3. நிஸ்ஸக்³கி³யனித்³தே³ஸவண்ணனா

17. இதா³னி சீவரவிதி⁴ம் த³ஸ்ஸேதும் ‘‘விகப்பன’’ந்த்யாதி³முத்³த⁴டம். யோ பி⁴க்கு² அகாலசீவரம் விகப்பனஞ்ச அதி⁴ட்டா²னஞ்ச அகத்வா த³ஸாஹம் அதிக்காமேதி, தஸ்ஸ பி⁴க்கு²னோ நிஸ்ஸக்³கி³யம் ஸியாதி பிண்ட³த்தோ². தத்த² அகாலசீவரந்தி அகாலே சீவரம், கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³ந்தி ஜாதிதோ ச² சீவரானி, து³கூலம் பட்டுண்ணம் ஸோமாரபட்டம் சீனபட்டம் இத்³தி⁴ஜம் தே³வதி³ன்னந்தி இமானி பன ச² அனுலோமசீவரானி. தேஸு து³கூலம் ஸாணஸ்ஸ அனுலோமம் வாகமயத்தா. பட்டுண்ணாதீ³னி தீணி கோஸேய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜாதீ³னி த்³வயானி கோ²மாதீ³னம் அனுலோமானி தேஸமஞ்ஞதரபா⁴வதோ. இமேஸம் ச²ன்னம் சீவரானம் அஞ்ஞதரம் அகாலசீவரம்.

விகப்பனமதி⁴ட்டா²னந்தி ஏத்த² பன விகப்பனூபக³ம் அதி⁴ட்டா²னூபக³ஞ்ச ஏவம் வேதி³தப்³ப³ம். தத்ராயம் பாளி – ‘‘அனுஜானாமி, பி⁴க்க²வே, ஆயாமேன அட்ட²ங்கு³லம் ஸுக³தங்கு³லேன சதுரங்கு³லவித்த²தம் பச்சி²மசீவரம் விகப்பேது’’ந்தி (மஹாவ. 358). மஜ்ஜி²மஸ்ஸ புரிஸஸ்ஸ தீ³க⁴ஸோ த்³வே வித³த்தி²யோ, திரியம் வித³த்தி². த்³வே விகப்பனா ஸம்முகா²விகப்பனா ச பரம்முகா²விகப்பனா ச. கத²ம்? ‘‘இமம் சீவரம் துய்ஹம் விகப்பேமீ’’தி வத்தப்³ப³ம், அயம் ஸம்முகா²விகப்பனா. ‘‘மய்ஹம் ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி, ஏகஸ்ஸ ஸந்திகே ‘‘இமம் சீவரம் திஸ்ஸஸ்ஸ பி⁴க்கு²னோ விகப்பேமீ’’தி வத்தப்³ப³ம், அயம் அபராபி ஸம்முகா²விகப்பனா. தேன பி⁴க்கு²னா ‘‘திஸ்ஸஸ்ஸ பி⁴க்கு²னோ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி, ‘‘இமம் சீவரம் துய்ஹம் விகப்பனத்தா²ய த³ம்மீ’’தி வத்தப்³ப³ம், தேன வத்தப்³போ³ ‘‘கோ தே மித்தோ வா ஸந்தி³ட்டோ² வா ஸம்ப⁴த்தோ வா’’தி, ததோ இதரேன ‘‘திஸ்ஸோ பி⁴க்கூ²’’தி வத்தப்³ப³ம், புன தேன ‘‘அஹம் திஸ்ஸஸ்ஸ பி⁴க்கு²னோ த³ம்மீ’’தி வத்தப்³ப³ம், அயம் பரம்முகா²விகப்பனா. ‘‘திஸ்ஸஸ்ஸ பி⁴க்கு²னோ ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி வுத்தே பச்சுத்³தா⁴ரோ நாம ஹோதி. ப³ஹுகே ‘‘இமானீ’’தி, அஹத்த²பாஸே ‘‘ஏதம், ஏதானீ’’தி வா. ஏவம் விகப்பனஞ்ச அகத்வாதி அத்தோ².

