கு²த்³த³ஸிக்கா²-புராணடீகா

க³ந்தா²ரம்ப⁴கதா²

யோ சிரம் தீ³க⁴மத்³தா⁴னம், விதி³த்வா து³க்கி²தம் ஜனம்;

ததா²பி நாவபு³ஜ்ஜ²ந்தமனுகம்பாய சோதி³தோ.

போ³தா⁴ய பணிதி⁴ம் கத்வா, பத்தோ ஸம்போ³தி⁴முத்தமம்;

தஸ்ஸ பாதே³ நமஸ்ஸித்வா, த⁴ம்மம் ஸங்க⁴ஞ்ச ஸாது⁴கம்.

புப்³பா³சரியபாதே³ஸு, ட²பேத்வா ஸீஸமத்தனோ;

தே²ரேன த⁴ம்மஸிரினா, தி²ரஸீலேன யா கதா.

‘‘ஆதி³தோ உபஸம்பன்னஸிக்கி²தப்³ப³’’ந்திஆதி³னா;

கு²த்³த³ஸிக்கா² ஸமாஸேன, தஸ்ஸா அத்த²வினிச்ச²யம்.

லிகி²ஸ்ஸாமி ஹிதத்தா²ய, ஆதி³கம்மிகபி⁴க்கு²னம்;

தத்த² யுத்தம் க³ஹேதப்³ப³மயுத்தம் துஜ்ஜி²தப்³ப³கந்தி;

க³ந்தா²ரம்ப⁴கதா²வண்ணனா

(க) ஏத்தா²ஹ – கதமா கு²த்³த³ஸிக்கா², கத²ம் ஸிக்கி²தப்³பா³, கஸ்மா ஸிக்கி²தப்³பா³, கே ஸிக்க²ந்தி, கே ஸிக்கி²தஸிக்கா²தி? வுச்சதே – அதி⁴ஸீலஅதி⁴சித்தஅதி⁴பஞ்ஞாவஸேன திஸ்ஸோ ஸிக்கா², க³ந்த²வஸேனேத்த² ஸங்கி²பித்வா வுத்தத்தா தத்³தீ³பனோ க³ந்தோ² ‘‘கு²த்³த³ஸிக்கா²’’தி வுச்சதி, அத² வா ‘‘கு²த்³த³ம் அனேலகம் மது⁴படல’’ந்திஆதீ³னி விய ஸிக்கா²காமானம் மது⁴ரதாய கு²த்³தா³ ச தா ஸிக்கா² சாதி கு²த்³த³ஸிக்கா², அத² வா ‘‘கு²த்³த³புத்தம்ஹி ஸமண போஸ ம’’ந்திஆதீ³ஸு விய ப³ஹுவித⁴த்தாபி கு²த்³தா³ ச தா ஸிக்கி²தப்³ப³தோ ஸிக்கா² சாதி கு²த்³த³ஸிக்கா². அதி⁴ஸீலஸிக்கா² பனேத்த² சாரித்தவாரித்தவஸேன து³வித⁴ம்பி ஸீலம் யதா²னுஸிட்ட²ம் படிபஜ்ஜமானேன தப்படிபக்கே² கிலேஸே தத³ங்க³ப்பஹானவஸேன பஜஹந்தேன ஸிக்கி²தப்³பா³, அதி⁴சித்தஸிக்கா² பன யதா²வுத்தேஸு ஆரம்மணேஸு அபி⁴யோக³கரணவஸேன ஜா²னப்படிபக்கா²னம் நீவரணக³ணானம் விக்க²ம்ப⁴னப்பஹானம் குருமானேன ஸிக்கி²தப்³பா³, அதி⁴பஞ்ஞாஸிக்கா² பன யதா²னுரூபம் ஸமுச்சே²த³வஸேன ஸானுஸயே கிலேஸே ஸமுச்சி²ந்த³ந்தேன ஸிக்கி²தப்³பா³.

கஸ்மா ஸிக்கி²தப்³பா³தி ஏத்த² –

ஜாதிஆதீ³ஹி து³க்கே²ஹி, அனேகேஹி உபத்³து³தம்;

க²ந்த⁴லோகம் ஜஹித்வான, பத்தும் கே²மம் புரம் ஸிவம்.

கல்யாணபுது²ஜ்ஜனேன ஸஹ ஸத்த ஸேக்கா² ஸிக்க²ந்தி. அரஹந்தோ ஸிக்கி²தஸிக்கா².

யே வீதமோஹா முனிபுங்க³வஸ்ஸ;

ஸிஸ்ஸேஸு அக்³கா³ முனினா பஸத்தா²;

தே தீஸு ஸிக்கா²ஸு ஸமத்தஸிக்கா²;

ததோ பரே கேன ஸமத்தஸிக்கா²தி.

ஆதி³தோதி ஏத்த² ஆதி³ம்ஹியேவாதி அத்தோ², ஆதி³தோ பட்டா²யாதி வா. உபஸம்பன்னேன ச உபஸம்பன்னாய ச ஸிக்கி²தப்³ப³ம் உபஸம்பன்னஸிக்கி²தப்³ப³ம். ஸஹ மாதிகாய ஸமாதிகம். புப்³பே³ வுத்தப்பகாரம் கு²த்³த³ஸிக்க²ம் பவக்கா²மி ஆத³ரேன, பகாரேன வா வக்கா²மி ரதனத்தயம் வந்தி³த்வாதி அத்தோ². அபிச தே²ரோ ஆதி³தோதி வசனேன ஸத்³தா⁴பப்³ப³ஜிதானம் குலபுத்தானம் ஆலஸியதோ³ஸேன அப்படிபஜ்ஜந்தானம் அஞ்ஞாணதோ³ஸேன அஞ்ஞதா² படிபஜ்ஜந்தானம் ஸம்வேக³ம் ஜனேதி. கத²ம்? அதிது³ல்லப⁴ம் க²ணஸமவாயம் படிலபி⁴த்வா தங்க²ணம் ந குஸீதேன வா நிரத்த²ககதா²பஸுதேன வா வீதினாமேதப்³ப³ம், கிம் காதப்³ப³ம்? ஆதி³தோ பட்டா²ய நிரந்தரமேவ தீஸு ஸிக்கா²ஸு ஆத³ரோ ஜனேதப்³போ³தி. ஏத்தா²ஹ – கிம் தம் ரதனத்தயம் நாம, யம் வந்தி³த்வா தே²ரோ கு²த்³த³ஸிக்க²ம் பவக்க²தீதி? வுச்சதே – பு³த்³த⁴ரதனம் த⁴ம்மரதனம் ஸங்க⁴ரதனந்தி இமானி தீணி ரதனானி. தானி ஹி ரதிஜனனட்டே²ன ‘‘ரதனானீ’’தி வுச்சந்தி. அபிச –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ரதனம் தேன வுச்சதீ’’தி. (தீ³. நீ. அட்ட². 2.33; ஸம். நி. அட்ட². 3.5.223; கு². பா. அட்ட². 6.3; ஸு. நி. அட்ட². 1.226; மஹானி. அட்ட². 50; உதா³. அட்ட². 45) –

இமிஸ்ஸா கா³தா²ய வஸேன ரதனத்தோ² வேதி³தப்³போ³.

மாதிகாவண்ணனா

(க²-ஜ) இதா³னி ‘‘ஸமாதிக’’ந்தி வுத்தத்தா மாதிகம் தாவ த³ஸ்ஸேதும் ‘‘பாராஜிகா ச சத்தாரோ’’திஆதி³ ஆரத்³த⁴ம். ஸப்³ப³ஸிக்கா²னம் பன மூலபூ⁴தத்தா அதி⁴ஸீலஸிக்கா²வ பட²மம் வுத்தா. ‘‘ஸீலே பதிட்டா²யா’’தி (ஸும். நி. 1.1.23, 192; பேடகோ. 22; மி. ப. 2.1.9) ஹி வுத்தம். தத்ராபி மஹாஸாவஜ்ஜத்தா, மூலச்சே²ஜ்ஜவஸேன பவத்தனதோ ச ஸப்³ப³பட²மம் ஜானிதப்³பா³தி பாராஜிகாவ பட²மம் வுத்தாதி. இதா³னி யதா²னிக்கி²த்தானி மாதிகாபதா³னி படிபாடியா வித்தா²ரேத்வா த³ஸ்ஸேதும் ‘‘பாராஜிகா ச சத்தாரோ’’தி பட²மபத³ம் உத்³த⁴டம், தஸ்ஸாயமத்தோ² – பாராஜிகாதி பராஜிதா பராஜயமாபன்னா, ஸிக்கா²பத³ம் அதிக்கமித்வா தேனேவ ஆபத்திம் ஆபஜ்ஜித்வா, தாய வா பராஜயமாபாதி³தானமேதம் அதி⁴வசனம், தே பன சத்தாரோதி வுத்தம் ஹோதி.

1. பாராஜிகனித்³தே³ஸவண்ணனா

1-2. இதா³னி தே த³ஸ்ஸேதும் ‘‘மக்³க³த்தயே’’திஆதி³ ஆரத்³த⁴ம். தத்த² மனுஸ்ஸாமனுஸ்ஸதிரச்சா²னக³தானம் வஸேன திஸ்ஸோ இத்தி²யோ, தயோ உப⁴தோப்³யஞ்ஜனகா, தயோ பண்ட³கா, தயோ புரிஸாதி பாராஜிகவத்து²பூ⁴தானம் நிமித்தானம் நிஸ்ஸயா த்³வாத³ஸமத்தா ஹோந்தி, தேஸம் வச்சமக்³க³ப்பஸ்ஸாவமக்³க³முக²மக்³க³வஸேன தயோ மக்³கா³. தத்த² மனுஸ்ஸித்தி²யா தயோ, அமனுஸ்ஸித்தி²யா தயோ, திரச்சா²னக³தித்தி²யா தயோதி நவ, ததா² மனுஸ்ஸஉப⁴தோப்³யஞ்ஜனகாதீ³னம். மனுஸ்ஸபண்ட³காதீ³னம் பன வச்சமக்³க³முக²மக்³க³வஸேன த்³வே த்³வே கத்வா ச², ததா² மனுஸ்ஸபுரிஸாதீ³னந்தி ஸப்³பே³ஸம் வஸேன திம்ஸ மக்³கா³ ஹோந்தி. தே ஸப்³பே³ பரிக்³க³ஹேத்வா இத⁴ ‘‘மக்³க³த்தயே’’தி வுத்தம், தஸ்மிம் மக்³க³த்தயேதி அத்தோ². அனிக்கி²த்தஸிக்கோ²தி பி⁴க்கு²பா⁴வதோ சவிதுகாமதாசித்தேன யதா²லக்க²ணம் அபச்சக்கா²தஸிக்கோ²தி அத்தோ². ஸந்த²தஸந்த²தேதி வத்தா²தீ³ஸு யேன கேனசி ஸந்த²தே வா அஸந்த²தே வா. அல்லோகாஸேதி மக்³க³த்தயஸ்ஸ பகதிவாதேன அஸம்பு²ட்ட²ப்பதே³ஸே. நிமித்தந்தி அங்க³ஜாதம். ஸம்ஸந்த²தம் வா அஸந்த²தம் வாதி அத்தனோ அங்க³ஜாதம் வத்தா²தீ³னம் அஞ்ஞதரேன படிச்ச²ன்னம் வா அப்படிச்ச²ன்னம் வா. உபாதி³ண்ணந்தி அனட்ட²காயப்பஸாத³ம். வுத்தப்பகாரே மக்³க³த்தயே பவேஸந்தோ சுதோ பாராஜிகோதி ஸம்ப³ந்தோ⁴. நட்ட²காயப்பஸாத³ம் பன பீளகம் வா சம்மகி²லம் வா லோமம் வா பவேஸந்தஸ்ஸ து³க்கடம், மனுஸ்ஸானம் பன ஜீவமானகஸரீரே அக்கி²னாஸாகண்ணச்சி²த்³த³வத்தி²கோஸேஸு ஸத்த²காதீ³ஹி கதவணே வா மேது²னராகே³ன திலபீ³ஜமத்தம்பி அங்க³ஜாதம் பவேஸந்தஸ்ஸ து²ல்லச்சயம், அவஸேஸஸரீரேஸு உபகச்ச²காதீ³ஸு ச து³க்கடம். திரச்சா²னக³தானம் ஹத்தி²அஸ்ஸகோ³ணக³த்³ரப⁴ஓட்ட²மஹிம்ஸாதீ³னம் நாஸாய து²ல்லச்சயம், ததா² தேஸம் வத்தி²கோஸேஸு. ஸப்³பே³ஸம்பி திரச்சா²னக³தானம் அக்கி²கண்ணவணேஸு து³க்கடம், ததா² தேஸம் அவஸேஸஸரீரேஸுபி.

இதா³னி பவேஸனம் நாம ந கேவலம் அத்துபக்கமேனேவ ஹோதி, பி⁴க்கு²பச்சத்தி²காதீ³னம் பன வஸேன பரூபக்கமேனாபி ஹோதி, தத்தா²பி ஸேவனசித்தே ஸதி பாராஜிகோ ஹோதீதி த³ஸ்ஸனத்த²ம் ‘‘அத² வா’’திஆதி³ வுத்தம். தஸ்ஸத்தோ² – யோ பி⁴க்கு² பவேஸனபவிட்ட²டி²தஉத்³தா⁴ரணக்க²ணேஸு ஸாதி³யதி, தஸ்மிம் க²ணே ஸேவனசித்தம் உபட்ட²பேதி, ஸோபி பாராஜிகோ ஹோதி. யோ பன பி⁴க்கு² ஸப்³ப³ஸோ அஸாதி³யந்தோ ஆஸீவிஸமுக²ம் அங்கா³ரகாஸுஞ்ச பவிட்ட²ம் விய மஞ்ஞதி, ஸோ நிப்பராதோ⁴ ஹோதி. ஏத்த² டி²தம் நாம ஸுக்கவிஸ்ஸட்டி²ஸமயப்பவத்தி.

பட²மம்.

3-4. இதா³னி து³தியம் த³ஸ்ஸேதும் ‘‘ஆதி³யேய்யா’’திஆதி³மாஹ. ‘‘ஆதி³யேய்யா’’திஆதீ³னம் பதா³னம் ‘‘அதி³ன்னம் தே²ய்யசித்தேன ப⁴வே பாராஜிகோ’’தி இமினா ஸம்ப³ந்தோ⁴. ஆதி³யேய்யாதி ஆராமாதி³ம் அபி⁴யுஞ்ஜித்வா யோ பி⁴க்கு² க³ண்ஹேய்ய, ஸோ ப⁴வே பாராஜிகோதி அத்தோ². ஏவம் ஸேஸேஸுபி. ஹரேய்யாதி வேதனேன வா மித்தபா⁴வேன வா அஞ்ஞஸ்ஸ ப⁴ண்ட³ம் ஹரந்தோ புன தே²ய்யசித்தே உப்பன்னே ‘‘ஸீஸே பா⁴ரம் தே²ய்யசித்தோ ஆமஸதீ’’திஆதி³னா க³ண்ஹேய்யாதி அத்தோ². அவஹரேய்யாதி ‘‘உபனிக்கி²த்தம் ப⁴ண்ட³ம் ‘தே³ஹி மே ப⁴ண்ட³’ந்தி வுச்சமானோ ‘நாஹம் க³ண்ஹாமீ’’திஆதி³னா அவஹரேய்ய. இரியாபத²ம் கோபேய்யாதி ‘‘ஸஹப⁴ண்ட³ஹாரகம் நேஸ்ஸாமீ’’தி தேனேவ புரிஸேன தம் நேதும் தஸ்ஸ க³மனபத²ம் வாரேத்வா அஞ்ஞேன மக்³கே³ன தம் ஸந்தஜ்ஜேத்வா நேதி, ஏவம் நேந்தஸ்ஸ தஸ்ஸ புரிஸஸ்ஸ பட²மபாதே³ து²ல்லச்சயம், து³தியபாது³த்³தா⁴ரே பாராஜிகம். ‘‘த²லட்ட²ம் ப⁴ண்ட³ம் தே²ய்யசித்தோ ஆமஸதீ’’திஆதி³னா டா²னா சாவேய்ய. பரிகப்பிதட்டா²னம் வா ஸுங்ககா⁴தம் வா அதிக்காமேந்தோ ஸங்கேதம் வீதினாமேய்ய. யம் கிஞ்சி பரபரிக்³க³ஹிதம் ஸஸ்ஸாமிகம் ப⁴ண்ட³ம் தேஹி ஸாமிகேஹி காயேன வா வாசாய வா ந தி³ன்னந்தி அதி³ன்னம்.

இதா³னி ந இமினாவ ஆகாரேன அவஹாரகோ பாராஜிகோ ஹோதி, அஞ்ஞதா²பி ஹோதீதி த³ஸ்ஸேதும் ‘‘அத² வா’’திஆதி³ வுத்தம். தே²ய்யாவஹாரகோ ச ப³லாவஹாரகோ ச குஸாவஹாரகோ ச படிச்ச²ன்னாவஹாரகோ ச பரிகப்பாவஹாரகோ ச ப⁴வே பாராஜிகோதி ஸம்ப³ந்தோ⁴. தத்த² தே²ய்யாவஹாரோ நாம ஸந்தி⁴ச்சே²தா³தீ³ஹி வா கம்ஸகூடமானகூடதுலாகூடாதீ³ஹி வா வஞ்சேத்வா க³ஹணம். பஸய்ஹாவஹாரோ ப³லாவஹாரோ. குஸஸங்கமனம் கத்வா பரகோட்டா²ஸக்³க³ஹணம் குஸாவஹாரோ. பரப⁴ண்ட³ம் பம்ஸுஆதி³னா படிச்சா²தே³த்வா ஸாமிகேஸு அபஸ்ஸித்வா க³தேஸு பச்சாக³ந்த்வா க³ஹணம் படிச்ச²ன்னாவஹாரோ. பரிகப்பாவஹாரோ பன து³விதோ⁴ ப⁴ண்டோ³காஸவஸேன. தத்த² ‘‘ஸாடகோ சே, க³ண்ஹிஸ்ஸாமி, ஸுத்தஞ்சே, ந க³ண்ஹிஸ்ஸாமீ’’தி ப⁴ண்ட³ம் பரிகப்பேத்வா அந்த⁴காரே பஸிப்³ப³கம் க³ண்ஹாதி. தத்த² சே ஸாடகோ ஹோதி, உத்³தா⁴ரேயேவ பாராஜிகம். ஸசே ஸுத்தம் ஹோதி, ரக்க²தி, புன ‘‘ஸுத்த’’ந்தி ஞத்வாபி ‘‘யம் லத்³த⁴ம், தம் க³ஹேதப்³ப³’’ந்தி உக்³க³ண்ஹந்தோ உத்³தா⁴ரேயேவ பாராஜிகம், அயம் ப⁴ண்ட³பரிகப்போ. ஓகாஸபரிகப்போ க³ப்³ப⁴த்³வாரப்பமுக²விஹாராதீ³னம் வஸேன பரிச்சே²த³ம் கரோதி ‘‘ஸசே மம் ஏத்த²ந்தரே பஸ்ஸந்தி, த³ஸ்ஸாமி, நோ சே பஸ்ஸந்தி, க³ண்ஹித்வா க³ச்சா²மீ’’தி, தஸ்ஸ தம் பரிகப்பிதபரிச்சே²த³ம் அதிக்கமந்தஸ்ஸ பத³வாரேன பாராஜிகம் வேதி³தப்³ப³ம், அயம் ஓகாஸபரிகப்போ.

இதா³னி இமஸ்மிம் அதி³ன்னாதா³னே வினிச்ச²யனயம் த³ஸ்ஸேதும் ‘‘ப⁴ண்ட³காலக்³க⁴தே³ஸேஹீ’’திஆதி³ வுத்தம். ஏத்தா²தி அதி³ன்னாதா³னே. நிச்ச²யோதி வினிச்ச²யோ காதப்³போ³தி அத்தோ². தத்த² கேனசி பி⁴க்கு²னா ‘‘மயா இத³ம் நாம ப⁴ண்ட³ம் தே²ய்யசித்தேன க³ஹித’’ந்தி வுத்தே வினயத⁴ரேன ஸஹஸாவ தம் ஆபத்திம் அனாரோபேத்வா தஸ்ஸ ப⁴ண்ட³ஸ்ஸ ஸாமிகஅஸ்ஸாமிகபா⁴வம் உபபரிக்கி²த்வா யதி³ ஸஸ்ஸாமிகம், தஸ்ஸ ப⁴ண்ட³ஸ்ஸ அக்³க⁴வஸேன ஆபத்தியா காரேதப்³போ³. ஸசே நிராலயகாலே க³ஹிதம், பாராஜிகேன ந காரேதப்³போ³, அயம் ப⁴ண்ட³வஸேன வினிச்ச²யோ.

