3. பே⁴ஸஜ்ஜஸிக்கா²பத³வண்ணனா

620. ‘‘ஸா அஹோஸி ஸுவண்ணமாலா’’தி வசனதோ ட²பேத்வா ஸஹத⁴ம்மிகே அஞ்ஞேஸம் யதா²ஸுக²ம் ரூபியம் தா³தும் வட்டதி உக்³க³ண்ஹாபேதும், ஸப்³யோஹாராபேபு⁴ஞ்சாதி ஆசரியோ, வீமம்ஸிதப்³ப³ம் இத்³தி⁴மஸ்ஸ இத்³தி⁴விஸயத்தா.

622. ‘‘யேஸம் மம்ஸம் கப்பதீ’’தி வசனேன யேஸம் மம்ஸம் ந கப்பதி, தேஸம் ஸப்பிஆதி³ கிஞ்சாபி ந கப்பதி, ந பன நிஸ்ஸக்³கி³யவத்தூ²தி வேதி³தப்³ப³ம். ததா² ந பணீதபோ⁴ஜனவத்தூ²தி. உக்³க³ஹிதகம் கத்வா நிக்கி²த்தந்தி அஜ்ஜோ²ஹரணத்த²ம் நிக்கி²த்தம். இதரஞ்ஹி படிக்³க³ஹேத்வா அஜ்ஜோ²ஹரிதும் வட்டதி. உப⁴யேஸம்பீதி பச்சா²ப⁴த்தம் படிக்³க³ஹிதேஹி, புரேப⁴த்தம் படிக்³க³ஹிதேஹி ச கதானம். ‘‘மம்ஸஸ்ஸ அகப்பியத்தா’’தி காரணபதிரூபகம் வத்வா. கா²தி³ம்ஸூதி ‘‘விகாலே கேவலம் நவனீதமேவ கா²தி³துகாமேன த³தி⁴தக்கக³தானி அபனேதப்³பா³னி, பசிதுகாமஸ்ஸ ஸாமம்பாகம் ந ஹோதீதி தே²ரஸ்ஸ அதி⁴ப்பாயோ’’தி வுத்தம். ‘‘க²யம் க³மிஸ்ஸதீ’’தி வசனதோ கீ²ரம் பக்கி²பித்வா பக்கஸப்பி விகாலே கப்பதீதி ஸித்³த⁴ம். பே⁴ஸஜ்ஜேஹீதி யாவஜீவிகபே⁴ஸஜ்ஜேஹி. கததேலம் புரேப⁴த்தந்தி அபசித்வா கதம் ஏவ. உண்ஹோத³கேனாதி தாபனபா⁴வம் தீ³பேதீதி கேசி, தம் ந ஸுந்த³ரம். நிப்³ப³ட்டிதத்தாதி பிஞ்ஞாகாதி³தோ. ‘‘தேலத்தா²ய படிக்³க³ஹித…பே… து³க்கடமேவா’’தி வசனதோ அதேலத்தா²ய படிக்³க³ஹிதேஹி, ஸத்தாஹாதிக்கந்தேஹிபி கததேலம் கததி³வஸதோ பட்டா²ய ஸத்தாஹம் வட்டதீதி சா²யா தி³ஸ்ஸதி, கரமந்த³ம் ருக்க²ஸாரோதி கேசி.

623. அவஸகஸடே யஸ்மா கீ²ராதீ³னி பக்கி²பித்வா தேலம் பசந்தி, தஸ்மா கஸடம் ந வட்டதி, தேலமேவ வட்டதி, தேன வுத்தம் ‘‘பக்கதேலகஸடே விய குக்குச்சாயதீ’’தி. வஸாய ஸத்³தி⁴ம் பக்கத்தா ந வட்டதீதி சே? வத³த², ப⁴ந்தே, நவனீதே த³தி⁴கு³ளிகாதிஆதி³ஸம்ப³ந்தோ⁴. மது⁴ம்ஹி சத்தாரோ காலிகா யதா²ஸம்ப⁴வம் யோஜேதப்³பா³, உச்சு²ம்ஹி ச, கத²ம்? ஸமக்கி²கம் ஸேளகம் மது⁴ யாவகாலிகம். அனேலகம் உத³கஸம்பி⁴ன்னம் யாமகாலிகம், அஸம்பி⁴ன்னம் ஸத்தாஹகாலிகம், மது⁴ஸிட்ட²ம் பரிஸுத்³த⁴ம் யாவஜீவிகம். ததா² உச்சு² வா ரஸோ வா ஸகஸடோ யாவகாலிகோ, நிக்கஸடோ உத³கஸம்பி⁴ன்னோ யாமகாலிகோ, அஸம்பி⁴ன்னோ ஸத்தாஹகாலிகோ, ஸுக்க²கஸடம் யாவஜீவிகந்தி வேதி³தப்³ப³ம். கஸ்மா? உத³கஸம்பே⁴த³விஸேஸதோ.

