1. பட²மகதி²னஸிக்கா²பத³வண்ணனா

459. ஸமிதாவினாதி ஸமிதா’நேன கிலேஸாதி ஸமிதாவீ, தேன ஸமிதாவினா. ‘‘தீணி சீவரானீ’’தி வத்தப்³பே³ ‘‘திசீவர’’ந்தி வுத்தம். ஸங்க்²யாபுப்³போ³ தி³கு³னேகவசனந்தி ஏத்த² லக்க²ணம் வேதி³தப்³ப³ம். தம் பன அதி⁴ட்டி²தஸ்ஸபி அனதி⁴ட்டி²தஸ்ஸபி நாமம் ‘‘ஏகரத்தம்பி சே பி⁴க்கு² திசீவரேன விப்பவஸேய்யா’’திஆதீ³ஸு திசீவராதி⁴ட்டா²னேன அதி⁴ட்டி²தஸ்ஸ நாமம். ‘‘அனுஜானாமி, பி⁴க்க²வே, திசீவரம் அதி⁴ட்டா²து’’ந்தி (மஹாவ. 358) ஏத்த² அனதி⁴ட்டி²தஸ்ஸ நாமம், இத⁴ தது³ப⁴யம்பி ஸம்ப⁴வதி. ‘‘ப⁴க³வதா பி⁴க்கூ²னம் திசீவரம் அனுஞ்ஞாதம் ஹோதீ’’தி ஏத்த² அதி⁴ட்டி²தமேவ. ‘‘அஞ்ஞேனேவ திசீவரேன கா³மம் பவிஸந்தீ’’தி ஏத்த² அனதி⁴ட்டி²தமேவ. ஏகஸ்மிம்யேவ ஹி சீவரே திசீவராதி⁴ட்டா²னம் ருஹதி, ந இதரஸ்மிம் பத்தாதி⁴ட்டா²னம் விய, தஸ்மா இதரம் அதிரேகட்டா²னே திட்ட²தி. தேன வுத்தம் ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகசீவரம் தா⁴ரேஸ்ஸந்தீ’’திஆதி³.

460-1. பட²மபஞ்ஞத்தியா பனேத்த² ஏகரத்தம்பி அதிரேகசீவரம் தா⁴ரேய்ய, நிஸ்ஸக்³கி³யம் வுத்தம் ஹோதி, ததோ பரம் ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேதும். ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² ‘த³ஸாஹபரமம் அதிரேகசீவரம் தா⁴ரேதப்³ப³ம், தம் அதிக்காமயதோ நிஸ்ஸக்³கி³யம் பாசித்திய’’’ந்தி ஏவம் ப⁴க³வா பரிபுண்ணம் ஸிக்கா²பத³ம் பஞ்ஞாபேஸி. அத² பச்சி²மபோ³தி⁴யம் அஜாதஸத்துகாலே கதி²னம் அனுஞ்ஞாதம், ததோ பட்டா²ய பி⁴க்கூ² இத³ம் ஸிக்கா²பத³ம் ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே த³ஸாஹ…பே… பாசித்திய’’ந்தி உத்³தி³ஸந்தி, ஏஸ நயோ து³தியததியகதி²னேஸுபி. ததா²பி கங்கா²விதரணியம் (கங்கா². அட்ட². கதி²னஸிக்கா²பத³வண்ணனா) ‘‘த³ஸாஹபரமந்தி அயமேத்த² அனுபஞ்ஞத்தீ’’தி ஏத்தகம்யேவ வுத்தம், தஸ்மா ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வசனம் ந பஞ்ஞத்தி, ந ச அனுபஞ்ஞத்தீதி ஸித்³த⁴ம். ந ஹி பஞ்ஞத்திவத்து²ஸ்மிம், அனுபஞ்ஞத்திவத்து²ம்ஹி வா கதி²னாதி⁴காரோ தி³ஸ்ஸதீதி யதா²வுத்தனயோவ ஸாரோதி நிட்ட²மேத்த² க³ந்தப்³ப³ம். அதா²பி ஸியா ‘‘கதி²னஸ்ஸுப்பத்திகாலதோ பட்டா²ய ப⁴க³வதோ வசனம் அனுபஞ்ஞத்திபா⁴வேன வுத்த’’ந்தி. யதி³ ஏவம் த்³வே அனுபஞ்ஞத்தியோ ஸியும், ததோ பரிவாரே (பரி. 24) ‘‘ஏகா அனுபஞ்ஞத்தீ’’திவசனவிரோதோ⁴. அபிச யதா²வுத்தனயதீ³பனத்த²ம் இத⁴ தம் வசனம் பட²மபஞ்ஞத்திகாலே அவத்வா பச்சா² வுத்தம். ஏத்த² ஸாதி⁴தத்தா து³தியததியேஸு பச்சா² வுத்தபட²மபஞ்ஞத்தீஸு ஏவம் வுத்தம். அஞ்ஞதா² தத்த²பி தம் வசனம் பச்சா² வத்தப்³ப³ம் ஸியா. அனுக³ண்டி²பதே³ பன ‘‘பச்சா² வுத்தபா⁴வம் ஸந்தா⁴ய நிட்டி²தசீவரஸ்மிந்திஆதீ³ஸு அனுபஞ்ஞத்தீ’’தி வுத்தம். ஸேக்க²புது²ஜ்ஜனானம் பேமம், அரஹந்தானம் கா³ரவோ. த³ஸமம் வா நவமம் வாதி ஏத்த² பு⁴ம்மத்தே² உபயோக³வசனம்.

462-3. நிட்டி²தசீவரஸ்மிந்தி இத³ம் கேவலம் சீவரபலிபோ³தா⁴பா⁴வமத்ததீ³பனத்த²ம் வுத்தம், தஸ்மா ‘‘நட்ட²ம் வா வினட்ட²ம் வா த³ட்³ட⁴ம் வா சீவராஸா வா உபச்சி²ன்னா’’தி வுத்தம். யதி³ த³ஸாஹபரமம் தா⁴ரேதப்³ப³சீவரத³ஸ்ஸனத்த²ம் வுத்தம் ஸியா, நட்டா²தி³கம் ஸோ தா⁴ரேய்ய. தா⁴ரணஞ்சேத்த² ட²பனம், பரிபோ⁴கோ³ வா. தம் த்³வயம் கதேபி யுஜ்ஜதி, அகதேபி யுஜ்ஜதி, தஸ்மா ‘‘கதம் வா ஹோதீ’’திபி ந வத்தப்³ப³ம். ந ஹி கதமேவ அதிக்காமயதோ நிஸ்ஸக்³கி³யந்தி, தஸ்மா யம் சீவரம் உபாதா³ய ‘‘நிட்டி²தசீவரஸ்மி’’ந்தி வுத்தம். தம்பி உப்³ப⁴தஸ்மிம் கதி²னே த³ஸாஹபரமம் காலம் தா⁴ரேதப்³ப³ந்தி அத்தோ² ந க³ஹேதப்³போ³. தஞ்ஹி சீவரம் ஸந்தஞ்சே, உப்³ப⁴தஸ்மிம் கதி²னே ஏகதி³வஸம்பி பரிஹாரம் ந லப்³ப⁴தி. அபிச ‘‘சீவரம் நாம விகப்பனுபக³ம் பச்சி²ம’’ந்தி வுத்தம். தத்த² ச கதம் நாம ஹோதி, தஸ்மாபி ந தம் ஸந்தா⁴ய தா⁴ரேதப்³ப³ந்தி வுத்தந்தி வேதி³தப்³ப³ம் அஸம்ப⁴வதோ.

