8. காலிகனித்³தே³ஸவண்ணனா

84. இதா³னி யே தே சத்தாரோ காலிகா முனினா வுத்தா ‘‘யாவகாலிகம் யாமகாலிகம் ஸத்தாஹகாலிகம் யாவஜீவிக’’ந்தி, தே த³ஸ்ஸேதும் ‘‘காலிகா சா’’தி பத³ம் உத்³த⁴டம். தத்த² (பாசி. 254-256; பாசி. அட்ட². 253-256) கதமே தே காலிகாதி சே, தே த³ஸ்ஸேதும் ‘‘யாவகாலிக’’ந்திஆதி³மாஹ. தேஸு அருணுக்³க³மனதோ யாவ டி²தமஜ்ஜ²ன்ஹிகா பு⁴ஞ்ஜிதப்³ப³தோ யாவகாலிகம். அருணுக்³க³மனதோ யாவ யாமாவஸானா பிபாஸாய ஸதி பிபாஸச்சே²த³னத்த²ம் பாதப்³ப³தோ யாமோ காலோ அஸ்ஸாதி யாமகாலிகம். தேன உபஸமேதப்³பே³ ஆபா³தே⁴ ஸதி யாவ ஸத்தாஹா பரிபு⁴ஞ்ஜிதப்³ப³தோ ஸத்தாஹகாலிகம். ஆபா³தே⁴ ஸதி யாவஜீவம் பரிஹரித்வா பு⁴ஞ்ஜிதப்³ப³தோ யாவஜீவிகம்.

85. தேஸு யாவகாலிகம் த³ஸ்ஸேதும் ‘‘பிட்ட²ம் மூலம் ப²லம் க²ஜ்ஜ’’ந்திஆதி³மாஹ. ஏத்த² (பாசி. 248-250; பாசி. அட்ட². 248-249) பிட்ட²கா²த³னீயம் நாம ஸத்தன்னம் தாவ த⁴ஞ்ஞானம் த⁴ஞ்ஞானுலோமானம் அபரண்ணானஞ்ச பிட்ட²ம் பனஸபிட்ட²ம் லபு³ஜபிட்ட²ம் அம்பா³டகபிட்ட²ம் ஸாலபிட்ட²ம் தோ⁴தகதாலபிட்ட²ம் கீ²ரவல்லிபிட்ட²ஞ்சாதி ஏவமாதீ³னி தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்ச போ⁴ஜனீயத்த²ஞ்ச ப²ரணகானி பிட்டா²னி யாவகாலிகானி. இமினாவ லக்க²ணேன மூலகா²த³னீயாதீ³ஸுபி யாவகாலிகலக்க²ணம் வேதி³தப்³ப³ம், அதிவித்தா²ரப⁴யேன ஸம்கி²த்தம். கோ³ரஸோ நாம கீ²ரத³தி⁴தக்கரஸோ. த⁴ஞ்ஞபோ⁴ஜனந்தி ஸானுலோமானி ஸத்தத⁴ஞ்ஞானி ச பஞ்சவித⁴போ⁴ஜனஞ்சாதி அத்தோ². யாகு³ஸூபப்பபு⁴தயோதி ஏத்த² பபு⁴தி-ஸத்³தே³ன கந்த³கா²த³னீயம் முளாலகா²த³னீயம் மத்த²ககா²த³னீயம் க²ந்த⁴கா²த³னீயம் தசகா²த³னீயம் பத்தகா²த³னீயம் புப்ப²கா²த³னீயம் அட்டி²கா²த³னீயம் நிய்யாஸகா²த³னீயந்தி இமானி ஸங்க³ஹிதானீதி வேதி³தப்³பா³னி.

தத்ரித³ம் முக²மத்தனித³ஸ்ஸனம் – பி⁴ஸஸங்கா²தோ பது³மபுண்ட³ரீககந்தோ³ பிண்டா³லுமஸாலுகஆத³யோ வல்லிகந்தோ³ ஆலுவகந்தோ³ தாலகந்தோ³தி ஏவமாதி³ கந்த³கா²த³னீயம். பது³மமுளாலாத³யோ முளாலகா²த³னீயம். தாலஹிந்தாலகுந்தாலகேதகனாளிகேரபூக³ருக்க²க²ஜ்ஜூரீஆதீ³னம் களீரஸங்கா²தா மத்த²கா மத்த²ககா²த³னீயம். உச்சு²க²ந்தோ⁴ நீலுப்பலரத்துப்பலகுமுத³ஸோக³ந்தி⁴கானம் புப்ப²த³ண்ட³கானீதி ஏவமாதி³ க²ந்த⁴கா²த³னீயம். தசகா²த³னீயம் உச்சு²தசோ ஏவ ஏகோ யாவகாலிகோ, ஸோபி ஸரஸோ. மூலகம் கா²ரகோ சச்சு தம்பு³கோ தண்டு³லேய்யகோதி ஏவமாதி³ பத்தகா²த³னீயம். மூலகபுப்ப²ம் கா²ரகபுப்ப²ம் சச்சுபுப்ப²ம் தம்பு³கபுப்ப²ந்தி ஏவமாதி³ புப்ப²கா²த³னீயம், அஸோகபுப்ப²ம் பன யாவஜீவிகம். லபு³ஜபனஸட்டி²ஆதி³ அட்டி²கா²த³னீயம். நிய்யாஸகா²த³னீயே யாவகாலிகம் நத்தி². ஏதே வுத்தப்பகாரா யாவகாலிகா ஹோந்தீதி அத்தோ².