கிம் வுத்தம் ஹோதி? சதூஸு காலிகேஸு புப்³ப³ம் புப்³ப³ம் க³ருகம், அபரம் அபரம் லஹுகம். தேஸு சாயம் உத³கஸம்பே⁴தோ³ க³ருகம் லஹுகம் கரோதி, லஹுகஞ்ச க³ருகம். அம்ப³ரஸாதீ³னி ஹி யாவகாலிகத்தா க³ருகானி, உத³கஸம்பே⁴தோ³ பன தானி அம்ப³பானாதி³ஸமஞ்ஞம் த³த்வா லஹுகானி யாமகாலிகானி கரோதி. ‘‘பா²ணிதம் நாம உச்சு²ம்ஹா நிப்³ப³த்தந்தி உச்சு²ரஸம் உபாதா³யா’’தி அட்ட²கதா²வசனதோ உச்சு²ரஸோ ஸத்தாஹகாலிகோதி ஸித்³த⁴ம். தத்த² ‘‘உத³கஸம்பே⁴தோ³ தம் யாமகாலிகம் கரோதீ’’திஆதி³ம் ப³ஹும் வத்வா யோஜிதா.

அபிசேத்த² உச்சு²ரஸோ ‘‘அனுஜானாமி, பி⁴க்க²வே, உச்சு²ரஸ’’ந்தி (மஹாவ. 300) அனுஞ்ஞாதத்தா கு³ளோத³கம் விய உச்சு²ரஸஸாமஞ்ஞதோ உத³கேன அஸம்பி⁴ன்னோபி அகி³லானஸ்ஸ வட்டதி, தேனேவாஹ அட்ட²கதா²யம் ‘‘உச்சு²ரஸோ நிகஸடோ பச்சா²ப⁴த்தம் வட்டதீ’’தி (மஹா. அட்ட². 300). அயம் ஸப்³போ³ நோ தக்கோதி ஆசரியோ. கேசி பனாஹு ‘‘பா²ணிதம் நாம உச்சு²ம்ஹா நிப்³ப³த்த’ந்தி வசனதோ, ‘உச்சு²ரஸம் உபாதா³யா’தி அட்ட²கதா²வசனதோ ச உச்சு²ரஸோ பா²ணிதமேவ, தஸ்மா கு³ளே விய படிபஜ்ஜிதப்³ப³’’ந்தி. கேசி ‘‘வுத்தனயேன ஸத்தாஹகாலிகோவ ஸமானோ ‘அனுஜானாமி, பி⁴க்க²வே, உச்சு²ரஸ’ந்தி விஸும் அனுஞ்ஞாதத்தா அஸம்பி⁴ன்னோபி அகி³லானஸ்ஸ வட்டதீ’’தி வத³ந்தி. கேசி ‘‘வுத்தனயேன விஸும் அனுஞ்ஞாதத்தா ஏவ ஸம்பி⁴ன்னோ வா அஸம்பி⁴ன்னோ வா யாமகாலிகோவ, கு³ளோத³கம் பன ஸத்தாஹகாலிகமேவா’’தி வத³ந்தி. கேசி ‘‘கு³ளோத³கம் விய ஸோ து³விதோ⁴பி ஸத்தாஹகாலிகோயேவா’’தி வத³ந்தி.

