41. பகிண்ணகனித்³தே³ஸவண்ணனா

335-6. ஸத்³வாரப³ந்த⁴னே டா²னே…பே… ஸயந்தோ து³க்கடம் பு²ஸேதி ஏவரூபே டா²னே தி³வா ஸயந்தேனாதி ஸம்ப³ந்தோ⁴. ஸத்³வாரப³ந்த⁴னே (பாரா. 77; பாரா. அட்ட². 1.77) பன டா²னே யேன கேனசி பரிக்கி²த்தே அப்³போ⁴காஸேபி ருக்க²மூலேபி அந்தமஸோ இமினா லக்க²ணேன யுத்தே ஆகாஸங்க³ணேபி ஸயந்தேன த்³வாரம் ப³ந்தி⁴தப்³ப³மேவ. விஞ்ஞும்ஹி புரிஸேதி பி⁴க்கு²ம்ஹி வா ஸாமணேரே வா அந்தமஸோ உபாஸகஆராமிகேஸுபி அஞ்ஞதரஸ்மிம் ஸதீதி அத்தோ². ‘‘ஏஸ ஜக்³கி³ஸ்ஸதீ’’தி ஆபோ⁴கோ³ சாபி கப்பதீதி கேவலம் பி⁴க்கு²னிம் வா மாதுகா³மம் வா ஆபுச்சி²தும் ந வட்டதி. ஸவஸேதி அத்தனோ வஸே, அப³ஹுஸாதா⁴ரணட்டா²னேதி அத்தோ². தம் வினாகாரந்தி தம் புப்³பே³ வுத்தப்பகாரம் த்³வாரத²கனஆபோ⁴க³கரணஸங்கா²தம் ஆகாரம் வினாதி அத்தோ². அசித்தகாபத்திகிரியாயம் ஸங்கே²போ.

337. ரதனானீதி முத்தாதி³த³ஸவித⁴ரதனானி. த⁴ஞ்ஞந்தி ஸத்தவித⁴ம் த⁴ஞ்ஞம்.

338. ஸித்த²தேலோத³தேலேஹீதி ஏத்த² (சூளவ. 246; சூளவ. அட்ட². 246) பன யோ மது⁴ஸித்த²கதேலேன வா உத³கமிஸ்ஸகதேலேன வா அஞ்ஞேன கேனசி விகாரேன வா கேஸே ஓஸண்டே²தி, த³ந்தமயாதீ³ஸு யேன கேனசி ப²ணேன வா கோச்சே²ன வா ஹத்தே²ன வா ப²ணகிச்சம் கரோந்தோ அங்கு³லீஹி வா ஓஸண்டே²தி, தஸ்ஸ து³க்கடம் ஹோதீதி அத்தோ².

339. நேகபாவுரணாதி (சூளவ. 264) ந ஏகபாவுரணா. துவட்டயுந்தி நிபஜ்ஜேய்யும். கிம் வுத்தம் ஹோதி? யதி³ ஏகபாவுரணா வா ஏகத்த²ரணா வா ஏகமஞ்சே வா துவட்டேய்யும், ந வட்டதி, து³க்கடம் ஹோதீதி வுத்தம் ஹோதி. ஏகம்ஹி (சூளவ. அட்ட². 264) வா பா⁴ஜனே ந பு⁴ஞ்ஜேய்யுந்தி ஸம்ப³ந்தோ⁴.

340. சதுரங்கு³லதோ (சூளவ. 282; சூளவ. அட்ட². 282) ஊனம் த³ந்தகட்ட²ம் ந கா²தே³ய்யாதி ஸம்ப³ந்தோ⁴. அதி⁴கட்ட²ங்கு³லந்தி அட்ட²ங்கு³லதோ அதி⁴கம். ததா²தி ந கா²தே³ய்யாதி அத்தோ². அகல்லகோ (சூளவ. 289) லஸுணம் ந கா²தே³ய்ய.

