2. உதோ³ஸிதஸிக்கா²பத³வண்ணனா

471. ஸந்தருத்தரேன ஜனபத³சாரிகம் பக்கமந்தி. கஸ்மா? கிஞ்சாபி ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³, யோ பவிஸேய்ய, ஆபத்தி து³க்கடஸ்ஸா’’தி (மஹாவ. 362) பட²மம் வுத்தம். பச்சா² பன ‘‘பஞ்சிமே, பி⁴க்க²வே, பச்சயா ஸங்கா⁴டியா நிக்கே²பாய, உத்தராஸங்க³ஸ்ஸ, அந்தரவாஸகஸ்ஸ நிக்கே²பாய கி³லானோ வா ஹோதி, வஸ்ஸிகஸங்கேதம் வா, நதீ³பாரம் க³ந்தும் வா, அக்³க³ளகு³த்திவிஹாரோ வா, அத்த²தகதி²னம் வா ஹோதீ’’தி வுத்தத்தா, அட்ட²கதா²யம்பிஸ்ஸ ‘‘பஞ்சஸு பேதேஸு அக்³க³ளகு³த்தி ஏவ பமாணம். கு³த்தே ஏவ ஹி விஹாரே நிக்கி²பித்வா ப³ஹி க³ந்தும் வட்டதி, நாகு³த்தே’’தி வுத்தத்தா அபஞ்ஞத்தேபி கதி²னே ‘‘தே பி⁴க்கூ² அக்³க³ளகு³த்திவிஹாரே ட²பேதா²’’தி வத்வா ஸபா⁴கா³னம் ஹத்தே² சீவரம் நிக்கி²பித்வா ஸந்தருத்தரேன கா³மப்பவேஸே லத்³த⁴கப்பியா ஜனபத³சாரிகம் பக்காமிம்ஸூதி வேதி³தப்³ப³ம்.

473. அவிப்பவாஸஸம்முதிந்தி அவிப்பவாஸத்த²ம், விப்பவாஸபச்சயா யா ஆபத்தி, தத³பா⁴வத்த²ம் வா ஸம்முதிம் தா³துந்தி அத்தோ². ததோ பட்டா²ய வட்டதி. கித்தகம் காலம் வட்டதீதி? மாஸம் வா அதிரேகம் வா யாவ க³மனே ஸஉஸ்ஸாஹோ, தாவ வட்டதி. தேன வுத்தம் ‘‘து⁴ரனிக்கே²பம் கரோந்தேன பச்சுத்³த⁴ரிதப்³ப³’’ந்தி. புன ஸம்முதிதா³னகிச்சம் நத்தீ²தி ஸசே த்³வாத³ஸன்னம் வஸ்ஸானம் அச்சயேன அஞ்ஞோ ரோகோ³ ஹோதி, வட்டதி, உபஸம்பத³கம்மம் விய யாவஜீவம் ஏகாஸம்முதி வட்டதீதி ச.

‘‘கதம் வா ஹோதீ’’திஆதி³ இமஸ்மிம் ஸிக்கா²பதே³ ந வத்தப்³ப³ம், கஸ்மா? கரணபலிபோ³தே⁴ உபச்சி²ன்னேபி அனதி⁴ட்டி²தசீவரதோ விப்பவாஸபச்சயா ஆபத்தியா அஸம்ப⁴வதோ, தஸ்மா ‘‘நிட்டி²தசீவரஸ்மிந்தி பி⁴க்கு²னோ சீவரம் அதி⁴ட்டி²தம் ஹோதீ’’தி ஏத்தகமேவ வத்தப்³ப³ந்தி சே? ந, ததா³யத்தத்தா. அதி⁴ட்டா²னஞ்ஹி கரணபலிபோ³த⁴ஸ்ஸ நிட்டா²பனாயத்தம், தஸ்மா ‘‘கதம் வாதிஆதி³ வுத்த’’ந்தி ச வுத்தம். தத்த² கதந்தி புப்³பே³ வுத்தமேவ.

