2. விசயஹாரவிப⁴ங்க³வண்ணனா

11. ஜாதிலிங்க³காலஸாத⁴னவிப⁴த்திஸங்க்²யாவிஸேஸாதி³தோ ஸத்³த³தோ பத³விசயோ காதப்³போ³. தத்த² கரியமானோ ச யதா²ஸபா⁴வனிருத்தியா ஏவ கதோ ஸுகதோ ஹோதீதி த³ஸ்ஸேந்தோ ‘‘இத³ம் நாமபத³ம் …பே… அயம் ஸத்³த³தோ பத³விசயோ’’தி வத்வா ‘‘ஸோ பனாய’’ந்திஆதி³மாஹ. வத்தப்³ப³அத்த²ஸம்வண்ணனாதி தம்தம்பத³வசனீயஸ்ஸ அத்த²ஸ்ஸ பே⁴த³ம் வத்வா பரியாயேஹி விவரித்வா கத²னம்.

விசியமானஸ்ஸ ஸுத்தபத³ஸ்ஸாதி புச்சா²வஸேன பவத்தஸுத்தபத³ஸ்ஸ. ‘‘ஸுத்தந்தரபதா³னிபி புச்சா²வஸேனேவ பவத்தானீ’’தி வத³ந்தி ‘‘ந ஸப்³ப³ம்பி ஸுத்தபத³’’ந்தி. ஏகஸ்ஸேவ பத³ஸ்ஸ ஸம்ப⁴வந்தானம் அனேகேஸம் அத்தா²னம் உத்³தா⁴ரோ அத்து²த்³தா⁴ரோ. ஏகஸ்ஸேவ பன அத்த²ஸ்ஸ ஸம்ப⁴வந்தானம் அனேகேஸம் பதா³னம் உத்³தா⁴ரோ பது³த்³தா⁴ரோ. ஸப்³பே³ ஹி ஸம்வண்ணியமானே ஸுத்தே லப்³ப⁴மானே ஸப்³பே³ பத³த்தே². நவ ஸுத்தந்தேதி ஸுத்தகே³ய்யாதி³வஸேன நவப்பகாரே ஸுத்தஸ்மிம் ஆனேத்வா விசினதீதி யோஜனா. அத² வா ‘‘ஸப்³பே³ நவ ஸுத்தந்தே’’தி இமினா பவிசயலக்க²ணேன ஹாரேன ஸுத்தகே³ய்யாதீ³னி ஸப்³பா³னிபி நவப்பகாரானி ஸுத்தானி விசினதீதி அத்தோ². தேனாஹ ‘‘ஸுத்தகே³ய்யாதி³கே’’திஆதி³.

‘‘கோஸலானம் புரா ரம்மா’’திஆதி³கா (ஸு. நி. 982) ச²பஞ்ஞாஸ கா³தா² வத்து²கா³தா². ‘‘பாராயனமனுகா³யிஸ்ஸ’’ந்தி (ஸு. நி. 1137 ஆத³யோ) பன ஆதி³கா ஏகூனவீஸதி கா³தா² அனுகீ³திகா³தா². இத³ம் நாமம் கதந்தி இத³ம் ‘‘பாராயன’’ந்தி நாமம் கதம். தேனாஹ ‘‘பாரம் க³மனீயா இமே த⁴ம்மா, தஸ்மா இமஸ்ஸ த⁴ம்மபரியாயஸ்ஸ ‘பாராயனந்த்வேவ அதி⁴வசன’’’ந்தி (ஸு. நி. பாராயனத்து²திகா³தா²; சூளனி. பாராயனத்து²திகா³தா² 149 ஆத³யோ). பு³த்³தி⁴யம் விபரிவத்தமானந்தி இமஸ்ஸ விசயஹாரவிப⁴ங்க³ஸ்ஸ தே³ஸனாகாலே ஆயஸ்மா மஹாகச்சானோ அத்தனோ பு³த்³தி⁴யம் வத்தமானம் கத்வா ஏவமாஹாதி யோஜனா.

