4. காமகு³ணஸுத்தவண்ணனா

117. சேதஸோதி கரணே ஸாமிவசனம். சித்தேன ஸம்பு²ஸனம் நாம அனுப⁴வோதி ஆஹ ‘‘சித்தேன அனுபூ⁴தபுப்³பா³’’தி. உதுத்தயானுரூபதாவஸேன பாஸாத³த்தயம், தம் வஸேன திவித⁴னாடகபே⁴தோ³. மனோரம்மதாமத்தேன காமகு³ணம் கத்வா த³ஸ்ஸிதம், ந காமவஸேன. ந ஹி அபி⁴னிக்க²மனதோ உத்³த⁴ம் போ³தி⁴ஸத்தஸ்ஸ காமவிதக்கா பூ⁴தபுப்³பா³. தேனாஹ மாரோ பாபிமா –

‘‘ஸத்த வஸ்ஸானி ப⁴க³வந்தம், அனுப³ந்தி⁴ம் பதா³பத³ம்;

ஓதாரம் நாதி⁴க³ச்சி²ஸ்ஸம், ஸம்பு³த்³த⁴ஸ்ஸ ஸதீமதோ’’தி. (ஸு. நி. 448);

மேத்தேய்யோ நாமாதிஆதி³ அனாக³தாரம்மணத³ஸ்ஸனமத்தம், ந போ³தி⁴ஸத்தஸ்ஸ ஏவம் உப்பஜ்ஜதீதி. அத்தா பியாயிதப்³ப³ரூபோ ஏதஸ்ஸாதி அத்தரூபோ, உத்தரபதே³ புரிமபத³லோபேனாதி ‘‘அத்தனோ ஹிதகாமஜாதிகேனா’’தி அத்தோ² வுத்தோ. அத்தரூபேனாதி வா பீதிஸோமனஸ்ஸேஹி க³ஹிதஸபா⁴வேன துட்ட²பஹட்டே²ன உத³க்³கு³த³க்³கே³ன. அப்பமாதோ³தி அப்பமஜ்ஜனம் குஸலத⁴ம்மேஸு அக²ண்ட³காரிதாதி ஆஹ ‘‘ஸாதச்சகிரியா’’தி. அவோஸ்ஸக்³கோ³தி சித்தஸ்ஸ காமகு³ணேஸு அவோஸ்ஸஜ்ஜனம் பக்க²ந்தி³தும் அப்பதா³னம். புரிமோ விகப்போ குஸலானம் த⁴ம்மானம் கரணவஸேன த³ஸ்ஸிதோ, பச்சி²மோ அகுஸலானம் அகரணவஸேன. த்³வே த⁴ம்மாதி அப்பமாதோ³ ஸதீதி த்³வே த⁴ம்மா. அப்பமாதோ³ ஸதி ச ததா² பவத்தா சத்தாரோ குஸலத⁴ம்மக்க²ந்தா⁴ வேதி³தப்³பா³. கத்தப்³பா³தி பவத்தேதப்³பா³.

தஸ்மிம் ஆயதனேதி தஸ்மிம் நிப்³பா³னஸஞ்ஞிதே காரணே படிவேதே⁴. தம் காரணந்தி ச²ன்னம் ஆயதனானம் காரணம். ஸளாயதனம் நிருஜ்ஜ²தி ஏத்தா²தி ஸளாயதனனிரோதோ⁴ வுச்சதி நிப்³பா³னம். தேனாஹ ‘‘நிப்³பா³னம். தம் ஸந்தா⁴யா’’திஆதி³. நிப்³பா³னஸ்மிந்தி நிப்³பா³னம்ஹி.

காமகு³ணஸுத்தவண்ணனா நிட்டி²தா.