6. இஸிகி³லிஸுத்தவண்ணனா

133. ஸமஞ்ஞாயதி ஏதாயாதி ஸமஞ்ஞா, நாமந்தி அத்தோ². அயமயம் நாமாதி பஞ்ஞாபேந்தி ஏதாய, ததா²பஞ்ஞாபனமத்தந்தி வா பஞ்ஞத்தி, நாமமேவ. தேனாஹ ‘‘புரிமபத³ஸ்ஸேவ வேவசன’’ந்தி. ஸேஸேஸுபீதி ‘‘பண்ட³வஸ்ஸ பப்³ப³தஸ்ஸா’’திஆதீ³ஸு தீஸு வாரேஸுபி.

ஸமுட்டா²னம் தாவ ஸுத்தஸ்ஸ கதே²த்வா அத்த²ஸம்வண்ணனம் காதும் ‘‘ததா³ கிரா’’திஆதி³ வுத்தம். ந பப்³ப³தேஹி அத்தோ²தி ந ப⁴க³வதோ பப்³ப³தேஹி கதி²தேஹி அத்தோ² அத்தி². இஸிகி³லிபா⁴வோதி இஸிகி³லினாமதா. இதீதி இமினா காரணேன, இமம் அட்டு²ப்பத்திம் அவேக்க²ந்தோதி அத்தோ².

சேதியக³ப்³பே⁴தி சேதியக⁴ரே சேதியஸ்ஸ அப்³ப⁴ந்தரே. யமகமஹாத்³வாரந்தி யமககவாடயுத்தம் மஹந்தம் த்³வாரம். த்³வேதா⁴ கத்வாதி பப்³ப³தஸ்ஸ அப்³ப⁴ந்தரே மண்ட³பஸங்கே²பேன லேணம் நிம்மினித்வா த்³வேதா⁴ கத்வா ததா³ தே தத்த² வஸிம்ஸு.

வஸிதகாலஞ்ச கதே²ந்தோ தேஸம் மாதுயா யாவ ததியப⁴வதோ பட்டா²ய ஸமுதா³க³மம் த³ஸ்ஸேதும், ‘‘அதீதே கிரா’’திஆதி³ வுத்தம். பத்தே²ஸீதி தஸ்ஸா கிர கே²த்தகுடியா வீஹயோ ப⁴ஜ்ஜந்தியா தத்த² மஹாகரஞ்ஜபுப்ப²ப்பமாணா மஹந்தா மனோஹரா பஞ்சஸதமத்தா லாஜா ஜாயிம்ஸு. ஸா தா க³ஹேத்வா மஹந்தே பது³மினிபத்தே ட²பேஸி. தஸ்மிஞ்ச ஸமயே ஏகோ பச்சேகபு³த்³தோ⁴ தஸ்ஸா அனுக்³க³ஹத்த²ம் அவிதூ³ரே கே²த்தபாளியா க³ச்ச²தி. ஸா தம் தி³ஸ்வா பஸன்னமானஸா ஸுபுப்பி²தம் மஹந்தம் ஏகம் பது³மம் க³ஹேத்வா தத்த² லாஜே பக்கி²பித்வா பச்சேகபு³த்³த⁴ம் உபஸங்கமித்வா பஞ்சபதிட்டி²தேன வந்தி³த்வா, ‘‘இமஸ்ஸ, ப⁴ந்தே, புஞ்ஞஸ்ஸ ஆனுபா⁴வேன ஆனுபா⁴வஸம்பன்னே பஞ்சஸதபுத்தே லபே⁴ய்ய’’ந்தி பஞ்ச புத்தஸதானி பத்தே²ஸி. தஸ்மிம்யேவ க²ணேதி யதா³ ஸா யதா²வுத்தம் பத்த²னம் பட்ட²பேஸி; தஸ்மிம்யேவ க²ணே பஞ்சஸதா மிக³லுத்³த³கா ஸம்ப⁴தஸம்பா⁴ரா பரிபக்கபச்சேகபோ³தி⁴ஞாணா தஸ்ஸேவ பச்சேகபு³த்³த⁴ஸ்ஸ மது⁴ரமம்ஸம் த³த்வா, ‘‘ஏதிஸ்ஸா புத்தா ப⁴வேய்யாமா’’தி பத்த²யிம்ஸு. அதீதாஸு அனேகஜாதீஸு தஸ்ஸா புத்தபா⁴வேன ஆக³தத்தா ததா² தேஸம் அஹோஸீதி வத³ந்தி. பாது³த்³தா⁴ரேதி பாது³த்³தா⁴ரே பாது³த்³தா⁴ரே. பாது³த்³தா⁴ரஸீஸேன சேத்த² நிக்கி²பனம் ஆஹ.