திசீவரஸ்ஸ பன பமாணம் உக்கட்ட²பரிச்சே²தே³ன ஸுக³தசீவரதோ ஊனகம் வட்டதி, லாமகபரிச்சே²தே³ன ஸங்கா⁴டியா, உத்தராஸங்க³ஸ்ஸ ச தீ³க⁴தோ முட்டி²பஞ்சகம், திரியம் முட்டி²த்திகம், அந்தரவாஸகோ தீ³க⁴தோ முட்டி²பஞ்சகோ, திரியம் த்³விஹத்தோ²பி அட்³ட⁴தேய்யோ வா வட்டதி. வுத்தப்பமாணதோ அதி⁴கஞ்ச ஊனகஞ்ச ‘‘பரிக்கா²ரசோள’’ந்தி அதி⁴ட்டா²தப்³ப³ம். த்³வே சீவரஸ்ஸ அதி⁴ட்டா²னா காயேன வா அதி⁴ட்டே²தி, வாசாய வா அதி⁴ட்டே²தி. திசீவரம் அதி⁴ட்ட²ஹந்தேன ரஜித்வா கப்பபி³ந்து³ம் த³த்வா புராணஸங்கா⁴டிம் ‘‘இமம் ஸங்கா⁴டிம் பச்சுத்³த⁴ராமீ’’தி பச்சுத்³த⁴ரித்வா நவம் ஸங்கா⁴டிம் ஹத்தே²ன க³ஹேத்வா ‘‘இமம் ஸங்கா⁴டிம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரம் கரோந்தேன காயேன அதி⁴ட்டா²தப்³பா³, இத³ம் காயேன அதி⁴ட்டா²னம். தம் யேன கேனசி ஸரீராவயவேன அபு²ஸந்தஸ்ஸ ந வட்டதி. வாசாய அதி⁴ட்டா²னம் பன வசீபே⁴த³ம் கத்வா வாசாய அதி⁴ட்டா²தப்³ப³ம், ஸசே ஹத்த²பாஸே ‘‘இமம் ஸங்கா⁴டிம் அதி⁴ட்டா²மீ’’தி, ஸசே அஹத்த²பாஸே ட²பிதட்டா²னம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³. ஏஸ நயோ உத்தராஸங்கே³, அந்தரவாஸகே ச. திசீவராதீ³னி ஸப்³பா³னி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி அதி⁴ட்டா²தும்பி வட்டதீதி. ஏவம் அதி⁴ட்டா²னஞ்ச அகத்வாதி அத்தோ².

த³ஸ அஹானி த³ஸாஹம். அதிமாபேதீதி அதிக்காமேதி. தஸ்ஸாதி தஸ்ஸ பி⁴க்கு²னோ. நிஸ்ஸக்³கி³யந்தி நிஸ்ஸஜ்ஜனம் நிஸ்ஸக்³கி³யம், புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதம் நாமம், நிஸ்ஸக்³கி³யமஸ்ஸ அத்தீ²தி நிஸ்ஸக்³கி³யம், கிம் தம்? பாசித்தியம், தம் அதிக்காமயதோ ஸஹனிஸ்ஸக்³கி³யவினயகம்மம் பாசித்தியம் ஸியா, அயமேத்த² அத்தோ². தம் பனேதம் சீவரம் யம் தி³வஸம் உப்பன்னம், தஸ்ஸ யோ அருணோ, ஸோ உப்பன்னதி³வஸனிஸ்ஸிதோ, தஸ்மா சீவருப்பாத³தி³வஸேன ஸத்³தி⁴ம் ஏகாத³ஸே அருணுக்³க³மனே த³ஸாஹாதிக்கமிதம் ஹோதீதி. சீவரஸ்ஸ அத்தனோ ஸந்தகதா, ஜாதிப்பமாணயுத்ததா, சி²ன்னபலிபோ³த⁴பா⁴வோ, அதிரேகசீவரதா, த³ஸாஹாதிக்கமோதி இமானேத்த² பஞ்ச அங்கா³னி. பட²மகதி²னஸிக்கா²பத³ம்.