காலோதி அவஹாரகாலோ. ததே³வ ஹி ப⁴ண்ட³ம் கதா³சி மஹக்³க⁴ம் ஹோதி, கதா³சி அப்பக்³க⁴ம், தஸ்மா யஸ்மிம் காலே அவஹடம், தஸ்மிம் காலே யோ தஸ்ஸ அக்³கோ⁴, தேன அக்³கே⁴ன ஆபத்தியா காரேதப்³போ³, அயம் காலவஸேன வினிச்ச²யோ.

அக்³கோ⁴தி ப⁴ண்ட³க்³கோ⁴. நவப⁴ண்ட³ஸ்ஸ ஹி யோ அக்³கோ⁴, ஸோ பச்சா² பரிஹாயதி, தஸ்மா ஸப்³ப³தா³ ப⁴ண்ட³ம் பகதிஅக்³க⁴வஸேனேவ ந காரேதப்³ப³ம், அயம் அக்³க⁴வஸேன வினிச்ச²யோ. தே³ஸோதி அவஹாரதே³ஸோ. ப⁴ண்டு³ட்டா²னதே³ஸே ஹி ப⁴ண்ட³ம் அப்பக்³க⁴ம் ஹோதி, அஞ்ஞத்த² மஹக்³க⁴ம், தஸ்மா யஸ்மிம் தே³ஸே ப⁴ண்ட³ம் அவஹடம், தஸ்மிம்யேவ தே³ஸே அக்³கே⁴ன காரேதப்³போ³, அயம் தே³ஸவஸேன வினிச்ச²யோ.

பரிபோ⁴கே³னபி ஸாடகாதி³கஸ்ஸ ப⁴ண்ட³ஸ்ஸ அக்³கோ⁴ பரிஹாயதி, தஸ்மா தஸ்ஸ பரிபோ⁴க³வஸேன பரிஹீனாபரிஹீனபா⁴வோ உபபரிக்கி²தப்³போ³, அயம் பரிபோ⁴க³வஸேன வினிச்ச²யோ.

து³தியம்.

5. இதா³னி ததியம் த³ஸ்ஸேதும் ‘‘மனுஸ்ஸவிக்³க³ஹ’’ந்திஆதி³ ஆரத்³த⁴ம். தத்த² மனுஸ்ஸவிக்³க³ஹந்தி படிஸந்தி⁴விஞ்ஞாணேன ஸத்³தி⁴ம் உப்பன்னம் கலலரூபம் ஆதி³ம் கத்வா பகதியா வீஸதிவஸ்ஸஸதாயுகஸ்ஸ ஸத்தஸ்ஸ யாவ மரணகாலா ஏத்த²ந்தரே அனுபுப்³பே³ன வுத்³தி⁴ப்பத்தோ அத்தபா⁴வோ, ஏஸோ மனுஸ்ஸவிக்³க³ஹோ நாம, ஏவரூபம் மனுஸ்ஸவிக்³க³ஹந்தி அத்தோ². சிச்சாதி வத⁴கசேதனாவஸேன ஸஞ்சேதேத்வா பகப்பேத்வா அபி⁴விதரித்வா வீதிக்கமோதி அத்தோ². ஜீவிதா வா வியோஜயேதி வுத்தப்பகாரம் மனுஸ்ஸவிக்³க³ஹம் கலலகாலேபி தாபனமத்³த³னேஹி வா பே⁴ஸஜ்ஜஸம்பதா³னேன வா ததோ வா உத்³த⁴ம்பி தத³னுரூபேன உபக்கமேன ஸந்ததிவிகோபனவஸேன யோ ஜீவிதா வியோஜேய்ய, ஸோ சுதோ ப⁴வேதி ஸம்ப³ந்தோ⁴. கிஞ்ச பி⁴ய்யோ – ‘‘ஸத்த²ஹாரகம் வா’’திஆதி³ வுத்தம். ஏத்த² ஹரதீதி ஹாரகம், கிம் ஹரதி? ஜீவிதம், ஹரிதப்³ப³ந்தி வா ஹாரகம், உபனிக்கி²பிதப்³ப³ந்தி அத்தோ², ஸத்த²ஞ்ச தம் ஹாரகஞ்சாதி ஸத்த²ஹாரகம். அஸ்ஸாதி மனுஸ்ஸவிக்³க³ஹஸ்ஸ. யதா² மனுஸ்ஸவிக்³க³ஹோ இச்சி²திச்சி²தக்க²ணே தம் அஸிஆதி³ஸத்த²ம் படிலப⁴தி, ததா² ஸயம் மரணசேதனோ மரணாதி⁴ப்பாயோ ஹுத்வா உபனிக்கி²பேய்ய. ஸோபி சுதோ ப⁴வேதி அத்தோ². ஏதேன தா²வரப்பயோக³ம் த³ஸ்ஸேதி.

6-7. இதா³னி ‘‘மரணவண்ணம் வா ஸம்வண்ணேய்யா’’திஆதி³விதி⁴ம் த³ஸ்ஸேதும் ‘‘கா³ஹேய்ய மரணூபாயம், வதே³ய்ய மரணே கு³ண’’ந்தி வுத்தம். தத்த² ‘‘ஸத்த²ம் வா ஆஹர, விஸம் வா கா²த³, ரஜ்ஜுயா வா உப்³ப³ந்தி⁴த்வா காலம் கரோஹீ’’திஆதி³னா நயேன மரணத்தா²ய உபாயம் கா³ஹேய்ய. மரணஸம்வண்ணனா பனேத்த² ப³ஹுவிதா⁴ ‘‘காயேன ஸம்வண்ணேதி, வாசாய காயவாசாய தூ³தேன லேகா²ய வா ஸம்வண்ணேதீ’’தி வுத்தத்தா. தத்த² காயேன ஸம்வண்ணேதி நாம காயேன விஞ்ஞாபேதி. ‘‘யோ பபாதே பபதனாதீ³னி கத்வா மரதி, ஸோ த⁴னம் வா லப⁴தி, யஸம் வா லப⁴தி, ஸக்³க³ம் வா க³ச்ச²தீ’’திஆதி³னா நயேன ஸம்வண்ணேதி, ஆபத்தி து³க்கடஸ்ஸ. தஸ்ஸ வசனம் ஸுத்வா கோசி ‘‘மரிஸ்ஸாமீ’’தி து³க்க²ம் வேத³னம் உப்பாதே³தி, து²ல்லச்சயம். மரதி சே, பாராஜிகம். ஏவம் ஸேஸேஸுபி. தூ³தேன ஸம்வண்ணனாயம் பன தூ³தஸ்ஸ ஸாஸனம் ஆரோசாபேதி ‘‘ஏவம் ஆரோசேஹீ’’தி, ‘‘யோ ஏவம் மரதி, ஸோ த⁴னம் வா லப⁴தீ’’தி ஸப்³ப³ம் புரிமஸதி³ஸமேவ. லேகா²ய ஸம்வண்ணேதி நாம கி³ரிபப்³ப³தபுராணாதி³லேக²ம் லிக²தி, ‘‘யோ ஏவம் மரதீ’’திஆதி³ வுத்தனயமேவ. ஏத்தா²பி யோ மரணூபாயம் வா கா³ஹேய்ய, மரணே வா கு³ணம் வதே³ய்ய, ஸோ சுதோ ப⁴வேதி ஸம்ப³ந்தோ⁴.

இதா³னி பன இமஸ்ஸ மனுஸ்ஸவிக்³க³ஹஸ்ஸ ச²ப்³பி³தே⁴ பயோகே³ த³ஸ்ஸேதும் ‘‘பயோகா³’’திஆதி³ ஆரத்³த⁴ம். ஸாஹத்தி²கனிஸ்ஸக்³கி³கஆணத்திகதா²வரஇத்³தி⁴மயவிஜ்ஜாமயானம் வஸேன தஸ்ஸ மனுஸ்ஸவிக்³க³ஹஸ்ஸ ச²ப்பயோகா³தி அதி⁴ப்பாயோ. தத்த² ஸாஹத்தி²கோதி ஸயம் மாரேந்தஸ்ஸ காயேன வா காயப்படிப³த்³தே⁴ன வா பஹரணம். நிஸ்ஸக்³கி³கோதி தூ³ரே டி²தம் மாரேதுகாமஸ்ஸ காயாதீ³ஹி உஸுஸத்தியந்தபாஸாணாதீ³னம் நிஸ்ஸஜ்ஜனம். ஆணத்திகோதி ‘‘அஸுகம் நாம மாரேஹீ’’தி அஞ்ஞம் ஆணாபேந்தஸ்ஸ ஆணாபனம். தா²வரோதி ஓபாதக்க²ணனம், அபஸ்ஸேனஸம்விதா⁴னம், அஸிஆதீ³னம் உபனிக்கி²பனம், தளாகாதீ³ஸு விஸஸம்பயோஜனம், ரூபூபஹாரோதி ஏவமாதி³. கம்மவிபாகஜாய இத்³தி⁴யா பயோஜனம் இத்³தி⁴பயோக³ம். மாரணத்தா²ய விஜ்ஜானம் பரிஜப்பனம் விஜ்ஜாமயோதி.

இதா³னி இமேஸு ச²ஸு பயோகே³ஸு ஆணத்தியம் ஸங்கேதவிஸங்கேததம் த³ஸ்ஸேதும் ‘‘காலவத்தா²வுதி⁴ரியாபதா²’’திஆதி³மாஹ. தத்த² காலோதி புப்³ப³ண்ஹஸாயன்ஹாதி³காலோ ச யோப்³ப³னதா²வரியாதி³காலோபி ச. இமேஸு யம் கிஞ்சி காலம் நியமேத்வா ‘‘இமஸ்மிம் நாம காலே மாரேஹீ’’தி ஆணத்தோ ஸசே தஸ்மிம்யேவ காலே மாரேதி, ஆணத்திக்க²ணேயேவ பாராஜிகம். ஸசே நியமிதகாலதோ புரே வா பச்சா² வா மாரேதி, ஆணாபகோ முச்சதி. வத்தூ²தி மாரேதப்³போ³ புக்³க³லோ. ஸசே ஆணத்தோ தமேவ மாரேதி, ஆணாபகஸ்ஸ ஆணத்திக்க²ணேயேவ பாராஜிகம். அத² அஞ்ஞம் மாரேதி, ஆணாபகோ முச்சதி. ஏவம் ஸேஸேஸுபி வுத்தனயேனேவ வினிச்ச²யோ வேதி³தப்³போ³. ஆவுத⁴ந்தி அஸிஆதி³. இரியாபதோ²தி மாரேதப்³ப³ஸ்ஸ க³மனம் வா நிஸஜ்ஜா வாதி ஏவமாதி³கோ. கிரியாவிஸேஸோதி விஜ்ஜ²னம் வா சே²த³னம் வா பே⁴த³னம் வா ஸூலாரோபனம் வாதி ஏவமாதி³கோ. ஓகாஸோதி கா³மோ வா வனம் வா கே³ஹம் வாதி ஏவமாதி³கோ. இமேஸு யதா² யதா² வத⁴கோ ஆணத்தோ, ததா² ததா² கதே ஆணாபகஸ்ஸ ஆபத்தி, அஞ்ஞதா² கதே விஸங்கேதோ ஹோதி. ஆணத்தியம் பன அயம் விஸேஸோ ‘‘அதி⁴ட்டா²யாதி அதி⁴ட்ட²ஹித்வா ஆணாபேதி ‘ஏவம் விஜ்ஜ², ஏவம் பஹர, ஏவம் கா⁴தேஹீ’’தி வுத்தாய பாளியா லப்³ப⁴தீதி ஞாதப்³போ³.

ததியம்.

8-9. இதா³னி சதுத்த²ம் த³ஸ்ஸேதும் ‘‘ஜா²னாதி³பே⁴த³’’ந்திஆதி³மாஹ. தஸ்ஸத்தோ² – ‘‘ஜா²னம் விமோக்கோ² ஸமாதி⁴ ஸமாபத்தி ஞாணத³ஸ்ஸனம் மக்³க³பா⁴வனா ப²லஸச்சி²கிரியா கிலேஸப்பஹானம் வினீவரணதா சித்தஸ்ஸ ஸுஞ்ஞாகா³ரே அபி⁴ரதீ’’தி ஏவம் வுத்தம் உத்தரிமனுஸ்ஸத⁴ம்மம் அத்தனி நத்தி²தாய நோஸந்தம் ‘‘மயி அத்தீ²’’தி அத்தனி வா தம் ‘‘அஹம் ஏத்த² ஸந்தி³ஸ்ஸாமீ’’தி அத்தானம் வா தத்த² உபனேத்வா தீ³பேந்தோ சுதோ ப⁴வே. கோட்டா²ஸம் வாதி ஏத்த² ‘‘ஜா²னலாபீ⁴, விமோக்க²லாபீ⁴, ஸமாதி⁴லாபீ⁴, ஸமாபத்திலாபீ⁴ம்ஹீ’’தி ஏவமாதி³னா நயேன கோட்டா²ஸதோ வாதி அத்தோ². ஏகேகம் வாதி ‘‘பட²மஸ்ஸ ஜா²னஸ்ஸ லாபீ⁴, து³தியஸ்ஸ ஜா²னஸ்ஸ லாபீ⁴ம்ஹீ’’தி ஏவமாதி³னா நயேன ஏகேகம் வாதி அத்தோ². ‘‘அதீதப⁴வே ஸோதாபன்னோம்ஹீ’’தி வத³தோ அதீதப⁴வம் ஸந்தா⁴ய கதி²தத்தா பாராஜிகம் நத்தி², தஸ்மா ‘‘பச்சுப்பன்னப⁴வஸ்ஸித’’ந்தி வுத்தம், தஸ்ஸ பச்சுப்பன்னப⁴வனிஸ்ஸிதம் கத்வாதி அத்தோ². அஞ்ஞாபதே³ஸரஹிதந்தி ‘‘யோ தே விஹாரே வஸதி, ஸோ பி⁴க்கு² பட²மஸ்ஸ ஜா²னஸ்ஸ லாபீ⁴’’திஆதி³னா நயேன அஞ்ஞாபதே³ஸம் வினாதி அத்தோ². ஏவம் தீ³பேந்தோ ஹி து²ல்லச்சயமாபஜ்ஜதி. தீ³பேந்தோதி ‘‘பட²மம் ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ, பட²மஸ்ஸ ஜா²னஸ்ஸ லாபீ⁴ம்ஹி, வஸீம்ஹி, ஸச்சி²கதம் அஸ்ஸா’’தி ஏவமாதி³னா நயேன தீ³பேந்தோதி அத்தோ². ‘‘அதி⁴க³தோ’’தி மானோ அதி⁴மானோ, ஸோ யஸ்ஸ நத்தி², ஸோ அனதி⁴மானிகோ. கேன ஏவம் தீ³பேந்தோதி சே? தம் த³ஸ்ஸேதும் ‘‘காயேன வாசா’’திஆதி³ வுத்தம், காயேன வா வாசாய வா தது³ப⁴யேன வாதி அத்தோ². விஞ்ஞத்திபதே²தி யத்த² டி²தோ மனுஸ்ஸஜாதிகோ க³ஹட்டோ² வா பப்³ப³ஜிதோ வா தஸ்ஸ வசனம் பகதிஸோதேன ஸுத்வா ஸமனந்தரமேவ ‘‘இமம் நாம ஏஸ வத³தீ’’தி ஜானாதி, தத்த² ட²த்வா தீ³பேந்தோ சுதோ ப⁴வே, ந தே³வப்³ரஹ்மாதீ³ஸு அஞ்ஞதரேன ஞாதேதி அத்தோ².

சதுத்த²ம்.

10. இதா³னி சதுன்னம்பி ஸாதா⁴ரணவினிச்ச²யம் வத்தும் ‘‘பாராஜிகேதே சத்தாரோ’’திஆதி³மாஹ. தத்தா²யம் ஸங்கே²போ – சத்தாரோபி ஏதே பாராஜிகா ‘‘ஏககம்மம் ஏகுத்³தே³ஸோ ஸமஸிக்க²தா’’தி ஏவம் வுத்தஸம்வாஸஸ்ஸ அப⁴ப்³ப³தாய அஸம்வாஸா, யதா²புரே புப்³பே³ கி³ஹிகாலே ச அனுபஸம்பன்னகாலே ச அஸம்வாஸிகா, ஏவம் பச்சா² பாராஜிகம் ஆபன்னாபி அஸம்வாஸாதி. கிஞ்ச பி⁴ய்யோ – அப⁴ப்³பா³ பி⁴க்கு²பா⁴வாய புன தேன அத்தபா⁴வேன உபஸம்பதா³ய அவத்து²தாய உபஸம்பன்னா ப⁴விதும்பி அப⁴ப்³பா³தி அத்தோ². கிம் வியாதி சே? ஸீஸச்சி²ன்னோவ ஜீவிதும், யதா²பி ஸீஸச்சி²ன்னோ தேன அத்தபா⁴வேன புன ஜீவிதும் அப⁴ப்³போ³, ஏவமிமே சத்தாரோதி அதி⁴ப்பாயோ.

11. இதா³னி இமேஸு சதூஸு பாராஜிகேஸு யே பரியாயாணத்தீஹி ஸம்ப⁴வந்தி, தே த³ஸ்ஸேதும் ‘‘பரியாயோ சா’’திஆதி³ வுத்தம். தத்த² பரியாயோதி மரணாதி⁴ப்பாயஸ்ஸ காயபயோகோ³ வா வசீபயோகோ³ வா. தஸ்மா ‘‘யோ ஈதி³ஸே முஹுத்தே ஸத்த²ம் வா ஆஹரித்வா விஸம் வா கா²தி³த்வா ஸோப்³பா⁴தீ³ஸு வா பபதித்வா மரதி, ஸோ த⁴னம் வா லப⁴தி, யஸம் வா லப⁴தீ’’திஆதி³னா நயேன மரணம் அபி⁴னந்த³ந்தோ ‘‘இத³ம் ஸுத்வா யோ கோசி மரதூ’’தி யோ பரியாயேன வத³தி, தம் ஸுத்வா ஸசே கோசி ததா² மரதி, பாராஜிகம். நியமிதேன பன யம் ஸந்தா⁴ய வுத்தம், தஸ்ஸேவ மரணே பாராஜிகம். ஆணத்தி பன வுத்தத்தா²யேவ. ததியே மனுஸ்ஸவிக்³க³ஹபாராஜிகே லப்³ப⁴தீதி ஸம்ப³ந்தோ⁴. து³தியே பன அதி³ன்னாதா³னே ஆணத்தி ஏவ லப்³ப⁴தி, ந பரியாயோதி அத்தோ². கஸ்மா நம் பரியாயேன நாபஜ்ஜதீதி? யதா² மனுஸ்ஸவிக்³க³ஹே ‘‘மரணவண்ணம் வா ஸம்வண்ணேய்யா’’தி வுத்தம், ததா² இத⁴ அதி³ன்னாதா³னே ‘‘வண்ணம் வா ஸம்வண்ணேய்யா’’தி அவுத்தத்தா. ஸேஸேஸூதி பட²மசதுத்தே²ஸு பரியாயாணத்தித்³வயம் ந லப்³ப⁴தீதி அத்தோ².

12. இதா³னி சதூஸுபி யதா²ஸம்ப⁴வம் அங்க³பே⁴த³ம் த³ஸ்ஸேதும் ‘‘ஸேவேதுகாமதாசித்த’’ந்திஆதி³ வுத்தம். தத்த² மேது²னத⁴ம்மஸ்ஸாதி மேது²னத⁴ம்மபாராஜிகஸ்ஸ. பு³தா⁴தி வினயத⁴ரா.