க³ப்³ப⁴மலம் நிஸ்ஸாயாதி ப³ஹி நிக்க²ந்தம் க³ப்³ப⁴மலம் நிஸ்ஸயம் கத்வா ஸம்ஸேத³ஜபா⁴வேன நிப்³ப³த்தா. ஓபபாதிகபா⁴வேனாதி கேசி. க²யவயம் பட்ட²பேத்வாதி விபஸ்ஸனம் ஆரபி⁴த்வா. விபஸ்ஸனாதி அனிச்சானுபஸ்ஸனாபுப்³பி³கா ஸப்பச்சயனாமரூபத³ஸ்ஸனபுப்³பி³கா ச, ஸங்கா²ரே ஸம்மஸந்தஸ்ஸ அனிச்சலக்க²ணே தி³ட்டே², ‘‘யத³னிச்சம் தம் து³க்க²ம், யம் து³க்க²ம் தத³னத்தா’’தி ஸேஸலக்க²ணானி ஸுவிஞ்ஞேய்யானேவ ஹோந்தி. பச்சேகபோ³தி⁴ஞாணம் நிப்³ப³த்தயிம்ஸூதி த்³வே அஸங்க்²யேய்யானி கப்பானம் ஸதஸஹஸ்ஸஞ்ச பச்சேகபோ³தி⁴பாரமிதாய பரினிப்ப²ன்னத்தா ஞாணஸ்ஸ பரிபாகத்தா வுத்தனயேன ஸயமேவ விபஸ்ஸனம் பவத்தேத்வா மத்த²கம் பாபேத்வா பச்சேகபோ³தி⁴ஞாணம் அதி⁴க³ச்சி²ம்ஸு. ஸப்³பே³பி தே தம்யேவ கா³த²ம் அபா⁴ஸிம்ஸூதி ஆஹ – ‘‘அயம் தேஸம் ப்³யாகரணகா³தா² அஹோஸீ’’தி.

ஸரோருஹந்தி ஸரஸி ஜாதம். பது³மபலாஸபத்தஜந்தி கு²த்³த³கமஹந்தேஹி கமலத³லேஹி ஸஹஜாதம். கு²த்³த³கமஹந்தகமலத³லஸங்கா²தானி வா பது³மபலாஸபத்தானி ஏத்த² ஸந்தீதி பது³மபலாஸபத்தம், பது³மக³ச்ச²ம். தத்த² ஜாதந்தி பது³மபலாஸபத்தஜம். ஸுபுப்பி²தந்தி ஸுட்டு² புப்பி²தம் ஸம்மா விகஸிதம். ப⁴மரக³ணானுசிண்ணந்தி ப⁴மரக³ணேஹி அனுகுலஞ்சேவ அனுபரிப்³ப⁴மிதஞ்ச. அனிச்சதாயுபக³தந்தி க²ணே க²ணே வண்ணபே⁴தா³தி³வஸேன அனிச்சதாய உபக³தம். விதி³த்வாதி விபஸ்ஸனாபஞ்ஞாஸஹிதாய மக்³க³பஞ்ஞாய ஜானித்வா. ஏகோ சரேதி தஸ்மா அஞ்ஞோபி மாதி³ஸோ ஹோதுகாமோ ஏவம் படிபஜ்ஜித்வா ஏகோ சரே க²க்³க³விஸாணகப்போதி.

135. ஸதிஸாரஸீலஸாராதி³ஸமன்னாக³மனேன ஸத்தேஸு ஸாரபூ⁴தா. ஸப்³ப³ஸோ வட்டது³க்க²ஸ்ஸ விக³தத்தா நித்³து³க்கா². ஸமுச்சி²ன்னதண்ஹதாய நித்தண்ஹா. மானச்சி²தோ³தி து²திவசனம்.

ஏதேஸம் ஏகனாமகாயேவாதி ஏதேஸம் ஆக³தானம் பச்சேகபு³த்³தா⁴னம் பாளியம் அனாக³தா அஞ்ஞே பச்சேகபு³த்³தா⁴ ஸமானனாமகா ஏவ. வுத்தமேவத்த²ம் பாகடீகரணத்த²ம் ‘‘இமேஸு ஹீ’’திஆதி³ வுத்தம். விஸும் விஸும் அவத்வாதி பச்சேகம் ஸரூபதோ அவத்வா. அஞ்ஞே சாதி அஸாதா⁴ரணத்தா ஆஹ. ஸேஸம் ஸுவிஞ்ஞேய்யமேவ.

இஸிகி³லிஸுத்தவண்ணனாய லீனத்த²ப்பகாஸனா ஸமத்தா.