477-8. அவிப்பவாஸலக்க²ணவவத்தா²பனத்த²ந்தி ஏத்த² ‘‘அந்தோகா³மே சீவரம் நிக்கி²பித்வா அந்தோகா³மே வத்த²ப்³ப³’’ந்திஆதி³வசனதோ அவிப்பவாஸலக்க²ணம் வவத்தா²பிதம், தப்³பி³பரீதனயேன விப்பவாஸலக்க²ணம் வேதி³தப்³ப³ம். கா³மோ ஏகூபசாரோதிஆதி³ம்ஹி பன ட²பேத்வா ஸத்த²ம், ருக்க²மூலம், அஜ்ஜோ²காஸஞ்ச ஸேஸேஸு பரிக்கே²பாபரிக்கே²பவஸேன ஏகூபசாரனானூபசாரதா வேதி³தப்³பா³. யஸ்மா பன ஸத்த²ம் து³வித⁴ம் நிவிட்ட²ம், அனிவிட்ட²ஞ்ச, தேஸு அனிவிட்ட²ம் ஏககுலஸ்ஸ வா நானாகுலஸ்ஸ வா அபரிக்கி²த்தமேவ ஹோதி, நிவிட்ட²ம் ஸியா பரிக்கி²த்தம், ஸியா அபரிக்கி²த்தம், தஸ்மா தத்த² பரிக்கே²பாதி³வஸேன அத³ஸ்ஸேத்வா அப்³ப⁴ந்தரவஸேன வுத்தோ. ததா² அப்³போ⁴காஸே. ருக்க²மூலே சா²யாவஸேன. அஞ்ஞதா² ‘‘ஸத்தோ² ஏகூபசாரோ நானூபசாரோ’’திஆதி³ உத்³தே³ஸவிரோதோ⁴ ஸியா விப⁴ங்கே³ அத³ஸ்ஸிதத்தா, தஸ்மா ஸத்த²ஸ்ஸ புரதோ ச பச்ச²தோ ச ஸத்தப்³ப⁴ந்தரா, பஸ்ஸதோ ச ஏகப்³ப⁴ந்தரந்தி அயமேகூபசாரோ, ததோ பரம் நானூபசாரோ. ததா² ருக்க²மூலஸ்ஸ யத்த² மஜ்ஜ²ன்ஹிகே காலே சா²யா ப²ரதி, அயம் ஏகூபசாரோ. இதரோ நானூபசாரோ. கஸ்மா? தத்த² ஹி பரிக்கே²போ அப்பமாணம். சா²யாவ பமாணம். அஜ்ஜோ²காஸஸ்ஸ பாளியம் வுத்தோவ. ‘‘ஸத்தா²தீ³னம் ஏககுலஸந்தகவஸேன ஏகூபசாரதா’’தி லிகி²தம், தஸ்மா நிவேஸனே, உதோ³ஸிதே ச வுத்தபரிச்சே²தோ³வ அட்டாதீ³ஸூதி கத்வா ஸம்கி²த்தம். ததோ பரம் கே²த்தத⁴ஞ்ஞகரணஆராமவிஹாரேஸு பன பரிக்கி²த்தாபரிக்கி²த்த-பத³ம் புன உத்³த⁴டம் ஸத்த²விப⁴ங்கே³ன அதி⁴காரஸ்ஸ பச்சி²ன்னத்தா. ‘‘நானாக³ப்³பா⁴’’திஆதி³வசனம் பன அஸம்ப⁴வதோ கே²த்தத⁴ஞ்ஞகரணஆராமேஸு ந உத்³த⁴டம். விஹாரே ஸம்ப⁴வந்தம்பி தத்த² பச்சி²ன்னத்தா ந உத்³த⁴டம். குலம் வுச்சதி ஸாமிகோ, தஸ்மா ‘‘ஏககுலஸ்ஸ நானாகுலஸ்ஸா’’தி இமினா கா³மாதீ³னம் சுத்³த³ஸன்னம் சீவரனிக்கே²பட்டா²னானம் ஸாதா⁴ரணாஸாதா⁴ரணபா⁴வம் தீ³பேதி. அஜ்ஜோ²காஸஸ்ஸ பன அஸம்ப⁴வதோ ந வுத்தம். யஸ்மா பனேத்த² ஏககுலஸ்ஸ, நானாகுலஸ்ஸ ச அபரிக்கி²த்தேஸு கா³மாதீ³ஸு பரிஹாரவிஸேஸோ கிஞ்சாபி நத்தி², பரிக்கி²த்தேஸு பன அத்தி², தஸ்மா ஏகனானாகுலக்³க³ஹணம், ஏகனானூபசாரக்³க³ஹணஞ்ச ஸாத்த²கந்தி வேதி³தப்³ப³ம். தத்த²பி அயம் விஸேஸோ – ஸத்தே², ருக்க²மூலே ச குலபே⁴த³தோவ பே⁴தோ³, நோபசாரபே⁴த³தோ. அஜ்ஜோ²காஸே உபசாரபே⁴த³தோ ச, ஸோ பன பாளியம் ந த³ஸ்ஸிதோதி. ‘‘தம் பமாணம் அதிக்கமித்வாதி வசனதோ ஆகாஸேபி அட்³ட⁴தேய்யரதனப்பமாணே தோ³ஸோ நத்தீ²’’தி வத³ந்தி.