13. மனுஸ்ஸஸந்தி மனுஸ்ஸஸந்தகதா. ஏதேன பேததிரச்சா²னக³தபரிக்³க³ஹேஸு அனாபத்தீதி தீ³பிதம் ஹோதி. ததா²ஸஞ்ஞீதி மனுஸ்ஸஸந்தகவஸேன பரபரிக்³க³ஹிதஸஞ்ஞீதி அத்தோ². வத்து²னோ க³ருதாதி பஞ்சமாஸகம் வா அதிரேகபஞ்சமாஸகம் வா தத³க்³க⁴னகம் ப⁴ண்ட³ம் வா ஹோதீதி அத்தோ². அவஹாரோ சாதி பஞ்சவீஸதியா அவஹாரேஸு யேன கேனசி அவஹாரோ ஹோதீதி அத்தோ². அதி³ன்னாதா³னஹேதுயோதி அதி³ன்னாதா³னபாராஜிகஸ்ஸ ஏதானி பஞ்ச அங்கா³னீதி அதி⁴ப்பாயோ.

14. பாணோ மானுஸ்ஸகோதி மனுஸ்ஸஜாதிகபாணோ. தஸ்மிம் பாணே பாணஸஞ்ஞிதா. கா⁴தசேதனாதி வத⁴கசேதனா. பயோகோ³தி தம்ஸமுட்டி²தோ ஸாஹத்தி²காதீ³னம் ச²ன்னம் பயோகா³னம் அஞ்ஞதரபயோகோ³. தேன பயோகே³ன மரணம். பஞ்சேதே வத⁴ஹேதுயோதி மனுஸ்ஸவிக்³க³ஹபாராஜிகஸ்ஸ பஞ்ச அங்கா³னீதி அத்தோ².

15. அஸந்ததாதி உத்தரிமனுஸ்ஸத⁴ம்மஸ்ஸ அத்தனி அஸந்ததா சாதி அத்தோ². பாபமிச்ச²தாயாரோசனாதி இமினா யோ கேவலம் பாபமிச்ச²தம் வினா மந்த³த்தா மோமூஹத்தா ப⁴ணதி, தஸ்ஸ அனாபத்தீதி தீ³பிதம் ஹோதி. தஸ்ஸாதி யஸ்ஸ ஆரோசேதி, தஸ்ஸ மனுஸ்ஸஜாதிதா ச. ‘‘யோ தே விஹாரே வஸதி, ஸோ பி⁴க்கு² அரஹா’’திஆதி³னா (பரி. 160, 336) நாஞ்ஞாபதே³ஸோ ச. ததே³வாதி ததா³ ஏவ தங்க²ணேயேவ ஜானனம். அஸந்ததீ³பனேதி உத்தரிமனுஸ்ஸத⁴ம்மாரோசனபாராஜிகேதி அத்தோ².

16. இதா³னி ‘‘பாராஜிகா ச சத்தாரோ’’தி ஏத்த² ச-ஸத்³தே³ன ஸங்க³ஹிதேஹி ஸத்³தி⁴ம் ஸமோதா⁴னேத்வா த³ஸ்ஸேதும் ‘‘அஸாதா⁴ரணா சத்தாரோ’’திஆதி³ வுத்தம். தத்த² உப்³ப⁴ஜாணுமண்ட³லிகா வஜ்ஜப்படிச்சா²தி³கா உக்கி²த்தானுவத்திகா அட்ட²வத்து²காதி இமே சத்தாரோ பி⁴க்கு²னீனம் பி⁴க்கூ²ஹி அஸாதா⁴ரணா நாம. ஏதாஸு உப்³ப⁴ஜாணுமண்ட³லிகா நாம யா காயஸம்ஸக்³க³ராகே³ன அவஸ்ஸுதா தேனேவ ராகே³ன அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானம் அதோ⁴, ஜாணுமண்ட³லானம் கப்பரானஞ்ச உபரி யேன கேனசி ஸரீராவயவேன ஆமஸனாதி³ம் ஸாதி³யதி, தஸ்ஸா அதி⁴வசனம். யா பன பி⁴க்கு²னீ அஞ்ஞிஸ்ஸா பி⁴க்கு²னியா பாராஜிகஸங்கா²தம் வஜ்ஜம் ஜானம் படிச்சா²தே³தி, ஸா வஜ்ஜப்படிச்சா²தி³கா நாம. ஸமக்³கே³ன பன ஸங்கே⁴ன உக்கி²த்தம் பி⁴க்கு²ம் யா பி⁴க்கு²னீ யம்தி³ட்டி²கோ ஸோ ஹோதி, தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா நாம. யா பன காயஸம்ஸக்³க³ராகே³ன திந்தா ததா²வித⁴ஸ்ஸேவ புரிஸஸ்ஸ ஹத்த²க்³க³ஹணம் வா ஸங்கா⁴டிகண்ணக்³க³ஹணம் வா ஸாதி³யதி, காயஸம்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்ட²தி வா, தத்த² ட²த்வா ஸல்லபதி வா, ஸங்கேதம் வா க³ச்ச²தி, புரிஸஸ்ஸ ஆக³மனம் வா ஸாதி³யதி, கேனசி வா படிச்ச²ன்னோகாஸம் பவிஸதி, ஹத்த²பாஸே ட²த்வா காயம் உபஸம்ஹரதி, அயம் அட்ட²வத்து²கா நாமாதி வேதி³தப்³பா³.

அப⁴ப்³ப³கா ஏகாத³ஸாதி ஏத்த² பண்ட³கோ தே²ய்யஸம்வாஸகோ தித்தி²யபக்கந்தகோ திரச்சா²னக³தோ மாதுகா⁴தகோ பிதுகா⁴தகோ அரஹந்தகா⁴தகோ பி⁴க்கு²னிதூ³ஸகோ ஸங்க⁴பே⁴த³கோ லோஹிதுப்பாத³கோ உப⁴தோப்³யஞ்ஜனகோதி இமே ஏகாத³ஸ அப⁴ப்³ப³புக்³க³லா நாம. விப்³ப⁴ந்தா பி⁴க்கு²னீதி யதா³ பி⁴க்கு²னீ விப்³ப⁴மிதுகாமா ஹுத்வா ஸேதவத்த²ம் வா காஸாயமேவ வா கி³ஹினிவாஸனாகாரேன நிவாஸேதி, ததா³ பாராஜிகமாபன்னா நாம ஹோதி, புன உபஸம்பத³ம் ந லப⁴தி, ஸா ச பாராஜிகாதி அத்தோ². முது³பிட்டி²கோ நாம கதபரிகம்மாய முது³காய பிட்டி²யா ஸமன்னாக³தோ. ஸோ ஏத்தாவதா ந பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதம் அத்தனோ முக²மக்³க³வச்சமக்³கே³ஸு அஞ்ஞதரம் பவேஸேதி, ததா³ பாராஜிகோ ஹோதி.

17-18. லம்பீ³தி அங்க³ஜாதஸ்ஸ தீ³க⁴த்தா ஏவம் வுத்தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதம் அத்தனோ முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முகே²ன க³ண்ஹந்தோதி ஏத்த² யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதம் அத்தனோ முகே²ன க³ண்ஹாதி, ஸோ சாதி அத்தோ². தத்தே²வாதி பரஸ்ஸ அங்க³ஜாதேவாதி அத்தோ². யோ அனபி⁴ரதியா பீளிதோ பரஸ்ஸ அங்க³ஜாதம் கம்மனியம் தி³ஸ்வா அத்தனோ வச்சமக்³கே³ன தஸ்ஸ உபரி நிஸீத³தி, தம் அத்தனோ வச்சமக்³க³ம் பவேஸேதி, ஸோ சாதி அத்தோ². ஏதே சத்தாரோ அனுலோமிகா மேது²னஸ்ஸாதி ஸம்ப³ந்தோ⁴. கத²மிதி சே? மக்³கே³ மக்³க³ப்பவேஸனஸதி³ஸதாய, ந உபி⁴ன்னம் ராக³வஸேன ஸதி³ஸபா⁴வூபக³தானம் த்³வயம்த்³வயஸமாபத்திஸதி³ஸதாய. இதா⁴க³தா சத்தாரோதி மேது²னத⁴ம்மாதி³வஸேன பாராஜிகா சத்தாரோ சாதி ஏவம் ஸமோதா⁴னதோ சதுவீஸதி பாராஜிகாதி அத்தோ².

ஏத்தா²ஹ – மாதுகா⁴தகபிதுகா⁴தகஅரஹந்தகா⁴தகா ததியபாராஜிகம் ஆபன்னா, பி⁴க்கு²னிதூ³ஸகோ லம்பீ³ஆத³யோ சத்தாரோ பட²மபாராஜிகம் ஆபன்னாயேவாதி கத்வா குதோ சதுவீஸதீதி? அதி⁴ப்பாயோ பனேத்த² அத்தி², மாதுகா⁴தகாத³யோ ஹி சத்தாரோ இத⁴ அனுபஸம்பன்னாயேவ அதி⁴ப்பேதா, லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா ஏகேன பரியாயேன மேது²னத⁴ம்மம் அப்படிஸேவினோபி ஹோந்தி, தஸ்மா விஸும் வுத்தாதி. பாராஜிகவினிச்ச²யோ.

பாராஜிகனித்³தே³ஸவண்ணனா நிட்டி²தா.

2. ஸங்கா⁴தி³ஸேஸனித்³தே³ஸவண்ணனா

19. இதா³னி ஸங்கா⁴தி³ஸேஸம் பகாஸேதும் ‘‘க³ருகா நவா’’திஆதி³ ஆரத்³த⁴ம். க³ருகாதி ஸங்கா⁴தி³ஸேஸா இத⁴ அதி⁴ப்பேதா, அஞ்ஞத்த² பன பாராஜிகாபி ஸங்க³ய்ஹந்தி. கஸ்மா ‘‘தேரஸா’’தி அவத்வா ‘‘நவா’’தி வுத்தந்தி சே? வீதிக்கமக்க²ணேயேவ ஆபஜ்ஜிதப்³ப³த்தா பட²மாபத்திகா வுத்தா, யாவததியகா பன சத்தாரோ ஸங்கா⁴தி³ஸேஸா ஸங்கா⁴யத்தத்தா சிரேன ஆபஜ்ஜந்தீதி ந வுத்தா. தத்த² மோசேதுகாமதாதி மோசேதுகாமதாயாதி அத்தோ² ‘‘அலஜ்ஜிதா’’திஆதீ³ஸு விய. இமினா பன நயேன மோசனஸ்ஸாதோ³ முச்சனஸ்ஸாதோ³ முத்தஸ்ஸாதோ³ மேது²னஸ்ஸாதோ³ ப²ஸ்ஸஸ்ஸாதோ³ கண்டூ³வனஸ்ஸாதோ³ த³ஸ்ஸனஸ்ஸாதோ³ நிஸஜ்ஜனஸ்ஸாதோ³ வாசஸ்ஸாதோ³ கே³ஹஸிதபேமம் வனப⁴ங்கி³யந்தி ஏகாத³ஸ அஸ்ஸாதா³ வுத்தா, தேஸு ஏகம்யேவ மோசனஸ்ஸாத³ம் க³ஹேத்வா ஸேஸா படிக்கி²த்தா ஹோந்தி.

தேஸம் அஸ்ஸாதா³னம் வஸேன ஏவம் வினிச்ச²யோ வேதி³தப்³போ³ – மோசேதும் அஸ்ஸாதோ³ மோசனஸ்ஸாதோ³. மோசனஸ்ஸாத³சேதனாய நிமித்தே உபக்கமதி, முச்சதி, ஸங்கா⁴தி³ஸேஸோ. ந முச்சதி சே, து²ல்லச்சயம். முச்சனஸ்ஸாதே³ ஸசே அத்தனோ த⁴ம்மதாய முச்சமானம் அஸ்ஸாதே³தி, ந உபக்கமதி, அனாபத்தி. ஸசே முச்சமானம் அஸ்ஸாதே³ந்தோ உபக்கமித்வா மோசேதி, ஸங்கா⁴தி³ஸேஸோவ. அத்தனோ த⁴ம்மதாய முத்தே அஸ்ஸாதோ³ முத்தஸ்ஸாதோ³. ஏத்தா²பி உபக்கமஸ்ஸ நத்தி²தாய அனாபத்தி. ஏவம் ஸப்³ப³த்த². மேது²னஸ்ஸாதே³ன இத்தி²ம் க³ண்ஹந்தஸ்ஸ முத்தேபி அனாபத்தி, அயம் மேது²னஸ்ஸாதோ³. ப²ஸ்ஸஸ்ஸாதோ³ து³விதோ⁴ அஜ்ஜ²த்திகோ பா³ஹிரோ சாதி. தத்த² அஜ்ஜ²த்திகே தாவ அத்தனோ நிமித்தம் ‘‘த²த்³த⁴ம் முது³கந்தி ஜானிஸ்ஸாமீ’’தி வா லோலபா⁴வேன வா கீளாபயதோ ஸசே முச்சதி, அனாபத்தி. பா³ஹிரப²ஸ்ஸஸ்ஸாதே³ காயஸம்ஸக்³க³ராகே³ன மாதுகா³மம் பு²ஸதோ ஆலிங்க³தோ ச முத்தே அனாபத்தி. கண்டூ³வனஸ்ஸாதே³ த³த்³து³கச்சா²தீ³னம் வஸேன க²ஜ்ஜமானம் நிமித்தம் கண்டூ³வனஸ்ஸாதே³ன கண்டூ³வதோ முத்தேபி அனாபத்தி. த³ஸ்ஸனஸ்ஸாதே³ மாதுகா³மஸ்ஸ அனோகாஸம் உபனிஜ்ஜா²யதோ முத்தேபி அனாபத்தி. நிஸஜ்ஜனஸ்ஸாதே³ மாதுகா³மேன ஸத்³தி⁴ம் ரஹோ நிஸின்னஸ்ஸ முத்தேபி அனாபத்தி. வாசாய அஸ்ஸாதோ³ வாசஸ்ஸாதோ³. தேன அஸ்ஸாதே³ன மாதுகா³மம் மேது²னப்படிஸம்யுத்தாஹி வாசாஹி ஓபா⁴ஸந்தஸ்ஸ முத்தேபி அனாபத்தி. கே³ஹஸிதபேமே மாதாதீ³னம் மாதாதி³பேமேன ஆலிங்க³னாதி³ம் கரோந்தஸ்ஸ முத்தேபி அனாபத்தி. வனப⁴ங்கே³ ச ஸந்த²வகரணத்தா²ய இத்தி²யா பேஸிதம் புப்பா²தி³வனப⁴ங்க³ஸஞ்ஞிதம் பண்ணாகாரம் ‘‘இத்த²ன்னாமாய நாம இத³ம் மே பேஸித’’ந்தி அஸ்ஸாதே³ன ஆமஸந்தஸ்ஸ முத்தேபி அனாபத்தி. ஏதேஸு பன மோசனஸ்ஸாத³வஸேனேவ உபக்கமந்தஸ்ஸ ஆபத்தி, ஸேஸானம் வஸேன அனாபத்தீதி வேதி³தப்³ப³ம்.

ஸுக்கஸ்ஸாதி ‘‘நீலம் பீதகம் லோஹிதகம் ஓதா³தம் தக்கவண்ணம் த³கவண்ணம் தேலவண்ணம் கீ²ரவண்ணம் த³தி⁴வண்ணம் ஸப்பிவண்ண’’ந்தி (பாரா. 237) ஏவம் ஆக³தேஸு த³ஸஸு வண்ணேஸு யஸ்ஸ கஸ்ஸசி ஸுக்கஸ்ஸாதி அதி⁴ப்பாயோ. உபக்கம்மாதி ‘‘அஜ்ஜ²த்தரூபே மோசேதி, ப³ஹித்³தா⁴ரூபே மோசேதி, அஜ்ஜ²த்தப³ஹித்³தா⁴ரூபே மோசேதி, ஆகாஸே கடிம் கம்பேந்தோ மோசேதீ’’தி (பாரா. 237) ஏவம் வுத்தேஸு சதூஸு உபாயேஸு அஞ்ஞதரேன உபாயேன ‘‘ராகூ³பத்த²ம்பே⁴ மோசேதி, வச்சூபத்த²ம்பே⁴ மோசேதி, பஸ்ஸாவூபத்த²ம்பே⁴ மோசேதி, வாதூபத்த²ம்பே⁴ மோசேதி, உச்சாலிங்க³பாணகத³ட்டூ²பத்த²ம்பே⁴ மோசேதீ’’தி ஏவம் வுத்தேஸு பஞ்சஸு காலேஸு கிஸ்மிஞ்சி காலே அங்க³ஜாதே கம்மனியம் பத்தே ‘‘ஆரோக்³யத்தா²ய மோசேதி, ஸுக²த்தா²ய மோசேதி, பே⁴ஸஜ்ஜத்தா²ய, தா³னத்தா²ய, புஞ்ஞத்தா²ய, யஞ்ஞத்தா²ய, ஸக்³க³த்தா²ய, பீ³ஜத்தா²ய, வீமம்ஸத்தா²ய, த³வத்தா²ய மோசேதீ’’தி (பாரா. 237) ஏவம் வுத்தேஸு த³ஸஸு அதி⁴ப்பாயேஸு யேன கேனசி அதி⁴ப்பாயேன ஹத்தா²தீ³ஸு யேன கேனசி உபக்கமித்வாதி அத்தோ². விமோசயந்தி அந்தமஸோ யம் ஏகா கு²த்³த³கமக்கி²கா பிவேய்ய, தத்தகம்பி மோசேந்தோதி அத்தோ². அஞ்ஞத்ர ஸுபினந்தேனாதி யா ஸுபினந்தே ஸுக்கவிஸ்ஸட்டி² ஹோதி, தம் ட²பேத்வாதி அத்தோ². ஸமணோதி யோ கோசி உபஸம்பன்னோ. க³ருகந்தி ஸங்கா⁴தி³ஸேஸம். பு²ஸேதி ஆபஜ்ஜேய்யாதி அத்தோ².

ஸுக்கவிஸ்ஸட்டி²ஸிக்கா²பத³ம் பட²மம்.

20. இதா³னி காயஸம்ஸக்³க³ம் தீ³பேதும் ‘‘இத்தி²ஸஞ்ஞீ’’திஆதி³ ஆரத்³த⁴ம். தத்த² இத்தி²ஸஞ்ஞீதி தத³ஹுஜாதாயபி மனுஸ்ஸித்தி²யா இத்தி²ஸஞ்ஞீயேவ ஹுத்வாதி அத்தோ². ஸசே தத்த² வேமதிகோ வா பண்ட³கபுரிஸதிரச்சா²னக³தஸஞ்ஞீ வா ஹோதி, து²ல்லச்சயம், ததா² இத்தி²யா காயேன காயப்படிப³த்³தா⁴மஸனே ச காயப்படிப³த்³தே⁴ன காயாமஸனே ச யக்கீ²பேதீபண்ட³கானம் காயேன காயாமஸனே ச. புரிஸதிரச்சா²னக³தித்தீ²னம் பன காயேன காயாமஸனேபி து³க்கடம், ததா² யக்கீ²ஆதீ³னம் காயேன காயப்படிப³த்³தா⁴தீ³ஸு ச. மதித்தி²யா பன து²ல்லச்சயம். காயஸம்ஸக்³க³ராக³வாதி இமினா மாதுபேமாதி³ம் மோக்கா²தி⁴ப்பாயஞ்ச படிக்கி²பதி. ஸம்பு²ஸந்தோதி காயஸம்ஸக்³க³ராகே³ன உபக்கம்ம அந்தமஸோ லோமேனபி மனுஸ்ஸித்தி²ம் ஸம்பு²ஸந்தோதி அத்த²ஸம்ப³ந்தோ⁴. இமினா யோ இத்தி²யா ஆலிங்க³தோபி காயேன ந வாயமதி, கேவலம் ப²ஸ்ஸம்யேவ அனுப⁴வதி, தஸ்ஸ அனாபத்தீதி தீ³பிதம் ஹோதி.

காயஸம்ஸக்³க³ஸிக்கா²பத³ம் து³தியம்.

