3. ஸப்புரிஸத⁴ம்மஸுத்தவண்ணனா

105. ஸப்புரிஸத⁴ம்மந்தி ஸப்புரிஸபா⁴வகரம் த⁴ம்மம். ஸோ பன யஸ்மா ஸப்புரிஸானம் பவேணிகோ த⁴ம்மோ ஹோதி. தஸ்மா ஆஹ – ‘‘ஸப்புரிஸானம் த⁴ம்ம’’ந்தி, ஏஸ நயோ அஸப்புரிஸத⁴ம்மந்தி ஏத்தா²பி. ஏவம் பதா⁴னம் அனுட்டா²தப்³ப³ஞ்ச ஸப்புரிஸத⁴ம்மம் ஆதி³ம் கத்வா மாதிகம் ட²பேத்வா அயதா²னுபுப்³பி³யா நித்³தி³ஸந்தோ ‘‘கதமோ ச, பி⁴க்க²வே, அஸப்புரிஸத⁴ம்மோ’’திஆதி³மாஹ. ததா² பன நித்³தி³ஸந்தோ உதா³ஹரணபுப்³ப³கம் ஹேதும் த³ஸ்ஸேதும், ‘‘யதா² நாமா’’திஆதி³ வுத்தம். தேன இச்சி²தப்³ப³பரிச்சாக³புப்³ப³கம் க³ஹேதப்³ப³க்³க³ஹணம் நாம ஞாயபடிபத்தி, தஸ்மா ஸப்புரிஸத⁴ம்மா ஸம்பாதே³தப்³பா³தி தீ³பேந்தோ ஸத்தா² அயதா²னுபுப்³பி³யா நித்³தா⁴ரீயதீதி இமமத்த²ம் த³ஸ்ஸேதி. ததா² அஞ்ஞத்தா²பி ‘‘அஸேவனா ச பா³லானம், பண்டி³தானஞ்ச ஸேவனா’’தி. ஏததே³வ ஹி குலத்³வயம் ‘‘உச்சகுல’’ந்தி வுச்சதி நிப்பரியாயதோ. ததா²ஹி அந்திமப⁴விகா போ³தி⁴ஸத்தா தத்தே²வ படிஸந்தி⁴ம் க³ண்ஹந்தி. ஸோதி ஸாமீசிப்படிபன்னோ பி⁴க்கு². அந்தரம் கரித்வாதி தம் காரணம் கத்வா. படிபதா³ ஹி விஞ்ஞூனம் பூஜாய காரணம், ந உச்சகுலீனதா. மஹாகுலாதி விபுலகுலா உபாதி³தோதி³தகுலஸம்பவத்திகாதி அத்தோ².

106. யஸஸத்³தோ³ பரிவாரவாசகோ. யஸஸ்ஸீதி ச ஸாதிஸயபரிவாரவந்ததா வுச்சதீதி ஆஹ ‘‘பரிவாரஸம்பன்னோ’’தி. ஆதி⁴பதேய்யாபா⁴வதோ பரேஸம் உபரினத்தி ஏதேஸம் ஈஸோ ஈஸனம் இஸ்ஸரியந்தி அக்கா²தப்³பா³தி அப்பேஸக்கா². தேனாஹ ‘‘அப்பபரிவாரா’’தி. அபா⁴வத்தோ² ஹி இத⁴ அப்ப-ஸத்³தோ³.

107. நவேவ து⁴தங்கா³னி ஆக³தானீதி ஏத்த² யதா² உக்கட்ட²பம்ஸுகூலிகஸ்ஸ தேசீவரிகதா ஸுகரா. ஏவம் உக்கட்ட²பிண்ட³பாதிகஸ்ஸ ஸபதா³னசாரிகதா ஸுகரா. ஏகாஸனிகஸ்ஸ ச பத்தபிண்டி³கக²லுபச்சா²ப⁴த்திகதா ஸுகரா ஏவாதி – ‘‘பம்ஸுகூலிகோ ஹோதீ’’திஆதி³வசனேனேவ பாளியா அனாக³தானம்பி ஆக³தபா⁴வோ வேதி³தப்³போ³ பரிஹரணஸுகரதாய தேஸம்பி ஸமாதா³னஸம்ப⁴வதோ. தேனாஹ ‘‘தேரஸ ஹோந்தீ’’தி.

108. காமதண்ஹாதி³காய தாய தண்ஹாய நிப்³ப³த்தாதி தம்மயா, புது²ஜ்ஜனா, பகதிபா⁴வூபக³மனேன தேஸம் பா⁴வோ தம்மயதா, தப்படிக்கே²பதோ அதம்மயதா, நித்தண்ஹதா. தம்யேவ காரணம் கத்வாதி பட²மஜ்ஜா²னேபி தண்ஹாபஹானம்யேவ காரணம் கத்வா. சித்தே உப்பாதே³த்வாதி அதம்மயதாபரியாயேன வுத்தே தண்ஹாய படிபக்க²த⁴ம்மே ஸம்பாதே³த்வா. ந மஞ்ஞதீதி மஞ்ஞனானம் அரியமக்³கே³ன ஸப்³ப³ஸோ ஸமுச்சி²ன்னத்தா கிஸ்மிஞ்சி ஓகாஸே காமப⁴வாதி³கே கேனசி வத்து²னா ஹத்தி²அஸ்ஸகே²த்தவத்தா²தி³னா பத்தசீவரவிஹாரபரிவேணாதி³னா ச புக்³க³லம் ந மஞ்ஞதி. ஸேஸம் ஸுவிஞ்ஞேய்யமேவ.

ஸப்புரிஸத⁴ம்மஸுத்தவண்ணனாய லீனத்த²ப்பகாஸனா ஸமத்தா.