13. குலதூ³ஸகஸிக்கா²பத³வண்ணனா

431. ந கேவலம் விஹாரோ ஏவ கீடாகி³ரி, ஸோபி கா³மோ ‘‘கீடாகி³ரி’’ச்சேவ வுச்சதி. கா³மஞ்ஹி ஸந்தா⁴ய பரதோ ‘‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’’ந்தி வுத்தம். ஏகஸம்வச்ச²ரே த்³விக்க²த்தும் வஸ்ஸதி கிர, தம் ஸந்தா⁴ய ‘‘த்³வீஹி மேகே⁴ஹீ’’தி வுத்தம். ஸமதி⁴கந்தி ச² ஜனே ஸந்தா⁴ய. அகதவத்து²ந்தி நவம் அட்டு²ப்பத்திம். ‘‘ஜாபி⁴ஸுமனாதி³க³ச்ச²ம் அல்லானம் ஹரிதானம் ஏவா’’தி லிகி²தம். பூ⁴தகா³மபீ³ஜகா³மபே⁴த³தோ பனேஸ பே⁴தோ³. வதத்தா²யாதி வதிஅத்தா²ய. யம்கிஞ்சீதி ஸோத³கம் வா நிருத³கம் வா. ஆராமாதி³அத்தா²யாதி வனராஜிகாதி³அத்தா²ய. மாலாவச்ச²ரோபனம் குலதூ³ஸகம்யேவ ஸந்தா⁴ய, க³ந்த²னாதி³ஸப்³ப³ம் ந ஸந்தா⁴ய வுத்தந்தி. கத²ம் பஞ்ஞாயதீதி சே? தம் த³ஸ்ஸேதும் ‘‘பு³த்³தே⁴ன த⁴ம்மோ’’திஆதி³. ‘‘ஆவேளம் ஆபி³ள’’ந்திபி பாடோ².

கோ³ப்ப²னந்தி க³ந்த²னம். வேடி²மந்தி தக்³க³திகமேவ. வேதி⁴மம் அஞ்ஞேன கேனசி புப்ப²ம் வேதே⁴த்வா கதம். கண்டகம்பி ப³ந்தி⁴துந்தி ஏத்த² ‘‘ஸயம் விஜ்ஜ²னத்த²ம் ந வட்டதி. அஞ்ஞஸ்ஸத்தா²ய வட்டதீ’’தி வத³ந்தி. ஜாலமயம் விதானம் ஜாலவிதானம். புப்ப²படிச்ச²கம் க³வக்க²ம் விய ஸசி²த்³த³ம் கரோந்தி. தாலபண்ணகு³ளகந்தி தாலபண்ணமயம் புன கதம்பி படிசி²ஜ்ஜகமேவ. த⁴ம்மரஜ்ஜு சேதியம் வா போ³தி⁴ம் வா புப்ப²ப்பவேஸனத்த²ம் ஆவிஜ்ஜி²த்வா ப³த்³த⁴ரஜ்ஜு. ‘‘காஸாவேன ப³த்³த⁴ம்பி ஸுத்தவாகாதீ³ஹி ப³த்³த⁴ம் ப⁴ண்டி³தஸதி³ஸ’’ந்தி லிகி²தம். அம்ஸப⁴ண்டி³கம் பஸிப்³ப³கே பக்கி²த்தஸதி³ஸத்தா வேதி⁴மம் ந ஜாதம், தஸ்மா ‘‘ஸிதி²லப³த்³த⁴ஸ்ஸ அந்தரந்தரா பக்கி²பிதும் ந வட்டதீ’’தி வத³ந்தி. ‘‘அஞ்ஞமஞ்ஞம் அபு²ஸாபேத்வா அனேகக்க²த்தும்பி பரிக்கி²பிதும் வட்டதீ’’தி வத³ந்தி. பூரிதந்தி தீ³க⁴தோ பஸாரேத்வா பூரிதம். க⁴டிகதா³மஓலம்ப³கோதி ‘‘யமகதா³மஓலம்ப³கோ’’தி லிகி²தம். ‘‘கே³ண்டு³க²ரபத்ததா³மானம் படிக்கி²த்தத்தா சேலாதீ³ஹி கததா³மம்பி ந வட்டதி அகப்பியானுலோமத்தா’’தி வத³ந்தி.

‘‘ரேசகம் நாம ததா²லாஸியனாடனடானம் நச்ச’’ந்தி லிகி²தம். தம் ‘‘பரிவத்தந்தீ’’தி வுத்தம். ‘‘ஸாரியோ நாம ருதஸுனகா² ஸிங்கா³லகம்மகுருங்க³கேளிபனே டி²தா’’தி கிர பாடோ². ‘‘நிபு³ஜ்ஜ²ந்தீ’’தி பாளி.

432. அப³லப³லாதி³-பதா³னம் உப்படிபாடியா. யதா² பாமோக்கா²னம் வஸேன ஸப்³பே³பி ‘‘அஸ்ஸஜிபுனப்³ப³ஸுகா’’தி வுத்தா, ததா² பாமோக்க²ப்பத்தஸாவகஸ்ஸ வஸேன ததா³யத்தவுத்தினே ஸப்³பே³பி ‘‘ஸாரிபுத்தா’’தி. தேன வுத்தம் ‘‘க³ச்ச²த² தும்ஹே ஸாரிபுத்தா’’தி.