அனுக³ண்டி²பதே³ பனேதம் வுத்தம் ‘‘தத்த² ஸியா – தஸ்ஸ பி⁴க்கு²னோ சீவரம் நட்டா²தீ³ஸு அஞ்ஞதரம் யதி³ ப⁴வேய்ய, கதமம் சீவரம் த³ஸாஹபரமம் தா⁴ரேய்ய. யஸ்மா தா⁴ரேதப்³ப³சீவரம் நத்தி², தஸ்மா அத்து²த்³தா⁴ரவஸேன கரணபலிபோ³த⁴த³ஸ்ஸனத்த²ம் ‘நட்ட²ம் வா’திஆதி³பதா³னி வுத்தானி. அயம் பனத்தோ² ‘நட்ட²ம் வா’திஆதி³னா நயேன வுத்தசீவரானம் அஞ்ஞதரஸ்மிம் சீவரே அஸதி க³ஹேதப்³போ³, ஸதி தம் த³ஸாஹபரமம் அதிக்காமயதோ நிஸ்ஸக்³கி³யம். ஏஸ நயோ ஸப்³ப³த்த². ‘கதம் வா ஹோதீ’தி வுத்தசீவரமேவாதி⁴ப்பேதம். கஸ்மா பன கதசீவரம் இமஸ்மிம் அத்தே² அதி⁴ப்பேதந்தி ந வுத்தந்தி சே? பாகடத்தா. கத²ம்? நட்ட²வினட்ட²சீவராதீ³னம் தா⁴ரணஸ்ஸ அபா⁴வதோ கதசீவரமேவ இதா⁴தி⁴ப்பேதந்தி பாகடம். யதா² கிம்? யதா² பட²மானியதே மேது²னகாயஸம்ஸக்³க³ரஹோனிஸஜ்ஜானமேவாக³தத்தா ஸோதஸ்ஸ ரஹோ அத்து²த்³தா⁴ரவஸேன வுத்தோதி பாகடோ, தஸ்மா ‘சக்கு²ஸ்ஸ ரஹோ இதரஸ்மிம் அத்தே² அதி⁴ப்பேதோ’தி ந வுத்தோ. ஏவம்ஸம்பத³மித³ந்தி வேதி³தப்³ப³ம். ‘கதம் வா ஹோதீ’தி இத³ம் ந வத்தப்³ப³ம், கஸ்மா? அகதம் அதிக்காமயதோபி நிஸ்ஸக்³கி³யத்தா, கிஞ்சாபி நிஸ்ஸக்³கி³யம் ஹோதி, இத⁴ பன திசீவராதி⁴ட்டா²னமதி⁴ப்பேதம். தஸ்மிம் திசீவராதி⁴ட்டா²னே அகதம், அரஜிதம், அகப்பியகதஞ்ச ‘இமம் ஸங்கா⁴டிம் அதி⁴ட்டா²மீ’திஆதி³னா நயேன அதி⁴ட்டா²தும் ந வட்டதி, தத³த்த²தீ³பனத்த²ம் ‘கதம் வா ஹோதீ’தி வுத்தம். இதரதா² ‘நிட்டி²தசீவரஸ்மிம் படிலத்³தே⁴’தி வதே³ய்ய, ஏவம் ஸந்தே திசீவரம் த³ஸாஹம் அதிக்காமயதோ நிஸ்ஸக்³கி³யந்தி கத²ம் பஞ்ஞாயதீதி சே? வசனப்பமாணதோ. ‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேது’ந்தி வுத்தத்தா இதா⁴பி ‘அதிரேகசீவரம் நாம அனதி⁴ட்டி²த’ந்தி ஏத்தகமேவ வத்தப்³ப³ம் ஸியா. யஸ்மா ‘கதம் வா ஹோதீ’தி வசனேன இதா⁴தி⁴ப்பேதசீவரேன ஸத்³தி⁴ம் ஸேஸம்பி த³ஸாஹபரமதோ உத்தரி தா⁴ரேதும் ந லப்³ப⁴தீதி அனுஜானந்தோ ‘அதிரேகசீவரம் நாம அனதி⁴ட்டி²தம் அவிகப்பித’ந்தி ஆஹ. தத்த² ஸியா – யதா² ‘அவிகப்பித’ந்தி அத்து²த்³தா⁴ரவஸேன வுத்தம், ததா² ‘விகப்பனுபக³ம் பச்சி²ம’ந்திபி. கஸ்மா? யஸ்மா திசீவரமேவ த³ஸாஹபரமம் தா⁴ரேதப்³ப³ம் ‘நிட்டி²தசீவரஸ்மி’ந்திஆதி³அனுபஞ்ஞத்திவஸேன. இதரதா² ஏகாஹாதிக்கமேபி நிஸ்ஸக்³கி³யம் ஹோதி ‘யோ பன, பி⁴க்கு², அதிரேகசீவரம் தா⁴ரேய்ய, நிஸ்ஸக்³கி³யம் பாசித்திய’ந்தி வசனதோ. ந திசீவரதோ அஞ்ஞம்பி சீவரம் த³ஸாஹபரமம் தா⁴ரேதப்³ப³ம், ததோ பரம் நிஸ்ஸக்³கி³யம் ‘அந்தோத³ஸாஹ’ந்தி வுத்தத்தா. யதா²ஹ ‘அனாபத்தி அந்தோத³ஸாஹம் அதி⁴ட்டே²தி, விகப்பேதீ’தி, இதரதா² ‘அந்தோத³ஸாஹம் அதி⁴ட்டே²தீ’தி வசனமத்தமேவ ப⁴வேய்ய, தஸ்மா அட்ட²கதா²யம் வுத்தனயேனேவ அத்தோ² க³ஹேதப்³போ³. இத³ம் ஸப்³ப³ம் அபரே வத³ந்தீ’’தி. ஏத்த² அந்தோகதி²னே உப்பன்னசீவரம் கதமேவ ஸந்தஞ்சே, த³ஸாஹபரமம் தா⁴ரேதப்³ப³ந்தி இத³ஞ்சிமஸ்ஸ ஸாத⁴னத்த²ம் வுத்தவசனஞ்ச பரதோ இதே⁴வ வுத்தவிசாரணாய யதா²வுத்தயுத்தியா ச விருஜ்ஜ²தீதி ந க³ஹேதப்³ப³ம்.

இதே⁴வ வுத்தவிசாரணா நாம – ‘‘ஸ்வே கதி²னுத்³தா⁴ரோ ப⁴விஸ்ஸதீ’’தி அஜ்ஜ உப்பன்னசீவரம் தத³ஹேவ அனதி⁴ட்ட²ஹந்தஸ்ஸ அருணுக்³க³மனே நிஸ்ஸக்³கி³யம். கஸ்மா? ‘‘நிட்டி²தசீவரஸ்மி’’ந்திஆதி³னா ஸிக்கா²பத³ஸ்ஸ வுத்தத்தா. அந்தோகதி²னே அதிரேகத³ஸாஹம்பி பரிஹாரம் லப⁴தி, கதி²னதோ உத்³த⁴ம் ஏகதி³வஸம்பி ந லப⁴தி. யதா² கிம்? யதா² அத்த²தகதி²னோ ஸங்கோ⁴ அத்த²ததி³வஸதோ பட்டா²ய யாவ உப்³பா⁴ரா ஏகதி³வஸாவஸேஸேபி கதி²னுப்³பா⁴ரே ஆனிஸம்ஸம் லப⁴தி, புனதி³வஸே ந லப⁴தி. ஸசே ஸதிஸம்மோஸா பா⁴ஜனீயசீவரம் ந பா⁴ஜிதம், புனதி³வஸே அனத்த²தகதி²னானம்பி ஸாதா⁴ரணம் ஹோதி. தி³வஸா சே ஸாவஸேஸா, அத்த²தகதி²னஸ்ஸேவ ஸங்க⁴ஸ்ஸ பாபுணாதி, ஏவமேவ அத்த²ததி³வஸதோ பட்டா²ய யாவ உப்³பா⁴ரா அனதி⁴ட்டி²தம் அவிகப்பிதம் வட்டதி அனுஞ்ஞாததி³வஸப்³ப⁴ந்தரத்தா. கதி²னதி³வஸோ க³ணனுபகோ³ ஹோதி, உப்³ப⁴ததி³வஸதோ பட்டா²ய த³ஸாஹபரமம் காலம் உப்பன்னசீவரம் பரிஹாரம் லப⁴தி, ததோ பரம் ந லப⁴தி. கஸ்மா? ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேது’’ந்தி வசனதோ. அந்தோகதி²னேபி ஏகாத³ஸே அருணுக்³க³மனே நிஸ்ஸக்³கி³யப்பஸங்க³ம் ‘‘நிட்டி²தசீவரஸ்மிம் உப்³ப⁴தஸ்மிம் கதி²னே’’தி அயம் அனுபஞ்ஞத்தி வாரேத்வா டி²தா, ந ச தே தி³வஸே அதி³வஸே அகாஸீதி. ததா² ததியகதி²னே ச விசாரிதம் ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே பி⁴க்கு²னோ பனேவ அகாலசீவரம் உப்பஜ்ஜேய்யா’தி வத³ந்தேன ப⁴க³வதா யம் மயா ஹேட்டா² பட²மஸிக்கா²பதே³ ‘த³ஸாஹபரமம் அதிரேகசீவரம் தா⁴ரேதப்³ப³’ந்தி அனுஞ்ஞாதம், தம்பி கதி²னமாஸதோ ப³ஹி உப்பன்னமேவ, ந அந்தோதி தீ³பிதம் ஹோதீ’’தி ச, ‘‘‘காலேபி ஆதி³ஸ்ஸ தி³ன்னம் ஏதம் அகாலசீவர’ந்தி (பாரா. 500) வசனதோ கதி²னுப்³பா⁴ரதோ உத்³த⁴ம் த³ஸாஹபரிஹாரம் ந லப⁴தீதி தீ³பிதம் ஹோதி, தேஹி ஸத்³தி⁴ம் புன கதி²னுப்³பா⁴ரதோ உத்³த⁴ம் பஞ்ச தி³வஸானி லப⁴தீதி பஸங்கோ³பி ‘நிட்டி²தசீவர…பே… கி²ப்பமேவ காரேதப்³ப³’ந்தி அகாலசீவரஸ்ஸ உப்பத்திகாலம் நியமேத்வா வுத்தத்தா வாரிதோ ஹோதி. தது³ப⁴யேன கதி²னப்³ப⁴ந்தரே உப்பன்னசீவரம் கதி²னுப்³பா⁴ரதோ உத்³த⁴ம் ஏகதி³வஸம்பி பரிஹாரம் ந லப⁴தீதி ஸித்³த⁴ம் ஹோதீ’’தி ச. தஸ்மா து³வித⁴ம்பேதம் விசாரணம் ஸந்தா⁴ய அம்ஹேஹி ‘‘இதே⁴வ வுத்தவிசாரணாய யதா²வுத்தயுத்தியா ச விருஜ்ஜ²தீதி ந க³ஹேதப்³ப³’’ந்தி வுத்தந்தி வேதி³தப்³ப³ம்.

