9. பா³லபண்டி³தஸுத்தவண்ணனா

246. ஏதேஹீதி து³சிந்திதாதீ³ஹி. ஏதேன லக்க²ணஸத்³த³ஸ்ஸ கரணத்த²தமாஹ. தானேவாதி லக்க²ணானி ஏவ. தஸ்ஸாதி பா³லஸ்ஸ. ‘‘அயம் பா³லோ’’தி நிமீயதி ஸஞ்சானீயதி ஏதேஹீதி பா³லனிமித்தானி. அபதா³னம் வுச்சதி விக்²யாதம் கம்மம். து³சிந்திதாதீ³னி ச பா³லே விக்²யாதானி, அவதா⁴ரணபா⁴வே வா, தஸ்மா பா³லஸ்ஸ அபதா³னானீதி பா³லாபதா³னானி. அபி⁴ஜ்ஜா²தீ³ஹி து³ட்ட²ம் தூ³ஸிதம் சிந்தேதீதி து³சிந்திதசிந்தீ. லோபா⁴தீ³ஹி து³ட்ட²ம் பா⁴ஸிதம் முஸாவாதா³தி³ம் பா⁴ஸதீதி து³ப்³பா⁴ஸிதபா⁴ஸீ. தேஸம் தேஸம்யேவ வஸேன கத்தப்³ப³தோ து³க்கடகம்மம் பாணாதிபாதாதி³ம் கரோதீதி து³க்கடகம்மகாரீ. தேனாஹ ‘‘சிந்தயந்தோ’’திஆதி³. தானி உபனிஸ்ஸாய ஜாதந்தி தஜ்ஜம். ததோ ஏவ தேஸம் ஸாருப்பம் அனுரூபந்தி தஸ்ஸாருப்பம். தேனாஹ ‘‘தஜ்ஜாதிக’’ந்திஆதி³. கச்ச²மானாயாதி கதி²யமானாய.

248. யஸ்மா ஸத்தானம் யதூ²பசிதானி கம்மானி கதோகாஸானி தது³பட்டா²பிதானி கம்மனிமித்தக³தினிமித்தானி மரணஸ்ஸ ஆஸன்னகாலே சித்தஸ்ஸ ஆபாத²ம் ஆக³ச்ச²ந்தானி, ததா³ ஓலம்ப³ந்தானி விய அபி⁴ப⁴வந்தானி விய அஜ்ஜோ²த்த²ரந்தானி விய உபட்ட²ஹந்தி, தஸ்மா வுத்தம் – ‘‘ஓலம்ப³னாதி³ஆகாரேன ஹி தானி உபட்ட²ஹந்தீ’’தி. உபட்டா²னாகாரோ ஏவ ததா³ சித்தஸ்ஸ கோ³சரபா⁴வம் க³ச்ச²தீதி ஆஹ – ‘‘தஸ்மிம் உபட்டா²னாகாரே ஆபாத²க³தே’’தி.

249. ந ஸக்காதி ந வத³தீதி ஏதேன த்³வேபி படிஸேதா⁴ பகதிஅத்தா²தி அயமத்தோ² வுத்தோ ஹோதி. ந ஸுகராதி பன இமினா து³க்கரபா⁴வோ தீ³பிதோ, து³க்கரஞ்ச தாவ உபாயேன ஸக்கா காதுந்தி த³ஸ்ஸேந்தோ ஆஹ – ‘‘ந ஸுகரம் பனா’’திஆதி³. தேனாதி வினிவிஜ்ஜி²த்வா க³மனேன அஞ்ஞமஞ்ஞம் ஸம்விஜ்ஜ²னேன. அஸ்ஸாதி சோரஸ்ஸ. இதோ உத்தரிபீதி மஜ்ஜ²ன்ஹிகஸமயம் ஸாயன்ஹஸமயஞ்ச ஸத்திஸதேன.