341. ஹீனேஹி (பாசி. 31 ஆத³யோ) வா உக்கட்டே²ஹி வா ஜாதிஆதீ³ஹி ஏவ உக்கட்ட²ம் வா ஹீனம் வா ‘‘சண்டா³லோஸீ’’திஆதி³னா நயேன உஜும் வா ‘‘ஸந்தி வா இதே⁴கச்சே சண்டா³லா, வேனா, நேஸாதா³’’திஆதி³னா நயேன அஞ்ஞாபதே³ஸேன வா உபஸம்பன்னம் வா அனுபஸம்பன்னம் வா அக்கோஸாதி⁴ப்பாயம் வினா கேவலம் த³வாதி⁴ப்பாயேன வதே³, து³ப்³பா⁴ஸிதந்தி அத்தோ².

342. நகே² வா கேஸே வா நாஸலோமே (சூளவ. 275) வா தீ³கே⁴ ந தா⁴ரயேதி ஸம்ப³ந்தோ⁴. ‘‘அனுஜானாமி, பி⁴க்க²வே, மம்ஸப்பமாணேன நகே² சி²ந்தி³து’’ந்தி (சூளவ. 274) ச ‘‘அனுஜானாமி, பி⁴க்க²வே, து³மாஸிகம் வா து³வங்கு³லம் வா’’தி (சூளவ. 246) ச வுத்தம். ந லப்³ப⁴ம் வீஸதிமட்ட²ந்தி ஏத்த² ஏகனக²ம்பி மட்ட²ம் காதும் ந வட்டதி ஏவ. ‘‘ந பி⁴க்க²வே வீஸதிமட்ட²ம் காராபேதப்³ப³ம். யோ காராபேய்ய, ஆபத்தி து³க்கடஸ்ஸ (சூளவ. 274). அனுஜானாமி, பி⁴க்க²வே, மலமத்தம் அபகட்³டி⁴து’’ந்தி (சூளவ. 274) ஹி வுத்தம். தஸ்மா நக²தோ மலமத்தம் அபகட்³டி⁴தும் வட்டதி. ஸம்பா³தே⁴ லோமஹாரணந்தி ஏத்த² ஸம்பா³தோ⁴ நாம உபோ⁴ உபகச்ச²கா முத்தகரணஞ்ச. ‘‘அனுஜானாமி, பி⁴க்க²வே, ஆபா³த⁴பச்சயா ஸம்பா³தே⁴ லோமம் ஸம்ஹராபேது’’ந்தி (சூளவ. 275) ஹி வுத்தம்.

343. யதா²வுட்³ட⁴ந்தி வுட்³ட⁴படிபாடியா லத்³த⁴ப்³ப³ம். ந பா³தே⁴ய்யாதி ந வாரேய்ய. ஸங்கு⁴த்³தி³ட்ட²ம்வாதி உபாஸகாதீ³ஹி யதா²வுட்³ட⁴ம் ‘‘அய்யா பரிபு⁴ஞ்ஜந்தூ’’தி நிஸ்ஸஜ்ஜித்வாவ தி³ன்னம் ஸேனாஸனாதி³. ‘‘ந பி⁴க்க²வே உத்³தி³ஸ்ஸகதம்பி யதா²வுட்³ட⁴ம் படிபா³ஹிதப்³ப³ம். யோ படிபா³ஹேய்ய, ஆபத்தி து³க்கடஸ்ஸா’’தி (சூளவ. 313) ஹி வுத்தம். அதோ⁴தபாதே³ஹி (சூளவ. அட்ட². 324) வா அல்லபாதே³ஹி வா நக்கமேதி ஸம்ப³ந்தோ⁴. ஸுதோ⁴தபாத³கம் வாபீதி தோ⁴தபாதே³ஹேவ அக்கமிதப்³ப³ட்டா²னம். ததே²வாதி நக்கமேய்ய ஸஉபாஹனோதி அத்தோ². ‘‘ந பி⁴க்க²வே அதோ⁴தேஹி பாதே³ஹி, அல்லேஹி பாதே³ஹி, ஸஉபாஹனேன ஸேனாஸனம் அக்கமிதப்³ப³ம். யோ அக்கமேய்ய, ஆபத்தி து³க்கடஸ்ஸா’’தி (சூளவ. 324), ஹி வுத்தம். ‘‘அனுஜானாமி, பி⁴க்க²வே, பச்சத்த²ரித்வா நிபஜ்ஜிது’’ந்தி (சூளவ. 324) வுத்தத்தா பரிப⁴ண்ட³கதம் பூ⁴மிம் வா பூ⁴மத்த²ரணஸேனாஸனம் வா ஸங்கி⁴கம் மஞ்சபீட²ம் வா அத்தனோ ஸந்தகேன பச்சத்த²ரணேன பச்சத்த²ரித்வாவ நிபஜ்ஜிதப்³ப³ம்.

