7. பவாரணானித்³தே³ஸவண்ணனா

73. இதா³னி பவாரணாவிதி⁴ம் த³ஸ்ஸேதும் ‘‘பவாரணா’’தி (பாசி. 238-239; பாசி. அட்ட². 238-239; கங்கா². அட்ட². பட²மபவாரணாஸிக்கா²பத³வண்ணனா) பத³ம் உத்³த⁴டம். தத்த² இரியாபதே²னாதி டா²னக³மனஸயனனிஸஜ்ஜானம் அஞ்ஞதரேன இரியாபதே²னாதி அத்தோ². ததோ இரியாபத²தோ அஞ்ஞேன இரியாபதே²ன அனதிரித்தகம் பரிபு⁴ஞ்ஜேய்ய சே, பாசித்தியந்தி அத்தோ². பாசித்தினதிரித்தகந்தி பாசித்தி அனதிரித்தகம்.

74. இதா³னி யேஹி அங்கே³ஹி பவாரணா ஹோதி, தானி அங்கா³னி த³ஸ்ஸேதும் ‘‘அஸன’’ந்திஆதி³மாஹ. தத்த² அஸனந்தி ஏதேன அவிப்பகதபோ⁴ஜனதா வுத்தா, பு⁴ஞ்ஜமானோ ச ஸோ புக்³க³லோ ஹோதீதி அத்தோ². போ⁴ஜனஞ்சேவாதி யம் பு⁴ஞ்ஜந்தோ பவாரேதி, தம் ஓத³னோ கும்மாஸோ ஸத்து மச்சோ² மம்ஸந்தி இமேஸு அஞ்ஞதரம் ஹோதீதி அத்தோ². அபி⁴ஹாரோதி தா³யகோ தஸ்ஸ தம் ப⁴த்தம் காயேன அபி⁴ஹரதீதி அத்தோ², வாசாபி⁴ஹாரோ பன ந க³ஹேதப்³போ³. ஸமீபதாதி தா³யகோ பவாரணப்பஹோனகபோ⁴ஜனம் க³ஹேத்வா அட்³ட⁴தேய்யஹத்த²ப்பமாணே ஓகாஸே ஹோதீதி அத்தோ². காயவாசாபடிக்கே²போதி ஹத்த²பாஸே டி²தேன அபி⁴ஹடம் பி⁴க்க²ம் காயேன வா வாசாய வா படிக்கி²பேய்யாதி அத்தோ². ஏத்த² பன ஸசே பி⁴க்கு² நிஸின்னோ ஹோதி, ஆனிஸத³ஸ்ஸ பாரிமந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸாபி ததா²வித⁴ஸ்ஸ ட²பேத்வா பஸாரிதஹத்த²ம் யம் தஸ்ஸ ஆஸன்னதரம் அங்க³ம், தஸ்ஸ வஸேன பரிச்சே²தோ³ காதப்³போ³. பஞ்ச அங்கா³ பவாரணாதி ‘‘அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதீ’’தி (பாசி. 239; பரி. 428) பாளியம் வுத்தேஹி இமேஹி பஞ்சஹி அங்கே³ஹி பவாரணா ஹோதீதி அத்தோ².

75. இதா³னி ஏதேஸு பஞ்சஸு போ⁴ஜனம் த³ஸ்ஸேதும் ‘‘ஓத³னோ’’திஆதி³ வுத்தம். இதா³னி ஓத³னாத³யோ இமேஹி நிப்³ப³த்தாதி த³ஸ்ஸேதும் ‘‘ஸாலீ’’திஆதி³மாஹ. தத்த² ஸேதரத்தகாளபே⁴தா³ ஸப்³பா³பி கங்கு³ஜாதியோ கங்கூ³தி க³ஹேதப்³பா³. காளஸேதா குத்³ரூஸவரகா. இமேஸம் ஸத்தன்னம் த⁴ஞ்ஞானம் ஓத³னோ ச போ⁴ஜ்ஜயாகு³ ச ஓத³னோ நாமாதி அத்தோ².