250. ஸங்க²ம்பி ந உபேதீதி இமினா ஸங்கா²தப்³ப³மத்தம் நத்தீ²தி தீ³பிதம் ஹோதீதி ஆஹ – ‘‘க³ணனாமத்தம்பி ந க³ச்ச²தீ’’தி. உபனிக்கே²பனமத்தம்பீதி ஏத்தா²பி ஏஸேவ நயோ. கலபா⁴க³ந்தி கலானம் ஸங்க³ணனகோட்டா²ஸம். தேனாஹ ‘‘ஸதிமம் கல’’ந்திஆதி³. ஓலோகிதமத்தம்பீதி உபனிக்கே²பனவஸேன ஓலோகனமத்தகம்பி. தம் கம்மகாரணந்தி தம் பஞ்சவித⁴ப³ந்த⁴னகம்மகாரணம் சதுன்னம்பி பஸ்ஸானம் வஸேன ஸம்பரிவத்தேத்வா கரோந்தியேவ, பாளியம் பன ஏகபஸ்ஸவஸேன ஆக³தா. கே³ஹஸ்ஸாதி மஹதோ கே³ஹஸ்ஸ. ஸப்³ப³தோதி ஸப்³பா³வயவதோ. ஸம்பஜ்ஜலிதே ஏகஜாலீபூ⁴தே. ஸுபக்குதி²தாயாதி ஸுட்டு² நிபக்காய.

விப⁴த்தோதி தத்த² நிப்³ப³த்தகஸத்தானம் ஸாதா⁴ரணகம்முனா விப⁴த்தோ விய நிப்³ப³த்தோ. அயோபாகாரேன பரிதோ அத்தோ க³ஹிதோதி அயோபாகாரபரியத்தோ பரிக்கி²த்தோ.

யமககோ³ளகாதி தா³ரகானம் கீளனயுக³ளா. ஏவம்பி து³க்கோ²தி யதா²வுத்தஉஸ்ஸத³னிரயவஸேனபி ஸோத-கா⁴ன-ஜிவ்ஹா-காய-மனோ-கோ³சரதாவஸேனபி இமினா ஆகாரேன து³க்கோ²தி.

251. த³ந்தேஹி உல்லேஹித்வாதி உத்தரத³ந்தேஹி அஞ்சி²த்வா. ரஸவஸேன அதித்தோ அஸ்ஸாதோ³ ரஸாதோ³. தேனாஹ ‘‘ரஸகே³தே⁴ன பரிபு⁴த்தரஸோ’’தி.

252. து³ரூபோதி விரூபோ. து³த்³த³ஸோதி தேனேவ விரூபபா⁴வேன அனிட்ட²த³ஸ்ஸனோ. லகுண்ட²கோதி ரஸ்ஸோ. பவிட்ட²கீ³வோதி க²ந்த⁴ந்தரம் அனுபவிட்ட²கீ³வோ. மஹோத³ரோதி விபுலகுச்சி². யேபு⁴ய்யேன ஹி லகுண்டகா ஸத்தா ரஸ்ஸகீ³வா புது²லகுச்சி²காவ ஹோந்தீதி ததா² வுத்தம். காணோ நாம சக்கு²விகலோதி வுத்தம் – ‘‘ஏகக்கி²காணோ வா உப⁴யக்கி²காணோ வா’’தி. குணீதி ஹத்த²விகலோ வுச்சதீதி ஆஹ – ‘‘ஏகஹத்த²குணீ வா உப⁴யஹத்த²குணீ வா’’தி. வாதாதி³னா உபஹதகாயபக்கோ² இத⁴ பக்க²ஹதோதி அதி⁴ப்பேதோ, ந பக்கி²ஹதோதி ஆஹ – ‘‘பக்க²ஹதோதி பீட²ஸப்பீ’’தி. து³க்கா²னுபப³ந்த⁴த³ஸ்ஸனத்த²ந்தி அபராபரஜாதீஸு விபாகது³க்க²ஸ்ஸ அனுபப³ந்த⁴வஸேன பவத்தித³ஸ்ஸனத்த²ம்.