ஏகம்ஸப்³யாகரணஸ்ஸ அயந்தி ஏகம்ஸப்³யாகரணீயா, ஏகம்ஸேன வா ப்³யாகாதப்³ப³த்தா ஏகம்ஸப்³யாகரணீயா, ஏகம்ஸப்³யாகரணயோக்³கா³தி அத்தோ². ஸேஸபத³த்³வயேபி ஏஸேவ நயோ. ட²பனீயாதி ட²பேதப்³ப³த்தா அப்³யாகரணீயாதி அத்தோ². ஸமயந்தரபரிசயேன நிவாரணத⁴ம்மம் பதி ஸம்ஸயபக்க²ந்தோ³ புச்ச²தீதி அதி⁴ப்பாயேனாஹ ‘‘விமதிச்சே²த³ன’’ந்தி. பகதியா பன நிவாரணத⁴ம்மம் அஜானந்தோ ஞாதுகாமதாய புச்ச²தீதி அதி³ட்ட²ஜோதனாய புச்சா²பி ஸியா. ததா² ஹி வக்க²தி ‘‘லோகஸ்ஸ நிவாரணாதீ³னி அஜானந்தேனா’’தி.

ஏகவத்து²பரிக்³க³ஹாதி ஏகஸ்ஸ அபி⁴தே⁴ய்யத்த²ஸ்ஸ க³ஹணதோ.

விமுத்திபரிபாசகஇந்த்³ரியானி விவட்டபக்கே² டி²தஸ்ஸ ஸத்³தா⁴த³யோ த⁴ம்மா, கிம் பனேத்த² அரியானம்பி இந்த்³ரியலோகேன ஸங்க³ஹோ ஹோதீதி ஆஹ ‘‘பரியாபன்னத⁴ம்மவஸேனா’’திஆதி³.

காளபக்க²சாதுத்³த³ஸீக⁴னவனஸண்ட³மேக⁴படலச்சா²த³னஅட்³ட⁴ரத்தீனம் வஸேன சதுரங்க³ஸமன்னாக³தேன. விவிச்சா²தி விசிகிச்சா²ய. தேனாஹ ‘‘விசிகிச்சா²ஹேதூ’’தி. து³க்க²மஸ்ஸ மஹப்³ப⁴யந்தி ஏத்த² வுத்தம் ‘‘அஸ்ஸா’’தி பத³ம் ‘‘ஜப்பாபி⁴லேபனம் அஸ்ஸ ப்³ரூமீ’’தி ஆனேத்வா ஸம்ப³ந்தி⁴தப்³ப³ந்தி த³ஸ்ஸேந்தோ ‘‘ஜப்பா தண்ஹா அஸ்ஸ லோகஸ்ஸா’’தி ஆஹ. ‘‘ஸப்³ப³ஸத்தான’’ந்திஆதி³னா, ‘‘ஸப்³ப³ஸோவா’’திஆதி³னா ச அன்வயதோ, ப்³யதிரேகதோ ச ஸாதிஸயம் அவிஜ்ஜாய நீவரணபா⁴வம் த³ஸ்ஸேதி. ‘‘தூ³ரே ஸந்தோ பகாஸந்தி (த⁴. ப. 304; நேத்தி. 11), ரத்தோ அத்த²ம் ந ஜானாதீ’’தி (நேத்தி. 11, 27) கா³தா²த்³வயேனாபி அனுகீ³திவிசயம் த³ஸ்ஸேதீதி யோஜேதப்³ப³ம்.

ரூபாவசராதி ரூபாவசரஸத்தா. விபரிணாமது³க்க²தாய முச்சனஸ்ஸ காரணவசனந்தி ஸம்ப³ந்தோ⁴. யதோ வட்டது³க்க²தோ முச்சனம். தம் வட்டது³க்க²ம் அனவஸேஸபரியாதா³னவஸேன ஸங்கா²ரது³க்க²தாக³ஹணேன.

ஏகாதா⁴ரந்தி ஏகவத்து² அதி⁴ட்டா²னம். நிவாரணம் விக்க²ம்ப⁴னம் பிதா⁴னம் ஸமுச்சே²தோ³தி அத்த²த்³வயஸ்ஸ புச்சி²தத்தா ‘‘அனேகாதா⁴ரம் த³ஸ்ஸேது’’ந்தி வுத்தம். தேனாஹ ‘‘நிவாரணஸங்கா²தம் ஸம்வரம்…பே… பிதி⁴ய்யந்தி பச்சி²ஜ்ஜந்தீ’’தி (ஸு. நி. அட்ட². 2.1041; சூளனி. அட்ட². 3). தஸ்ஸத்தோ² ‘‘நிவாரணஸங்கா²தம் விக்க²ம்ப⁴னம், ஸம்வரம், பிதா⁴னஞ்ச கதே²ஹீ’’தி.

