49. சதுராரக்க²னித்³தே³ஸவண்ணனா

461-2. அஸுப⁴ந்தி அஸுப⁴பா⁴வனா. இமே சத்தாரோ சதுராரக்கா² நாமாதி அதி⁴ப்பாயோ. இதா³னி தே த³ஸ்ஸேதும் ‘‘ஆரகத்தாதி³னா’’திஆதி³மாஹ. ஆரகத்தாதி³னாதி ஏத்த² ஆரகத்தா, அரீனம் அரானஞ்ச ஹதத்தா, பச்சயாதீ³னம் அரஹத்தா, பாபகரணே ரஹாபா⁴வாதி இமேஹி தாவ சதூஹி காரணேஹி ஸோ ப⁴க³வா அரஹந்தி அனுஸ்ஸரிதப்³போ³தி அத்தோ². வுத்தஞ்ஹேதம் –

‘‘ஆரகத்தா ஹதத்தா ச, கிலேஸாரீன ஸோ முனி;

ஹதஸம்ஸாரசக்காரோ, பச்சயாதீ³ன சாரஹோ;

ந ரஹோ கரோதி பாபானி, அரஹம் தேன வுச்சதீ’’தி. (பாரா. அட்ட². 1.1; விஸுத்³தி⁴. 1.130);

ப⁴க³வா பன ஸப்³ப³கிலேஸேஹி ஸுவிதூ³ரவிதூ³ரே டி²தோ மக்³கே³ன ஸவாஸனகிலேஸானம் ஹதத்தா, தஸ்மா ‘‘ஆரகத்தா அரஹ’’ந்தி வுத்தோ. வுத்தஞ்ஹேதம் –

‘‘ஸோ ததோ ஆரகா நாம;

யஸ்ஸ யேனாஸமங்கி³தா;

அஸமங்கீ³ ச தோ³ஸேஹி,

நாதோ² தேனாரஹம் மதோ’’தி. (விஸுத்³தி⁴. 1.125);

ப⁴க³வதா பன ஸப்³ப³கிலேஸாரயோ ஹதா, தஸ்மா ‘‘அரீனம் ஹதத்தாபி அரஹ’’ந்தி வுத்தோ. வுத்தஞ்ஹேதம் –

‘‘யஸ்மா ராகா³தி³ஸங்கா²தா, ஸப்³பே³பி அரயோ ஹதா;

பஞ்ஞாஸத்தே²ன நாதே²ன, தஸ்மாபி அரஹம் மதோ’’தி. (விஸுத்³தி⁴. 1.126);

யம் பனேதம் அவிஜ்ஜாப⁴வதண்ஹாமயனாபி⁴புஞ்ஞாபி⁴ஸங்கா²ரஅபுஞ்ஞாபி⁴ஸங்கா²ரஆனேஞ்ஜாபி⁴ஸங்கா²ராரம் ஜராமரணனேமி ‘‘ஆஸவஸமுத³யா அவிஜ்ஜாஸமுத³யோ’’தி (ம. நி. 1.103) வசனதோ ஆஸவஸமுத³யமயேன அக்கே²ன விஜ்ஜி²த்வா திப⁴வரதே² யோஜிதம் அனாதி³காலப்பவத்தம் ஸம்ஸாரசக்கம், தஸ்ஸ ப⁴க³வதோ போ³தி⁴ருக்க²மூலே ஸம்மப்பதா⁴னவீரியபாதே³ஹி சதுபாரிஸுத்³தி⁴ஸீலபத²வியம் பதிட்டா²ய ஸத்³தா⁴ஹத்தே²ன கம்மக்க²யகரஞாணப²ரஸும் க³ஹேத்வா ஸப்³பே³ அரா ஹதா. தஸ்மா ‘‘அரானம் ஹதத்தா அரஹ’’ந்தி வுத்தோ. வுத்தஞ்ஹேதம் –

‘‘அரா ஸம்ஸாரசக்கஸ்ஸ, ஹதா ஞாணாஸினா யதோ;

லோகனாதே²ன தேனேஸ, அரஹந்தி பவுச்சதீ’’தி. (விஸுத்³தி⁴. 1.128);