கலீயதி க²லீயதி அப்பஹீயதி ஸாஸனம் ஏதேனாதி கலி, ஜுதபராஜயோ. ஸோ ஏவ க³ஹஸதி³ஸதாய ‘‘கலிக்³க³ஹோ’’தி வுத்தோ. அதி⁴ப³ந்த⁴ந்தி குடும்ப³ஸ்ஸ அதி⁴வுத்த²ஸ்ஸ மூலபூ⁴தஸ்ஸ அத்தனோ ப³ந்தி⁴தப்³ப³தம். தேனாஹ ‘‘அத்தனாபி ப³ந்த⁴ம் நிக³ச்சே²ய்யா’’தி. பா³லபூ⁴மியா பா³லபா⁴வஸ்ஸ மத்த²கப்பத்தி நிரயகா³மிகம்மகாரிதாதி ‘‘நிரயே நிப்³ப³த்ததி’’ச்சேவ வுத்தம். தக்³க³ஹணேனேவ பன ததோ முது³முது³தராதி³கம்மவஸேன ஸேஸாபாயேஸு அபராபரனிப்³ப³த்தாதி³பா³லபூ⁴மி விபா⁴விதா ஹோதீதி.

253. வுத்தானுஸாரேனாதி ‘‘பா³லோ அய’’ந்திஆதி³னா வுத்தஸ்ஸ அத்த²வசனஸ்ஸ ‘‘பண்டி³தோ அய’’ந்தி ஏதேஹி லக்கீ²யதீதிஆதி³னா அனுஸாரேன. மனோஸுசரிதாதீ³னம் வஸேனாதி சிந்தேந்தோ அனபி⁴ஜ்ஜா²-அப்³யாபாத³-ஸம்மாத³ஸ்ஸனம் ஸுசிந்திதமேவ சிந்தேதீதிஆதி³னா மனோஸுசரிதானம் திண்ணம் ஸுசரிதானம் வஸேன யோஜேதப்³பா³னி.

சக்கரதனவண்ணனா

256. உபோஸத²ம் (தீ³. நி. டீ. 2.243) வுச்சதி அட்ட²ங்க³ஸமன்னாக³தம் ஸப்³ப³தி³வஸேஸு க³ஹட்டே²ஹி ரக்கி²தப்³ப³ஸீலம், ஸமாதா³னவஸேன தம் ஏதஸ்ஸ அத்தீ²தி உபோஸதி²கோ, தஸ்ஸ. தேனாஹ ‘‘ஸமாதி³ன்னஉபோஸத²ங்க³ஸ்ஸா’’தி. ததா³தி தஸ்மிம் காலே, யஸ்மிம் பன காலே சக்கவத்திபா⁴வஸம்வத்தனிய-தா³ன-ஸீலாதி³-புஞ்ஞஸம்பா⁴ரஸமுதா³க³மஸம்பன்னோ பூரிதசக்கவத்திவத்தோ காதீ³பதே³ஸவிஸேஸபச்சாஜாதியா சேவ குலரூபபோ⁴கா³தி⁴பதேய்யாதி³கு³ணவிஸேஸஸம்பத்தியா ச தத³னுரூபே அத்தபா⁴வே டி²தோ ஹோதி, தஸ்மிம் காலே. தாதி³ஸே ஹி காலே சக்கவத்திபா⁴வீ புரிஸுத்தமோ யதா²வுத்தகு³ணஸமன்னாக³தோ ராஜா க²த்தியோ ஹுத்வா முத்³தா⁴வஸித்தோ விஸுத்³த⁴ஸீலோ அனுபோஸத²ம் ஸதஸஹஸ்ஸவிஸ்ஸஜ்ஜனாதி³னா ஸம்மாபடிபத்திம் படிபஜ்ஜதி, ந யதா³ சக்கரதனம் உப்பஜ்ஜதி, ததா³ ஏவ. தேனாஹ – ‘‘பாதோ…பே… த⁴ம்மதா’’தி. (தத்த² த³மோ இந்த்³ரியஸம்வரோ, ஸம்யமோ ஸீலஸம்வரோ.)