344. ஸங்கா⁴டியா ந பல்லத்தே²தி அதி⁴ட்டி²தசீவரேன விஹாரே வா அந்தரக⁴ரே வா பல்லத்தி²கா ந காதப்³பா³தி அத்தோ². பரிகம்மகதம் (சூளவ. அட்ட². 324) பி⁴த்திஆதி³ம் ந அபஸ்ஸயே. ‘‘ந பி⁴க்க²வே பரிகம்மகதா பி⁴த்தி அபஸ்ஸேதப்³பா³. யோ அபஸ்ஸேய்ய, ஆபத்தி து³க்கடஸ்ஸா’’தி (சூளவ. 324) ஹி வுத்தம். தஸ்மா ஸேதபி⁴த்தி வா சித்தகம்மகதா வா பி⁴த்தி ந அபஸ்ஸயிதப்³பா³. ந கேவலம் பி⁴த்தியேவ, பரிகம்மகதா த்³வாரகவாடவாதபானத்த²ம்பா⁴த³யோபி ந அபஸ்ஸயிதப்³பா³. ஏத்த²பி லோமக³ணனாய ஏவ ஆபத்தியோ வேதி³தப்³பா³. ஸந்தே உத³கே நோ ந ஆசமேதி (சூளவ. 373; சூளவ. அட்ட². 373) நோ ந ஆசமேதும், உத³கஸுத்³தி⁴ம் அகாதும் ந வட்டதீதி அத்தோ². ஸந்தேதி வசனேன அஸந்தே அனாபத்தீதி தீ³பேதி.

345. அகப்பியஸமாதா³னேதி பி⁴க்கு²ம் வா ஸாமணேராதி³கே ஸேஸஸஹத⁴ம்மிகே வா அகப்பியே நியோஜேந்தஸ்ஸ து³க்கடமேவ. ‘‘ந, பி⁴க்க²வே, பப்³ப³ஜிதேன அகப்பியே ஸமாத³பேதப்³ப³ம். யோ ஸமாத³பேய்ய, ஆபத்தி து³க்கடஸ்ஸா’’தி (மஹாவ. 303) ஹி வுத்தம். ஸபா⁴கா³ய (மஹாவ. அட்ட². 169) ஆபத்தியா தே³ஸனாயாதி அத்தோ². வத்து²ஸபா⁴க³தா இத⁴ அதி⁴ப்பேதா, ந ஆபத்திஸபா⁴க³தா. ‘‘ந பி⁴க்க²வே ஸபா⁴கா³ ஆபத்தி தே³ஸேதப்³பா³. யோ தே³ஸேய்ய, ஆபத்தி து³க்கடஸ்ஸா’’தி (மஹாவ. 169) ச ‘‘ந பி⁴க்க²வே ஸபா⁴கா³ ஆபத்தி படிக்³க³ஹேதப்³பா³. யோ படிக்³க³ண்ஹேய்ய, ஆபத்தி து³க்கடஸ்ஸா’’தி (மஹாவ. 169) ச வுத்தம். வத்து²ஸபா⁴க³ம் ஆபத்திம் ஆவி காதும்பி ந வட்டதி, தேன வுத்தம் ‘‘ஆவிகம்மே ச து³க்கட’’ந்தி. ‘‘அஹம், ஆவுஸோ, இத்த²ன்னாமம் ஆபத்திம் ஆபஜ்ஜிம், தம் இதோ வுட்ட²ஹித்வா படிகரிஸ்ஸாமீ’’தி அஞ்ஞஸ்ஸ வசனம் ஆவிகம்மம்னாம.