அக்³க³த³க்கி²ணேய்யத்தா சீவராதீ³னம் பச்சயானம் உத்தமபூஜாய ச யுத்தோ ப⁴க³வா, தஸ்மா ‘‘பச்சயாதீ³னம் அரஹத்தா ச அரஹ’’ந்தி வுச்சதி. வுத்தஞ்ஹேதம் –

‘‘பூஜாவிஸேஸம் ஸஹ பச்சயேஹி,

யஸ்மா அயம் அரஹதி லோகனாதோ²;

அத்தா²னுரூபம் அரஹந்தி லோகே,

தஸ்மா ஜினோ அரஹதி நாமமேத’’ந்தி. (விஸுத்³தி⁴. 1.129);

யதா² லோகே கேசி பண்டி³தமானினோ அஸிலோகப⁴யேன ரஹோ பாபானி கரோந்தி, ததா² ப⁴க³வா கதா³சிபி ந கரோதி, தஸ்மா ‘‘பாபகரணே ரஹாபா⁴வா ச அரஹ’’ந்தி வுச்சதி. வுத்தஞ்ஹேதம் –

‘‘யஸ்மா நத்தி² ரஹோ நாம, பாபகம்மேஸு தாதி³னோ;

ரஹாபா⁴வேன தேனேஸ, அரஹம் இதி விஸ்ஸுதோ’’தி. (விஸுத்³தி⁴. 1.130) –

ஏவம் ஆரகத்தாதி³னா அரஹந்தி பா⁴வேதப்³ப³ம்.

ஸம்மா ஸாமஞ்ச ஸப்³ப³த⁴ம்மானம் பு³த்³த⁴த்தா பன ஸம்மாஸம்பு³த்³தோ⁴. ஸம்மாதி ஞாயேனேவ, அபி⁴ஞ்ஞேய்யே த⁴ம்மே அபி⁴ஞ்ஞேய்யதோ பரிஞ்ஞேய்யே த⁴ம்மே பரிஞ்ஞேய்யதோ பஹாதப்³பே³ த⁴ம்மே பஹாதப்³ப³தோ ஸச்சி²காதப்³பே³ த⁴ம்மே ஸச்சி²காதப்³ப³தோ பா⁴வேதப்³பே³ த⁴ம்மே பா⁴வேதப்³ப³தோ ஏவாதி அத்தோ². ஸாமஞ்சாதி அத்தனாவ. வுத்தஞ்ஹேதம் –

‘‘அபி⁴ஞ்ஞேய்யம் அபி⁴ஞ்ஞாதம், பா⁴வேதப்³ப³ஞ்ச பா⁴விதம்;

பஹாதப்³ப³ம் பஹீனம் மே, தஸ்மா பு³த்³தோ⁴ஸ்மி ப்³ராஹ்மணா’’தி. (ம. நி. 2.399; ஸு. நி. 563);

‘‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா²தே³வமனுஸ்ஸானம் பு³த்³தோ⁴ ப⁴க³வா’’தி ஏவம் வுத்தே நவபே⁴தே³ ப⁴க³வதோ கு³ணே யா புனப்புனம் உப்பஜ்ஜனதோ ஸதியேவ அனுஸ்ஸதி, பவத்திதப்³ப³ட்டா²னம்ஹியேவ வா பவத்தத்தா ஸத்³தா⁴பப்³ப³ஜிதஸ்ஸ குலபுத்தஸ்ஸ அனுரூபா ஸதீதி அனுஸ்ஸதி, பு³த்³த⁴ம் ஆரப்³ப⁴ உப்பன்னா அனுஸ்ஸதி பு³த்³தா⁴னுஸ்ஸதி, யா ஏவம் நவவிதே⁴ன பவத்தா ஸதி, ஸா பு³த்³தா⁴னுஸ்ஸதி நாமாதி அத்தோ². ஸப்³பா³காரேன பன ஆசரியேன பு³த்³த⁴கோ⁴ஸேன பு³த்³தா⁴னுஸ்ஸதி விஸுத்³தி⁴மக்³கே³ (விஸுத்³தி⁴. 1.123 ஆத³யோ) வுத்தா, அத்தி²கேன பன ததோ பச்சாஸீஸிதப்³பா³.