தத்தா²யம் பட²மாசரியவாதே³ விசாரணா – பா²ணிதானுமதியாயேவ உச்சு²ரஸானுமதியா ஸித்³தி⁴தோ விஸும் ‘‘உச்சு²ரஸ’’ந்தி உத்³த⁴ரித்வா அனுமதி நிரத்தி²காதி ஆபஜ்ஜதி, ததா² ‘‘உச்சு²ரஸோ நிகஸடோ பச்சா²ப⁴த்தம் வட்டதீ’’தி அட்ட²கதா²பி நிரத்தி²கா. ‘‘ஸத்தாஹம் வட்டதீ’’தி வத்தப்³ப³ம் ஸியாதி, ந ச ததா² ஸக்கா வத்தும். பச்சா²ப⁴த்தம் வட்டனகரஸாதி⁴காரத்தாதி சே? ந, தஸ்மிம் அதி⁴காரே ஸத்தாஹகாலிகஸ்ஸ அவத்தப்³ப³ப்பஸங்க³தோ. காலபே⁴த³ம் அனபேக்கி²த்வா ரஸாதி⁴காரே ஓதிண்ணத்தா வுத்தோதி சே? ந ஸக்கா ‘‘நிகஸடோ ஸத்தாஹம் வட்டதீ’’தி வத்தும். பச்சா²ப⁴த்தம் வட்டனகரஸாதி⁴காரத்தா ந வத்தப்³ப³ந்தி சே? ந, ஏவஞ்ஹி வுத்தே தத³ஞ்ஞரஸோ விய அயம்பி பச்சா²ப⁴த்தமேவ வட்டதி, ந ததோ பரந்தி ஆபஜ்ஜதி. ததோ பரம் அபரிபோ⁴க³த்தா ‘‘பச்சா²ப⁴த்தம் வட்டதீ’’தி வுத்தந்தி சே? ந, யாவகாலிகபா⁴வப்பஸங்க³தோ. ந ஸோ பஸங்கோ³ ஆபி⁴தோ³ஸிகஸ்ஸாபி உச்சு²ரஸஸ்ஸ பாகேன பா²ணிதாதி³பா⁴வப்பஸங்க³தோ. அயமேவ ததியசதுத்தா²சரியவாதே³ஸு விசாரணா. து³தியவாதே³ விசாரணா வுத்தா, விமத்³தோ³ பனேத்த² பே⁴ஸஜ்ஜக்க²ந்த⁴கே (மஹாவ. 300) ஆவி ப⁴விஸ்ஸதி. பா²ணிதம் நாம உச்சு²ம்ஹா நிப்³ப³த்தந்தி மது⁴கதாலனாளிகேரபா²ணிதாதி³தோ உக்கடவத்து²தோ நிஸ்ஸக்³கி³யவத்து²பா²ணிதஸ்ஸ விஸேஸவசனம், தேனேதம் பஞ்ஞாயதி ‘‘நிஸ்ஸக்³கி³யவத்து²பூ⁴தம் இத⁴ பா²ணிதம் நாம உச்சு²ம்ஹா நிப்³ப³த்தமேவ, ந மது⁴காதி³தோ நிப்³ப³த்த’’ந்தி. ஏத்தாவதா யம்கிஞ்சி உச்சு²ம்ஹா நிப்³ப³த்தம், ந தம் ஸப்³ப³ம் பா²ணிதமேவ நாமாதி ஸாதி⁴தம் ஹோதி. தேனேவ க²ந்த⁴கே பா²ணிதம் பட²மம் அனுஜானித்வாவ பச்சா² உச்சு²ரஸோ அனுஞ்ஞாதோ, ததா² தத்தே²வ கு³ளம், கு³ளோத³கஞ்ச.

