6. வத்தாதி³கண்ட³னித்³தே³ஸோ

96. உபஜ்ஜா²சரியவத்தஞ்ச, க³மிகாக³ந்துகம்பி ச;

ஸேனாஸனாதி³வத்தஞ்ச, காதப்³ப³ம் பியஸீலினா.

97. ஹத்த²பாஸே டி²தோ கிஞ்சி, க³ஹிதப்³ப³ம் த³தே³ திதா⁴;

க³ஹேதுகாமோ க³ண்ஹேய்ய, த்³விதா⁴யம் ஸம்படிக்³க³ஹோ.

98. ஸங்கா⁴டிமுத்தராஸங்க³ம், ததா² அந்தரவாஸகம்;

‘‘ஏதம் இமம் அதி⁴ட்டா²மி’’, ததா² ‘‘பச்சுத்³த⁴ராமி’’தி.

99. ‘‘இமம் இமானி ஏதானி, ஏதம்பி சீவர’’ந்தி வா;

‘‘பரிக்கா²ரசோளானீ’’தி, ததா² ‘‘பச்சுத்³த⁴ராமி’’தி.

100. ‘‘ஏதம் இமம் அதி⁴ட்டா²மி, பத்தம் பச்சுத்³த⁴ராமி’’தி;

ஏவம் பச்சுத்³த⁴ரேதி⁴ட்டே², சீவராதி³ம் யதா²விதி⁴.

101. ஸஞ்சரித்தம் வினா ஸேஸா, ஸசித்தா க³ருகந்திமா;

அச்சி²ன்னம் பரிணதம் ஹித்வா, நிஸ்ஸக்³கி³யமசித்தகம்.

102. பத³ஸோத⁴ம்மம் து³வே ஸேய்யா, இத்தி²யா த⁴ம்மதே³ஸனா;

து³வே ஸேனாஸனானீபி, ஸிப்³ப³னம் சீவரஸ்ஸபி.

103. பவாரிதம் ஸுராபானம், பஞ்சஸன்னிதி⁴ஆதி³கம்;

ஜோதினுஜ்ஜாலனஞ்சேவ, கப்பபி³ந்து³மனாதி³கம்;

கா³மப்பவேஸனந்தேதே, பாசித்தீஸு அசித்தகா.

104. பகிண்ணகேஸு உத்³தி³ஸ்ஸ-கதம் ஹித்வாஞ்ஞமம்ஸகம்;

ஏகத்த²ரணபாவுரணம், ஏகமஞ்சே துவட்டனம்;

ஏகதோ பு⁴ஞ்ஜனஞ்சாபி, நச்சகீ³தாதி³ஸத்தபி.

105. அகாயப³ந்த⁴னஞ்சாபி, பத்தஹத்த²கவாடகம்;

அசித்தகமித³ம் ஸப்³ப³ம், ஸேஸமேத்த² ஸசித்தகம்.

106. வீதிக்கமனசித்தேன, ஸசித்தகமசித்தகம்;

பஞ்ஞத்திஜானனேனாபி, வத³ந்தாசரியா ததா².

107. புப்³ப³கரணாதி³கம் கத்வா, உபோஸத²ப்பவாரணம்;

நவதா⁴ தீ³பிதம் ஸப்³ப³ம், காதப்³ப³ம் பியஸீலினா.

108. ஸம்மஜ்ஜனீ பதீ³போ ச, உத³கம் ஆஸனேன ச;

உபோஸத²ஸ்ஸ ஏதானி, புப்³ப³கரணந்தி வுச்சதி.

109. ச²ந்த³பாரிஸுத்³தி⁴உதுக்கா²னம், பி⁴க்கு²க³ணனா ச ஓவாதோ³;

உபோஸத²ஸ்ஸ ஏதானி, புப்³ப³கிச்சந்தி வுச்சதி.

110. உபோஸதோ² யாவதிகா ச பி⁴க்கூ² கம்மப்பத்தா,

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி,

பத்தகல்லந்தி வுச்சதி.

111. புப்³ப³கரணபுப்³ப³கிச்சானி ஸமாபேத்வா தே³ஸிதாபத்திகஸ்ஸ ஸமக்³க³ஸ்ஸ பி⁴க்கு²ஸங்க⁴ஸ்ஸ அனுமதியா பாதிமோக்க²ம் உத்³தி³ஸிதும் ஆராத⁴னம் கரோம.

112. பாரிஸுத்³தி⁴அதி⁴ட்டா²ன-ஸுத்துத்³தே³ஸவஸா திதா⁴;

க³ணபுக்³க³லஸங்கா⁴ ச, தம் கரேய்யும் யதா²க்கமம்.

113. சாதுத்³த³ஸோ பன்னரஸோ, ஸாமக்³கீ³ தி³னதோ திதா⁴;

தி³னபுக்³க³லகத்தப்³பா³-காரதோ தே நவேரிதா.

114. தயோ தயோதி கத்வான, தி³னபுக்³க³லபே⁴த³தோ;

தேவாசீத்³வேகவாசீதி, நவ வுத்தா பவாரணா.

115. கத்திகந்திமபக்க²ம்ஹா, ஹேமம் ப²க்³கு³னபுண்ணமா;

தஸ்ஸ அந்திமபக்க²ம்ஹா, கி³ம்ஹம் ஆஸாள்ஹிபுண்ணமா;

வஸ்ஸகாலம் ததோ ஸேஸம், சதுவீஸதுபோஸதா².

116. சாதுத்³த³ஸா ச² ஏதேஸு, பக்கா² ததியஸத்தமா;

ஞேய்யா பன்னரஸா ஸேஸா, அட்டா²ரஸ உபோஸதா².

