8. து³தியக³த்³து³லப³த்³த⁴ஸுத்தவண்ணனா

100. தி³ட்டி²க³த்³து³லனிஸ்ஸிதாயாதி ஸஹஜாதாதி³பச்சயவஸேன தி³ட்டி²க³த்³து³லனிஸ்ஸிதாய நிஸ்ஸாயேவ பவத்ததி ததோ அத்தானம் விவேசேதும் அஸக்குணேய்யத்தா. சித்தஸம்கிலேஸேனேவாதி த³ஸவித⁴கிலேஸவத்து²வஸேன சித்தஸ்ஸ ஸம்கிலிட்ட²பா⁴வேன. அரியமக்³கா³தி⁴க³மனேன சித்தஸ்ஸ வோதா³னத்தா வோதா³யந்தி விஸுஜ்ஜ²ந்தி.

விசரணசித்தந்தி க³ஹேத்வா விசரணவஸேன விசரணசித்தம். ஸங்கா²னாமாதி ஏவம்னாமகா. ப்³ராஹ்மணபாஸண்டி³காதி ஜாதியா ப்³ராஹ்மணா, ச²ன்னவுதியா பாஸண்டே³ஸு தம் ஸங்கா²ஸஞ்ஞிதம் பாஸண்ட³ம் பக்³க³ய்ஹ விசரணகா. படகோட்ட²கந்தி து³ஸ்ஸாபணகம். த³ஸ்ஸேந்தாதி யதா²க³திகம்மவிபாகசித்ததம் த³ஸ்ஸேந்தா. தம் சித்தந்தி தம் படகோட்ட²கசித்தம் க³ஹேத்வா விசரந்தி. சிந்தேத்வா கதத்தாதி ‘‘இமஸ்ஸ ரூபஸ்ஸ ஏவம் ஹத்த²பாதா³, ஏவம் முக²ம் லிகி²தப்³ப³ம், ஏவம் ஆகாரவத்த²க்³க³ஹணானி, ஏவம் கிரியாவிஸேஸா, ஏவம் கிரியாவிபா⁴க³ம், ஸத்தவிஸேஸானம் விபா⁴க³ம் காதப்³ப³’’ந்தி தஸ்ஸ உப்³ப³த்தனகி²பனபவத்தனாதி³பயோஜனஞ்சாதி ஸப்³ப³மேதம் ததா² சிந்தேத்வா கதத்தா சித்தேன மனஸா சிந்திதம் நாம. உபாயபரியேஸனசித்தந்தி ‘‘ஹத்த²பாதா³ ஏவம் லிகி²தப்³பா³’’திஆதி³னா யதா²வுத்தஉபாயஸ்ஸ சேவ புப்³பே³ பவத்தஸ்ஸ பூ⁴மிபரிகம்மவண்ணதா⁴துஸம்மாயோஜனுபாயஸ்ஸ ச வஸேன பவத்தம் சித்தம். ததோபி சித்ததரந்தி ததோ சித்தகம்மதோபி சித்ததரம் சித்தகாரேன சிந்திதப்பகாரானம் ஸப்³பே³ஸம்யேவ சித்தகம்மே அனிப்ப²ஜ்ஜனதோ. கம்மசித்தேனாதி கம்மவிஞ்ஞாணேன. கம்மசித்தேனாதி வா கம்மஸ்ஸ சித்தபா⁴வேன. ஸோ கம்மஸ்ஸ விசித்தபா⁴வோ தண்ஹாவஸேன ஜாயதீதி வேதி³தப்³போ³. ஸ்வாயமத்தோ² அட்ட²ஸாலினீடீகாயம் விபா⁴விதோ. ஏவம் சித்தாதி ஏவம் சித்தரூபவிஸேஸா. யோனிம் உபனேதீதி தம் தம் அண்ட³ஜாதி³பே⁴த³ம் யோனிவிஸேஸம் பாபேதி வண்ணவிஸேஸோ விய ப²லிகமணிகம். ந ஹி விஸேஸா ஹிதவிசித்தஸாமத்தி²யகம்மம் யோனிம் உபனேதி, தஸ்ஸ தஸ்ஸ விபாகுப்பத்தியா பச்சயோ ஹோதி. யோனிமூலகோ தேஸம் சித்தபா⁴வோதி யம் யம் யோனிம் கம்மம் ஸத்தே உபனேதி, தம்தம்யோனிமூலகோ தேஸம் ஸத்தானம் சித்தவிசித்தபா⁴வோ. தேனாஹ ‘‘யோனிஉபக³தா’’திஆதி³. ஸதி³ஸசித்தாவ ஸதி³ஸசித்தபா⁴வா ஏவ. இதீதிஆதி³ வுத்தஸ்ஸேவ அத்த²ஸ்ஸ உப்படிபாடியா நிக³மனம்.

திரச்சா²னக³தசித்தபா⁴வதோ சித்தஸ்ஸேவ ஸவிஸேஸம் சித்தபா⁴வகரணம் த³ஸ்ஸேதும் ‘‘அபிசா’’திஆதி³ வுத்தம். தத்த² சித்தம் நாமேதம் சித்ததரமேவ வேதி³தப்³ப³ந்தி ஸம்ப³ந்தோ⁴. ஸஹஜாதத⁴ம்மசித்ததாயாதி ராகா³தி³ஸத்³தா⁴தி³த⁴ம்மவிசித்தபா⁴வேன. பூ⁴மிசித்ததாயாதி அதி⁴ட்டா²னசித்ததாய. கம்மனானத்தம் மூலம் காரணம் ஏதேஸந்தி கம்மனானத்தமூலகா, தேஸம். லிங்க³னானத்தம் இத்தி²லிங்கா³தி³னானத்தவஸேன சேவ தம்தம்ஸண்டா²னனானத்தவஸேன ச வேதி³தப்³ப³ம். ஸஞ்ஞானானத்தம் இத்தி²புரிஸதே³வமனுஸ்ஸாதி³ஸஞ்ஞானானத்தவஸேன. வோஹாரனானத்தம் திஸ்ஸோதிஆதி³வோஹாரனானத்தவஸேன. சித்தானம் விசித்தானம். தம்தம்வோஹாரனானத்தம்பி சித்தேனேவ பஞ்ஞபீயதி. ரங்க³ஜாதரூபஸமுட்டா²பனாதி³னா வத்த²ம் ரஞ்ஜயதீதி ரஜகோ, வண்ணகாரோ. புது²ஜ்ஜனஸ்ஸ அத்தபா⁴வஸஞ்ஞிதரூபஸமுட்டா²பனதா நியதா ஏகந்திகாதி புது²ஜ்ஜனக்³க³ஹணம். ‘‘அபி⁴ரூபம் ரூபம் ஸமுட்டா²பேதீ’’தி ஆனேத்வா ஸம்ப³ந்தோ⁴.

து³தியக³த்³து³லப³த்³த⁴ஸுத்தவண்ணனா நிட்டி²தா.