4. வஸ்ஸிகஸாடிகஸிக்கா²பத³வண்ணனா

627. ‘‘ஏகமேவ கத்வா’’தி வசனேன வஸ்ஸிகஸாடிகலக்க²ணேன ஞாதகானம்பி ஸதுப்பாத³ம் கரோந்தேன ஏகமேவ க³ஹேதப்³ப³ந்தி த⁴ம்மஸிரித்தே²ரோ. சதுப்³பி³த⁴ம் கே²த்தந்தி ஏத்த² கிஞ்சாபி திவித⁴ம் தி³ஸ்ஸதி, தம் பன ஏவம் க³ஹேதப்³ப³ம், யஸ்மிம் கே²த்தே பரியேஸிதும் லப⁴தி, தம் பரியேஸனகே²த்தம் நாம, ‘‘ஏவம் கரணனிவாஸனாதி⁴ட்டா²னகே²த்தானிபீ’’தி வுத்தம். ஏத்த² பச்சி²மேன புரிமக்³கா³ஹோ வேதி³தப்³போ³, ந புரிமேன பச்சி²மக்³கா³ஹோ, யதா²லாப⁴ந்தி ஆசரியோ. தஸ்ஸத்தோ² – அதி⁴ட்டா²னகே²த்தேன பச்சி²மேன புரிமானம் திண்ணம் கா³ஹோ ஹோதி, ததா² நிவாஸனகே²த்தேன த்³வின்னம் புரிமானம். கரணகே²த்தேன பன ஏகஸ்ஸேவ புரிமஸ்ஸ கா³ஹோ ஹோதீதி. ஏத்த² பன கிஞ்சாபி கரணகே²த்தனிவாஸனகே²த்தானம் காலதோ நானத்தம் நத்தி², கிரியதோ பன ‘‘அட்டி²ம் கத்வா நிவாஸேதப்³ப³’’ந்தி பாளிவசனதோ, தஸ்மா த்³விதா⁴ கத்வா வுத்தம் அஞ்ஞதராபா⁴வேன, தத³த்த²ஸித்³தி⁴தோ ச, கத²ம் பனேத்த² நானத்தம் நத்தீ²தி பஞ்ஞாயதீதி சே? பாளிதோ, ‘‘அட்³ட⁴மாஸோ ஸேஸோ கி³ம்ஹானந்தி கத்வா நிவாஸேதப்³ப³’’ந்தி ஹி பாளி, ததா² மாதிகாட்ட²கதா²தோ (கங்கா². அட்ட². வஸ்ஸிகஸாடிகஸிக்கா²பத³வண்ணனா) ச.

