நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

கு²த்³த³ஸிக்கா²-மூலஸிக்கா²

கு²த்³த³ஸிக்கா²

க³ந்தா²ரம்ப⁴கதா²

(க)

ஆதி³தோ உபஸம்பன்ன-ஸிக்கி²தப்³ப³ம் ஸமாதிகம்;

கு²த்³த³ஸிக்க²ம் பவக்கா²மி, வந்தி³த்வா ரதனத்தயம்.

தத்ராயம் மாதிகா –

(க²)

பாராஜிகா ச சத்தாரோ, க³ருகா நவ சீவரம்;

ரஜனானி ச பத்தோ ச, தா²லகா ச பவாரணா.

(க³)

காலிகா ச படிக்³கா³ஹோ, மம்ஸேஸு ச அகப்பியம்;

நிஸ்ஸக்³கி³யானி பாசித்தி, ஸமணகப்ப பூ⁴மியோ.

(க⁴)

உபஜ்ஜா²சரியவத்தானி, வச்சப்பஸ்ஸாவடா²னிகம்;

ஆபுச்ச²கரணம் நக்³கோ³, ந்ஹானகப்போ அவந்தி³யோ.

(ங)

சம்மம் உபாஹனா சேவ, அனோலோகியமஞ்ஜனீ;

அகப்பியஸயனானி, ஸமானாஸனிகோபி ச.

(ச)

அஸம்வாஸிகோ ச கம்மம், மிச்சா²ஜீவவிவஜ்ஜனா;

வத்தம் விகப்பனா சேவ, நிஸ்ஸயோ காயப³ந்த⁴னம்.

(ச²)

பத²வீ ச பரிக்கா²ரோ, பே⁴ஸஜ்ஜுக்³க³ஹதூ³ஸனம்;

வஸ்ஸூபனாயிகா சேவாவேப⁴ங்கி³யம் பகிண்ணகம்.

(ஜ)

தே³ஸனா ச²ந்த³தா³னாதி³, உபோஸத²ப்பவாரணா;

ஸம்வரோ ஸுத்³தி⁴ ஸந்தோஸோ, சதுரக்கா² விபஸ்ஸனாதி.

1. பாராஜிகனித்³தே³ஸோ

பாராஜிகா ச சத்தாரோதி –

1. மக்³க³த்தயே அனிக்கி²த்தஸிக்கோ² ஸந்த²தஸந்த²தே;

அல்லோகாஸே நிமித்தம் ஸம், திலமத்தம்பி ஸந்த²தம்.

2. அஸந்த²தமுபாதி³ண்ணம், பவேஸந்தோ சுதோத² வா;

பவேஸனட்டி²துத்³தா⁴ரபவிட்ட²க்க²ணஸாத³கோ.

3. ஆதி³யேய்ய ஹரேய்யாவஹரேய்ய இரியாபத²ம்;

கோபேய்ய டா²னா சாவேய்ய, ஸங்கேதம் வீதினாமயே.

4. அதி³ன்னம் தே²ய்யசித்தேன, ப⁴வே பாராஜிகோத² வா;

தே²ய்யாப³லகுஸச்ச²ன்னபரிகப்பாவஹாரகோ;

ப⁴ண்ட³காலக்³க⁴தே³ஸேஹி, பரிபோ⁴கே³த்த² நிச்ச²யோ.

5. மனுஸ்ஸவிக்³க³ஹம் சிச்ச, ஜீவிதா வா வியோஜயே;

ஸத்த²ஹாரகம் வாஸ்ஸ மரணசேதனோ உபனிக்கி²பே.

6. கா³ஹேய்ய மரணூபாயம், வதே³ய்ய மரணே கு³ணம்;

சுதோ பயோகா³ ஸாஹத்தி²னிஸ்ஸக்³கா³ணத்திதா²வரா.

7. இத்³தி⁴விஜ்ஜாமயா காலவத்தா²வுதி⁴ரியாபதா²;

க்ரியாவிஸேஸோ ஓகாஸோ, ச² ஆணத்தினியாமகா.

