6. அஞ்ஞாதகவிஞ்ஞத்திஸிக்கா²பத³வண்ணனா

515. பரிக்கா²ரானந்தி உபயோக³த்தே² ஸாமிவசனம். ஏகஸாடகந்தி பா⁴வனபும்ஸகம், ‘‘அஞ்ஞாதகோ மோக⁴புரிஸா’’தி வசனேன பவாரிதோபி அதா³துகாமோ அஞ்ஞாதகோ அப்பவாரிதட்டா²னே திட்ட²தீதி தீ³பிதம் ஹோதி. அஞ்ஞதா² ‘‘அனாபத்தி பவாரிதான’’ந்தி இமினா விருஜ்ஜ²தி.

517. நேவ தாவ விஞ்ஞாபேதப்³ப³ம், ந ப⁴ஞ்ஜிதப்³ப³ந்தி அனச்சி²ன்னானம் சீவரானம் அத்தனோ ஸந்தகானம் அத்தி²தாய, தத்த² பச்சாஸாஸப்³பா⁴வதோ ச. பச்சாஸா கித்தகம் காலம் ரக்க²தீதி? யாவ கா³மந்தரா, யாவ அத்³த⁴யோஜனாதி ஏகே. யாவ த³ஸ்ஸனஸவனூபசாராதி ஏகே. யாவ அஞ்ஞே ந பஸ்ஸந்தீதி ஏகே. யாவ பச்சாஸா சி²ஜ்ஜதீதி ஏகே. யாவ ஸாகா²பலாஸபரியேஸனப⁴ஞ்ஜனஸஜ்ஜனகாலபரிச்சே²தா³தி ஏகே. இத³ம் ஸப்³ப³ம் யதா²ஸம்ப⁴வம் யுஜ்ஜதி. கத²ம் பஞ்ஞாயதீதி சே? ‘‘ஸசே பன ஏதேஸம் வுத்தப்பகாரானம் கி³ஹிவத்தா²தீ³னம் பி⁴ஸிச²விபரியந்தானம் கிஞ்சி ந லப்³ப⁴தி, தேன திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி அட்ட²கதா²வசனதோ.