வுத்தப்பகாரபுஞ்ஞகம்மபச்சயந்தி சக்கவத்திபா⁴வாவஹதா³னத³மஸம்யமாதி³புஞ்ஞகம்மஹேதுகம். நீலமணிஸங்கா⁴டஸதி³ஸந்தி இந்த³னீலமணிஸஞ்சயஸமானம். தி³ப்³பா³னுபா⁴வயுத்தத்தாதி த³ஸ்ஸனீயதா மனுஞ்ஞகோ⁴ஸதா ஆகாஸகா³மிதா ஓபா⁴ஸவிஸ்ஸஜ்ஜனா அப்படிகா⁴ததா ரஞ்ஞோ இச்சி²தத்த²னிப்ப²த்திகாரணதாதி ஏவமாதீ³ஹி தி³ப்³ப³ஸதி³ஸேஹி ஆனுபா⁴வேஹி ஸமன்னாக³தத்தா. ஸப்³பே³ஹி ஆகாரேஹீதி ஸப்³பே³ஹி ஸுந்த³ரேஹி ஆகாரேஹி. பரிபூரந்தி பரிபுண்ணம். ஸா சஸ்ஸ பாரிபூரி இதா³னேவ வித்தா²ரீயதி.

பனாளீதி சி²த்³த³ம். ஸுத்³த⁴ஸினித்³த⁴த³ந்தபந்தியா நிப்³பி³வராயாதி அதி⁴ப்பாயோ. நாபி⁴பனாளி பரிக்கே²பபட்டேஸூதி நாபி⁴பரிக்கே²பபட்டே சேவ நாபி⁴யா பனாளிபரிக்கே²பபட்டே ச. ஸுவிப⁴த்தாவாதி அஞ்ஞமஞ்ஞம் அஸம்கிண்ணத்தா ஸுட்டு² விப⁴த்தா. பரிச்சே²த³லேக²ந்தரேஸு மணிகா ஸுவிப⁴த்தா ஹுத்வா பஞ்ஞாயந்தீதி வத³ந்தி.

பரிச்சே²த³லேகா²தீ³னீதி ஆதி³-ஸத்³தே³ன மாலாகம்மாதி³ம் ஸங்க³ண்ஹாதி. ஸுரத்தாதிஆதீ³ஸு ஸுரத்தக்³க³ஹணேன மஹானாமவண்ணதம் படிக்கி²பதி, ஸுத்³த⁴க்³க³ஹணேன ஸம்கிலிட்ட²தம், ஸினித்³த⁴க்³க³ஹணேன லூக²தம். காமம் தஸ்ஸ சக்கரதனஸ்ஸ நேமிமண்ட³லம் அஸந்தி⁴கம்வ நிப்³ப³த்தம், ஸப்³ப³த்த²கமேவ பன கேவலம் பவாளவண்ணோவ ந ஸோப⁴தீதி பகதிசக்கஸ்ஸ ஸந்தி⁴யுத்தேஸு டா²னேஸு ரத்தஜம்பு³னத³பரிக்க²தம் அஹோஸி, தம் ஸந்தா⁴ய வுத்தம் ‘‘ஸந்தீ⁴ஸு பனஸ்ஸா’’திஆதி³.

நேமிமண்ட³லபிட்டி²யந்தி நேமிமண்ட³லஸ்ஸ பிட்டி²பதே³ஸே. த³ஸன்னம் த³ஸன்னம் அரானமந்தரேதி த³ஸன்னம் த³ஸன்னம் அரானம் அந்தரஸமீபே பதே³ஸே. சி²த்³த³மண்ட³லசித்தோதி மண்ட³லஸண்டா²னசி²த்³த³விசித்தோ. ஸுகுஸலஸமன்னாஹதஸ்ஸாதி ஸுட்டு² குஸலேன ஸிப்பினா பஹதஸ்ஸ, வாதி³தஸ்ஸாதி அத்தோ². வக்³கூ³தி மனோரமோ ரஜனீயோதி ஸுணந்தானம் ராகு³ப்பாத³கோ. கமனீயோதி கந்தோ. ஸமோஸரிதகுஸுமதா³மாதி ஓலம்பி³தஸுக³ந்த⁴குஸுமதா³மா. நேமிபரிக்கே²பஸ்ஸாதி நேமிபரியந்தபரிக்கே²பஸ்ஸ. நாபி⁴பனாளியா த்³வின்னம் பஸ்ஸானம் வஸேன ‘‘த்³வின்னம்பி நாபி⁴பனாளீன’’ந்தி வுத்தம். ஏகா ஏவ ஹி ஸா பனாளி. யேஹீதி யேஹி த்³வீஹி ஸீஹமுகே²ஹி. புன யேஹீதி முத்தாகலாபேஹி.