‘‘வோதா³ன’’ந்தி இமினா ஸோதானம் விக்க²ம்ப⁴னவிஸுத்³தி⁴, ‘‘வுட்டா²ன’’ந்தி இமினா ஸமுச்சே²த³விஸுத்³தி⁴ அதி⁴ப்பேதாதி ஆஹ ‘‘புச்சா²ய து³வித⁴த்த²விஸயதம் விவரிதும் ‘ஏவ’ந்திஆதி³ வுத்த’’ந்தி. ததா² சாஹ ‘‘வோதா³யதி…பே… அரியமக்³கோ³’’தி.

தி³ட்டி²மானாவிஜ்ஜாஸோதாபி தண்ஹாஸோதானுகா³தி ஆஹ ‘‘யேபு⁴ய்யேன அனுரோத⁴வஸேனா’’தி. உபசாரவஸேனாதி நிஸ்ஸிதுபசாரவஸேன. ஸப்³ப³ஸ்மாதி சக்கு²தோ யாவ மனதோதி ஸப்³ப³ஸ்மா த்³வாரதோ. ஸப்³ப³ப்பகாரேனாத்தி தண்ஹாயனமிச்சா²பி⁴னிவேஸனஉன்னமனாதி³ப்பகாரேன.

தமேவ ஸதிந்தி யாயம் ஸதி புப்³ப³பா⁴கே³ ஸோதானம் விக்க²ம்ப⁴னவஸேன வுத்தா, தமேவ ஸதிம். மக்³க³க்க²ணே ஸோதானம் ஸம்வரம் பிதா⁴னம் ப்³ரூமி. யஸ்மா பன பிதா⁴யிகாபி ஸதி மக்³க³க்க²ணே பஞ்ஞானுகா³, பஞ்ஞாகிச்சமேவேத்த² அதி⁴கம், தஸ்மா வுத்தம் ‘‘பஞ்ஞாயேதே பிதீ⁴யரே’’தி.

ஸம்வரபிதா⁴னானந்தி ஏத்த² ஸம்வரஸத்³தே³ன நிவாரணம் வுத்தம்.

யஸ்மிம் யஸ்மிம் அரியமக்³கே³ அனதி⁴க³தே யம் யம் அபி⁴ஸங்கா²ரவிஞ்ஞாணம் உப்பஜ்ஜனாரஹம், தஸ்மிம் தஸ்மிம் அதி⁴க³தே தம் தம் விஞ்ஞாணம் அனுப்பாத³னிரோதே⁴ன நிருஜ்ஜ²தி ஸத்³தி⁴ம் அத்தனா ஸம்பயுத்தனாமரூபேனாதி ஆஹ ‘‘தஸ்ஸ தஸ்ஸ விஞ்ஞாணஸ்ஸ நிரோதே⁴ன ஸஹேவா’’தி. அனுப்பாத³னிரோதோ⁴ ஹி ஏத்த² ‘‘நிரோதோ⁴’’தி அதி⁴ப்பேதோ அனுபாதி³ஸேஸனிப்³பா³னஸ்ஸ அதி⁴ப்பேதத்தாதி. அனுஸந்தீ⁴யதி ஏதேனாதி அனுஸந்தி⁴, இத⁴ புச்சி²யமானோ அத்தோ².

ஸஹ விஸயேன த³ஸ்ஸேதுந்தி ஏத்த² ஸச்சானி ஏவ விஸயோ. பஹாதப்³ப³ஸபா⁴வம் ஸமுத³யஸச்சம், தஸ்ஸ விஸயோ து³க்க²ஸச்சம். ‘‘ஸம்யோஜனியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தீ’’தி (ஸம். நி. 2.53, 57) ஹி வுத்தம். பஹாயகஸபா⁴வம் மக்³க³ஸச்சம், தஸ்ஸ விஸயோ நிரோத⁴ஸச்சந்தி ஆஹ ‘‘ஸஹ விஸயேன…பே… ஸச்சேஸூ’’தி. காமஞ்சேத்த² ‘‘ஸமுத³யோ த்³வீஸு பூ⁴மீஸு பஹீயதீ’’தி ஆரத்³த⁴ம், ‘‘த³ஸ்ஸனேன தீணி ஸம்யோஜனானி பஹீயந்தி, பா⁴வனாய ஸத்த ஸம்யோஜனானி பஹீயந்தீ’’தி பன விபா⁴க³வசனமேவ வத்தந்தி ஆஹ ‘‘பஹாயகவிபா⁴க³முகே²ன பஹாதப்³ப³விபா⁴க³ம் த³ஸ்ஸேது’’ந்தி.

