2. ச²ப்³பி³ஸோத⁴னஸுத்தவண்ணனா

98. கீ²ணா ஜாதீதி அத்தனோ ஜாதிக்க²யம் படிஜானந்தேன அரஹத்தம் ப்³யாகதம் ஹோதி அரஹதோ தத³பா⁴வதோ. ததா² வுஸிதம் ப்³ரஹ்மசரியந்தி மக்³க³ப்³ரஹ்மசரியவாஸோ மே பரியோஸிதோதி படிஜானந்தேனபி. கதம் கரணீயந்தி சதூஹி மக்³கே³ஹி சதூஸு ஸச்சேஸு பரிஞ்ஞாதி³வஸேன ஸோளஸவித⁴ஸ்ஸபி கிச்சஸ்ஸ அத்தனா நிட்டா²பிதபா⁴வம் படிஜானந்தேனபி. நாபரம் இத்த²த்தாயாதி ஆயதிம் புனப்³ப⁴வாபா⁴வம், ஆயதிம் வா பரிஞ்ஞாதி³கரணீயாபா⁴வம் படிஜானந்தேனபீதி ஆஹ – ‘‘ஏகேனபி பதே³ன அஞ்ஞா ப்³யாகதாவ ஹோதீ’’தி. த்³விக்க²த்தும் ப³த்³த⁴ம் பன ஸுப³த்³த⁴ம் வியாதி வுத்தம். இத⁴ பன அஞ்ஞாப்³யாகரணம் சதூஹி பதே³ஹி ஆக³தம், தஸ்மா வத்தப்³ப³மேவ சேத்த² நத்தீ²தி அதி⁴ப்பாயோ. சேதனாய தி³ட்ட²வாதி³தா நாம அரியவோஹாரோ. ஸபா⁴வோதி பகதிஅத்தோ² ஹி அயம் த⁴ம்மஸத்³தோ³, ‘‘ஜாதித⁴ம்மா ஜராத⁴ம்மா’’திஆதீ³ஸு (ம. நி. 1.274-275) விய தஸ்மா, அனுத⁴ம்மோதி அரியபா⁴வம் அனுக³தா பகதீதி அத்தோ². பரமப்பிச்ச²தாய அரியா அத்தனோ கு³ணே அனாவிகரோந்தாபி ஸாஸனஸ்ஸ நிய்யானிகபா⁴வபவேத³னத்த²ஞ்சேவ ஸப்³ரஹ்மசாரீனம் ஸம்மாபடிபத்தியம் உஸ்ஸாஹஜனனத்த²ஞ்ச தாதி³ஸானம் பரினிப்³பா³னஸமயேயேவ ஆவிகரோந்தீதி அதி⁴ப்பாயேனாஹ – ‘‘பரினிப்³பு³தஸ்ஸ…பே… காதப்³போ³’’தி.