346. இதரஸ்ஸ தூதி அஸுத்³த⁴சித்தஸ்ஸ.

347. போரிஸந்தி (சூளவ. அட்ட². 284) புரிஸப்பமாணம் அபி⁴ருஹிதும் வட்டதீதி அத்தோ². ‘‘அனுஜானாமி, பி⁴க்க²வே, ஸதி கரணீயே போரிஸம் ருக்க²ம் அபி⁴ருஹிதும், ஆபதா³ஸு யாவத³த்த²’’ந்தி (சூளவ. 284) ஹி வுத்தம்.

348. பரிஸ்ஸாவனம் (சூளவ. 259; சூளவ. அட்ட². 259) வினா அட்³ட⁴யோஜனம் க³ச்ச²ந்தஸ்ஸ து³க்கடந்தி ஸம்ப³ந்தோ⁴. ‘‘அத்³தா⁴னக³மனஸமயோ நாம அட்³ட⁴யோஜனம் க³ச்சி²ஸ்ஸாமீதி பு⁴ஞ்ஜிதப்³ப³’’ந்தி (பாசி. 218) வுத்தம், தஸ்மா அட்³ட⁴யோஜனமேவ அந்திமம் அத்³தா⁴னந்தி வேதி³தப்³ப³ம். பி⁴க்கு²னியா ச மாதுகா³மேன ச ஸம்விதா⁴னஸிக்கா²பதே³ ‘‘ஏகத்³தா⁴னமக்³க³ம் படிபஜ்ஜேய்ய, அந்தமஸோ கா³மந்தரம்பீ’’தி (பாசி. 182, 413) ஏவம் விஸேஸேத்வா வுத்தத்தா ‘‘குக்குடஸம்பாதே கா³மே கா³மந்தரே கா³மந்தரே ஆபத்தி பாசித்தியஸ்ஸா’’தி (பாசி. 183, 414) வுத்தம், ந அத்³தா⁴னலக்க²ணேன. யதி³ கா³மந்தரபரிச்சே²தே³ன அத்³தா⁴னம் வுச்சதி, க³ணபோ⁴ஜனஸிக்கா²பதே³பி ‘‘அத்³தா⁴னக³மனஸமயோ நாம கா³மந்தரம்பி க³ச்சி²ஸ்ஸாமீதி பு⁴ஞ்ஜிதப்³ப³’’ந்தி வதே³ய்ய, ந ச வுத்தம். தஸ்மா ‘‘ந பி⁴க்க²வே அபரிஸ்ஸாவனகேன அத்³தா⁴னோ படிபஜ்ஜிதப்³போ³. யோ படிபஜ்ஜேய்ய, ஆபத்தி து³க்கடஸ்ஸ. ஸசே ந ஹோதி பரிஸ்ஸாவனம் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³ இமினா பரிஸ்ஸாவேத்வா பிவிஸ்ஸாமீ’’தி வுத்தட்டா²னேபி அட்³ட⁴யோஜனவஸேனேவ அத்³தா⁴னபரிச்சே²தோ³ வேதி³தப்³போ³. அப⁴யகி³ரிவாஸீனம் பன ‘‘த்³விகா³வுதவஸேன அத்³தா⁴னபரிச்சே²தோ³’’தி பாளியம் ஏவ அத்தி². யாசமானஸ்ஸாதி யாசந்தஸ்ஸ. ‘‘ந ச பி⁴க்க²வே அத்³தா⁴னப்படிபன்னேன பி⁴க்கு²னா பரிஸ்ஸாவனம் யாசியமானேன ந தா³தப்³ப³ம். யோ ந த³தே³ய்ய, ஆபத்தி து³க்கடஸ்ஸா’’தி ஹி வுத்தம்.