நிரவஸேஸகாமராக³ப்³யாபாதா³ ததியமக்³கே³ன பஹீயந்தி, இதரே சதுத்த²மக்³கே³னாதி வுத்தம் ‘‘இதரேஹி பன நிரவஸேஸ’’ந்தி. தத்தா²தி கம்மவிபாகவட்டப்பபே⁴தே³ன தேதா⁴துகே ப⁴வத்தயே. ஸம்யோஜனவஸேனாதி ஸப்³ப³தா³ யோஜனவஸேன ப³ந்த⁴னவஸேன.

12. அக்³க³ப²லஞாணதாய ஏகம்பி ஸமானம் தன்னிமித்தஸ்ஸ க²யானுப்பாதா³ரம்மணஸ்ஸ பச்சவேக்க²ணஞாணஸ்ஸ வஸேன ப²லவோஹாரேன த்³வே நாமானி லப⁴தி.

ஸோமனஸ்ஸனாமலாபோ⁴ இமினா ஆரம்மணஸங்கேதேனாதி தத³த்த²ம் விவரந்தோ ‘‘க²யே…பே… ஸமஞ்ஞாயா’’தி ஆஹ.

13. தக்³க³ஹணேனேவாதி ப²ஸ்ஸபஞ்சமகபஞ்சரூபிந்த்³ரியக்³க³ஹணேனேவ. ஸஹசரணாதி³னாதி ஸஹஜாதாதி³அனந்தராதி³பச்சயபா⁴வேன சேவ நிஸ்ஸயாரம்மணாதி³னா ச. ‘‘ஸம்பயுத்த’’ந்தி இமினா ஸஹிததா அவிஸிட்ட²தா இதா⁴தி⁴ப்பேதாதி ஆஹ ‘‘அவிபா⁴கே³ன க³ஹணீயபா⁴வம் ஸந்தா⁴யா’’தி.

கத²ம் ஸமாதி⁴ந்த்³ரியம் உப்பாதே³தீதி ஆஹ ‘‘ஸதிக்³க³ஹணேன சேத்த² பரியுட்டா²னப்பஹானம் இதா⁴தி⁴ப்பேத’’ந்தி. ந ஹி ஸமாதி⁴னா பரியுட்டா²னப்பஹானம் ஸம்ப⁴வதி.

பத³ஹதி ஏதேனாதி பதா⁴னம், வீரியம். தேதி வீரியஸங்கா²ரா. ஏகரஸேனாதி யதா² இந்த்³ரியானி ஏகரஸானி ஹோந்தி, ஏவம் ஏகரஸபா⁴வேன ஸரணதோ பவத்தனதோ. ததா² பவத்தியா ஏவ ஸுட்டு² வத வீரியம் வாஹேஸீதி யோகி³னா ஸங்கப்பேதப்³ப³தோ தது³பக³வீரியவாஹனட்டே²ன ‘‘ஸம்பஹம்ஸனா’’தி வுத்தம். தேனாஹ ‘‘ஏவம் மே…பே… ஹேதுபா⁴வதோ’’தி.

இத்³தி⁴ஸத்³த³ஸ்ஸ பட²மோ கத்துஅத்தோ², து³தியோ கரணத்தோ² வுத்தோ, பாத³ஸத்³த³ஸ்ஸ ஏகோ கரணத்தோ² ஏவ. பஜ்ஜிதப்³பா³ ச இத்³தீ⁴ வுத்தா, ந ச இஜ்ஜ²ந்தி. பஜ்ஜிதப்³பா³ ச இத்³தீ⁴ பஜ்ஜனகரணேன பாதே³ன ஸமானாதி⁴கரணா ந ஹோந்தீதி ‘‘பட²மேன அத்தே²ன இத்³தி⁴ ஏவ பாதோ³’’தி கத²ம் ஸக்கா வத்தும், ததா² இத்³தி⁴கிரியாகரணேன ஸாதே⁴தப்³பா³ பு³த்³தி⁴ஸங்கா²தா இத்³தி⁴ பஜ்ஜனகிரியாகரணேன பஜ்ஜிதப்³பா³தி த்³வின்னம் கரணானம் ந ஸமானாதி⁴கரணதா ஸம்ப⁴வதீதி ‘‘து³தியேன அத்தே²ன இத்³தி⁴யா பாதோ³’’தி கத²ம் ஸக்கா வத்துந்தி சே? ஸக்கா, பாத³ஸ்ஸ இஜ்ஜ²மானகோட்டா²ஸ இஜ்ஜ²னகரணூபாயபா⁴வதோ. அத² வா ‘‘பட²மேன அத்தே²ன இத்³தி⁴யா பாதோ³, து³தியேன அத்தே²ன இத்³தி⁴ ஏவ பாதோ³ இத்³தி⁴பாதோ³’’தி ஏவம் யோஜனதோ. கத²ம்? அனந்தரத்தோ² பச்சாஸத்திஞாயேன இத⁴ பட²மோதி அதி⁴ப்பேதோ, ததோ புரிமோ து³தியோதி.