ஏத்தா²ஹ – ‘‘நிட்டி²தசீவரஸ்மிம் உப்³ப⁴தஸ்மிம் கதி²னே’’தி இத³ம் பு⁴ம்மம் கிம் சீவரஸ்ஸ உப்பத்தி நியமேதி, உதா³ஹு தா⁴ரணம், உதா³ஹு உப⁴யந்தி, கிஞ்சேத்த², யதி³ உப்பத்திம் நியமேதி, பச்சி²மகத்திகமாஸே ஏவ உப்³ப⁴தஸ்மிம் கதி²னே உப்பன்னசீவரம் ததோ பட்டா²ய த³ஸாஹம் தா⁴ரேதப்³ப³ம் அனிட்டி²தேபி தஸ்மிம் மாஸேதி ஆபஜ்ஜதி. அத² தா⁴ரணம் நியமேதி, அந்தோகதி²னே உப்பன்னசீவரம் உப்³ப⁴தேபி த³ஸாஹபரமம் தா⁴ரேதப்³ப³ந்தி ஆபஜ்ஜதி. அத² உப⁴யம் நியமேதி, ததியகதி²னே விய விஸேஸேத்வா வத்தப்³ப³ந்தி? வுச்சதே – காமம் உப⁴யம் நியமேதி, ந பன விஸேஸனே பயோஜனம் அத்தி². யம் அந்தோகதி²னே உப்பன்னசீவரம் ஸந்தா⁴ய ‘‘நிட்டி²தசீவரஸ்மி’’ந்தி வுத்தம், ந தம் ஸந்தா⁴ய ‘‘தா⁴ரேதப்³ப³’’ந்தி வுத்தம், ஸாதி⁴தஞ்ஹேதம். ‘‘கதம் வா ஹோதீ’’திஆதி³வசனதோ தத³த்த²ஸித்³தி⁴, தேன புன விஸேஸனே பயோஜனம் நத்தி², ந ஹி கதமேவ நிஸ்ஸக்³கி³யம் கரோதி, ந ச நட்டா²தி³கம் தா⁴ரேதும் ஸக்காதி. யேன வா அதி⁴ப்பாயேன ப⁴க³வதா இத³ம் ஸிக்கா²பத³ம் பஞ்ஞத்தம், ஸோ அதி⁴ப்பாயோ ததியகதி²னே பகாஸிதோதி வேதி³தப்³போ³. கஸ்மா தத்த² பகாஸிதோதி சே? விஸேஸவிதா⁴னத³ஸ்ஸனாதி⁴ப்பாயதோ. விஸேஸவிதா⁴னஞ்ஹி ‘‘நோ சஸ்ஸ பாரிபூரீ’’திஆதி³. தத்தா²பி ‘‘சீவரம் உப்பஜ்ஜேய்யா’’தி அவத்வா ‘‘அகாலசீவரம் உப்பஜ்ஜேய்யா’’தி விஸேஸனேன உப்³ப⁴தேபி கதி²னே காலசீவரம் அத்தீ²தி தீ³பேதி. கிஞ்சேதம்? பச்சி²மகத்திகமாஸே உப்பன்னசீவரம், தேனேவ தத்த² ‘‘அனத்த²தே கதி²னே ஏகாத³ஸமாஸே உப்பன்ன’’ந்தி வுத்தம், தஸ்மா உப்பத்தினியமே வுத்ததோ³ஸாபா⁴வஸித்³தி⁴. யஞ்ச தத்த² ‘‘காலேபி ஆதி³ஸ்ஸ தி³ன்னம் ஏதம் அகாலசீவரம் நாமா’’தி வுத்தம், தஸ்ஸ த்³வே அத்த²விகப்பா. ஆதே³ஸவஸேன ‘‘அகாலசீவர’’ந்தி லத்³த⁴ஸங்க்²யம்பி காலே உப்பன்னத்தா காலபரிஹாரம் லப⁴தி, பகே³வானாதே³ஸந்தி அயம் பட²மோ விகப்போ உப்பத்தினியமே வுத்ததோ³ஸாபா⁴வமேவ உபத்த²ம்பே⁴தி. ததா² ஆதே³ஸவஸேன அகாலசீவரஸங்க்²யம் க³தம் சீவரகாலே உப்பன்னத்தா சீவரகாலதோ பரம் த³ஸாஹபரிஹாரம் ந லப⁴தி, பகே³வானாதே³ஸந்தி அயம் து³தியோ தா⁴ரணனியமே வுத்ததோ³ஸாபா⁴வமேவ உபத்த²ம்பே⁴தி. யதி³ ஏவம் ஆதே³ஸவஸேன அகாலசீவரஸ்ஸ அகாலசீவரதா கிமத்தி²காதி சே? ஸங்கு⁴த்³தே³ஸிகஸ்ஸ தஸ்ஸ அத்த²தகதி²னஸ்ஸபி பி⁴க்கு²ஸங்க⁴ஸ்ஸ ஸாதா⁴ரணபா⁴வத்தி²காதி வேதி³தப்³பா³.

அபிச புக்³க³லஸ்ஸ கதி²னதி³வஸாபி தி³வஸாவ. ஏவம் க³ணனுபக³த்தா அகாலசீவரஸங்க²யாபடிலாபா⁴னுபா⁴வேன ‘‘உப்³ப⁴தஸ்மிம் கதி²னே’’தி வசனாபேக்க²ஸ்ஸ அனிஸ்ஸக்³கி³யத்தா தத³னுலோமத்தா ‘‘காலசீவரஸ்ஸபீ’’தி ஏவம் ஸப்³ப³தா² சதுப்³பி³த⁴ம் ஏத்த² வசனந்தி வேதி³தப்³ப³ம். அபிச அத்தி² ஏகச்சேன கதி²னுத்³தா⁴ரேன உப்³ப⁴தே கதி²னே உப்பன்னம் ஏகச்சஸ்ஸ பி⁴க்கு²னோ காலசீவரம் ஹோதி, ஏகச்சஸ்ஸ அகாலசீவரம், தம் ஸீமாதிக்கந்தஸ்ஸ, நோ உப்³பா⁴ரக³தம். தம் த்³வின்னம் வஸேன உப்³ப⁴தே உப்பன்னம் ட²பேத்வா இதரேஸம் அஞ்ஞதரேன உப்³ப⁴தே உப்பன்னந்தி வேதி³தப்³ப³ம். தஞ்ஹி யஸ்ஸ உப்³ப⁴தம், தஸ்ஸ அகாலசீவரம், இதரஸ்ஸ காலசீவரம். ததா² அத்தி² ஏகச்சேன கதி²னுத்³தா⁴ரேன உப்³ப⁴தே கதி²னே உப்பன்னம் ஸப்³ப³ஸ்ஸபி அகாலசீவரமேவ ஹோதி. தம் யதா²ட²பிதம் வேதி³தப்³ப³ம். ததா² அத்தி² உப்³ப⁴தஸ்மிம் கதி²னே உப்பன்னம் ட²பேத்வா வஸ்ஸானஸ்ஸ பச்சி²மே மாஸே உப்பன்னம். ததா² அத்தி² உப்³ப⁴தஸ்மிம் கதி²னே உப்பன்னம் அகாலசீவரம், தம் ஹேமந்தே, கி³ம்ஹே வா உப்பன்னந்தி வேதி³தப்³ப³ம். ஏவம் புக்³க³லகாலபே⁴த³தோ ப³ஹுவித⁴த்தா உப்பன்னஸ்ஸ ‘‘உப்³ப⁴தஸ்மிம் கதி²னே உப்பன்ன’’ந்தி ந வுத்தந்தி வேதி³தப்³ப³ம். அனேகம்ஸிகத்தா இமம்பி அத்த²விகப்பம் த³ஸ்ஸேதும் ‘‘உப்³ப⁴தஸ்மிம் கதி²னேதி பி⁴க்கு²னோ கதி²னம் உப்³ப⁴தம் ஹோதீ’’தி. ஏத்தாவதா ஸித்³தே⁴பி ‘‘அட்ட²ன்னம் மாதிகானம் அஞ்ஞதராயா’’திஆதி³ வுத்தம். ‘‘தா⁴ரயாமீ’’தி பி⁴க்கு²னீவிப⁴ங்கே³ ஆக³தோதி வத்தப்³போ³. ‘‘ஏவ’’ந்தி வசனேன வசனபே⁴தோ³ தத்த² நத்தீ²தி வுத்தம் ஹோதி.

‘‘விகப்பனுபக³ம் பச்சி²ம’’ந்தி இத³ம் ஸப்³ப³ஸங்கா³ஹிகத்தா வுத்தம். ‘‘அதி⁴ட்டா²னுபக³ம் பச்சி²ம’’ந்தி அஸப்³ப³ஸங்கா³ஹிகம். ந ஹி யத்தகம் ஸங்கா⁴டி அதி⁴ட்டா²னுபக³ம் பச்சி²மம், தத்தகம் அந்தரவாஸகாதி³ அதி⁴ட்டா²னுபக³ம் பச்சி²மம் ஹோதி அதி⁴ட்டா²னஸ்ஸ ப³ஹுவித⁴த்தா. ந ஏவம் விகப்பனாய பே⁴தோ³ தஸ்ஸா ஏகவித⁴த்தாதி வேதி³தப்³ப³ம். ‘‘ஏகாத³ஸே அருணுக்³க³மனே நிஸ்ஸக்³கி³ய’’ந்தி அந்திமம் ட²பேத்வா ததோ புரிமதரஸ்மிந்தி அத்தோ² வேதி³தப்³போ³. அந்திமம் நாம அபரகத்திகாய பட²மாருணுக்³க³மனம். தஞ்ஹி காலத்தா நிஸ்ஸக்³கி³யம் ந கரோதி, தேனேவாஹ அச்சேகசீவரஸிக்கா²பத³ட்ட²கதா²யம் ‘‘ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³த⁴ரித்வா ட²பிதசீவரம்பி ஏதம் பரிஹாரம் லப⁴தியேவா’’தி (பாரா. அட்ட². 2.646-9). இமம்யேவ நயம் ஸந்தா⁴ய ‘‘அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா, ததோ பரம் ஏகதி³வஸம்பி பரிஹாரோ நத்தீ²’’தி தத்தே²வாஹ. இமஸ்மிம் நயே ஸித்³தே⁴ அனச்சேகசீவரம் த்³வாத³ஸாஹே ந லப⁴தீதி ஸித்³த⁴மேவ ஹோதி. ததோ ‘‘அனச்சேகசீவரே அனச்சேகசீவரஸஞ்ஞீ, அனாபத்தீ’’தி (பாரா. 650) ஏத்த² அச்சேகசீவரஸதி³ஸே அஞ்ஞஸ்மிம் அனதி⁴ட்டி²தேதி ஸித்³த⁴ம் ஹோதி. தத்த² பன ‘‘பஞ்ச மாஸா’’தி உக்கட்ட²பரிச்சே²த³வசனம். வஸ்ஸிகஸாடிகஞ்ச அவஸ்ஸிகஸாடிகபா⁴வம் பத்வா ஏகாத³ஸமாஸே பரிஹாரம் லப⁴தீதி வேதி³தப்³ப³ம்.

த³ஸாஹாதிக்கந்தம் நிஸ்ஸக்³கி³யந்தி ஏத்த² ஆபத்திவுட்டா²னே ‘‘த³ஸாஹப்படிச்ச²ன்னம் பக்க²அதிரேகபக்க²மாஸஅதிரேகமாஸபடிச்ச²ன்ன’’ந்திஆதி³வசனபே⁴தோ³ விய, ந இத⁴ வசனபே⁴தோ³, தஸ்மா ஸம்வச்ச²ராதிக்கந்தம்பி த³ஸாஹாதிக்கந்தமேவ நாம, ததா² து³தியகதி²னேபி ஸம்வச்ச²ரவிப்பவுத்த²ம்பி ரத்திவிப்பவுத்த²மேவ. ததியே ஸம்வச்ச²ராதிக்கந்தம்பி மாஸாதிக்கந்தமேவ நாமாதி வேதி³தப்³ப³ம். ‘‘அனதி⁴ட்டி²தே அதி⁴ட்டி²தஸஞ்ஞீ நிஸ்ஸக்³கி³யம் பாசித்திய’’ந்தி இத³மேகஸ்ஸ திகபாசித்தியஸ்ஸ ஆதி³பத³தீ³பனம். ஏஸ நயோ அவிகப்பிதேதிஆதீ³ஸுபி, தஸ்மா ஏத்த² அட்ட²ஸு திகச்சே²தே³ஸு ஏகம் வித்தா²ரேத்வா இதரேஸம் ஏகேகமாதி³பத³ம் வித்தா²ரேஹ்வா த்³வே த்³வே ப⁴க³வதாவ ஸங்கி²த்தத்தாதி ப³ஹூஸுபி திகச்சே²தே³ஸு ஸம்ப⁴வந்தேஸு ஏகோ ஏவ வுச்சதி, ‘‘அயம் வினயஸ்ஸ த⁴ம்மதா’’தி வத³ந்தி. து³க்கடவாரேஸு பன ஏகம் து³க்கடம் வித்தா²ரேத்வா ஸேஸானி ஸத்த ததே²வ ஸங்கி²த்தானி. ததா² அந்திமந்திமோ ஏகேகோ அனாபத்திகோட்டா²ஸோதி வேதி³தப்³ப³ம்.