99. து³ப்³ப³லந்தி பே²க்³கு³ விய ஸுபே⁴ஜ்ஜனீயம் ப³லவிரஹிதம், அஸாரந்தி அத்தோ². விராகு³தந்தி பலுஜ்ஜனஸபா⁴வம். விக³ச்ச²னஸபா⁴வந்தி வினாஸக³மனஸபா⁴வம். அனிச்சது³க்க²விபரிணாமத்தா அஸ்ஸாஸலேஸஸ்ஸபி அபா⁴வதோ அஸ்ஸாஸவிரஹிதம். ஆரம்மணகரணவஸேன ஸமன்னாக³மனவஸேன ச யதா²ரஹம் உபேந்தி உபக³ச்ச²ந்தீதி உபயா, ‘‘ஏதம் மம, ஏஸோ மே அத்தா’’தி உபாதி³யந்தி த³ள்ஹக்³கா³ஹம் க³ண்ஹந்தீதி உபாதா³னா. அதி⁴திட்ட²தி சேதஸோ அபி⁴னந்த³னபூ⁴தாதி சேதஸோ அதி⁴ட்டா²னம். தாஹீதி தண்ஹாதி³ட்டீ²ஹி. தந்தி சித்தம். அபி⁴னிவிஸதீதி அபி⁴ரதிவஸேன நிவிஸதி, அயஞ்ஹேத்த² அத்தோ² – ஸக்காயத⁴ம்மேஸு சித்தம் அபி⁴னிவிஸதி ‘‘ஏதம் மமம், ஏஸோ மே அத்தா’’தி அஜ்ஜோ²ஸாய திட்ட²தி ஏதாஹி அபி⁴னிவேஸாஹி, ததா² ஸக்காயத⁴ம்மேஸு சித்தம் அனுஸேதி ஏதாஹீதி அனுஸயா, தண்ஹாதி³ட்டி²யோ. யத³க்³கே³ன ஹி தேபூ⁴மகத⁴ம்மேஸு ராகா³த³யோ அனுஸேந்தி, தத³க்³கே³ன தம்ஸஹக³தத⁴ம்மா தத்த² அனுஸேந்தீதி பரியாயேன, ‘‘தம் அனுஸேதீ’’தி வுத்தம். க²யா விராகா³தி ஹேதும்ஹி நிஸ்ஸக்கவசனந்தி ‘‘க²யேன விராகே³னா’’தி ஹேதும்ஹி கரணவஸேன அத்தோ² வுத்தோ. விராகே³னாதி ச இதிஸத்³தோ³ ஆதி³ அத்தோ². தேன ‘‘நிரோதே⁴னா’’தி ஏவமாதி³கம் க³ஹிதம் ஹோதி. அஞ்ஞமஞ்ஞவேவசனானேவ உபயாதீ³னம் ஸமுச்சே²த³ஸ்ஸேவ போ³த⁴னதோ.