ந தாவ தே²ரானம் தா³தப்³பா³னீதி ந தாவ அத்தனோ ருசியா தா³தப்³பா³னி, யதா³ தே²ரா ‘‘தே³தா²வுஸோ’’தி வத³ந்தி, ததா³ தா³தப்³பா³னி. ‘‘ஏவம் ஸதி த³ஹராபி அச்சி²ன்னசீவரட்டா²னே திட்ட²ந்தி, ஸாகா²பலாஸம் ப⁴ஞ்ஜிதும் வட்டதி, ந அஞ்ஞதா². ‘யேஹி கேஹிசி வா அச்சி²ன்னம் ஹோதீ’தி ஹி வுத்த’’ந்தி வுத்தம். ஆசரியோ பன ஏவம் வத³தி ‘‘அத்தனோ ருசியாபி தா³தும் லப⁴ந்தீ’’தி. ததா² ஹி அட்ட²கதா²யம் ‘‘பரிபோ⁴க³ஜிண்ணம் வா’தி ஏத்த² ச ‘அச்சி²ன்னசீவரானம் ஆசரியுபஜ்ஜா²யாதீ³னம் அத்தனா திணபண்ணேஹி படிச்சா²தே³த்வா தி³ன்னசீவரம்பி ஸங்க³ஹம் க³ச்ச²தீ’தி வத்தும் யுஜ்ஜதீ’’தி வுத்தம். அதா²பி ஸியா ஆசரியாதீ³ஹி ‘‘ஆஹராவுஸோ’’தி வுத்தேயேவ, நாவுத்தேதி, ந, ‘‘கேஹிசி வா அச்சி²ன்ன’’ந்தி ஏத்த² வுத்தலேஸதோ து³தியலேஸஸ்ஸ அவிஸேஸபா⁴வப்பஸங்க³தோதி. அத² கிமத்த²ம் ‘‘ந தாவ தே²ரானம் தா³தப்³பா³னீ’’தி வுத்தந்தி சே? யாவ தே²ரானம் அத்தா²ய ஸாகா²பலாஸானி ப⁴ஞ்ஜதி, தாவ ந தா³தப்³பா³னி, ததோ தானி தே²ருத்³தி³ஸ்ஸகானி ஸாகா²பலாஸானி ஸயம் பரித³ஹித்வா வினாபி தே²ராணத்தியா அத்தனோ ருசியா தா³தப்³பா³னி, பூ⁴தகா³மபாதப்³யதாய பாசித்தியம் ந ஹோதி ஸத்து²னாபி அனுஞ்ஞாதத்தா. ‘‘திணேன வா பண்ணேன வா’’தி ஹி வுத்தம், தம் கப்பியமேவ ஸந்தா⁴ய வுத்தந்தி சே? ந, ‘‘தத³லாபே⁴ ந த்வேவ…பே… து³க்கடஸ்ஸா’’தி வசனவிரோத⁴தோ. ஏத்தா²ஹ – து³க்கடப⁴யா பாசித்தியவத்து² சே அதிக்கமிதப்³ப³ம், தத³லாபே⁴ து²ல்லச்சயவத்து² ஸங்கி⁴கம், தத³லாபே⁴ பாராஜிகவத்து²பி அதிக்கமிதப்³ப³ம் ஸியாதி? ந, பாராஜிகஸ்ஸ லோகவஜ்ஜத்தா. அபிச ந ஸப்³ப³ம் பூ⁴தகா³மம் பாசித்தியவத்து²மேவ, ததோ து³க்கடாதி³வத்து²பி அத்தி², அனாபத்திவத்து²பி காலோதி³ஸகம், தஸ்மா இத³ம் ததா³ அனாபத்திவத்து²கந்தி வேதி³தப்³ப³ம். கித்தாவதா பி⁴க்கு² அச்சி²ன்னசீவரோ நட்ட²சீவரோ ஹோதீதி? ஏத்தாவதா நக்³கோ³ ஹோதீதி ஏகே. விகப்பனுபக³பச்சி²மபா⁴வேன, விகப்பனுபக³பச்சி²மமாதி³ம் கத்வா விஞ்ஞாபேந்தஸ்ஸ ஆபத்தீதி ஏகே. நிவாஸனபாருபனுபகா³பா⁴வேனாதி ஏகே. திசீவராபா⁴வேனாதி ஏகே. ஸந்தருத்தரபரமாபா⁴வேனாதி ஏகே. அயம் ஏகேவாதோ³ யுத்தோ ‘‘ஸந்தருத்தரபரமம் ததோ சீவரம் ஸாதி³தப்³ப³’’ந்தி ஹி வசனதோ, தஸ்மா ஸந்தருத்தரே ஸதி விகப்பனுபக³பச்சி²மம் விஞ்ஞாபேந்தஸ்ஸ படிலாபே⁴ன நிஸ்ஸக்³கி³யம். யதி³ ஏவம் ‘‘விஞ்ஞாபேத்வா படிலபே⁴ய்ய நிஸ்ஸக்³கி³ய’’ந்தி ஸிக்கா²பதே³ன ப⁴விதப்³ப³ந்தி சே? தன்ன, தத³த்த²ஸித்³தி⁴தோ நானத்த²த்தா தா⁴தூனம். கிம் வுத்தம் ஹோதி? யதா² ஹி ‘‘திக்க²த்தும் மேது²னம் த⁴ம்மம் அபி⁴விஞ்ஞாபேஸீ’’தி (பாரா. 36) வுத்தே பவத்தேஸீதி அத்தோ², ததா² இதா⁴பி ‘‘சீவரம் விஞ்ஞாபேய்யா’’தி விஞ்ஞத்தியா பவத்தேய்ய உப்பாதே³ய்யாதி அத்தோ².