21. இதா³னி து³ட்டு²ல்லவாசம் பகாஸேதும் ‘‘ததா² ஸுணந்தி’’ந்திஆதி³ ஆரத்³த⁴ம். தத்த² ததா²தி இத்தி²ஸஞ்ஞீ. மனுஸ்ஸித்தி²ம் ஸுணந்திந்தி ஸம்ப³ந்தோ⁴. ஸுணந்திந்தி இமினா படிப³லாயபி இத்தி²யா அவிஞ்ஞத்திபதே² டி²தாய தூ³தேன வா பண்ணேன வா ஆரோசேந்தஸ்ஸ து³ட்டு²ல்லவாசாபத்தின ஹோதீதி தீ³பிதம் ஹோதி. விஞ்ஞுஞ்சாதி இமினா யா மஹல்லிகாபி பா³லாபி ஏளமூகா³பி அஸத்³த⁴ம்மப்படிஸம்யுத்தம் கத²ம் ந ஜானாதி, ஸா இத⁴ நாதி⁴ப்பேதாதி த³ஸ்ஸேதி. வச்சமக்³க³பஸ்ஸாவமக்³கா³னம் வஸேன மக்³க³ம் வா மேது²னம் வா ஆரப்³பா⁴தி ஸம்ப³ந்தோ⁴. து³ட்டு²ல்லவாசாய ராகோ³ து³ட்டு²ல்லவாசாராகோ³, தேன து³ட்டு²ல்லவாசாராகே³ன. தம் அஸ்ஸாதே³ந்தோ ஓபா⁴ஸேத்வா து³ருத்தவசனம் வத்வா க³ருகம் பு²ஸேதி அத்தோ².

கத²ம் த்³வே மக்³கே³ ஆரப்³ப⁴ பஸம்ஸதி க³ரஹதி? தத்த² பஸம்ஸாயபி தாவ ‘‘இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ந தாவஸீஸம் ஏதி. ‘‘தவ வச்சமக்³கோ³ ச பஸ்ஸாவமக்³கோ³ ச ஸுபோ⁴ ஸுஸண்டா²னோ த³ஸ்ஸனீயோ, ஈதி³ஸேன நாம இத்தி²லக்க²ணேன ஸுப⁴லக்க²ணேன ஸமன்னாக³தாஸீ’’தி வத³தி, ஸீஸம் ஏதி, ஸங்கா⁴தி³ஸேஸோ ஹோதீதி அத்தோ². க³ரஹணே பன ‘‘ஸிக²ரணீஸி, ஸம்பி⁴ன்னாஸி, உப⁴தோப்³யஞ்ஜனாஸீ’’தி இமானி தீணி ஸுத்³தா⁴னியேவ ஸீஸம் ஏந்தி வச்சமக்³க³பஸ்ஸாவமக்³கா³னம் நியதவசனத்தா அச்சோளாரிகத்தா ச. அஞ்ஞானி பன ‘‘அனிமித்தாஸி, நிமித்தமத்தாஸீ’’திஆதீ³னி மக்³கா³னம் அனியதவசனத்தா மேது²னேன க⁴டேத்வா வுத்தானி ஏவ ஸீஸம் ஏந்தி. மேது²னப்படிஸம்யுத்தே ‘‘தே³ஹி மே, அரஹஸி மே தா³து’’ந்திஆதீ³ஹி பன ஸீஸம் ந ஏதி, ‘‘மேது²னத⁴ம்மம் தே³ஹீ’’திஆதி³னா மேது²னத⁴ம்மே க⁴டிதேயேவ ஸங்கா⁴தி³ஸேஸோ. இத்தி²யா வச்சமக்³க³பஸ்ஸாவமக்³கே³ ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணாதி³ப⁴ணனே து²ல்லச்சயம், ததா² யக்கீ²பேதீபண்ட³கேஸு வச்சமக்³க³பஸ்ஸாவமக்³கே³ மேது²னேபி. இமேஸம் பன யக்கீ²ஆதீ³னம் அத⁴க்க²காதி³கே வுத்தப்பகாரே பதே³ஸே து³ம்க்கடம், ததா² இத்தி²யாதீ³னம் உப்³ப⁴க்க²கே அதோ⁴ஜாணுமண்ட³லே காயப்படிப³த்³தே⁴ சாதி.

து³ட்டு²ல்லவாசாஸிக்கா²பத³ம் ததியம்.

22. இதா³னி அத்தகாமபாரிசரியம் த³ஸ்ஸேதும் ‘‘வத்வா’’திஆதி³ வுத்தம். தத்த² வத்வாதி து³ட்டு²ல்லோபா⁴ஸனே வுத்தப்பகாரம் இத்தி²ம் இத்தி²ஸஞ்ஞீயேவ ஹுத்வா வத்வாதி அத்தோ². அத்தகாமுபட்டா²னவண்ணந்தி ஏத்த² மேது²னத⁴ம்மஸங்கா²தேன காமேன உபட்டா²னம் காமுபட்டா²னம், அத்தனோ அத்தா²ய காமுபட்டா²னம் அத்தகாமுபட்டா²னம், அத்தனா வா காமிதம் இச்சி²தந்தி அத்தகாமம், ஸயம் மேது²னராக³வஸேன பத்தி²தந்தி அத்தோ², அத்தகாமஞ்ச தம் உபட்டா²னஞ்சாதி அத்தகாமுபட்டா²னம், தஸ்ஸ வண்ணோ அத்தகாமுபட்டா²னவண்ணோ, தம் அத்தகாமுபட்டா²னவண்ணம். ‘‘ஏதத³க்³க³ம், ப⁴கி³னி, பாரிசரியானம் யா மாதி³ஸம் ஸீலவந்தம் கல்யாணத⁴ம்மம் ப்³ரஹ்மசாரிம் ஏதேன த⁴ம்மேன பரிசரேய்யா’’தி ஏவம் வத்வாதி ஸம்ப³ந்தோ⁴. மேது²னராகி³னோதி இமினா கி³லானபச்சயாதீ³ஹி உபட்டா²னஸ்ஸ வண்ணம் ப⁴ணதோ அனாபத்தீதி தீ³பிதம் ஹோதி. வாசா மேது²னயுத்தேனாதி ஏத்த² மேது²னயுத்தேனேவ வாசாய மேது²னயாசனே க³ருகம் ஹோதி, ந அஞ்ஞதா²தி அதி⁴ப்பாயோ.

அத்தகாமபாரிசரியஸிக்கா²பத³ம் சதுத்த²ம்.

23. இதா³னி ஸஞ்சரித்தம் த³ஸ்ஸேதும் ‘‘படிக்³க³ஹேத்வா’’திஆதி³ ஆரத்³த⁴ம். தத்த² படிக்³க³ஹேத்வாதி இத்தி²யா வா புரிஸேன வா உபி⁴ன்னம் மாதாதீ³ஹி வா ‘‘ப⁴ந்தே, இத்த²ன்னாமம் இத்தி²ம் வா புரிஸம் வா ஏவம் ப⁴ணாஹீ’’தி வுத்தோ தேஸம் வசனம் ‘‘ஸாதூ⁴’’தி வா ‘‘ஹோதூ’’தி வா ‘‘ப⁴ணாமீ’’தி வா யேன கேனசி ஆகாரேன வசீபே⁴த³ம் கத்வா, ஸீஸகம்பனாதீ³ஹி வா ஸம்படிச்சி²த்வாதி அத்தோ². ஸந்தே³ஸந்தி ஏத்த² பன இத்தீ² த³ஸவிதா⁴ மாதுரக்கி²தா பிதுரக்கி²தா மாதாபிதுரக்கி²தா பா⁴துரக்கி²தா ப⁴கி³னிரக்கி²தா ஞாதிரக்கி²தா கோ³த்தரக்கி²தா த⁴ம்மரக்கி²தா ஸாரக்கா² ஸபரித³ண்டா³தி. த³ஸ ப⁴ரியாயோ த⁴னக்கீதா ச²ந்த³வாஸினீ போ⁴க³வாஸினீ படவாஸினீ ஓத³பத்தகினீ ஓப⁴டசும்ப³டகா தா³ஸீ ச ப⁴ரியா ச கம்மகாரீ ச ப⁴ரியா ச த⁴ஜாஹடா முஹுத்திகா சாதி.

தாஸு மாதுரக்கி²தா பி⁴க்கு²ம் பஹிணதி ‘‘க³ச்ச², ப⁴ந்தே, இத்த²ன்னாமம் ப்³ரூஹி ‘ஹோமி இத்த²ன்னாமஸ்ஸ ப⁴ரியா த⁴னக்கீதா…பே… முஹுத்திகா சா’’தி, அயம் இத்தி²யா ஸந்தே³ஸோ நாம. ஸசே மாதுரக்கி²தாய மாதாபிதாபா⁴தாப⁴கி³னிஆத³யோ பி⁴க்கு²ம் பஹிணந்தி ‘‘க³ச்ச², ப⁴ந்தே, இத்த²ன்னாமம் ப்³ரூஹி ‘ஹோது இத்த²ன்னாமஸ்ஸ ப⁴ரியா த⁴னக்கீதா…பே… முஹுத்திகா சா’’தி, அயம்பி இத்தி²யா ஸந்தே³ஸோயேவ நாம. ஏவம் பிதுரக்கி²தாதீ³ஸுபி நயோ நேதப்³போ³. புரிஸோ பி⁴க்கு²ம் பஹிணதி ‘‘க³ச்ச², ப⁴ந்தே, இத்த²ன்னாமம் மாதுரக்கி²தம் ப்³ரூஹி…பே… ஸபரித³ண்ட³ம் ப்³ரூஹி ‘ஹோது கிர இத்த²ன்னாமஸ்ஸ ப⁴ரியா த⁴னக்கீதா…பே… முஹுத்திகா சா’’தி, அயம் புரிஸஸ்ஸ ஸந்தே³ஸோ நாம. ஸசே புரிஸஸ்ஸ மாதாபிதாபா⁴தாப⁴கி³னிஆத³யோ பி⁴க்கு²ம் பஹிணந்தி ‘‘க³ச்ச², ப⁴ந்தே, இத்த²ன்னாமம் மாதுரக்கி²தம் ப்³ரூஹி…பே… ஸபரித³ண்ட³ம் ப்³ரூஹி ‘ஹோது இத்த²ன்னாமஸ்ஸ ப⁴ரியா த⁴னக்கீதா…பே… முஹுத்திகா சா’’தி, அயம்பி புரிஸஸ்ஸ ஸந்தே³ஸோயேவ நாம, ஆணாபனந்தி அத்தோ².

வீமம்ஸித்வாதி ஏத்த² வுத்தப்பகாரேன ஸாஸனம் க³ஹேத்வா தஸ்ஸா இத்தி²யா வா புரிஸஸ்ஸ வா தேஸம் அவஸ்ஸாரோசனகானம் மாதாபிதாபா⁴தாப⁴கி³னிஆதீ³னம் வா ஆரோசேத்வாதி அத்தோ². ஹரந்தி யத்த² பஹிதோ, தத்த² க³ந்த்வா தஸ்ஸா இத்தி²யா வா புரிஸஸ்ஸ வா ஆரோசேதி, ஸா இத்தீ² வா புரிஸோ வா ‘‘ஸாதூ⁴’’தி ஸம்படிச்ச²து வா, மா வா, லஜ்ஜாய வா துண்ஹீ ஹோது, புன ஆக³ந்த்வா தஸ்ஸா இத்தி²யா வா புரிஸஸ்ஸ வா ஹரந்தோ க³ருகம் பு²ஸேதி ஸம்ப³ந்தோ⁴. ஏத்தாவதா ‘‘படிக்³க³ண்ஹதி வீமம்ஸதி பச்சாஹரதீ’’தி வுத்தம் அங்க³த்தயம் ஸம்பாதி³தம் ஹோதி. இமாய திவங்க³ஸம்பத்தியா ஸங்கா⁴தி³ஸேஸோ, இதோ யேஹி கேஹிசி த்³வீஹி அங்கே³ஹி து²ல்லச்சயம், ஏகேன து³க்கடம். யக்கீ²பேதீபண்ட³கேஸு அங்க³த்தயேனபி து²ல்லச்சயமேவ, ஏகேன வா த்³வீஹி வா து³க்கடந்தி.

ஸஞ்சரித்தஸிக்கா²பத³ம் பஞ்சமம்.

24. இதா³னி குடிகாரஸிக்கா²பத³ம் ஆவி காதும் ‘‘ஸம்யாசிதபரிக்கா²ர’’ந்திஆதி³ ஆரத்³த⁴ம். தத்ராயம் ஸங்கே²பத்தோ² – ‘‘வாஸிம் தே³த², ப²ரஸும் தே³தா²’’திஆதி³னா ஸயம் பவத்திதயாசனாய க³ஹிதபரிக்கா²ரம் ஸம்யாசிதபரிக்கா²ரம் பத³பா⁴ஜனே வுத்தனயேன ஸங்க⁴ம் திக்க²த்தும் யாசித்வா லத்³த⁴பி⁴க்கூ²ஹி வா ஸங்கே⁴னேவ வா தத்த² க³ந்த்வா ஸாரம்பா⁴னாரம்ப⁴ஸபரிக்கமனாபரிக்கமனபா⁴வம் ஞத்வா அதே³ஸிதவத்து²கம் ‘‘குடி நாம உல்லித்தா வா ஹோதி அவலித்தா வா உல்லித்தாவலித்தா வா’’தி (பாரா. 349) ஏவம் வுத்தலக்க²ணம் குடிம். ‘‘தத்ரித³ம் பமாணம், தீ³க⁴ஸோ த்³வாத³ஸ வித³த்தி²யோ ஸுக³தவித³த்தி²யா, திரியம் ஸத்தந்தரா’’தி (பாரா. 348) ஏவம் வுத்தபமாணாதிக்கந்தம், ‘‘மய்ஹம் வாஸாகா³ரம் ஏஸா’’தி ஏவம் அத்தா உத்³தே³ஸோ ஏதிஸ்ஸாதி அத்துத்³தே³ஸா, தம் அத்துத்³தே³ஸம் கத்வா க³ரும் ஸங்கா⁴தி³ஸேஸம் பு²ஸேதி ஸம்ப³ந்தோ⁴. அயம் பனேத்த² வினிச்ச²யோ – அதே³ஸிதவத்து²கம் பமாணாதிக்கந்தம் குந்த²கிபில்லிகாதீ³னம் ஆஸயே கதத்தா ஸாரம்ப⁴ம் த்³வீஹி ப³லீப³த்³தே³ஹி யுத்தேன ஸகடேன க³ந்தும் அஸக்குணேய்யதாய அபரிக்கமனம் உல்லித்தாதி³பே⁴த³ம் குடிம் அத்தனோ வஸனத்தா²ய கரோந்தோ வா காராபேந்தோ வா ‘‘இதா³னி நிட்டா²னம் க³மிஸ்ஸதீ’’தி பட²மபிண்ட³தா³னே து²ல்லச்சயம், து³தியபிண்ட³தா³னேன லேபே க⁴டிதே த்³வே ச ஸங்கா⁴தி³ஸேஸே த்³வே ச து³க்கடானி, ஸசே தே³ஸிதவத்து²காயேவ வா பமாணாதிக்கந்தாயேவ வா ஹோதி, ஏகம் ஸங்கா⁴தி³ஸேஸம் த்³வே ச து³க்கடானி ஆபஜ்ஜதீதி.

குடிகாரஸிக்கா²பத³ம் ச²ட்ட²ம்.

25. இதா³னி விஹாரகாரஸிக்கா²பத³ம் த³ஸ்ஸேதும் ‘‘மஹல்லக’’ந்திஆதி³ ஆரத்³த⁴ம். தத்த² மஹல்லகந்தி ஸஸ்ஸாமிகபா⁴வேன ஸம்யாசிதகுடிதோ மஹந்தபா⁴வோ ஏதஸ்ஸ அத்தி², யஸ்மா வா வத்து²ம் தே³ஸாபேத்வா பமாணாதிக்கமேனாபி காதும் வட்டதி, தஸ்மா பமாணமஹந்ததாயபி மஹல்லகோ, தம் மஹல்லகம் விஹாரம் வா கத்வாதி அத்தோ². ஏத்த² பன அதே³ஸிதவத்து²கபா⁴வேன ஏகோ ஸங்கா⁴தி³ஸேஸோ, ஸேஸம் அனந்தரஸதி³ஸமேவ. இத⁴ ச தத்த² ச வாஸாகா³ரம் ட²பேத்வா உபோஸதா²கா³ரம் வா ஜந்தாக⁴ரம் வா அக்³கி³ஸாலம் வா ப⁴விஸ்ஸதீதி ஏவமாதி³னா நயேன கரோந்தஸ்ஸ அனாபத்தி.

விஹாரகாரஸிக்கா²பத³ம் ஸத்தமம்.

26. இதா³னி அமூலகஸிக்கா²பத³ம் பகாஸேதும் ‘‘அமூலகேனா’’திஆதி³ ஆரத்³த⁴ம். தத்த² அமூலகேனாதி யம் சோத³கேன சுதி³தகம்ஹி புக்³க³லே அதி³ட்ட²ம் அஸுதம் அபரிஸங்கிதம், இத³ம் ஏதேஸம் த³ஸ்ஸனஸவனபரிஸங்காஸங்கா²தானம் மூலானம் அபா⁴வதோ அமூலகம், தேன அமூலகேன வத்து²னாதி ஸம்ப³ந்தோ⁴. தத்த² அதி³ட்ட²ம் நாம அத்தனோ பஸாத³சக்கு²னா வா தி³ப்³ப³சக்கு²னா வா அதி³ட்ட²ம். அஸுதம் நாம ததே²வ கேனசி வுச்சமானம் ந ஸுதம். அபரிஸங்கிதம் நாம சித்தேன அபரிஸங்கிதம், தம் பன தி³ட்ட²ஸுதமுதவஸேன திவித⁴ம். தத்த² பி⁴க்கு²ஞ்ச மாதுகா³மஞ்ச ததா²ரூபே டா²னே தி³ஸ்வா ‘‘அத்³தா⁴ இமேஹி கத’’ந்தி வா ‘‘கரிஸ்ஸந்தீ’’தி வா பரிஸங்கதி, இத³ம் தி³ட்ட²பரிஸங்கிதம் நாம. அந்த⁴காரே படிச்ச²ன்னோகாஸே வா பி⁴க்கு²ஸ்ஸ ச மாதுகா³மஸ்ஸ ச வசனம் ஸுத்வா து³தியஸ்ஸ அத்தி²பா⁴வம் அஜானந்தோ புப்³பே³ வுத்தனயேன பரிஸங்கதி, இத³ம் ஸுதபரிஸங்கிதம் நாம. து⁴த்தேஹி இத்தீ²ஹி ஸத்³தி⁴ம் பச்சந்தவிஹாரேஸு புப்ப²க³ந்த⁴ஸுராதீ³ஹி அனுப⁴வித்வா க³தட்டா²னம் தி³ஸ்வா ‘‘கேன நு கோ² இத³ம் கத’’ந்தி வீமம்ஸந்தோ தத்ர கேனசி பி⁴க்கு²னா க³ந்தா⁴தீ³ஹி பூஜா கதா ஹோதி, பே⁴ஸஜ்ஜத்தா²ய அரிட்ட²ம் வா பீதம், ஸோ தஸ்ஸ க³ந்த⁴ம் கா⁴யித்வா ‘‘அயம் ஸோ ப⁴விஸ்ஸதீ’’தி பரிஸங்கதி, இத³ம் முதபரிஸங்கிதம் நாம. ஏவம் திவிதா⁴ய பரிஸங்காய அபா⁴வேன அபரிஸங்கிதந்தி அத்தோ².