463-4. சதுராரக்கா²ய ஸாயம்பாதம் பா⁴வேதப்³ப³த்தா மேத்தாபா⁴வனம் த³ஸ்ஸேந்தேன தே²ரேன ஸப்³ப³த்த²ககம்மட்டா²னபா⁴வனாவஸேன த³ஸ்ஸிதாதி வேதி³தப்³பா³. இதரதா² ‘‘அத்தானம் உபமம் கத்வா, ந ஹனேய்ய ந கா⁴தயே’’தி (த⁴. ப. 129-130) வசனதோ ஸப்³ப³பட²மம் ‘‘அஹம் ஸுகி²தோ ஹோமி, அவேரோ’’திஆதி³னா நயேன பா⁴வேத்வாவ அத்தனி சித்தம் நிபரிப³ந்த⁴மானம் கத்வா பச்சா² ஆசரியுபஜ்ஜா²யாதீ³ஸு கமேன பா⁴வேதப்³பா³. அத்தனி பன அப்பனா ந ஹோதி. கோ³சரகா³மம்ஹி இஸ்ஸரே ஜனேதி ஸம்ப³ந்தோ⁴. தத்தா²தி (பாரா. அட்ட². 2.165) கோ³சரகா³மே. ஸீமட்ட²ஸங்க⁴தோ பட்டா²ய பரிச்சி²ஜ்ஜ பரிச்சி²ஜ்ஜாதி அத்தோ². ஏவம் மேத்தம் பா⁴வேந்தோ பி⁴க்கு²ஸங்கே⁴ மேத்தாய ஸஹவாஸீனம் முது³சித்தம் ஜனேதி, அத²ஸ்ஸ ஸுக²ஸம்வாஸதா ஹோதி. ஸீமட்ட²கதே³வதாஸு மேத்தாய முது³கதசித்தாஹி தே³வதாஹி த⁴ம்மிகாய ரக்கா²ய ஸுஸம்விஹிதரக்கோ² ஹோதி. கோ³சரகா³மம்ஹி இஸ்ஸரஜனே மேத்தாய முது³கதசித்தஸந்தானேஹி இஸ்ஸரேஹி த⁴ம்மிகாய ரக்கா²ய ஸுரக்கி²தபரிக்கா²ரோ ஹோதி. தத்த² மனுஸ்ஸே மேத்தாய பஸாதி³தசித்தேஹி தேஹி அபரிபூ⁴தோ ஹுத்வா விசரதி. ஸப்³ப³ஸத்தேஸு மேத்தாய ஸப்³ப³த்த² அப்படிஹதசாரோ ஹோதி.

465-6. வண்ணதோ ச ஸண்டா²னதோ ச ஓகாஸதோ ச தி³ஸதோ ச பரிச்சே²த³தோ ச கேஸாதி³கோட்டா²ஸே வவத்த²பேத்வாதி ஸம்ப³ந்தோ⁴. ஏத்த² வண்ணதோதி (விஸுத்³தி⁴. 1.110) கேஸாதீ³னம் வண்ணதோ. ஸண்டா²னதோதி தேஸம்யேவ ஸண்டா²னதோ. ஓகாஸதோதி ‘‘அயம் கோட்டா²ஸோ இமஸ்மிம் நாம ஓகாஸே பதிட்டி²தோ’’தி ஏவம் தஸ்ஸ தஸ்ஸ ஓகாஸதோ. தி³ஸதோதி இமஸ்மிம் ஸரீரே நாபி⁴தோ உத்³த⁴ம் உபரிமா தி³ஸா, அதோ⁴ ஹேட்டி²மா தி³ஸா, தஸ்மா ‘‘அயம் கோட்டா²ஸோ இமிஸ்ஸா நாம தி³ஸாயா’’தி தி³ஸா வவத்த²பேதப்³பா³. பரிச்சே²த³தோதி ஸபா⁴க³பரிச்சே²த³தோ விஸபா⁴க³பரிச்சே²த³தோதி த்³வே பரிச்சே²தா³. தத்த² ‘‘அயம் கோட்டா²ஸோ ஹேட்டா² ச உபரி ச திரியஞ்ச இமினா நாம பரிச்சே²தோ³’’தி ஏவம் ஸபா⁴க³பரிச்சே²தோ³ வேதி³தப்³போ³. ‘‘கேஸா ந லோமா, லோமா ந கேஸா’’தி ஏவம் அமிஸ்ஸகவஸேன விஸபா⁴க³பரிச்சே²தோ³.

