4. பாசித்தியனித்³தே³ஸவண்ணனா

30. இதா³னி பாசித்தியம் த³ஸ்ஸேதும் ‘‘ஸம்பஜானமுஸாவாதே³’’த்யாதி³ ஆரத்³த⁴ம். தத்த² ஸம்பஜானமுஸாவாதே³தி நிமித்தத்தே² பு⁴ம்மவசனம், தஸ்மா யோ பி⁴க்கு² ஸம்பஜானந்தோ முஸா வத³தி, தஸ்ஸ தன்னிமித்தம் தம்ஹேது தப்பச்சயா பாசித்தியம் உதீ³ரிதந்தி அத்தோ². பி⁴க்கு²ஞ்ச ஓமஸந்தஸ்ஸாதி ஜாதினாமகோ³த்தகம்மஸிப்பவயஆபா³த⁴லிங்க³கிலேஸாபத்திஅக்கோஸேஸு பூ⁴தேன வா அபூ⁴தேன வா யேன கேனசி முக²ஸத்தினா பி⁴க்கு²ம் ஓவிஜ்ஜ²ந்தஸ்ஸ பி⁴க்கு²னோ பாசித்தியம் உதீ³ரிதந்தி அத்தோ². பேஸுஞ்ஞஹரணேபி சாதி பி⁴க்கு²ஸ்ஸ பேஸுஞ்ஞஹரணே, ஜாதிஆதீ³ஹி அக்கோஸவத்தூ²ஹி பி⁴க்கு²ம் அக்கோஸந்தஸ்ஸ பி⁴க்கு²னோ ஸுத்வா பி⁴க்கு²னோ பியகம்யதாய வா பே⁴தா³தி⁴ப்பாயேன வா யோ அக்குத்³தோ⁴, தஸ்ஸ பி⁴க்கு²ஸ்ஸ காயேன வா வாசாய வா பேஸுஞ்ஞஹரணவசனே பாசித்தியம் உதீ³ரிதந்தி அத்தோ².

31. ஸங்கீ³தித்தயமாருள்ஹம் பிடகத்தயம் த⁴ம்மம் பி⁴க்கு²ஞ்ச பி⁴க்கு²னிஞ்ச ட²பேத்வா அஞ்ஞேன புக்³க³லேன ஸத்³தி⁴ம் ஏகதோ பத³ம் பத³ம் ப⁴ணந்தஸ்ஸ பி⁴க்கு²னோ பத³க³ணனாய பாசித்தியம் உதீ³ரிதந்தி ஸமுதா³யத்தோ².

32. அனுபஸம்பன்னேனேவாதி பி⁴க்கு²ம் ட²பேத்வா அந்தமஸோ பாராஜிகவத்து²பூ⁴தேன திரச்சா²னக³தேனாபி ஸஹ திரத்தியம் ஸயித்வா சதுத்த²தி³வஸே அத்த²ங்க³தே ஸூரியே புன ஸஹஸேய்யாய பாசித்தி ஸியாதி ஸம்ப³ந்தோ⁴. தத்த² ஸஹஸேய்யாயாதி ஸப்³ப³ச்ச²ன்னபரிச்சி²ன்னே, யேபு⁴ய்யேனச்ச²ன்னபரிச்சி²ன்னே வா ஸேனாஸனே புப்³பா³பரியேன வா ஏகக்க²ணே வா ஏகதோ நிஸஜ்ஜனாய. தத்த² ச²த³னம் அனாஹச்ச தி³யட்³ட⁴ஹத்து²ப்³பே³தே⁴ன பாகாராதி³னா பரிச்சி²ன்னம்பி ஸப்³ப³பரிச்சி²ன்னமிச்சேவ வேதி³தப்³ப³ம்.

33. ஏகரத்தம்பி இத்தி²யா ஸத்³தி⁴ம் ஸேய்யம் கப்பயதோ தஸ்ஸ பி⁴க்கு²னோபி பாசித்தி ஸியாதி அத்தோ². தத்த² இத்தி²யாதி அந்தமஸோ தத³ஹுஜாதாயபி மனுஸ்ஸித்தி²யா. தே³ஸேந்தஸ்ஸ வினா விஞ்ஞும், த⁴ம்மஞ்ச ச²ப்பது³த்தரிந்தி விஞ்ஞும் புரிஸம் வினா இத்தி²யா ச²ப்பத³தோ உத்தரிம் த⁴ம்மம் தே³ஸேந்தஸ்ஸ பி⁴க்கு²னோ பாசித்தி ஸியாதி அத்தோ². தத்த² ‘‘ச²ப்பது³த்தரி’’ந்தி ஏத்த² ஏகோ கா³தா²பாதோ³ ஏகம் பத³ந்தி ஏவம் ஸப்³ப³த்த² பத³ப்பமாணம் வேதி³தப்³ப³ம். ச² பதா³னி ச²ப்பத³ம், ச²ப்பத³தோ உத்தரிம் ச²ப்பது³த்தரிம்.

