40. அவேப⁴ங்கி³யனித்³தே³ஸவண்ணனா

322-4. ஆராமாராமவத்தூ²னீதி ஏத்த² (சூளவ. 321; சூளவ. அட்ட². 321) ஆராமோ நாம புப்பா²ராமோ வா ப²லாராமோ வா. மஞ்சோ பீட²ம் பி⁴ஸி பி³ப்³போ³ஹனாதி³ஸயனாஸனம். லோஹகும்பீ⁴ஆத³யோ காளலோஹதம்ப³லோஹாதி³மயா. பா⁴ணகோ உத³கசாடி. பஞ்சேதே அவிபா⁴ஜியாதி பா⁴ஜேத்வா ந க³ஹேதப்³பா³, க³ஹிதாபி ஸங்க⁴ஸந்தகா ஏவாதி அத்தோ². ஏத்த² பன ஆராமோ ஆராமவத்தூ²தி பட²மம், விஹாரோ விஹாரவத்தூ²தி து³தியம், மஞ்சோ பீட²ம் பி⁴ஸி பி³ப்³போ³ஹனந்தி ததியம், லோஹகும்பீ⁴…பே… நிகா²த³னந்தி சதுத்த²ம், வல்லி…பே… தா³ருப⁴ண்ட³ம் மத்திகப⁴ண்ட³ந்தி பஞ்சமந்தி ஏவம் இமானி ராஸிவஸேன பஞ்ச ஹோந்தி, ஸருபவஸேன அனேகானி ஹோந்தி. ஹோந்தி சேத்த² –

‘‘த்³விஸங்க³ஹானி த்³வே ஹோந்தி, ததியம் சதுஸங்க³ஹம்;

சதுத்த²ம் நவகோட்டா²ஸம், பஞ்சமம் அட்ட²பே⁴த³ன’’ந்தி. (சூளவ. அட்ட². 321);

325. ‘‘பஞ்சிமானி, பி⁴க்க²வே, அவிஸ்ஸஜ்ஜியானி ந விஸ்ஸஜ்ஜேதப்³பா³னி ஸங்கே⁴ன வா க³ணேன வா புக்³க³லேன வா, விஸ்ஸஜ்ஜிதானிபி அவிஸ்ஸஜ்ஜிதானி ஹோந்தி. யோ விஸ்ஸஜ்ஜேய்ய, ஆபத்தி து²ல்லச்சயஸ்ஸா’’தி (சூளவ. 321) வுத்தத்தா ‘‘பா⁴ஜிதாபி அபா⁴ஜிதா’’தி வுத்தம். ஏதேதி வுத்தப்பகாரா பஞ்சபி ‘‘க³ருப⁴ண்டா³னீ’’தி ச ‘‘அவிஸ்ஸஜ்ஜியானீ’’தி ச ச-ஸத்³தே³ன ‘‘அவேப⁴ங்கி³யானீ’’தி ச வுச்சந்தீதி அத்தோ².

326-8. இதா³னி புரிமேஸு தீஸு ராஸீஸு ஸப்³ப³ஸ்ஸ க³ருப⁴ண்ட³த்தா தே அனாமஸித்வா பச்சி²மேஸு த்³வீஸு ராஸீஸு ஏகச்சஸ்ஸ அக³ருப⁴ண்ட³ஸ்ஸாபி அத்தி²தாய தம் த³ஸ்ஸேதும் ஆரப⁴ந்தோபி தேஸு த்³வீஸு ப³ஹுவிஸயம் பட²மம் த³ஸ்ஸேதும் ‘‘வல்லிட்³ட⁴பா³ஹுமத்தாபீ’’திஆதி³மாஹாதி ஞாதப்³ப³ம். தஸ்ஸாயம் ஸங்கே²போ (சூளவ. அட்ட². 321) – வல்லி அட்³ட⁴பா³ஹுமத்தாபி வேளு அட்ட²ங்கு³லாயதோபி திணாதி³ முட்டி²மத்தம்பீதி ஏத்த² ஆதி³-ஸத்³தே³ன முஞ்ஜபப்³ப³ஜம் ஸங்க³ண்ஹாதி, பண்ணம் ஏகம்பி மத்திகா பாகதா வா பஞ்சவண்ணா வா ஸுதா⁴கங்கு³ட்ட²ஆதி³காதி ஆதி³-ஸத்³தே³ன ஸஜ்ஜுலஸஜாதிஹிங்கு³லகாதி³ வா தாலபக்கப்பமாணாபி யேஹி கேஹிசி ஸங்க⁴ஸ்ஸ தி³ன்னா வா ஸங்கி⁴கே திணகே²த்தாதி³ம்ஹி ஜாதா வா ரக்கி²தகோ³பிதபூ⁴மிபா⁴கே³ உப்பன்னா தத்த²ஜாதகா வா ஸங்கி⁴கா ரக்கி²தா ஏவ அபா⁴ஜியாதி அத்தோ².