ஏவம் பஞ்சஹி ஆகாரேஹி வவத்தா²னாகாரம் த³ஸ்ஸேத்வா இதா³னி மனஸி கரோந்தேன ஏவம் மனஸி காதப்³ப³ந்தி தம் த³ஸ்ஸேதும் ‘‘அனுபுப்³ப³தோ’’திஆதி³மாஹ. தத்த² அனுபுப்³ப³தோதி ஸஜ்ஜா²யகரணகாலதோ பட்டா²ய ‘‘கேஸா நகா²’’தி ஏவம் ஏகந்தரிகாய வா ‘‘லோமா கேஸா’’தி ஏவம் உப்படிபாடியா வா ந மனஸி காதப்³ப³ம், அத² கோ² ‘‘கேஸா லோமா’’திஆதி³னா நயேன அனுபடிபாடியா மனஸி காதப்³ப³ம், அனுபடிபாடியா மனஸி கரோந்தேனாபி நாதிஸீக⁴ம் நாதிஸணிகம் மனஸி காதப்³ப³ம், ப³ஹித்³தா⁴ புது²த்தாரம்மணே சேதஸோ விக்கே²போ படிபா³ஹிதப்³போ³. ‘‘பண்ணத்திம் ஸமதிக்கம்ம, முஞ்சந்தஸ்ஸானுபுப்³ப³தோ’’தி பாடோ² க³ஹேதப்³போ³. ஏவஞ்ஹி ஸதி பா⁴வனாக்கமேன அத்தோ² ஸுவிஞ்ஞேய்யோ ஹோதி. ‘‘கேஸா லோமா’’திஆதி³பஞ்ஞத்திம் அமனஸிகத்வா படிக்கூலபா⁴வேன ஏவம் சித்தம் ட²பேதப்³ப³ம். முஞ்சந்தஸ்ஸானுபுப்³ப³தோதி யோ யோ கோட்டா²ஸோ ஆபாத²ம் நாக³ச்ச²தி, தம் தம் அனுபுப்³ப³தோ முஞ்சந்தஸ்ஸாதி அத்தோ².

467. இதா³னி யதா² படிக்கூலமனஸிகாரோ காதப்³போ³, தம் த³ஸ்ஸேதும் ‘‘வண்ணஆஸயஸண்டா²னா’’திஆதி³மாஹ. ஏதேஹி வண்ணாதீ³ஹி கோட்டா²ஸேஹி படிக்கூலாதி பா⁴வனாதி ஸம்ப³ந்தோ⁴. ஏத்த² (விப⁴. அட்ட². 356; விஸுத்³தி⁴. 1.178) கேஸா தாவ வண்ணதோபி படிக்கூலா. ததா² ஹி யாகு³ப⁴த்தாதீ³ஸு கேஸவண்ணம் கிஞ்சி தி³ஸ்வா ஜிகு³ச்ச²ந்தி. ஸண்டா²னதோபி படிக்கூலா. ததா² ஹி ரத்திம் பு⁴ஞ்ஜந்தா கேஸஸண்டா²னம் மகசிவாகாதி³கம் சு²பித்வா ஜிகு³ச்ச²ந்தி. தேலமக்க²னாதி³விரஹிதானஞ்ச அக்³கி³ம்ஹி பக்கி²த்தானஞ்ச க³ந்தோ⁴ அதிவிய படிக்கூலோதி க³ந்த⁴தோபி படிக்கூலா. அஸுசிட்டா²னே ஜாதஸூபேய்யபண்ணம் விய புப்³ப³லோஹிதமுத்தகரீஸபித்தஸேம்ஹாதி³னிஸ்ஸந்தே³ன ஜாதத்தா ஆஸயதோபி படிக்கூலா. கூ³த²ராஸிம்ஹி உட்டி²தகண்ணிகம் விய ஏகதிம்ஸகோட்டா²ஸராஸிம்ஹி ஜாதத்தா ஓகாஸதோபி படிக்கூலா. உத்³து⁴மாதகம் வினீலகம் விபுப்³ப³கம் விச்சி²த்³த³கம் விக்கா²யிதகம் விக்கி²த்தகம் ஹதவிக்கி²த்தகம் லோஹிதகம் புளவகம் அட்டி²கந்தி இமேஸு உத்³து⁴மாதகாதீ³ஸு வத்தூ²ஸு அஸுபா⁴காரம் க³ஹேத்வா பவத்தா பா⁴வனா வா அஸுப⁴ம் நாமாதி அத்தோ².