அனாபத்தி அந்தோத³ஸாஹந்தி அயம் ஸங்கே²பத்தோ² – தம் த³ஸாஹபரமம் தா⁴ரேதப்³ப³ம். தம் அதிரேகசீவரம் யதா²ஸகம் அதி⁴ட்டா²னம் அந்தோத³ஸாஹம் அதி⁴ட்டே²தி வா விகப்பேதி வா விஸ்ஸஜ்ஜேதி வா அத்தனோ த⁴ம்மதாய நஸ்ஸதி வா வினஸ்ஸதி வா ட³ய்ஹதி வா அஞ்ஞோ வா தம் அச்சி²ந்தி³த்வா க³ண்ஹாதி விஸ்ஸாஸந்தோ வா க³ண்ஹாதி பாசித்தியதோ அனாபத்தி. து³க்கடதோ பன ஸியா ஆபத்தி ஸியா அனாபத்தி ஸஞ்ஞாபே⁴தே³ன. அந்திமானம் பனேத்த² த்³வின்னம் பதா³னம் வஸேன அனச்சி²ன்னே அச்சி²ன்னஸஞ்ஞீ நிஸ்ஸக்³கி³யம் பாசித்தியம். அவிஸ்ஸாஸக்³கா³ஹே விஸ்ஸாஸக்³கா³ஹஸஞ்ஞீ நிஸ்ஸக்³கி³யம் பாசித்தியந்திஆதி³கா த்³வே திகபாசித்தியா, த்³வே ச து³க்கடா ஸங்கி²த்தாதி வேதி³தப்³பா³. ஏத்த² ஹி யதி³ அந்தோத³ஸாஹம் அதி⁴ட்டே²தி, த³ஸாஹபரமம் அருணம் அதிக்கமித்வா தஸ்ஸ தி³வஸபா⁴கே³ அதி⁴ட்ட²ஹதீதி வேதி³தப்³ப³ம். அயம் தாவ பாளிவினிச்ச²யோ.

அட்ட²கதா²யம் பன இதோ க³ருகதரானீதிஆதி³ம்ஹி அயம் சோத³னாபுப்³ப³ங்க³மோ வினிச்ச²யோ – க³ண்டி²பதே³ பனஸ்ஸ இதோ நிஸ்ஸட்ட²சீவரதா³னதோ க³ருகம்பி ஞத்திது³தியகம்மம் யதா² அபலோகனேன கரோந்தி, ஏவமித³ம் ஞத்தியா கத்தப்³ப³ம்பி பகதிவசனேன வட்டதீதி. யதி³ ஏவம் பரிவாரே கம்மவக்³க³ஸ்ஸ அட்ட²கதா²யம் ‘‘ஞத்திகம்மம்பி ஏகம் ஞத்திம் ட²பேத்வாவ காதப்³ப³ம், அபலோகனகம்மாதி³வஸேன ந காதப்³ப³’’ந்தி (பரி. அட்ட². 482) யம் வுத்தம், தேன விருஜ்ஜே²ய்ய. தேனேதம் வுச்சதி ‘‘தேஸம் ஏதம் அனுலோம’’ந்தி, தஸ்மா அனுலோமனயேனேவ தம் வுத்தம். நியமம் பன யதா² த்³வின்னம் பாரிஸுத்³தி⁴உபோஸதோ² வினா ஞத்தியா ஹோதி, ஏவம் த்³வின்னம் நிஸ்ஸட்ட²சீவரதா³னம்பீதி வதா³ம, தஸ்மா ‘‘ஆயஸ்மதோ தே³மா’’தி வத்தும் வட்டதி. கத²ம் பனேதம் ஞாதப்³ப³ந்தி? தத³னுலோமத்தாதி. ஏகதே³வேத³ம் ஞத்திகம்மம் அபலோகனேனாபி காதும் வட்டதீதி ஸாத⁴னந்தி வேதி³தப்³ப³ந்தி ஆசரியோ. அனுக³ண்டி²பதே³ பனேத்த² சோத³னம் கத்வா ‘‘ஏதம் ஸாதி⁴தம். ஞத்திகம்மம் ஏகம் ஞத்திம் ட²பேத்வாவ காதப்³ப³’’ந்தி பாளியா ஆக³தம் ஸந்தா⁴ய வுத்தம், இத³ம் பன பாளியம் நாக³தம், லேஸதோ ஆஹரித்வா வுத்தந்தி கத்வா ஏதம் அபலோகனேனாபி வட்டதீதி.

468. ஏஸ நயோதி அஞ்ஞேஸம் சீவரேஸு உபசிகாதீ³ஹி கா²யிதேஸு மமபி கா²யிதானீதிஆதி³. ‘‘அஞ்ஞேன கதம்…பே… ஸாத⁴க’’ந்தி வசனதோ ஸமானஜாதிகம், ஏகத்த²ஜாதிகஞ்ச ததியகதி²னம் பட²மஸமானமேவாதி ஸித்³த⁴ம் ஹோதி.

469. திசீவரம் அதி⁴ட்டா²துந்தி ஏத்த² திசீவரம் திசீவராதி⁴ட்டா²னேன அதி⁴ட்டா²தப்³ப³யுத்தகம், யம் வா திசீவராதி⁴ட்டா²னேன அதி⁴ட்டா²தும் அவிகப்பேதும் அனுஜானாமி, தஸ்ஸ அதி⁴ட்டா²னகாலபரிச்சே²தா³பா⁴வதோ ஸப்³ப³காலம் இச்ச²ந்தஸ்ஸ அதி⁴ட்டா²தும்யேவ அனுஜானாமி, தம் காலபரிச்சே²த³ம் கத்வா விகப்பேதும் நானுஜானாமி. ஸதி பன பச்சயே யதா³ ததா³ வா பச்சுத்³த⁴ரித்வா விகப்பேதும் வட்டதீதி ‘‘அனாபத்தி அந்தோத³ஸாஹம் அதி⁴ட்டே²தி, விகப்பேதீ’’தி வசனதோ ஸித்³த⁴ம் ஹோதீதி வுத்தமேதம். வஸ்ஸிகஸாடிகம் ததோ பரம் விகப்பேதும்யேவ நாதி⁴ட்டா²தும். வத்த²ஞ்ஹி கதபரியோஸிதம் அந்தோசதுமாஸே வஸ்ஸானதி³வஸம் ஆதி³ம் கத்வா அந்தோத³ஸாஹே அதி⁴ட்டா²தும் அனுஜானாமி, சதுமாஸதோ உத்³த⁴ம் அத்தனோ ஸந்தகம் கத்வா ட²பிதுகாமேன விகப்பேதும் அனுஜானாமீதி அத்தோ². ஸுக³தசீவரதோ ஊனகந்தி திண்ணம்பி சீவரானம் உக்கட்ட²பரிச்சே²தோ³. ‘‘திசீவரம் பன பரிக்கா²ரசோளம் அதி⁴ட்டா²தும் வட்டதீ’’தி வாதே³ பன ஸதி ததா²ரூபபச்சயே வட்டதி. யதா² ஸதி பச்சயே விகப்பேதும் வட்டதீதி ஸாதி⁴தமேதம், பகே³வ அஞ்ஞேன அதி⁴ட்டா²னேன அதி⁴ட்டா²தும். ‘‘அந்தோத³ஸாஹம் அதி⁴ட்டே²தி, விகப்பேதீ’’தி அனியமதோ வுத்தந்தி ஸங்கா⁴டி, உத்தராஸங்கோ³, அந்தரவாஸகந்தி அதி⁴ட்டி²தானதி⁴ட்டி²தானம் ஸமானமேவ நாமம். ‘‘அயம் ஸங்கா⁴டீ’’திஆதீ³ஸு (மஹாவ. 126) ஹி அனதி⁴ட்டி²தா வுத்தா. ‘‘திசீவரேன விப்பவஸேய்யா’’தி ஏத்த² அதி⁴ட்டி²தா வுத்தா. ஸாமந்தவிஹாரே வாதி கோ³சரகா³மதோ விஹாரேதி த⁴ம்மஸிரித்தே²ரோ. தூ³ரதரேபி லப்³ப⁴தேவாதி ஆசரியோ. அனுக³ண்டி²பதே³பி ‘‘ஸாமந்தவிஹாரே வாதி தே³ஸனாஸீஸமத்தம், தஸ்மா ட²பிதட்டா²னம் ஸல்லக்கே²த்வா தூ³ரே டி²தம்பி அதி⁴ட்டா²தப்³ப³’’ந்தி வுத்தம். ஸாமந்தவிஹாரோ நாம யத்த² தத³ஹேவ க³ந்த்வா நிவத்திதும் ஸக்கா. ரத்திவிப்பவாஸம் ரக்க²ந்தேன ததோ தூ³ரே டி²தம் அதி⁴ட்டா²தும் ந வட்டதி, ஏவம் கிர மஹாஅட்ட²கதா²யம் வுத்தந்தி. கேசி ‘‘சீவரவம்ஸே ட²பிதம் அஞ்ஞோ பரிவத்தித்வா நாக³த³ந்தே ட²பேதி, தம் அஜானித்வா அதி⁴ட்ட²ஹந்தஸ்ஸபி ருஹதி சீவரஸ்ஸ ஸல்லக்கி²தத்தா’’தி வத³ந்தி. அதி⁴ட்ட²ஹித்வாதி பரிக்கா²ரசோளாதி³வஸேன. மஹந்ததரமேவாதிஆதி³ ஸப்³பா³தி⁴ட்டா²னஸாதா⁴ரணலக்க²ணம். தத்த² புன அதி⁴ட்டா²தப்³ப³மேவாதி அதி⁴ட்டி²தசீவரஸ்ஸ ஏகதே³ஸபூ⁴தத்தா. அனதி⁴ட்டி²தஞ்சே, அதி⁴ட்டி²தஸ்ஸ அப்பபா⁴வேன ஏகதே³ஸபூ⁴தம் அதி⁴ட்டி²தஸங்க்²யமேவ க³ச்ச²தி. ததா² அதி⁴ட்டி²தஞ்சே, அனதி⁴ட்டி²தஸ்ஸ ஏகதே³ஸபூ⁴தம் அனதி⁴ட்டி²தஸங்க்²யம் க³ச்ச²தீதி ஹி லக்க²ணம், ந கேவலஞ்சேத்த² து³தியபட்டமேவ, ததியபட்டாதி³கம்பி. யதா²ஹ ‘‘அனுஜானாமி…பே… உதுத்³த⁴டானம் து³ஸ்ஸானம் சதுக்³கு³ணம் ஸங்கா⁴டிம்…பே… பம்ஸுகூலே யாவத³த்த²’’ந்தி (மஹாவ. 348).

