4. புராணசீவரஸிக்கா²பத³வண்ணனா

503-505. ப⁴த்தவிஸ்ஸக்³க³ந்தி ப⁴த்தகிச்சாதி⁴ட்டா²னம். ப⁴த்தகிச்சாதி⁴ட்டா²னவிபா⁴க³ந்தி போராணா. தத்த² நாம த்வந்தி தத்த² தயா கதகம்மே ஏவம் அகத்தப்³பே³ ஸதி தோ⁴வாபிஸ்ஸஸி நாம. அத² வா ஸோ நாம த்வந்தி அத்தோ². உப⁴தோஸங்கே⁴ உபஸம்பன்னாதி பி⁴க்கூ²னம் ஸந்திகே உபஸம்பதா³ய படிக்கி²த்தத்தா தத³னுபஸங்க³ப⁴யா ஏவம் வுத்தந்தி வேதி³தப்³ப³ம். ‘‘புராணசீவர’’ந்தி ஏத்த² புராணபா⁴வதீ³பனத்த²மேவ ‘‘ஸகிம் நிவத்த²ம்பி ஸகிம் பாருதம்பீ’’தி வுத்தம், தஸ்மா ‘‘சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²ம’’ந்தி வசனஸ்ஸ ஓகாஸோ ந ஜாதோதி ஏகே. யஸ்மா விகப்பனுபக³பச்சி²மம் இத⁴ நாதி⁴ப்பேதம், நிவாஸனபாருபனுபக³மேவாதி⁴ப்பேதம், தேனேவ நிஸீத³னபச்சத்த²ரணே து³க்கடம் வுத்தம், தஸ்மா ந வுத்தந்தி ஏகே. ஜாதிப்பமாணாவசனதோ யம் கிஞ்சி புராணவத்த²ம் தோ⁴வாபேந்தஸ்ஸ நிஸ்ஸக்³கி³யமேவ, தேனேவ ‘‘அனாபத்தி சீவரம் ட²பேத்வா அஞ்ஞம் பரிக்கா²ரம் தோ⁴வாபேதீ’’தி வுத்தம். த²விகம்பி ஹி அஸுசிமக்கி²தம் பரிபு⁴த்தம் தோ⁴வாபேதி, நிஸ்ஸக்³கி³யமேவ ஓளாரிகத்தா, அப்பதிரூபத்தா ச. தேனேவ கங்கா²விதரணியம் இமஸ்மிம் டா²னே சீவரபரிச்சே²தோ³ ந வுத்தோதி ஏகே, விசாரேத்வா யுத்ததரம் க³ஹேதப்³ப³ம். ‘‘ரஜித்வா கப்பம் கத்வாதி கப்பியம் கதமேவ நிவாஸேதும், பாருபிதும் வா வட்டதி, நேதர’’ந்தி வுத்தம். இமினா ச மஜ்ஜி²மத்தே²ரவாதோ³ உபத்த²ம்பி⁴தோ ஹோதி, நோபத்த²ம்பி⁴தோ. ரஜித்வாதிஆதி³ பன வினயவிதி⁴த³ஸ்ஸனத்த²ம் வுத்தந்தி மம தக்கோ. யதா² அஞ்ஞாதிகாய அஞ்ஞாதிகஸஞ்ஞீவாரே தீணி சதுக்கானி, ஏவம் வேமதிகஞாதிகவாரேஸு சாதி நவ சதுக்கானி ஹோந்தி. ஏத்தா²ஹ – ஏகவாரம் தோ⁴வித்வா தோ⁴வனேஸு து⁴ரம் நிக்கி²பித்வா புன ‘‘து³த்³தோ⁴த’’ந்தி மஞ்ஞமானா தோ⁴வதி, அனாபத்தியா ப⁴விதப்³ப³ம், து³தியவாரம் அவுத்தா தோ⁴வதி நாம ஹோதீதி? வுச்சதே – ஸசே பி⁴க்கு² ‘‘அலம் ஏத்தாவதா தோ⁴தேனா’’தி படிக்கி²பதி, புன தோ⁴வந்தீ அவுத்தா தோ⁴வதி நாமாதி யுஜ்ஜதி. நோ சே, வுத்தாவ ஹோதீதி வேதி³தப்³ப³ம். பி⁴க்கு²ஸ்ஸ லிங்க³பரிவத்தனே ஏகதோஉபஸம்பன்னாய வஸேன ஆபத்தி ஸாகியானீனம் விய.

506. ஏகேன வத்து²னாதி யேன கேனசி பட²மேன. ‘‘திண்ணம் சதுக்கானம் வஸேனா’’தி பாடோ². பி⁴க்கூ²னம் ஸந்திகே அட்ட²வாசிகாய உபஸம்பன்னாய பாகடத்தா தம் அவத்வா ஸாகியானியோவ வுத்தா அபாகடத்தா.

புராணசீவரஸிக்கா²பத³வண்ணனா நிட்டி²தா.