ததா²ஹ ‘‘பச்சி²மோ அட்³ட⁴மாஸோ கரணனிவாஸனகே²த்தம்பீ’’தி, இமினா நயேன திவித⁴மேவ கே²த்தந்திபி ஸித்³த⁴ம். ஸமந்தபாஸாதி³காயம் பன கத்த²சி போத்த²கே ‘‘ஜேட்ட²மூலபுண்ணமாஸியா பச்சி²மபாடிபத³தி³வஸதோ பட்டா²ய யாவ காளபக்கு²போஸதோ², அயமேகோ அத்³த⁴மாஸோ பரியேஸனகே²த்தஞ்சேவ கரணகே²த்தஞ்ச. ஏதஸ்மிஞ்ஹி அந்தரே வஸ்ஸிகஸாடிகம் அலத்³த⁴ம் பரியேஸிதும், லத்³த⁴ம் காதுஞ்ச வட்டதி, நிவாஸேதும், அதி⁴ட்டா²துஞ்ச ந வட்டதீ’’தி பாடோ² தி³ஸ்ஸதி, ஸோ அபாடோ² யதா²வுத்தபாளிமாதிகாட்ட²கதா²விரோத⁴தோ, தஸ்மா தத்த² ‘‘அலத்³த⁴ம் பரியேஸிதும் வட்டதி, காதும், நிவாஸேதும், அதி⁴ட்டா²துஞ்ச ந வட்டதீ’’தி பாடோ² வேதி³தப்³போ³. ஏவம் தாவ பச்சி²மேன புரிமக்³கா³ஹஸித்³தி⁴ வேதி³தப்³பா³, ந புரிமேன கரணகே²த்தாதீ³னம் கா³ஹோ ஸம்ப⁴வதி. ‘‘மாஸோ ஸேஸோ கி³ம்ஹானந்தி வஸ்ஸிகஸாடிகசீவரம் பரியேஸிதப்³ப³’’ந்தி ஏத்தகமேவ ஹி வுத்தம், ந, அட்ட²கதா²யம் ‘‘அயமேகோ அத்³த⁴மாஸோ பரியேஸனகே²த்தஞ்சேவ கரணகே²த்தஞ்சா’’தி வுத்தத்தாதி சே? ந, தஸ்ஸ லேக²னதோ³ஸத்தா, ததா² ஸாதி⁴தம். கரணகே²த்தேன பன நிவாஸனகே²த்தக்³கா³ஹோ அத்தி² காலனானத்தாபா⁴வதோ, தேனேவ புப்³பே³ யதா²லாப⁴க்³க³ஹணம் கதம், ததா² ச ஸாதி⁴தமேவ, ந பே⁴தோ³ பனத்தி², பயோஜனம் வுத்தமேவ. நிவாஸனக்கே²த்தேன அதி⁴ட்டா²னக்கே²த்தக்³கா³ஹோ நத்தி² ஏவ, ந ஹி புரிமேன பச்சி²மக்³கா³ஹோ வேதி³தப்³போ³. ந பாளிவிரோத⁴தோதி சே? ந, தத³த்தா²ஜானனதோ. ‘‘மாஸோ ஸேஸோ கி³ம்ஹானந்தி அத்³த⁴மாஸோ ஸேஸோ கி³ம்ஹான’’ந்தி ஏத்த² இதி-ஸத்³த³ஸ்ஸ ஹி இதோ பட்டா²யாதி அத்தோ². பரதோ ஆபத்திகே²த்தத³ஸ்ஸனதோ இதரஸ்ஸ அனாபத்திகே²த்தபா⁴வோ த³ஸ்ஸிதோவ ஹோதி. தி³ன்னபுப்³ப³தோபி ஞாதகபவாரிதட்டா²னதோ நிப்பா²தே³ந்தஸ்ஸ நிஸ்ஸக்³கி³யம் பிட்டி²ஸமயத்தா, பகதியா வஸ்ஸிகஸாடிகதா³யகா நாம ஸங்க⁴ஸ்ஸ வா புக்³க³லஸ்ஸ வா அபவாரேத்வா அனுஸம்வச்ச²ரம் தே³ந்தா, தத்த² ஸதுப்பாதோ³வ வட்டதி. வத்தபே⁴தே³ து³க்கடந்தி தத³ஞ்ஞேஸு.

‘‘ஸசே கத…பே… வஸ்ஸூபனாயிகதி³வஸே அதி⁴ட்டா²தப்³பா³…பே… ச² மாஸே பரிஹாரம் லப⁴தீ’’தி வசனதோ அந்தோவஸ்ஸேபி யாவ வஸ்ஸானஸ்ஸ பச்சி²மதி³வஸா அகதா பரிஹாரம் லப⁴தீதி தீ³பிதம் ஹோதி. கஸ்மா ந விசாரிதந்தி சே? அத்தா²பத்திஸித்³த⁴த்தா. ‘‘ச² மாஸே பரிஹாரம் லப⁴தீ’’தி வசனேன அகதா லப⁴தீதி ஸித்³த⁴மேவ, தம் கிஞ்சாபி ஸித்³த⁴ம், ஸரூபேன பன அனாக³தத்தா ஸரூபேன த³ஸ்ஸேதும், து³ஸ்ஸத்³தா⁴பயத்தா உபபத்திதோ த³ஸ்ஸேதுஞ்ச இத³மாரத்³த⁴ம் ஆசரியேன, ‘‘யதா² சேத்த², ஏவம் கதி²னப்³ப⁴ந்தரே உப்பன்னசீவரம்பி ஹேட்டா² வுத்தனயேனேவ படிபஜ்ஜிதப்³ப³’’ந்தி அனுக³ண்டி²பதே³ வுத்தம், தம் து³வுத்தம் தத்தே²வ புப்³பா³பரவிரோத⁴தோ. யஞ்சேத்த² அட்ட²கதா²வசனம் ஸாத⁴கத்தேன வுத்தம், தம் தமத்த²ம் ந ஸாதே⁴தி. ‘‘யதி³ நப்பஹோதி யாவ கத்திகபுண்ணமா பரிஹாரம் லப⁴தீ’’தி வசனம் அப்பஹோந்தஸ்ஸ யாவ கத்திகபுண்ணமா தாவ பரிஹாரகே²த்தம், ததோ பரம் ஏகதி³வஸோபி ந ஹோதீதி தீ³பேதி, தஸ்மா அப்பஹோனகபா⁴வேன அகதாவ யாவ கத்திகபுண்ணமா பரிஹாரம் லப⁴தி, ததோ பரம் ந லப⁴தீதி ஸித்³த⁴ம். ததா² ததே³வ வசனம் கதபரிஹாரம் ந லப⁴தீதி தீ³பேதி, தஸ்மா கத்திகபுண்ணமதி³வஸேயேவ அதி⁴ட்டா²தப்³பா³. ‘‘அப்பஹோந்தே த³ஸாஹே அந்தோவஸ்ஸே கரணபரியோஸானம்யேவ பமாண’’ந்தி லிகி²தம்.