அவஸேஸா பி⁴க்கூ²தி வக்க²மானகாலே நிஸின்னா பி⁴க்கூ². தஸ்மா வட்டதீதி யதா² ‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேது’’ந்தி வுத்தம், ஏவம் பரிக்கா²ரசோளம்பி வுத்தம், ந தஸ்ஸ உக்கட்ட²பரிச்சே²தோ³ வுத்தோ, ந ச ஸங்க்²யாபரிச்சே²தோ³, தஸ்மா தீணிபி சீவரானி பச்சுத்³த⁴ரித்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி அதி⁴ட்ட²ஹித்வா பரிபு⁴ஞ்ஜிதும் வட்டதீதி அத்தோ². ‘‘நிதா⁴னமுக²மேத’’ந்தி கத²ம் பஞ்ஞாயதீதி சே? ‘‘தேன கோ² பன ஸமயேன பி⁴க்கூ²னம் பரிபுண்ணம் ஹோதி திசீவரம், அத்தோ² ச ஹோதி பரிஸ்ஸாவனேஹிபி த²விகாஹிபீ’’தி ஏதஸ்மிம் வத்து²ஸ்மிம் ‘‘அனுஜானாமி, பி⁴க்க²வே, பரிக்கா²ரசோள’’ந்தி (மஹாவ. 358) அனுஞ்ஞாதத்தா. பி⁴க்கூ²னஞ்ச ஏகமேவ பரிஸ்ஸாவனம், த²விகா வா வட்டதி, ந த்³வே வா தீணி வாதி படிக்கே²பாபா⁴வதோ விகப்பனுபக³பச்சி²மப்பமாணானி, அதிரேகப்பமாணானி வா பரிஸ்ஸாவனாதீ³னி பரிக்கா²ரானி கப்பந்தீதி ஸித்³த⁴ம். யதி³ ஏவம் ‘‘யம்னூனாஹம் பி⁴க்கூ²னம் சீவரே ஸீமம் ப³ந்தே⁴ய்யம் மரியாத³ம் ட²பேய்ய’’ந்தி (மஹாவ. 346) வசனவிரோதோ⁴தி சே? ந, அனுஸந்தி⁴யா அஜானனதோ, விரோத⁴தோ ச. கிம் வுத்தம் ஹோதி? சீவரக்க²ந்த⁴கே (மஹாவ. 326 ஆத³யோ) பட²மம் க³ஹபதிசீவரம் அனுஞ்ஞாதம், ததோ பாவாரகோஸியகோஜவகம்ப³லாதி³. ததோ ‘‘தேன கோ² பன ஸமயேன ஸங்க⁴ஸ்ஸ உச்சாவசானி சீவரானி உப்பன்னானி ஹோந்தி. அத² கோ² பி⁴க்கூ²னம் ஏதத³ஹோஸி ‘கிம் நு கோ² ப⁴க³வதா சீவரம் அனுஞ்ஞாதம், கிம் அனனுஞ்ஞாத’’’ந்தி ஏதஸ்மிம் வத்து²ஸ்மிம் ‘‘அனுஜானாமி, பி⁴க்க²வே, ச² சீவரானி கோ²ம’’ந்திஆதி³னா (மஹாவ. 339) கப்பியசீவரஜாதி அனுஞ்ஞாதா, ந பன ஸங்க்²யாபமாணம். ததோ ‘‘அத்³த³ஸ ப⁴க³வா…பே… ஸம்ப³ஹுலே பி⁴க்கூ² சீவரேஹி உப்³ப⁴ண்டி³தே ஸீஸேபி சீவரபி⁴ஸிம் கரித்வா க²ந்தே⁴பி சீவரபி⁴ஸிம் கரித்வா கடியாபி சீவரபி⁴ஸிம் கரித்வா ஆக³ச்ச²ந்தே, தி³ஸ்வான ப⁴க³வதோ ஏதத³ஹோஸி…பே… யேபி கோ² தே குலபுத்தா இமஸ்மிம் த⁴ம்மவினயே ஸீதாலுகா ஸீதபீ⁴ருகா, தேபி ஸக்கோந்தி திசீவரேன யாபேதும், யம்னூனாஹம் பி⁴க்கூ²னம் சீவரே ஸீமம் ப³ந்தே⁴ய்யம் மரியாத³ம் ட²பேய்யம் திசீவரம் அனுஜானேய்ய’’ந்தி (மஹாவ. 346) சீவரம் அனுஞ்ஞாதம், தஞ்ச கோ² ஏகமேவ. ச²ப்³ப³க்³கி³யா பன மிச்சா² க³ஹேத்வா ப³ஹூனி பரிஹரிம்ஸு. தானி நேஸம் அதிரேகட்டா²னே டி²தானி ஹோந்தி. ததோ ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேது’’ந்தி (மஹாவ. 347) அனுஞ்ஞாதம், தேனேதம் பஞ்ஞாயதி. அதிரேகானி ப³ஹூனி சீவரானி தே பரிஹரிம்ஸு, ‘‘தானி த³ஸாஹபரமமேவ தா⁴ரேதும் அனுஜானாமி, ந தமேவேக’’ந்தி வத³ந்தேன யா புப்³பே³ திசீவராதி⁴ட்டா²னஸங்கா²தா சீவரே ஸீமாப³த்³தா⁴, மரியாதா³ ச ட²பிதா, தாய ஸதிபி திசீவரபா³ஹுல்லபரிஹரணக்கமோ த³ஸ்ஸிதோ தி³வஸபரிச்சே²த³வஸேன. ததோ பரம் ‘‘அனுஜானாமி, பி⁴க்க²வே, அதிரேகசீவரம் விகப்பேது’’ந்தி (மஹாவ. 347) அனுஜானந்தேன வினாபி தி³வஸபரிச்சே²தே³ன அதிரேகசீவரபரிஹரணக்கமோ த³ஸ்ஸிதோதி த்³வேபி தானி நிதா⁴னமுகா²னீதி ஸித்³த⁴ம். ததா² பரிக்கா²ரசோளாதி⁴ட்டா²னம்பி ஸியா, அஞ்ஞதா² இதரசீவராதி⁴ட்டா²னானுஜானனவிரோதோ⁴ ஸியா ஸீமாமரியாத³ட்ட²பனவிரோத⁴தோ. திசீவராதி⁴ட்டா²னபஞ்ஞத்தியேவ திசீவரமரியாதா³ ஹோதி. தேன வுத்தம் ‘‘பாடேக்கம் நிதா⁴னமுக²மேத’’ந்தி. ‘‘பட²மம் திசீவரம் திசீவராதி⁴ட்டா²னேன அதி⁴ட்டா²தப்³ப³ம், புன பரிஹரிதும் அஸக்கோந்தேன பச்சுத்³த⁴ரித்வா பரிக்கா²ரசோளம் அதி⁴ட்டா²தப்³ப³ம், ந த்வேவ ஆதி³தோவ இத³ம் வுத்த’’ந்தி வுத்தம். ‘‘யதா² திசீவரம் பரிஹரிதும் அஸக்கோந்தஸ்ஸ கி³லானஸ்ஸ விப்பவாஸஸம்முதி அனுஞ்ஞாதா, அகி³லானஸ்ஸபி ஸாஸங்கஸிக்கா²பதே³ (பாரா. 652) தஸ்ஸ அந்தரக⁴ரே நிக்கே²போ ச, ததோபி ஸதி பச்சயே சா²ரத்தவிப்பவாஸோ, ததோபி அஸக்கோந்தஸ்ஸ பச்சுத்³தா⁴ரோ, பச்சுத்³த⁴டம்பி அந்தோத³ஸாஹே அதி⁴ட்டா²தும், அஸக்கோந்தஸ்ஸ விகப்பனா ச அனுஞ்ஞாதா. ததே²வ த்³வின்னம்பி ஸம்முகா²பரம்முகா²விகப்பனானம் பரஸந்தகத்தா விகப்பனபச்சயே அஸதி ‘பரிக்கா²ரசோள’ந்தி அதி⁴ட்ட²ஹித்வா பரிபு⁴ஞ்ஜிதும் ப⁴க³வதா அனுஞ்ஞாதம் ஸியா, யதோ தத³தி⁴ப்பாயஞ்ஞூ ஏவம் வத³ந்தீ’’தி மஹாபச்சரியம்பி வுத்தம். புப்³பே³திஆதி³ ‘‘பாடேக்கம் நிதா⁴னமுக²’’ந்தி வுத்தஸ்ஸ பயோக³த³ஸ்ஸனத்த²ம் வுத்தம். அப³த்³த⁴ஸீமாயம் து³ப்பரிஹாரந்தி விகப்பனாதி³அத்தா²ய உபசாரம் அதிக்கமித்வாபி க³மனஸம்ப⁴வதோ.