349. அஞ்ஞத்ர ஆபா³த⁴ப்பச்சயா கண்ணனாஸாதி³கே ஸேஸங்கே³ து³க்கடந்தி ஸம்ப³ந்தோ⁴. ஆபா³தே⁴ ஸதி அங்கு³லிஆதீ³னி சி²ந்தி³தும் வட்டதி. அங்க³ஜாதம் வா பீ³ஜானி வா சி²ந்தி³தும் ந வட்டதி ஏவ. அத்தகா⁴தனே ச து³க்கடந்தி ஸம்ப³ந்தோ⁴. ‘‘ந ச பி⁴க்க²வே அத்தானம் கா⁴தேதப்³ப³ம். யோ கா⁴தேய்ய, ஆபத்தி து³க்கடஸ்ஸா’’தி ஹி வுத்தம்.

350. ‘‘ந ச பி⁴க்க²வே படிபா⁴னசித்தம் காராபேதப்³ப³ம் இத்தி²ரூபகம் புரிஸரூபகம். யோ காராபேய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மாலாகம்மம் லதாகம்மம் மகரத³ந்தகம் பஞ்சபடிக’’ந்தி (சூளவ. 299) வுத்தத்தா ‘‘சித்தபோத்த²கரூபானி, ந கரே ந ச காரயே’’தி வுத்தம். பு⁴ஞ்ஜந்தந்தி (சூளவ. அட்ட². 316) விப்பகதபோ⁴ஜனம். ‘‘ந பி⁴க்க²வே விப்பகதபோ⁴ஜனோ பி⁴க்கு² வுட்டா²பேதப்³போ³. யோ வுட்டா²பேய்ய, ஆபத்தி து³க்கடஸ்ஸா’’தி (சூளவ. 316) ஹி வுத்தம்.

351. யானானீதி வய்ஹம் ரதோ² ஸகடம் ஸந்த³மானிகாதீ³னி கி³லானஸ்ஸ அபி⁴ருஹிதும் கப்பந்தி, ஸிவிகோ ச கப்பதி. ஏவம் ஸப்³ப³த்த². ‘‘அனுஜானாமி, பி⁴க்க²வே, கி³லானஸ்ஸ யானம், புரிஸயுத்தம் ஹத்த²வட்டகம், ஸிவிகம் பாடங்கி’’ந்தி (மஹாவ. 253) ஹி வுத்தம்.

352. த³வந்தி கேளிம். ‘‘ந பி⁴க்க²வே பு³த்³த⁴ம் வா த⁴ம்மம் வா ஸங்க⁴ம் வா ஆரப்³ப⁴ த³வோ காதப்³போ³. யோ கரேய்ய, ஆபத்தி து³க்கடஸ்ஸா’’தி (பாசி. 627) ஹி வுத்தம். தஸ்மா ‘‘கிம் பு³த்³தோ⁴ ஸிலகபு³த்³தோ⁴, உதா³ஹு படிபு³த்³தோ⁴’’தி வா ‘‘கிம் த⁴ம்மோ கோ³த⁴ம்மோ அஜத⁴ம்மோ’’தி வா ‘‘கிம் ஸங்கோ⁴ அஜஸங்கோ⁴ மிக³ஸங்கோ⁴’’தி வா ஏவமாதி³னா நயேன யோ த³வம் கரோதி, தஸ்ஸ து³க்கடந்தி வேதி³தப்³ப³ம். ‘‘தும்ஹாகம் சீவரம் த³ஸ்ஸாம, பத்தம் த³ஸ்ஸாமா’’திஆதி³னா நயேன ஸாமணேரம் வா உபஸம்பன்னம் வா அஞ்ஞஸ்ஸ அந்தமஸோ து³ஸ்ஸீலஸ்ஸாபி பரிஸபூ⁴தம் அத்தனோ உபட்டா²ககரணத்த²ம் உபலாளனே து³க்கடந்தி அத்தோ². ‘‘ந பி⁴க்க²வே அஞ்ஞஸ்ஸ பரிஸா அபலாளேதப்³பா³. யோ அபலாளேய்ய, ஆபத்தி து³க்கடஸ்ஸா’’தி ஹி வுத்தம்.