‘‘ச²ந்த³ம் சே பி⁴க்கு² அதி⁴பதிம் கரித்வா லப⁴தி ஸமாதி⁴’’ந்திஆதி³ (விப⁴. 432) வசனதோ ச²ந்த³ஸமாதி⁴ப்பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதீதி ஏத்தா²பி ச²ந்தா³தி⁴பதி ஸமாதி⁴ ச²ந்த³ஸமாதீ⁴தி அதி⁴பதிஸத்³த³லோபம் கத்வா ஸமாஸோ வுத்தோதி விஞ்ஞாயதி. அதி⁴பதிஸத்³த³த்த²த³ஸ்ஸனவஸேனேவ பன ‘‘ச²ந்த³ஹேதுகோ, ச²ந்தா³தி⁴கோ வா ஸமாதீ⁴’’தி ஸம்மோஹவினோத³னியம் (விப⁴. அட்ட². 431) வுத்தம், தஸ்மா இதா⁴பி ச²ந்தா³தி⁴பதி ஸமாதி⁴ ச²ந்த³ஸமாதீ⁴தி வேதி³தப்³போ³. தம் பன ச²ந்த³ம் வுத்தனயேன ஸத்³தா⁴ஸீஸேன த³ஸ்ஸேந்தோ ‘‘ஸத்³தா⁴தி⁴பதேய்யா சித்தேகக்³க³தா’’தி வுத்தம். ‘‘இத³ம் பதா⁴ன’’ந்தி வா வீரியம் வுத்தம். வீரியஸத்³தா³பேக்கா²ஸஹிதம் ஏகவசனேன வத்வா சதுப்³பி³த⁴ஸ்ஸபி வீரியஸ்ஸ அதி⁴ப்பேதத்தா நிப்³ப³த்தேதப்³ப³த⁴ம்மவிபா⁴கே³ன ச ‘‘இமே ஸங்கா²ரா’’தி வுத்தம். தேன பதா⁴னபூ⁴தா ஸங்கா²ராதி ஏவம் ஸமாஸோ வேதி³தப்³போ³. ஸங்க²தஸங்கா²ராதி³னிவத்தனத்த²ஞ்சேத்த² பதா⁴னக்³க³ஹணம். அத² வா தம் தம் விஸேஸம் ஸங்க²ரோதீதி ஸங்கா²ரோ, ஸப்³ப³ம்பி வீரியம். தத்த² சதுகிச்சஸாத⁴கதோ அஞ்ஞஸ்ஸ நிவத்தனத்த²ம் பதா⁴னக்³க³ஹணந்தி பதா⁴னபூ⁴தா ஸேட்ட²பூ⁴தாதி அத்தோ².