76. ஸாமாகாதி³திணம் (பாசி. அட்ட². 238-239) குத்³ரூஸகே ஸங்க³ஹம் க³தந்தி அத்தோ². வரகசோரகோ வரகே ஸங்க³ஹம் க³தோ, ஸாலியஞ்சேவ நீவாரோ ஸங்க³ஹம் க³தோ ஸேதத்தாதி வத³ந்தி. இமேஸம் வுத்தப்பகாரானம் ஸானுலோமானம் ஸத்தன்னம் த⁴ஞ்ஞானம் தண்டு³லே க³ஹேத்வா ‘‘யாகு³ம் பசிஸ்ஸாமா’’தி வா ‘‘ப⁴த்தம் பசிஸ்ஸாமா’’தி வா யம் கிஞ்சி ஸந்தா⁴ய பசந்தி, ஸசே உண்ஹம் வா ஸீதலம் வா பு⁴ஞ்ஜந்தானம் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, அயம் ஓத³னோ நாம, பவாரணம் ஜனேதி. யோபி பாயாஸோ வா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஆவிஜ்ஜி²த்வா பிவிதும் ஸக்கா, க³ஹிதோகாஸேபி ஓதி⁴ம் ந த³ஸ்ஸேதி, அயம் பவாரணம் ந ஜனேதி. உஸுமாய பன விக³தாய க⁴னபா⁴வம் க³ச்ச²தி, ஓதி⁴ பஞ்ஞாயதி, புன பவாரணம் ஜனேதி, புப்³பே³ தனுகபா⁴வோ ந ரக்க²தி. ப⁴த்தே பன உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி வத³ந்தி, கிஞ்சாபி தனுகா ஹோதி, பவாரணம் ஜனேதியேவ தஸ்மிம் யாகு³யா நத்தி²பா⁴வதோ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி.

77. ப⁴ட்ட²த⁴ஞ்ஞமயோதி ஸத்தவிதா⁴னிபி த⁴ஞ்ஞானி க³ஹேத்வா க²ரபாகப⁴ஜ்ஜிதானம் தேஸம் தண்டு³லே கோட்டேத்வா கதசுண்ணகுண்ட³கானி ஸத்து நாம. ஸமபாகப⁴ஜ்ஜிதானம் பன ஆதபஸுக்கா²னம் வா தண்டு³லானம் சுண்ணகுண்ட³கானி ஸத்துஸங்க்²யம் ந க³ச்ச²ந்தி. யவஸம்ப⁴வோதி அஞ்ஞேஹி பன முக்³கா³தீ³ஹி கதகும்மாஸோ ந பவாரேதீதி அதி⁴ப்பாயோ. உத³கஸம்ப⁴வோதி இமினா கக்கடகஸிப்பிகஸம்பு³காத³யோபி ஸங்க³ஹம் க³ச்ச²ந்தி. ஸசே யாகு³பானகாலே ஏகஸ்மிம் பா⁴ஜனே ட²பேத்வா மச்ச²மம்ஸம் வா கா²த³ந்தி, தே சே அகா²த³ந்தோ அஞ்ஞம் பவாரணப்பஹோனகம் படிக்கி²பதி, ந பவாரேதி. கா²தி³தேபி ஸசே முகே² அவஸிட்ட²ம் நத்தி², ததா³ படிக்கி²பந்தோபி ந பவாரேதியேவ. ஸசே பத்தே அவஸிட்ட²ம் அத்தி², முகே² நத்தி², தஞ்சே அகா²தி³துகாமோ ஹோதி, அஞ்ஞத்த² வா க³ந்த்வா கா²தி³துகாமோ, தஸ்மிம் க²ணே படிக்கி²பந்தோபி ந பவாரேதியேவ.