ஓதா⁴பயமானந்தி ஸோதும் அவஹிதானி குருமானம். சந்தோ³ புரதோ, சக்கரதனம் பச்சா²தி ஏவம் புப்³பா³பரியேன புப்³பா³பரபா⁴கே³ன.

அந்தே புரஸ்ஸாதி அனுராத⁴புரே ரஞ்ஞோ அந்தேபுரஸ்ஸ உத்தரஸீஹபஞ்ஜரஆஸன்னே ததா³ ரஞ்ஞோ பாஸாதே³ தாதி³ஸஸ்ஸ உத்தரதி³ஸாய ஸீஹபஞ்ஜரஸ்ஸ லப்³ப⁴மானத்தா வுத்தம். ஸுகே²ன ஸக்காதி கிஞ்சி அனாருஹித்வா ஸரீரஞ்ச அனுல்லங்கி⁴த்வா யதா²டி²தேனேவ ஹத்தே²ன புப்ப²முட்டி²யோ கி²பித்வா ஸுகே²ன ஸக்கா ஹோதி பூஜேதும்.

நானாவிராக³ரதனப்பபா⁴ஸமுஜ்ஜலந்தி நானாவித⁴சித்தவண்ணரதனோபா⁴ஸபப⁴ஸ்ஸரம். ஆகாஸம் அப்³பு⁴க்³க³ந்த்வா பவத்தேதி. ஆக³ந்த்வா டி²தட்டா²னதோ உபரி ஆகாஸம் அப்³பு⁴க்³க³ந்த்வா பவத்தே.

ஸன்னிவேஸக்க²மோதி க²ந்த⁴வாரஸன்னிவேஸயோக்³யோ. ஸுலபா⁴ஹாரூபகரணோதி ஸுகே²னேவ லத்³த⁴ப்³ப³த⁴ஞ்ஞகோ³ரஸதா³ருதிணாதி³போ⁴ஜனஸாத⁴னோ. பரசக்கந்தி பரஸ்ஸ ரஞ்ஞோ ஸேனா, ஆணா வா.

ஆக³தனந்த³னோதி ஆக³தோ ஹுத்வா நந்தி³ஜனனோ. ஆக³தம் வா ஆக³மனம், தேன நந்த³தீதி ஆக³தனந்த³னோ. க³மனேன ஸோசேதீதி க³மனஸோசனோ. உபகப்பேதா²தி உபரூபரி கப்பேத² ஸம்வித³ஹத², உபனேதா²தி அத்தோ². உபபரிக்கி²த்வாதி ஹேதுதோபி ஸபா⁴வதோபி ப²லதோபி தி³ட்ட²த⁴ம்மிகஸம்பராயிகஆதீ³னவதோபி வீமம்ஸித்வா.

விபா⁴வேந்தி பஞ்ஞாய அத்த²ம் விபூ⁴தம் கரோந்தீதி விபா⁴வினோ, பஞ்ஞவந்தோ. அனுயந்தாதி அனுவத்தகா. ஓக³ச்ச²மானந்தி ஓஸீத³ந்தம். யோஜனமத்தந்தி வித்தா²ரதோ யோஜனமத்தம் பதே³ஸம். க³ம்பீ⁴ரபா⁴வேன பன யதா² பூ⁴மி தி³ஸ்ஸதி, ஏவம் ஓக³ச்ச²தி. தேனாஹ ‘‘மஹாஸமுத்³த³தல’’ந்திஆதி³. அந்தே சக்கரதனம் உத³கேன ஸேனாய அனஜ்ஜோ²த்த²ரணத்த²ம்.

257. புரத்தி²மோ ஸமுத்³தோ³ பரியந்தோ அஸ்ஸாதி புரத்தி²மஸமுத்³த³பரியந்தோ, புரத்தி²மஸமுத்³த³ம் பரியந்தம் கத்வா. சாதுரந்தாயாதி சாதுஸமுத்³த³ந்தாய புப்³ப³விதே³ஹாதி³சதுகோட்டா²ஸந்தாய.