353. காயம் (சூளவ. 411) வா ஊரும் வா நிமித்தம் வா விவரித்வா பி⁴க்கு²னீனம் ந த³ஸ்ஸயேதி ஸம்ப³ந்தோ⁴. கத்³த³முத³காதி³னா தா பி⁴க்கு²னியோ ந ஸிஞ்சேய்யாதி அத்தோ². ந கேவலம் கத்³த³முத³காதி³கேனேவ, விப்பஸன்னஉத³கரஜனகத்³த³மாதீ³ஸுபி யேன கேனசி ஓஸிஞ்சந்தஸ்ஸ து³க்கடமேவ.

354. பா³லந்தி ஏத்த² பா³லோ நாம யோ ஓவாத³ம் க³ஹேத்வா பாதிமோக்கு²த்³தே³ஸகஸ்ஸ ஆரோசேத்வா பாடிபதே³ பச்சாஹரிதப்³ப³ந்தி ந ஜானாதி. கி³லானோ நாம யோ ஓவாத³ம் க³ஹேத்வா உபோஸத²க்³க³ம் க³ந்த்வா ஆரோசேதுஞ்ச பச்சாஹரிதுஞ்ச ந ஸக்கோதி. க³மியோ நாம யோ படிதே³ஸம் க³ந்துகாமோ.

‘‘ந பி⁴க்க²வே ஓவாதோ³ ந க³ஹேதப்³போ³. யோ ந க³ண்ஹேய்ய, ஆபத்தி து³க்கடஸ்ஸா’’தி (சூளவ. 414) ச ‘‘அனுஜானாமி, பி⁴க்க²வே, ட²பேத்வா பா³லம், ட²பேத்வா கி³லானம், ட²பேத்வா க³மிகம், அவஸேஸேஹி ஓவாத³ம் க³ஹேது’’ந்தி (சூளவ. 414) ச ‘‘ந பி⁴க்க²வே ஓவாதோ³ ந பச்சாஹரிதப்³போ³. யோ ந பச்சாஹரேய்ய, ஆபத்தி து³க்கடஸ்ஸா’’தி (பாசி. 415) ச வுத்தத்தா பி⁴க்கு²னீஹி தேரஸியம் வா சாதுத்³த³ஸியம் வா ஆக³ந்த்வா ‘‘அயம் உபோஸதோ² சாதுத்³த³ஸோ’’தி வா ‘‘பன்னரஸோ’’தி வா ‘‘கதா³ அய்ய உபோஸதோ²’’தி வா புச்சி²தே ‘‘சாதுத்³த³ஸோ’’தி வா ‘‘பன்னரஸோ’’தி வா ‘‘ஸ்வே ப⁴கி³னி உபோஸதோ²’’தி வா ஆசிக்கி²தப்³ப³ம். தாஹி பி⁴க்கு²னீஹி உபோஸத²தி³வஸே ஆக³ந்த்வா ‘‘பி⁴க்கு²னிஸங்கோ⁴ அய்ய பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர அய்ய பி⁴க்கு²னிஸங்கோ⁴ ஓவாதூ³பஸங்கமன’’ந்தி ஏவம் யாசிதப்³ப³ம், தம் வசனம் படிக்³க³ஹேத்வா உபோஸத²க்³கே³ பாதிமோக்கு²த்³தே³ஸகஸ்ஸ ‘‘பி⁴க்கு²னிஸங்கோ⁴, ப⁴ந்தே, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, ப⁴ந்தே, பி⁴க்கு²னிஸங்கோ⁴ ஓவாதூ³பஸங்கமன’’ந்தி ஆசிக்கி²தப்³ப³ம். பாதிமோக்கு²த்³தே³ஸகேனாபி ஸசே தத்த² பி⁴க்கு²னோவாத³கோ அத்தி², ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தம் பி⁴க்கு²னிஸங்கோ⁴ உபஸங்கமதூ’’தி வத்தப்³ப³ம். ஸசே நத்தி², ‘‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’’ந்தி புச்சி²த்வா ஸசே அத்தி² அட்ட²ஹங்கே³ஹி ஸமன்னாக³தோ பி⁴க்கு², தம் தத்தே²வ ஸம்மன்னித்வா வுத்தனயேனேவ ஓவாத³ப்படிக்³கா³ஹகஸ்ஸ ஆரோசேதப்³ப³ம். யதி³ நத்தி² கோசி பி⁴க்கு² பி⁴க்கு²னோவாத³கோ ஸம்மதோ, ‘‘பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி வத்தப்³ப³ம். தேன பி⁴க்கு²னா ‘‘ஸாதூ⁴’’தி ஸம்படிச்சி²த்வா பாடிபதே³ பி⁴க்கு²னீனம் ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி வத்தப்³ப³ம். தாஹிபி ‘‘ஸாது⁴ அய்யா’’தி ஸம்படிச்சி²தப்³ப³ம். இமினா நயேன க³ணபுக்³க³லேஸுபி வசனபே⁴தோ³ வேதி³தப்³போ³.