78. போ⁴ஜனந்தி (பாசி. அட்ட². 238-239) பஞ்சஸு போ⁴ஜனேஸு யம் கிஞ்சி போ⁴ஜனம். கப்பியம் வா அகப்பியம் வா பு⁴ஞ்ஜந்தோதி ஸம்ப³ந்தோ⁴. நிஸேத⁴யந்தி காயேனாபி⁴ஹடம் அங்கு³லிசலனாதி³னா வா ப⁴முகவிகாரேன வா குத்³த⁴பா⁴வேன ஓலோகேன வா படிக்கி²பந்தோ காயேன வா ‘‘அல’’ந்தி வா ‘‘ந க³ண்ஹாமீ’’தி வா ‘‘மா ஆகிரா’’தி வா ‘‘அபக³ச்சா²’’தி வா ஆதி³னா நயேன படிக்கி²பந்தோ வாசாய வா நிஸேத⁴யந்தோதி அத்தோ². கப்பந்தி கப்பியபோ⁴ஜனமேவ படிக்கி²பந்தோ ஸோ பவாரேதி, அகப்பியமம்ஸம் வா போ⁴ஜனம் வா படிக்கி²பந்தோ ந பவாரேதி. கஸ்மா? தஸ்ஸ படிக்கி²பிதப்³ப³ட்டா²னே டி²தத்தா. ஸசே கப்பியபோ⁴ஜனம் பு⁴ஞ்ஜமானோ அகப்பியம் படிக்கி²பதி, ந பவாரேதி. கஸ்மா? தஸ்ஸ படிக்கி²பிதப்³ப³தோ. இதா³னி மிஸ்ஸகனயம் த³ஸ்ஸேதும் ‘‘தன்னாமேனா’’திஆதி³ வுத்தம். தத்ராயம் பிண்ட³த்தோ² – தன்னாமேன வா இமந்தி வா அபி⁴ஹடம் கப்பியம் நிஸேத⁴யம் பவாரேய்யாதி. கிம் வுத்தம் ஹோதி? யோ பன மச்ச²மம்ஸமிஸ்ஸம் (கங்கா². அட்ட². பட²மபவாரணாஸிக்கா²பத³வண்ணனா; பாசி. அட்ட². 238-239) யாகு³ம் ப்³யஞ்ஜனம் வா ஆஹரித்வா ‘‘மச்ச²ம் க³ண்ஹத², மம்ஸம் க³ண்ஹதா²’’தி வத³தி, தம் படிக்கி²பதோ பவாரணா ஹோதி. ஸசே ‘‘யாகு³ம் க³ண்ஹத², ரஸப்³யஞ்ஜனம் க³ண்ஹதா²’’தி வத³தி, தம் படிக்கி²பதோ பவாரணா ந ஹோதி. கஸ்மா? தஸ்ஸாபி அத்தி²தாய. ஸசே ‘‘இமம் க³ண்ஹதா²’’தி ஸவத்து²கம் கத்வா தே³தி, தம் படிக்கி²பதோ பவாரணா ஹோதி. ப⁴த்தமிஸ்ஸகேபி ஏஸேவ நயோ. ஸசே அஞ்ஞஸ்ஸ அபி⁴ஹடம் படிக்கி²பதி, பவாரணா நத்தி²யேவ.

79-80. இதா³னி பவாரணம் அஜனேந்தே த³ஸ்ஸேதும் ‘‘லாஜா’’திஆதி³ வுத்தம். ஏத்த² லாஜா தம்ஸத்துப⁴த்தானீதி (கங்கா². அட்ட². பட²மபவாரணாஸிக்கா²பத³வண்ணனா) லாஜா ச லாஜேஹி கதஸத்துப⁴த்தானி சாதி அத்தோ². மச்ச²மம்ஸபூவேஸு பன பவாரணா ஹோதி, தஸ்மா ‘‘ஸுத்³த⁴க²ஜ்ஜகோ’’தி வுத்தம். ப⁴ட்ட²பிட்ட²ந்தி புப்³பே³ ஆமகம் பச்சா² ப⁴ஜ்ஜிதப்³ப³ந்தி வுத்தம் ஹோதி. வேளுஆதீ³னம் வுத்தாவஸேஸானம் ப⁴த்தந்தி ஸம்ப³ந்தோ⁴. ரஸயாகு³ ரஸோ பக்கயாகு³. மம்ஸாதீ³ஹி அமிஸ்ஸிதா ஸுத்³த⁴யாகு³. புது²காமயம் பன யம் கிஞ்சி பவாரணம் ந ஜனேதி.

81. வுட்டா²யாதி (பாசி. அட்ட². 238-239) ஆஸனா உட்டா²ய அதிரித்தம் ந காதப்³ப³ந்தி ஸம்ப³ந்தோ⁴. ஸசே பவாரேத்வா ஆஸனா ந வுட்டா²தி பி⁴க்கு², தஸ்ஸாபி அதிரித்தம் காதும் லப⁴தி. அபு⁴த்தேன ச போ⁴ஜனந்தி யேன பஞ்சன்னம் போ⁴ஜனானம் அஞ்ஞதரம் போ⁴ஜனம் அந்தமஸோ குஸக்³கே³னாபி ந பு⁴த்தம், தேனாபி அதிரித்தம் ந காதப்³ப³ந்தி அத்தோ². யேன பன அருணுக்³க³மேபி பு⁴த்தம் ஹோதி, ஸோ சே அபவாரிதோ ஆஸனா வுட்டி²தோபி மஜ்ஜ²ன்ஹிகஸமயேபி புன கிஞ்சி அபு⁴த்வாபி காதும் லப⁴தி. யேன யம் வா புரே கதந்தி யேன யம் வா புப்³பே³ கதம், தேன தம்பி பச்சா² ந காதப்³ப³ம். அஞ்ஞேன பன தம் காதும் வட்டதீதி வத³ந்தி.