வஸ்ஸிகஸாடிகா அனதிரித்தப்பமாணாதி தஸ்ஸா உக்கட்ட²பரிச்சே²த³ஸ்ஸ வுத்தத்தா வுத்தம். பச்சத்த²ரணம்பி அதி⁴ட்டா²தப்³ப³மேவாதி ‘‘இத³ம், ப⁴ந்தே, அம்ஹாகம் ஸேனாஸனஸ்ஸ உபரி அத்த²ரிதப்³ப³’’ந்திஆதி³னா தி³ன்னம் நாதி⁴ட்டா²தப்³ப³ம், ‘‘இத³ம் தும்ஹாக’’ந்தி தி³ன்னம் ஸயம் அதி⁴ப்பேதம்வ அதி⁴ட்டா²தப்³ப³ந்தி அதி⁴ப்பாயோ. ‘‘ஸகிம் அதி⁴ட்டி²தம் அதி⁴ட்டி²தமேவ ஹோதி, ந புன பச்சுத்³த⁴ரீயதி காலபரிச்சே²தா³பா⁴வதோ’’தி லிகி²தம். ‘‘ஏகவசனேனபி வட்டதீதி அபரே’’தி வுத்தம். பே⁴ஸஜ்ஜனவகம்மமாதாபிதுஆதீ³னம் அத்தா²யாதி ஏத்த² ‘‘இமினா பே⁴ஸஜ்ஜம் சேதாபேஸ்ஸாமி, இத³ம் மாதுயா த³ஸ்ஸாமீ’’தி ட²பேந்தேன அதி⁴ட்டா²தப்³ப³ம். ‘‘‘இத³ம் பே⁴ஸஜ்ஜஸ்ஸ, இமம் மாதுயா’தி விப⁴ஜந்தேன அதி⁴ட்டா²னகிச்சம் நத்தீ²தி அபரே’’தி வுத்தம். ‘‘ஸகபா⁴வம் மோசேத்வா ட²பனம் ஸந்தா⁴யாஹா’’தி லிகி²தம்.

‘‘புன அதி⁴ட்டா²தப்³ப³ந்தி அயம் ஸங்கீ³திதோ பட்டா²ய ஆக³தஅட்ட²கதா²வாதோ³. ததோ பரம் ஆசரியானம் தத்த² தத்த² யுத்திவிசாரணா’’தி வுத்தம். பமாணசீவரஸ்ஸாதி பச்சி²மப்பமாணஸ்ஸ. த்³வே சீவரானீதி ஸஹ உத்தராஸங்கே³ன. ஏஸ நயோதி பமாணயுத்தேஸு யத்த² கத்த²சீதிஆதி³னயோவ. ‘‘தம் அதிக்காமயதோ சே²த³னக’’ந்தி (பாசி. 533) வசனதோ உத்தரி படிஸித்³த⁴ம், ததோ ஹேட்டா² அப்படிஸித்³த⁴த்தா வட்டதி. தத்த² ஸியா – திசீவரஸ்ஸ பச்சி²மப்பமாணம் விஸும் ஸுத்தே நத்தீ²தி, ந வத்தப்³ப³ம், ஸிக்கா²கரணீயேஹி ஸித்³த⁴த்தா. கிம் வுத்தம் ஹோதி? ‘‘‘பரிமண்ட³லம் நிவாஸேஸ்ஸாமி, பாருபிஸ்ஸாமி, ஸுப்படிச்ச²ன்னோ அந்தரக⁴ரே க³மிஸ்ஸாமீ’தி (பாசி. 576-579) வசனதோ யத்தகேன பமாணேன பரிமண்ட³லதா, ஸுப்படிச்ச²ன்னதா ச அட்ட²கதா²யம் வுத்தக்கமேன ஸம்பஜ்ஜதீ’’தி வத்தப்³ப³ம். தேஸம் வஸேன பச்சி²மப்பமாணந்தி ஸித்³த⁴ம், தஞ்ச கோ² முட்டி²பஞ்சகாதி³ யதா²வுத்தமேவ வுச்சதே. தேனேவாஹ லேஸம் ட²பேத்வா ‘‘விஸும் ஸுத்தே நத்தீ²’’தி.

அபிசேத்த² அதி⁴ப்பேதம், ததா²பி ந ஸமேதியேவாதி அத்தோ², தஸ்மா ‘‘யதீ³’’திஆதி³ஸம்ப³ந்தோ⁴ அத்³தா⁴ வுத்தோ. யஸ்மா பரிச்சி²ன்னோ ஸமேதி ச. இதரேஸு பன ஏகச்சஸ்மிம் ஆசரியவாதே³ நேவ பரிச்சே²தோ³ அத்தி². ஏகச்சஸ்மிம் ந புப்³பா³பரம் ஸமேதீதி ஸம்ப³ந்தோ⁴. அதி⁴ட்டா²னம் அதி⁴ட்டா²னமேவ, பரிபோ⁴க³காலே பன அரஜிதம் ந வட்டதி. இத³ம் ஸப்³ப³ம் திசீவரே ஏவ. இமஸ்ஸ பன ஸிக்கா²பத³ஸ்ஸ அயம் ஸங்கே²பவினிச்ச²யோ – அனத்த²தே கதி²னே ஹேமந்தானம் பட²மதி³வஸதோ பட்டா²ய அத்த²தே கதி²னே கி³ம்ஹானம் பட²மதி³வஸதோ பட்டா²ய உப்பன்னசீவரம் ஸந்தா⁴ய ‘‘நிட்டி²தசீவரஸ்மி’’ந்திஆதி³ வுத்தந்தி.

ஏத்தா²ஹ – ‘‘ரஜகேஹி தோ⁴வாபேத்வா ஸேதம் காராபேந்தஸ்ஸாபி அதி⁴ட்டா²னம் அதி⁴ட்டா²னமேவா’’தி வசனதோ அரஜிதேபி அதி⁴ட்டா²னம் ருஹதி, தேன ஸூசிகம்மம் கத்வா ரஜித்வா கப்பபி³ந்து³ம் த³த்வா அதி⁴ட்டா²தப்³ப³ந்தி நியமோ ந காதப்³போ³தி? வுச்சதே, காதப்³போ³வ பத்தோ விய அதி⁴ட்டி²தோ. யதா² புன ஸேதபா⁴வம், தம்ப³பா⁴வம் வா பத்தோ அதி⁴ட்டா²னம் ந விஜஹதி, ந ச பன தாதி³ஸோ அதி⁴ட்டா²னம் உபக³ச்ச²தி, ஏவமேதம் த³ட்ட²ப்³ப³ந்தி. ‘‘யதோ பட்டா²ய பரிபோ⁴கா³த³யோ வட்டந்தி, ததோ பட்டா²ய அந்தோத³ஸாஹே அதி⁴ட்டா²தப்³ப³’’ந்தி வத³ந்தி.

அவிஸேஸேன வுத்தவசனந்தி அதி⁴ட்டா²தப்³ப³ம் அதி⁴ட்டே²தி, விகப்பேதப்³ப³ம் விகப்பேதீதி ஏவம் ஸவிஸேஸம் கத்வா அவசனம் ‘‘ந விகப்பேது’’ந்தி (மஹாவ. 358) இமினா விருத்³த⁴ம் விய தி³ஸ்ஸதி. இதா³னி இத³ம் அதி⁴ட்டா²னவிகப்பனனயபடிப³த்³த⁴ம் க²ந்த⁴கம், பரிவாரஞ்ச மிஸ்ஸேத்வா பகிண்ணகம் வுச்சதி – க²ந்த⁴கே தாவ ‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேதும், வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும், ததோ பரம் விகப்பேது’’ந்திஆதி³ வுத்தம். பரிவாரே ‘‘ந நவ சீவரானி அதி⁴ட்டா²தப்³பா³னி, ந நவ சீவரானி விகப்பேதப்³பா³னீ’’தி (பரி. 329), ‘‘த³ஸகே த³ஸ, ஏகாத³ஸகே ஏகாத³ஸ சீவரானி அதி⁴ட்டா²தப்³பா³னி, ந விகப்பேதப்³பா³னீ’’தி (பரி. 331) ச அனேகக்க²த்தும் வசனேன ஸுட்டு² த³ள்ஹம் கத்வா ‘‘ஸப்³பா³னி சீவரானி அதி⁴ட்டா²தப்³பா³னி, ந விகப்பேதப்³பா³னீ’’தி வுத்தம், தஸ்மா உபோ⁴பி தே விருத்³தா⁴ விய தி³ஸ்ஸந்தி, க²ந்த⁴கே ஏவ ச ‘‘வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும் ததோ பரம் விகப்பேது’’ந்தி (மஹாவ. 358) வுத்தம். தத³ட்ட²கதா²யம் ‘‘வஸ்ஸிகஸாடிகா அனதிரித்தப்பமாணா நாமம் க³ஹேத்வா வுத்தனயேனேவ சத்தாரோ வஸ்ஸிகே மாஸே அதி⁴ட்டா²தப்³பா³, ததோ பரம் பச்சுத்³த⁴ரித்வா விகப்பேதப்³பா³’’தி வுத்தம். இத³ஞ்ச விருத்³த⁴ம் விய தி³ஸ்ஸதி அஞ்ஞமஞ்ஞம் ஹேமந்தே பச்சுத்³தா⁴ரஸம்ப⁴வதோ, வஸ்ஸானே விகப்பனாஸம்ப⁴வதோ ச. ததா² இத⁴ ‘‘அனாபத்தி அந்தோத³ஸாஹம் அதி⁴ட்டே²தி விகப்பேதீ’’தி வசனப்பமாணதோ ஸப்³ப³த்த² விகப்பனாய அப்படிஸித்³த⁴பா⁴வோ வேதி³தப்³போ³தி (பாரா. அட்ட². 2.469) அட்ட²கதா²வசனம் பரிவாரவசனேன விருத்³த⁴ம் விய தி³ஸ்ஸதி, ந ஹி விருத்³த⁴ம் ததா²க³தா பா⁴ஸந்தி, தஸ்மா அட்ட²கதா²னயோவேத்த² படிஸரணம், யேன ஸப்³ப³ம்பி தம் ஏகரஸம் ஹோதி. பரிவாரட்ட²கதா²யஞ்ச வுத்தம் ‘‘ந விகப்பேதப்³பா³னீதி அதி⁴ட்டி²தகாலதோ பட்டா²ய ந விகப்பேதப்³பா³னீ’’தி (பரி. அட்ட². 329). திசீவரானி அதி⁴ட்டி²தகாலதோ பட்டா²ய, வஸ்ஸிகஸாடிகாதீ³னி ச அத்தனோ அத்தனோ அதி⁴ட்டா²னகே²த்தே ந அகாமா விகப்பேதப்³பா³னீதி அத்தோ², அவஸேஸபாளி, அத்தோ² ச இத⁴ அட்ட²கதா²யம் வுத்தோ, தஸ்மா ஸப்³ப³ம்பேதம் ஏகரஸந்தி.