34. பி⁴க்கு²ஸம்முதிம் ட²பேத்வா பி⁴க்கு²னோ து³ட்டு²ல்லம் வஜ்ஜம் அபி⁴க்கு²னோ வத³ந்தஸ்ஸ பாசித்தியம் உதீ³ரிதந்தி அத்தோ². தத்த² து³ட்டு²ல்லந்தி இத⁴ ஸங்கா⁴தி³ஸேஸம் அதி⁴ப்பேதம். பி⁴க்கு²ஸம்முதியாதி யம் ஸங்கோ⁴ அபி⁴ண்ஹாபத்திகஸ்ஸ பி⁴க்கு²னோ ஆயதிம் ஸம்வரத்தா²ய ஆபத்தீனஞ்ச குலானஞ்ச பரியந்தம் கத்வா வா அகத்வா வா திக்க²த்தும் அபலோகேத்வா கதிகம் கரோதி, தம் ட²பேத்வா. அபி⁴க்கு²னோதி அனுபஸம்பன்னஸ்ஸ. வத³ந்தஸ்ஸாதி ஆரோசேந்தஸ்ஸ.

35. யோ அகப்பியம் பத²விம் க²ணேய்ய வா க²ணாபேய்ய வா, தஸ்ஸ பாசித்தியம் ஸியா. தத்த² அகப்பியந்தி உத்³த⁴னபசனாதி³வஸேன வா ததா² ததா² அத³ட்³டா⁴ வா ஜாதபத²வீ வுச்சதி. ஸா திவிதா⁴ ஸுத்³த⁴மிஸ்ஸபுஞ்ஜவஸேன. தத்த² ஸுத்³த⁴பத²வீ நாம பகதியா ஸுத்³த⁴பம்ஸு வா ஸுத்³த⁴மத்திகா வா. மிஸ்ஸபத²வீ நாம யத்த² பம்ஸுதோ வா மத்திகதோ வா பாஸாணஸக்க²ரகத²லமரும்ப³வாலுகாஸு அஞ்ஞதரஸ்ஸ ததியபா⁴கோ³ ஹோதி. புஞ்ஜபத²வீ நாம அதிரேகசாதுமாஸம் ஓவட்டோ² பம்ஸுபுஞ்ஜோ வா மத்திகாபுஞ்ஜோ வா ஹோதி. வுத்தலக்க²ணேன பன மிஸ்ஸகபுஞ்ஜோபி பிட்டி²பாஸாணே டி²தஸுகு²மரஜம்பி ச தே³வே பு²ஸயந்தே ஸகிம் சே திந்தம், சாதுமாஸச்சயேன திந்தோகாஸோ புஞ்ஜபத²வீஸங்க²மேவ க³ச்ச²தி. யோ பி⁴க்கு² பூ⁴தகா³மம் விகோபேய்ய, தஸ்ஸ பாசித்தியம் ஸியாதி ஸம்ப³ந்தோ⁴. தத்த² பூ⁴தகா³மந்தி ப⁴வந்தி, அப⁴வும் சாதி பூ⁴தா, ஜாயந்தி வட்³ட⁴ந்தி ஜாதா வட்³டி⁴தா சாதி அத்தோ², கா³மோதி ராஸி, பூ⁴தானம் கா³மோ, பூ⁴தா ஏவ வா கா³மோதி பூ⁴தகா³மோ, பதிட்டி²தஹரிததிணருக்கா²தீ³னமேதம் அதி⁴வசனம். தம் பூ⁴தகா³மம். விகோபேய்யாதி சே²த³னபே⁴த³னாதீ³னி கரேய்ய.