82. யம் ப²லம் வா கந்த³மூலம் வா பஞ்சஹி ஸமணகப்பேஹி கதகப்பியம் அஞ்ஞம்பி கப்பியபோ⁴ஜனம் வா கப்பியமம்ஸம் வா, இத³ம் கப்பியம் நாம, வுத்தப்பகாரவிபரீதம் அகப்பியம் நாம, தஸ்மிம் அதிரித்தகரணம் ந ருஹதி, யஞ்ச படிக்³க³ஹேத்வா ந க³ஹிதம், தஸ்மிம்பி ந ருஹதி, தேன வுத்தம் ‘‘கப்பியம் க³ஹிதஞ்சேவா’’தி. உச்சாரிதந்தி கப்பியம் காரேதும் ஆக³தேன பி⁴க்கு²னா ஈஸகம்பி உக்கி²த்தம் வா அபனமிதம் வாதி அத்தோ². ஹத்த²பாஸதோ ப³ஹி டி²தம் காதும் ந வட்டதி, தேன வுத்தம் ‘‘ஹத்த²பாஸக³’’ந்தி. அதிரித்தம் கரோந்தேவந்தி அதிரித்தம் கரோந்தோ ‘‘அலமேதம் ஸப்³ப³’’ந்தி வசீபே⁴த³ம் கத்வா ஏவம் பா⁴ஸதூதி அத்தோ². ‘‘அலமேதம் ஸப்³ப³’’ந்தி திக்க²த்தும் வத்தப்³ப³ம், அயம் கிர ஆசிண்ணோ. வினயத⁴ரா கிர பன ‘‘ஸகிம் ஏவ வத்தப்³ப³’’ந்தி வத³ந்தி. அலமேதம் ஸப்³ப³ந்தி இத³ம்பி வோ அதி⁴கம், இதோ அஞ்ஞம் ந லச்ச²ஸீதி அத்தோ².

83. அனுபஸம்பன்னஹத்த²க³ந்தி கப்பியம் கரோந்தேன பன அனுபஸம்பன்னஸ்ஸ ஹத்தே² டி²தம்யேவ ந காதப்³ப³ம், தம் பன அஞ்ஞேன பி⁴க்கு²னா படிக்³க³ஹாபேத்வா தஸ்ஸ ஹத்தே² டி²தம் அதிரித்தம் கத்வா அனுபஸம்பன்னஸ்ஸ தா³தும் வட்டதி. அத்தனா ஆக³ந்த்வா அஞ்ஞஸ்ஸ ஹத்தே² ச பேஸயித்வாபி காரேதும் லப்³ப⁴தேதி அத்தோ². தம் பன அதிரித்தகாரகம் ட²பேத்வா அஞ்ஞோ ஸப்³போ³ பவாரிதோபி அப்பவாரிதோபி பு⁴ஞ்ஜிதும் லப⁴தீதி அத்தோ². ஸசே பவாரிதோ பரிபு⁴ஞ்ஜதி, யதா² அகதேன மிஸ்ஸம் ந ஹோதி, ததா² முக²ஞ்ச ஹத்த²ஞ்ச ஸுத்³த⁴ம் கத்வா பு⁴ஞ்ஜிதப்³ப³ம். கி³லானஸ்ஸ பு⁴த்தாவஸேஸம்பி தஸ்ஸ ‘‘அஜ்ஜ வா ஸ்வே வா கா²தி³ஸ்ஸதீ’’தி ஆஹடம்பி அனதிரித்தகதம் பு⁴ஞ்ஜிதும் வட்டதீதி. பவாரணாவினிச்ச²யோ.

பவாரணானித்³தே³ஸவண்ணனா நிட்டி²தா.