100. பதிட்டா²தி ஏத்த² ஸேஸபூ⁴தத்தயம் உபாதா³ரூபஞ்சாதி பதிட்டா²னா, நிஜ்ஜீவட்டே²ன தா⁴துசாதி பதிட்டா²னதா⁴து. ந்ஹானீயசுண்ணம் பா³ஹிரஉத³கம் விய ஸேஸபூ⁴தத்தயம் ஆப³ந்த⁴தீதி ஆப³ந்த⁴னம். பசனீயப⁴த்தம் பா³ஹிரதேஜோ விய ஸேஸபூ⁴தத்தயம் பரிபாசேதீதி பரிபாசனம். பா³ஹிரவாதோ விய ஸேஸபூ⁴தத்தயம் வித்த²ம்பே⁴தீதி வித்த²ம்ப⁴னம். தா⁴துஸத்³த³த்தோ² வுத்தோயேவ. அஸம்பு²ட்ட²தா⁴தூதி அஸம்பு²ஸிதபா⁴வோ தேஸம் விபரிமட்ட²தாபா⁴வதோ. விஜானனம் ஆரம்மணூபலத்³தி⁴. அஹம் அத்தாதி அஹம், ‘‘ரூபத⁴ம்மோ மே அத்தா’’தி அத்தகோட்டா²ஸேன அத்தபா⁴வேன ந உபக³மிம் ந க³ண்ஹிம். நிஸ்ஸிதனிஸ்ஸிதாபி நிஸ்ஸிதா ஏவ நாமாதி ஆஹ ‘‘பத²வீதா⁴துனிஸ்ஸிதாவா’’தி. அத்தனா வா பன தன்னிஸ்ஸிதாதி ‘‘ஏகேன பரியாயேனா’’தி. உபாதா³ருபம்பி காமம் நிஸ்ஸிதம்பி ஹோதி. ததா²பி தம் நிஸ்ஸிதம் ஹோதியேவாதி தம் ந உத்³த⁴டம். பரிச்சே²த³கரத்தா பரிச்சே²தா³காஸஸ்ஸ ‘‘அவினிப்³போ⁴க³வஸேனா’’தி வுத்தம். தேன ச ததா² பரிச்சி²ன்னத்தா ஸப்³ப³ம்பி பூ⁴துபாதா³ரூபம் ஆகாஸதா⁴துனிஸ்ஸிதம் நாம. தம் நிஸ்ஸாய பவத்தியா உபாதா³ரூபம் விய பூ⁴தரூபானி, அரூபக்க²ந்தா⁴ விய ச வத்து²ரூபானி, ‘‘தம்னிஸ்ஸிதரூபவத்து²கா அரூபக்க²ந்தா⁴’’தி வுத்தனயேன ஆகாஸதா⁴துனிஸ்ஸிதசக்கா²தி³ரூபத⁴ம்மவத்து²கா வேத³னாத³யோ அரூபக்க²ந்தா⁴ ஆகாஸதா⁴துனிஸ்ஸிதா நாமாதி இமமத்த²ம் ததா²-ஸத்³தே³ன உபஸம்ஹரதி. இதா⁴பீதி ஆகாஸதா⁴துனிஸ்ஸிதபதே³பி, ந பத²வீதா⁴துனிஸ்ஸிதபதா³தீ³ஸு ஏவ. ரூபாரூபந்தி ஸப்³ப³ம்பி ரூபாரூபம் க³ஹிதமேவ ஹோதி, அக்³க³ஹிதம் நத்தி². ஸஹஜாதா…பே… நிஸ்ஸிதந்தி இத³ம் நிப்பரியாயஸித்³த⁴ம் நிஸ்ஸயத்தம் க³ஹேத்வா வுத்தம். ஹேட்டா² வுத்தனயேன பரியாயஸித்³தே⁴ நிஸ்ஸயத்தே க³ய்ஹமானே – ‘‘பச்சா²ஜாதபச்சயோதி பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதபச்சயேன பச்சயோ’’தி (பட்டா². 1.1.11) வசனதோ ஸப்³ப³ம் சதுஸமுட்டா²னிகரூபம், ‘‘விஞ்ஞாணதா⁴துனிஸ்ஸித’’ந்தி வத்தப்³ப³ம். ததா² அனந்தரவிஞ்ஞாணதா⁴துபச்சயா பவத்தனதோ, ‘‘விஞ்ஞாணதா⁴துனிஸ்ஸித’’ந்தி வத்தப்³ப³ம்.