468. யம் பனேதம் அரஹந்தானம் வட்டது³க்க²ஸமுச்சே²த³ஸங்கா²தம் ஸமுச்சே²த³மரணம் (விஸுத்³தி⁴. 1.167), ஸங்கா²ரானம் க²ணப⁴ங்க³ஸங்கா²தம் க²ணிகமரணம், ‘‘ருக்கோ² மதோ, லோஹம் மத’’ந்திஆதி³ ஸம்முதிமரணஞ்ச, ந தம் இத⁴ அதி⁴ப்பேதம். இத⁴ பன மரணந்தி ஏகப⁴வபரியாபன்னஸ்ஸ ஜீவிதிந்த்³ரியஸ்ஸ உபச்சே²தோ³ அதி⁴ப்பேதோ. தம்பி காலமரணம் அகாலமரணந்தி து³வித⁴ம் ஹோதி. தத்த² காலமரணம் புஞ்ஞக்க²யேன வா ஆயுக்க²யேன வா உப⁴யக்க²யேன வா ஹோதி, அகாலமரணம் உபபீளகஉபச்சே²த³ககம்மவஸேன. ‘‘மரணம் மே ப⁴விஸ்ஸதீ’’தி வா ‘‘ஜீவிதம் உச்சி²ஜ்ஜிஸ்ஸதீ’’தி வா ‘‘மரணம் மரண’’ந்தி வா யோனிஸோ பா⁴வயித்வானாதி ஸம்ப³ந்தோ⁴.

469-70. யஸ்ஸ பன ஏத்தாவதா உபசாரஜ்ஜா²னம் ந உப்பஜ்ஜதி, தேன வத⁴கபச்சுபட்டா²னதோ ஸம்பத்திவிபத்திதோ உபஸம்ஹரணதோ காயப³ஹுஸாதா⁴ரணதோ ஆயுது³ப்³ப³லதோ அனிமித்ததோ அத்³தா⁴னபரிச்சே²த³தோ க²ணபரித்ததோதி இமேஹி அட்ட²ஹி ஆகாரேஹி மரணம் அனுஸ்ஸரிதப்³ப³ம், இதா³னி தே த³ஸ்ஸேதும் ‘‘வத⁴கஸ்ஸேவுபட்டா²ன’’ந்திஆதி³மாஹ. அஸிம் உக்கி²பித்வா ஸீஸம் சி²ந்தி³தும் டி²தவத⁴கோ விய மரணம் பச்சுபட்டி²தமேவாதி பா⁴வனா மரணஸ்ஸதி நாமாதி ஸம்ப³ந்தோ⁴. ஏவம் ஸப்³ப³த்த². ஸப்³ப³ம் ஆரோக்³யம் ப்³யாதி⁴பரியோஸானம், ஸப்³ப³ம் யோப்³ப³னம் ஜராபரியோஸானம், ஸப்³ப³ம் ஜீவிதம் மரணபரியோஸானம், தஸ்மா ‘‘அயம் யோப்³ப³னாதி³காயஸம்பத்தி தாவதே³வ ஸோப⁴தி, யாவ மரணஸங்கா²தா விபத்தி ந ப⁴விஸ்ஸதீ’’தி ஏவமாதி³னா ஸம்பத்திவிபத்திதோ ச, ஸத்தஹாகாரேஹி உபஸம்ஹரணதோ மரணம் அனுஸ்ஸரிதப்³ப³ம் யஸமஹத்ததோ புஞ்ஞமஹத்ததோ தா²மமஹத்ததோ இத்³தி⁴மஹத்ததோ பஞ்ஞாமஹத்ததோ பச்சேகபு³த்³த⁴தோ ஸம்மாஸம்பு³த்³த⁴தோதி. தத்த² ‘‘இத³ம் மரணம் நாம மஹாயஸானம் மஹாபரிவாரானம் மஹாஸம்மதமந்தா⁴தாதீ³னம்பி உபரி பததி, கிமங்க³ம் பன மய்ஹம் உபரி ந பதிஸ்ஸதீ’’தி ஏவம் யஸமஹத்ததோ,