86. இதா³னி ‘‘அனுஜானாமி, பி⁴க்க²வே, அட்ட² பானானி அம்ப³பானம் ஜம்பு³பானம் சோசபானம் மோசபானம் மது⁴கபானம் முத்³தி³கபானம் ஸாலூகபானம் பா²ருஸகபான’’ந்தி (மஹாவ. 300) ஏவம் வுத்தம் அட்ட²வித⁴ம் பானகம் யாமகாலிகம் நாமாதி த³ஸ்ஸேதும் ‘‘மதூ⁴’’திஆதி³மாஹ. தத்த² (மஹாவ. அட்ட². 300) மது⁴ஜம் முத்³தி³கஜம் ஸாலூகஜம் சோசஜம் மோசஜம் அம்பு³ஜம் ஜம்பு³ஜஞ்சாதி ஏவமத்தோ² க³ஹேதப்³போ³. ஏத்த² மது⁴ஜம் நாம மது⁴கானம் ஜாதிரஸேன கதம், தம் பன உத³கஸம்பி⁴ன்னமேவ வட்டதி, ஸுத்³த⁴ம் ந வட்டதி. முத்³தி³கபானம் நாம முத்³தி³கா உத³கே மத்³தி³த்வா பரிஸ்ஸாவேத்வா க³ஹிதம். ஸாலூகபானம் நாம ரத்துப்பலனீலுப்பலாதீ³னம் கிஞ்ஜக்க²ரேஹி கதம். ஸேஸானி பாகடானேவ. ஏத்த² பன ஸசே ஸயம் ஏதானி யாவகாலிகவத்தூ²னி படிக்³க³ஹேத்வா உத³கே மத்³தி³த்வா ஆதபே ஆதி³ச்சபாகேன பசித்வா பரிஸ்ஸாவேத்வா பானகம் கரோதி, தம் புரேப⁴த்தமேவ கப்பதி. ஸசே அனுபஸம்பன்னேன கதம் லப⁴தி, தத³ஹுபுரேப⁴த்தம் ஸாமிஸம்பி வட்டதி, பச்சா²ப⁴த்தம் நிராமிஸபரிபோ⁴கே³ன யாவ அருணுக்³க³மனா வட்டதி. இமானி அட்ட² பானானி ஸீதானிபி ஆதி³ச்சபாகானிபி வட்டந்தி, அக்³கி³பாகானி பன ந வட்டந்தி, தஸ்மா ‘‘நக்³கி³ஸந்தத்த’’ந்தி வுத்தம்.

87. ‘‘அனுஜானாமி, பி⁴க்க²வே, ஸப்³ப³ம் ப²லரஸம் ட²பேத்வா த⁴ஞ்ஞப²லரஸ’’ந்தி (மஹாவ. 300) வுத்தத்தா த⁴ஞ்ஞப²லரஸோ பன ந வட்டதி, தேன வுத்தம் ‘‘ஸானுலோமானி த⁴ஞ்ஞானி ட²பேத்வா’’தி. ‘‘அனுஜானாமி, பி⁴க்க²வே, ஸப்³ப³ம் புப்ப²ரஸம் ட²பேத்வா மது⁴கபுப்ப²ரஸ’’ந்தி வுத்தத்தா மது⁴கபுப்ப²ரஸோ ஆதி³ச்சபாகோ வா ஹோது அக்³கி³பாகோ வா, பச்சா²ப⁴த்தம் ந வட்டதி, தேன வுத்தம் ‘‘மது⁴கபுப்ப²மஞ்ஞத்ரா’’தி.

88. ‘‘அனுஜானாமி, பி⁴க்க²வே, ஸப்³ப³ம் பத்தரஸம் ட²பேத்வா டா³கரஸ’’ந்தி வுத்தத்தா உத³கேன பக்கானம்பி யாவகாலிகபத்தானம் ரஸோ புரேப⁴த்தமேவ வட்டதி, ஸீதோத³கேன மத்³தி³தானம் ரஸோ யாமகாலிகம். தேன வுத்தம் ‘‘ட²பேத்வா பக்கடா³கஜ’’ந்தி. யாவஜீவிகபண்ணஸ்ஸ உத³கேன பக்கஸ்ஸ ரஸோ யாவஜீவிகோ ஹோதி.