101. ருப்பதி வண்ணவிகாரம் ஆபஜ்ஜமானம் ஹத³யங்க³தபா⁴வம் பகாஸேதீதி ரூபந்தி அயமத்தோ² சக்கு²த்³வாரே ஆபாத²க³தே ரூபாயதனே நிப்பரியாயதோ லப்³ப⁴தி, ந ஆபாத²மனாக³தே. சக்கு²விஞ்ஞாணவிஞ்ஞாதப்³ப³பா⁴வோ பன ஆபாத²மனாக³தேபி தஸ்மிம் லப்³ப⁴தேவ தம்ஸபா⁴வானதிவத்த²னதோ. ரூபாயதனம் த்³விதா⁴ விப⁴ஜித்வா. தே²ரோ பன ஆபாத²ம் அனாக³தஸ்ஸாபி ரூபாயதனஸ்ஸ ரூபபா⁴வம் ந ஸக்கா படிக்கி²பிதுந்தி த்³விதா⁴கரணம் நானுஜானந்தோ ச²ன்னோவாத³ம் நித³ஸ்ஸேதி, ‘‘உபரி ச²ன்னோவாதே³ கிந்தி கரிஸ்ஸதா²’’தி. தத்த² ஹி ‘‘சக்கு²ம், ஆவுஸோ ச²ன்ன, சக்கு²விஞ்ஞாணம் சக்கு²விஞ்ஞாணவிஞ்ஞாதப்³பே³ த⁴ம்மே’’தி (ம. நி. 3.391) ஆக³தம், ந சேத்த² சக்கு²த்³வாரே ஆபாத²ம் ஆக³தமேவ ரூபாயதனம் சக்கு²விஞ்ஞாணவிஞ்ஞாதப்³ப³பதே³ன க³ஹிதம், ந ஆபாத²ம் அனாக³தந்தி ஸக்கா விஞ்ஞாதும் அவிஸேஸேனேவ ரூபாயதனேன தண்ஹாமானதி³ட்டி²கா³ஹாபா⁴வஸ்ஸ ஜோதிதத்தா. தேனாஹ ‘‘ந யித³ம் லப்³ப⁴தீ’’தி. ரூபமேவாதி ரூபாயதனமேவ. யதி³ ஏவம் ‘‘சக்கு²விஞ்ஞாணவிஞ்ஞாதப்³பே³ஸு த⁴ம்மேஸூ’’தி பத³ம் கத²ம் நேதப்³ப³ந்தி ஆஹ – ‘‘சக்கு²விஞ்ஞாணஸம்பயுத்தா பனா’’திஆதி³. சக்கு²விஞ்ஞாணேன ஸத்³தி⁴ம் விஞ்ஞாதப்³பே³ஸூதி யேன மனோவிஞ்ஞாணேன சக்கு²விஞ்ஞாணம் அனிச்சந்திஆதி³னா சக்கு²விஞ்ஞாணேன ஸத்³தி⁴ம் தேன விஞ்ஞாதப்³பே³ஸு தம்ஸம்பயுத்தத⁴ம்மேஸூதி அத்தோ². தண்ஹாச²ந்தோ³தி தஸ்ஸனஸபா⁴வோ ச²ந்தோ³, ந கத்துகம்யதா ச²ந்தோ³யேவாதி தண்ஹாச²ந்தோ³. ரஜ்ஜனவஸேனாதி வத்த²ம் விய ரங்க³ஜாதம் சித்தஸ்ஸ அனுரஞ்ஜனவஸேன. அபி⁴னந்த³னவஸேனாதி ஆரம்மணே அபி⁴ரமித்வா நந்த³னவஸேன. ஸப்பீதிகதண்ஹா ஹி நந்தீ³தி வுச்சதி. தண்ஹாயனவஸேன தண்ஹா.