36. யோ பி⁴க்கு² ஸங்கி⁴கம் மஞ்சாதி³ம் அஜ்ஜோ²காஸே ஸந்த²ரணாதி³கம் கத்வா ஆபுச்ச²னாதி³கம் அகத்வா யாதி, தஸ்ஸ பாசித்தி ஸியாதி அத்தோ². தத்த² ஸங்கி⁴கந்தி ஸங்க⁴ஸ்ஸ ஸந்தகம். மஞ்சாதி³ந்தி ஏத்த² ஆதி³-ஸத்³தே³ன பீட²பி⁴ஸிகோச்சா²தி³ம் ஸங்க³ண்ஹாதி. ஸந்த²ரணாதி³கந்தி ஸந்த²ரணாதி³ம் கத்வா வா காராபேத்வா வா. ஆபுச்ச²னாதி³கந்தி ஆபுச்ச²னம் வா உத்³த⁴ரணம் வா உத்³த⁴ராபனம் வாதி அத்தோ². யாதீதி க³ச்ச²தி.

37. யோ பி⁴க்கு² ஸங்கி⁴காவஸதே² ஸேய்யம் ஸந்த²ரணாதி³கம் கத்வா ஆபுச்ச²னாதி³கம் அகத்வா யாதி, தஸ்ஸ பி⁴க்கு²னோ பாசித்தி ஸியாதி அத்தோ². தத்த² ஸங்கி⁴காவஸதே²தி ஸங்க⁴ஸ்ஸ ஸந்தகே ஆவஸதே² விஹாரே க³ப்³பே⁴ வா அஞ்ஞஸ்மிம் வா ஸப்³ப³பரிச்சி²ன்னே கு³த்தஸேனாஸனே. ஸேய்யந்தி பி⁴ஸி சிமிலிகா பாவுரணம் உத்தரத்த²ரணம் பூ⁴மத்த²ரணம் தட்டிகா சம்மக்க²ண்ட³ம் நிஸீத³னம் பச்சத்த²ரணம் திணஸந்தா²ரோ பண்ணஸந்தா²ரோதி ஏவமாதி³கம். ஸந்த²ரணாதி³கந்தி தேஸு யேன கேனசி அத்த²ரணாதி³கம் கத்வா வா காராபேத்வா வா.

38-9. யோ பன பி⁴க்கு² ஜானம் ஸப்பாணகம் தோயம் பரிபு⁴ஞ்ஜயே, தஸ்ஸ பி⁴க்கு²னோ பாசித்தி ஸியாதி யோஜனா. தத்த² ஜானம் ஸப்பாணகந்தி ‘‘ஸப்பாணகமித³’’ந்தி தி³ஸ்வா வா ஸுத்வா வா யேன கேனசி ஆகாரேன ஜானந்தோ. தோயந்தி உத³கம். பரிபு⁴ஞ்ஜயேதி பரிபு⁴ஞ்ஜேய்ய. யோ பி⁴க்கு² பாரிவத்தகம் ட²பேத்வா அஞ்ஞாதிகாய பி⁴க்கு²னியா சீவரம் தே³தி, தஸ்ஸ பி⁴க்கு²னோ பாசித்தி ஸியா. சீவரப்படிக்³க³ஹணஸிக்கா²பதே³ பி⁴க்கு² படிக்³கா³ஹகோ இத⁴ பி⁴க்கு²னீ, அயம் விஸேஸோ. அஞ்ஞாதிகாய பி⁴க்கு²னியா சீவரம் ஸிப்³ப³தோபி தஸ்ஸ பி⁴க்கு²னோ பாசித்தி ஸியாதி அத்தோ². சீவரந்தி நிவாஸனபாருபனூபக³ம். ஸிப்³ப³தோதி ஸயம் ஸிப்³ப³ந்தஸ்ஸ ஸூசிம் பவேஸேத்வா நீஹரணே பயோக³க³ணனாய பாசித்தி. ஸிப்³பா³பேந்தஸ்ஸ பன ‘‘ஸிப்³பா³’’தி வுத்தோ ஸசேபி ஸப்³ப³ம் ஸூசிகம்மம் நிட்டா²பேஸி, ஏகமேவ பாசித்தி, ஆணத்தஸ்ஸ பயோக³க³ணனாய பாசித்தி ஹோதி. பவாரேத்வான அதிரித்தம் அகாரேத்வா பு⁴ஞ்ஜதோ பாசித்தி ஸியாதி அத்தோ². தத்ராயம் வினிச்ச²யோ – ஓத³னோ ஸத்து கும்மாஸோ மச்சோ² மம்ஸந்தி பஞ்சன்னம் போ⁴ஜனானம் அஞ்ஞதரம் ஸாஸபமத்தம்பி அஜ்ஜோ²ஹரித்வா போ⁴ஜனம் படிக்கே²பம் கத்வா அஞ்ஞேன இரியாபதே²ன ‘‘அலமேதம் ஸப்³ப³’’ந்தி அதிரித்தம் அகாரேத்வா பரிபு⁴ஞ்ஜதோ பாசித்தி ஹோதீதி.

