3. லோகந்தக³மனஸுத்தவண்ணனா

116. லோகியந்தி ஏத்த² ஸத்தகாயபூ⁴தகா³மாதீ³தி லோகோ, சக்கவாளோ. ஸங்கா²ரோ பன லுஜ்ஜனபலுஜ்ஜனட்டே²ன லோகோ. அந்தந்தி ஓஸானம். ஸப்³ப³ஞ்ஞுதஞ்ஞாணேன ஸம்ஸந்தி³த்வாதி ஸப்³ப³ஞ்ஞுதஞ்ஞாணக³தியா ஸமானேத்வா அவிரோதே⁴த்வா. தோ²மேஸ்ஸாமீதி பஸம்ஸிஸ்ஸாமி.

ஏவம்ஸம்பத்திகந்தி ஏவம்ஸம்பஜ்ஜனகம் ஏவம்பஸ்ஸிதப்³ப³ம் இத³ம் மம அஜ்ஜே²ஸனம். தேனாஹ ‘‘ஈதி³ஸந்தி அத்தோ²’’தி. ஜானம் ஜானாதீதி ஸப்³ப³ஞ்ஞுதஞ்ஞாணேன ஜானிதப்³ப³ம் ஜானாதி ஏவ. ந ஹி பதே³ஸஞ்ஞாணே டி²தோ ஜானிதப்³ப³ம் ஸப்³ப³ம் ஜானாதி. உக்கட்ட²னித்³தே³ஸேன ஹி அவிஸேஸக்³க³ஹணேன ச ‘‘ஜான’’ந்தி இமினா நிரவஸேஸம் ஞேய்யஜாதம் பரிக்³க³ய்ஹதீதி தப்³பி³ஸயாய ஜானனகிரியாய ஸப்³ப³ஞ்ஞுதஞ்ஞாணமேவ கரணம் ப⁴விதும் யுத்தம். பகரணவஸேன ‘‘ப⁴க³வா’’தி பத³ஸன்னிதா⁴னேன ச அயமத்தோ² விபா⁴வேதப்³போ³. பஸ்ஸிதப்³ப³மேவ பஸ்ஸதீதி தி³ப்³ப³சக்கு²-பஞ்ஞாசக்கு²-த⁴ம்மசக்கு²-பு³த்³த⁴சக்கு²-ஸமந்தசக்கு²-ஸங்கா²தேஹி ஞாணசக்கூ²ஹி பஸ்ஸிதப்³ப³ம் பஸ்ஸதி ஏவ. அத² வா ஜானம் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவம் ப⁴க³வா. ப⁴க³வா பன பஹீனவிபல்லாஸத்தா ஜானந்தோ ஜானாதி ஏவ, தி³ட்டி²த³ஸ்ஸனஸ்ஸ அபா⁴வா பஸ்ஸந்தோ பஸ்ஸதி ஏவாதி அத்தோ².

த³ஸ்ஸனபரிணாயகட்டே²னாதி யதா² சக்கு² ஸத்தானம் த³ஸ்ஸனத்த²ம் பரிணேதி ஸாதே⁴தி, ஏவம் லோகஸ்ஸ யாதா²வத³ஸ்ஸனஸாத⁴னதோபி த³ஸ்ஸனகிச்சபரிணாயகட்டே²ன சக்கு²பூ⁴தோ, பஞ்ஞாசக்கு²மயத்தா வா ஸயம்பூ⁴ஞாணேன பஞ்ஞாசக்கு²ம் பூ⁴தோ பத்தோதி வா சக்கு²பூ⁴தோ. ஞாணபூ⁴தோதி ஏதஸ்ஸ ச ஏவமேவ அத்தோ² த³ட்ட²ப்³போ³. த⁴ம்மா வா போ³தி⁴பக்கி²யா, தேஹி உப்பன்னத்தா லோகஸ்ஸ ச தது³ப்பாத³னதோ அனஞ்ஞஸாதா⁴ரணம் வா த⁴ம்மம் பத்தோ அதி⁴க³தோதி த⁴ம்மபூ⁴தோ. ‘‘ப்³ரஹ்மா’’வுச்சதி ஸேட்ட²ட்டே²ன மக்³க³ஞாணம், தேன உப்பன்னத்தா லோகஸ்ஸ ச தது³ப்பாத³னதோ தஞ்ச ஸயம்பூ⁴ஞாணேன பத்தோதி ப்³ரஹ்மபூ⁴தோ. சதுஸச்சத⁴ம்மம் வத³தீதி வத்தா. சிரம் ஸச்சபடிவேத⁴ம் பவத்தேந்தோ வத³தீதி பவத்தா. அத்த²ம் நீஹரித்வாதி து³க்கா²தி³அத்த²ம் உத்³த⁴ரித்வா. பரமத்த²ம் வா நிப்³பா³னம் பாபயிதா. அமதஸச்சி²கிரியம் ஸத்தேஸு உப்பாதே³ந்தோ அமதம் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானம் ததா³யத்தபா⁴வதோ த⁴ம்மஸ்ஸாமீ. புனப்புனம் யாசாபேந்தோ பா⁴ரியம் கரோந்தோ க³ரும் கரோதி நாம, ததா² து³விஞ்ஞேய்யம் கத்வா கதே²ந்தோபி.