8. ஜா²னாதி³பே⁴த³ நோஸந்தமத்தனத்துபனாயிகம்;

கத்வா கோட்டா²ஸமேகேகம், பச்சுப்பன்னப⁴வஸ்ஸிதம்.

9. அஞ்ஞாபதே³ஸரஹிதம், தீ³பேந்தோனதி⁴மானிகோ;

காயேன வாசா விஞ்ஞத்தி-பதே² ஞாதே சுதோ ப⁴வே.

10. பாராஜிகேதே சத்தாரோ, அஸம்வாஸா யதா² புரே;

அப⁴ப்³பா³ பி⁴க்கு²பா⁴வாய, ஸீஸச்சி²ன்னோவ ஜீவிதும்.

11. பரியாயோ ச ஆணத்தி, ததியே து³தியே பன;

ஆணத்தியேவ ஸேஸேஸு, த்³வயமேதம் ந லப்³ப⁴தி.

12. ஸேவேதுகாமதாசித்தம், மக்³கே³ மக்³க³ப்பவேஸனம்;

இமம் மேது²னத⁴ம்மஸ்ஸ, ஆஹு அங்க³த்³வயம் பு³தா⁴.

13. மனுஸ்ஸஸம் ததா²ஸஞ்ஞீ, தே²ய்யசித்தஞ்ச வத்து²னோ;

க³ருதா அவஹாரோ ச, அதி³ன்னாதா³னஹேதுயோ.

14. பாணோ மானுஸ்ஸகோ பாண-ஸஞ்ஞிதா கா⁴தசேதனா;

பயோகோ³ தேன மரணம், பஞ்சேதே வத⁴ஹேதுயோ.

15. அஸந்ததா அத்தனி பாபமிச்ச²தா-

யாரோசனா தஸ்ஸ மனுஸ்ஸஜாதிதா;

நாஞ்ஞாபதே³ஸோ ச ததே³வ ஜானனம்,

பஞ்சேத்த² அங்கா³னி அஸந்ததீ³பனே.

16. அஸாதா⁴ரணா சத்தாரோ, பி⁴க்கு²னீனமப⁴ப்³ப³கா;

ஏகாத³ஸ ச விப்³ப⁴ந்தா, பி⁴க்கு²னீ முது³பிட்டி²கோ.

17. லம்பீ³ முகே²ன க³ண்ஹந்தோ, அங்க³ஜாதம் பரஸ்ஸ ச;

தத்தே²வாபி⁴னிஸீத³ந்தோ, சத்தாரோ அனுலோமிகா.

18. மக்³கே³ மக்³க³ப்பவேஸனா, மேது²னஸ்ஸ இதா⁴க³தா;

சத்தாரோதி சதுப்³பீ³ஸ, ஸமோதா⁴னா பராஜிகாதி.

2. ஸங்கா⁴தி³ஸேஸனித்³தே³ஸோ

க³ருகா நவாதி –

19. மோசேதுகாமதா ஸுக்க-ஸ்ஸுபக்கம்ம விமோசயம்;

அஞ்ஞத்ர ஸுபினந்தேன, ஸமணோ க³ருகம் பு²ஸே.

20. இத்தி²ஸஞ்ஞீ மனுஸ்ஸித்தி²ம், காயஸம்ஸக்³க³ராக³வா;

ஸம்பு²ஸந்தோ உபக்கம்ம, ஸமணோ க³ருகம் பு²ஸே.

21. ததா² ஸுணந்திம் விஞ்ஞுஞ்ச, மக்³க³ம் வாரப்³ப⁴ மேது²னம்;

து³ட்டு²ல்லவாசாராகே³ன, ஓபா⁴ஸேத்வா க³ரும் பு²ஸே.

22. வத்வாத்தகாமுபட்டா²ன-வண்ணம் மேது²னராகி³னோ;

வாசா மேது²னயுத்தேன, க³ரும் மேது²னயாசனே.

23. படிக்³க³ஹேத்வா ஸந்தே³ஸம், இத்தி²யா புரிஸஸ்ஸ வா;

வீமம்ஸித்வா ஹரம் பச்சா, ஸமணோ க³ருகம் பு²ஸே.