உச்சு²ரஸம் உபாதா³ய அபக்கா வாதிஆதி³ம்ஹி பன யேஸம் லத்³தி⁴ ‘‘உச்சு²ரஸோ யாமகாலிகோ’’தி. ‘‘தே அபக்கா வாதி ஸாமம் பி⁴க்கு²னா அபக்கா வா. அவத்து²கபக்கா வாதி வினா வத்து²னா பக்கா வா’’தி அத்த²ம் வண்ணயந்தி, தம் ந யுத்தம் ‘‘உச்சு²ரஸம் உபாதா³யா’’தி இமஸ்ஸ வசனஸ்ஸ பயோஜனாபா⁴வப்பஸங்க³தோ, பி⁴க்கு²னோ பசனாதி⁴காராபா⁴வா. ஸாமபாகோ இதா⁴தி⁴ப்பேதோதி சே? ஸாமம் அபக்கஸ்ஸ உச்சு²ரஸஸ்ஸ தேஸம் அத்தனோமதியா பா²ணிதபா⁴வஸித்³தி⁴தோ ச பரதோ ‘‘புரேப⁴த்தம் படிக்³க³ஹிதேன அபரிஸ்ஸாவிதஉச்சு²ரஸேன கதபா²ணித’’ந்திஆதி³னயத³ஸ்ஸனதோ ச தம் அயுத்தம், தத்த² ‘‘அபரிஸ்ஸாவிதஉச்சு²ரஸேன ஸயம்கதம் நிராமிஸமேவ வட்டதீ’’தி வசனம் யம் தத்த² கஸடம் ஸாமபாகம் ந ஜனேதி, ஸவத்து²கபடிக்³க³ஹிதகதம்யேவ தம் கரோதீதி தீ³பேதி, தஸ்மா படிக்³க³ஹேதும் ந வட்டதி விகாலேதி போராணா. ‘‘கோட்டிதஉச்சு²பா²ணிதம் ‘ரஜனபாகம் விய ஓளாரிகம் ஸவத்து²கபக்கம் நாம ஹோதீ’தி ஸஞ்ஞாய புரேப⁴த்தமேவ வட்டதீ’’தி வுத்தம். மஹாஅட்ட²கதா²சரியா ‘‘ஏவம் பா²ணிதக்³க³ஹணம் அமது⁴ரம், தஸ்மா பச்சா²ப⁴த்தம் ந வட்டதீ’’தி வதி³ம்ஸு. கிம் மது⁴ரதாய, அமது⁴ரதாய வாதி? அத்த²மேவ த³ஸ்ஸேதும் மஹாபச்சரியம் ததா² வுத்தந்தி உபதிஸ்ஸத்தே²ரோ ஆஹ கிர. தம் யுத்தந்தி உச்சு²தோ நிப்³ப³த்தத்தா வுத்தம், தேனேவாஹ ‘‘க²ண்ட³ஸக்க²ரம் பன…பே… வட்டதீ’’தி. ‘‘தம் கீ²ரக⁴டே பக்கி²பித்வா பசந்தீ’’தி லிகி²தம். ஜல்லிகா நாம பே²ணாதி³.

பே⁴ஸஜ்ஜோதி³ஸம் வத³ந்தேன இதரே அத்து²த்³தா⁴ரவஸேன வுத்தா. ‘‘ஆஹாரத்த²ம் ப²ரிதும் ஸமத்தா²னீ’’தி க²ந்த⁴கே (மஹாவ. 260) ‘‘யம் பே⁴ஸஜ்ஜஞ்சேவ அஸ்ஸ பே⁴ஸஜ்ஜஸம்மதஞ்ச லோகஸ்ஸ, ஆஹாரத்த²ஞ்ச ப²ரேய்யா’’தி வுத்தத்தா வுத்தம். ஏத்த² விசாரணா பே⁴ஸஜ்ஜக்க²ந்த⁴கே ஆவி ப⁴விஸ்ஸதி.

624. த்³வாரவாதபானகவாடானீதி த்³வாரஸ்ஸ ச வாதபானானஞ்ச கவாடானி. கஸாவபக்கே²பமத்தேன ஹி தானி அத்தனோ ஸபா⁴வம் பரிச்சஜிதானி ஹோந்தி, தஸ்மா ‘‘மக்கே²தப்³பா³னீ’’தி வுத்தம். ‘‘கஸாவோ நாம கனகலம்பா³தீ³னிபீ’’தி வத³ந்தி. அதி⁴ட்டே²தீதி ‘‘இதா³னி அஜ்ஜோ²ஹரணீயம் ந ப⁴விஸ்ஸதி, பா³ஹிரபரிபோ⁴கோ³ ப⁴விஸ்ஸதீ’’தி சித்தம் உப்பாதே³தி. இத⁴ ‘‘விகப்பேதீ’’தி பத³ம் நத்தி². அதி⁴ட்டா²னம்பி முகா²ருள்ஹியா வுத்தம் ‘‘இமம் நவனீதம் அதி⁴ட்டா²மீ’’தி அவத்தப்³ப³தோ.

