9. ஸாஸங்கஸிக்கா²பத³வண்ணனா

652. ‘‘திண்ணம் சீவரானம் அஞ்ஞதரம் சீவரந்தி இத³ம் திசீவரே ஏவ அயம் விதி⁴, இதரஸ்மிம் யதா²ஸுக²ந்தி த³ஸ்ஸனத்த²ம் வுத்த’’ந்தி வத³ந்தி. ‘‘அதிரேகசா²ரத்தம் விப்பவஸந்தீ’’தி தஸ்மிம்யேவ ஸேனாஸனே வாஸோ ந விப்பவாஸோதி கத்வா வுத்தம். கஸ்மா? சீவரப்பவத்திஜானனதோ. ஏத்த² கிஞ்சாபி ‘‘ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²ம’’ந்தி வசனதோ அதிரேகதோபி வுத்தம், ஆரஞ்ஞகமேவ பன ஸேனாஸனம் ஹோதி, து⁴தங்க³ம் ரக்க²தி சீவரப்பவத்திஜானனபலிபோ³த⁴ஸம்ப⁴வதோ.

653. ‘‘கா³வுததோ அதிரேகப்பமாணேன லப⁴தீ’’தி யம் வுத்தம், தம் கத²ம் பஞ்ஞாயதீதி சே? ‘‘ஸியா ச தஸ்ஸ பி⁴க்கு²னோ கோசிதே³வ பச்சயோ தேன சீவரேன விப்பவாஸாயா’’தி வசனதோ. யோஜனப்பமாணேபி ஸியாதி சே? ந, ‘‘புன கா³மஸீமம் ஓக்கமித்வா வஸித்வா பக்கமதீ’’தி அனாபத்திவாரே அனுஞ்ஞாதத்தா. யதி³ ஏவம் ‘‘யோஜனப்பமாணே ந லப⁴தீ’’தி இத³ம் கிந்தி? இத³ம் நிப³த்³தா⁴வாஸவஸேனேவ வுத்தம். தத்த² து⁴தங்க³ம் பி⁴ஜ்ஜதீதி? ந பி⁴ஜ்ஜதி, கிந்து ந இத⁴ து⁴தங்கா³தி⁴காரோ அத்தீ²தி. அத² கஸ்மா ‘‘அயம் து⁴தங்க³சோரோதி வேதி³தப்³போ³’’தி வுத்தந்தி? அஸம்ப⁴வதோ. கத²ம் பஞ்ஞாயதீதி? அங்கே³ஸு அபா⁴வதோ. து⁴தங்க³த⁴ரஸ்ஸ பதிரூபஸேனாஸனதீ³பனதோ து⁴தங்க³த⁴ரதா தஸ்ஸ ஸித்³தா⁴. வசனப்பமாணதோதி சே? ந, வசனப்பமாணதோ ச பாளியேவ பமாணம். ‘‘அனாபத்தி புன கா³மஸீமம் ஓக்கமித்வா வஸித்வா பக்கமதீ’’தி ஹி வுத்தம். கா³மஸீமா நிக்க²மித்வா கித்தகம் காலம் வஸித்வா பக்கமிதப்³ப³ந்தி சே? புனதி³வஸேயேவ, தஸ்மா அட்ட²மோ அருணோ நிப³த்³தா⁴வாஸே வா க³ந்தப்³ப³ட்டா²னே வா உட்டே²தப்³போ³தி ஏகே. அந்தோசா²ரத்தந்தி ஏகே. யாவ நிப³த்³தா⁴வாஸம் ந கப்பேதீதி ஏகே. யாவ மக்³க³பரிஸ்ஸமவினோத³னாதி ஏகே. ஸதி அந்தராயே அந்தோசா²ரத்தம் வஸதி, அனாபத்தி. நிப³த்³தா⁴வாஸகப்பனே ஸதி அருணுக்³க³மனே ஆபத்தி. ஸசே தம்ஸத்தமோ தி³வஸோ, தத³ஹேவ நிக்கி²த்தசீவரம் க³ஹேதப்³ப³ம், பச்சுத்³த⁴ரிதப்³ப³ம் வாதி ஏகே. ஸசே அந்தரா நவமக்³க³பாதுபா⁴வேன வா நவகா³மஸன்னிவேஸேன வா, தம் ஸேனாஸனம் அங்க³ஸம்பத்திதோ பரிஹாயதி. தத³ஹேவ சீவரம் க³ஹேதப்³ப³ம் வா பச்சுத்³த⁴ரிதப்³ப³ம் வா. சா²ரத்தம் விப்பவஸந்தஸ்ஸ சே பரிஹாயதி, அனாபத்தி அனுஞ்ஞாததி³வஸத்தாதி ஏகே. ஆபத்தி ஏவ அனங்க³ஸம்பத்திதோதி ஏகே. யுத்ததரம் பனேத்த² விசாரேத்வா க³ஹேதப்³ப³ம். ஸசே து⁴தங்க³த⁴ரோ ஹோதி, கா³மஸீமாயம் அவஸித்வா பச்சி²மப்பமாணயுத்தே டா²னே வஸித்வா பக்கமிதப்³ப³ம். பட²மம் ப³த்³த⁴அவிப்பவாஸஸீமோ சே கா³மோ ஹோதி, அஞ்ஞஸ்மிம்பி மாஸே அந்தோஸீமாய வஸதோ அனாபத்தி. போராணக³ண்டி²பதே³ ‘‘யதா²வுத்தஸேனாஸனே வஸந்தேனாபி சா²ரத்தமேவ சீவரம் கா³மே நிக்கி²பிதப்³ப³ந்தி அதி⁴ப்பாயேன அஞ்ஞம் அந்தோசா²ரத்தம்பி அஞ்ஞம்பி வஸதோ ஆபத்தியேவா’’தி வுத்தம்.

ஸாஸங்கஸிக்கா²பத³வண்ணனா நிட்டி²தா.