89. இதா³னி ஸத்தாஹகாலிகே த³ஸ்ஸேதும் ‘‘ஸப்பீ’’திஆதி³மாஹ. ஏத்த² (மஹாவ. 260) பன –

‘‘ஸப்பினோனீததேலானி, மது⁴பா²ணிதமேவ ச;

ஸத்தாஹகாலிகா ஸப்பி, யேஸம் மம்ஸமவாரித’’ந்தி. –

பாடோ² க³ஹேதப்³போ³. ஏவம் பன க³ஹிதே வஸா தேலக்³க³ஹணேன க³ஹிதாவ ஹோதி ‘‘தேலம் நாம திலதேலம் ஸாஸபதேலம் மது⁴கதேலம் ஏரண்ட³தேலம் வஸாதேல’’ந்தி (பாரா. 623; பாசி. 260) ஏவம் பாளியம் வித்தா²ரிதத்தா. ஏவம் பன அக்³க³ஹேத்வா வஸா ச ‘‘மது⁴பா²ணித’’ந்தி பாடே² க³ஹிதே யாவகாலிகபூ⁴தா வஸா ஸத்தாஹகாலிகாதி ஆபஜ்ஜேய்ய, ‘‘யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸஜ்ஜானி, ஸேய்யதி²த³ம் – ஸப்பி நவனீதம் தேலம் மது⁴ பா²ணித’’ந்தி (பாரா. 622) ஏவம் பஞ்சேவ ப⁴க³வதா ஸத்தாஹகாலிகபே⁴ஸஜ்ஜானி அனுஞ்ஞாதானி, ததோ உத்தரி ச²ட்ட²ஸ்ஸ ஸத்தாஹகாலிகபே⁴ஸஜ்ஜஸ்ஸ அத்தி²தாபி ஆபஜ்ஜதி, பே⁴ஸஜ்ஜக்க²ந்த⁴கேபி ப⁴க³வதா ‘‘அனுஜானாமி, பி⁴க்க²வே, வஸானி பே⁴ஸஜ்ஜானி அச்ச²வஸம் மச்ச²வஸம் ஸுஸுகாவஸம் ஸூகரவஸம் க³த்³ரப⁴வஸம் காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி (மஹாவ. 262) ஏவம் ஸத்தாஹகாலிகவஸேன வஸம் அனனுஜானித்வா ததோ நிப்³ப³த்ததேலமேவ அனுஞ்ஞாதம், தஸ்மா ‘‘மது⁴பா²ணிதமேவ சா’’தி பாடே² அக்³க³ஹிதே பாளியா அட்ட²கதா²ய ச விருஜ்ஜ²தி. தே²ரேன பன உத்தரவிஹாரவாஸீனம் கு²த்³த³ஸிக்கா²ய ஆக³தனயேன வுத்தம். தேஸம் பன –

‘‘ஸப்பி நவனீதம் தேலம், மது⁴ பா²ணிதபஞ்சமம்;

அச்ச²மச்ச²வஸாதி³ ச, ஹோந்தி ஸத்தாஹகாலிகா’’தி. –

ஏவமாக³தம். அம்ஹாகம் பன விஸும் ஸத்தாஹகாலிகே ஆக³தட்டா²னம் நத்தீ²தி வத³ந்தி, உபபரிக்கி²தப்³ப³ம்.

இதா³னி தேஸு ஸப்பிம் த³ஸ்ஸேதும் ‘‘யேஸம் மம்ஸபவாரித’’ந்தி வுத்தம். ‘‘ஸப்பினாம கோ³ஸப்பி வா அஜிகாஸப்பி வா மஹிம் ஸஸப்பி வா. யேஸம் மம்ஸம் கப்பதி, தேஸம் ஸப்பி, நவனீதம் நாம தேஸம்யேவ நவனீத’’ந்தி (பாரா. 623; பாசி. 260) பாளியம் வுத்தத்தா நவனீதம் பன க³ஹிதந்தி ந வித்தா²ரிதம், ஸப்பி பன புரேப⁴த்தம் படிக்³க³ஹிதம் தத³ஹு புரேப⁴த்தம் ஸாமிஸம்பினிராமிஸம்பி வட்டதி. பச்சா²ப⁴த்ததோ பட்டா²ய ஸத்தாஹம் நிராமிஸம் பரிபு⁴ஞ்ஜிதப்³ப³ம். ஸத்தாஹாதிக்கமே ஸசே ஏகபா⁴ஜனே ட²பிதம், ஏகம் நிஸ்ஸக்³கி³யம். ஸசே ப³ஹூஸு, வத்து²க³ணனாய நிஸ்ஸக்³கி³யபாசித்தியானி. பச்சா²ப⁴த்தம் படிக்³க³ஹிதம் ஸத்தாஹம் நிராமிஸமேவ வட்டதி. ஸப்பி தாபேந்தஸ்ஸ ஸாமம்பாகோ ந ஹோதி, ‘‘நவனீதம் பன தாபேந்தஸ்ஸ ஹி ஸாமம்பாகோ ந ஹோதி, ஸாமம்பக்கேன பன தேன ஸத்³தி⁴ம் ஆமிஸம் ந வட்டதீ’’தி ச ‘‘ஸசே அனுபஸம்பன்னோ புரேப⁴த்தம் படிக்³க³ஹிதனவனீதேன ஸப்பிம் கத்வா தே³தி, புரேப⁴த்தம் ஸாமிஸம் வட்டதி. ஸசே ஸயம் கரோதி, ஸத்தாஹம் நிராமிஸமேவ வட்டதீ’’தி ச ஸமந்தபாஸாதி³காயம் (பாரா. அட்ட². 2.622) நவனீதம்ஹியேவ ஸாமம்பாகதா வுத்தா, ந ஸப்பிம்ஹி. யம் பன கங்கா²விதரணியம் வுத்தம் ‘‘நிப்³ப³த்திதஸப்பி வா நவனீதம் வா பசிதும் வட்டதீ’’தி, ‘‘தம் பன தத³ஹு புரேப⁴த்தம்பி ஸாமிஸம் பரிபு⁴ஞ்ஜிதும் ந வட்டதீ’’தி (கங்கா². அட்ட². பே⁴ஸஜ்ஜஸிக்கா²பத³வண்ணனா) ச, தத்த² யாவகாலிகவத்து²னா அஸம்மிஸ்ஸம் ஸுதோ⁴தம் நவனீதம் ஸந்தா⁴ய ‘‘பசிதும் வட்டதீ’’தி வுத்தம். ஸயம்பசிதஸத்தாஹகாலிகேன ஸத்³தி⁴ம் யதி³ ஆமிஸம் பு⁴ஞ்ஜதி, தம் ஆமிஸம் ஸயம்பக்கஸத்தாஹகாலிகேன மிஸ்ஸிதம் அத்தனோ யாவகாலிகபா⁴வம் ஸத்தாஹகாலிகேன க³ண்ஹாபேதி, ததா² ச ஸதி யாவகாலிகம் அபக்கம்பி ஸயம்பக்கபா⁴வம் உபக³ச்ச²தீதி ‘‘ஸாமிஸம் பரிபு⁴ஞ்ஜிதும் ந வட்டதீ’’தி வுத்தம். யதா² ஸயம்பக்கஸத்தாஹகாலிகவஸாதேலம் ஸயம்ப⁴ஜ்ஜிதஸாஸபாதி³யாவஜீவிகவத்தூ²னம் தேலஞ்ச ஸாமிஸம் தத³ஹு புரேப⁴த்தம்பி ந வட்டதி, ததா² நவனீதஸப்பீதி வேதி³தப்³ப³ம். வக்க²தி ச ஆசரியோ –