625. பரிபு⁴ஞ்ஜிதும் பன ந வட்டதீதி விஸ்ஸாஸாபா⁴வம் ஸந்தா⁴ய வுத்தம். ஸசே ஸவிஸ்ஸாஸோ, வட்டதீதி ‘‘பரிபு⁴ஞ்ஜ த்வ’’ந்தி ஏத்தாவதா விஸ்ஸஜ்ஜிதம் ஹோதி, தஸ்மா உபி⁴ன்னம் அனாபத்தீதி ஸம்ப³ந்தோ⁴. ஸசே ந விஸ்ஸஜ்ஜிதம், ஆபத்தி ஹோதீதி ஸித்³த⁴ம். தஸ்மா உபி⁴ன்னம் ஸந்தகம் சீவரம் அஞ்ஞதரேன ஸம்முகீ²பூ⁴தேன அதி⁴ட்டா²தப்³ப³ம். நோ சே அதி⁴ட்டா²தி, நிஸ்ஸக்³கி³யம் ஹோதீதிபி யுஜ்ஜதி. காகனிகமத்தஞ்சே மூலம் அதி³ன்னம், ‘‘ந அதி⁴ட்டா²னுபக³ம்…பே… ஸகபா⁴வம் ந உபேதீ’’தி இமினா ஏதம் ஸதி³ஸம் ந ஹோதி, ஆபி⁴த⁴ம்மிகக³ணானம் தி³ன்னம் விய ச ந ஹோதி. கஸ்மா? ஆபி⁴த⁴ம்மிகா ஹி அனுபஸம்பன்னாபி ஹோந்தி, பச்சா² ஆபி⁴த⁴ம்மிகபூ⁴தானம்பி தம் ஸாதா⁴ரணம் ஹோதீதி. ஏத்த² த்³வேபி உபஸம்பன்னா ஏவ, த்³வின்னம்பி தத்த² யதா²காமகரணீயதா அத்தி² மமத்தஞ்ச, ந ஏவம் தத³ஞ்ஞேஸம் ஸாதா⁴ரணம், ந ச த்³வே தயோ பி⁴க்கூ² ‘‘ஏகதோ வஸ்ஸிஸ்ஸாமா’’தி கரோந்தி, ரக்க²தி தாவ. ‘‘அவிப⁴த்தத்தா அனாபத்தீ’’தி இமினா ச இத³ம் ஸதி³ஸம், யேன மூலேன படிக்³க³ஹிதம், தஸ்ஸ ஸசே இதரோ தே³தி, ஸோ வா தம் இதரஸ்ஸ தே³தி, ஸதி படிக்³க³ஹணே ஸத்தாஹாதிக்கமே நிஸ்ஸக்³கி³யத்தா, தஸ்மா தம் சீவரம் த்³வீஸு ஸம்முகீ²பூ⁴தேன ஏகேன அதி⁴ட்டா²தப்³ப³ம். கிஞ்சாபி ஏத்த² பயோகோ³ ந தி³ஸ்ஸதி ஸமானபரிக்கா²ரானம் த்³வின்னம் அதி⁴ட்டா²னபயோகா³பா⁴வதோ, ததா²பி ஸமானஸப்³ப³ப⁴ண்ட³கானம் த்³வின்னம் தேலாதி³ யேன படிக்³க³ஹிதம், தஸ்ஸ காலாதிக்கமே ஆபத்திஸம்ப⁴வதோ, அனதி⁴ட்டா²னே து³ல்லப⁴விஸேஸஹேதுத்தா ச ‘‘அதி⁴ட்டா²தப்³ப³’’ந்தி வுத்தம். தம் அயுத்தம் பத்தசீவரஸத்தாஹகாலிகானம் அஸதி³ஸவிதா⁴னத்தா. ஏத்த² பத்தசீவரஞ்ஹி அத்தனோ ஸந்தகபா⁴வம் உபக³தமேவ அனதி⁴ட்ட²ஹந்தஸ்ஸ காலாதிக்கமே ஆபத்தி, ஸத்தாஹகாலிகம் பன பரஸந்தகஸாதா⁴ரணம்பி படிக்³க³ஹிதம் படிக்³கா³ஹகஸ்ஸ காலாதிக்கமே ஆபத்திகரம். படிக்³க³ஹணஞ்சேத்த² பமாணம், ந தத்த² ஸகஸந்தகதா, ஸத்தாஹகாலிகஞ்ச நிஸ்ஸக்³கி³யம், ஸப்³பே³ஸம்பி அனஜ்ஜோ²ஹரணீயம். பத்தசீவரம் அஞ்ஞஸ்ஸ பரிபு⁴ஞ்ஜதோ அனாபத்தி. இத³ஞ்ச காலாதிக்கந்தம்பி நிஸ்ஸஜ்ஜித்வா பச்சா² லத்³த⁴ம் கப்பதி. பத்தசீவரம் பன தம் தஸ்ஸ வினயகம்மந்தி கப்பதீதி. அவிப⁴த்தஸ்ஸபி இமஸ்ஸ தா³னம் ருஹதி, ந பத்தசீவரஸ்ஸ. வுத்தஞ்ஹேதம் அட்ட²கதா²யம் ‘‘த்³வின்னம் ஸந்தகம் ஹோதி…பே… ஸசேபி அவிப⁴ஜித்வா ஸத்³தி⁴விஹாரிகாதீ³னம் தே³ந்தி, அதி³ன்னமேவ ஹோதீ’’தி. யஸ்ஸ தா³னமேவ ந ருஹதி, தஸ்ஸ குதோ அதி⁴ட்டா²னம். ஏகோ சே பத்தசீவரம் த³ஸமே தி³வஸே இதரஸ்ஸ தே³தி. ததோ பட்டா²ய ஸோ த³ஸ தி³வஸே பரிஹரிதும் லப⁴தி, ந ததா² ஸத்தாஹகாலிகந்தி ஸப்³ப³தா² உபபரிக்கி²யமானம் ஸரிக்க²ம் நக்க²மதீதி ந தம் ஸாரதோ த³ட்ட²ப்³ப³ந்தி ஆசரியஸ்ஸ தக்கோ. ‘‘வினயகம்மவஸேன பன அனிஸ்ஸஜ்ஜித்வா ஸஹஸா விருஜ்ஜி²த்வா கஸ்ஸசி பரிச்சத்தம்பி புன படிலபி⁴த்வா பரிபு⁴ஞ்ஜிதும் ந வட்டதீ’’தி வுத்தம், ஸசே தே³ஸந்தரிதம், ஸமுத்³த³ந்தரிதம் வா சீவரம் நிஸ்ஸக்³கி³யம் ஜாதம், தம் இத⁴ டி²தேன பி⁴க்கு²னா ஏகஸ்ஸ வந்தேன சித்தேன சத்தம் கத்வா அனபேக்கி²த்வா ஆபத்திம் தே³ஸேத்வா தஸ்ஸ விஸ்ஸாஸேன புன க³ஹேத்வா அதி⁴ட்டா²தப்³ப³ம், ‘‘பத்தாதீ³ஸு ச அயமேவ நயோ’’தி ச வுத்தம், ‘‘தாலனாளிகேரபா²ணிதம்பி ஸத்தாஹகாலிகம் ஏவா’’தி ச. ‘‘த்³வின்னம் ஸந்தகம் ஏகேன படிக்³க³ஹிதம் ஸத்தாஹகாலிகம் ஸத்தாஹாதிக்கமே ஆபத்திம் ந கரோதி, பரிபு⁴ஞ்ஜிதும் பன த்³வின்னம்பி ந வட்டதீ’’தி ச ‘‘பரஸந்தகம் படிக்³க³ஹேத்வா ட²பிதேபி ஏஸேவ நயோ’’தி ச கேசி வத³ந்தி. து³க்கடவத்து²பூ⁴தம் ஸப்பிஆதி³ நிஸ்ஸஜ்ஜிதப்³ப³ம் புன பரிபு⁴ஞ்ஜிதும் வட்டதீதி விதா⁴னம் ந தி³ஸ்ஸதீதி.

பே⁴ஸஜ்ஜஸிக்கா²பத³வண்ணனா நிட்டி²தா.