24. ஸம்யாசிதபரிக்கா²ரம், கத்வாதே³ஸிதவத்து²கம்;

குடிம் பமாணாதிக்கந்தம், அத்துத்³தே³ஸம் க³ரும் பு²ஸே.

25. மஹல்லகம் விஹாரம் வா, கத்வாதே³ஸிதவத்து²கம்;

அத்தனோ வஸனத்தா²ய, ஸமணோ க³ருகம் பு²ஸே.

26. அமூலகேன சோதே³ந்தோ, சோதா³பேந்தோவ வத்து²னா;

அந்திமேன ச சாவேதும், ஸுணமானம் க³ரும் பு²ஸே.

27. அஞ்ஞஸ்ஸ கிரியம் தி³ஸ்வா, தேன லேஸேன சோத³யம்;

வத்து²னா அந்திமேனாஞ்ஞம், சாவேதும் க³ருகம் பு²ஸே.

28. சா²தே³தி ஜானமாபன்னம், பரிவஸேய்ய தாவதா;

சரேய்ய ஸங்கே⁴ மானத்தம், பரிவுத்தோ² ச² ரத்தியோ.

சிண்ணமானத்தமப்³பே⁴ய்ய, தம் ஸங்கோ⁴ வீஸதீக³ணோ.

29. ஆபத்தினுக்கி²த்தமனந்தராய

பஹுத்ததாயோ தத²ஸஞ்ஞிதா ச;

சா²தே³துகாமோ அத² சா²த³னாதி,

ச²ன்னா த³ஸங்கே³ஹ்யருணுக்³க³மம்ஹீதி.

3. சீவரனித்³தே³ஸோ

சீவரந்தி –

30. கோ²மகோஸேய்யகப்பாஸ-ஸாணப⁴ங்கா³னி கம்ப³லம்;

கப்பியானி ச²ளேதானி, ஸானுலோமானி ஜாதிதோ.

31. து³கூலஞ்சேவ பட்டுண்ண-படம் ஸோமாரசீனஜம்;

இத்³தி⁴ஜம் தே³வதி³ன்னஞ்ச, தஸ்ஸ தஸ்ஸானுலோமிகம்.

32. திசீவரம் பரிக்கா²ர-சோளம் வஸ்ஸிகஸாடிகம்;

அதி⁴ட்டே² ந விகப்பேய்ய, முக²புஞ்ச²னனிஸீத³னம்.

33. பச்சத்த²ரணகம் கண்டு³-ச்சா²தி³மேத்த² திசீவரம்;

ந வஸேய்ய வினேகாஹம், சாதுமாஸம் நிஸீத³னம்.

34. ‘‘இமம் ஸங்கா⁴டிம்தி⁴ட்டா²மி’’, ஸங்கா⁴டிமிச்சதி⁴ட்ட²யே;

அஹத்த²பாஸமேதந்தி, ஸேஸேஸுபி அயம் நயோ.

35. அதி⁴ட்ட²ஹந்தோ ஸங்கா⁴டி-ப்பபு⁴திம் புப்³ப³சீவரம்;

பச்சுத்³த⁴ரித்வாதி⁴ட்டே²ய்ய, பத்தாதி⁴ட்ட²ஹனே ததா².

36. ஏதம் இமம் வ ஸங்கா⁴டிம், ஸம்ஸே பச்சுத்³த⁴ராமிதி;

ஏவம் ஸப்³பா³னி நாமேன, வத்வா பச்சுத்³த⁴ரே விதூ³.

37. ஸங்கா⁴டி பச்சி²மந்தேன, தீ³க⁴ஸோ முட்டி²பஞ்சகோ;

உத்தமந்தேன ஸுக³த-சீவரூனாபி வட்டதி.

38. முட்டி²த்திகஞ்ச திரியம், ததா² ஏகம்ஸிகஸ்ஸபி;

அந்தரவாஸகோ சாபி, தீ³க⁴ஸோ முட்டி²பஞ்சகோ;

அட்³ட⁴தேய்யோ த்³விஹத்தோ² வா, திரியந்தேன வட்டதி.