479. ‘‘ஸபா⁴’’தி இத்தி²லிங்க³ம். ‘‘ஸபா⁴ய’’ந்தி நபும்ஸகலிங்க³ம், தேன வுத்தம் ‘‘லிங்க³ப்³யத்தனயேனா’’தி. நபும்ஸகலிங்க³த³ஸ்ஸனத்த²ம் கிர ‘‘ஸபா⁴ய’’ந்தி பச்சத்தவஸேன நித்³தி³ட்ட²ம், தஸ்ஸ அனுபயோக³த்தா ‘‘த்³வாரமூல’’ந்திபி. அத்தனோ நிக்கி²த்தட்டா²னே அனிக்கி²த்தத்தா வீதி²ஹத்த²பாஸோ ந ரக்க²தி, யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வத்த²ப்³ப³ம். ‘‘ஸபா⁴யே வா வத்த²ப்³ப³ம் த்³வாரமூலே வா, ஹத்த²பாஸா வா ந விஜஹிதப்³ப³’’ந்தி ஹி வுத்தம். ‘‘ஹத்த²பாஸேயேவ அருணம் உட்ட²பேதப்³ப³’’ந்தி நியமிதத்தா ஜானிதும் ந ஸக்காதி சே? அந்தோக⁴ரே ந ஸக்கா, ததா² ததா² வுத்தத்தா, தஸ்மா ‘‘யுத்தி பமாண’’ந்தி வுத்தம். அயமத்தோ² அட்ட²கதா²யம்பி பகாஸிதோ, புனபி கு²த்³த³ககா³மே ஸப்³ப³ஸாதா⁴ரணகா³மத்³வாரவஸேன. ஸசே தஸ்ஸ த்³வாரத்³வயம் ஹோதி, மஜ்ஜே² ச க⁴ரஸபா⁴யம், யத்தி²ச்ச²தி, தத்த² வஸிதப்³ப³’’ந்தி.

480-1. யானி நிவேஸனாதீ³னி கா³மஸங்க்²யம் ந க³ச்ச²ந்தி, தானி நிவேஸனாதீ³னீதி அதி⁴ப்பேதானி. அஜ்ஜோ²காஸே அபரிஸங்கிதம்பி சீவரம் அதிரேகஸத்தப்³ப⁴ந்தரே நிக்கி²த்தம் நிஸ்ஸக்³கி³யம் ஹோதி, ஏத்த² அந்தோஸீமதா ந ரக்க²தி, ஸத்தே² பன ரக்க²தி. ‘‘நதீ³பரிஹாரோ ச லப்³ப⁴தீ’’தி வசனதோ உத³குக்கே²பஸீமாயம் பரிஹாரோ லப்³ப⁴தீதி ஸித்³த⁴ம். ஸாமந்தவிஹாரோ சே ஏகஸீமோ, சீவரம் ந நிஸ்ஸக்³கி³யம்.