40. யோ பி⁴க்கு² ஆஸாத³னாபேக்கோ² பு⁴த்தாவிம் பவாரிதம் பி⁴க்கு²ம் ‘‘ஹந்த³, பி⁴க்கு², கா²த³ வா பு⁴ஞ்ஜ வா’’தி அனதிரித்தேன பவாரேதி, போ⁴ஜனே பு⁴த்தே தஸ்ஸ பாசித்தியம் உதீ³ரிதந்தி அத்தோ². தத்த² ஆஸாத³னாபேக்கோ²தி ஆஸாத³னம் சோத³னம் மங்குகரணபா⁴வம் அபேக்க²மானோ.

41-2. யோ பி⁴க்கு² ஸன்னிதி⁴போ⁴ஜனம் பு⁴ஞ்ஜேய்ய, தஸ்ஸ பி⁴க்கு²னோ பாசித்தி ஸியாதி அத்தோ². தத்த² ஸன்னிதி⁴போ⁴ஜனந்தி படிக்³க³ஹேத்வா ஏகரத்தம் வீதினாமிதபோ⁴ஜனம். விகாலே யாவகாலிகம் பு⁴ஞ்ஜதோ வாபி பாசித்தி ஸியாதி யோஜனா. தத்த² விகாலேதி விக³தகாலே, மஜ்ஜ²ன்ஹிகாதிக்கமதோ பட்டா²ய யாவ அருணுக்³க³மனாதி அத்தோ². யாவகாலிகந்தி வனமூலப²லாதி³கம் ஆமிஸபோ⁴ஜனம். அகி³லானோ பி⁴க்கு² பணீதகம் ஸப்பிப⁴த்தாதி³கம்பி விஞ்ஞாபேத்வான பு⁴ஞ்ஜேய்ய, தஸ்ஸ பி⁴க்கு²னோ பாசித்தி ஸியாதி யோஜனா. தத்த² அகி³லானோதி கல்லகோ. பணீதகந்தி ஸப்பிதேலமது⁴பா²ணிதமச்ச²மம்ஸகீ²ரத³தி⁴ஸங்கா²தேஹி ஸம்ஸட்ட²ம் ஸத்தத⁴ஞ்ஞனிப்³ப³த்தம் பணீதபோ⁴ஜனம். யோ பி⁴க்கு² த³ந்தகட்டோ²த³கம் வஜ்ஜேத்வா அப்படிக்³க³ஹிதகம் பு⁴ஞ்ஜேய்ய, பாசித்தி ஸியாதி அத்தோ². தத்த² அப்படிக்³க³ஹிதந்தி காயேன வா காயப்படிப³த்³தே⁴ன வா க³ண்ஹந்தஸ்ஸ ஹத்த²பாஸே ட²த்வா காயகாயப்படிப³த்³த⁴னிஸ்ஸக்³கி³யானம் அஞ்ஞதரேன ந தி³ன்னம் அப்படிக்³க³ஹிதம் நாம.

43. யோ பி⁴க்கு² தித்தி²யஸ்ஸ ஸஹத்த²தோ கிஞ்சி பு⁴ஞ்ஜிதப்³ப³ம் த³தே³ய்ய, தஸ்ஸ பாசித்தி ஸியாதி ஸம்ப³ந்தோ⁴. தத்த² தித்தி²யஸ்ஸாதி அஞ்ஞதித்தி²யஸ்ஸ. கிஞ்சி பு⁴ஞ்ஜிதப்³ப³ந்தி யம் கிஞ்சி போ⁴ஜனீயம். ஸஹத்த²தோதி ஸஹத்தா². யோ பி⁴க்கு² மாதுகா³மேன ஏகதோ ரஹோ நிஸஜ்ஜம் கப்பேய்ய, தஸ்ஸ பாசித்தி ஸியாதி ஸம்ப³ந்தோ⁴. தத்த² ரஹோதி படிச்ச²ன்னே. கப்பேதி கப்பேய்ய. ஏகதோதி ஸத்³தி⁴ம்.