வீரியித்³தி⁴பாத³னித்³தே³ஸே ‘‘வீரியஸமாதி⁴ப்பதா⁴னஸங்கா²ரஸமன்னாக³த’’ந்தி (விப⁴. 435) த்³விக்க²த்தும் வீரியம் ஆக³தம். தத்த² புரிமம் ஸமாதி⁴விஸேஸனம் ‘‘வீரியாதி⁴பதி ஸமாதி⁴ வீரியஸமாதீ⁴’’தி, து³தியம் ஸமன்னாக³மங்க³த³ஸ்ஸனத்த²ம். த்³வே ஏவ ஹி ஸப்³ப³த்த² ஸமன்னாக³மங்கா³னி ஸமாதி⁴, பதா⁴னஸங்கா²ரோ ச. ச²ந்தா³த³யோ ஸமாதி⁴விஸேஸனானி. பதா⁴னஸங்கா²ரோ பன பதா⁴னவசனேனேவ விஸேஸிதோ, ந ச²ந்தா³தீ³ஹீதி ந இத⁴ வீரியாதி⁴பதிதா பதா⁴னஸங்கா²ரஸ்ஸ வுத்தா ஹோதி. வீரியஞ்ச ஸமாதி⁴ம் விஸேஸேத்வா டி²தமேவ ஸமன்னாக³மங்க³வஸேன பதா⁴னஸங்கா²ரவசனேன வுத்தந்தி நாபி த்³வீஹி வீரியேஹி ஸமன்னாக³மோ வுத்தோ ஹோதி. யஸ்மா பன ச²ந்தா³தீ³ஹி விஸிட்டோ² ஸமாதி⁴ ததா² விஸிட்டே²னேவ தேன ஸம்பயுத்தோ பதா⁴னஸங்கா²ரோ, ஸேஸத⁴ம்மா ச, தஸ்மா ஸமாதி⁴விஸேஸனானம் வஸேன ‘‘சத்தாரோ இத்³தி⁴பாதா³’’தி வுத்தா. விஸேஸனபா⁴வோ ச ச²ந்தா³தீ³னம் தம்தம்அபஸ்ஸயனவஸேன ஹோதீதி ச²ந்த³ஸமாதி⁴…பே… இத்³தி⁴பாத³ந்தி ஏத்த² நிஸ்ஸயத்தே²பி பாத³ஸத்³தே³ன உபாயத்தே²ன ச²ந்தா³தீ³னம் இத்³தி⁴பாத³தா வுத்தா ஹோதி. ததா² ஹி அபி⁴த⁴ம்மே உத்தரசூளபா⁴ஜனீயே ‘‘சத்தாரோ இத்³தி⁴பாதா³ ச²ந்தி³த்³தி⁴பாதோ³’’திஆதி³னா (விப⁴. 457) ச²ந்தா³தீ³னமேவ இத்³தி⁴பாத³தா வுத்தா. பஞ்ஹாபுச்ச²கே ச ‘‘சத்தாரோ இத்³தி⁴பாதா³ – இத⁴ பி⁴க்கு² ச²ந்த³ஸமாதீ⁴’’தி (விப⁴. 462) ஆரபி⁴த்வாபி புன ச²ந்தா³தீ³னம்யேவ குஸலாதி³பா⁴வோ விப⁴த்தோ. உபாயித்³தி⁴பாத³த³ஸ்ஸனத்த²மேவ ஹி நிஸ்ஸயித்³தி⁴பாத³த³ஸ்ஸனம் கதம். அஞ்ஞதா² சதுப்³பி³த⁴தாவ ந ஹோதீதி. அயமேத்த² பாளிவஸேன அத்த²வினிச்ச²யோ வேதி³தப்³போ³.

தத³ங்க³ஸமுச்சே²த³னிஸ்ஸரணவிவேகனிஸ்ஸிதத்தம் வத்வா படிப்பஸ்ஸத்³தி⁴விவேகனிஸ்ஸிதஸ்ஸ அவசனம் ‘‘ச²ந்த³ஸமாதி⁴…பே… இத்³தி⁴பாத³ம் பா⁴வேதீ’’தி (விப⁴. 432) பா⁴வேதப்³பா³னம் இத்³தி⁴பாதா³னம் வுத்தத்தா. பா⁴விதித்³தி⁴பாத³ஸ்ஸ ஹி ஸச்சி²காதப்³பா³ ப²லபரியாபன்னா இத்³தி⁴பாதா³தி.

வோஸ்ஸக்³க³ஸத்³தோ³ பரிச்சாக³த்தோ², பக்க²ந்த³னத்தோ² சாதி வோஸ்ஸக்³க³ஸ்ஸ து³வித⁴தா வுத்தா. யதா²வுத்தேன பகாரேனாதி தத³ங்க³ஸமுச்சே²த³ப்பகாரேன, தன்னின்னபா⁴வாரம்மணப்பகாரேன ச. பரிணமந்தம் விபஸ்ஸனக்க²ணே.

14. புப்³ப³பா⁴க³பஞ்ஞாயாதி ஏகாவஜ்ஜனனானாவஜ்ஜனவீதீ²ஸு பவத்தஉபசாரபஞ்ஞாய. அதி⁴க³மபஞ்ஞாயாதி அப்பனாபஞ்ஞாய. புன புப்³ப³பா⁴க³பஞ்ஞாயாதி நானாவஜ்ஜனுபசாரபஞ்ஞாய, படிஸந்தி⁴பஞ்ஞாய வா. உபசாரபஞ்ஞாயாதி ஏகாவஜ்ஜனே, ஸப்³ப³த்த² வா பவத்தஉபசாரபஞ்ஞாய.

