5. சீவரஅச்சி²ந்த³னஸிக்கா²பத³வண்ணனா

632. ஸாமந்தி ஸகஸஞ்ஞிதானியமனத்த²ம் வுத்தம். ஸகஸஞ்ஞிதாயேவ ஹி அச்சி²ந்தா³பனஅச்சி²ந்த³னேஸு நிஸ்ஸக்³கி³யம், தஸ்மா நிஸ்ஸக்³கி³யமூலங்க³னித³ஸ்ஸனமேதம். ‘‘சீவர’’ந்தி வுத்தத்தா ‘‘அசீவரம் அச்சி²ந்த³ந்தஸ்ஸ ந நிஸ்ஸக்³கி³ய’’ந்தி வுத்தமேவ ஹோதி. ‘‘த³த்வாதி த³த்வா வா தா³பேத்வா வா’’தி கிஞ்சாபி பத³பா⁴ஜனம் யுஜ்ஜதி, அஞ்ஞஸ்ஸ பன ஸந்தகம் அஞ்ஞஸ்ஸ பி⁴க்கு²னோ தா³பேத்வா தம் ஸயம் வா அச்சி²ந்தே³ய்ய, தேனேவ வா அச்சி²ந்தா³பேய்யாதி அனிட்ட²ப்பஸங்க³ப⁴யா ந வுத்தம், அத்த²தோ பன அத்தனோ ஸந்தகம் அஞ்ஞேன ஸத்³தி⁴விஹாரிகாதி³னா தா³பேத்வா, அஞ்ஞஸ்ஸ ஸந்தகம் வா தஸ்ஸ விஸ்ஸாஸா தா³பேத்வா தம் அச்சி²ந்தே³ய்ய வா அச்சி²ந்தா³பேய்ய வா நிஸ்ஸக்³கி³யந்தி வேதி³தப்³ப³ம், தஞ்ச கோ² அனபேக்கோ² த³த்வா. யதி³ ஏவம் ‘‘சஜித்வா தி³ன்னம் அச்சி²ந்தி³த்வா க³ண்ஹந்தோ ப⁴ண்ட³க்³கே⁴ன காரேதப்³போ³’’தி இத³ம் கிந்தி சே? ஸகஸஞ்ஞாய அக்³க³ஹேத்வா அஞ்ஞாய தே²ய்யாய க³ண்ஹந்தம் ஸந்தா⁴ய வுத்தம், தேனேவ வுத்தம் ‘‘ஸகஸஞ்ஞாய க³ஹிதத்தா பனஸ்ஸ பாராஜிகம் நத்தீ²’’தி, அபிச ‘‘அனாபத்தி ஸோ வா தே³தி, தஸ்ஸ வா விஸ்ஸஸந்தோ க³ண்ஹாதீ’’தி வசனதோபி தம் ஸித்³த⁴மேவ. ஏத்தாவதா தாவகாலிகம் கத்வா தி³ன்னம் அச்சி²ந்த³ந்தஸ்ஸ அனாபத்தி ஸாதி⁴தா ஹோதி. ‘‘அம்ஹாகம் ஸந்திகே உபஜ்ஜ²ம் க³ண்ஹிஸ்ஸதீ’’திஆதி³வசனம் ஸாமணேரஸ்ஸ தா³னம் தீ³பேதி, தஞ்ச இத⁴ நாதி⁴ப்பேதம். பாளியம் (பாரா. 633-634) உபஸம்பன்னே திகபாசித்தியம் விய அனுபஸம்பன்னே திகது³க்கடம்பி ஆக³தந்தி சே? ந, தத³தி⁴ப்பாயாஜானனதோ. அனுபஸம்பன்னகாலே ஏவம் த³த்வா அஞ்ஞஸ்ஸ ஸந்திகே உபஸம்பன்னம் தி³ஸ்வா குபிதோ சே அச்சி²ந்த³தி, உபஸம்பன்னஸ்ஸேவ வா ‘‘ஸிக்க²ம் பச்சக்கா²ய தும்ஹாகம் ஸந்திகே உபஸம்பஜ்ஜிஸ்ஸாமீ’’தி வத³ந்தஸ்ஸ த³த்வா புன அச்சி²ந்த³தி சே, நிஸ்ஸக்³கி³யந்தி அயமேத்த² அதி⁴ப்பாயோ.