ஏத்தா²ஹ – யதி³ ஏவம் ‘‘நவ சீவரானி நாதி⁴ட்டா²தப்³பா³னீ’’தி ச வத்தப்³ப³ம். விகப்பிதகாலதோ பட்டா²ய ஹி நாதி⁴ட்டா²தப்³பா³னீதி? ஏத்த² வுச்சதே – ‘‘திசீவரம் அதி⁴ட்டா²தும் ந விகப்பேதும்…பே… பரிக்கா²ரசோளம் அதி⁴ட்டா²தும் ந விகப்பேது’’ந்தி ஏத்த² ஸப்³ப³த்த² அதி⁴ட்டா²னே படிஸேதா⁴த³ஸ்ஸனதோ, விகப்பனாய அத³ஸ்ஸனதோ ச ‘‘ததோ பர’’ந்தி த்³வீஸ்வேவ பரிச்சே²த³த³ஸ்ஸனதோ ச ‘‘நவ சீவரானி அதி⁴ட்டா²தப்³பா³னி, ந விகப்பேதப்³பா³னி சேவ வுத்தந்தி வேதி³தப்³ப³ம். அபரோ நயோ – அனுஜானாமி, பி⁴க்க²வே, திசீவரம் அதி⁴ட்டா²தும் அகாமா. கஸ்மா? காலே உப்பன்னம் அனதி⁴ட்ட²ஹந்தஸ்ஸ காலாதிக்கமே ஆபத்திஸம்ப⁴வதோ, அகாலே உப்பன்னம் அனதி⁴ட்ட²ஹந்தஸ்ஸ த³ஸாஹாதிக்கமே ஆபத்திஸம்ப⁴வதோ ச. தத்த² யம் காலே உப்பன்னம் அப்பஹோந்தேபி த³ஸாஹே காலாதிக்கமே ஆபத்திகரம், தம் நிஸ்ஸஜ்ஜனகாலே ‘‘இத³ம் மே, ப⁴ந்தே, அதிரேகசீவரம் தா⁴ரிதம் நிஸ்ஸக்³கி³யம், இமாஹம் ஸங்க⁴ஸ்ஸா’’திஆதி³னா நிஸ்ஸஜ்ஜிதப்³ப³ம், இதரம் யதா²பாளிமேவ. தத்த² பட²மனயோ ‘‘யோ பன, பி⁴க்கு², அதிரேகசீவரம் தா⁴ரேய்ய நிஸ்ஸக்³கி³ய’’ந்தி இமாய பட²மபஞ்ஞத்தியா வஸேன வுத்தோ, து³தியோ அனுபஞ்ஞத்தியா வஸேன வுத்தோ.

யதா² ச நிஸ்ஸஜ்ஜிதப்³ப³வத்து²ம்ஹி அஸதி யதா²பாளிம் அவத்வா கேவலம் ஆபத்தி ஏவ தே³ஸேதப்³பா³, யதா² ச வஸ்ஸிகஸாடிகனிஸ்ஸஜ்ஜனே கேவலம் பரியிட்ட²மத்தே யதா²பாளிம் அவத்வா யதா²ஸம்ப⁴வம் நிஸ்ஸஜ்ஜிதப்³ப³ம், ததா² இத³ம்பீதி வேதி³தப்³ப³ம். யதா² ஸம்வச்ச²ராதிக்கந்தம் அதிரேகசீவரம் ‘‘த³ஸாஹாதிக்கந்த’’மிச்சேவ வுச்சதி. ஸம்வச்ச²ரவிப்பவுத்த²திசீவரம், மாஸாதிக்கந்தஞ்ச ‘‘ரத்திவிப்பவுத்த²’’ந்தி ச ‘‘சா²ரத்தவிப்பவுத்த²’’ந்தி ச வுச்சதி, ததா² இத³ம்பி ‘‘த³ஸாஹாதிக்கந்த’’மிச்சேவ வுச்சதீதி ஏகே, தஸ்மா ஸித்³த⁴மித³ம் ‘‘அனுஜானாமி, பி⁴க்க²வே, திசீவரம் அதி⁴ட்டா²தும் அகாமா’’தி, ததா² அகாமா ந விகப்பேதுந்தி அத்தோ². இச்சா²ய ஹி ஸதி ‘‘பச்சுத்³த⁴ரித்வா விப்பவாஸஸுக²த்த²ம் விகப்பனாய ஓகாஸோ தி³ன்னோ ஹோதி, த³ஸாஹாதிக்கமே ச அனாபத்தீ’’தி வசனதோ விகப்பேதும் அனுஜானாமீதி வுத்தம் ஹோதி. ததா² வஸ்ஸிகஸாடிகா அகாமா அதி⁴ட்டா²தும் த³ஸாஹாதிக்கமே ஆபத்திஸம்ப⁴வதோ. கித்தகம் காலந்தி சே? வஸ்ஸானம் சாதுமாஸம், இச்சா²ய பன ஸதி உத்³த⁴ம்யேவ விகப்பேதப்³ப³ம். ‘‘ஸப்³ப³த்த² விகப்பனாய அப்படிஸித்³த⁴பா⁴வோ வேதி³தப்³போ³’’தி ஹி வுத்தம். ‘‘அத்தா²பத்தி ஹேமந்தே ஆபஜ்ஜதி, நோ கி³ம்ஹே, நோ வஸ்ஸே’’தி (பரி. 323) ச வுத்தம், தேன வுத்தம் அட்ட²கதா²யம் ‘‘ததோ பரம் பச்சுத்³த⁴ரித்வா விகப்பேதப்³பா³’’தி.

தத்ராயம் விசாரணா – கதா³ பச்சுத்³த⁴ரிதப்³பா³, கதா³ விகப்பேதப்³பா³, கிஞ்சேத்த² யஸ்மா ‘‘ததோ பர’’ந்தி வுத்தம். ஹேமந்தஞ்ச பத்தமத்தே ஸா அதி⁴ட்டா²னம் விஜஹதி, தஸ்மா ‘‘பச்சுத்³த⁴ரித்வா’’தி ந வத்தப்³ப³ம் அதி⁴ட்டா²னஸ்ஸ நத்தி²தாய, அத² ‘‘அந்தோசாதுமாஸே விகப்பேதப்³பா³’’தி ந வத்தப்³ப³ம். ‘‘ததோ பரம் விகப்பேது’’ந்தி ஹி வுத்தந்தி? ஏத்த² ஏகச்சே வத³ந்தி ‘‘வத்தப்³ப³மேத’’ந்தி. யதா² பரிவுத்த²பரிவாஸோ, சிண்ணமானத்தோ ச ஸந்தோ நிட்டி²தேஸுபி பரிவாஸமானத்ததி³வஸேஸு, ததா² நிட்டி²தேஸுபி அதி⁴ட்டா²னதி³வஸேஸு ஸாதி⁴ட்டா²னமேதந்தி ஏகே. அட்ட²கதா²சரியானம் இத³ம் ஸன்னிட்டா²னம் ‘‘கத்திகபுண்ணமதி³வஸே பச்சுத்³த⁴ரித்வா பாடிபத³தி³வஸே விகப்பேதப்³பா³’’தி. வுத்தஞ்ஹேதம் பரிவாரட்ட²கதா²யம் ‘‘கத்திகபுண்ணமாஸியா பச்சி²மே பாடிபத³தி³வஸே விகப்பேத்வா ட²பிதம் வஸ்ஸிகஸாடிகம் நிவாஸேந்தோ ஹேமந்தே ஆபஜ்ஜதி. குருந்தி³யம் பன ‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’தி வுத்தம், தம்பி ஸுவுத்தம். ‘சாதுமாஸம் அதி⁴ட்டா²தும், ததோ பரம் விகப்பேது’ந்தி ஹி வுத்த’’ந்தி (பரி. அட்ட². 323). தத்த² குருந்தி³னயோ பச்சா² வுத்தத்தா ஸாரதோ த³ட்ட²ப்³போ³, ந புரிமோ. நிவாஸேந்தோ ஹி கி³ம்ஹேபி ஓரேனத்³த⁴மாஸம் ஆபஜ்ஜதி ஏவ. இத⁴ ச ‘‘அத்தா²பத்தி ஹேமந்தே ஆபஜ்ஜதி, நோ கி³ம்ஹேதி வுத்த’’ந்தி குருந்தி³வசனஸ்ஸாயமத்தோ² தி³ஸ்ஸதி.