44. ஸுராமேரயபானேபீதி ஏத்த² பிட்டா²தீ³ஹி கதம் மஜ்ஜம் ஸுரா. புப்பா²தீ³ஹி கதோ ஆஸவோ மேரயம். யோ பி⁴க்கு² தது³ப⁴யம்பி பீ³ஜதோ பட்டா²ய குஸக்³கே³னாபி பிவதி, தஸ்ஸ தப்பானபச்சயா பாசித்தியம் உதீ³ரிதந்தி அத்தோ². அங்கு³லிபதோத³கே சாபீதி அங்கு³லீஹி உபகச்ச²காதீ³னம் க⁴ட்டனபச்சயா பாசித்தி ஸியாதி அத்தோ². ஹஸத⁴ம்மேபி சோத³கேதி உபரிகோ³ப்ப²கே உத³கே ஹஸத⁴ம்மே கீளானிமித்தம் தஸ்ஸ பாசித்தி ஸியாதி அத்தோ².

45. அனாத³ரேபி பாசித்தீதி புக்³க³லஸ்ஸ வா த⁴ம்மஸ்ஸ வா அனாத³ரகரணேபி பாசித்தி ஸியாதி அத்தோ². யோ பி⁴க்கு² உபஸம்பன்னேன பஞ்ஞத்தேன வுச்சமானோ தஸ்ஸ வா வசனம் அகத்துகாமதாய, தம் வா த⁴ம்மம் அஸிக்கி²துகாமதாய அனாத³ரியம் கரோதி, தஸ்ஸ தஸ்மிம் அனாத³ரியே பாசித்தி ஸியாதி அத்தோ². ப⁴யானகம் கத²ம் கத்வா வா ப⁴யானகம் ரூபம் த³ஸ்ஸேத்வா வா பி⁴க்கு²ம் பீ⁴ஸயதோபி பாசித்தி ஸியாதி அத்தோ².

46. யோ பி⁴க்கு² அகி³லானோ கிஞ்சி பச்சயம் ட²பேத்வா ஜோதிம் ஜலேய்ய வா ஜலாபேய்ய வா, தஸ்ஸ பாசித்தியம் ஸியாதி ஸம்ப³ந்தோ⁴. தத்த² கிஞ்சி பச்சயந்தி பதீ³புஜ்ஜலனம் வா பத்தபசனாதீ³ஸு ஜோதிகரணம் வாதி ஏவரூபம் பச்சயம் ட²பேத்வா. ஜோதிந்தி அக்³கி³ம்.

47-8. கப்பபி³ந்து³ம் அனாதா³ய நவசீவரபோ⁴கி³னோ நவம் சீவரம் பு⁴ஞ்ஜந்தஸ்ஸ பாசித்தி ஸியாதி அத்தோ². கப்பபி³ந்து³ந்தி மோரக்கி²மண்ட³லமங்கு³லபிட்டீ²னம் அஞ்ஞதரப்பமாணம் கப்பபி³ந்து³ம். அனாதா³யாதி அனாதி³யித்வா. பி⁴க்கு²னோ சீவராதி³கம் பரிக்கா²ரம் அபனேத்வா நிதே⁴ந்தஸ்ஸ வா நிதா⁴பேந்தஸ்ஸ வா ஹஸாபேக்க²ஸ்ஸ பி⁴க்கு²னோ பாசித்தி ஸியாதி அத்தோ². சீவராதி³கந்தி ஆதி³-ஸத்³தே³ன பத்தனிஸீத³னஸூசிக⁴ரகாயப³ந்த⁴னாதி³ம் ஸங்க³ண்ஹாதி. நிதே⁴ந்தஸ்ஸாதி நித³ஹந்தஸ்ஸ. ஹஸாபேக்க²ஸ்ஸாதி ஹஸாதி⁴ப்பாயஸ்ஸ. ஜானம் பாணம் ஹனே பி⁴க்கு², திரச்சா²னக³தம்பி சாதி யோ பி⁴க்கு² ‘‘பாணோ’’தி ஜானந்தோ திரச்சா²னக³தம் பாணம் கு²த்³த³கம்பி மஹந்தம்பி ஹனேய்ய, தஸ்ஸ பாசித்தியம் ஸியாதி அத்தோ².

