4. ஸேவிதப்³பா³ஸேவிதப்³ப³ஸுத்தவண்ணனா

109. அஞ்ஞமஞ்ஞந்தி அஞ்ஞம் அஞ்ஞம். தேனாஹ ‘‘அஞ்ஞம் ஸேவிதப்³ப³’’ந்திஆதி³. ஸத்தஹி பதே³ஹீதி ஸத்தஹி வாக்யேஹி. பஜ்ஜதி ஏதேன யதா²தி⁴ப்பேதோ அத்தோ²தி பத³ம், வாக்யம். ஸாரிபுத்தத்தே²ரஸ்ஸ ஓகாஸகரணம் த⁴ம்மதா³யாதே³ (ம. நி. 1.31) வுத்தனயேன வேதி³தப்³ப³ம்.

113. தி³ட்டி²யேவ பச்சயவஸேன படிலத்³த⁴தாய தி³ட்டி²படிலாபோ⁴. ஸஞ்ஞாபடிலாபே⁴பி ஏஸேவ நயோ. மிச்சா²தி³ட்டி²ஸம்மாதி³ட்டி²யோ…பே… ந க³ஹிதா கம்மபத²ப்பத்தானம் தேஸம் மனோஸமாசாரபா⁴வேன க³ஹிதத்தா. யதி³ ஏவம் கஸ்மா தி³ட்டி² சித்துப்பாத³வாரே ந க³ஹிதாதி? காமம் மிச்சா²தி³ட்டி²யா அவயவிபா⁴வோ லப்³ப⁴தி, ததா²பி சித்துப்பாத³க்க²ணே லோகியலோகுத்தரசித்துப்பாதே³ஸு கம்மபத²கோட்டா²ஸோ ந உத்³த⁴டோ.

115. காமஸஞ்ஞாதீ³னந்தி ஏத்த² ஆதி³-ஸத்³தே³ன யதா² ப்³யாபாத³விஹிம்ஸாஸஞ்ஞா ஸங்க³ஹிதா, ஏவம் அனபி⁴ஜ்ஜா²அப்³யாபாத³அவிஹிம்ஸாஸஞ்ஞா ஸங்க³ஹிதா பட²மேன ஆதி³ஸத்³தே³ன ‘‘அனபி⁴ஜ்ஜா²ஸஹக³தாய ஸஞ்ஞாயா’’திஆதி³பாட²ஸ்ஸ ஸங்க³ஹிதத்தா.

117. தி காமப⁴வாதீ³னம் அபரியோஸானாய பரியோஸானம் இச்ச²தோபி தாதி³ஸஸ்ஸ ப⁴வானம் அபரியோஸானமேவ ஹோதி. சத்தாரோ ஹோந்தி புக்³க³லவஸேன. தேனாஹ ‘‘புது²ஜ்ஜனோபி ஹீ’’திஆதி³. அகுஸலா த⁴ம்மா வட்³ட⁴ந்தீதி தேஸம் பஹானாய அப்படிபஜ்ஜமானஸ்ஸாதி அதி⁴ப்பாயோ, ததோ ஏவ குஸலா த⁴ம்மா பரிஹாயந்தி. தேனஸ்ஸ கிலேஸது³க்கே²ன விபாகது³க்கே²ன ச ஸது³க்க²மேவ அத்தபா⁴வம் அபி⁴னிப்³ப³த்தேதி. ஓரம்பா⁴கி³யஸம்யோஜனானி பஹாய ஸுத்³தா⁴வாஸேஸு நிப்³ப³த்தனாரஹோ அனாகா³மீ கத²ம்…பே… அபி⁴வட்³ட⁴ந்தீதி ஆஹ ‘‘அனாகா³மீபீ’’திஆதி³. ஸது³க்க²மேவ அத்தபா⁴வம் அபி⁴னிப்³ப³த்தேதி, யாய லப்³ப⁴மானஅகுஸலாபி⁴வுத்³தி⁴ம் குஸலபரிஹானிஞ்ச க³ஹேத்வா அனாகா³மினோபி ஸப்³யாப³ஜ்ஜ²அத்தபா⁴வாபி⁴னிப்³ப³த்தனம் வுத்தம். ஏவம் யதா²லப்³ப⁴மானம் அகுஸலபரிஹானிம் குஸலாபி⁴வுத்³தி⁴ஞ்ச க³ஹேத்வா புது²ஜ்ஜனஸ்ஸபி அந்திமப⁴விகஸ்ஸ அப்³யாப³ஜ்ஜ²அத்தபா⁴வாபி⁴னிப்³ப³த்தனம் வுத்தந்தி த³ட்ட²ப்³ப³ம். தேனாஹ ‘‘புது²ஜ்ஜனோபீ’’திஆதி³. அகுஸலமேவ ஹாயதி,ந குஸலம் தஸ்ஸ பு³த்³தி⁴பக்கே² டி²தத்தா. தத்தா²பி விபஸ்ஸனமேவ க³ப்³ப⁴ம் க³ண்ஹாபேதி, ந வட்டக³ப்³ப⁴ம் அந்திமப⁴விகதாய விவட்டூபனிஸ்ஸிதத்தா அஜ்ஜா²ஸயஸ்ஸ, ஞாணஸ்ஸ ச பாகக³மனதோ.

119. ஏகச்சஸ்ஸாதி ஸாமிவசனம் ‘‘அபி⁴னந்த³தீ’’திஆதீ³ஸு பச்சத்தவஸேன பரிணாமேதப்³ப³ம், ததா² ‘‘நிப்³பி³ந்த³தீ’’திஆதீ³ஸுபி. உக்³க³ண்ஹித்வாபீதி பி-ஸத்³தோ³ லுத்தனித்³தி³ட்டோ². ப⁴க³வதோ பா⁴ஸிதஸ்ஸ அத்த²ம் அஜானந்தா தாவ தீ³க⁴ரத்தம் ஹிதஸுக²தோ பரிபா³ஹிரா ஹோந்து ஜானந்தானம்பி ஸப்³பே³ஸம் தீ³க⁴ரத்தம் ஹிதாய ஸுகா²ய ஹோதீதி அனேகம்ஸிகதம் சோதே³ந்தோ ‘‘ஏவம் ஸந்தேபீ’’திஆதி³மாஹ. இதரோ ஸப்³பே³ஸம்பி தீ³க⁴ரத்தம் ஹிதாய ஸுகா²ய ஹோதியேவாதி, ‘‘அப்படிஸந்தி⁴கா’’திஆதி³னா அனேகம்ஸிகதம் பரிஹரதி. ஸேஸம் ஸுவிஞ்ஞேய்யமேவ.

ஸேவிதப்³பா³ஸேவிதப்³ப³ஸுத்தவண்ணனாய லீனத்த²ப்பகாஸனா ஸமத்தா.