433. ‘‘கா³மே வா ந வஸிதப்³ப³’’ந்தி இமினாவ தஸ்மிம் கா³மே அஞ்ஞத்த² ந வஸிதப்³ப³ந்தி ஸித்³த⁴ம். ‘‘தஸ்மிம் விஹாரே வா’’தி கஸ்மா வுத்தந்தி சே? அத்த²ஸப்³பா⁴வதோ. யஸ்மிஞ்ஹி கா³மே குலதூ³ஸககம்மம் கதம், தஸ்மிம் கா³மே, யஸ்மிம் விஹாரே வஸந்தேன குலதூ³ஸனம் கதம், தம் விஹாரம் ட²பேத்வா அஞ்ஞஸ்மிம் வஸிதும் ந வட்டதீதி த³ஸ்ஸனத்த²ம். தம் கத²ந்தி சே? ‘‘கா³மே வா ந வஸிதப்³ப³’’ந்தி வசனேன யஸ்மிம் கா³மே குலதூ³ஸனகம்மம் கதம், தஸ்மிம் விஹாரேபி வஸிதும் ந லப்³ப⁴தீதி ஆபன்னம், தம் தி³ஸ்வா ‘‘தஸ்மிம் விஹாரே’’தி வுத்தம், தேன தஸ்மிம் கா³மே அஞ்ஞஸ்மிம் வஸிதும் லப்³ப⁴தீதி ஸித்³த⁴ம். ‘‘தஸ்மிம் விஹாரே வஸந்தேனா’’தி இமினா தஸ்மிம் கா³மே அஞ்ஞத்த² வஸந்தேன ஸாமந்தகா³மே பிண்டா³ய சரிதும் வட்டதீதி தீ³பிதம் ஹோதி. ஸாமந்தவிஹாரேபீதி ஸாமந்தவிஹாரோ நாம தஸ்மிம்யேவ கா³மே தஸ்ஸ விஹாரஸ்ஸ ஸாமந்தவிஹாரோ ச தஸ்ஸ கா³மஸ்ஸ ஸாமந்தவிஹாரோ சாதி உப⁴யம் வுச்சதி, ஏதேன தஸ்மிம் கா³மே அஞ்ஞத்த² வஸந்தேன தஸ்மிம் கா³மே பிண்டா³ய ந சரிதப்³ப³ம். ஸாமந்தகா³மேபி பிண்டா³ய சரிதும் வட்டதி, புன யஸ்மிம் கா³மே குலதூ³ஸனகம்மம் கதம், தஸ்ஸ ஸாமந்தகா³மே குலதூ³ஸகவிஹாரஸ்ஸ ஸாமந்தவத்து²விஹாரே வஸந்தேன தஸ்மிம் கா³மேபி சரிதும் வட்டதி. யஸ்மிம் ஸாமந்தகா³மே குலதூ³ஸகம் ந கதம், தஸ்மிம்பி சரிதும் வட்டதி, நேவ விஹாரேதி அதி⁴ப்பாயோ. ‘‘ந நக³ரே சரிது’’ந்தி வுத்தத்தா அஞ்ஞஸ்மிம் விஹாரே தஸ்மிம் கா³மே வஸிதும் வட்டதீதி தீ³பிதம் ஹோதீதி ஏகே. க³ண்டி²பதே³ஸு பன விசாரணா ஏவ நத்தி², தஸ்மா ஸுட்டு² விசாரேத்வா கதே²தப்³ப³ம்.

436-7. தா³பேதும் ந லப⁴ந்தி, புப்ப²தா³னஞ்ஹி ஸியா. தஸ்ஸேவ ந கப்பதீதி ஏத்த² யாகு³ஆதீ³னி ஆனேத்வா ‘‘த³த³ந்தூ’’தி இச்சா²வஸேன வத³தி சே, ஸப்³பே³ஸம் ந கப்பதி, கேவலம் பன ஸுத்³த⁴சித்தேன அத்தானம் வா பரேஸம் வா அனுத்³தி³ஸித்வா ‘‘இமே மனுஸ்ஸா தா³னம் த³த்வா புஞ்ஞம் பஸவந்தூ’’தி வத³ந்தஸ்ஸ தஸ்ஸேவ ந கப்பதி யாகு³ஆதீ³னம் பச்சயபடிஸம்யுத்தகதா²ய உப்பன்னத்தா. மஹாஅட்ட²கதா²யம்பி ‘‘பஞ்சன்னம்பி ஸஹத⁴ம்மிகான’’ந்தி விஸேஸேத்வா அவுத்தத்தா அத்த²தோ ஸயமேவாதி அபரே. ஆசரியா பன ‘‘யதா² மஹாபச்சரியம், குருந்தி³யஞ்ச ‘தஸ்ஸேவா’தி விஸேஸேத்வா வுத்தம், ஏவம் மஹாஅட்ட²கதா²யம் விஸேஸேத்வா ந வுத்தம், தஸ்மா ஸப்³பே³ஸம் ந கப்பதீ’’தி வத³ந்தி.

குலதூ³ஸகஸிக்கா²பத³வண்ணனா நிட்டி²தா.

தேரஸககண்ட³வண்ணனா நிட்டி²தா.