இதா³னி யே சேத்த² பா⁴ஜிதப்³பா³, தே த³ஸ்ஸேதும் ‘‘நிட்டி²தே’’திஆதி³மாஹ, ஸங்க⁴ஸ்ஸ வா சேதியஸ்ஸ வா கம்மே நிட்டி²தே பா⁴ஜியாதி அதி⁴ப்பாயோ. ஏத்த² பன யம் கிஞ்சி வல்லிவேளுதிணபண்ணமத்திகாதி³ ஸங்க⁴ஸ்ஸ தி³ன்னம் வா ஸங்கி⁴கே திணகே²த்தாதி³ம்ஹி ஜாதகம் வா ரக்கி²தகோ³பிதம் க³ருப⁴ண்ட³ம், தம் ஸங்க⁴கம்மே ச சேதியகம்மே ச நிட்டி²தே அவஸேஸம் புக்³க³லிககம்மேபி தா³தும் வட்டதி, அக³ருப⁴ண்ட³த்தா பா⁴ஜிதும்பி லப்³ப⁴தி. ஸேனாஸனத்தா²ய ரக்கி²தகோ³பிதமேவ க³ருப⁴ண்ட³ம் ஹோதி, ந இதரம். ஸீஹளதீ³பே துமூலஸோமவிஹாரே ஸங்க⁴ஸ்ஸ பாகவத்தம்பி தாலபண்ணம் விக்கிணித்வா கரீயதி. கஸ்மா? ந ஹி தத்த² பண்ணேன அத்தோ² அத்தி², ஸப்³பே³பி இட்ட²கச்ச²ன்னா பாஸாதா³த³யோதி. ஏவம் அஞ்ஞத்தா²பி கரீயதி ஏவாதி வத³ந்தி.

329. இதா³னி லோஹப⁴ண்டா³தீ³ஸு ஏகந்தபா⁴ஜேதப்³ப³ப⁴ண்ட³ம் த³ஸ்ஸேதும் ‘‘பத்தாதீ³’’திஆதி³மாஹ. ஏத்த² (சூளவ. அட்ட². 221) பன ஆதி³-ஸத்³தே³ன லோஹதா²லகதம்ப³ குண்டி³கா கடச்சு² ஸரக அஞ்ஜனி அஞ்ஜனிஸலாகாகண்ணமலஹரணீஸூசிஸண்டா³ஸகத்தரயட்டி²ஆதீ³னி க³ஹிதானேவ. ததா²தி பா⁴ஜியமேவாதி அத்தோ². விப்பகதஞ்ச அவிப்பகதஞ்ச. பாத³க³ண்ஹகந்தி மக³த⁴னாளியா பஞ்சனாளியா க³ண்ஹனம்.

331-2. அனுஞ்ஞாதவாஸி யம் ஸக்கா ஸிபாடிகாய பக்கி²பித்வா பரிஹரிதுந்தி வுத்தா. தச்சி²தானிட்டி²தந்தி விப்பகதம். யதி³ தச்சி²தம், க³ருப⁴ண்ட³மேவ. த³ந்தம் பன அதச்சி²தஞ்ச அனிட்டி²தஞ்ச பா⁴ஜியமேவ. அனிட்டி²தம் மஞ்சபாதா³தி³கம் க³ருப⁴ண்ட³ம். இதா³னி மத்திகப⁴ண்ட³ம் த³ஸ்ஸேதும் ‘‘பி⁴க்கூ²பகரணே’’திஆதி³மாஹ. பத்ததா²லககுண்டி³காதி³பி⁴க்கூ²பகரணே ச. பாத³க⁴டகோதி பாத³க³ண்ஹனகோ க⁴டகோ ச மத்திகாமயோ பா⁴ஜியோ பா⁴ஜேதப்³போ³தி அத்தோ². ஸங்க²தா²லகம்பி பா⁴ஜியமேவ.