‘‘கத்திகபுண்ணமதி³வஸே அபச்சுத்³த⁴ரித்வா தஸ்மிம்யேவ தி³வஸே அவிகப்பேந்தோ பச்சி²மபாடிபத³தி³வஸே அபச்சுத்³தா⁴ரபச்சயா து³க்கடம் ஆபஜ்ஜதி, ந, அவிகப்பனபச்சயா த³ஸாஹபரிஹாரஸம்ப⁴வதோ’’தி காரணமேகே வத³ந்தி. ஏவம் ஸதி ஹேமந்தே பத்தமத்தே அதி⁴ட்டா²னம் விஜஹதீதி ஆபஜ்ஜதி, தஞ்ச அயுத்தம். அதி⁴ட்டா²னஞ்ஹி ‘‘அஞ்ஞஸ்ஸ தா³னேன…பே… சி²த்³த³பா⁴வேனாதி இமேஹி நவஹி காரணேஹி விஜஹதீ’’தி (பாரா. அட்ட². 2.469) வுத்தம், ந ‘‘அதி⁴ட்டா²னகே²த்தாதிக்கமேன வா’’தி. அஸாதா⁴ரணத்தா ந வுத்தந்தி சே? ந, ‘‘சி²த்³த³பா⁴வேனா’’தி ந வத்தப்³ப³ப்பஸங்க³தோ, சி²த்³த³பா⁴வேன பன திசீவரஸ்ஸேவ ஸப்³ப³ட்ட²கதா²ஸு அதி⁴ட்டா²னவிஜஹனஸ்ஸ வுத்தத்தா. தஸ்மா ஹேமந்தஸ்ஸ பட²மதி³வஸே அபச்சுத்³தா⁴ரபச்சயா து³க்கடம் ஆபஜ்ஜதி, ந பச்சுத்³த⁴ரித்வா அவிகப்பனபச்சயா. ‘‘விகப்பேது’’ந்தி வசனதோ ததோ அதி⁴ட்டா²னம் ந விஜஹதீதி பஞ்ஞாயதி. ந ஹி கத்திகபுண்ணமாஸியா பச்சி²மே பாடிபத³தி³வஸே அவிகப்பேத்வா ஹேமந்தே ஆபஜ்ஜதீதி வுத்தந்தி அதி⁴ப்பாயோ, யஸ்மா தம் அபச்சுத்³தா⁴ரபச்சயா து³க்கடம் ஹேமந்தஸ்ஸ பட²மஅருணக்க²ணே ஏவ ஆபஜ்ஜதி, தஸ்மா ‘‘கத்திகபுண்ணமதி³வஸே அபச்சுத்³த⁴ரித்வா’’தி வுத்தம். பச்சுத்³த⁴டம் பன ஹேமந்தே த³ஸாஹபரிஹாரம் லப⁴தி. ‘‘த³ஸாஹே அப்பஹோந்தே சீவரகாலம் நாதிக்காமேதப்³பா³’’தி (பாரா. அட்ட². 2.630) ஹி வுத்தம், தஞ்ச கோ² ஸமயே உப்பன்னம் சே, நாஸமயே. ததா² ச ஸாதி⁴தம் அபச்சுத்³த⁴டம் ந நிஸ்ஸக்³கி³யம் ஹோதி, நோ ச தம் பரித³ஹிதம், தஸ்மா கத்திகபுண்ணமதி³வஸே ஏவ பச்சுத்³த⁴ரணஞ்ச விகப்பனஞ்ச கத்தப்³ப³ந்தி ஸித்³த⁴ம், ஏத்த² ச யதா² அதிரேகசீவரம் த³ஸமே தி³வஸே விகப்பேந்தேன த³ஸாஹபரமம் தா⁴ரிதம் ஹோதி, அந்தோத³ஸாஹே ச விகப்பிதம் ஹோதி, ததா² கத்திகபுண்ணமாய விகப்பேந்தேன வஸ்ஸானம் சாதுமாஸம் அதி⁴ட்டி²தஞ்ச ஹோதி, ததோ பரம் அனாபத்திகே²த்தே ஏவ விகப்பனா ச ஹோதீதி வேதி³தப்³ப³ம். ஏத்தாவதா அத்தி² விகப்பனாகே²த்தே அதி⁴ட்டா²னம், அதி⁴ட்டா²னகே²த்தே ச விகப்பனாதி தீ³பிதம் ஹோதி. அஞ்ஞதா² ‘‘அத்தா²பத்தி அதி⁴ட்டா²னேன ஆபஜ்ஜதி, அனதி⁴ட்டா²னேன ஆபஜ்ஜதி. அத்தா²பத்தி விகப்பனாய ஆபஜ்ஜதி, அவிகப்பனாய ஆபஜ்ஜதீ’’தி து³கேஸு த்³வே து³கானி வத்தப்³பா³னி ஸியும். தத்த² பட²மது³கே பட²மபத³ம் ஸம்ப⁴வதி. விகப்பனகே²த்தே ஹி வஸ்ஸிகஸாடிகாதீ³னம் அதி⁴ட்டா²னேன வினயாதிஸாரது³க்கடம் ஆபஜ்ஜதி. ஏதேனேவ து³தியது³க்கடஸ்ஸ து³தியபத³ம் வுத்தம் ஹோதி. அனதி⁴ட்டா²னேன ஆபஜ்ஜதீதி நத்தி². அந்தோத³ஸாஹே அனாபஜ்ஜனதோ, விகப்பனாதி³ஸம்ப⁴வதோ ச விகப்பனாய ஆபஜ்ஜதீதி நத்தி² ஸப்³ப³த்த² விகப்பனாய அப்படிஸித்³த⁴த்தா, தஸ்மா தானி து³கானி ‘‘ந லப்³ப⁴ந்தீ’’தி ந வுத்தானி. ஏத்தா²ஹ – யா ஸா ‘‘அத்தா²பத்தி ஹேமந்தே ஆபஜ்ஜதீ’’தி (பரி. 323) வசனப்பமாணதோ து³க்கடாபத்தி ஸாதி⁴தா, ஸா ஸஞ்சிச்ச அபச்சுத்³த⁴ரந்தஸ்ஸ யுஜ்ஜதி, அஸதியா சே, கஞ்சி, அனாபத்தி. கத்திகபுண்ணமாய பச்சுத்³த⁴டம் ஸஞ்சிச்ச அவிகப்பயதோ து³க்கடேன ஸஹ புனதி³வஸே நிஸ்ஸக்³கி³யம், அஸதியா அவிகப்பயதோ நிஸ்ஸக்³கி³யமேவ இத⁴ பட²மபஞ்ஞத்தியா. யம் பன வுத்தம் மாதிகாட்ட²கதா²யம் (கங்கா². அட்ட². கதி²னஸிக்கா²பத³வண்ணனா) ‘‘வஸ்ஸிகஸாடிகா வஸ்ஸானமாஸாதிக்கமேனாபி, கண்டு³படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதி, தஸ்மா ஸா ததோ பரம் விகப்பேதப்³பா³’’தி, தேனேதம் விருஜ்ஜ²தி, ந கேவலம் இத³மேவ, ‘‘ததோ பரம் பச்சுத்³த⁴ரித்வா விகப்பேதப்³பா³’’தி அட்ட²கதா²வசனஞ்ச விருஜ்ஜ²தி. ததோ பரம் நாம ஹி ஹேமந்தம், தத்த² சே பச்சுத்³தா⁴ரோ, ‘‘வஸ்ஸிகஸாடிகா வஸ்ஸானமாஸாதிக்கமேனாபீ’’திஆதி³ ந யுத்தம் அதி⁴ட்டா²னாபா⁴வேன பச்சுத்³தா⁴ராபா⁴வதோ. அவிரோதோ⁴ ச இச்சி²தப்³போ³, தஸ்மா ‘‘பச்சுத்³த⁴ரணம் வத்தமத்த’’ந்திவாதோ³ ஏத்தா²பி ஸம்ப⁴வதீதி சே? ந, குருந்தி³ வசனவிரோத⁴தோ. தத்த² ஹி கத்திகபுண்ணமாய பச்சுத்³தா⁴ரோ வுத்தோ, தஸ்மா வஸ்ஸானதி³வஸத்தா ஸாதி⁴ட்டா²னாவஸா பச்சுத்³த⁴ரீயதீதி ந பச்சுத்³தா⁴ரோ வத்தமத்தம், தஸ்மா ‘‘ததோ பர’’ந்தி யாவ புண்ணமா அதி⁴ப்பேதா ஸியா. யதா² சாயம் விகப்போ, ததா² ‘‘வஸ்ஸானமாஸாதிக்கமேனாபி ஆபா³த⁴வூபஸமேனாபீ’’தி இத³ம்பி அவஸ்ஸம் பச்சுத்³த⁴ரிதப்³ப³தாய வுத்தம் ஸியா. ஏவஞ்ச ஸதி இத⁴ ஸமந்தபாஸாதி³காய தத³வசனேன ஸமேதி. அஞ்ஞதா² இத⁴பி தம் வத்தப்³ப³ம் ஸியாதி யதா²வுத்தோவ விதி⁴ ஏத்த² ஸம்ப⁴வதி, கிஞ்சாபி ஸம்ப⁴வதி, து³விஞ்ஞாபயஸ்ஸ பன லோகஸ்ஸ ஸுவிஞ்ஞாபனத்த²ம் வுத்தா. யஸ்மா பன ஸா வஸ்ஸானாதிக்கமேன அதி⁴ட்டா²னம் விஜஹதி, ஹேமந்தபட²மாருணே ச அபச்சுத்³தா⁴ரபச்சயா து³க்கடா ஸாதி⁴தா, தஸ்மா கத்திகபுண்ணமாயமேவ பச்சுத்³த⁴ரித்வா விகப்பேதப்³பா³, அவிகப்பிதாய ‘‘நிஸ்ஸக்³கி³யாபஜ்ஜனமேவா’’தி வத்தப்³ப³ம். ஏத்தாவதாபி ஸந்தோஸம் அகத்வா வினிச்ச²யோ பரியேஸிதப்³போ³. ஹோதி சேத்த² –

‘‘ஏவம் அபா⁴வம் வினயஸ்ஸ பாளி,

பி⁴ன்னம் அபி⁴ன்னஞ்ச தத³த்த²யுத்திம்;

விஞ்ஞாதுகாமேன தத³த்த²விஞ்ஞூ,

பரியேஸிதப்³பா³ வினயே விஞ்ஞாயா’’தி.

‘‘துய்ஹம் க³ண்ஹாஹீ’’தி வுத்தே வினாபி ‘‘மய்ஹம் க³ண்ஹாமீ’’தி வசனேன ஸுதி³ன்னம் ஹோதி. இதரோ சே அதி⁴வாஸேதி, தேனாபி ஸுக்³க³ஹிதம் ஹோதி, நோ சே அதி⁴வாஸேதி, தே³ந்தேன ஸுதி³ன்னம். தம் பன வத்து² ந கஸ்ஸசி ஹோதி. ததா² ‘‘மய்ஹம் க³ண்ஹாமீ’’தி வத³தி, ஸாமிகோ சே அதி⁴வாஸேதி, வினாபி ‘‘க³ண்ஹாஹீ’’தி வசனேன ஸுக்³க³ஹிதம். நோ சே அதி⁴வாஸேதி, ஸாமிகஸ்ஸேவ தம், ந ஹி தஸ்ஸேதம் வினயகம்மந்தி ஏத்த² வினயகம்மஸ்ஸத்தா²ய சே க³ண்ஹாதி, ந வட்டதி. ந கேவலம் அத்தனோ அத்தா²ய க³ஹிதம், புன தஸ்ஸபி தே³தி, வட்டதீதி ச. ததா² அனபேக்கோ² ஹுத்வா பரஸ்ஸ விஸ்ஸஜ்ஜேத்வா புன தேன தி³ன்னம் வா தஸ்ஸ விஸ்ஸாஸந்தோ வா பரிபு⁴ஞ்ஜதி, வட்டதி. தத்தா²பி வினயகம்மவஸேன ந வட்டதீதி ஏகே. தே ஏவ ‘‘மஹந்தம் வா கு²த்³த³கம் கரோதீ’’தி ஏத்த² ‘‘திசீவரே தீ³க⁴தோ வித³த்தி² அனதிக்கமித்வா சி²ந்தி³த்வா கரோதி, ஏவம் ஸேஸேஸுபீ’’தி வத³ந்தி. ஏவரூபேஸு டா²னேஸு போராணாசரியானம் கதா²மக்³க³ம் ஸுட்டு² ஆசரியகுலஸேவனாய ஸஞ்ஜானித்வா தேன ஸம்ஸந்தி³த்வா ஸதோ ஸம்பஜானோ ஹுத்வா ஸோதூனஞ்ச சித்தம் அவிமோஹேத்வா கதே²தப்³ப³ம். ஏஸா அம்ஹாகம் ஆயாசனா.

பட²மகதி²னஸிக்கா²பத³வண்ணனா நிட்டி²தா.