2. க³ருகாபத்தினித்³தே³ஸவண்ணனா

10. இதா³னி ஸங்கா⁴தி³ஸேஸம் பகாஸேதும் ‘‘மோசேதுகாமசித்தேனா’’திஆதி³மாரத்³த⁴ம். தத்த² மோசேதும் காமேதீதி மோசேதுகாமம், மோசேதுகாமஞ்ச தம் சித்தஞ்சாதி மோசேதுகாமசித்தம், தேன, மோசனஸ்ஸாத³சித்தேனாதி அத்தோ². ஏகாத³ஸன்னஞ்ஹி ராகா³னம் ஏகேன மோசனஸ்ஸாதே³ன ஆபத்தி ஹோதீதி வுத்தம் ஹோதி.

தத்ரிமே ஏகாத³ஸ அஸ்ஸாதா³ மோசனஸ்ஸாதோ³ முச்சனஸ்ஸாதோ³ முத்தஸ்ஸாதோ³ மேது²னஸ்ஸாதோ³ ப²ஸ்ஸஸ்ஸாதோ³ கண்டூ³வனஸ்ஸாதோ³ த³ஸ்ஸனஸ்ஸாதோ³ நிஸஜ்ஜஸ்ஸாதோ³ வாசஸ்ஸாதோ³ கே³ஹஸிதபேமம் வனப⁴ங்கி³யந்தி. தத்த² மோசனஸ்ஸாத³சேதனாய சேதேந்தோ சேவ அஸ்ஸாதே³ந்தோ ச உபக்கமதி, முச்சதி, ஸங்கா⁴தி³ஸேஸோ, ந முச்சதி சே, து²ல்லச்சயம். ஸசே பன ஸயனகாலே ராக³பரியுட்டி²தோ ஹுத்வா ஊருனா வா முட்டி²னா வா அங்க³ஜாதம் கா³ள்ஹம் பீளேத்வா மோசனத்தா²ய ஸஉஸ்ஸாஹோ ஸுபதி, ஸுபந்தஸ்ஸ சஸ்ஸ அஸுசி முச்சதி, ஸங்கா⁴தி³ஸேஸோ. முச்சனஸ்ஸாதே³ அத்தனோ த⁴ம்மதாய முச்சமானம் அஸ்ஸாதே³தி, ந உபக்கமதி, முச்சதி, அனாபத்தி. முத்தஸ்ஸாதே³ அத்தனோ த⁴ம்மதாய முத்தே டா²னா சுதே அஸுசிம்ஹி பச்சா² அஸ்ஸாதே³ந்தஸ்ஸ வினா உபக்கமேன முச்சதி, அனாபத்தி. மேது²னஸ்ஸாதே³ மேது²னராகே³ன மாதுகா³மம் க³ண்ஹாதி, தேன அஸுசி முச்சதி, அனாபத்தி, து³க்கடம் பன ஆபஜ்ஜதி. ப²ஸ்ஸஸ்ஸாதோ³ து³விதோ⁴ அஜ்ஜ²த்திகோ பா³ஹிரோ சாதி. தத்த² அத்தனோ நிமித்தம் ‘‘த²த்³த⁴ம், முது³கந்தி ஜானிஸ்ஸாமீ’’தி வா லோலபா⁴வேன வா கீளாபயதோ அஸுசி முச்சதி, அனாபத்தி. பா³ஹிரப²ஸ்ஸஸ்ஸாதே³ பன காயஸம்ஸக்³க³ராகே³ன இத்தி²ம் பு²ஸதோ, ஆலிங்க³தோ ச அஸுசி முச்சதி, அனாபத்தி, காயஸம்ஸக்³க³ஸங்கா⁴தி³ஸேஸம் பன ஆபஜ்ஜதி.

