9. வாஸிஜடஸுத்தவண்ணனா

101. அத்த²ஸ்ஸாதி ஹிதஸ்ஸ. அஸாதி⁴கா ‘‘பா⁴வனானுயோக³ம் அனனுயுத்தஸ்ஸா’’தி அனனுயுத்தஸ்ஸ வுத்தத்தா. இதராதி ஸுக்கபக்க²உபமா. ஸாதி⁴கா பா⁴வனாயோக³ஸ்ஸ அனுயுத்தத்தா. தஞ்ஹி தஸ்ஸ ஸாதி⁴கா வேதி³தப்³பா³. ஸம்பா⁴வனத்தே²தி பரமத்த²ஸம்பா⁴வனே. ஏவஞ்ஹி கண்ஹபக்கே²பி அபிஸத்³த³க்³க³ஹணம் ஸமத்தி²தம் ஹோதி. ஸம்பா⁴வனத்தே²தி வா பரிகப்பனத்தே²தி அத்தோ². ஸங்கா²தப்³பே³ அத்தே² அனியமதோ வுச்சமானே ஸங்கா²தோ அனியமத்தோ² வாஸத்³தோ³ வத்தப்³போ³தி ‘‘அட்ட² வா’’திஆதி³ வுத்தம். ஊனாதி⁴கானீதி ஊனானிபி அதி⁴கானிபி கிஞ்சாபி ஹோந்தி, ஏகம்ஸோ பன க³ஹேதப்³போ³தி ‘‘அட்ட² வா த³ஸ வா த்³வாத³ஸ வா’’தி வுத்தம். ஏவம் வசனம் ஸந்தா⁴ய ‘‘வசனஸிலிட்ட²தாயா’’திஆதி³ வுத்தம். பாத³னக²ஸிகா²ஹி அகோபனவஸேன ஸம்மா அதி⁴ஸயிதானி. உதுந்தி உண்ஹஉதும் காயுஸ்மாவஸேன. தேனாஹ ‘‘உஸ்மீகதானீ’’தி. பா⁴விதானீதி குக்குடவாஸனாய வாஸிதானி. ஸம்மாஅதி⁴ஸயனாதி³திவித⁴கிரியாகரணேன இமம் அப்பமாத³ம் கத்வா. ஸோத்தி²னா அபி⁴னிப்³பி⁴ஜ்ஜிதுந்தி அனந்தராயேன ததோ நிக்க²மிதும். இதா³னி தமத்த²ம் விவரந்தோ ‘‘தே ஹீ’’திஆதி³மாஹ. ஸயம்பீதி அண்டா³னி. பரிணாமந்தி பரிபக்கம் ப³ஹினிக்க²மனயோக்³க³தம்.

தந்தி ஓபம்மஸம்படிபாத³னம். ஏவந்தி இதா³னி வுச்சமானாகாரேன. அத்தே²னாதி உபமேய்யத்தே²ன. ஸம்ஸந்தி³த்வா ஸம்மா யோஜேத்வா. ஸம்பயுத்தத⁴ம்மவஸேன ஞாணஸ்ஸ திக்கா²தி³பா⁴வோ வேதி³தப்³போ³. ஞாணஸ்ஸ ஹி ஸபா⁴வதோ ஸதினேபக்கதோ ச திக்க²பா⁴வோ, ஸமாதி⁴வஸேன ஸூரபா⁴வோ, ஸத்³தா⁴வஸேன விப்பஸன்னபா⁴வோ, வீரியவஸேன பரிணாமபா⁴வோ. பரிணாமகாலோதி ப³லவவிபஸ்ஸனாகாலோ. வட்³டி⁴தகாலோதி வுட்டா²னகா³மினிவிபஸ்ஸனாகாலோ. அனுலோமட்டா²னஸ்ஸ ஹி விபஸ்ஸனா க³ஹிதக³ப்³பா⁴ நாம ததா³ மக்³க³க³ப்³ப⁴ஸ்ஸ க³ஹிதத்தா. தஜ்ஜாதிகந்தி தஸ்ஸ விபஸ்ஸனானுயோக³ஸ்ஸ அனுரூபம். ஸத்தா²பி கா³தா²ய அவிஜ்ஜண்ட³கோஸம் பஹரதி பி⁴ந்தா³பேதி.

ஓலம்ப³கஸங்கா²தந்தி ஓலம்ப³கஸுத்தஸங்கா²தம். பலந்தி தஸ்ஸ ஸுத்தஸ்ஸ நாமம். தா⁴ரேத்வாதி தா³ரூனம் ஹேய்யாதி³ஜானனத்த²ம் உபனேத்வா. தா³ரூனம் க³ண்ட³ம் ஹரதீதி பலக³ண்டோ³தி ஏதேன பலேன க³ண்ட³ஹாரோ ‘‘பலக³ண்டோ³’’தி பச்சி²மபதே³ உத்தரபத³லோபேன நித்³தே³ஸோதி த³ஸ்ஸேதி. க³ஹணட்டா²னேதி ஹத்தே²ன க³ஹேதப்³ப³ட்டா²னே. ஸம்மதே³வ கே²பீயந்தி ஏதேன காயது³ச்சரிதாதீ³னீதி ஸங்கே²போ, தேன. விபஸ்ஸனம் அனுயுஞ்ஜந்தஸ்ஸ புக்³க³லஸ்ஸேவ தி³வஸே தி³வஸே ஆஸவானம் பரிக்க²யோ இத⁴ ‘‘விபஸ்ஸனாயானிஸம்ஸோ’’தி அதி⁴ப்பேதோ. ஹேமந்திகேன கரணபூ⁴தேன. பு⁴ம்மத்தே² வா ஏதம் கரணவசனம், ஹேமந்திகேதி அத்தோ². படிப்பஸ்ஸம்ப⁴ந்தீதி படிப்பஸ்ஸத்³த⁴ப²லானி ஹோந்தி. தேனாஹ ‘‘பூதிகானி ப⁴வந்தீ’’தி.

மஹாஸமுத்³தோ³ விய ஸாஸனம் ஸபா⁴வக³ம்பீ⁴ரபா⁴வதோ. நாவா விய யோகா³வசரோ மஹோகு⁴த்தரணதோ. பரியாதா³னம் வியாதி பரிதோ அபரிபூரணம் விய. க²ஜ்ஜமானானந்தி ஸங்கா²த³ந்தேன விய உத³கேன கே²பியமானானம் ப³ந்த⁴னானம். தனுபா⁴வோதி பரியுட்டா²னுப்பத்தியா அஸமத்த²தாய து³ப்³ப³லபா⁴வோ. விபஸ்ஸனாஞாணபீதிபாமோஜ்ஜேஹீதி விபஸ்ஸனாஞாணஸமுட்டி²தேஹி பீதிபாமோஜ்ஜேஹி. ஓக்கா²யமானே பக்கா²யமானேதி விவித⁴படிபத்தியா உக்கா²யமானே படிஸங்கா²னுபஸ்ஸனாய பக்கா²யமானே. து³ப்³ப³லதா தீ³பிதா ‘‘அப்பகஸிரேனேவ ஸம்யோஜனானி படிப்பஸ்ஸம்ப⁴ந்தி, பூதிகானி ப⁴வந்தீ’’தி வுத்தத்தா.

வாஸிஜடஸுத்தவண்ணனா நிட்டி²தா.