3. ததியகதி²னஸிக்கா²பத³வண்ணனா

497. நப்பஹோதீதி லாமகபரிச்சே²த³ம் ந பாபுணாதி, தேனேவ திசீவரஸ்ஸ முட்டி²பஞ்சகாதி³லாமகபரிச்சே²தோ³வ தாவ வுத்தோ. சீவரே பச்சாஸா சீவரபச்சாஸா. தேனேதம் தீ³பேதி – தம் சீவரம் பச்சா² லப்³ப⁴து வா மா வா, யாவ ஸா பச்சாஸா சி²ஜ்ஜதி, தாவ இத³ம் மூலசீவரம் ட²பேதும் அனுஜானாமீதி. ‘‘சீவரபச்சாஸா’’தி மரியாத³த்தே² நிஸ்ஸக்கவசனம், பு⁴ம்மத்தே² வா பச்சத்தவசனம் கதம்.

499-500. நிட்டி²தசீவரஸ்மிம் …பே… சீவராஸா வா உபச்சி²ன்னாதிஆதி³ம்ஹி தீஸு சீவரேஸு அஞ்ஞதரம் கதம் ஹோதி, ஸேஸா அத்தி², ரக்க²தி. சீவரபலிபோ³த⁴ஸ்ஸ உபச்சே²தே³, உப்³ப⁴தஸ்மிஞ்ச கதி²னே ஸமயே வா ஹேமந்தஸ்ஸ ஸமயே வா அகாலசீவரம் உப்பஜ்ஜேய்ய, கி²ப்பமேவ காரேதப்³ப³ம். ஸதி பாரிபூரியா பச்சாஸா ந ரக்க²தி, அஸதி நத்தி² சே பச்சாஸா, ந ரக்க²தி. ‘‘அனத்த²தே கதி²னே ஏகாத³ஸமாஸே உப்பன்ன’’ந்தி வசனதோ அபரகத்திகா அத்த²தே வா அனத்த²தே வா ஸமயோவ. ஹேமந்தோ ஸியா ஸமயோ அத்த²தே, ஸியா அஸமயோ அனத்த²தே. ததோ பரம் ஏகம்ஸதோ அஸமயோ வாதி. ‘‘ஆதி³ஸ்ஸ தி³ன்ன’’ந்தி இத³ம் இத⁴ அலப்³ப⁴மானம்பி அத்து²த்³தா⁴ரவஸேன வுத்தம் பி⁴க்கு²னீனம் து³தியனிஸ்ஸக்³கி³யே (பாசி. 738 ஆத³யோ) ஸேஸம் அகாலசீவரம் விய. தத்த² ஹி பி⁴க்கு²னிஸங்க⁴ஸ்ஸ ‘‘ஸம்பத்தா பா⁴ஜேந்தூ’’தி ஏவம் ஆதி³ஸ்ஸ தி³ன்னமேவ ‘‘அகாலசீவரம் காலசீவர’’ந்தி அதி⁴ட்ட²ஹித்வா பா⁴ஜேந்தியா நிஸ்ஸக்³கி³யம். ததா² ஹி தத்த² யதா² ‘‘அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்ன’’ந்தி இத³ம் அத்து²த்³தா⁴ரவஸேன வுத்தம், ஏவம்ஸம்பத³மித³ம். யதி³ ஏவம் ‘‘ஏகபுக்³க³லஸ்ஸ இத³ம் துய்ஹம் த³ம்ஹீதி தி³ன்ன’’ந்தி இத³ம் கிமத்த²ம் வுத்தம், ந ஹி தம் பா⁴ஜனீயந்தி சே? அபா⁴ஜனீயஸாமஞ்ஞதோ வுத்தம் ஹோதி. யதா² ஸங்க⁴ஸ்ஸ ஆதி³ஸ்ஸ தி³ன்னம் அத்த²தகதி²னேஹி ஏவ பி⁴க்கூ²ஹி அபா⁴ஜனீயத்தா அகாலசீவரம் நாம ஜாதம், ஏவம் புக்³க³லிகம்பி இதரேஹீதி அத்தோ². ஏவம் ஸந்தேபி கஸ்ஸசி ஸியா ‘‘ஆதி³ஸ்ஸ தி³ன்னம்பி த³ஸாஹமேவ பரிஹாரம் லப⁴தீ’’தி. தஸ்ஸேதம் பாடிகங்க²ம். பட²மகதி²னே ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி இத³ஞ்ஹி நிரத்த²கந்தி. அனுப்³ப⁴தஸ்மிம்பி ஹி கதி²னே த³ஸாஹபரமமேவ தா⁴ரேதப்³ப³ந்தி விஞ்ஞாதத்தா அனாதி³ஸ்ஸ தி³ன்னமேவ ஸந்தா⁴யேதம் வுத்தம் ஸியாதி சே? ஏவம் ஸந்தேபி அனாதி³ஸ்ஸ தி³ன்னம்பி அனத்த²தகதி²னானம் அபரகத்திகாய த³ஸாஹமேவ பரிஹாரம் லப⁴தி ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வுத்தத்தா. ஆமந்தாதி சே? ‘‘அனத்த²தே கதி²னே ஏகாத³ஸமாஸே உப்பன்ன’’ந்தி வசனேன விருஜ்ஜ²தி, தஸ்மா யதா²வுத்தனயேனேவேத்த² ஸன்னிட்டா²னம் க³ந்தப்³ப³ம்.