புச்சா²விஸ்ஸஜ்ஜனவிசயோபீதி யதா²வுத்தாய புச்சா²ய விஸ்ஸஜ்ஜனவிசயோபி. வுத்தனயானுஸாரேனாதி அதி³ட்ட²ஜோதனா, விமதிச்சே²த³னா சாதி ஹேட்டா² வுத்தனயானுக³மனேன.

15. ஸேகே² அஸேகே²தி ஸேக்கே² அரியபுக்³க³லே, அஸேக்கே² அரியபுக்³க³லே. விபஸ்ஸனாபுப்³ப³ங்க³மப்பஹானேதி விபஸ்ஸனம் புரேசாரிகம் கத்வா பவத்தகிலேஸப்பஹானே, பஹானாபி⁴ஸமயேதி அத்தோ².

‘‘யம் அனிச்சம் து³க்க²ம் அனத்தா’’தி பாளிம் த³ஸ்ஸேத்வா புன ‘‘யம் அனிச்சே து³க்கே² அனத்தனீ’’தி வசனம் ஏவம்பேத்த² பட²ந்தீதி த³ஸ்ஸேதும்.

ஸேஸஸம்கிலேஸவோதா³னத⁴ம்மாதி கே³த⁴தோ அவஸிட்ட²ஸம்கிலேஸத⁴ம்மா ச ஸப்³ப³வோதா³னத⁴ம்மா ச. அபா⁴வேனாதி அபா⁴வனேன அபா⁴வகரணேன.

பயோக³பரக்கமந்தி பு⁴ஸம் யோகோ³ பயோகோ³, பயோகோ³வ பரக்கமோ பயோக³பரக்கமோ, சித்தம். உக்கி²பதீதி கோஸஜ்ஜபக்கே² பதிதும் அதே³ந்தோ குஸலபக்கே² உத்³த⁴ம் கி²பேந்தோ விய பவத்ததி. பதா⁴னவீரியந்தி அகுஸலானம் அனுப்பாத³னட்டே²ன உத்தமவீரியம். யோஜேதப்³பா³னீதி ‘‘ஆஸேவமானோ வாயமதீ’’திஆதி³னா யோஜேதப்³பா³னி. அனுப்பன்னாதி அவத்தப்³ப³தம் ஆபன்னானந்தி பூ⁴மிலத்³தா⁴ரம்மணாதி⁴க்³க³ஹிதாவிக்க²ம்பி⁴தாஸமுக்³கா⁴டிதுப்பன்னானம்.

16. ‘‘அட்ட²மகஸ்ஸ இந்த்³ரியானீ’’தி வுத்தத்தா ‘‘பட²மமக்³கே³ ஸத்³தா⁴த³யோ’’திஆதி³ வுத்தம். இந்த்³ரியக்³க³ஹணஞ்ச பாளியம் நித³ஸ்ஸனமத்தம் த³ட்ட²ப்³ப³ம்.

அஸுபா⁴னுபஸ்ஸனா காயானுபஸ்ஸனாஸதிபட்டா²னந்தி ஆஹ ‘‘ஸதிபட்டா²னபா⁴வனாய ஸுனிக்³க³ஹிதோ காமவிதக்கோ’’தி. ஸமாதி⁴ உப்பஜ்ஜமானோ காமவிதக்கம்பி நிக்³க³ஹேத்வா ஏவ உப்பஜ்ஜதீதி த³ஸ்ஸேந்தோ ‘‘அனவஜ்ஜஸுக²பத³ட்டா²னேனா’’திஆதி³மாஹ. ‘‘குஸலேஸு த⁴ம்மேஸு ஆரத்³த⁴வீரியோ’’திஆதி³னா த⁴ம்மச்ச²ந்த³தோ உப்பஜ்ஜமானோ வீரியச்ச²ந்தோ³ க²ந்திம் பரிப்³ரூஹேதீதி த³ஸ்ஸேதி. அனவஜ்ஜத⁴ம்மானம் உபகாரகத⁴ம்மாஸேவனம் விய அனுபகாரகத⁴ம்மபரிவஜ்ஜனம்பி பஞ்ஞானிஸேவனேனேவ ஹோதீதி ஆஹ ‘‘ஸமாதி⁴ஆதீ³ன’’ந்திஆதி³.