சக்கு²னா விஜ்ஜமானேன லோகஸஞ்ஞீ ஹோதி, ந தஸ்மிம் அஸதி. ந ஹி அஜ்ஜ²த்திகாயதனவிரஹேன லோகஸமஞ்ஞா அத்தி². தேனாஹ ‘‘சக்கு²ஞ்ஹி லோகோ’’திஆதி³. அப்பஹீனதி³ட்டீ²தி அஸமூஹதஸக்காயதி³ட்டி²கோ க⁴னவினிப்³போ⁴க³ம் காதும் அஸக்கோந்தோ ஸமுதா³யம் விய அவயவம் ‘‘லோகோ’’தி ஸஞ்ஜானாதி சேவ மஞ்ஞதி ச. ததா²தி இமினா ‘‘லோகோதி ஸஞ்ஜானாதி சேவ மஞ்ஞதி சா’’தி பத³த்தயம் ஆகட்³ட⁴தி. தஸ்ஸாதி புது²ஜ்ஜனஸ்ஸ, சக்கவாளலோகஸ்ஸ வா. சக்கா²தி³மேவ ஹி ஸஹோகாஸேன ‘‘சக்கவாளோ’’தி புது²ஜ்ஜனோ ஸஞ்ஜானாதி. க³மனேனாதி பத³ஸா க³மனேன. ந ஸக்கா தேஸம் அனந்தத்தா. லுஜ்ஜனட்டே²னாதி அபி⁴ஸங்கா²ரலோகவஸேன லோகஸ்ஸ அந்தம் த³ஸ்ஸேதும் வுத்தம். தஸ்ஸ அந்தோ நாம நிப்³பா³னம். தம் பத்தும் ஸக்கா ஸம்மாபடிபத்தியா பத்தப்³ப³த்தா. சக்கவாளலோகஸ்ஸ பன அந்தோ நாம, நத்தி² தஸ்ஸ க³மனேன அப்பத்தப்³ப³த்தா.

இமேஹி பதே³ஹீதி இமேஹி வாக்யவிபா⁴கே³ஹி பதே³ஹி. தானி பன அக்க²ரஸமுதா³யலக்க²ணானீதி ஆஹ ‘‘அக்க²ரஸம்பிண்ட³னேஹீ’’தி. பாடியேக்கஅக்க²ரேஹீதி தஸ்மிம் தஸ்மிம் பதே³ படினியதஸன்னிவேஸேஹி விஸும் விஸும் சித்தேன க³ய்ஹமானேஹி அக்க²ரேஹீதி அத்தோ².

க³மனட்டே²ன ‘‘பண்டா³’’ வுச்சதி பஞ்ஞா, தாய இதோ க³தோ பத்தோதி பண்டி³தோ, பஞ்ஞவா. மஹாபஞ்ஞதா நாம படிஸம்பி⁴தா³வஸேன வேதி³தப்³பா³தி ஆஹ ‘‘மஹந்தே அத்தே²’’திஆதி³. யதா² தந்தி ஏத்த² தந்தி நிபாதமத்தம் பட²மவிகப்பே, து³தியவிகப்பே பன பச்சாமஸனந்தி ஆஹ ‘‘தம் ப்³யாகத’’ந்தி.

லோகந்தக³மனஸுத்தவண்ணனா நிட்டி²தா.