ஹத்தி²ரதனவண்ணனா

258. ஹரிசந்த³னாதீ³ஹீதி ஆதி³-ஸத்³தே³ன சதுஜ்ஜாதியக³ந்தா⁴தி³ம் ஸங்க³ண்ஹாதி. ஆக³மனம் சிந்தேதா²தி வத³ந்தி சக்கவத்திவத்தஸ்ஸ பூரிததாய பரிசிதத்தா. பூ⁴மிபு²ஸனகேஹி வாலதி⁴, வரங்க³ம் ஹத்தோ²தி இமேஹி ச தீஹி, சதூஹி பாதே³ஹி சாதி ஸத்தஹி அவயவேஹி டி²தத்தா ஸத்தபதிட்டோ². இதரேஸம் அமச்சாதீ³னம் சிந்தயந்தானம் ந ஆக³ச்ச²தி. அபனேத்வாதி அத்தனோ ஆனுபா⁴வேன அபனேத்வா. க³ந்த⁴மேவ ஹி தஸ்ஸ இதரே ஹத்தி²னோ ந ஸஹந்தி.

அஸ்ஸரதனவண்ணனா

ஸிந்த⁴வகுலதோதி ஸிந்த⁴வஸ்ஸாஜானீயகுலதோ.

மணிரதனவண்ணனா

ஸகடனாபி⁴ஸமப்பமாணந்தி பரிணாஹதோ மஹாஸகடஸ்ஸ நாபி⁴யா ஸமப்பமாணம். உபோ⁴ஸு அந்தேஸூதி ஹேட்டா² உபரி சாதி த்³வீஸு அந்தேஸு. கண்ணிகபரியந்ததோதி த்³வின்னம் கஞ்சனபது³மானம் கண்ணிகாய பரியந்ததோ. முத்தாஜாலகே ட²பேத்வாதி ஸுவிஸுத்³தே⁴ முத்தாமயே ஜாலகே பதிட்ட²பேத்வா.

இத்தி²ரதனவண்ணனா

‘‘இத்தி²ரதனம் பாதுப⁴வதீ’’தி வத்வா அஸ்ஸ பாதுப⁴வனாகாரம் த³ஸ்ஸேதும், ‘‘மத்³த³ராஜகுலதோ வா’’திஆதி³ வுத்தம். மத்³த³ரட்ட²ம் கிர அபி⁴ரூபானம் இத்தீ²னம் உப்பத்திட்டா²னம். ஸண்டா²னபாரிபூரியாதி ஹத்த²பாதா³தி³ஸரீராவயவானம் ஸுஸண்டி²ததாய. அவயவபாரிபூரியா ஹி ஸமுதா³யபாரிபூரிஸித்³தி⁴. ரூபந்தி ஸரீரம். த³ஸ்ஸனீயாதி ஸுரூபபா⁴வேன பஸ்ஸிதப்³ப³யுத்தா. ஸோமனஸ்ஸவஸேன சித்தம் பஸாதே³தி யோனிஸோ சிந்தேந்தானம் கம்மப²லஸத்³தா⁴ய வஸேன. பஸாதா³வஹத்தாதி காரணவசனேன யதா² பாஸாதி³கதாய வண்ணபோக்க²ரதாஸித்³தி⁴ வுத்தா, ஏவம் த³ஸ்ஸனீயதாய பாஸாதி³கதாஸித்³தி⁴, அபி⁴ரூபதாய ச த³ஸ்ஸனீயதாஸித்³தி⁴ வத்தப்³பா³தி நயம் த³ஸ்ஸேதி. படிலோமதோ வா வண்ணபோக்க²ரதாய பாஸாதி³கதாஸித்³தி⁴, பாஸாதி³கதாய த³ஸ்ஸனீயதாஸித்³தி⁴, த³ஸ்ஸனீயதாய அபி⁴ரூபதாஸித்³தி⁴ யோஜேதப்³பா³. ஏவம் ஸரீரஸம்பத்திவஸேன அபி⁴ரூபதாதி³கே த³ஸ்ஸேத்வா இதா³னி ஸரீரே தோ³ஸாபா⁴வவஸேனபி தே த³ஸ்ஸேதும், ‘‘அபி⁴ரூபா வா’’திஆதி³ வுத்தம். தத்த² யதா² பமாணயுத்தா, ஏவம் ஆரோஹபரிணாஹயோக³தோ ச பாஸாதி³கா நாதிதீ³க⁴தாத³யோ. ஏவம் மனுஸ்ஸானம் தி³ப்³ப³ரூபதாஸம்பத்திபீதி ‘‘அப்பத்தா தி³ப்³ப³வண்ண’’ந்தி வுத்தம். காயவிபத்தியாதி ஸரீரதோ³ஸஸ்ஸ. அபா⁴வோதி அச்சந்தமேவ தூ³ரீபா⁴வோ.