அனுக³ண்டி²பதே³ வுத்தம் ‘‘பட²மஸிக்கா²பதே³ ஸப்³ப³சீவரானம் யாவத³த்த²சீவரவஸேன கதி²னமாஸப்³ப⁴ந்தரே த³ஸாஹாதிக்கமேபி அனாபத்தி பரிஹாரஸ்ஸ தி³ன்னத்தா. யதா² கதி²னமாஸப்³ப⁴ந்தரே ஆதி³ஸ்ஸ தி³ன்னமகாலசீவரம் காலசீவரபரிஹாரமேவ லப⁴தி, ததா² இதரமாஸேபி லப⁴தீதி வேதி³தப்³ப³ம். தஸ்மா ஏவம் ‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே பி⁴க்கு²னோ பனேவ சீவரம் உப்பஜ்ஜேய்யா’திஆதி³னா ஸிக்கா²பதே³ ஸித்³தே⁴பி அனத்த²தகதி²னானம் பச்சி²மகத்திகமாஸம் அனுஜானந்தேன ‘அகாலசீவரம் உப்பஜ்ஜேய்யா’தி வுத்தம். ஏவஞ்ஹி அவுத்தே அகாலசீவரம் நாம ‘அனத்த²தே கதி²னே ஏகாத³ஸமாஸே உப்பன்ன’ந்தி ந ஸக்கா வத்தும். ஏவஞ்ஹி வசனதோ அனத்த²தகதி²னானம் அத்த²தகதி²னானம் விய ஸப்³ப³சீவரானம் பச்சி²மகத்திகமாஸே த³ஸாஹாதிக்கமே நிஸ்ஸக்³கி³யம் ந ஹோதீ’’திஆதி³.

பி⁴ய்யோபி ஏவம் வுத்தம் – யம் பன மயா ‘‘பட²மகதி²னே த³ஸாஹபரமம் அதிரேகசீவரம் தா⁴ரேதப்³ப³’’ந்தி அனுஞ்ஞாதம், தம்பி கதி²னமாஸதோ ப³ஹி உப்பன்னமேவ, ந அந்தோதி அயமத்தோ² தீ³பிதோ ஹோதி. கத²ம்? அதிரேகசீவரஸ்ஸ த³ஸாஹபரிஹாரதோ உத்³த⁴ம் ஆபஜ்ஜிதப்³பா³பத்திம் ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி அனுபஞ்ஞத்தியா கதி²னப்³ப⁴ந்தரே வாரேத்வா ததோ உத்³த⁴ம் உப்பன்னேஸு த³ஸாஹாதிக்கமே ஆபஜ்ஜிதப்³பா³பத்திம் இமினா ஸிக்கா²பதே³ன வாரேதும் ‘‘அகாலசீவரம் உப்பஜ்ஜேய்யா’’திஆதி³ வுத்தம். தேன ‘‘காலேபி ஆதி³ஸ்ஸ தி³ன்னம், ஏதம் அகாலசீவரம் நாமா’’தி வசனதோ கதி²னுப்³பா⁴ரதோ உத்³த⁴ம் த³ஸாஹபரிஹாரம் ந லப⁴தீதி தீ³பிதம் ஹோதி, தேஹி ஸத்³தி⁴ம் புன கதி²னுப்³பா⁴ரதோ உத்³த⁴ம் பஞ்ச தி³வஸானி லப⁴தீதி பஸங்கோ³பி ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே பி⁴க்கு²னோ பனேவ அகாலசீவரம் உப்பஜ்ஜேய்ய…பே… கி²ப்பமேவ காரேதப்³ப³’’ந்தி அகாலசீவரஸ்ஸ உப்பத்திகாலம் நியமேத்வா வுத்தத்தா நிவாரிதோ ஹோதி, தது³ப⁴யேன கதி²னப்³ப⁴ந்தரே உப்பன்னசீவரம் கதி²னுப்³பா⁴ரதோ உத்³த⁴ம் ஏகதி³வஸம்பி பரிஹாரம் ந லப⁴தீதி ஸித்³த⁴ம் ஹோதி. ஏவம் அபரே வத³ந்தீதி.