கண்டூ³வனஸ்ஸாதே³ த³த்³து³கச்சு²பிளகபாணகாதீ³னம் அஞ்ஞதரேன க²ஜ்ஜமானம் நிமித்தம் கண்டூ³வனஸ்ஸாதே³ன கண்டூ³வதோ அஸுசி முச்சதி, அனாபத்தி. த³ஸ்ஸனஸ்ஸாதே³ இத்தி²யா அனோகாஸம் உபனிஜ்ஜா²யதோ அஸுசி முச்சதி, அனாபத்தி, து³க்கடம் பன ஹோதி. நிஸஜ்ஜஸ்ஸாதே³ மாதுகா³மேன ஸத்³தி⁴ம் ரஹோ நிஸின்னஸ்ஸ முத்தேபி அனாபத்தி, ரஹோனிஸஜ்ஜாபத்தி பன ஹோதி. வாசஸ்ஸாதே³ மாதுகா³மம் மேது²னப்படிஸம்யுத்தாஹி வாசாஹி ஓபா⁴ஸந்தஸ்ஸ முத்தேபி அனாபத்தி, து³ட்டு²ல்லவாசாஸங்கா⁴தி³ஸேஸம் பன ஆபஜ்ஜதி. கே³ஹஸிதபேமே மாதாதீ³னம் மாதாதி³பேமேன ஆலிங்க³னாதி³ம் கரோந்தஸ்ஸ முத்தேபி அனாபத்தி. வனப⁴ங்க³ம் ஸந்த²வகரணத்தா²ய இத்தி²யா பேஸிதபுப்பா²தி³வனப⁴ங்க³ஸஞ்ஞிதம் பண்ணாகாரம் ‘‘இத்த²ன்னாமாய இமம் பேஸித’’ந்தி அஸ்ஸாதே³ன ஆமஸந்தஸ்ஸ முத்தேபி அனாபத்தீதி. ஏவமேதேஸு மோசனஸ்ஸாதே³ன ஆபத்தி ஹோதீதி த³ஸ்ஸேதும் ‘‘மோசேது…பே… நா’’தி வுத்தம். அத² வா மோசேதுகாமம் சித்தம் யஸ்ஸ ஸோயம் மோசேதுகாமசித்தோ, தேன, இத்த²ம்பூ⁴தே கரணவசனம், மோசேதுகாமசித்தோ ஹுத்வாதி அத்தோ².

உபக்கம்மாதி ஹத்தா²தீ³ஸு யேன கேனசி நிமித்தே உபக்கமித்வாதி அத்தோ². விமோசயந்தி யம் அந்தமஸோ ஏகா கு²த்³த³கமக்கி²கா பிவேய்ய, தத்தகம்பி விமோசேந்தோதி அத்தோ². ஸுக்கந்தி நீலபீதலோஹிதோதா³ததக்கதேலத³ககீ²ரத³தி⁴ஸப்பிவண்ணஸங்கா²தேஸு த³ஸவிதே⁴ஸு ஸுக்கேஸு யம் கிஞ்சி ஸுக்கம். அஞ்ஞத்ர ஸுபினாதி யா ஸுபினந்தே ஸுக்கவிஸ்ஸட்டி² ஹோதி, தம் ட²பேத்வாதி அத்தோ². ஸமணோதி யோ கோசி உபஸம்பன்னோ. க³ருகந்தி ஸங்கா⁴தி³ஸேஸம். பு²ஸேதி ஆபஜ்ஜேய்யாதி அத்தோ². சேதனா உபக்கமோ முச்சனந்தி இமானேத்த² தீணி அங்கா³னீதி. ஸுக்கவிஸ்ஸட்டி²ஸிக்கா²பத³ம்.

11. இதா³னி காயஸம்ஸக்³க³ம் த³ஸ்ஸேதும் ‘‘காயஸம்ஸக்³க³ராகே³னா’’திஆதி³மாரத்³த⁴ம். பி⁴க்கு² மனுஸ்ஸித்தி²யா மனுஸ்ஸித்தி²ஸஞ்ஞீ ஹுத்வா காயஸம்ஸக்³க³ராகே³ன உபக்கமித்வா மனுஸ்ஸித்தி²ம் பராமஸந்தோ ஸங்கா⁴தி³ஸேஸம் ஆபஜ்ஜேய்யாதி யோஜனா. தத்த² காயஸம்ஸக்³க³ராகே³னாதி ஹத்த²க்³க³ஹணாதி³காயஸம்ப²ஸ்ஸேன ராகே³ன காயமிஸ்ஸராகே³ன. மனுஸ்ஸித்தி²ந்தி தத³ஹுஜாதம்பி ஜீவமானகமனுஸ்ஸித்தி²ம். பராமஸந்தி பராமஸந்தோ, இத்தீ²தி ஸஞ்ஞா இத்தி²ஸஞ்ஞா, ஸா அஸ்ஸ அத்தீ²தி இத்தி²ஸஞ்ஞீ, இத்தி²ஸஞ்ஞீ ஹுத்வாதி அத்தோ². மனுஸ்ஸித்தீ², இத்தி²ஸஞ்ஞிதா, காயஸம்ஸக்³க³ராகோ³, தேன ராகே³ன வாயாமோ, ஹத்த²க்³கா³ஹாதி³ஸமாபஜ்ஜனந்தி இமானேத்த² பஞ்ச அங்கா³னி. காயஸம்ஸக்³க³ஸிக்கா²பத³ம்.