‘‘யாவகாலிகஆதீ³னி, ஸம்ஸட்டா²னி ஸஹத்தனா. கா³ஹாபயந்தி ஸப்³பா⁴வ’’ந்தி ச,

‘‘தேஹேவ பி⁴க்கு²னா பக்கம், கப்பதே யாவஜீவிகம்;

நிராமிஸஞ்ச ஸத்தாஹம், ஸாமிஸே ஸாமபாகதா’’தி ச.

யா பன ஸமந்தபாஸாதி³காயம் நவனீதம்ஹி ஸாமம்பாகதா வுத்தா, ஸா தக்காதி³ஸம்மிஸ்ஸம் அதோ⁴தனவனீதம் ஸந்தா⁴ய வுத்தா. தஸ்மா விஞ்ஞூனம் ஸமந்தபாஸாதி³காபி கங்கா²விதரணீபி ஸமேந்தி, தம் நவனீதம் ஸந்தா⁴ய வுத்தந்தி ஆசரியா வத³ந்தி. இத³மேவ யுத்தம். யதி³ ஸப்பிம்ஹி ஸாமம்பாகதா ஹோதி, அவஸ்ஸம்யேவ ஸமந்தபாஸாதி³காயம் வுச்சேய்ய, தத்த² பன ‘‘ஸப்பி தாவ புரேப⁴த்தம் படிக்³க³ஹிதம், தத³ஹு புரேப⁴த்தம் ஸாமிஸம்பி நிராமிஸம்பி பரிபு⁴ஞ்ஜிதும் வட்டதீ’’தி (பாரா. அட்ட². 2.622) ஹி வுத்தம், ந பசனவிதா⁴னம். மனுஸ்ஸஸப்பினவனீதானம், அஞ்ஞேஸம்பி ஹத்தி²அஸ்ஸாதீ³னம் அகப்பியமம்ஸஸப்பினவனீதானம் ஸத்தாஹாதிக்கமே து³க்கடம். கிம் பன தம் பரிபு⁴ஞ்ஜிதும் வட்டதீதி? ஆம வட்டதி. கஸ்மா? படிக்கே²பாபா⁴வா ச ஸப்³ப³அட்ட²கதா²ஸு அனுஞ்ஞாதத்தா ச. ‘‘யேஸம் மம்ஸம் கப்பதி, தேஸம் ஸப்பி, நவனீத’’ந்தி (பாரா. 623) இத³ம் பன நிஸ்ஸக்³கி³யவத்து²ம் த³ஸ்ஸேதும் வுத்தம், ந அஞ்ஞேஸம் வாரணத்தா²ய.