633. ஸகிம் ஆணத்தோ ப³ஹுகம்பி அச்சி²ந்த³தி, நிஸ்ஸக்³கி³யந்தி ஏகப³த்³த⁴த்தா ஏகம் பாசித்தியம், தம் ஸந்தா⁴யேதம் வுத்தம் ‘‘ஆணத்தோ ப³ஹூனி க³ண்ஹாதி, ஏகம் பாசித்திய’’ந்தி. மாதிகாட்ட²கதா²யம் பன ‘‘வத்து²க³ணனாய ஆபத்தியோ’’தி வுத்தம், தம் ஆணத்தியா ப³ஹுத்தா ‘‘ஸப்³பா³னி க³ண்ஹா’’தி வத³ந்தஸ்ஸ கா³ஹம் ஸந்தா⁴ய வுத்தம், தேனேவ தத்த² வுத்தம் ‘‘ஏகவாசாய ஸம்ப³ஹுலா ஆபத்தியோ’’தி. ஏவம் ஸந்தே பாளிவசனம், அட்ட²கதா²வசனத்³வயஞ்ச அஞ்ஞமஞ்ஞம் ஸமேதி, பரஸந்தகம்பி நிஸ்ஸக்³கி³யம் ஹோதி பம்ஸுகூலஞ்ச, தேன ‘‘து³ஸ்ஸந்தே ப³த்³த⁴ரூபியம் வியா’’தி வுத்தம், தம் தத³த்த²னியமத³ஸ்ஸனத்த²ம் வுத்தம், யதா²வசா²தி³தம் அச்சி²ந்த³னசித்தேன ஸசித்தகம், வசீகம்மம் பன கேவலம் அச்சி²ந்தா³பேந்தஸ்ஸேவ ‘‘தே³ஹீ’’தி ப³லக்காரேன க³ண்ஹதோபி வேதி³தப்³ப³ம், தம் ந யுத்தம் ‘‘அனாபத்தி ஸோ வா தே³தீ’’தி வசனதோ. ‘‘துட்டோ² வா து³ட்டோ² வா தே³தி, அனாபத்தியேவா’’தி மாதிகாட்ட²கதா²வசனதோ வாதி சே? ந, உப⁴யத்த² அத்தனோ ருசியா தா³னம் ஸந்தா⁴ய வுத்தத்தா, பஸய்ஹாவஹாரே அனாபத்திப்பஸங்க³தோ ச. ‘‘பி⁴க்கு²ஸ்ஸ ஸாமம் சீவரம் த³த்வா’தி பாளிவசனதோ ச மாதிகாட்ட²கதா²ய அங்க³வவத்தா²னே ‘உபஸம்பன்னதா’தி வுத்தத்தா ச உப⁴யத்த² தா³னஹரணேஸு பி⁴க்கு²பா⁴வோ இச்சி²தப்³போ³தி தீ³பேதீ’’தி வத³ந்தி, இத³மயுத்தந்தி நோ தக்கோதி ஆசரியோ. கஸ்மா? அனுபஸம்பன்னஸ்ஸ சீவரம் த³த்வா தம் உபஸம்பன்னகாலே அச்சி²ந்த³ந்தஸ்ஸ அனாபத்திப்பஸங்க³தோ. ‘‘அனுபஸம்பன்னஸ்ஸ சீவரம் வா அஞ்ஞம் வா பரிக்கா²ரம் த³த்வா…பே… ஆபத்தி து³க்கடஸ்ஸா’’தி வசனதோ து³க்கடம் தத்த² ஹோதீதி சே? நாஸித்³த⁴த்தா, தா³னகாலே ஏவ உபஸம்பன்னதா பமாணந்தி அஸித்³த⁴மேதம் அட்ட²கதா²ய வா பாளியா வா யுத்திதோ வா, தஸ்மா தம் ந யுத்தந்தி அத்தோ². அனுபஸம்பன்னஸ்ஸ சீவரம் த³த்வா தஸ்ஸேவ அனுபஸம்பன்னகாலேயேவ சீவரம் அச்சி²ந்த³ந்தஸ்ஸ து³க்கடம், உபஸம்பன்னகாலே வா த³த்வா அனுபஸம்பன்னகாலே அச்சி²ந்த³ந்தஸ்ஸ து³க்கடந்தி தஸ்ஸ வசனஸ்ஸ இத³ம் விகப்பந்தரஞ்ச ஸம்ப⁴வதி, தஸ்மா (பாரா. 631 ஆத³யோ) விகப்பந்தரஸ்ஸ ஸம்ப⁴வதோ ச ந யுத்தம், யஸ்மா அனுபஸம்பன்னகாலே த³த்வா உபஸம்பன்னகாலே அச்சி²ந்த³ந்தஸ்ஸ விஸும் து³க்கடம் ந பஞ்ஞத்தம், தஸ்மா புராணசீவரதோ⁴வாபனாதி³ஸிக்கா²பதே³ஸு விய அபரபா⁴கே³ உபஸம்பன்னதா சேத்த² பமாணம், தஸ்மா ‘‘உபஸம்பன்னதா’’தி அங்கே³ஸு வுத்தத்தா ச தம் ந யுத்தந்தி அத்தோ². ஏத்த² ‘‘பச்சாஸீஸந்தஸ்ஸேவ தா³னமதி⁴ப்பேதம், ந நிஸ்ஸட்ட²தா³ன’’ந்தி த⁴ம்மஸிரித்தே²ரோ வத³தி கிர, வீமம்ஸிதப்³ப³ம்.

சீவரஅச்சி²ந்த³னஸிக்கா²பத³வண்ணனா நிட்டி²தா.