சோதே³ந்தோதி ‘‘பாராஜிகம் த⁴ம்மம் ஆபன்னோஸி, அஸ்ஸமணோஸி, அஸக்யபுத்தியோஸீ’’திஆதீ³ஹி வசனேஹி ஸயம் சோதே³ந்தோதி அத்தோ². ஏவம் சோதே³ந்தஸ்ஸ வாசாய வாசாய ஸங்கா⁴தி³ஸேஸோ. சோதா³பேந்தோ வாதி அத்தனா தஸ்ஸ ஸமீபே ட²த்வா அஞ்ஞம் பி⁴க்கு²ம் ஆணாபேத்வா சோதா³பேந்தோ தஸ்ஸ ஆணத்தஸ்ஸ வாசாய வாசாய க³ரும் பு²ஸேதி அத்தோ². அத² ஸோபி சாவனாதி⁴ப்பாயேன ‘‘மயாபி தி³ட்ட²ம் அத்தீ²’’திஆதி³னா நயேன சோதே³தி, த்³வின்னம்பி வாசாய ஆபத்தி. வத்து²னா அந்திமேன சாதி பி⁴க்கு²னோ அனுரூபேஸு ஏகூனவீஸதியா பாராஜிகேஸு அஞ்ஞதரேனாதி அத்தோ². சாவேதுந்தி ப்³ரஹ்மசரியா சாவேதும், யோ ஸுத்³த⁴ம் வா அஸுத்³த⁴ம் வா கதூபஸம்பத³ம் புக்³க³லம் ஸுத்³த⁴தி³ட்டி²கோ ஸமானோ சாவனாதி⁴ப்பாயேன சோதே³தி வா சோதா³பேதி வா, தஸ்ஸ ஸங்கா⁴தி³ஸேஸோதி அதி⁴ப்பாயோ. ஸுணமானந்தி இமினா பரம்முகா² தூ³தேன வா பண்ணேன வா சோதே³தி. சோதே³ந்தஸ்ஸ ந ருஹதீதி தீ³பிதம் ஹோதி. பரம்முகா² பன ஸத்தஹி ஆபத்திக்க²ந்தே⁴ஹி வத³ந்தஸ்ஸ து³க்கடம்.

அமூலகஸிக்கா²பத³ம் அட்ட²மம்.

27. இதா³னி அஞ்ஞபா⁴கி³யஸிக்கா²பத³ம் த³ஸ்ஸேதும் ‘‘அஞ்ஞஸ்ஸ கிரிய’’ந்திஆதி³மாஹ. தத்த² அஞ்ஞஸ்ஸ கிரியந்தி அஞ்ஞஸ்ஸ க²த்தியாதி³ஜாதிகஸ்ஸ பாராஜிகஸ்ஸ வீதிக்கமஸங்கா²தம் கிரியம் தி³ஸ்வாதி ஸம்ப³ந்தோ⁴. தேன லேஸேனாதி ‘‘த³ஸ லேஸா ஜாதிலேஸோ நாமலேஸோ கோ³த்தலேஸோ லிங்க³லேஸோ ஆபத்திலேஸோ பத்தலேஸோ சீவரலேஸோ உபஜ்ஜா²யலேஸோ ஆசரியலேஸோ ஸேனாஸனலேஸோ’’தி (பாரா. 394) ஏவம் வுத்தேஸு த³ஸஸு லேஸேஸு யோ தஸ்மிம் புக்³க³லே தி³ஸ்ஸதி, தேன லேஸேன தத³ஞ்ஞம் புக்³க³லம் ப்³ரஹ்மசரியா சாவேதும் அந்திமவத்து²னா சோதே³ந்தோ க³ருகம் பு²ஸேதி அத்தோ². தத்த² அஞ்ஞம்பி வத்து²ம் லிஸ்ஸதி ஸிலிஸ்ஸதி வோஹாரமத்தேனேவ ஈஸகம் அல்லீயதீதி லேஸோ, ஜாதியேவ லேஸோ ஜாதிலேஸோ. ஏஸ நயோ ஸேஸபதே³ஸுபி. லேஸேன சோதே³ந்தோ கத²ம் சோதே³தி? அஞ்ஞோ க²த்தியஜாதிகோ இமினா சோத³கேன பாராஜிகம் த⁴ம்மம் அஜ்ஜா²பஜ்ஜந்தோ தி³ட்டோ² ஹோதி, ஸோ அஞ்ஞம் அத்தனோ வேரிம் க²த்தியஜாதிகம் பி⁴க்கு²ம் பஸ்ஸித்வா தம் க²த்தியஜாதிலேஸம் க³ஹேத்வா ஏவம் சோதே³தி ‘‘க²த்தியோ மயா தி³ட்டோ² பாராஜிகம் த⁴ம்மம் அஜ்ஜா²பஜ்ஜந்தோ, த்வம்பி க²த்தியோ பாராஜிகம் த⁴ம்மம் ஆபன்னோஸீ’’தி வா ‘‘ஸோ த்வம் க²த்தியோ, நாஞ்ஞோ, பாராஜிகம் த⁴ம்மம் அஜ்ஜா²பன்னோஸீ’’தி வா சோதே³தி. ஏவம் நாமலேஸாத³யோபி வேதி³தப்³பா³.

அஞ்ஞபா⁴கி³யஸிக்கா²பத³ம் நவமம்.

28. ஏத்தாவதா ‘‘க³ருகா நவா’’தி உத்³தி³ட்டே² வித்தா²ரதோ த³ஸ்ஸேத்வா இதா³னி தேஸு ஆபன்னேஸு படிபஜ்ஜனாகாரம் த³ஸ்ஸேதும் ‘‘சா²தே³தி ஜானமாபன்ன’’ந்திஆதி³ வுத்தம். தஸ்ஸாயம் பிண்ட³த்தோ² – யோ பி⁴க்கு² ‘‘அயம் இத்த²ன்னாமா ஆபத்தீ’’தி ஆபத்திவஸேன வா ‘‘இத³ம் பி⁴க்கூ²னம் ந வட்டதீ’’தி ஏவம் வத்து²வஸேன வா ஜானமாபன்னம் ஆபத்திம் யாவ சா²தே³தி, தாவ தேன பி⁴க்கு²னா அகாமா பரிவாஸோ வஸிதப்³போ³தி. சரேய்யாதி மானத்தம் ஸமாதா³ய வஸேய்ய. கித்தகம் தி³வஸந்தி சே? ச² ரத்தியோ. மானத்தவாஸோ பன ஸங்கே⁴யேவ, ந க³ணே, ந புக்³க³லே, தேன வுத்தம் ‘‘ஸங்கே⁴’’தி. பரிவுத்தோ²தி ‘‘தயோ கோ² உபாலி பாரிவாஸிகஸ்ஸ பி⁴க்கு²னோ ரத்திச்சே²தா³ ஸஹவாஸோ விப்பவாஸோ அனாரோசனா’’தி (சூளவ. 83) ஏவம் வுத்தம் ரத்திச்சே²த³ம் அகத்வா பரிவுத்தோ²தி அத்தோ². தத்த² ஸஹவாஸோதி பகதத்தேன பி⁴க்கு²னா ஸத்³தி⁴ம் ஏகச்ச²ன்னே உத³கபாதட்டா²னப்³ப⁴ந்தரே வாஸோ. விப்பவாஸோ நாம அஞ்ஞம் பகதத்தம் பி⁴க்கு²ம் வினா வாஸோ. அனாரோசனாதி ஆக³ந்துகாதீ³னம் அனாரோசனா. ஏதேஸு தீஸு ஏகேனாபி ரத்திச்சே²தோ³ ஹோதி ஏவ. ஏத்த² பன உபசாரஸீமக³தானம் ஆரோசேதப்³ப³ம், ந ப³ஹி டி²தானம், ப³ஹி டி²தானம்பி ஸசே ஸத்³த³ம் ஸுணாதி, பஸ்ஸதி, தூ³ரம் வா க³ந்த்வா ஆரோசேதப்³ப³மேவ, அனாரோசேந்தஸ்ஸ ரத்திச்சே²தோ³ சேவ வத்தபே⁴தே³ து³க்கடஞ்ச ஹோதி. அஜானந்தஸ்ஸேவ உபசாரஸீமம் பவிஸித்வா க³ச்ச²ந்தி சே, ரத்திச்சே²தோ³வ ஹோதி, ந வத்தபே⁴தோ³.

சிண்ணமானத்தந்தி ‘‘சத்தாரோ கோ², உபாலி, மானத்தசாரிகஸ்ஸ பி⁴க்கு²னோ ரத்திச்சே²தா³ ஸஹவாஸோ விப்பவாஸோ அனாரோசனா ஊனே க³ணே சரண’’ந்தி (சூளவ. 92) ஏவம் வுத்தம் ரத்திச்சே²த³ம் அகத்வா சிண்ணமானத்தம் பரினிட்டி²தமானத்தந்தி அத்தோ². ஏத்த² பன ஸஹவாஸாத³யோ பரிவாஸே வுத்தப்பகாரா ஏவ. ‘‘ஊனே க³ணே சரண’’ந்தி ஏத்த² க³ணோ சத்தாரோ வா அதிரேகா வா பி⁴க்கூ², தஸ்மா ஸசேபி தீஹி பி⁴க்கூ²ஹி ஸத்³தி⁴ம் வஸதி, ரத்திச்சே²தோ³ ஹோதியேவ, ‘‘ஸசே பன தேன தேஸம் அத்தி²பா⁴வம் தி³ஸ்வா ஆரோசிதே பக்கமந்தி, ஊனே க³ணே சரணதோ³ஸோ ந ஹோதீ’’தி (சூளவ. அட்ட². 97) அட்ட²கதா²ஸு வுத்தம் கிர. அப்³பே⁴ய்யாதி தம் பி⁴க்கு²ம் வீஸதிக³ணோ ஸங்கோ⁴ அப்³பே⁴ய்ய ஸம்படிச்சே²ய்ய, அப்³பா⁴னகம்மவஸேன ஓஸாரேய்யாதி அத்தோ². ஸசே ஏகேனபி ஊனோ வீஸதிக³ணோ பி⁴க்கு²ஸங்கோ⁴ தம் பி⁴க்கு²ம் அப்³பே⁴ய்ய, ஸோ ச பி⁴க்கு² ந அப்³பி⁴தோ, தே ச பி⁴க்கூ² கா³ரய்ஹா, து³க்கடம் ஆபஜ்ஜந்தீதி அத்தோ².

29. இதா³னி யதா² சா²தி³தா ஆபத்தி ச²ன்னா ஹோதி, தம் பகாரம் த³ஸ்ஸேதும் ‘‘ஆபத்தீ’’திஆதி³ வுத்தம். தத்தா²யம் பத³யோஜனா – ஆபத்திதா ச அனுக்கி²த்ததா ச அனந்தராயதா ச பஹுத்ததா ச ஆபத்தினுக்கி²த்தஅனந்தராயபஹுத்ததாயோ, ஏதாஸு சதூஸு ததா²ஸஞ்ஞிதா ச சா²தே³துகாமோ ஹுத்வா சா²த³னா சாதி ஏவம் த³ஸஹங்கே³ஹி அருணுக்³க³மம்ஹி ச²ன்னா ஹோதீதி. ஏத்த² பன ஆபத்திஆதீ³ஸு சதூஸு ஆபத்திஸஞ்ஞிதா ச அனுக்கி²த்தஸஞ்ஞிதா ச அனந்தராயஸஞ்ஞிதா ச பஹுத்தஸஞ்ஞிதா சாதி ஏவம் ஸஞ்ஞாவஸேன யோஜேத்வா அட்ட²ங்கா³னி க³ஹேதப்³பா³னி, சா²தே³துகாமோதி இத³மேகம், சா²த³னாதி இத³மேகந்தி ஏவம் த³ஸ.

ஏதேஸு பன ஆதி³தோ பட்டா²ய அயம் வினிச்ச²யோ – ‘‘ஆபத்தி ச ஹோதி ஆபத்திஸஞ்ஞீ சா’’தி ஏத்த² யம் ஆபன்னோ, ஸா தேரஸன்னம் அஞ்ஞதரா ஹோதி, ஸோபி ச தத்த² க³ருகாபத்திஸஞ்ஞீயேவ ஹுத்வா ஜானந்தோ சா²தே³தி, ச²ன்னா ஹோதி. ஸசே தத்த² அனாபத்திஸஞ்ஞீ வா அஞ்ஞாபத்திஸஞ்ஞீ வா வேமதிகோ வா ஹோதி, அச்ச²ன்னாவ ஹோதி. திவித⁴ம் பன உக்கே²பனீயகம்மம், தேன அகதோ அனுக்கி²த்தோ. ஸோ சே பகதத்தஸஞ்ஞீ ஹுத்வா சா²தே³தி, ச²ன்னா ஹோதி. ஸசே அபகதத்தஸஞ்ஞீ சா²தே³தி, அச்ச²ன்னா ஹோதி. அபகதத்தேன பன பகதத்தஸஞ்ஞினாபி அபகதத்தஸஞ்ஞினாபி சா²தி³தம் அச்சா²தி³தமேவ ஹோதீதி. அனந்தராயிகோதி யஸ்ஸ த³ஸஸு ராஜசோரஅக்³கி³உத³கமனுஸ்ஸாமனுஸ்ஸவாளஸரீஸபஜீவிதப்³ரஹ்மசரியந்தராயேஸுபி ஏகோபி நத்தி², ஸோ சே அனந்தராயிகஸஞ்ஞீ ஹுத்வா சா²தே³தி, ச²ன்னா ஹோதி. ஸசே ஸோ அந்த⁴காரபீ⁴ருகோ அனந்தராயே ஏவ வாளாதி³அந்தராயஸஞ்ஞீ ஹுத்வா சா²தே³தி, அச்ச²ன்னாவ ஹோதி. பஹூதி யோ ஸக்கோதி ஸபா⁴க³பி⁴க்கு²னோ ஸமீபம் க³ந்துஞ்சேவ ஆரோசிதுஞ்ச, ஸோ சே பஹுஸஞ்ஞீ ஹுத்வா சா²தே³தி, ச²ன்னா ஹோதி. யோ பன அபஹு ஹுத்வா பஹுஸஞ்ஞீ, பஹு வா அபஹுஸஞ்ஞீ ஹுத்வா சா²தே³தி, அச்ச²ன்னாவ ஹோதீதி.

அருணுக்³க³மம்ஹீதி ஏத்த² புரேப⁴த்தம் வா ஆபத்திம் ஆபன்னோ ஹோதி பச்சா²ப⁴த்தம் வா, யாவ அருணம் ந உக்³க³ச்ச²தி, தாவ ஆரோசேதப்³பா³. ஸசே பன அருணப்³ப⁴ந்தரே ஸதக்க²த்தும்பி சா²தே³துகாமதா உப்பஜ்ஜதி, அச்ச²ன்னாவ ஹோதி. ஆரோசேந்தோ பன ஸபா⁴க³ஸங்கா⁴தி³ஸேஸம் ஆபன்னஸ்ஸ ஆரோசேதும் ந வட்டதி. ஸசே ஆரோசேதி, ஆபத்தி பன ஆவிகதா ஹோதி, ஆரோசனபச்சயா பன அஞ்ஞம் து³க்கடம் ஆபத்திம் ஆபஜ்ஜதி. இமினா அஞ்ஞம்பி வத்து²ஸபா⁴கா³பத்திம் ஆரோசேதும் ந வட்டதீதி தீ³பிதோ ஹோதி. ஆரோசேந்தேன பன ‘‘அஹம் தவ ஸந்திகே ஏகம் ஆபத்திம் ஆவி கரோமீ’’தி வா ‘‘ஆசிக்கா²மீ’’தி வா ‘‘ஆரோசேமீ’’தி வா ‘‘ஏகம் ஆபத்திம் ஆபன்னபா⁴வம் ஜானாஹீ’’தி வா ‘‘ஏகம் க³ருகாபத்திம் ஆவி கரோமீ’’தி வா ஆதி³னா நயேன வத்தப்³ப³ம், ஏத்தாவதா அச்ச²ன்னாவ ஹோதி. ஸசே ‘‘லஹுகாபத்திம் ஆரோசேமீ’’தி வத³தி, ச²ன்னாவ ஹோதீதி. ஸங்கா⁴தி³ஸேஸவினிச்ச²யோ.

ஸங்கா⁴தி³ஸேஸனித்³தே³ஸவண்ணனா நிட்டி²தா.

3. சீவரனித்³தே³ஸவண்ணனா

30. ஏவம் க³ருகே ஸிக்கி²தப்³பா³காரம் த³ஸ்ஸேத்வா இதா³னி சீவரேஸு த³ஸ்ஸேதும் ‘‘சீவர’’ந்தி உத்³த⁴டம். தத்த² ஜாதிதோ ச² சீவரானி (மஹாவ. 339; பாரா. அட்ட². 2.462-463; கங்கா². அட்ட². கதி²னஸிக்கா²பத³வண்ணனா), தானி கானீதி சே, தம் த³ஸ்ஸேதும் ‘‘கோ²மா’’திஆதி³ ஆரத்³த⁴ம். தத்த² கோ²மம் நாம கோ²மவாகஸுத்தேஹி கதம் வத்த²ம். ஸாணம் நாம ஸாணவாகேஹி கதம் வத்த²ம். ப⁴ங்க³ம் நாம கோ²மஸுத்தாதீ³ஹி பஞ்சஹி மிஸ்ஸேத்வா கதம் வத்த²ம். பாடேக்கம் வாகமயமேவ வாதி வத³ந்தி. கம்ப³லம் நாம மனுஸ்ஸலோமம் வாளலோமம் ட²பேத்வா லோமேஹி வாயித்வா கதம் வத்த²ம். ச²ளேதானீதி ச² ஏதானி. ஸஹ அனுலோமேஹீதி ஸானுலோமானி. ஜாதிதோ பன கப்பியானி ச² சீவரானீதி வுத்தம் ஹோதி.

31. இதா³னி தேஸம் அனுலோமானி த³ஸ்ஸேதும் ‘‘து³கூல’’ந்திஆதி³ வுத்தம். தத்த² (மஹாவ. அட்ட². 305) து³கூலம் ஸாணஸ்ஸ அனுலோமம் வாகமயத்தா. பட்டுண்ணந்தி பட்டுண்ணதே³ஸே பாணகேஹி ஸஞ்ஜாதவத்த²ம். ஸோமாரதே³ஸே, சீனதே³ஸே ஜாதம் ஸோமாரசீனஜம் படந்தி ஸம்ப³ந்தோ⁴. இமானி தீணிபி கோஸேய்யஸ்ஸ அனுலோமானி பாணகேஹி கதஸுத்தமயத்தா. இத்³தி⁴ஜந்தி ஏஹிபி⁴க்கூ²னம் புஞ்ஞித்³தி⁴யா நிப்³ப³த்தசீவரம். தம் பன கோ²மாதீ³னம் அஞ்ஞதரம் ஹோதி. கப்பருக்கே²ஹி நிப்³ப³த்தம் ஜாலினியா தே³வகஞ்ஞாய அனுருத்³த⁴த்தே²ரஸ்ஸ தி³ன்னவத்தா²தி³கம் தே³வதி³ன்னம். தம்பி கோ²மாதீ³ஹி நிப்³ப³த்தவத்த²ஸதி³ஸத்தா ச²ன்னம்பி அனுலோமம் ஹோதியேவ கப்பாஸிகஸ்ஸ வா, இத்³தி⁴ஜம்பி ததே²வ வேதி³தப்³ப³ம். தஸ்ஸ தஸ்ஸாதி கோ²மாதி³கஸ்ஸ. அனுலோமிகந்தி அனுரூபம்.