12. இதா³னி து³ட்டு²ல்லம் த³ஸ்ஸேதும் ‘‘து³ட்டு²ல்லவாசஸ்ஸாதே³னா’’திஆதி³ ஆரத்³த⁴ம். தத்த² து³ட்டு²ல்லவாசஸ்ஸாதே³னாதி வச்சமக்³க³பஸ்ஸாவமக்³க³மேது²னத⁴ம்மப்படிஸம்யுத்தவாசஸ்ஸாத³ராகே³ன. மக்³க³ம் வாரப்³ப⁴ மேது²னந்தி வச்சமக்³க³பஸ்ஸாவமக்³கா³னம் அஞ்ஞதரம் மக்³க³ம் வா மேது²னம் வா ஆரப்³பா⁴தி அத்தோ². ஓபா⁴ஸந்தோதி அவபா⁴ஸந்தோ. மனுஸ்ஸித்தி²ந்தி விஞ்ஞும் படிப³லம் ஸுபா⁴ஸிதது³ப்³பா⁴ஸிதம் து³ட்டு²ல்லாது³ட்டு²ல்லம் ஸல்லக்க²ணஸமத்த²ம் மனுஸ்ஸித்தி²ம். ஸுணமானந்தி ஸுணந்திம். இமினா படிப³லாயபி இத்தி²யா அவிஞ்ஞத்திபதே² டி²தாய தூ³தேன வா பண்ணேன வா ஆரோசேந்தஸ்ஸ து³ட்டு²ல்லவாசாபத்தி ந ஹோதீதி தீ³பிதம் ஹோதி. மனுஸ்ஸித்தீ², இத்தி²ஸஞ்ஞிதா, து³ட்டு²ல்லவாசஸ்ஸாத³ராகோ³, தேன ராகே³ன ஓபா⁴ஸனம், தங்க²ணவிஜானனந்தி இமானேத்த² பஞ்ச அங்கா³னி. து³ட்டு²ல்லவாசஸ்ஸாத³ஸிக்கா²பத³ம்.

13. இதா³னி அத்தகாமபாரிசரியம் த³ஸ்ஸேதும் ‘‘வண்ண’’ந்த்யாதி³ வுத்தம். தத்த² யோ பி⁴க்கு² அத்தனோ காமபாரிசரியாய வண்ணம் வத்வா மேது²னராகே³ன இத்தி²ம் மேது²னம் யாசமானோ க³ரும் பு²ஸேதி ஸம்ப³ந்தோ⁴. வண்ணம் வத்வாதி கு³ணம் ஆனிஸம்ஸம் பகாஸேத்வா. அத்தனோகாமபாரிசரியாயாதி மேது²னத⁴ம்மஸங்கா²தேன காமேன பாரிசரியா காமபாரிசரியா, அத்தனோ அத்தா²ய காமபாரிசரியா அத்தனோகாமபாரிசரியா, அலுத்தஸமாஸோயம். அத² வா அத்தனோதி கத்வத்தே² ஸாமிவசனம், அத்தனோ காமிதா இச்சி²தாதி அத்தனோகாமா, ஸயம் மேது²னராக³வஸேன பத்தி²தாதி அத்தோ², அத்தனோகாமா ச ஸா பாரிசரியா சாதி அத்தனோகாமபாரிசரியா, தாய அத்தனோகாமபாரிசரியாய, ‘‘ஏதத³க்³க³ம், ப⁴கி³னி, பாரிசரியானம், யா மாதி³ஸம் ஸீலவந்தம் கல்யாணத⁴ம்மம் ப்³ரஹ்மசாரிம் ஏதேன த⁴ம்மேன பரிசரேய்யா’’தி ஏவம் வண்ணம் வத்வாதி அத்தோ². யாசதா⁴துனோ த்³விகம்மிகத்தா ‘‘இத்தி²ம் மேது²னம் யாசமானோ’’தி வுத்தம். தத்த² இத்தி²ந்தி து³ட்டு²ல்லோபா⁴ஸனே வுத்தப்பகாரம் இத்தி²ம். மனுஸ்ஸித்தீ², இத்தி²ஸஞ்ஞிதா, அத்தகாமபாரிசரியாய ராகோ³, தேன ராகே³ன வண்ணப⁴ணனம், தங்க²ணவிஜானனந்தி இமானேத்த² பஞ்ச அங்கா³னி. அத்தகாமபாரிசரியஸிக்கா²பத³ம்.