தேன நிவத்தோ²தி தம்னிவத்தோ². அஞ்ஞஸ்ஸ அலாபே⁴ன தமேவ பரிபு⁴ஞ்ஜதோ ஜிரதி, ந லேஸேன. அத்தனாதி ஸயமேவ வத்தும் யுஜ்ஜதி, தஸ்மா அயுத்தபரிபோ⁴கே³ன அபரிபு⁴ஞ்ஜித்வா யுத்தபரிபோ⁴க³வஸேன பரிபு⁴ஞ்ஜதோ ஜிண்ணம் பரிபோ⁴க³ஜிண்ணம் நாம. தஸ்ஸ ஸபா⁴கா³னம் அச்சி²ன்னகாலே தா³னம்பி யுத்தபரிபோ⁴கே³ ஏவ ஸங்க³ஹம் க³ச்ச²தீதி அதி⁴ப்பாயோ. ‘‘இமே கிர த்³வே லேஸா அட்ட²கதா²யோ, வாசேந்தானம் ஆசரியானம் மதந்தி த⁴ம்மஸிரித்தே²ரோ ஆஹா’’தி வுத்தம்.

521. நிஸீதி³தும் வா நிபஜ்ஜிதும் வா ந லப⁴தீதி யதா²ஸுக²ம் ந லப⁴தீதி அதி⁴ப்பாயோ. ‘‘அஞ்ஞஸ்ஸத்தா²யா’’தி ஏத்தா²பி ‘‘ஞாதகானம் பவாரிதான’’ந்தி அனுவத்ததி ஏவ. அத்தா²ய கஸ்ஸ? தஸ்ஸேவ அஞ்ஞஸ்ஸ. யதா² அஞ்ஞாதகே திகபாசித்தியம், ததா² அப்பவாரிதேபீதி த³ஸ்ஸனத்த²ம் ‘‘ஞாதகானம் பவாரிதான’’ந்தி வுத்தம். அஞ்ஞதா² ‘‘ஞாதகே ஞாதகஸஞ்ஞீ’’தி இமினா ஸித்³த⁴த்தா ந நிச்சம் ஸேஸம் ஆபஜ்ஜதி. அபிசேத்த² அஞ்ஞாதகக்³க³ஹணேன அப்பவாரிதக்³க³ஹணம் ஹோதி, அப்பவாரிதக்³க³ஹணேன அஞ்ஞாதகக்³க³ஹணம், அஞ்ஞாதகா ஹி அப்பவாரிதா ஹோந்தி. ததா² ஞாதகக்³க³ஹணேன பவாரிதக்³க³ஹணம் ஹோதி, கத்த²சி ந ஹோதி. ந பவாரிதக்³க³ஹணேன ஞாதகக்³க³ஹணம் ஹோதீதி இமஸ்ஸ அத்த²விஸேஸஸ்ஸ த³ஸ்ஸனத்த²ம் ‘‘ஞாதகானம் பவாரிதான’’ந்தி வுத்தம். ததா² ஹி அஞ்ஞாதிகாய பி⁴க்கு²னியா அப்பவாரிதாய ச சீவரம் அஞ்ஞத்ர பாரிவத்தகா படிக்³க³ண்ஹந்தஸ்ஸ ஆபத்தி. ஞாதிகாய பன பவாரிதாய ச விஸ்ஸாஸம் க³ண்ஹாதி, அனாபத்தி. ததா² புராணசீவரம் ஞாதிகாய அனாபத்தி, பவாரிதாய பன திகபாசித்தியமேவ. ஞாதகானஞ்ச ஏகச்சானம் புராணசீவரம் நாம தா³தும் வட்டதி, ந பவாரிதானம். திகச்சே²தோ³ ச மாதிகாபதே³னேவ ஹோதி, ந அஞ்ஞேன. தத்தா²பி ஏகேனேவ, ந து³தியாதீ³ஹீதி அயம் வினயே த⁴ம்மதா வேதி³தப்³பா³.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.