18. இதா³னி து³தியம் த³ஸ்ஸேதும் ‘‘பி⁴க்கு²ஸம்முதியா’’த்யாதி³மாரத்³த⁴ம். யோ பி⁴க்கு²ஸம்முதிம் வஜ்ஜேத்வா காலஞ்ச வினா அதி⁴ட்டி²தம் திசீவரம் ஏகாஹம் அதிக்கமாபேதி, தஸ்ஸ நிஸ்ஸக்³கி³யம் ஸியாதி ஸம்ப³ந்தோ⁴. தத்த² பி⁴க்கு²ஸம்முதியாஞ்ஞத்ராதி யம் ஸங்கோ⁴ கி³லானஸ்ஸ பி⁴க்கு²னோ திசீவரேன விப்பவாஸஸம்முதிம் தே³தி, தம் ட²பேத்வா. திசீவரமதி⁴ட்டி²தந்தி கரணத்தே² உபயோக³வசனம், தேன திசீவராதி⁴ட்டா²னனயேன அதி⁴ட்டி²தேஸு ஸங்கா⁴டிஆதீ³ஸு யேன கேனசி சீவரேன. ஏகாஹந்தி ஏகரத்தம். அதிமாபேதீதி விப்பவஸதி, வியுத்தோ வஸதீதி அத்தோ². தஸ்ஸ அலத்³த⁴ஸம்முதிகஸ்ஸ பி⁴க்கு²னோ ஏகரத்தம்பி சீவரேன விப்பவாஸதோ நிஸ்ஸக்³கி³யம் பாசித்தியம் ஸியாதி அத்தோ². ஸமயம் வினாதி சீவரகாலம் வஜ்ஜேத்வா. அதி⁴ட்டி²தசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானேத்த² சத்தாரி அங்கா³னி. து³தியகதி²னஸிக்கா²பத³ம்.

19. இதா³னி புராணசீவரம் த³ஸ்ஸேதும் ‘‘அஞ்ஞாதிகா’’த்யாதி³ ஆரத்³த⁴ம். தத்த² அஞ்ஞாதிகாதி அஞ்ஞாதிகாய ‘‘படிஸங்கா² யோனிஸோ’’திஆதீ³ஸு விய, அஞ்ஞாதிகாய நேவ மாதுஸம்ப³ந்தே⁴ன ந பிதுஸம்ப³ந்தே⁴ன ஸம்ப³த்³தா⁴யாதி வுத்தம் ஹோதி. பி⁴க்கு²னியாதி அட்ட²வாசிககம்மேன உபஸம்பன்னாய. ஆகோடாபேதீதி பஹராபேதி. தந்தி நிஸ்ஸக்³கி³யம் பாசித்தியம் ப⁴வேய்யாதி அத்தோ². புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனம், தஸ்ஸா தோ⁴வனாதீ³னி சாதி இமானேத்த² தீணி அங்கா³னி. புராணசீவரஸிக்கா²பத³ம்.

20. கிஞ்சி மூலகந்தி கிஞ்சி பாப⁴தம். சீவராதா³னேதி சீவரஸ்ஸ ஆதா³னே சீவரப்படிக்³க³ஹணே. விகப்பனூபக³சீவரதா, பாரிவத்தகாபா⁴வோ, அஞ்ஞாதிகாய ஹத்த²தோ க³ஹணந்தி இமானேத்த² தீணி அங்கா³னி. சீவரப்படிக்³க³ஹணஸிக்கா²பத³ம்.