49. சா²தே³துகாமோ சா²தே³தி, து³ட்டு²ல்லம் பி⁴க்கு²னோபி சாதி யோ பி⁴க்கு² பி⁴க்கு²னோ து³ட்டு²ல்லஸங்கா²தம் ஸங்கா⁴தி³ஸேஸம் சா²தே³துகாமோ ஹுத்வா சா²தே³தி, தஸ்ஸ பாசித்தியம் ஸியாதி அத்தோ². இத்தி²யா ஸஹ ஸம்விதா⁴ய கா³மந்தரக³தஸ்ஸ பி⁴க்கு²னோ பாசித்தியம் ஸியாதி யோஜனா.

50. பி⁴க்கு²ம் வா பஹரேய்யாதா²தி யோ பி⁴க்கு² பி⁴க்கு²ம் பஹரேய்ய, தஸ்ஸ பாசித்தியம் ஸியாதி யோஜனா. தலஸத்திகமுக்³கி³ரேதி யோ பி⁴க்கு² பஹரணாகாரம் த³ஸ்ஸேந்தோ காயம் வா காயப்படிப³த்³த⁴ம் வா உக்³கி³ரேய்ய, தஸ்ஸ பாசித்தியம் ஸியாதி அத்தோ². சோதே³ய்ய வா சோதா³பேய்ய, பி⁴க்கு²ம் அமூலகேன சாதி யோ பி⁴க்கு² பி⁴க்கு²ம் அமூலகேன ஸங்கா⁴தி³ஸேஸேன சோதே³ய்ய வா சோதா³பேய்ய வா, தஸ்ஸ பாசித்தியம் ஸியாதி அத்தோ². தத்த² அமூலகேனாதி தி³ட்டா²தி³மூலவிரஹிதேன.

51. குக்குச்சுப்பாத³னே சாபீதி ‘‘ஊனவீஸதிவஸ்ஸோ த்வம் மஞ்ஞே’’திஆதீ³னி ப⁴ணந்தோ குக்குச்சம் உப்பாதே³ய்ய, தஸ்ஸ குக்குச்சுப்பாத³னபச்சயா பாசித்தியம் ஹோதி. யோ பி⁴க்கு² ப⁴ண்ட³னத்தா²ய ப⁴ண்ட³னஜாதானம் வசனம் ஸோதும் உபஸ்ஸுதிம் யாதி, தஸ்ஸ பாசித்தியம் ஸியாதி ஸம்ப³ந்தோ⁴. தத்த² ப⁴ண்ட³னத்தா²யாதி கலஹத்தா²ய. ப⁴ண்ட³னஜாதானந்தி கலஹஜாதானம். உபஸ்ஸுதிந்தி ஸுதிஸமீபம்.

52. யோ பி⁴க்கு² ஸங்க⁴ஸ்ஸ பரிணாமிதம் யம் லாப⁴ம், தம் பரபுக்³க³லஸ்ஸ நாமேதி, தஸ்ஸ பாசித்தியம் ஸியாதி ஸம்ப³ந்தோ⁴. தத்த² நாமேதீதி பரிணாமேதி. புச்ச²ம் அகத்வாதி ‘‘விகாலே கா³மப்பவேஸனம் ஆபுச்சா²மீ’’தி வா ‘‘கா³மம் பவிஸிஸ்ஸாமீ’’தி வா அனாபுச்சி²த்வா. ஸந்தபி⁴க்கு²ந்தி அந்தோஉபசாரஸீமாய த³ஸ்ஸனூபசாரே பி⁴க்கு²ம் தி³ஸ்வா யம் ஸக்கா ஹோதி பகதிவசனேன ஆபுச்சி²தும், தாதி³ஸம் விஜ்ஜமானம் பி⁴க்கு²ம். கா³மஸ்ஸாதி கா³மம், கம்மத்தே² ஸாமிவசனம். க³தேதி ஸம்பதா³னத்தே² பு⁴ம்மவசனம், க³தஸ்ஸாதி அத்தோ². ஸந்தம் பி⁴க்கு²ம் அனாபுச்சி²த்வா விகாலே கா³மம் க³தஸ்ஸ பி⁴க்கு²னோ பாசித்தியம் ஸியாதி அத்தோ². ஸேஸம் உத்தானமேவாதி.

பாசித்தியனித்³தே³ஸவண்ணனா நிட்டி²தா.