7. ததுத்தரிஸிக்கா²பத³வண்ணனா

522-4. பக்³கா³ஹிகஸாலம் வாதி து³ஸ்ஸபஸாரம் வா. ஹத்தே²ன பக்³க³ஹேத்வா ட²த்வா ஸாலாயம் பஸாரேதப்³ப³து³ஸ்ஸம் பஸாரேந்தீதி சோத³னா. திசீவரிகேனேவாதி வினயதிசீவரிகேன. ஸோ ஹி அதி⁴ட்ட²ஹித்வா ட²பிதபரிக்கா²ரசோளாதீ³ஸு ஸந்தேஸுபி திசீவரே அச்சி²ன்னே ஸந்தருத்தரபரமம் விஞ்ஞாபேத்வா க³ஹேதும் லப⁴தி. அஞ்ஞதா²பீதி ‘‘பமாணிகம் திசீவரம் பரிக்கா²ரசோளவஸேன அதி⁴ட்ட²ஹித்வா பரிபு⁴ஞ்ஜதோ தஸ்மிம் நட்டே² ப³ஹூனிபி க³ஹேதும் லப⁴தி, ந ஸந்தருத்தரபரம’’ந்தி ச, தஸ்மா தம் விபா⁴க³ந்தி ‘‘திசீவரிகஸ்ஸ தம் விபா⁴க³ந்தி அத்தோ², ந பரிக்கா²ரசோளிகஸ்ஸா’’தி ச கேசி வத³ந்தி. ஆசரியோ பன ‘‘அஞ்ஞேனாதி அதிசீவரிகேன, அஞ்ஞதா²தி இதோ வுத்தக்³க³ஹணபரிச்சே²த³தோ அஞ்ஞேனா’’தி ஏத்தகமேவ வத³தி. அஞ்ஞதா²தி பன ஸசே தீணிபி நட்டா²னி, ஸந்தருத்தரபரமம் க³ண்ஹிதப்³ப³ம், ஸசே த்³வே வா ஏகம் வா நட்ட²ம், தேன ‘‘அஞ்ஞதா²பீ’’தி த³ஸ்ஸனத்த²ம் வுத்தந்தி ஏகே. க³ண்டி²பதே³ஸு விசாரணா ஏவ நத்தி², தஸ்மா உபபரிக்கி²த்வா க³ஹேதப்³ப³ம். பகதியா ஸந்தருத்தரேன சரதி, ஸாஸங்கஸிக்கா²பத³வஸேன வா தம்ஸம்முதிவஸேன வா ததியஸ்ஸ அலாபே⁴ன வா.

526. ‘‘பமாணமேவ வட்டதீ’’தி ஸல்லேக²த³ஸ்ஸனத்த²ம் வுத்தம். தம் மிச்சா² க³ஹேத்வா ஞாதகாதி³ட்டா²னே தது³த்தரி க³ண்ஹந்தஸ்ஸ ஆபத்தீதி சே? தம் பாளியா ந ஸமேதி, ‘‘அனாபத்தி ஞாதகானம் பவாரிதான’’ந்தி ஹி பாளி. ஏத்த² ச பவாரிதா நாம அச்சி²ன்னகாலதோ புப்³பே³ ஏவ பவாரிதா, ந அச்சி²ன்னகாலே. ‘‘அபி⁴ஹட்டு²ம் பவாரேய்யா’’தி ஹி வுத்தம், தஸ்மா யோ அச்சி²ன்னகாலஸ்ஸத்தா²ய பவாரேதி, உபோ⁴பி அப்பவாரிதா ஏவாதி வேதி³தப்³பா³. தே ஹி அச்சி²ன்னகாரணா நட்ட²காரணாவ தே³ந்தி நாம. அபிச யதா² பிட்டி²ஸமயே ஸதுப்பாத³ம் கத்வா ஞாதகபவாரிதட்டா²னதோ வஸ்ஸிகஸாடிகம் நிப்பா²தே³ந்தஸ்ஸ தேன ஸிக்கா²பதே³ன நிஸ்ஸக்³கி³யம், ததா² இதா⁴பி ஞாதகபவாரிதட்டா²னேபி அச்சி²ன்னனட்ட²காரணா ந வட்டதி, தஸ்மா ‘‘அட்ட²கதா²ஸு பமாணமேவ வட்டதீ’தி வுத்தவசனமேவ பமாண’’ந்தி த⁴ம்மஸிரித்தே²ரோ ஆஹ, தம் அயுத்தம், கஸ்மா? யஸ்மா இத³ம் ஸிக்கா²பத³ம் தது³த்தரி விஞ்ஞாபேந்தஸ்ஸ பஞ்ஞத்தம், தஸ்மிஞ்ச ‘‘அஞ்ஞாதகோ க³ஹபதி வா க³ஹபதானீ வா’’தி மாதிகாய பாளி, விப⁴ங்கே³ ச ‘‘அஞ்ஞாதகோ நாம மாதிதோ வா…பே… அஸம்ப³த்³தோ⁴’’தி பாளி, அனாபத்திவாரே ச ‘‘ஞாதகானம் பவாரிதான’’ந்தி பாளி, தஸ்மா திவிதா⁴யபி பாளியா ந ஸமேதீதி அயுத்தமேவ, தஸ்மா கேவலம் ஸல்லேக²மேவ ஸந்தா⁴ய வுத்தந்தி அபரே. உபரி காணமாதாஸிக்கா²பதே³ அட்ட²கதா²ஸு பன ‘‘தேஸம்பி பாதே²ய்யபஹேணகத்தா²ய படியத்ததோ பமாணமேவ வட்டதீ’’தி வுத்தம், ந பன ‘‘பாளியா ந ஸமேதீ’’தி வுத்தம், ந தத்த² ச இத⁴ ச நானாகரணம் பஞ்ஞாயதி, தஸ்மா தே²ரஸ்ஸ லத்³தி⁴ ஸுந்த³ரா விய மம கா²யதி, வீமம்ஸிதப்³ப³ம். யஸ்மா பனித³ம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தம். ‘‘ஸேஸம் உத்தானத்த²மேவா’’தி பாடோ². ‘‘அஞ்ஞஸ்ஸத்தா²யா’’தி நிதா³னவிரோத⁴தோ ந வுத்தம். ததா²பி அனந்தரே வுத்தனயேன லப்³ப⁴தீதி ஆசரியோ. ஏவரூபேஸு க³ஹபதிபடிஸம்யுத்தஸிக்கா²பதே³ஸு கிஞ்சாபி ‘‘க³ஹபதி நாம யோ கோசி அகா³ரம் அஜ்ஜா²வஸதீ’’தி வுத்தம், ததா²பி பஞ்ச ஸஹத⁴ம்மிகே ட²பேத்வா அவஸேஸா ச ஸிக்கா²பச்சக்கா²தகோ ச தித்தி²யோ ச வேதி³தப்³போ³.

ததுத்தரிஸிக்கா²பத³வண்ணனா நிட்டி²தா.