117. ‘‘ச²ந்த³ம் த³ம்மி, ச²ந்த³ம் மே ஹர, ச²ந்த³ம் மே ஆரோசேஹீ’’தி ச²ந்த³ம் தா³தப்³ப³ம்.

118. ‘‘பாரிஸுத்³தி⁴ம் த³ம்மி, பாரிஸுத்³தி⁴ம் மே ஹர, பாரிஸுத்³தி⁴ம் மே ஆரோசேஹீ’’தி பாரிஸுத்³தி⁴ தா³தப்³பா³.

119. ‘‘பவாரணம் த³ம்மி, பவாரணம் மே ஹர, பவாரணம் மே ஆரோசேஹி, மமத்தா²ய பவாரேஹீ’’தி பவாரணா தா³தப்³பா³.

120. ஆபத்திதே³ஸகேன ‘‘அஹம், ப⁴ந்தே, ஸம்ப³ஹுலா நானாவத்து²கா ஆபத்தியோ ஆபஜ்ஜிம், தா தும்ஹமூலே படிதே³ஸேமீ’’தி வத்வா படிக்³க³ண்ஹந்தேன ‘‘பஸ்ஸஸி, ஆவுஸோ, தா ஆபத்தியோ’’தி வுத்தே ‘‘ஆம, ப⁴ந்தே, பஸ்ஸாமீ’’தி வத்வா புன படிக்³க³ண்ஹந்தேன ‘‘ஆயதிம், ஆவுஸோ, ஸம்வரேய்யாஸீ’’தி வுத்தே ‘‘ஸாது⁴, ஸுட்டு², ப⁴ந்தே ஸம்வரிஸ்ஸாமீ’’தி திக்க²த்தும் வத்வா தே³ஸேதப்³ப³ம்.

121. வேமதிம் ஆரோசேந்தேன ‘‘அஹம், ப⁴ந்தே, ஸம்ப³ஹுலாஸு நானாவத்து²காஸு ஆபத்தீஸு வேமதிகோ, யதா³ நிப்³பே³மதிகோ ப⁴விஸ்ஸாமி, ததா³ தா ஆபத்தியோ படிகரிஸ்ஸாமீ’’தி திக்க²த்தும் வத்வா ஆரோசேதப்³ப³ம்.

122. ‘‘அஜ்ஜ மே உபோஸதோ² ‘பன்னரஸோ, சாதுத்³த³ஸோ’தி வா அதி⁴ட்டா²மீ’’தி திக்க²த்தும் வத்வா புக்³க³லேன அதி⁴ட்டா²னுபோஸதோ² காதப்³போ³.

123. த்³வீஸு பன தே²ரேன ‘‘பரிஸுத்³தோ⁴ அஹம் ஆவுஸோ, ‘பரிஸுத்³தோ⁴’தி மம் தா⁴ரேஹீ’’தி திக்க²த்தும் வத்தப்³ப³ம். நவகேனபி ததே²வ வத்தப்³ப³ம். ‘‘ப⁴ந்தே, தா⁴ரேதா²’’தி வசனம் விஸேஸோ.

124. தீஸு பன ‘‘ஸுணந்து மே ஆயஸ்மந்தா, அஜ்ஜுபோஸதோ² பன்னரஸோ, யதா³யஸ்மந்தானம் பத்தகல்லம், மயம் அஞ்ஞமஞ்ஞம் பாரிஸுத்³தி⁴உபோஸத²ம் கரேய்யாமா’’தி ஞத்திம் ட²பேத்வா படிபாடியா வுத்தனயேன பாரிஸுத்³தி⁴உபோஸதோ² காதப்³போ³.

125. ‘‘அஜ்ஜ மே பவாரணா ‘சாதுத்³த³ஸீ, பன்னரஸீ’தி வா அதி⁴ட்டா²மீ’’தி திக்க²த்தும் வத்வா ஏகேன பவாரேதப்³ப³ம்.

126. த்³வீஸு பன தே²ரேன ‘‘அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி திக்க²த்தும் வத்வா பவாரேதப்³ப³ம். நவகேனாபி ததே²வ வத்தப்³ப³ம். ‘‘ப⁴ந்தே’’தி வசனம் விஸேஸோ.

127. தீஸு வா சதூஸு வா பன ‘‘ஸுணந்து மே ஆயஸ்மந்தா, அஜ்ஜ பவாரணா பன்னரஸீ, யதா³யஸ்மந்தானம் பத்தகல்லம், மயம் அஞ்ஞமஞ்ஞம் பவாரேய்யாமா’’தி ஞத்திம் ட²பேத்வா தே²ரேன ‘‘அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி திக்க²த்தும் வத்வா பவாரேதப்³ப³ம். நவகேஹிபி ததே²வ படிபாடியா பவாரேதப்³ப³ம். ‘‘ப⁴ந்தே’’திவசனம் விஸேஸோ.

128. சதூஹி அதி⁴கேஸு பன ‘‘ஸுணாது மே ஆவுஸோ ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி ஞத்திம் ட²பேத்வா வுட்³ட⁴தரேன ‘‘ஸங்க⁴ம், ஆவுஸோ, பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி திக்க²த்தும் வத்வா பவாரேதப்³ப³ம். நவகேஹிபி ததே²வ படிபாடியா ‘‘ஸங்க⁴ம், ப⁴ந்தே, பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி திக்க²த்தும் வத்வா பவாரேதப்³ப³ம்.

மூலஸிக்கா² நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