90. இதா³னி தேலம் த³ஸ்ஸேதும் ‘‘தேலம் திலவஸேரண்ட³மது⁴ஸாஸபஸம்ப⁴வ’’ந்திஆதி³மாஹ. ஏத்த² திலாதீ³ஹி ஸம்ப⁴வம் நிப்³ப³த்தம் தேலந்தி ஸம்ப³ந்தோ⁴. ஏத்த² (பாரா. அட்ட². 1.100) பன புரேப⁴த்தம் திலே படிக்³க³ஹேத்வா கததேலம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸவத்து²கப்படிக்³க³ஹிதத்தா அனஜ்ஜோ²ஹரணீயம். பச்சா²ப⁴த்தம் படிக்³க³ஹேத்வா கததேலம் அனஜ்ஜோ²ஹரணீயம், ஸீஸமக்க²னாதீ³ஸு உபனேதப்³ப³ம். ஏரண்ட³மது⁴கஸாஸபட்டீ²னி படிக்³க³ஹேத்வா ஸசே தானி ப⁴ஜ்ஜித்வா தேலம் கரோதி, தத³ஹு புரேப⁴த்தம்பி ஸாமிஸம் ந வட்டதி, ஸாமம்பாகதா ஹோதி. ஸசே அப⁴ஜ்ஜித்வா கரோதி, தத³ஹு புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய நிராமிஸமேவ வட்டதி, பரிபு⁴ஞ்ஜிதப்³ப³வத்தூ²னம் யாவஜீவிகத்தா ஸவத்து²கப்படிக்³க³ஹணே தோ³ஸோ நத்தீ²தி. தேலக்³க³ஹணத்தா²ய ஏரண்ட³கட்டி²ஆதீ³னி படிக்³க³ஹேத்வா ஸத்தாஹம் அதிக்காமயதோ து³க்கடம். ததா² பாளியம் அனாக³தானி அத³ஸ்ஸிதானி கோஸம்ப³ககுஸும்பா⁴தீ³னம் தேலானி.

இதா³னி மது⁴விகதிம் த³ஸ்ஸேதும் ‘‘கு²த்³தா³ப⁴மரமது⁴கரி-மக்கி²காஹி கத’’ந்தி வுத்தம். தத்த² (பாரா. அட்ட². 2.623) கு²த்³தா³தி கு²த்³த³மக்கி²கா. ப⁴மராதி மஹாப⁴மரமக்கி²கா. த³ண்ட³கேஸு மது⁴கரா மது⁴கரிமக்கி²கா நாம. ஏதாஹி தீஹி மக்கி²காஹி கதம் மது⁴ நாமாதி அத்தோ². ‘‘மது⁴ நாம மக்கி²காமதூ⁴’’தி பாளியம் (பாரா. 623; பாசி. 260) வுத்தத்தா அஞ்ஞேஹி தும்ப³டகாதீ³ஹி கதம் ஸத்தாஹகாலிகம் ந ஹோதீதி வேதி³தப்³ப³ம்.

இதா³னி பா²ணிதம் த³ஸ்ஸேதும் ‘‘ரஸாதி³உச்சு²விகதி, பக்காபக்கா ச பா²ணித’’ந்தி ஆஹ. பக்கா ச அபக்கா ச ரஸாதி³உச்சு²விகதி பா²ணிதந்தி அத்தோ². மது⁴கபுப்ப²பா²ணிதம் புரேப⁴த்தம் ஸாமிஸம் வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி. தஸ்ஸ ஸத்தாஹாதிக்கமே து³க்கடம். சிஞ்சபா²ணிதஞ்ச அம்ப³பா²ணிதஞ்ச யாவகாலிகமேவ.

91. இதா³னி ஏதேஸு வஸாதேலஸ்ஸ ஓதி³ஸ்ஸ அனுஞ்ஞாதத்தா தம் விஸும் உத்³த⁴ரித்வா த³ஸ்ஸேதும் ‘‘ஸவத்து²பக்கா ஸாமம் வா’’திஆதி³மாஹ. ஸத்தவித⁴ஞ்ஹி (பாரா. அட்ட². 2.623) ஓதி³ஸ்ஸம் நாம ப்³யாதோ⁴தி³ஸ்ஸம் புக்³க³லோதி³ஸ்ஸம் காலோதி³ஸ்ஸம் ஸமயோதி³ஸ்ஸம் தே³ஸோதி³ஸ்ஸம் வஸோதி³ஸ்ஸம் பே⁴ஸஜ்ஜோதி³ஸ்ஸந்தி.

தத்த² ‘‘அனுஜானாமி, பி⁴க்க²வே, அமனுஸ்ஸிகாபா³தே⁴ ஆமகமம்ஸம் ஆமகலோஹித’’ந்தி (மஹாவ. 264) வுத்தம், இத³ம் ப்³யாதோ⁴தி³ஸ்ஸம் நாம. ஏத்த² பன காலேபி விகாலேபி கப்பியாகப்பியமம்ஸலோஹிதம் வட்டதி. ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²ன’’ந்தி (சூளவ. 273) ஏவம் அனுஞ்ஞாதம் புக்³க³லோதி³ஸ்ஸம் நாம. ‘‘அனுஜானாமி, பி⁴க்க²வே, சத்தாரி மஹாவிகடானி தா³தும் கூ³த²ம் முத்தம் சா²ரிகம் மத்திக’’ந்தி (மஹாவ. 268) ஏவம் ஸப்பத³ட்ட²காலே அப்படிக்³க³ஹிதகம் அனுஞ்ஞாதம் காலோதி³ஸ்ஸம் நாம. க³ணபோ⁴ஜனாதி³ ஸமயோதி³ஸ்ஸம் நாம. க³ணங்க³ணூபாஹனானி தே³ஸோதி³ஸ்ஸம் நாம. வஸோதி³ஸ்ஸம் நாம ‘‘அனுஜானாமி, பி⁴க்க²வே, வஸானி பே⁴ஸஜ்ஜானீ’’தி (மஹாவ. 262) ஏவம் வஸானாமேன அனுஞ்ஞாதம். தம் ட²பேத்வா மனுஸ்ஸவஸம் ஸப்³பே³ஸம் கப்பியாகப்பியவஸானம் தேலம் தம்தத³த்தி²கானம் தேலபரிபோ⁴கே³ன பரிபு⁴ஞ்ஜிதும் வட்டதி. பே⁴ஸஜ்ஜோதி³ஸ்ஸம் நாம ‘‘அனுஜானாமி, பி⁴க்க²வே, தானி பஞ்ச பே⁴ஸஜ்ஜானீ’’தி (மஹாவ. 261) ஏவம் பே⁴ஸஜ்ஜனாமேன வுத்தானி ஸப்பிஆதீ³னி பஞ்ச.

