானி டா²னானி புன ஸஜ்ஜிதானி. யதா²டி²தவஸேனேவ அஜ்ஜு²பேக்கி²தப்³பா³னீதி நோ தக்கோதி ஆசரியோ. இத³ம் ஸிக்கா²பத³ம் புண்ணமாயம் அனிஸ்ஸக்³கி³யத்த²மேவாதி உபதிஸ்ஸத்தே²ரோ. ‘‘பவாரணாமாஸஸ்ஸ ஜுண்ஹபக்க²பஞ்சமிதோ பட்டா²யா’’தி பாடே² ஸஜ்ஜிதே ஏதேன பரியாயேன யதா²வுத்தோ உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதி, ‘‘அச்சேகசீவரந்தி அச்சாயிகசீவரம் வுச்சதீ’’திஆதி³ பாடோ². ‘‘ச²ட்டி²தோ பட்டா²யா’’தி ச ‘‘காமஞ்சேஸ த³ஸாஹபரம’’ந்திஆதி³ ச யம் லிகி²தம், தம் ந பாடோ², தஸ்மா ஏகாத³ஸதி³வஸம் பரிஹாரம் லப⁴தீதி கத்வா ஆசரியேன ‘‘பஞ்சமிதோ பட்டா²யா’’தி லிகா²பிதோ கிர. ‘‘பவாரணாமாஸஸ்ஸ ஜுண்ஹபக்க²ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³த⁴ரித்வா ட²பிதம் திசீவரம்பி ஏதம் பரிஹாரம் லப⁴தியேவாதி பாடோ²’’தி ச ‘‘அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்சமாஸாதி பாடோ²’’தி ச ஏத்த² பபஞ்சேந்தி, தஸ்மா ஸுட்டு² ஸல்லக்கே²த்வா கதே²தப்³ப³ம், துண்ஹீபூ⁴தேன வா ப⁴விதப்³ப³ம்.

அச்சேகசீவரஸிக்கா²பத³வண்ணனா நிட்டி²தா.