21. அப்பவாரிதந்தி ‘‘வதே³ய்யாத², ப⁴ந்தே, யேன அத்தோ²’’தி இச்சா²பிதம் இச்ச²ம் ருசிம் உப்பாதி³தம், ந பவாரிதந்தி அப்பவாரிதம். விஞ்ஞாபேந்தஸ்ஸாதி யாசந்தஸ்ஸ. அஞ்ஞத்ர ஸமயாதி நட்ட²சீவரகாலம் ட²பேத்வா. விகப்பனூபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி. அஞ்ஞாதகவிஞ்ஞத்திஸிக்கா²பத³ம்.

22. ரஜதந்தி ரூபியம். ஜாதரூபந்தி ஸுவண்ணம். மாஸகந்தி தயோ மாஸகா லோஹமாஸகோ தா³ருமாஸகோ ஜதுமாஸகோதி. தத்த² லோஹமாஸகோதி தம்ப³லோஹாதீ³ஹி கதமாஸகோ. தா³ருமாஸகோதி ஸாரதா³ருனா வா வேளுபேஸிகாய வா அந்தமஸோ தாலபண்ணேனபி ரூபம் சி²ந்தி³த்வா கதமாஸகோ. ஜதுமாஸகோதி லாகா²ய வா நிய்யாஸேன வா ரூபம் ஸமுட்டா²பேத்வா கதமாஸகோ. கஹாபணந்தி ஸுவண்ணமயம் வா ரூபியமயம் வா பாகதிகம் வா. க³ண்ஹேய்யாதி அத்தனோ அத்தா²ய தீ³யமானம் வா கத்த²சி டி²தம் வா நிப்பரிக்³க³ஹம் தி³ஸ்வா ஸயம் க³ண்ஹேய்ய. க³ண்ஹாபேய்யாதி ததே³வ அஞ்ஞேன கா³ஹாபேய்ய. நிஸ்ஸக்³கீ³தி க³ஹணாதீ³ஸு யம் கிஞ்சி கரோந்தஸ்ஸ அக⁴னப³த்³தே⁴ஸு வத்து²க³ணனாய நிஸ்ஸக்³கி³ ஸியாதி அத்தோ². ஸாதி³யேய்ய வாதி காயவாசாஹி அப்படிக்கி²பித்வா சித்தேன அதி⁴வாஸேய்ய. ஜாதரூபரஜதபா⁴வோ, அத்துத்³தே³ஸிகதா, க³ஹணாதீ³ஸு அஞ்ஞதரபா⁴வோதி இமானேத்த² தீணி அங்கா³னி. ரூபியப்படிக்³க³ஹணஸிக்கா²பத³ம்.

23. ரஜதாதி³சதுப்³பி³த⁴ம் அகப்பியம் கப்பியேனாபி பரிவத்தேய்ய ஸஹத⁴ம்மிகே ட²பேத்வா, நிஸ்ஸக்³கி³யம் ஸியாதி ஸம்ப³ந்தோ⁴. தத்த² அகப்பியந்தி அகப்பியவத்து²ம். கப்பியேனாதி கப்பியவத்து²னா. ஸஹத⁴ம்மிகேதி பி⁴க்கு²பி⁴க்கு²னிஸாமணேரஸாமணேரிஸிக்க²மானஸங்கா²தே பஞ்ச ஸஹத⁴ம்மிகே. ரூபியபா⁴வோ, பரிவத்தனஞ்சாதி இமானேத்த² த்³வே அங்கா³னி. ரூபியபரிவத்தனஸிக்கா²பத³ம்.