யதா² பன கீ²ரத³தி⁴ஆதீ³ஹி பக்கதேலம் பச்சா²ப⁴த்தம் ந வட்டதி, ந ஏவமித³ம். இத³ம் பன தேலம் ஸவத்து²கபக்கம்பி வட்டதி, தம் த³ஸ்ஸேதும் ‘‘ஸவத்து²பக்கா ஸாமம் வா’’தி வுத்தம். வஸம் ஓலோகேத்வா ‘‘ஸவத்து²பக்கா’’தி வுத்தம். ஸாமம் பக்கா வாதி அத்தோ². யதா² ஸவத்து²கப்படிக்³க³ஹிதத்தா ஸாமம்பக்கத்தா த³தி⁴ஆதீ³ஹி பக்கதேலம் அத்தனா கதம் புரேப⁴த்தம்பி ந வட்டதி, ந ஏவமித³ம். இத³ம் பன அத்தனா ஸவத்து²கபக்கம்பி புரேப⁴த்தம்பி பச்சா²ப⁴த்தம்பி வட்டதீதி அத்தோ². ஏத்த² பன காரணூபசாரேன வஸாதேலம் ‘‘வஸா’’தி வுத்தம்.

காலேதி புரேப⁴த்தகாலே பரேஹி வா அத்தனா வா பக்காதி அத்தோ². பச்சா²ப⁴த்தம் பன பசிதும் ந வட்டதி ‘‘காலே படிக்³க³ஹிதம் காலே நிப்பக்கம் காலே ஸம்ஸட்ட²’’ந்தி (மஹாவ. 262) வுத்தத்தா. தஸ்மா ‘‘காலே’’தி வுத்தம். யோ பன விகாலே படிக்³க³ஹேத்வா விகாலே பசித்வா விகாலே பரிஸ்ஸாவேத்வா பரிபு⁴ஞ்ஜதி, ஸோ தீணி து³க்கடானி ஆபஜ்ஜதி.

அமானுஸாதி ஏத்த² (மஹாவ. 262) பன அச்ச²வஸாதீ³னம் அனுஞ்ஞாதத்தா ட²பேத்வா மனுஸ்ஸவஸம் ஸப்³பே³ஸம் அகப்பியமம்ஸானம் வஸா அனுஞ்ஞாதாதி வேதி³தப்³பா³. மம்ஸேஸு ஹி மனுஸ்ஸஹத்தி²மம்ஸாதீ³னி த³ஸ மம்ஸானி படிக்கி²த்தானி, வஸா பன ஏகா மனுஸ்ஸவஸா ஏவ.

அனுபஸம்பன்னேன (பாரா. அட்ட². 2.623) கதனிப்³ப³ட்டிதவஸாதேலம் புரேப⁴த்தம் படிக்³க³ஹிதம் புரேப⁴த்தம் ஸாமிஸம்பி வட்டதி, பச்சா²ப⁴த்ததோ பட்டா²ய ஸத்தாஹம் நிராமிஸமேவ வட்டதி. யம் பனேத்த² ஸுகு²மரஜஸதி³ஸம் மம்ஸம் வா ந்ஹாரு வா அட்டி² வா லோஹிதம் வா, தம் அப்³போ³ஹாரிகம். ஸசே ஸயம் கரோதி, புரேப⁴த்தம் படிக்³க³ஹேத்வா பசித்வா பரிஸ்ஸாவேத்வா ஸத்தாஹம் நிராமிஸமேவ பரிபு⁴ஞ்ஜிதப்³ப³ம். நிராமிஸபரிபோ⁴க³ஞ்ஹி ஸந்தா⁴ய இத³ம் வுத்தம் ‘‘காலே படிக்³க³ஹிதம் காலே நிப்பக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிது’’ந்தி (மஹாவ. 262). அஞ்ஞேஸந்தி ஸப்பிஆதீ³னம். வத்து²ந்தி யாவகாலிகபூ⁴தம் வத்து²ம். யாவகாலிகவத்தூ²னம் வத்து²ம் ந பசேதி ஸம்ப³ந்தோ⁴.