32-33. ஏவம் ஜாதிதோ ஸானுலோமானி ச² சீவரானி த³ஸ்ஸேத்வா இதா³னி தேஸு அதி⁴ட்டா²னாதி³கம் விதா⁴னம் த³ஸ்ஸேதும் ‘‘திசீவர’’ந்திஆதி³ வுத்தம். ஏத்த² (கங்கா². அட்ட². கதி²னஸிககா²பத³வண்ணனா; மஹாவ. 358) தி⁴ட்டா²னதோ புப்³பே³ திசீவரம் நாம பாடேக்கம் நத்தி² ஸங்கா⁴டிஆதி³ப்பஹோனகஸ்ஸ பச்சத்த²ரணாதி³வஸேனாபி அதி⁴ட்டா²தும் அனுஞ்ஞாதத்தா. தஸ்மா ‘‘திசீவரம் அதி⁴ட்டே²ய்ய ந விகப்பேய்யா’’தி ஏத்த² ‘‘இமம் ஸங்கா⁴டி’’ந்தி ஏவம் நாமே க³ஹிதே ‘‘அதி⁴ட்டா²ன’’மிச்சேவ வத்தப்³ப³ம், ‘‘விகப்பேமீ’’தி பன ந வத்தப்³ப³ந்தி அதி⁴ப்பாயோ. ஏவம் ஸேஸேஸுபி. முக²புஞ்ச²னஞ்ச நிஸீத³னஞ்ச முக²புஞ்ச²னனிஸீத³னம். கண்டு³ச்சா²தி³ந்தி கண்டு³ப்படிச்சா²தி³ம் அதி⁴ட்டே²ய்ய, ந விகப்பேய்யாதி ஸம்ப³ந்தோ⁴. ஏத்தா²தி இமேஸு நவஸு சீவரேஸு. திசீவரந்தி திசீவராதி⁴ட்டா²னனயேன அதி⁴ட்டி²ததிசீவரம். வினா அலத்³த⁴ஸம்முதிகோ பி⁴க்கு² அவிப்பவாஸஸம்முதிஅலத்³த⁴ட்டா²னே ஏகாஹம்பி ஹத்த²பாஸம் விஜஹித்வா ந வஸேய்யாதி அத்தோ². ‘‘ந பி⁴க்க²வே சாதுமாஸம் நிஸீத³னேன விப்பவஸிதப்³ப³ம், யோ விப்பவஸேய்ய, ஆபத்தி து³க்கடஸ்ஸா’’தி கு²த்³த³கக்க²ந்த⁴கே (சூளவ. 263) வுத்தத்தா சாதுமாஸம் நிஸீத³னம் வினா ந வஸேய்யாதி அத்தோ².

34. இதா³னி அதி⁴ட்டா²னவிதி⁴ம் த³ஸ்ஸேதும் ‘‘இமம் ஸங்கா⁴டி’’ந்திஆதி³ வுத்தம். தத்த² மிச்சதி⁴ட்ட²யேதி இதி அதி⁴ட்ட²யே, ‘‘இமம் ஸங்கா⁴டிம் அதி⁴ட்டா²மீ’’தி ஏவம் ஸங்கா⁴டிம் அதி⁴ட்ட²யேதி அத்தோ². அஹத்த²பாஸமேதந்தி தூ³ரே டி²தம் பன ட²பிதோகாஸம் ஸல்லக்கே²த்வா ஸசே ஏகம், ‘‘ஏத’’ந்தி, ப³ஹூனி சே, ‘‘ஏதானீ’’தி வத்வா அதி⁴ட்ட²யேதி அத்த²ஸம்ப³ந்தோ⁴. ஸேஸேஸுபி அயம் நயோதி யதா² ‘‘இமம் ஸங்கா⁴டிம் அதி⁴ட்டா²மீ’’தி வுத்தம், ஏவம் ‘‘இமம் உத்தராஸங்க³ம், இமம் கண்டு³ப்படிச்சா²தி³ம் அதி⁴ட்டா²மீ’’தி ஏவம் அத்தனோ நாமேனேவ வத்வா ஸம்முகா²பி பரம்முகா²பி வுத்தனயேன அதி⁴ட்டா²தப்³ப³ந்தி வுத்தம் ஹோதி.

35. இதா³னி ஸசே புப்³பே³ அதி⁴ட்டி²தம் திசீவரம் நிஸீத³னம் வஸ்ஸிகஸாடிகம் கண்டு³ப்படிச்சா²தீ³தி இமேஸு ச²ஸு சீவரேஸு அஞ்ஞதரம் சீவரம் அத்தி², புன ததா²வித⁴ம் சீவரம் அதி⁴ட்ட²ஹித்வா பரிஹரிதும் இச்ச²ந்தேன ‘‘த்³வே பன ந வட்டந்தீ’’தி (பாரா. அட்ட². 2.469; கங்கா². அட்ட². கதி²னஸிக்கா²பத³வண்ணனா) வுத்தத்தா புப்³பே³ அதி⁴ட்டி²தம் பச்சுத்³த⁴ரித்வா அதி⁴ட்டா²தப்³ப³ந்தி த³ஸ்ஸேதும் ‘‘அதி⁴ட்ட²ஹந்தோ’’திஆதி³ வுத்தம், தம் உத்தானமேவ. பத்தாதி⁴ட்ட²ஹனே ததா²தி ‘‘இமம் பத்தம், ஏதம் பத்த’’ந்தி ஏவம் நாமமத்தமேவ விஸேஸோ. ஸேஸம் தாதி³ஸமேவாதி அத்தோ².

36. ஏதம் இமம் வ ஸங்கா⁴டிம் ஸம்ஸேதி ஏத்த² ஸசே அந்தோக³ப்³பே⁴ வா ஸாமந்தவிஹாரே வா ஹோதி, ட²பிதட்டா²னம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³, ஸசே ஹத்த²பாஸே ஹோதி, ‘‘இமம் ஸங்கா⁴டி’’ந்தி தேஸம் தேஸம் நாமவஸேன வாசா பி⁴ந்தி³தப்³பா³தி அத்தோ². பச்சுத்³தா⁴ரேபி ஏஸேவ நயோ. ஏத்த² பன ‘‘த்³வே சீவரஸ்ஸ அதி⁴ட்டா²னா காயேன வா அதி⁴ட்டே²தி, வாசாய வா அதி⁴ட்டே²தீ’’தி (பரி. 322) வுத்தத்தா ஸங்கா⁴டிஆதி³கம் ஹத்தே²ன க³ஹேத்வா ‘‘இமம் ஸங்கா⁴டிம் அதி⁴ட்டா²மீ’’திஆதி³னா நயேன சித்தேன ஆபோ⁴க³ம் கத்வா காயவிகாரம் கரோந்தேன காயேன அதி⁴ட்டா²தப்³ப³ம், யேன கேனசி ஸரீராவயவேன அபு²ஸந்தஸ்ஸ ந வட்டதி. வாசாய அதி⁴ட்ட²ஹந்தேன வசீபே⁴த³ம் கத்வாவ அதி⁴ட்டா²தப்³ப³ம். ததா² பத்தேபி. விதூ³தி பண்டி³தோ.

37-8. இதா³னி தேஸம் பமாணபரிச்சே²த³ம் த³ஸ்ஸேதும் ‘‘ஸங்கா⁴டி பச்சி²மந்தேனா’’திஆதி³ வுத்தம். தத்த² தீ³க⁴தோ முட்டி²பஞ்சகதோ (பாரா. அட்ட². 2.469; கங்கா². அட்ட². கதி²னஸிக்கா²பத³வண்ணனா) பட்டா²ய ‘‘தத்ரித³ம் ஸுக³தஸ்ஸ ஸுக³தசீவரப்பமாணம், தீ³க⁴ஸோ நவ வித³த்தி²யோ ஸுக³தவித³த்தி²யா, திரியம் ச² வித³த்தி²யோ’’தி (பாசி. 548) ஏவம் வுத்தஸுக³தசீவரூனாபி வட்டதி. திரியம் பன முட்டி²த்திகம். ச-ஸத்³தே³ன அதிரேகம்பி வட்டதீதி அத்தோ². உத்தராஸங்க³ஸ்ஸபி ஏததே³வ பமாணந்தி தம் த³ஸ்ஸேதும் ‘‘ததா² ஏகம்ஸிகஸ்ஸாபீ’’தி வுத்தம். அந்தரவாஸகஸ்ஸ பன ‘‘பாருபனேனபி ஹி ஸக்கா நாபி⁴ம் படிச்சா²தே³து’’ந்தி (பாரா. அட்ட². 2.469) அட்ட²கதா²வசனதோ ‘‘த்³விஹத்தோ² வா’’தி வுத்தம்.

39. நிஸீத³னஸ்ஸ தீ³கே⁴னாதி ஏத்த² (பாசி. 531 ஆத³யோ; பாசி. அட்ட². 531; கங்கா². அட்ட². நிஸீத³னஸிக்கா²பத³வண்ணனா) நிஸீத³னந்தி ஸந்த²தஸதி³ஸம் ஸந்த²ரித்வா ஏகஸ்மிம் அந்தே வுத்தப்பமாணேன த்³வீஸு டா²னேஸு பா²லேத்வா கதாஹி தீஹி த³ஸாஹி யுத்தஸ்ஸ பரிக்கா²ரஸ்ஸேதம் நாமம்.

40. கண்டு³ப்படிச்சா²தி³ (பாசி. 538; மஹாவ. 354; பாசி. அட்ட². 537; கங்கா². அட்ட². கண்டு³ப்படிச்சா²தி³ஸிக்கா²பத³வண்ணனா) நாம யஸ்ஸ அதோ⁴னாபி⁴உப்³ப⁴ஜாணுமண்ட³லம் கண்டு³ வா பிளகா வா அஸ்ஸாவோ வா து²ல்லகச்சு² வா ஆபா³தோ⁴, தஸ்ஸ படிச்சா²த³னத்தா²ய அனுஞ்ஞாதம் சீவரம். கா³தா²யோ ஸுவிஞ்ஞேய்யாவ.

41. அட்³ட⁴தேய்யாவாதி (பாசி. 544) ஏத்த² ததோ உத்³த⁴ம் ந வட்டதீதி அத்தோ².

42. ஏத்தா²தி ஸங்கா⁴டிதோ பட்டா²ய யாவ வஸ்ஸிகஸாடிகா, தாவ த³ஸ்ஸிதசீவரேஸூதி அத்தோ². தது³த்தரிந்தி ததோ தேஸம் சீவரானம் வுத்தப்பமாணதோ உத்தரிம் கரோந்தஸ்ஸ சே²த³னபாசித்தி ஹோதீதி பாட²ஸேஸோ, தம் அதிரேகம் சி²ந்தி³த்வா புன பாசித்தியம் தே³ஸேதப்³ப³ந்தி அத்தோ². பச்சத்த²ரணமுக²சோளாதி ஏத்த² ‘‘அனுஜானாமி, பி⁴க்க²வே, யாவ மஹந்தம் பச்சத்த²ரணம் ஆகங்க²தி, தாவ மஹந்தம் பச்சத்த²ரணம் காது’’ந்தி (மஹாவ. 353) வுத்தத்தா பச்சத்த²ரணஸ்ஸ பமாணபரிச்சே²தோ³ நத்தி²,. முக²புஞ்ச²னசோளஸ்ஸ பன உக்கட்ட²வஸேன வா அந்திமவஸேன வா பமாணபரிச்சே²தோ³ ந வுத்தோ, தஸ்மா தம்பி அப்பமாணிகம். தேன வுத்தம் ‘‘ஆகங்கி²தப்பமாணிகா’’தி, இச்சி²தப்பமாணிகாதி அத்தோ². யாவ ஏகம் தோ⁴வீயதி, தாவ அஞ்ஞம் பரிபோ⁴க³த்தா²ய இச்சி²தப்³ப³ந்தி த்³வேபி வட்டந்தி.

43. ந தீ³பிதந்தி கத்த² ந தீ³பிதம்? அட்ட²கதா²ஸு. கஸ்மாதி சே? ‘‘தேன கோ² பன ஸமயேன பி⁴க்கூ²னம் பரிபுண்ணம் ஹோதி திசீவரம், அத்தோ² ச ஹோதி பரிஸ்ஸாவனேஹிபி த²விகாஹிபி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, பரிக்கா²ரசோளக’’ந்தி (மஹாவ. 357) ப³ஹூனம் பத்தத²விகபரிஸ்ஸாவனாதீ³னம் ஸங்க³ஹவஸேன வுத்தத்தா பாடேக்கம் நிதா⁴னமுக²ந்தி. யஸ்மா பன ப⁴க³வதா ‘‘யம் யம் லப்³ப⁴தி, தம் தம் இமினா விதா⁴னேன அதி⁴ட்ட²ஹித்வா புன யேன யேன பரிஸ்ஸாவனாதி³னா அத்தோ² ஹோதி, தம் தம் கத்வா க³ண்ஹந்தூ’’தி அனுகம்பாய அனுஞ்ஞாதம், தஸ்மா விகப்பனுபக³பச்சி²மசீவரப்பமாணம் த²விகம்பி படபரிஸ்ஸாவனம்பி ப³ஹூனிபி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’தி வத்வா அதி⁴ட்டா²தும்பி வட்டதியேவ. தஸ்மா வுத்தம் ‘‘ததா² வத்வா’’தி, ‘‘பரிக்கா²ரசோள’’ந்தி வத்வாதி அத்தோ². விகப்பியந்தி விகப்பனுபக³ம்.

44. அஹதகப்பானந்தி (மஹாவ. 348) ஏகவாரம் தோ⁴விதகானம்.

45. உதுத்³த⁴டானந்தி உதுதோ தீ³க⁴காலதோ உத்³த⁴டானம், கதவத்த²கிச்சானம் பிலோதிகானந்தி வுத்தம் ஹோதி. ஸேஸாதி உத்தராஸங்க³அந்தரவாஸகா. பம்ஸு விய குச்சி²தபா⁴வம் படிக்கூலபா⁴வம் உலதி க³ச்ச²தீதி பம்ஸுகூலம், சோளக²ண்டா³னமேதம் நாமம், தஸ்மிம் பம்ஸுகூலே யதா²ருசீதி அத்தோ². கஸ்மாதி சே? ‘‘அனுஜானாமி, பி⁴க்க²வே, அஹதானம் து³ஸ்ஸானம் அஹதகப்பானம் தி³கு³ணம் ஸங்கா⁴டிம் ஏகச்சியம் உத்தராஸங்க³ம் ஏகச்சியம் அந்தரவாஸகம், உதுத்³த⁴டானம் து³ஸ்ஸானம் சதுக்³கு³ணம் ஸங்கா⁴டிம் தி³கு³ணம் உத்தராஸங்க³ம் தி³கு³ணம் அந்தரவாஸகம், பம்ஸுகூலே யாவத³த்த²ம், பாபணிகே உஸ்ஸாஹோ கரணீயோ’’தி வுத்தத்தா, தஸ்மா ஸுஸானாதீ³ஸு பதிதபம்ஸுகூலே ச அந்தராபணே பதிதபிலோதிகசீவரே ச படபரிச்சே²தோ³ நத்தி², படஸதம்பி வட்டதீதி ஸித்³த⁴ம்.

46. இதா³னி ‘‘அனுஜானாமி, பி⁴க்க²வே, சி²ன்னகம் ஸங்கா⁴டிம் சி²ன்னகம் உத்தராஸங்க³ம் சி²ன்னகம் அந்தரவாஸக’’ந்தி (மஹாவ. 345) வத்வா புன ‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ திசீவரே கயிரமானே ஸப்³ப³ம் சி²ன்னகம் நப்பஹோதி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, த்³வே சி²ன்னகானி ஏகம் அச்சி²ன்னகந்தி. த்³வே சி²ன்னகானி ஏகம் அச்சி²ன்னகம் நப்பஹோதி. அனுஜானாமி, பி⁴க்க²வே, த்³வே அச்சி²ன்னகானி ஏகம் சி²ன்னகந்தி. ஏகம் சி²ன்னகம் நப்பஹோதி. அனுஜானாமி, பி⁴க்க²வே, அன்வாதி⁴கம்பி ஆரோபேதும். ந ச, பி⁴க்க²வே, ஸப்³ப³ம் அச்சி²ன்னகம் தா⁴ரேதப்³ப³ம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 360) ஏவம் வுத்தவிதா⁴னம் த³ஸ்ஸேதும் ‘‘தீஸூ’’திஆதி³ ஆரத்³த⁴ம். தஸ்ஸ அத்தோ² – தீஸு சீவரேஸு யம் சி²ந்தி³த்வா ஸிப்³பி³தும் ஸப்³ப³பச்சி²மப்பமாணம் பஹோதி, தம் சி²ந்தி³தப்³ப³ம். ஸப்³பே³ஸு பன அப்பஹோந்தேஸு அன்வாதி⁴கம் ஆதி³யேய்யாதி. தத்த² அன்வாதி⁴ நாம அனுவாதம் விய ஸம்ஹரித்வா சீவரஸ்ஸ உபரி ஸங்கா⁴டிஆகாரேன ஆரோபேதப்³ப³ம். ஆக³ந்துகபத்தந்திபி வத³ந்தி. இத³ம் பன அப்பஹோனகே அனுஞ்ஞாதம். ஸசே பஹோதி, ந வட்டந்தி, சி²ந்தி³தப்³ப³மேவ. அனாதி³ண்ணந்தி அனாரோபிதம் அன்வாதி⁴கம். ந தா⁴ரேய்யாதி திசீவராதி⁴ட்டா²னவஸேன அதி⁴ட்ட²ஹித்வா ந தா⁴ரேதப்³ப³ந்தி அதி⁴ப்பாயோ.

47-8. இதா³னி உதோ³ஸிதஸிக்கா²பத³னயம் த³ஸ்ஸேதும் ‘‘கா³மே’’திஆதி³ வுத்தம். ஏத்த² பன ஸசே கா³மோ (பாரா. 478; பாரா. அட்ட². 2.477-478; கங்கா². அட்ட². உதோ³ஸிதஸிக்கா²பத³வண்ணனா) ஏகஸ்ஸ ரஞ்ஞோ வா போ⁴ஜகஸ்ஸ வா வஸேன ஏககுலஸ்ஸ ஹோதி, பாகாராதி³னா பரிக்கி²த்தத்தா ஏகூபசாரோ ச, ஏவரூபே கா³மே சீவரம் நிக்கி²பித்வா தஸ்மிம் கா³மே யதா²ருசிதட்டா²னே வஸிதும் லப்³ப⁴தி. ஸசே ஸோ கா³மோ அபரிக்கி²த்தோ, யஸ்மிம் க⁴ரே சீவரம் நிக்கி²த்தம் ஹோதி, தஸ்மிம் க⁴ரே வஸிதப்³ப³ம், தஸ்ஸ வா க⁴ரஸ்ஸ ஸமந்ததோ ஹத்த²பாஸா ந விஜஹிதப்³ப³ம்.

ஸசே ஸோ கா³மோ வேஸாலிகுஸினாராத³யோ விய நானாராஜூனம் வா போ⁴ஜகானம் வா ஹோதி, வுத்தப்பகாரேன பரிக்கி²த்தோ ச, ஏவரூபே கா³மே யஸ்மிம் க⁴ரே சீவரம் நிக்கி²த்தம், தஸ்மிம் க⁴ரே வா வத்த²ப்³ப³ம். யஸ்ஸா வீதி²யா தம் க⁴ரம் ஹோதி, தஸ்ஸா வீதி²யா தஸ்ஸ க⁴ரஸ்ஸ ஸம்முகா²ட்டா²னே ஸபா⁴யே வா நக³ரத்³வாரே வா வத்த²ப்³ப³ம், தேஸம் ஸபா⁴யத்³வாரானம் ஹத்த²பாஸா வா ந விஜஹிதப்³ப³ம். ஸசே அபரிக்கி²த்தோ, யஸ்மிம் க⁴ரே நிக்கி²த்தம், தத்த² வா தஸ்ஸ ஹத்த²பாஸே வா வத்த²ப்³ப³ம்.

நிவேஸனாத³யோ ஹம்மியபரியோஸானா கா³மபரிக்கே²பதோ ப³ஹி ஸன்னிவிட்டா²தி வேதி³தப்³பா³. இதரதா² தேஸம் கா³மக்³க³ஹணேனேவ க³ஹிதத்தா கா³மஸ்ஸ ஏககுலனானாகுலஏகூபசாரனானூபசாரதாவஸேனேவ வினிச்ச²யோ வத்தப்³போ³ ஸியா. நிவேஸனாதீ³னம் வஸேனேவ பாளியம் (பாரா. 478 ஆத³யோ) அத்தோ² விப⁴த்தோ, ந கா³மவஸேன. உதோ³ஸிதவினிச்ச²யே அயம் நயோ வுத்தோயேவ.