24. ‘‘இமம் பத்தம் துய்ஹம் விகப்பேமீ’’திஆதி³னா விகப்பனஞ்ச ‘‘இமம் பத்தம் அதி⁴ட்டா²மீ’’திஆதி³னா அதி⁴ட்டா²னஞ்ச அகத்வாதி அத்தோ². பமாணிகந்தி ஏத்தா²யம் வினிச்ச²யோ – அனுபஹதபுராணஸாலிதண்டு³லானம் ஸுகோட்டிதபரிஸுத்³தா⁴னம் த்³வே மக³த⁴னாளியோ க³ஹேத்வா தேஹி தண்டு³லேஹி அனுத்தண்டு³லமகிலின்னமபிண்டி³தம் ஸுவிஸத³ம் குந்த³மகுளராஸிஸதி³ஸம் அவஸ்ஸாவிதோத³னம் பசித்வா நிரவஸேஸம் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³, ததோ ஆலோபஸ்ஸ அனுரூபம் யாவசரிமாலோபப்பஹோனகம் மச்ச²மம்ஸாதி³ப்³யஞ்ஜனம் பக்கி²பிதப்³ப³ம். ஸப்பிதேலதக்கரஸகஞ்ஜிகாதீ³னி பன அக³ணனூபகா³னி ஹோந்தி. தானி ஹி ஓத³னக³திகானி நேவ ஹாபேதும், ந வட்³டே⁴தும் ஸக்கோந்தி. ஏவமேதம் ஸப்³ப³ம்பி பக்கி²த்தம் ஸசே பன பத்தஸ்ஸ முக²வட்டியா ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³தமேவ ஹோதி, அயம் உக்கட்டு²க்கட்டோ² நாம. உக்கட்ட²தோ உபட்³ட⁴ப்பமாணோ மஜ்ஜி²மோ. மஜ்ஜி²மதோ உபட்³ட⁴ப்பமாணோ ஓமகோ. தேஸம்பி வுத்தனயேனேவ பபே⁴தோ³ வேதி³தப்³போ³. இச்சேதேஸு உக்கட்டு²க்கட்டோ² ச ஓமகோமகோ சாதி த்³வே அபத்தா, ஸேஸா ஸத்த பத்தா பமாணயுத்தா நாமாதி ஏவம் பமாணேன யுத்தோ பமாணிகோ, தம் பமாணிகம். பத்தந்தி ஸத்தஸு பத்தேஸு அஞ்ஞதரம் பத்தம். பத்தஸ்ஸ அத்தனோ ஸந்தகதா, பமாணயுத்ததா, அதி⁴ட்டா²னூபக³தா, அதிரேகபத்ததா, த³ஸாஹாதிக்கமோதி இமானேத்த² பஞ்ச அங்கா³னி. பட²மபத்தஸிக்கா²பத³ம்.

25. யோ பி⁴க்கு² பஞ்சப³ந்த⁴னதோ ஊனபத்தே ஸதி பரம் பன நவம் பத்தம் விஞ்ஞாபேதி, தஸ்ஸபி பி⁴க்கு²னோ நிஸ்ஸக்³கி³யம் ஸியாதி ஸம்ப³ந்தோ⁴. தத்த² பரந்தி அஞ்ஞம், ‘‘நவம் பத்த’’ந்திமினா துல்யாதி⁴கரணம். அதி⁴ட்டா²னூபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, கதவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி. ஊனபஞ்சப³ந்த⁴னஸிக்கா²பத³ம்.

26. யோ ஸப்பிதேலாதி³கம் பன பே⁴ஸஜ்ஜம் படிக்³க³ஹேத்வா ஸத்தாஹபரமம் ஸன்னிதி⁴காரகம் பு⁴ஞ்ஜந்தோ ஸத்தாஹம் அதிக்காமேதி, தஸ்ஸ நிஸ்ஸக்³கி³யம் ஸியாதி அத்தோ². தத்த² ஸப்பிதேலாதி³கந்தி ஏத்த² ஆதி³-ஸத்³தோ³ நவனீதமது⁴பா²ணிதம் ஸங்க³ண்ஹாதி. தத்த² ஸப்பி நாம க³வாதீ³னம் ஸப்பி, யேஸம் மம்ஸம் கப்பதி, தேஸம் ஸப்பி, ததா² நவனீதம். தேலம் நாம திலஸாஸபமது⁴கஏரண்ட³வஸாதீ³ஹி நிப்³ப³த்தம். மது⁴ நாம மக்கி²காமது⁴மேவ. உச்சு²ரஸம் உபாதா³ய பன அபக்கா வா அவத்து²கபக்கா வா ஸப்³பா³பி உச்சு²விகதி பா²ணிதந்தி வேதி³தப்³ப³ம். பே⁴ஸஜ்ஜவிதா⁴னஸிக்கா²பத³ம்.