39. நிஸீத³னஸ்ஸ தீ³கே⁴ன, வித³த்தி² த்³வே விஸாலதோ;

தி³யட்³ட⁴ம் த³ஸா வித³த்தி², ஸுக³தஸ்ஸ வித³த்தி²யா.

40. கண்டு³ப்படிச்சா²தி³கஸ்ஸ, திரியம் த்³வே வித³த்தி²யோ;

தீ³க⁴ந்ததோ சதஸ்ஸோவ, ஸுக³தஸ்ஸ வித³த்தி²யா.

41. வஸ்ஸிகஸாடிகாயாபி, தீ³க⁴ஸோ ச² வித³த்தி²யோ;

திரியம் அட்³ட⁴தேய்யாவ, ஸுக³தஸ்ஸ வித³த்தி²யா.

42. ஏத்த² சே²த³னபாசித்தி, கரோந்தஸ்ஸ தது³த்தரி;

பச்சத்த²ரண முக²சோளா, ஆகங்கி²தப்பமாணிகா.

43. பரிக்கா²ரசோளே க³ணனா, பமாணம் வா ந தீ³பிதம்;

ததா² வத்வா அதி⁴ட்டே²ய்ய, த²விகாதி³ம் விகப்பியம்.

44. அஹதாஹதகப்பானம், ஸங்கா⁴டி தி³கு³ணா ஸியா;

ஏகச்சியோத்தராஸங்கோ³, ததா² அந்தரவாஸகோ.

45. உதுத்³த⁴டான து³ஸ்ஸானம், ஸங்கா⁴டி ச சதுக்³கு³ணா;

ப⁴வேய்யும் தி³கு³ணா ஸேஸா, பம்ஸுகூலே யதா²ருசி.

46. தீஸு த்³வே வாபி ஏகம் வா, சி²ந்தி³தப்³ப³ம் பஹோதி யம்;

ஸப்³பே³ஸு அப்பஹோந்தேஸு, அன்வாதி⁴மாதி³யேய்ய வா;

அச்சி²ன்னஞ்ச அனாதி³ண்ணம், ந தா⁴ரேய்ய திசீவரம்.

47. கா³மே நிவேஸனே உத்³தோ³-ஸிதபாஸாத³ஹம்மியே;

நாவாட்டமாளஆராமே, ஸத்த²கே²த்தக²லே து³மே.

48. அஜ்ஜோ²காஸே விஹாரே வா, நிக்கி²பித்வா திசீவரம்;

பி⁴க்கு²ஸம்முதியாஞ்ஞத்ர, விப்பவத்து²ம் ந வட்டதி.

49. ரோக³வஸ்ஸானபரியந்தா, கண்டு³ச்சா²தி³கஸாடிகா;

ததோ பரம் விகப்பேய்ய, ஸேஸா அபரியந்திகா.

50. பச்சத்த²ரண பரிக்கா²ர-முக²புஞ்ச²னசோளகம்;

த³ஸம் ப்யரத்தனாதி³ண்ணகப்பம் லப்³ப⁴ம் நிஸீத³னம்.

51. அத³ஸம் ரஜிதம்யேவ, ஸேஸசீவரபஞ்சகம்;

கப்பதாதி³ண்ணகப்பம்வ, ஸத³ஸம்வ நிஸீத³னம்.

52. அனதி⁴ட்டி²தனிஸ்ஸட்ட²ம், கப்பேத்வா பரிபு⁴ஞ்ஜயே;

ஹத்த²தீ³க⁴ம் ததோபட்³ட⁴-வித்தா²ரஞ்ச விகப்பியம்.

53. திசீவரஸ்ஸ பி⁴க்கு²ஸ்ஸ, ஸப்³ப³மேதம் பகாஸிதம்;

பரிக்கா²ரசோளியோ ஸப்³ப³ம், ததா² வத்வா அதி⁴ட்ட²தி.

54. அச்சே²த³விஸ்ஸஜ்ஜனகா³ஹவிப்³ப⁴மா,