92. இதா³னி யாவஜீவிகவிகதிம் த³ஸ்ஸேதும் ‘‘ஹலித்³தீ³’’திஆதி³ வுத்தம். தத்தா²யமனுத்தானபத³த்தோ² (மஹாவ. 263; பாசி. அட்ட². 248-249) – பஞ்சமூலாதி³கஞ்சாபீதி ஏத்த² த்³விபஞ்சமூலேன ஸத்³தி⁴ம் அஞ்ஞானிபி தக்³க³திகானி மூலபே⁴ஸஜ்ஜானி க³ஹிதானீதி ஞாதப்³ப³ம்.

93-5. பி³ளங்கா³தீ³னி ப²லபே⁴ஸஜ்ஜானி. தத்த² (மஹாவ. 263) கோ³ட்ட²ப²லந்தி மத³னப²லந்தி வத³ந்தி. கப்பாஸாதீ³னம் பண்ணந்தி ஸம்ப³ந்தோ⁴. இமே பன வுத்தப்பகாரா மூலபே⁴ஸஜ்ஜப²லபே⁴ஸஜ்ஜபண்ணபே⁴ஸஜ்ஜவஸேன வுத்தா ஸப்³பே³ கப்பியா. இமேஸம் புப்ப²ப²லபண்ணமூலா ஸப்³பே³பி கப்பியா யாவஜீவிகாயேவ. ட²பேத்வா உச்சு²னிய்யாஸம் ஸப்³போ³ ச நிய்யாஸோ ஸரஸஞ்ச உச்சு²ஜம் தசம் ட²பேத்வா ஸப்³போ³ ச தசோதி ஸம்ப³ந்தோ⁴.

96. மது⁴னா (பாரா. அட்ட². 2.623) அமக்கி²தம் ஸுத்³த⁴ஸித்த²ஞ்ச. மது⁴மக்கி²தம் பன ஸத்தாஹகாலிகமேவ. யஞ்ச கிஞ்சீதி ஓத³னம் மம்ஸம் அட்டி²ஆதீ³னீதி அத்தோ².

97. ‘‘யானி வா பனஞ்ஞானிபி அத்தி² நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தி, தானி படிக்³க³ஹேத்வா யாவஜீவம் பரிஹரிதும், ஸதி பச்சயே பரிபு⁴ஞ்ஜிதும், அஸதி பச்சயே பரிபு⁴ஞ்ஜந்தஸ்ஸ ஆபத்தி து³க்கடஸ்ஸா’’தி (மஹாவ. 263) வுத்தத்தா ‘‘ஆஹாரத்த²மஸாதே⁴ந்தம், ஸப்³ப³ம் தம் யாவஜீவிக’’ந்தி வுத்தம்.

98. ஸப்³ப³ஸ்ஸாதி கி³லானஸ்ஸாபி அகி³லானஸ்ஸபீதி அத்தோ². காலிகத்தயந்தி யாவகாலிகம் வஜ்ஜேத்வா அவஸேஸம் ஸதி பச்சயே விகாலே கப்பதீதி அத்தோ².

99. ஜனயந்துபோ⁴தி ஜனயந்தி உபோ⁴. கிம் வுத்தம் ஹோதி? யாவகாலிகயாமகாலிகஸங்கா²தா உபோ⁴ காலிகா அத்தனோ காலமதிக்கமித்வா பரிபு⁴த்தா பாசித்திம் ஜனயந்தீதி அத்தோ². கிஞ்ச பி⁴ய்யோ (மஹாவ. 274; மஹாவ. அட்ட². 274; கங்கா². அட்ட². ஸன்னிதி⁴காரகஸிக்கா²பத³வண்ணனா) – உபோ⁴பி பனேதே அகப்பியகுடியம் வுத்தா அந்தோவுத்த²ம் து³க்கடஞ்ச, புனதி³வஸே பரிபு⁴ஞ்ஜதோ ஸன்னிதி⁴ம் பாசித்தியஞ்ச ஜனயந்தீதி அத்தோ².

100. அனாருள்ஹேதி பாளியம் அனாக³தே மனுஸ்ஸஸப்பிஆதி³ம்ஹீதி அத்தோ².