27. பி⁴க்கு²ஸ்ஸ சீவரம் த³த்வா புன தம் சீவரம் ஸகஸஞ்ஞாய அச்சி²ந்த³ந்தஸ்ஸ வா அச்சி²ந்தா³பயதோபி வா நிஸ்ஸக்³கி³யம் ஸியாதி யோஜனா. தத்த² த³த்வாதி வேய்யாவச்சாதீ³னி பச்சாஸீஸமானோ த³த்வா. அச்சி²ந்த³ந்தஸ்ஸாதி வேய்யாவச்சாதீ³னி அகரோந்தம் தி³ஸ்வா ப³லக்காரேன க³ண்ஹந்தஸ்ஸ, ததா² அச்சி²ந்தா³பயதோதி. விகப்பனூபக³சீவரதா, ஸாமம்தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் வா அச்சி²ந்தா³பனம் வாதி இமானேத்த² பஞ்ச அங்கா³னி. அச்சி²ந்த³னஸிக்கா²பத³ம்.

28. அப்பவாரிதம் அஞ்ஞாதிம் க³ஹபதிம் ஸுத்தம் யாசித்வா ஞாதிப்பவாரிதே வஜ்ஜேத்வா தந்தவாயேஹி சீவரம் வாயாபேந்தஸ்ஸ நிஸ்ஸக்³கி³யம் ஸியாதி பிண்ட³த்தோ². தத்த² ஸுத்தந்தி ச²ப்³பி³த⁴ம் கோ²மஸுத்தாதி³கம் வா தேஸம் அனுலோமம் வா. யாசியாதி சீவரத்தா²ய யாசித்வா. சீவரத்தா²ய விஞ்ஞாபிதஸுத்தம், அத்துத்³தே³ஸிகதா, அகப்பியதந்தவாயேன அகப்பியவிஞ்ஞத்தியா வாயாபனந்தி இமானேத்த² தீணி அங்கா³னி. ஸுத்தவிஞ்ஞத்திஸிக்கா²பத³ம்.

29. யோ பி⁴க்கு² ஸங்க⁴ஸ்ஸ பரிணதம் லாப⁴ம் ஜானந்தோ அத்தனோ பரிணாமேதி, தஸ்ஸ நிஸ்ஸக்³கி³யம் ஸியாதி அத்தோ². தத்த² ஜானந்தி ஜானந்தோ. லாப⁴ந்தி லபி⁴தப்³ப³ம் சீவராதி³வத்து²ம். பரிணதந்தி ஸங்க⁴ஸ்ஸ நின்னம் ஸங்க⁴ஸ்ஸ போணம் ஸங்க⁴ஸ்ஸ பப்³பா⁴ரம் ஹுத்வா டி²தம். அத்தனோ பரிணாமேதீதி ‘‘மய்ஹம் தே³தா²’’திஆதீ³னி வத³ந்தோ அத்தனி நின்னம் கரோதி. ஸங்கே⁴ பரிணதபா⁴வோ, தம் ஞத்வா அத்தனோ பரிணாமனம், படிலாபோ⁴தி இமானேத்த² தீணி அங்கா³னி. பரிணாமனஸிக்கா²பத³ம்.

நிஸ்ஸக்³கி³யனித்³தே³ஸவண்ணனா நிட்டி²தா.