14. இதா³னி ஸஞ்சரித்தம் த³ஸ்ஸேதும் ‘‘ஸந்தே³ஸ’’ந்த்யாதி³மாரத்³த⁴ம். தத்த² பி⁴க்கு² புரிஸஸ்ஸ வா ஸந்தே³ஸம், இத்தி²யா வா ஸந்தே³ஸம் படிக்³க³ஹேத்வா வீமம்ஸித்வா பச்சாஹரந்தோ க³ருகம் பு²ஸேதி ஸம்ப³ந்தோ⁴. தத்த² ஸந்தே³ஸந்தி ‘‘க³ச்ச², ப⁴ந்தே, இத்த²ன்னாமம் மாதுரக்கி²தம் ப்³ரூஹி ‘ஹோஹி கிர இத்த²ன்னாமஸ்ஸ ப⁴ரியா த⁴னக்கீதா’’தி (பாரா. 305) ஏவம் வுத்தம் புரிஸஸ்ஸ ஸாஸனம், ‘‘க³ச்ச², ப⁴ந்தே, இத்த²ன்னாமம் புரிஸம் ப்³ரூஹி ‘அஹம் தஸ்ஸ ப⁴ரியா ப⁴விஸ்ஸாமீ’’தி (பாரா. 326-327 தோ²கம் விஸதி³ஸம்) ஏவம் வுத்தம் இத்தி²யா ஸாஸனம். படிக்³க³ண்ஹித்வாதி ‘‘ஸாது⁴ உபாஸகா’’தி வா ‘‘ஹோதூ’’தி வா ‘‘ஆரோசேஸ்ஸாமீ’’தி வா யேன கேனசி ஆகாரேன வசீபே⁴த³ம் கத்வா வா ஸீஸகம்பனாதீ³ஹி வா படிக்³க³ண்ஹித்வா ஸம்படிச்சி²த்வாதி அத்தோ². வீமம்ஸித்வாதி வுத்தப்பகாரேன ஸாஸனம் க³ஹேத்வா புரிஸஸ்ஸ வா இத்தி²யா வா தேஸம் அவஸ்ஸாரோசனகானம் மாதாபிதாபா⁴தாப⁴கி³னிஆதீ³னம் வா ஆரோசேத்வாதி அத்தோ². ஹரம்பச்சாதி ஏத்த² ‘‘பச்சாஹர’’ந்தி வத்தப்³பே³ ச²ந்த³ஹானிப⁴யா ஹர-ஸத்³த³ம் புப்³ப³னிபாதம் கத்வா வுத்தந்தி த³ட்ட²ப்³ப³ம். யத்த² பஹிதேன தத்த² க³ந்த்வா தேன ஆரோசிதா ஸா இத்தீ² ‘‘ஸாதூ⁴’’தி ஸம்படிச்ச²து வா படிக்கி²பது வா லஜ்ஜாய வா துண்ஹீ ஹோது, புன ஆக³ந்த்வா தஸ்ஸ புரிஸஸ்ஸ ஹரந்தோ ஏத்தாவதா இமாய படிக்³க³ஹணாரோசனப்பச்சாஹரணஸங்கா²தாய திவங்க³ஸம்பத்தியா ஸோ பி⁴க்கு² ஸங்கா⁴தி³ஸேஸம் ஆபஜ்ஜேய்யாதி அத்தோ². தேஸம் மனுஸ்ஸஜாதிகதா, அலம்வசனீயதா, படிக்³க³ண்ஹனவீமம்ஸனப்பச்சாஹரணானீதி இமானேத்த² பஞ்ச அங்கா³னி. ஸஞ்சரித்தஸிக்கா²பத³ம்.