102. அஹங்காரோதி ‘‘ஸேய்யோஹமஸ்மீ’’திஆதி³னா (த⁴. ஸ. 1121, 1239; விப⁴. 832, 866; ஸம். நி. 4.108; மஹானி. 21, 178) அஹம்கரணம். யேன ஹி மமம் கரோதி, ஏதம் மமங்காரோ. ஸ்வேவாதி ‘‘அஹங்காரோ’’தி வுத்தமானோ. ஏவம் சதுத்த²ஜ்ஜா²னே நித்³தி³ட்டே² ஸப்³பா³ஸு லோகியாபி⁴ஞ்ஞாஸு வுச்சமானாஸு ஹேட்டா² விஜ்ஜாத்³வயம் வத்தப்³ப³ந்தி அதி⁴ப்பாயேன, ‘‘புப்³பே³னிவாஸம் தி³ப்³ப³சக்கு²ஞ்ச அவத்வா கஸ்மா வுத்த’’ந்தி ஆஹ? இதரோ இத⁴ ஸப்³ப³வாரேஸுபி லோகுத்தரத⁴ம்மபுச்சா² அதி⁴கதா தஸ்மா ‘‘ஸோ ஏவம் ஸமாஹிதே’’திஆதி³னா ததியா விஜ்ஜா கதி²தாதி த³ஸ்ஸேந்தோ, ‘‘பி⁴க்கூ² லோகியத⁴ம்மம் ந புச்ச²ந்தீ’’திஆதி³மாஹ. ஏகவிஸ்ஸஜ்ஜிதஸுத்தம் நாமேதம் ததியவிஜ்ஜாய ஏவ ஆக³தத்தா. அரியத⁴ம்மவஸேனபிஸ்ஸ ஸமஞ்ஞா அத்தே²வாதி த³ஸ்ஸேந்தோ, ‘‘ச²ப்³பி³ஸோத⁴னந்திபிஸ்ஸ நாம’’ந்தி வத்வா தேஸு த⁴ம்மேஸு பே⁴த³ம் த³ஸ்ஸேதும், ‘‘ஏத்த² ஹீ’’திஆதி³ வுத்தம். விஸுத்³தா⁴தி தஸ்ஸா சோத³னாய ஸோத⁴னவஸேன விஸோதி⁴தா. ஏகமேவ கத்வாதி ஏகவாரவஸேனேவ பாளியம் ஏகஜ்ஜ²ம் ஆக³தத்தா ஏகமேவ கோட்டா²ஸம் கத்வா. யதி³ ஏவம் கத²ம் வா ச²ப்³பி³ஸோத⁴னதாதி ஆஹ – ‘‘சதூஹி ஆஹாரேஹி ஸத்³தி⁴’’ந்தி கத²ம் பனேத்த² சத்தாரோ ஆஹாரா க³ஹேதப்³பா³தி? கேசி தாவ ஆஹு – ‘‘ஸாதூ⁴தி பா⁴ஸிதம் அபி⁴னந்தி³த்வா அனுமோதி³த்வா உத்தரி பஞ்ஹோ புச்சி²தப்³போ³’’தி ஹேட்டா² ஆக³தேன நயேன ஆஹாரவாரோ ஆஹரித்வா வத்தப்³போ³தி. ‘‘ப³ஹித்³தா⁴ ஸப்³ப³னிமித்தேஸூ’’தி ஏத்த² ஆஹாரானம்பி ஸங்க³ஹிதத்தா ஆஹாரா அத்த²தோ ஆக³தா ஏவாதி அஞ்ஞே. அபரே பன ரூபக்க²ந்த⁴க்³க³ஹணேன கப³ளீகாரோ ஆஹாரோ, ஸங்கா²ரக்க²ந்த⁴க்³க³ஹணேன ப²ஸ்ஸாஹாரோ, மனோஸஞ்சேதனாஹாரக்³க³ஹணேன விஞ்ஞாணாஹாரோ ஸரூபதோபி க³ஹிதோதி வத³ந்தி.

‘‘ச²ப்³பி³ஸோத⁴ன’’ந்தி இமஸ்ஸ ஸுத்தஸ்ஸ ஸமஞ்ஞாய அன்வத்த²தம் த³ஸ்ஸேத்வா ஆயதிம்பி தாதி³ஸேன ப்³யாகரணேன பி⁴க்கூ²னம் படிபத்திம்பி த³ஸ்ஸனத்த²ம், ‘‘இமே பனா’’திஆதி³ ஆரத்³த⁴ம். வினயனித்³தே³ஸபரியாயேனாதி வினயனித்³தே³ஸே ஆக³தேன காரணேன. வினயே வா ஆக³தனித்³தே³ஸானுக்கமேன.

அதி⁴க³ந்தப்³ப³தோ அதி⁴க³மோ, ஜா²னாதி³அதி⁴க³மபுச்சா². தேனாஹ – ‘‘ஜா²னவிமோக்கா²தீ³ஸூ’’திஆதி³. உபாயபுச்சா²தி அதி⁴க³மோபாயபுச்சா². கிந்தீதி கேன பகாரேன விதி⁴னாதி அத்தோ².