ஏத்தா²ஹ – ‘‘ஏகாஹத்³வீஹாதி³வஸேனா’’திஆதி³ ந வத்தப்³ப³ம். கஸ்மா? கி³ம்ஹதி³வஸானம் அனதி⁴ட்டா²னகாலத்தா, தஸ்மா ஏவ ‘‘அந்தோத³ஸாஹே வா தத³ஹேயேவ வா அதி⁴ட்டா²தப்³பா³’தி ச ஸாமஞ்ஞதோ ந வத்தப்³ப³ம் கி³ம்ஹதி³வஸானம் அதி⁴ட்டா²னகே²த்தபா⁴வப்பஸங்க³தோ’’தி. ஏத்த² வுச்சதி – ந, தத³த்தா²ஜானனதோ. த³ஸாஹானாக³தாய வஸ்ஸூபனாயிகாய கி³ம்ஹதி³வஸா த³ஸாஹா ஹோந்தி, பட²மதி³வஸே ச லத்³தா⁴ நிட்டி²தா வஸ்ஸிகஸாடிகா த³ஸாஹாதிக்கந்தாபி வஸ்ஸூபனாயிகதி³வஸம் அதி⁴ட்டா²னகே²த்தம் அப்பத்தத்தா ந ச தாவ நிஸ்ஸக்³கி³யம் ஹோதி, வுத்தஞ்சேதம் ‘‘வஸ்ஸூபனாயிகதோ புப்³பே³ த³ஸாஹாதிக்கமேபி அனாபத்தீ’’தி.

அந்தோத³ஸாஹே அதி⁴ட்டா²தப்³பா³தி இத³ம் ந அவிஸேஸேன ஏதஸ்மிம் அந்தரே கி³ம்ஹதி³வஸேபி அதி⁴ட்டா²தப்³ப³ந்தி இமமத்த²ம் தீ³பேதும் வுத்தம், கிந்து கி³ம்ஹதி³வஸே சே உப்பன்னா, அதி⁴ட்டா²னகே²த்தே ச அந்தோத³ஸாஹம் ஹோதி, அந்தோத³ஸாஹே கே²த்தேயேவ அதி⁴ட்டா²தப்³பா³, ந கே²த்தந்தி கத்வா த³ஸாஹம் அதிக்கமிதப்³ப³ந்தி தீ³பேதும் வுத்தம். கஸ்மா? கி³ம்ஹதி³வஸானம்பி க³ணனூபக³த்தா, தஸ்மா அகே²த்ததி³வஸேபி க³ணேத்வா கே²த்தே ஏவ ‘‘அந்தோத³ஸாஹே அதி⁴ட்டா²தப்³பா³’’தி வுத்தம் ஹோதீதி.

வஸ்ஸிகஸாடிகஸிக்கா²பத³வண்ணனா நிட்டி²தா.