15. இதா³னி அமூலகம் பகாஸேதும் ‘‘சாவேதுகாமோ’’திஆதி³மாரத்³த⁴ம். சாவேதுகாமோ பி⁴க்கு² அமூலந்திமவத்து²னா அஞ்ஞம் ஸுணமானம் பி⁴க்கு²ம் சோதே³ந்தோ வா சோதா³பேந்தோ வா க³ரும் பு²ஸேதி ஸம்ப³ந்தோ⁴. தத்த² சாவேதுகாமோதி ப்³ரஹ்மசரியா சாவேதுகாமோ. சோதே³ந்தோதி ‘‘த்வம் பாராஜிகம் த⁴ம்மம் ஆபன்னோஸி, அஸ்ஸமணோஸி, அஸக்யபுத்தியோஸீ’’திஆதீ³ஹி வசனேஹி ஸயம் சோதே³ந்தோதி அத்தோ². ஏவம் சோதே³ந்தஸ்ஸ வாசாய வாசாய ஸங்கா⁴தி³ஸேஸோ. அமூலந்திமவத்து²னாதி யம் சோத³கேன சுதி³தகம்ஹி புக்³க³லே அதி³ட்ட²ம் அஸுதம் அபரிஸங்கிதம், இத³ம் ஏதேஸம் த³ஸ்ஸனஸவனபரிஸங்கிதஸங்கா²தானம் மூலானம் அபா⁴வதோ நாஸ்ஸ மூலந்தி அமூலம், அந்திமம் வத்து² யஸ்ஸ பாராஜிகஸ்ஸ ததி³த³ம் அந்திமவத்து², அமூலஞ்ச தம் அந்திமவத்து² சேதி அமூலந்திமவத்து², தேன அமூலந்திமவத்து²னா, பி⁴க்கு²னோ அனுரூபேஸு ஏகூனவீஸதியா பாராஜிகேஸு அஞ்ஞதரேனாதி அத்தோ². சோதா³பயந்தி சோதா³பயந்தோ, தஸ்ஸ ஸமீபே ட²த்வா அஞ்ஞம் பி⁴க்கு²ம் ஆணாபேத்வா சோதா³பேந்தோ தஸ்ஸ ஆணத்தஸ்ஸ வாசாய வாசாய க³ரும் பு²ஸேதி அத்தோ². ஸுணமானந்தி இமினா பரம்முகா² தூ³தேன வா பண்ணேன வா சோதே³ந்தஸ்ஸ ந ருஹதீதி தீ³பிதம் ஹோதி. பரம்முகா² பன ஸத்தஹி ஆபத்திக்க²ந்தே⁴ஹி வத³ந்தஸ்ஸ து³க்கடம். யம் சோதே³தி, தஸ்ஸ உபஸம்பன்னோதி ஸங்க்²யூபக³மனம், தஸ்மிம் ஸுத்³த⁴ஸஞ்ஞிதா, யேன பாராஜிகேன சோதே³தி, தஸ்ஸ தி³ட்டா²தி³வஸேன அமூலகதா, சாவனாதி⁴ப்பாயேன ஸம்முகா² சோத³னா, தஸ்ஸ தங்க²ணவிஜானனந்தி இமானேத்த² பஞ்ச அங்கா³னி. அமூலகஸிக்கா²பத³ம்.

16. இதா³னி அஞ்ஞபா⁴கி³யம் த³ஸ்ஸேதும் ‘‘லேஸமத்த’’ந்திஆதி³மாஹ. தத்த² லேஸமத்தமுபாதா³யாதி ஜாதினாமகோ³த்தலிங்கா³பத்திபத்தசீவரூபஜ்ஜா²யாசரியஸேனாஸனலேஸஸங்கா²தேஸு த³ஸஸு லேஸேஸு யோ தஸ்மிம் புக்³க³லே தி³ஸ்ஸதி, தம் லேஸமத்தம் உபாதா³ய நிஸ்ஸாய பி⁴க்கு²ம் ப்³ரஹ்மசரியா சாவேதுகாமோ அமூலந்திமவத்து²னா ஸுணமானம் பி⁴க்கு²ம் சோதே³ந்தோ க³ரும் பு²ஸேதி அத்தோ². கத²ம்? அஞ்ஞோ க²த்தியஜாதிகோ இமினா சோத³கேன பாராஜிகம் த⁴ம்மம் அஜ்ஜா²பஜ்ஜந்தோ தி³ட்டோ² ஹோதி, ஸோ அஞ்ஞம் அத்தனோ வேரிம் க²த்தியஜாதிகம் பி⁴க்கு²ம் பஸ்ஸித்வா தம் க²த்தியஜாதிலேஸம் க³ஹேத்வா ஏவம் ‘‘க²த்தியோ மயா தி³ட்டோ² பாராஜிகம் த⁴ம்மம் அஜ்ஜா²பஜ்ஜந்தோ, த்வம் க²த்தியோ பாராஜிகம் த⁴ம்மம் ஆபன்னோஸீ’’தி வா ‘‘த்வம் ஸோ க²த்தியோ, நாஞ்ஞோ, பாராஜிகம் த⁴ம்மம் அஜ்ஜா²பன்னோஸீ’’தி வா சோதே³தி, ஏவம் நாமலேஸாத³யோபி வேதி³தப்³பா³. அங்கா³னி பனேத்த² அனந்தரஸதி³ஸானி. அஞ்ஞபா⁴கி³யஸிக்கா²பத³ம்.

க³ருகாபத்தினித்³தே³ஸவண்ணனா நிட்டி²தா.