நிவேஸனேதி ஏத்த² ஸசே ஏககுலஸ்ஸ நிவேஸனம் ஹோதி பரிக்கி²த்தஞ்ச, அந்தோனிவேஸனே சீவரம் நிக்கி²பித்வா அந்தோனிவேஸனே வத்த²ப்³ப³ம். அபரிக்கி²த்தஞ்சே ஹோதி, யஸ்மிம் க³ப்³பே⁴ சீவரம் நிக்கி²த்தம், தஸ்மிம் வத்த²ப்³ப³ம், தஸ்ஸ க³ப்³ப⁴ஸ்ஸ ஹத்த²பாஸா வா ந விஜஹிதப்³ப³ம். ஸசே நானாகுலஸ்ஸ ஹோதி பரிக்கி²த்தஞ்ச, யஸ்மிம் க³ப்³பே⁴ சீவரம் நிக்கி²த்தம், தஸ்மிம் க³ப்³பே⁴ வத்த²ப்³ப³ம், ஸப்³பே³ஸம் ஸாதா⁴ரணத்³வாரமூலே வா தேஸம் க³ப்³ப⁴த்³வாரமூலே வா தேஸம் க³ப்³ப⁴த்³வாரமூலானம் வா ஹத்த²பாஸா ந விஜஹிதப்³ப³ம். அபரிக்கி²த்தஞ்சே ஹோதி, யஸ்மிம் க³ப்³பே⁴ சீவரம் நிக்கி²த்தம், தஸ்மிம் க³ப்³பே⁴ வத்த²ப்³ப³ம், ஹத்த²பாஸா வா ந விஜஹிதப்³ப³ம்.

உதோ³ஸிதோதி யானாதீ³னம் ப⁴ண்டா³னம் ஸாலா. பாஸாதோ³தி தீ³க⁴பாஸாதோ³. ஹம்மியந்தி முண்ட³ச்ச²த³னபாஸாதோ³. நாவா பன த²லம் ஆரோபேத்வா நிக்கி²த்தாபி ஹோதி, ஸமுத்³தே³ டி²தாபி. ஸசே ஏககுலஸ்ஸ நாவா ஹோதி, அந்தோனாவாய சீவரம் நிக்கி²பித்வா அந்தோனாவாய வத்த²ப்³ப³ம். நானாகுலஸ்ஸ நாவா ஹோதி நானாக³ப்³பா⁴ நானாஓவரகா, யஸ்மிம் ஓவரகே சீவரம் நிக்கி²த்தம், தஸ்மிம் வத்த²ப்³ப³ம், சீவரஸ்ஸ ஹத்த²பாஸா வா ந விஜஹிதப்³ப³ம்.

அட்டோதி படிராஜாதீ³னம் படிபா³ஹனத்த²ம் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோதி ஏககூடஸங்க³ஹிதோ சதுரஸ்ஸபாஸாதோ³. இமேஸு பன உதோ³ஸிதாதீ³ஸு மாளபரியோஸானேஸு நிவேஸனே வுத்தனயேனேவ வினிச்ச²யோ வேதி³தப்³போ³. நிவேஸனந்தி பன உதோ³ஸிதாதீ³னம் வஸேன அகதாய பதிஸ்ஸயவிகதியா அதி⁴வசனம்.

ஆராமோ நாம புப்பா²ராமப²லாராமாதி³கோ. ஸசே ஏககுலஸ்ஸ ஆராமோ ஹோதி பரிக்கி²த்தோ ச, அந்தோஆராமே சீவரம் நிக்கி²பித்வா அந்தோஆராமே வத்த²ப்³ப³ம். ஸசே அபரிக்கி²த்தோ, சீவரஸ்ஸ ஹத்த²பாஸா ந விஜஹிதப்³ப³ம். ஸசே நானாகுலஸ்ஸ ஆராமோ ஹோதி பரிக்கி²த்தோ ச, த்³வாரமூலே வா வத்த²ப்³ப³ம், த்³வாரமூலஸ்ஸ ஹத்த²பாஸா வா ந விஜஹிதப்³ப³ம். அபரிக்கி²த்தோ சே, சீவரஸ்ஸ ஹத்த²பாஸா ந விஜஹிதப்³ப³ம்.

ஸத்தோ² நாம ஜங்க⁴ஸத்த²ஸகடஸத்தா²னமஞ்ஞதரோ. ஸசே ஏககுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³பா³, பஸ்ஸதோ அப்³ப⁴ந்தரம் ந விஜஹிதப்³ப³ம். அப்³ப⁴ந்தரம் நாம அட்ட²வீஸதிஹத்த²ம் ஹோதி. ஸசே க³ச்ச²ந்தோ ஸத்தோ² ஸகடே வா ப⁴க்³கே³, கோ³ணே வா நட்டே² அந்தரா சி²ஜ்ஜதி, யஸ்மிம் கோட்டா²ஸே சீவரம் நிக்கி²பிதப்³ப³ம், தத்த² வஸிதப்³ப³ம். ஸசே நானாகுலஸ்ஸ ஹோதி, ஸத்தே² சீவரம் நிக்கி²பித்வா சீவரஸ்ஸ ஹத்த²பாஸா ந விஜஹிதப்³ப³ம்.

கே²த்தக²லேஸு ஆராமே வுத்தஸதி³ஸோவ வினிச்ச²யோ. து³மேதி ருக்க²மூலே. ஸசே ஏககுலஸ்ஸ ருக்க²மூலம் ஹோதி, யம் மஜ்ஜ²ன்ஹிககாலே ஸமந்தா சா²யா ப²ரதி, தஸ்மிம் டா²னே அவிரளே பதே³ஸே தஸ்ஸ சா²யாய பு²ட்டோ²காஸஸ்ஸ அந்தோ ஏவ நிக்கி²பிதப்³ப³ம். ஸசே விரளஸாக²ஸ்ஸ பன ருக்க²ஸ்ஸ ஆதபேன பு²ட்டோ²காஸே ட²பேதி, அருணுக்³க³மனே ஸசே ஸோ பி⁴க்கு² தஸ்ஸ ஹத்த²பாஸே ந ஹோதி, அஞ்ஞஸ்மிம் வா டா²னே தஸ்ஸ சா²யாயபி ஹோதி, நிஸ்ஸக்³கி³யம் ஹோதியேவ. நானாகுலஸ்ஸ சே ஹோதி, சீவரஸ்ஸ ஹத்த²பாஸா ந விஜஹிதப்³ப³ம்.

அஜ்ஜோ²காஸே பன விஞ்ஜா²டவீஆதீ³ஸு அரஞ்ஞேஸுபி ஸமுத்³த³மஜ்ஜே² மச்ச²ப³ந்தா⁴னம் அக³மனபதே²ஸு தீ³பகேஸுபி சீவரம் ட²பேத்வா ததோ ஸமந்தா ஸத்தப்³ப⁴ந்தரே பதே³ஸே யத்த² கத்த²சி வஸிதப்³ப³ம். ஸசே ஸத்தப்³ப⁴ந்தரதோ கேஸக்³க³மத்தம்பி அதிக்கமித்வா அருணம் உட்ட²பேதி, நிஸ்ஸக்³கி³யம் ஹோதி.

ஏத்த² பன பாளியம் ‘‘கா³மோ ஏகூபசாரோ நானூபசாரோ’’திஆதி³னா (பாரா. 477) அவிஸேஸேன மாதிகம் நிக்கி²பித்வாபி கா³மனிவேஸனஉதோ³ஸிதகே²த்தத⁴ஞ்ஞகரணஆராமவிஹாரானம் ஏகூபசாரனானூபசாரதா ‘‘கா³மோ ஏகூபசாரோ நாம ஏககுலஸ்ஸ கா³மோ ஹோதி பரிக்கி²த்தோ ச அபரிக்கி²த்தோ சா’’திஆதி³னா (பாரா. 478) பரிக்கி²த்தாபரிக்கி²த்தவஸேன விப⁴த்தா. அட்டமாளபாஸாத³ஹம்மியனாவாஸத்த²ருக்க²மூலஅஜ்ஜோ²காஸானம்பி ஏவம் அவத்வா ‘‘ஏககுலஸ்ஸ அட்டோ ஹோதி, நானாகுலஸ்ஸ அட்டோ ஹோதீ’’திஆதி³னா (பாரா. 484) நயேன ஏககுலனானாகுலவஸேன ச அந்தே ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரம் நானூபசாரோ’’தி (பாரா. 494) ச ஏவம் ஏகூபசாரனானூபசாரதா விப⁴த்தா. தஸ்மா கா³மாதீ³ஸு பரிக்கி²த்தம் ஏகூபசாரம், அபரிக்கி²த்தம் நானூபசாரந்தி ச அட்டாதீ³ஸு யம் ஏககுலஸ்ஸ, தம் ஏகூபசாரம் நானாகுலஸ்ஸ நானூபசாரந்தி ச க³ஹேதப்³ப³ம். அஜ்ஜோ²காஸபதே³ வுத்தனயேன க³ஹேதப்³ப³ம்.

பி⁴க்கு²ஸம்முதியாஞ்ஞத்ராதி யம் கி³லானஸ்ஸ பி⁴க்கு²னோ சீவரம் ஆதா³ய பக்கமிதும் அஸக்கோந்தஸ்ஸ ஞத்திது³தியேன கம்மேன அவிப்பவாஸஸம்முதி தீ³யதி, தம் ட²பேத்வாதி அத்தோ². லத்³த⁴ஸம்முதிகஸ்ஸ பன யாவ ரோகோ³ ந வூபஸம்மதி, தஸ்மிம் வூபஸந்தே அஞ்ஞோ வா குப்பதி, அனாபத்தியேவ.

49. ‘‘அனுஜானாமி, பி⁴க்க²வே, கண்டு³ப்படிச்சா²தி³ம் யாவ ஆபா³தா⁴ அதி⁴ட்டா²தும், ததோ பரம் விகப்பேதும். வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும், ததோ பரம் விகப்பேது’’ந்தி (மஹாவ. 358) வுத்தத்தா ரோக³பரியந்தா கண்டு³ப்படிச்சா²தி³, வஸ்ஸானபரியந்தா வஸ்ஸிகஸாடிகாதி அத்தோ². ஸேஸாதி திசீவராத³யோ காலவஸேன அபரியந்திகாதி அத்தோ².

50. பச்சத்த²ரணாதி³த்தயம் ஸத³ஸம்பி அத³ஸம்பி ரத்தம்பி அரத்தம்பி ஆதி³ண்ணகப்பம்பி அனாதி³ண்ணகப்பம்பி லப்³ப⁴தீதி அத்தோ². நிஸீத³னந்தி நிஸீத³னஞ்ச ரத்தம் அனாதி³ண்ணகப்பஞ்ச லப்³ப⁴தீதி அதி⁴ப்பாயோ. பச்சத்த²ரணபரிக்கா²ரமுக²புஞ்ச²னசோளானி பன நீலம்பி பீதகம்பி லோஹிதகம்பி புப்ப²த³ஸாதி³கம்பி வட்டந்தி, தஸ்மா ‘‘ஸத³ஸம்பீ’’திஆதி³ வுத்தம். ஏவரூபம் பன நிவாஸேதும் வா பாருபிதும் வா ந வட்டதி, கேவலம் பச்சத்த²ரணாதி³வஸேன அதி⁴ட்டா²னமத்தம் காதும் வட்டதி.

51. திசீவரம் கண்டு³ப்படிச்சா²தி³ வஸ்ஸிகஸாடிகாதி இத³ம் பன ஸேஸசீவரபஞ்சகம் அத³ஸம் ரஜிதம்யேவ கப்பதி, தஞ்ச ஆதி³ண்ணகப்பமேவாதி அத்தோ². ஸத³ஸம்வ நிஸீத³னந்தி இத³ம் பன புப்³பே³ ‘‘ஸத³ஸம்பீ’’தி ஏத்த² வுத்தத்தா அத³ஸம்பி நிஸீத³னம் வட்டதீதி ஸம்மோஹனிவாரணத்த²ம் வுத்தந்தி வத³ந்தி.

52. அனதி⁴ட்டி²தந்தி திசீவராதி³வஸேன அனதி⁴ட்டி²தம். அனிஸ்ஸட்ட²ம் நாம அஞ்ஞேஸம் அவிஸ்ஸஜ்ஜிதம், தம் பன விகப்பேத்வா பரிபு⁴ஞ்ஜிதப்³ப³ந்தி அத்தோ².

இதா³னி விகப்பனுபக³ஸ்ஸ பமாணம் ஹேட்டி²மபரிச்சே²தே³ன த³ஸ்ஸேதும் ‘‘ஹத்த²தீ³க⁴’’ந்திஆதி³மாஹ. தத்த² ‘‘அனுஜானாமி, பி⁴க்க²வே, ஆயாமேன அட்ட²ங்கு³லம் ஸுக³தங்கு³லேன சதுரங்கு³லவித்த²தம் பச்சி²மம் சீவரம் விகப்பேது’’ந்தி (மஹாவ. 358) வுத்தத்தா தீ³க⁴தோ ஏகஹத்த²ம் புது²லதோ உபட்³ட⁴ஹத்த²ம் விகப்பேதப்³ப³ந்தி அதி⁴ப்பாயோ.

53. திசீவரஸ்ஸாதி வினயதிசீவரஸ்ஸ, ந து⁴தங்க³திசீவரஸ்ஸ. தஸ்ஸ பன இமேஸு நவஸு சீவரத்தயமேவ லப்³ப⁴தி, ந அஞ்ஞம் லப்³ப⁴தி. ஸப்³ப³மேதந்தி ஸப்³ப³ம் அதி⁴ட்டா²னவிதா⁴னஞ்ச பரிஹரணவிதா⁴னஞ்சாதி அத்தோ². பரிக்கா²ரசோளியோ ஸப்³ப³ந்தி திசீவராதி³கம் நவவித⁴ம்பி சீவரம். ததா² வத்வாதி ‘‘பரிக்கா²ரசோள’’ந்தி வத்வா. அதி⁴ட்ட²தீதி அதி⁴ட்டா²தி. கிம் பன திசீவரம் பரிக்கா²ரசோளம் அதி⁴ட்டா²தும் வட்டதீதி? ஆம வட்டதி, ‘‘பரிக்கா²ரசோளம் நாம பாடேக்கம் நிதா⁴னமுக²மேதந்தி திசீவரம் பரிக்கா²ரசோளம் அதி⁴ட்ட²ஹித்வா பரிபு⁴ஞ்ஜிதும் வட்டதி. உதோ³ஸிதஸிக்கா²பதே³ பன திசீவரம் அதி⁴ட்ட²ஹித்வா பரிஹரந்தஸ்ஸ பரிஹாரோ வுத்தோ’’தி அட்ட²கதா²யம் (பாரா. அட்ட². 2.469) வுத்தம், தஸ்மா திசீவரம் பரிக்கா²ரசோளம் அதி⁴ட்ட²ஹந்தேன பச்சுத்³த⁴ரித்வா புன அதி⁴ட்டா²தப்³ப³ம்.

54. இதா³னி ஏதேஸம் அதி⁴ட்டா²னவிஜஹனாகாரம் த³ஸ்ஸேதும் ‘‘அச்சே²த³விஸ்ஸஜ்ஜனகா³ஹவிப்³ப⁴மா’’திஆதி³ வுத்தம். தத்த² அச்சே²தோ³தி சோராதீ³ஹி அச்சி²ந்த³னம். விஸ்ஸஜ்ஜனந்தி அஞ்ஞேஸம் தா³னம். கத²ம் பன தி³ன்னம், கத²ம் க³ஹிதம் ஸுதி³ன்னம் ஸுக்³க³ஹிதஞ்ச ஹோதீதி? ஸசே ‘‘இத³ம் துய்ஹம் தே³மி த³தா³மி த³ஜ்ஜாமி ஓணோஜேமி பரிச்சஜாமி நிஸ்ஸஜ்ஜாமி விஸ்ஸஜ்ஜாமீ’’தி வா ‘‘இத்த²ன்னாமஸ்ஸ தே³மி…பே… விஸ்ஸஜ்ஜாமீ’’தி வா வத³தி, ஸம்முகா²பி பரம்முகா²பி தி³ன்னம்யேவ ஹோதி. ‘‘துய்ஹம் க³ண்ஹாஹீ’’தி வுத்தே ‘‘மய்ஹம் க³ண்ஹாமீ’’தி வத³தி, ஸுதி³ன்னம் ஸுக்³க³ஹிதஞ்ச. ‘‘தவ ஸந்தகம் கரோஹி, தவ ஸந்தகம் ஹோது, தவ ஸந்தகம் கரிஸ்ஸதீ’’தி வுத்தே ‘‘மமஸந்தகம் கரோமி, மம ஸந்தகம் ஹோது, மம ஸந்தகம் கரிஸ்ஸாமீ’’தி வத³தி, து³த்³தி³ன்னம் து³க்³க³ஹிதஞ்ச. ஸசே பன ‘‘தவ ஸந்தகம் கரோஹீ’’தி வுத்தே ‘‘ஸாது⁴, ப⁴ந்தே, மய்ஹம் க³ண்ஹாமீ’’தி க³ண்ஹாதி, ஸுக்³க³ஹிதம்.

கா³ஹோதி விஸ்ஸாஸக்³கா³ஹோ (பாரா. அட்ட². 1.131). ஸோ பன ஏவம் வேதி³தப்³போ³ – ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தஸ்ஸ விஸ்ஸாஸம் க³ஹேதும். ஸந்தி³ட்டோ² ச ஹோதி, ஸம்ப⁴த்தோ ச, ஆலபிதோ ச, ஜீவதி ச, ஜானாதி ச ‘க³ஹிதே மே அத்தமனோ ப⁴விஸ்ஸதீ’’’தி (மஹாவ. 356). தத்த² ஸந்தி³ட்டோ²தி தி³ட்ட²மத்தகமித்தோ. ஸம்ப⁴த்தோதி த³ள்ஹமித்தோ. ஆலபிதோதி ‘‘மம ஸந்தகம் யம் இச்ச²ஸி, தம் க³ண்ஹேய்யாஸி, ஆபுச்சி²த்வா க³ஹணே காரணம் நத்தீ²’’தி வுத்தோ. ஜீவதீதி அனுட்டா²னஸேய்யாய ஸயிதோபி யாவ ஜீவிதிந்த்³ரியுபச்சே²த³ம் ந பாபுணாதி. க³ஹிதே ச அத்தமனோதி க³ஹிதே ச துட்ட²சித்தோ. ஏவரூபஸ்ஸ ஸந்தகம் ‘‘க³ஹிதே மே அத்தமனோ ப⁴விஸ்ஸதீ’’தி ஜானந்தேன க³ஹேதும் வட்டதி. அனவஸேஸபரியாதா³னவஸேன சேதானி பஞ்ச அங்கா³னி வுத்தானி, விஸ்ஸாஸக்³கா³ஹோ பன தீஹி அங்கே³ஹி ருஹதி. கத²ம்? ஸந்தி³ட்டோ² ஜீவதி க³ஹிதே அத்தமனோ, ஸம்ப⁴த்தோ ஜீவதி க³ஹிதே அத்தமனோ, ஆலபிதோ ஜீவதி க³ஹிதே அத்தமனோதி ஏவம்.

யோ பன ஜீவதி, ந ச க³ஹிதே அத்தமனோ ஹோதி, தஸ்ஸ ஸந்தகம் விஸ்ஸாஸபா⁴வேன க³ஹிதம்பி புன தா³தப்³ப³ம். த³த³ந்தேன மதகத⁴னம் தாவ யே தஸ்ஸ த⁴னே இஸ்ஸரா க³ஹட்டா² வா பப்³ப³ஜிதா வா, தேஸம் தா³தப்³ப³ம். யோ பன பட²மம்யேவ ‘‘ஸுட்டு² கதம் தயா மம ஸந்தகம் க³ண்ஹந்தேனா’’தி வசீபே⁴தே³ன வா சித்துப்பாத³மத்தேன வா அனுமோதி³த்வா பச்சா² கேனசி காரணேன குபிதோ, ஸோ பச்சாஹராபேதும் ந லப⁴தி. யோபி அதா³துகாமோ, சித்தேன பன அதி⁴வாஸேதி, ந கிஞ்சி வத³தி, ஸோபி புன பச்சாஹராபேதும் ந லப⁴தி. யோ பன ‘‘மயா தும்ஹாகம் ஸந்தகம் க³ஹித’’ந்தி வா ‘‘பரிபு⁴த்த’’ந்தி வா வுத்தே நாதி⁴வாஸேதி, ‘‘படிதே³ஹீ’’தி ப⁴ணதி, ஸோ பச்சாஹராபேதும் லப⁴தி.