17. ஸப்³ப³த⁴ம்மாதி⁴ட்டா²னம் தே³ஸனம் புக்³க³லாதி⁴ட்டா²னேன விப⁴ஜிதும் ‘‘லோகோ நாமா’’திஆதி³ வுத்தந்தி த³ஸ்ஸேந்தோ ‘‘ஸப்³ப³த⁴ம்மானந்தி…பே… த³ஸ்ஸேது’’ந்தி ஆஹ. மஹக்³க³தத⁴ம்மேஸு டா²னம் தம்ஸம்பாத³னாவ. ததா² ஸேஸேஸு. வட்³டி⁴யமானேஸூதி யதா² விமுத்திம் பரிபாசயந்தி, ஏவம் ப்³ரூஹியமானேஸு.

த³ஸ்ஸனபரிஞ்ஞாதி ரூபாரூபத⁴ம்மானம் ஸலக்க²ணதோ, பச்சயதோ ச பரிஜானனா. தேனாஹ ‘‘ஞாதபரிஞ்ஞா’’தி. படிபக்க²வித⁴மனேன ஸத்³தி⁴ம் லக்க²ணத்தயவிபா⁴வனா இத⁴ ‘‘பா⁴வனாபரிஞ்ஞா’’தி அதி⁴ப்பேதாதி ஆஹ ‘‘பா⁴வனா…பே… பரிஞ்ஞா சா’’தி. த³ஸ்ஸனத்தா² பரிஞ்ஞா த³ஸ்ஸனபரிஞ்ஞா, பா⁴வனத்தா² பரிஞ்ஞா பா⁴வனாபரிஞ்ஞாதி ஏவம் வா ஏத்த² அத்தோ² த³ட்ட²ப்³போ³.

கக்க²ளபு²ஸனாதீ³தி கக்க²ளாதி³பு²ஸனாதி³. அபி⁴ஜானித்வாதி அபி⁴ஞ்ஞாய பஞ்ஞாய ஜானித்வா, டி²தஸ்ஸ அபி⁴ஜானனஹேது வாதி அத்தோ². அத்தோ²தி ப²லம். நயோதி வுத்தனயோ.

‘‘யம் அஸங்க²த’’ந்திபி பட²ந்தி. சதுனயகோவிதோ³தி ஏகத்தனானத்தாதி³னயசதுக்கே நிபுணோ. தே³ஸனாயுத்திகுஸலோதி த⁴ம்மானம் தே³ஸனாவிதி⁴ம்ஹி குஸலோ.

ஸதி³ஸீ காதப்³பா³ ஸம்ஸந்த³னவஸேனாதி அதி⁴ப்பாயோ. ஆனேதப்³பா³ ‘‘அயம் தே³ஸனா இமாய தே³ஸனாய ஏவம் ஸம்ஸந்த³தீ’’தி. அத்த²தோ அபேதந்தி அயுத்தத்த²ம். அஸம்ப³ந்த⁴த்த²ந்தி அஞ்ஞமஞ்ஞம் அஸம்ப³ந்த⁴பத³த்த²ம். நனு பட்டா²னவிசாரோ நயவிசாரோ விய ஹாரேஹி அஸம்மிஸ்ஸோ விசாரணந்தரோதி சோத³னம் மனஸி கத்வா ஆஹ ‘‘யஸ்மா பனா’’திஆதி³. இத⁴ நிக்கி²த்தோதி இத⁴ ஸுத்தவிசயே ஸுத்தத்த²விசாரபா⁴வதோ நிக்கி²த்தோ, ஏதேன வா பட்டா²னஸ்ஸ ஹாரந்தோக³த⁴பா⁴வத³ஸ்ஸனேனேவ மூலபதா³னம் விய பட்டா²னஸ்ஸ பத³த்த²ந்தராபா⁴வோ த³ஸ்ஸிதோதி வேதி³தப்³ப³ம்.

இமஸ்ஸ ஸுத்தஸ்ஸாதி ஸம்வண்ணியமானஸுத்தம் ஸந்தா⁴யாஹ. கஸ்மிம் வா பதே³தி ஸம்வண்ணியமானம் கா³த²ம் ஸந்தா⁴யாஹ. தப்³பி³சயேனாதி புச்சா²தி³விசயேன, அஸ்ஸாதா³தி³விசயேன ச.

விசயஹாரவிப⁴ங்க³வண்ணனா நிட்டி²தா.