இதா³னி –

‘‘சி²ன்னம் து⁴தங்க³ம் ஸாஸங்க-ஸம்மதோ ஸந்தருத்தரம்;

அசீவரஸ்ஸானாபத்தி, பச்சுத்³தா⁴ராதி³ஸித்³தி⁴தோ’’தி. –

இத³ம் பகிண்ணகம், தத்தா²யம் சோத³னாபுப்³ப³ங்க³மோ வினிச்ச²யோ – கேசி ‘‘தி³கு³ணம் ஸங்கா⁴டி’’ந்தி (மஹாவ. 348) வசனதோ ‘‘ஏகச்சிகா ஸங்கா⁴டிபி நாதி⁴ட்டா²தப்³பா³. ஸசே அதி⁴ட்டா²தி ந ருஹதீ’’தி வத்வா உபஸம்பதா³பேக்கா²னம்பி தி³கு³ணமேவ ஸங்கா⁴டிம் த³த்வா உபஸம்பாதே³ந்தி, தே இமினா ஸுத்தலேஸேன ஸஞ்ஞாபேதப்³பா³. ப⁴க³வதா ஹி ‘‘சி²ன்னகம் ஸங்கா⁴டிம் சி²ன்னகம் உத்தராஸங்க³ம் சி²ன்னகம் அந்தரவாஸக’’ந்தி பட²மம் அனுஞ்ஞாதம். ததோ ‘‘அஞ்ஞதரஸ்ஸ பி⁴க்கு²னோ திசீவரே கரியமானே ஸப்³ப³ம் சி²ன்னகம் நப்பஹோதி. த்³வே சி²ன்னகானி ஏகம் அச்சி²ன்னகம் நப்பஹோதி. த்³வே அச்சி²ன்னகானி ஏகம் சி²ன்னகம் நப்பஹோதீ’’தி இமஸ்மிம் வத்து²ஸ்மிம் ‘‘அனுஜானாமி, பி⁴க்க²வே, அன்வாதி⁴கம்பி ஆரோபேது’’ந்தி (மஹாவ. 360) அனுஞ்ஞாதம், தஸ்மா ஏகச்சிகாபி ஸங்கா⁴டி வட்டதீதி ஸித்³த⁴ம். யா சி²ஜ்ஜமானா நப்பஹோதி, தஸ்ஸா குதோ தி³கு³ணதாதி. அட்ட²கதா²யம்பிஸ்ஸ வுத்தம் ‘‘அன்வாதி⁴கம்பி ஆரோபேதுந்தி ஆக³ந்துகபத்தம்பி தா³தும். இத³ம் பன அப்பஹோனகே ஆரோபேதப்³ப³ம். ஸசே பஹோதி, ஆக³ந்துகபத்தம் ந வட்டதி, சி²ந்தி³தப்³ப³மேவா’’தி (மஹாவ. அட்ட². 360). கதி²னம் பன சி²ன்னகமேவ வட்டதி ஆவேணிகலக்க²ணத்தா, ‘‘சி²ன்னகம் தி³கு³ணம் நப்பஹோதீ’’தி வசனாபா⁴வதோ சாதி ஸன்னிட்டா²னமேத்த² க³ந்தப்³ப³ம்.

து⁴தங்க³ந்தி அனுபஸம்பன்னானம் தேசீவரிகது⁴தங்கா³பா⁴வதோ திசீவரேனேவ தேசீவரிகோதி. தேஸம் அதி⁴ட்டா²னாபா⁴வதோ ‘‘அதி⁴ட்டி²தேனேவா’’தி வத்தப்³ப³ம் ஹோதூதி சே? ந, து⁴தங்க³பே⁴தே³ன விரோத⁴ப்பஸங்க³தோ. சதுத்த²சீவரஸாதி³யனேன ஹி து⁴தங்க³பே⁴தோ³, ந திசீவரவிப்பவாஸேன, நாபி அதிரேகசீவரஸாதி³யனேன, நாபி அதிரேகசீவரதா⁴ரணேன. யஸ்மா பன பி⁴க்கூ²னம்யேவ ப⁴க³வதா அதி⁴ட்டா²னவஸேன நவ சீவரானி அனுஞ்ஞாதானி, ஜாதிவஸேன ச வுத்தானி, ந ஏவம் அனுபஸம்பன்னானம். தஸ்மா தேஸம் சீவரனியமாபா⁴வா ந தம் து⁴தங்க³ம் அனுஞ்ஞாதம் க³ஹட்டா²னம் விய, தஸ்மா தஸ்ஸ ஸமாதா³னவிதா⁴னே அவசனதோ ச ஸன்னிட்டா²னமேத்த² க³ந்தப்³ப³ம்.