விப்³ப⁴மாதி இமினா பி⁴க்கு²னியாயேவ அதி⁴ட்டா²னவிஜஹனம் க³ஹிதம் ஹோதி. ஸா பன யதா³ விப்³ப⁴மதி, ததா³ அஸ்ஸமணீ ஹோதி. பி⁴க்கு² பன விப்³ப⁴மந்தோபி யாவ ஸிக்க²ம் ந பச்சக்கா²தி, தாவ பி⁴க்கு²யேவாதி அதி⁴ட்டா²னம் ந விஜஹதீதி. லிங்க³ஸிக்கா²தி லிங்க³பரிவத்தனஞ்ச ஸிக்கா²பச்சக்கா²னஞ்சாதி அத்தோ². ஸப்³பே³ஸூதி நவஸு சீவரேஸு. அதி⁴ட்டா²னவியோக³காரணாதி அதி⁴ட்டா²னவிஜஹனகாரணா, இமேஸு அஞ்ஞதரேன அதி⁴ட்டா²னம் விஜஹதீதி அத்தோ².

கிஞ்ச பி⁴ய்யோ (பாரா. அட்ட². 2.469) – திசீவரஸ்ஸ பன வினிப்³பி³த்³த⁴சி²த்³த³ஞ்ச அதி⁴ட்டா²னவிஜஹனம் கரோதீதி அத்தோ². தத்த² ஸங்கா⁴டிஉத்தராஸங்கா³னம் தீ³க⁴ந்ததோ வித³த்தி²ப்பமாணஸ்ஸ திரியந்ததோ அட்ட²ங்கு³லப்பமாணஸ்ஸ பதே³ஸஸ்ஸ ஓரதோ கனிட்ட²ங்கு³லினக²பிட்டி²ப்பமாணகம் சி²த்³த³ம் அதி⁴ட்டா²னம் பி⁴ந்த³தி. அந்தரவாஸகஸ்ஸ தீ³க⁴ந்ததோ வித³த்தி²ப்பமாணஸ்ஸேவ திரியந்ததோ சதுரங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ம் அதி⁴ட்டா²னம் பி⁴ந்த³தி, பரதோ பன ந பி⁴ந்த³தி. தஸ்மா சி²த்³தே³ ஜாதே திசீவரம் அதிரேகசீவரம் ஹோதி, ஸூசிகம்மம் கத்வா புன அதி⁴ட்டா²தப்³ப³ம். இதரேஸம் பன சி²த்³தே³ன விஜஹனம் நாம நத்தி². யோ பன திசீவரேபி து³ப்³ப³லட்டா²னே பட²மம் அக்³க³ளம் த³த்வா பச்சா² து³ப்³ப³லட்டா²னம் சி²ந்தி³த்வா அபனேதி, அதி⁴ட்டா²னம் ந பி⁴ஜ்ஜதி. மண்ட³லபரிவத்தனேபி ஏஸேவ நயோ. யோ பன உபோ⁴ கோடியோ மஜ்ஜே² கரோந்தோ ஸசே பட²மம் சி²ந்தி³த்வா பச்சா² க⁴டேதி, அதி⁴ட்டா²னம் விஜஹதி, அத² க⁴டேத்வா சி²ந்த³தி, ந விஜஹதி. ரஜகேஹி தோ⁴வாபேத்வா ஸேதகம் கரோந்தஸ்ஸாபி ந விஜஹதி ஏவ.

55. இதா³னி அகப்பியசீவரானி த³ஸ்ஸேதும் ‘‘குஸவாகப²லகானீ’’திஆதி³ ஆரத்³த⁴ம். தத்த² குஸசீரம் (மஹாவ. 371; மஹாவ. அட்ட². ) நாம குஸே க³ந்தே²த்வா கதசீவரம். வாகசீரம் நாம தாபஸானம் வக்கலம். ப²லகசீரம் நாம ப²லகானி ஸிப்³பி³த்வா கதசீவரம். கேஸகம்ப³லந்தி கேஸேஹி தந்தம் வாயித்வா கதகம்ப³லம். வாலகம்ப³லந்தி சமரவாலேஹி வாயித்வா கதகம்ப³லம். உலூகபக்க²ந்தி உலூகஸகுணஸ்ஸ பக்கே²ஹி கதனிவாஸனம். அஜினக்கி²பந்தி ஸலோமம் ஸகு²ரம் அஜினமிக³சம்மம். இமேஸு ஸத்தஸு வத்தே²ஸு யம் கிஞ்சி தா⁴ரயதோ து²ல்லச்சயந்தி அத்தோ². யதா² இமேஸு து²ல்லச்சயம், ததா² அக்கனாளம் நிவாஸேந்தஸ்ஸ. அக்கனாளம் நாம அக்கத³ண்டே³ வாகாதீ³ஹி க³ந்தே²த்வா கதசீவரம். ‘‘ந பி⁴க்க²வே அக்கனாளம் நிவாஸேதப்³ப³ம், யோ நிவாஸேய்ய, ஆபத்தி து²ல்லச்சயஸ்ஸா’’தி (மஹாவ. 371) ஹி வுத்தம்.

56. கத³லேரகக்கது³ஸ்ஸே போத்த²கே சாபீதி ஏத்த² கத³லிஏரகஅக்கமகசிவாகேஹி கதானி வத்தா²னி ஏவம் வுத்தானீதி வேதி³தப்³பா³னி. ஏதேஸு போத்த²கோயேவ பாளியம் ஆக³தோ, இதரானி தக்³க³திகத்தா அட்ட²கதா²ஸு படிக்கி²த்தானி. இமேஸு சதூஸுபி து³க்கடமேவ. ‘‘ந பி⁴க்க²வே நக்³கி³யம் தித்தி²யஸமாதா³னம் ஸமாதி³யிதப்³ப³ம், யோ ஸமாதி³யேய்ய, ஆபத்தி து²ல்லச்சயஸ்ஸா’’தி (மஹாவ. 370) வுத்தத்தா நக்³கி³யம்பி ந கப்பதி ஏவ. ஸப்³ப³மேவ நீலகம் ஸப்³ப³னீலகம். ஏவம் ஸேஸேஸுபி. ஏத்த² நீலம் உமாபுப்ப²வண்ணம் ஹோதி. மஞ்ஜேட்ட²கம் மஞ்ஜேட்ட²கவண்ணமேவ. பீதகம் கணிகாரபுப்ப²வண்ணம். லோஹிதகம் ஜயஸுமனபுப்ப²வண்ணம். கண்ஹகம் அத்³தா³ரிட்ட²கவண்ணம்.

57. மஹாரங்க³ம் நாம ஸதபதி³பிட்டி²வண்ணம். மஹானாமம் நாம ரத்தஸம்பி⁴ன்னவண்ணம் ஹோதி. பது³மபுப்ப²வண்ணந்திபி வுத்தம், மந்த³ரத்தந்தி அத்தோ². திரீடகேதி ருக்க²தசே. அச்சி²ன்னதீ³க⁴த³ஸகேதி ஸப்³ப³ஸோ அச்சி²ன்னத³ஸகே ச மஜ்ஜே² சி²ன்னத³ஸகே சாதி அத்தோ². அஞ்ஞமஞ்ஞம் ஸம்ஸிப்³பி³த்வா கதத³ஸம் ப²லத³ஸம் நாம. கேதகபுப்பா²தி³புப்ப²ஸதி³ஸாஹி த³ஸாஹி யுத்தம் புப்ப²த³ஸம் நாம. ஏதேஸுபி ‘‘போத்த²கே சாபீ’’தி ஏத்த² வுத்தஅபி-ஸத்³தே³ன து³க்கடந்தி வேதி³தப்³ப³ம். ததா²தி யதா² ஏதேஸு கத³லிது³ஸ்ஸாதீ³ஸு புப்ப²த³ஸாவஸானேஸு து³க்கடம், ததா² கஞ்சுகவேட²னேஸுபி யம் கிஞ்சி தா⁴ரேந்தஸ்ஸ து³க்கடந்தி அத்தோ².

ஏதேஸு பன அயம் வினிச்ச²யோ (மஹாவ. அட்ட². 372) – ஸப்³ப³னீலகாதீ³னி ரஜனானி வமேத்வா புன ரஜித்வா தா⁴ரேதப்³பா³னி, ந ஸக்கா சே வமேதும், பச்சத்த²ரணாதீ³னி வா காரேதப்³பா³னி, திபட்டசீவரஸ்ஸ மஜ்ஜே² வா தா³தப்³பா³னி. அச்சி²ன்னத³ஸகாதீ³னி த³ஸா சி²ந்தி³த்வா தா⁴ரேதப்³பா³னி. கஞ்சுகம் விஜடேத்வா ரஜித்வா பரிபு⁴ஞ்ஜிதப்³ப³ம். வேட²னேபி ஏஸேவ நயோ. திரீடகம் பாத³புஞ்ச²னம் காதப்³ப³ம். ஸப்³ப³ந்தி இமம் வுத்தப்பகாரம் குஸசீராதி³கம் அகப்பியசீவரம் அச்சி²ன்னசீவரோ லப⁴தீதி அத்தோ². வுத்தம்பி சேதம் பரிவாரே.

‘‘அகப்பகதம் நாபி ரஜனாய ரத்தம்,

தேன நிவத்தோ² யேன காமம் வஜேய்ய;

ந சஸ்ஸ ஹோதி ஆபத்தி,

ஸோ ச த⁴ம்மோ ஸுக³தேன தே³ஸிதோ;

பஞ்ஹா மேஸா குஸலேஹி சிந்திதா’’தி. (பரி. 481);

அயஞ்ஹி பஞ்ஹோ அச்சி²ன்னசீவரபி⁴க்கு²ம் ஸந்தா⁴ய வுத்தோ, தஸ்மா ஹி யம் கிஞ்சி அகப்பியசீவரம் நிவாஸேத்வா வா பாருபித்வா வா அச்சி²ன்னசீவரகேன அஞ்ஞம் பரியேஸிதப்³ப³ம். ஏத்த² பன ‘‘இத⁴ பன, பி⁴க்க²வே, மனுஸ்ஸா நிஸ்ஸீமக³தானம் பி⁴க்கூ²னம் சீவரம் தே³ந்தி ‘இமம் சீவரம் இத்த²ன்னாமஸ்ஸ தே³மா’தி, அனுஜானாமி, பி⁴க்க²வே, ஸாதி³தும், ந தாவ தம் க³ணனூபக³ம், யாவ ந ஹத்த²ம் க³ச்ச²தீ’’தி (மஹாவ. 259) வுத்தத்தா யாவ ஆஹரித்வா தம் ந தி³ன்னம், ‘‘தும்ஹாகம், ப⁴ந்தே, சீவரம் உப்பன்ன’’ந்தி பஹிணித்வா வா நாரோசிதம், தாவ க³ணனம் ந உபேதி, அனதி⁴ட்டி²தம் வட்டதி. பத்தேபி ஏஸேவ நயோ. ஆனேத்வா தி³ன்னே வா ஆரோசிதே வா பரிஹாரோ நத்தி², த³ஸாஹம் அதி⁴ட்டா²தப்³ப³ம். சீவரவினிச்ச²யோ.

சீவரனித்³தே³ஸவண்ணனா நிட்டி²தா.

4. ரஜனனித்³தே³ஸவண்ணனா

58. இதா³னி தேஸம் சீவரானம் ரஜனவிதா⁴னம் த³ஸ்ஸேதும் ‘‘ரஜனானி சா’’தி வுத்தம். தத்த² ‘‘அனுஜானாமி, பி⁴க்க²வே, ச² ரஜனானி மூலரஜனம் க²ந்த⁴ரஜனம் தசரஜனம் பத்தரஜனம் புப்ப²ரஜனம் ப²லரஜன’’ந்தி (மஹாவ. 344) ஏவம் ப⁴க³வதா அனுஞ்ஞாதத்தா ‘‘ச²ப்பகாரானி அனுஞ்ஞாதானி ஸத்து²னா’’தி வுத்தம்.

59. தத்த² மூலேதி மூலரஜனேதி அத்தோ². ஹலித்³தி³ம் விவஜ்ஜிய ஸப்³ப³ம் லப்³ப⁴ந்தி ஸம்ப³ந்தோ⁴. ஏவம் ஸேஸேஸுபி. துங்க³ஹாரகோ நாம ஏகோ ஸகண்டகருக்கோ², தஸ்ஸ ஹரிதாலவண்ணம் க²ந்த⁴ரஜனம் ஹோதி. கி³ஹிபரிபு⁴த்தம் பன அல்லிபத்தேன ஏகவாரம் ரஜிதும் வட்டதி. ப²லரஜனே அகப்பியம் நாம நத்தி², ஸப்³ப³ம் வட்டதீதி. ரஜனவினிச்ச²யோ.

ரஜனனித்³தே³ஸவண்ணனா நிட்டி²தா.

5. பத்தனித்³தே³ஸவண்ணனா

60. இதா³னி பா⁴ஜனவிகதிம் த³ஸ்ஸேதும் ‘‘பத்தோ சா’’தி உத்³த⁴டம். ஏத்த² பன பட²மகா³தா² ஸுவிஞ்ஞேய்யா.

61. து³தியே ‘‘மக³த⁴னாளித்³வயதண்டு³லஸாதி⁴த’’ந்தி வத்தப்³பே³ விப⁴த்திலோபம் அகத்வா கா³தா²ப³ந்த⁴ஸுக²த்த²ம் ‘‘மக³தே⁴ நாளித்³வயதண்டு³லஸாதி⁴த’’ந்தி வுத்தம், பசிதந்தி அத்தோ². ஏத்த² (பாரா. 602; பாரா. அட்ட². 2.602; கங்கா². அட்ட². பத்தஸிக்கா²பத³வண்ணனா) மக³த⁴னாளி நாம அட்³ட⁴தேரஸபலம் க³ண்ஹாதி. ஓத³னந்தி ஏத்த² ஸப்³ப³ப்பகாரஸம்பன்னம் அவஸ்ஸாவிதோத³னம் க³ஹேதப்³ப³ம். ஓத³னஸ்ஸ சதுத்த²பா⁴க³ப்பமாணம் நாதிக⁴னம் நாதிதனுகம் ஹத்த²ஹாரியமுக்³க³ஸூபஞ்ச ஆலோபஸ்ஸ ஆலோபஸ்ஸ அனுரூபம் யாவ சரிமகாலோபப்பஹோனகம் மச்ச²மம்ஸாதி³ப்³யஞ்ஜனஞ்ச யோ பத்தோ க³ண்ஹாதி, ஸோ உக்கட்டோ² நாமாதி அத்தோ². ஸப்பிதேலதக்கரஸகஞ்ஜிகாதீ³னி பன க³ணனூபகா³னி ந ஹோந்தி, தானி ஹி ஓத³னக³திகானேவ ஹோந்தி, நேவ ஹாபேதும், ந வட்³டே⁴தும் ஸக்கோந்தி. ஏவமேதம் ஸப்³ப³ம் பக்கி²த்தம் ஸசே பத்தஸ்ஸ ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கமித்வா தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³தமேவ ஹோதி, அயம் உக்கட்டு²க்கட்டோ² நாம பத்தோ.

62. ‘‘மஜ்ஜி²மோ நாம பத்தோ நாளிகோத³னம் க³ண்ஹாதீ’’தி வுத்தத்தா ‘‘மஜ்ஜி²மோ தஸ்ஸுபட்³டோ⁴ வா’’தி வுத்தம். ஏத்தா²பி வுத்தப்பகாரேன மஜ்ஜி²மோ மஜ்ஜி²மோமகோ மஜ்ஜி²முக்கட்டோ²தி பத்தத்திகம் வேதி³தப்³ப³ம். ‘‘ஓமகோ நாம பத்தோ பத்தோ²த³னம் க³ண்ஹாதீ’’தி (பாரா. 602) வசனதோ ‘‘ததோபட்³டோ⁴’’தி வுத்தம். மக³த⁴னாளியா உபட்³ட⁴னாளிகோத³னஞ்ச ததூ³பியம் ஸூபம் ப்³யஞ்ஜனஞ்ச க³ண்ஹாதி, ஸோ ஓமகோ நாம. இதா⁴பி ஓமகோ ஓமகோமகோ ஓமகுக்கட்டோ²தி பத்தத்திகம் வேதி³தப்³ப³ம். இமேஸு பன நவஸு பத்தேஸு உக்கட்டு²க்கட்டோ² ச ஓமகோமகோ ச அபத்தோ. ஏதேஸு அதி⁴ட்டா²தப்³ப³கிச்சம் நத்தி², ஸேஸா ஸத்த பத்தா அதி⁴ட்டா²தப்³பா³, விகப்பேதப்³பா³ சாதி அத்தோ².

63. அதிரேகபத்தோதி (பாரா. 601) அனதி⁴ட்டி²தோ அவிகப்பிதோ. ஸகோதி ஸஸந்தகோ. கப்போதி கப்பியோ. அயமேவேத்த² ஸங்கே²போ – யோ பத்தோ காகணிகமத்தஸ்ஸாபி மூலஸ்ஸ தா³தப்³ப³ஸ்ஸ நத்தி²தாய ஸகோ. அயோபத்தோ பஞ்சஹி பாகேஹி மத்திகாபத்தோ த்³வீஹி பாகேஹி பக்கத்தா கப்போ. ஸோ த³ஸாஹபரமம் காலம் அனதி⁴ட்டி²தோ அவிகப்பிதோ தா⁴ரேய்யோதி.

64. அச்சே²தா³த³யோ சீவரே வுத்தப்பபே⁴தா³யேவ. சி²த்³தே³னாதி (பாரா. அட்ட². 2.608; கங்கா². அட்ட². பத்தஸிக்கா²பத³வண்ணனா) ஏத்த² யஸ்ஸ பத்தஸ்ஸ முக²வட்டிதோ ஹேட்டா² த்³வங்கு³லப்பதே³ஸே யேன சி²த்³தே³ன கங்கு³ஸித்த²ம் நிக்க²மதி, தத்தகேன சி²த்³தே³ன பி⁴ஜ்ஜதி. தஸ்மிம் பன அயசுண்ணாதீ³ஹி படிபாகதிகே கதே த³ஸாஹப்³ப⁴ந்தரே புன அதி⁴ட்டா²தப்³ப³ம். பத்தாதி⁴ட்டா²னமுஜ்ஜ²தீதி பத்தோ அதி⁴ட்டா²னம் உஜ்ஜ²தி.

65. இதா³னி பரிஹரணவிதி⁴ம் த³ஸ்ஸேதும் ‘‘பத்தம் ந படிஸாமேய்ய ஸோத³க’’ந்திஆதி³ ஆரத்³த⁴ம். ஸோத³கம் (சூளவ. 254) பத்தம் ந படிஸாமேய்ய, ஆதபே ச ஸோத³கம் பத்தம் ந ஓதபேதி அதி⁴ப்பாயோ. ந நித³ஹேதி நிருத³கம் கத்வாபி அதிகாலம் ந நித³ஹேதி அதி⁴ப்பாயோ. பு⁴ம்யாதி பூ⁴மியம். ந ட²பேதி தட்டிகாசம்மக²ண்டா³தீ³ஸு யேன கேனசி அனத்த²தாய பம்ஸுஸக்க²ரமிஸ்ஸாய பூ⁴மியா ந ட²பேய்யாதி அத்தோ². நோ ச லக்³க³யேதி ஏத்த²பி நாக³த³ந்தாதீ³ஸு (சூளவ. 254) யத்த² கத்த²சி லக்³க³ந்தஸ்ஸ து³க்கடமேவ.

66. மிட்³ட⁴ந்தேதி (சூளவ. 254; சூளவ. அட்ட². 254) மிட்³ட⁴பரியந்தே. ஸசே பன பரிவத்தேத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா அப்³ப⁴ந்தரபரிச்சே²தே³ ட²பேதும் வட்டதி, ந பரியந்தே. பரிப⁴ண்ட³ந்தேதி பா³ஹிரபஸ்ஸே கதாய தனுகமிட்³டி⁴யா அந்தேதி அத்தோ². அங்கே வாதி (சூளவ. 254) த்³வின்னம் ஊரூனம் மஜ்ஜே². ஏத்த² பன அம்ஸப³த்³த⁴கே அம்ஸகூடே லக்³கே³த்வா அங்கே ட²பேதும் வட்டதி, ந இதரதா². ஆதபத்தகேதி ச²த்தே. ஏத்த² ப⁴த்தபூரோபி அம்ஸகூடே லக்³கி³தபத்தோபி ட²பேதும் ந வட்டதி.