ஸதவிஹதஸ்ஸாதி ஸதக்க²த்தும் விஹதஸ்ஸ. ஸதவிஹதஸ்ஸாதி ச இத³ம் கப்பாஸபிசுவஸேன வுத்தம், தூலபிசுனோ பன விஹனனமேவ நத்தி². குங்குமதக³ரதுருக்க²யவனபுப்பா²னி சதுஜ்ஜாதி. தமாலதக³ரதுருக்க²யவனபுப்பா²னீதி அபரே.

அக்³கி³த³ட்³டா⁴ வியாதி ஆஸனக³தேன அக்³கி³னா த³ட்³டா⁴ விய. பட²மமேவாதி அஞ்ஞகிச்சதோ பட²மமேவ, த³ஸ்ஸனஸமகாலமேவாதி அத்தோ². தம் தம் அத்தனா ரஞ்ஞோ காதப்³ப³கிச்சம் கிம் கரோமீதி புச்சி²தப்³ப³தாய கிம் கரணந்தி படிஸ்ஸாவேதீதி கிங்காரபடிஸ்ஸாவினீ.

மாதுகா³மோ நாம யேபு⁴ய்யேன ஸட²ஜாதிகோ, இத்தி²ரதனஸ்ஸ பன தம் நத்தீ²தி த³ஸ்ஸேதும், ‘‘ஸ்வாஸ்ஸா’’திஆதி³ வுத்தம். கு³ணாதி ரூபகு³ணா சேவ ஆசாரகு³ணா ச. புரிமகம்மானுபா⁴வேனாதி தஸ்ஸா புரிமகம்மானுபா⁴வேன. இத்தி²ரதனஸ்ஸ தப்³பா⁴வஸம்வத்தனியபுரிமகம்மஸ்ஸ ஆனுபா⁴வேன, சக்கவத்தினோபி பரிவாரஸம்வத்தனியம் புஞ்ஞகம்மம் தாதி³ஸஸ்ஸ ப²லவிஸேஸஸ்ஸ உபனிஸ்ஸயோ ஹோதியேவ. தேனாஹ ‘‘சக்கவத்தினோ புஞ்ஞம் உபனிஸ்ஸாயா’’தி. ஏதேன ஸேஸரதனேஸுபி தேஸம் விஸேஸானம் தது³பனிஸ்ஸயதா விபா⁴விதா ஏவாதி த³ட்ட²ப்³ப³ம். புப்³பே³ ஏகதே³ஸவஸேன லப்³ப⁴மானபாரிபூரீ ரஞ்ஞோ சக்கவத்திபா⁴வூபக³மனதோ பட்டா²ய ஸப்³பா³காரபாரிபூரா ஜாதா.

க³ஹபதிரதனவண்ணனா

பகதியாவாதி ஸபா⁴வேனேவ, சக்கரதனபாதுபா⁴வதோ புப்³பே³பி.

பரிணாயகரதனவண்ணனா

நிஸ்ஸாயாதி உபனிஸ்ஸாய.

260. கடக்³க³ஹோ வுச்சதி ஜயக்³க³ஹோ ஸகானம் பணானம் கடபா⁴வேன அத்த²ஸித்³தி⁴வஸேன ஸங்க³ண்ஹனந்தி கத்வா. தேனாஹ ‘‘ஜயக்³கா³ஹேனா’’தி. ஏகப்பஹாரேனேவாதி ஏகப்பயோகே³னேவ ஸதஸஹஸ்ஸானி அதி⁴க³ச்சே²ய்யாதி யோஜனா. ஸேஸம் வுத்தனயத்தா ஸுவிஞ்ஞேய்யமேவ.

பா³லபண்டி³தஸுத்தவண்ணனாய லீனத்த²ப்பகாஸனா ஸமத்தா.