ஸாஸங்கஸம்மதோதி கங்கா²விதரணியம் ஸாஸங்கஸிக்கா²பதே³ விஸும் அங்கா³னி ந வுத்தானி, ‘‘ஸேஸமேத்த² சீவரவக்³க³ஸ்ஸ து³தியஸிக்கா²பதே³ வுத்தனயேன வேதி³தப்³ப³’’ந்தி (கங்கா². அட்ட². ஸாஸங்கஸிக்கா²பத³வண்ணனா) வுத்தம், ந ச பனேதம் வுத்தம். தத்த² ரத்திவிப்பவாஸோ சதுத்த²ம் அங்க³ம், இத⁴ சா²ரத்தவிப்பவாஸோ, அயமேத்த² விஸேஸோதி, தஸ்மா அங்க³ஸாமஞ்ஞதோ, ஸம்முதிஸாமஞ்ஞதோ ச ஸாஸங்கஸிக்கா²பத³மேவ வத³ந்தி. இத³ம் நிப்பதே³ஸம், தம் ஸப்பதே³ஸம் மாஸபரமத்தா. தத்த² ப³ஹிகா³மேபி கா³மஸீமம் ஓக்கமித்வா வஸித்வா பக்கமந்தஸ்ஸ அனாபத்தி, இத⁴ ந ததா², இத⁴ அனந்தரே அனந்தரே அருணுக்³க³மனே நிஸ்ஸக்³கி³யம், தத்த² ஸத்தமேதி அயம் இமேஸம் த்³வின்னம் விஸேஸோ. அங்கா³னி பன சீவரனிக்கே²பங்க³ஸம்பத்திதோ விபரியாயேன, இத⁴ வுத்தனயேன ச ஸித்³த⁴த்தா ந வுத்தானி. தானி காமம் ந வுத்தானி, ததா²பி சதுத்த²மங்க³ம் விஸேஸிதப்³ப³ம், ந பன விஸேஸிதம். கிம்காரணா? இத⁴ வுத்தனிஸ்ஸஜ்ஜனக்கமேன நிஸ்ஸஜ்ஜேத்வா ஆபத்திதே³ஸனதோ, தத்தா²பன்னாபத்திவிமோக்க²தீ³பனத்த²ம். ஸம்வச்ச²ரவிப்பவுத்த²ம்பி ரத்திவிப்பவுத்த²மேவ, பகே³வ சா²ரத்தம் விப்பவுத்த²ம். ஏவம் ஸந்தேபி தத்த² யதா²வுத்தஅங்க³ஸம்பத்தியா ஸதி தத்த² வுத்தனயேனேவ நிஸ்ஸஜ்ஜிதப்³ப³ம். ஹேமந்தே வா கி³ம்ஹே வா நிஸ்ஸஜ்ஜதி சே? இத⁴ வுத்தனயேனாபி நிஸ்ஸஜ்ஜிதும் வட்டதீதி ஞாபனத்த²ம் சதுத்த²ம் அங்க³ம் ந விஸேஸிதந்தி நோ தக்கோதி ஆசரியோ. மாஸாதிக்கந்தம்பி சீவரம் ‘‘த³ஸாஹாதிக்கந்த’’ந்தி வத்வா நிஸ்ஸட்ட²மேவ. த்³வயேன ஊனமாஸம் ஹுத்வா ‘‘த³ஸாஹாதிக்கந்த’’ந்தி வத்வா மாஸாதிக்கந்தந்தி ஏகே. ததா²பி ஸசே பச்சாஸாசீவரம் ஹோதி, நிஸ்ஸக்³கி³யம் ‘‘த³ஸாஹாதிக்கந்த’’ந்தி வத்வா, மூலசீவரம் பன ‘‘மாஸாதிக்கந்த’’ந்தி வத்வா நிஸ்ஸஜ்ஜிதப்³ப³ம்.