333-4. மிக³சம்மாதி³கம் கப்பியசம்மம் பா⁴ஜியம், ஸீஹசம்மாதி³கம் அகப்பியசம்மம் க³ருப⁴ண்ட³ம். தம் பன பூ⁴மத்த²ரணம் காதும் வட்டதி. ஏளசம்மம் பன பச்சத்த²ரணக³திகத்தா க³ருப⁴ண்ட³ம் ஹோதி. இதா³னி இமானி பன பஞ்ச சீவரபிண்ட³பாதபே⁴ஸஜ்ஜானம் அத்தா²ய பரிவத்தேதும் ந வட்டதி, க³ருப⁴ண்டே³ன பன க³ருப⁴ண்ட³ஞ்ச தா²வரஞ்ச தா²வரேன தா²வரமேவ பரிவத்தேத்வா பரிபு⁴ஞ்ஜிதப்³பா³னீதி த³ஸ்ஸேதும் ‘‘க³ருனா’’திஆதி³மாஹ. தத்த² (சூளவ. அட்ட². 321) க³ருனாதி க³ருப⁴ண்டே³ன க³ருப⁴ண்ட³ஞ்ச தா²வரஞ்ச பரிவத்தேய்யாதி ஸம்ப³ந்தோ⁴. தா²வரேன ச தா²வரமேவ பரிவத்தேய்ய, ந க³ருப⁴ண்ட³ந்தி அதி⁴ப்பாயோ. பஞ்சஸு கோட்டா²ஸேஸு பச்சி²மத்தயம் க³ருப⁴ண்ட³ம், புரிமத்³வயம் தா²வரந்தி வேதி³தப்³ப³ம். ததா² கத்வா ச பு⁴ஞ்ஜதூதி ஏவம் பரிவத்தேத்வா ததோ ஆப⁴தம் கப்பியப⁴ண்ட³ம் பரிபு⁴ஞ்ஜதூதி அத்தோ². கத²ம் ஞாயதீதி சே? வுத்தஞ்ஹேதம் பரிவாரே-

‘‘அவிஸ்ஸஜ்ஜியம் அவேப⁴ங்கி³யம், பஞ்ச வுத்தா மஹேஸினா;

விஸ்ஸஜ்ஜேந்தஸ்ஸ பரிபு⁴ஞ்ஜந்தஸ்ஸ அனாபத்தி,

பஞ்ஹா மேஸா குஸலேஹி சிந்திதா’’தி. (பரி. 479);

ஏத்த² பன க³ருப⁴ண்டே³ன க³ருப⁴ண்ட³ஞ்ச தா²வரஞ்ச தா²வரேன தா²வரமேவ பரிவத்தனவிதி⁴ம் ஸந்தா⁴ய ‘‘விஸ்ஸஜ்ஜந்தஸ்ஸ அனாபத்தீ’’தி வுத்தம். புன ததோ நிப்³ப³த்தஞ்ச சதுபச்சயம் பரிபு⁴ஞ்ஜிதும் லப்³ப⁴தீதி தீ³பேதும் ‘‘பரிபு⁴ஞ்ஜந்தஸ்ஸ அனாபத்தீ’’தி வுத்தம். அயம் இமிஸ்ஸா கா³தா²ய அதி⁴ப்பாயோ. ஸேஸந்தி (சூளவ. அட்ட². 321) ஆராமாதி³ அபா⁴ஜியந்தி அத்தோ². அவேப⁴ங்கி³யவினிச்ச²யோ.

அவேப⁴ங்கி³யனித்³தே³ஸவண்ணனா நிட்டி²தா.