‘‘ஜோதிகோ ஜடிலோ உக்³கோ³,

மேண்ட³கோ அத² புண்ணகோ;

ஏதே சஞ்ஞே ச யே லோகே,

மஹாபுஞ்ஞாதி விஸ்ஸுதா;

ஸப்³பே³ மரணமாபன்னா,

மாதி³ஸேஸு கதா²வ கா’’தி. –

ஏவம் புஞ்ஞமஹத்ததோ,

‘‘வாஸுதே³வோ ப³லதே³வோ, பீ⁴மஸேனாத³யோ மஹா;

ப³லா மச்சுவஸம் பத்தா, மாதி³ஸேஸு கதா²வ கா’’தி. –

ஏவம் தா²மமஹத்ததோ,

‘‘மஹாமோக்³க³ல்லானாதீ³னம் மஹித்³தி⁴கானம்பி உபரி பததி, மாதி³ஸேஸு கதா²வ கா’’தி ஏவம் இத்³தி⁴மஹத்ததோ, ‘‘ஸாரிபுத்தாதீ³னம் மஹாபஞ்ஞானம்பி உபரி பததி, மாதி³ஸேஸு கதா²வ கா’’தி ஏவம் பஞ்ஞாமஹத்ததோ. ஏவம் இதரேஸம்பி பச்சேகபு³த்³த⁴ஸம்மாஸம்பு³த்³தா⁴னம்பி மஹந்தபா⁴வம் சிந்தேத்வா ‘‘தேஸம்பி உபரி மரணம் பததி, கிமங்க³ம் பன மய்ஹம் உபரி ந பதிஸ்ஸதீ’’தி ஏவம் உபஸம்ஹரணதோ ச, ‘‘அயம் காயோ ப³ஹுஸாதா⁴ரணோ அஜ்ஜ²த்திகானம்யேவ அனேகஸதானம் ரோகா³னம் பா³ஹிரானம் அஹிவிச்சி²காதீ³னஞ்சா’’தி காயப³ஹுஸாதா⁴ரணதோ ச, ‘‘அஸ்ஸாஸபஸ்ஸாஸபடிப³த்³த⁴ம் ஜீவித’’ந்திஆதி³னா நயேன ஆயுது³ப்³ப³லதோ ச,

‘‘ஜீவிதம் ப்³யாதி⁴ காலோ ச,

தே³ஹனிக்கே²பனம் க³தி;

பஞ்சேதே ஜீவலோகஸ்மிம்;

அனிமித்தா ந நாயரே’’தி. (ஸம். நி. அட்ட². 1.1.20; ஜா. அட்ட². 2.2.34) –

ஏவம் காலவவத்தா²னஸ்ஸ அபா⁴வதோ ச, ‘‘யோ, பி⁴க்க²வே, சிரம் ஜீவதி, ஸோ வஸ்ஸஸதம் ஜீவதி அப்பம் வா பி⁴ய்யோ’’தி (ஸம். நி. 1.145) வுத்தத்தா ஏவமாதி³னா நயேன அத்³தா⁴னஸ்ஸ பரிச்சே²தா³ச பா⁴வனா மரணஸ்ஸதி நாமாதி அத்தோ². க²ணபரித்ததோ ச மரணஸ்ஸதி பா⁴வேதப்³பா³.

‘‘ஜீவிதம் அத்தபா⁴வோ ச,

ஸுக²து³க்கா² ச கேவலா;

ஏகசித்தஸமாயுத்தா,

லஹு ஸோ வத்ததே க²ணோ’’தி. (விஸுத்³தி⁴. 1.176) –

ஹி வுத்தம். சதுராரக்க²வினிச்ச²யோ.

சதுராரக்க²னித்³தே³ஸவண்ணனா நிட்டி²தா.