‘‘ஸந்தருத்தர’’ந்தி வா ‘‘ஸங்கா⁴டி’’ந்தி வா ‘‘சீவர’’ந்தி வா கிம் திசீவரம், உதா³ஹு அஞ்ஞம்பீதி. கிஞ்சேத்த² – யதி³ திசீவரமேவ படிஸித்³த⁴ம், பரியாபன்னவஸேன அச்சி²ன்னசீவரச்சி²ந்த³னதோ⁴வாபனவிஞ்ஞத்திஆதி³விரோதோ⁴. அத² அஞ்ஞம்பி, ‘‘நிட்டி²தசீவரஸ்மி’’ந்தி ஏவமாதி³னா விரோதோ⁴தி? வுச்சதே – ந நியமதோ வேதி³தப்³ப³ம் யதா²ஸம்ப⁴வம் க³ஹேதப்³ப³தோ. ததா² ஹி ‘‘சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமந்தீ’’தி (பாரா. 471) ஏவமாதீ³ஸு திசீவரமேவ. ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³, ஸந்தருத்தரபரமம் ததோ சீவரம் ஸாதி⁴தப்³ப³’’ந்தி ஏவமாதீ³ஸு யம்கிஞ்சி, ததா² ஸகு³ணம் கத்வா ஸங்கா⁴டியோ தா³தப்³பா³, நிவாஸனம் தா³தப்³ப³ம், ஸங்கா⁴டி தா³தப்³பா³, ஹந்த³ தே, ஆவுஸோ, ஸங்கா⁴டி, தே³ஹி மே படந்திஆதீ³ஸு. வுத்தஞ்ஹேதம் ‘‘ஸப்³ப³ஞ்ஹி சீவரம் ஸங்க⁴டிதட்டே²ன ‘ஸங்கா⁴டீ’தி வுச்சதீ’’தி. ததா² ‘‘நிட்டி²தசீவரஸ்மி’’ந்தி ஏத்தா²பீதி ஏகே. அந்தோஸமயே ஹி யாவத³த்த²ம் சீவரம் அனுஞ்ஞாதம், தம் ஸப்³ப³ம் கரியமானம் கதா³ நிட்டா²னம் க³ச்சி²ஸ்ஸதி, தஸ்மா திசீவரமேவாதி ஏகே. அசீவரஸ்ஸானாபத்தி பச்சுத்³தா⁴ராதி³ஸித்³தி⁴தோதி கிம் வுத்தம் ஹோதி? உதோ³ஸிதஸிக்கா²பத³ஸ்ஸ நிப்பயோஜனபா⁴வப்பஸங்க³தோ திசீவரவிப்பவாஸே தேசீவரஸ்ஸ ஆபத்தீதி ஏகே. தத்தே²தம் வுச்சதி ந ஹோதி ஆபத்தி பச்சுத்³தா⁴ராதி³ஸித்³தி⁴தோ. ‘‘அனாபத்தி அந்தோஅருணே பச்சுத்³த⁴ரதி, விஸ்ஸஜ்ஜேதீ’’தி ஹி வுத்தம். அஞ்ஞதா² பச்சுத்³த⁴ரந்தஸ்ஸ, அந்தோஅருணே விஸ்ஸஜ்ஜேந்தஸ்ஸ ச யாவ அஞ்ஞோ நாதி⁴ட்டா²தி, தாவ ஆபத்திம் ஆபஜ்ஜதி யதா²வுத்தனயேன. அஞ்ஞதா² ஸத்தப்³ப⁴ந்தரேன விப்பவாஸஸ்ஸாதி விப்பவாஸதோ யதா²ருதம்யேவ ஸதி விப்பவாஸே விப்பவாஸதோ அவிப்பவாஸே ஸதி அவிப்பவாஸதோதி.

உதோ³ஸிதஸிக்கா²பத³வண்ணனா நிட்டி²தா.