புனபி வுத்தம் – ஆசரியா பன ஏவம் வதே³ய்யும் ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே பி⁴க்கு²னோ பனேவ அகாலசீவரம் உப்பஜ்ஜேய்யா’’தி ஏத்த² ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வத³ந்தோ ஏவம் விஞ்ஞாபேதி ‘‘ஏத்த²ந்தரே திண்ணன்னம்பி அகாலசீவரானம் உப்பத்தி அபா⁴வ’’ந்தி. கஸ்மா பன பத³பா⁴ஜனே வித்தா²ரிதானீதி? வுச்சதே – இத³ம் ஸிக்கா²பத³ம் அதி⁴ட்டா²னம் ஸந்தா⁴ய வுத்தம், கிந்து பட²மே த³ஸாஹம் அனுஜானித்வா தஸ்மிம் அப்பஹோந்தே ஸசே பச்சாஸா அத்தி², தமேவ வட்³டே⁴த்வா மாஸம் அனுஜானந்தோ இமம்பி அத்த²விஸேஸம் தீ³பேதி அகாலசீவரம் நாம ஸம்முகீ²பூ⁴தேன பா⁴ஜேதப்³ப³ந்திபி தீ³பேதி. தம் பன ‘‘ஆகங்க²மானேன பி⁴க்கு²னா படிக்³க³ஹேதப்³ப³’’ந்தி இமினா ஸிக்கா²பதே³ன வட்³டே⁴த்வா வுத்தந்தி, தஸ்மா தீணிபி பத³பா⁴ஜனே வித்தா²ரிதானீதி.

‘‘கி²ப்பமேவ காரேதப்³ப³ந்தி த³ஸாஹா காரேதப்³ப³’’ந்தி இத³ம் பன பஹோனகபா⁴வே புரிமஸிக்கா²பத³லக்க²ணேனாதி தீ³பேதும் வுத்தம், தஸ்மா ‘‘ஏவம் ஸீக⁴ந்தி வா லஹுந்தி வா’’திஆதி³னா அவத்வா ‘‘த³ஸாஹா’’தி வுத்தம். அத்த²தகதி²னஸ்ஸ ஏவம் ஹோது, அனத்த²தே பன கதி²னே கத²ந்தி வுத்தே அனத்த²தஸ்ஸ படிக்கே²பதம் த³ஸ்ஸேதீதி வுத்தோ அபஸ்ஸந்தோ விகா⁴தம் ஆபஜ்ஜதீதி. ஏகதிம்ஸே அருணுக்³க³மனே நிஸ்ஸக்³கி³யந்தி மஹந்தேனபி பச்சாஸாசீவரேன ஸஹ க⁴டிதம்பி தப்³பா⁴வம் அனுபதித்வா நிஸ்ஸக்³கி³யம் ஹோதி ஸதி பச்சி²மப்பமாணஸம்ப⁴வே, அஸதி ந ஹோதி, புன க⁴டிதே ஹோதி, அஞ்ஞேன க⁴டிதே ந ஹோதி. சி²ன்னம் அஞ்ஞவத்து² ஹோதி. புப்³ப³பரிச்சே²த³ம் அதிக்கந்தம் க⁴டிதம் புன அஞ்ஞபரிச்சே²த³ம் லப⁴தீதி ஏகே, உபபரிக்கி²த்வா க³ஹேதப்³ப³ம். அஞ்ஞதரஸ்மிம் க³ண்டி²பதே³ பன ‘‘ஸங்க⁴ஸ்ஸ வா இத³ம் அகாலசீவரந்தி உத்³தி³ஸ்ஸ தி³ன்ன’ந்தி ஏத்த² ஸங்க⁴ஸ்ஸ தி³ன்னே ஆபத்தி நாம நத்தி², ‘ஸோதஸ்ஸ ரஹோ’திஆதீ³ஸு விய பது³த்³தா⁴ரேன வுத்தம், தஸ்ஸ லாப⁴ம் ஸந்தா⁴யாதி சே? ஸங்க⁴தோ வா உப்பஜ்ஜேய்யாதி அனேன ஸித்³த⁴த்தா அதி⁴கமேவா’’தி ச ‘‘ஸங்கோ⁴ சீவரானி லபி⁴ஸ்ஸதி க³ணோ வா’திஆதி³னாபி பாடோ² அத்தீ²’’தி ச வுத்தம். க³ண்டி²பதே³ கோஸல்லத்த²ம் பன மயா ஸப்³ப³ம் லிகி²தம், ஸுட்டு² விசாரேத்வா கதே²தப்³ப³ம்.

ததியகதி²னஸிக்கா²பத³வண்ணனா நிட்டி²தா.