கதமேஸம் த்வம் த⁴ம்மானம் லாபீ⁴தி இத³ம் பன புப்³பே³ ‘‘கிம் தே அதி⁴க³த’’ந்தி அனித்³தா⁴ரிதபே⁴தா³ ஜா²னாதி³விஸேஸா புச்சி²தாதி இதா³னி தேஸம் நித்³தா⁴ரேத்வா புச்ச²னாகாரத³ஸ்ஸனம். தஸ்மாதி யஸ்மா யதா²வுத்தேஹி ஆகாரேஹி அதி⁴க³மப்³யாகரணம் ஸோதே⁴தப்³ப³ம், தஸ்மா. ஏத்தாவதாவாதி ஏத்தகேன ப்³யாகரணமத்தேனேவ ந ஸக்காரோ காதப்³போ³. ப்³யாகரணஞ்ஹி ஏகச்சஸ்ஸ அயாதா²வதோபி ஹோதி, யதா² நாம ஜாதரூபபதிரூபம் ஜாதரூபம் விய கா²யதீதி ஜாதரூபம் நிக⁴ம்ஸனதாபனசே²த³னேஹி ஸோதே⁴தப்³ப³ம் ஏவமேவம் இமேஸு இதா³னேவ வுத்தேஸு ச²ஸு டா²னேஸு பக்கி²பித்வா ஸோத⁴னத்த²ம் வத்தப்³போ³ விமோக்கா²தீ³ஸூதி ஆதி³-ஸத்³தே³ன ஸமாதி⁴-ஸமாபத்தி-ஞாணத³ஸ்ஸன-மக்³க³பா⁴வனா-ப²லஸச்சி²கிரியா ஸங்க³ண்ஹாதி.

பாகடோ ஹோதி அதி⁴க³தவிஸேஸஸ்ஸ ஸதிஸம்மோஸாபா⁴வதோ. ஸேஸபுச்சா²ஸுபி ‘‘பாகடோ ஹோதீ’’தி பதே³ ஏஸேவ நயோ. உக்³க³ஹபரிபுச்சா²குஸலாதி ஸஜ்ஜா²யமக்³க³ஸம்வண்ணனாஸு நிபுணா. யாய படிபதா³ய யஸ்ஸ அரியமக்³கோ³ ஆக³ச்ச²தி, ஸா புப்³ப³பா⁴க³படிபத்தி ஆக³மனபடிபதா³. ஸோதே⁴தப்³பா³தி ஸுத்³தா⁴ உதா³ஹு அஸுத்³தா⁴தி விசாரணவஸேன ஸோதே⁴தப்³பா³. ந ஸுஜ்ஜ²தீதி தத்த² தத்த² பமாத³படிபத்திபா⁴வதோ. அபனேதப்³போ³ அத்தனோ படிஞ்ஞாய. ‘‘ஸுஜ்ஜ²தீ’’தி வத்வா ஸுஜ்ஜ²னாகாரம் த³ஸ்ஸேதும், ‘‘தீ³க⁴ரத்த’’ந்திஆதி³ வுத்தம். பஞ்ஞாயதீதி ஏத்த² ‘‘யதீ³’’தி பத³ம் ஆனேத்வா யதி³ ஸோ பி⁴க்கு² தாய படிபதா³ய யதி³ பஞ்ஞாயதீதி ஸம்ப³ந்தோ⁴. கீ²ணாஸவபடிபத்திஸதி³ஸா படிபதா³ ஹோதி தீ³க⁴ரத்தம் விக்க²ம்பி⁴தகிலேஸத்தா.

நதி³யா ஸமுத்³த³ம் பக்க²ந்த³னட்டா²னம் நதீ³முக²த்³வாரம். மத்³த³மானோதி ப³த³ரஸாளவம் ஸரஸம் பத்தே பக்கி²த்தோ ஹுத்வா மத்³த³மானோ. ஸேஸம் ஸுவிஞ்ஞேய்யமேவ.

ச²ப்³பி³ஸோத⁴னஸுத்தவண்ணனாய லீனத்த²ப்பகாஸனா ஸமத்தா.