101. நிஸ்ஸட்ட²லத்³த⁴ந்தி (பாரா. 624) வினயகம்மம் கத்வா புன லத்³த⁴ந்தி அத்தோ². விகப்பேந்தஸ்ஸ ஸத்தாஹேதி ஸத்தாஹப்³ப⁴ந்தரே ஸாமணேரஸ்ஸ ‘‘இத³ம் ஸப்பிம் தேல’’ந்திஆதி³னா நயேன நாமம் க³ஹேத்வா ‘‘துய்ஹம் விகப்பேமீ’’தி வா ‘‘இத்த²ன்னாமஸ்ஸ விகப்பேமீ’’தி வா ஸம்முகா²பி வா பரம்முகா²பி வா விகப்பேந்தஸ்ஸ அனாபத்தீதி ஸம்ப³ந்தோ⁴. பாளியம் பன ‘‘அனாபத்தி அந்தோஸத்தாஹே அதி⁴ட்டே²தி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தீ’’தி (பாரா. 625) ஏத்தகமேவ வுத்தம், ‘‘விகப்பேமீ’’தி இத³ம் பன நத்தி². கிஞ்சாபி நத்தி², அத² கோ² ‘‘அனதி⁴ட்டி²தே அதி⁴ட்டி²தஸஞ்ஞீ நிஸ்ஸக்³கி³யம் பாசித்தியம், அவிகப்பிதே விகப்பிதஸஞ்ஞீ நிஸ்ஸக்³கி³யம் பாசித்திய’’ந்தி (பாரா. 624) ஆபத்திவாரே ஆக³தத்தா தே²ரேன த³ஸ்ஸிதம். தம் த³ஸ்ஸேந்தேனாபி ஸசே உபஸம்பன்னஸ்ஸ விகப்பேதி, அத்தனோ ஏவ ஸந்தகம் ஹோதி, படிக்³க³ஹணம்பி ந விஜஹதி, தஸ்மா உபஸம்பன்னவஸேன அத³ஸ்ஸேத்வா அனுபஸம்பன்னவஸேன த³ஸ்ஸிதம். தஸ்ஸ ஹி விகப்பிதே படிக்³க³ஹணம்பி விஜஹதி, ஆபத்திபி ந ஹோதீதி. அதி⁴ட்ட²தோதி அப்³ப⁴ஞ்ஜனாதீ³னி அதி⁴ட்ட²ஹந்தஸ்ஸ அனாபத்தீதி அத்தோ². ஸசே பன ஸத்தாஹப்³ப⁴ந்தரே நிரபேக்கோ² ஹுத்வா அனுபஸம்பன்னஸ்ஸ பரிச்சஜதி, பரிச்சத்தத்தா அனாபத்தி, இதரஸ்ஸ ச அப்படிக்³க³ஹிதத்தா உபி⁴ன்னம்பி காயிகபரிபோ⁴கோ³ வட்டதி. அனிஸ்ஸக்³கி³யத்தா பன பா³ஹிரபரிபோ⁴கே³ன வட்டதி. ‘‘தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னீ’’தி (பாரா. 623) ஏவம் நியமேத்வா அனுஞ்ஞாதத்தா வுத்தம் ‘‘அஞ்ஞஸ்ஸ த³த³தோபி ச அனாபத்தீ’’தி.

102. ஸப்³பா⁴வந்தி அத்தனோ ஸபா⁴வம். யஸ்மா கா³ஹாபயந்தி, தஸ்மா ஏவமுதீ³ரிதந்தி வுத்தந்தி அத்தோ². இதா³னி வக்க²மானம் ஸந்தா⁴ய ‘‘ஏவ’’ந்தி வுத்தம்.

103-5. ஸத்தாஹம் யாவஜீவிகந்தி (மஹாவ. 305; மஹாவ. அட்ட². கங்கா². அட்ட². ஸன்னிதி⁴காரகஸிக்கா²பத³வண்ணனா) ஸத்தாஹகாலிகஞ்ச யாவஜீவிகஞ்சாதி அத்தோ². கிம் வுத்தம் ஹோதி? ஸத்தாஹகாலிகயாவஜீவிகத்³வயம் ஸேஸகாலிகஸம்மிஸ்ஸம் ஸம்பி⁴ன்னரஸம் கத்வா பரிபு⁴ஞ்ஜதோ ஸன்னிதி⁴பாசித்தி ஹோதீதி உதீ³ரிதந்தி. தத³ஹு படிக்³க³ஹிதம் தத³ஹேவாதி அத்தோ². ஸேஸந்தி ஸத்தாஹகாலிகயாவஜீவிகத்³வயம். இதரந்தி யாவஜீவிகம். புரே படிக்³க³ஹிதம் வா ஹோது, தத³ஹு வா படிக்³க³ஹிதம், யாவஜீவிகம் ஸத்தாஹகாலிகேன ஸத்தாஹம் கப்பதீதி வேதி³தப்³ப³ம். ‘‘யாவகாலிகேன, பி⁴க்க²வே, யாமகாலிகம், ஸத்தாஹகாலிகம், யாவஜீவிகம் தத³ஹு படிக்³க³ஹிதம் காலே கப்பதி, நோ விகாலே. யாமகாலிகேன, பி⁴க்க²வே, ஸத்தாஹகாலிகம், யாவஜீவிகம் தத³ஹு படிக்³க³ஹிதம் யாமே கப்பதி, யாமாதிக்கந்தே ந கப்பதி. ஸத்தாஹகாலிகேன, பி⁴க்க²வே, யாவஜீவிகம் படிக்³க³ஹிதம் ஸத்தாஹம் கப்பதி, ஸத்தாஹாதிக்கந்தே ந கப்பதீ’’தி ஹி பே⁴ஸஜ்ஜக்க²ந்த⁴கே (மஹாவ. 305) வுத்தம். ஏத்த² பன ‘‘தத³ஹு படிக்³க³ஹித’’ந்தி விஸேஸவசனஸ்ஸ நத்தி²தாய புரே படிக்³க³ஹிதம்பி வட்டதீதி ஸித்³த⁴ந்தி. காலிகவினிச்ச²யோ.

காலிகனித்³தே³ஸவண்ணனா நிட்டி²தா.