355. லோகாயதம் (சூளவ. 286; சூளவ. அட்ட². 286) நாம விதண்ட³ஸத்த²ம். ‘‘ந பி⁴க்க²வே ஆஸித்தகூபதா⁴னே பு⁴ஞ்ஜிதப்³ப³ம். யோ பு⁴ஞ்ஜேய்ய, ஆபத்தி து³க்கடஸ்ஸா’’தி (சூளவ. 264) வுத்தத்தா ‘‘பேளாயபி ந பு⁴ஞ்ஜேய்யா’’தி வுத்தம்.

356. கி³ஹிபாருதம் ந பாருபேய்ய, கி³ஹினிவாஸனம் ந நிவாஸேய்யாதி அத்தோ². ‘‘ந பி⁴க்க²வே கி³ஹினிவத்த²ம் நிவாஸேதப்³ப³ம் ஹத்தி²ஸோண்ட³கம் மச்ச²வாளகம் சதுகண்ணகம் தாலவண்டகம் ஸதவலிகம். யோ நிவாஸேய்ய, ஆபத்தி து³க்கடஸ்ஸா’’தி (சூளவ. 280) ஹி வுத்தம். பரிமண்ட³லதோ அஞ்ஞதா² பாருபனம், ஸப்³ப³மேதம் கி³ஹிபாருதம் நாம. தம் பன ந பாருபேதப்³ப³ந்தி அத்தோ². ஸம்வேல்லியந்தி ஏத்த² கச்ச²ம் ப³ந்தி⁴த்வா ந நிவாஸேய்யாதி அத்தோ². தா³யந்தி (சூளவ. 283; சூளவ. அட்ட². 283) அரஞ்ஞம். நாலிம்பயேய்யாதி ஸம்ப³ந்தோ⁴.

357. வட்³டி⁴ஞ்ச ந பயோஜயே, நோஞாதகே நப்பவாரிதே ந யாசேதி அத்தோ². அஞ்ஞஸ்ஸாதி ஏத்த² (சூளவ. 420; சூளவ. அட்ட². 420) ‘‘தும்ஹே பரிபு⁴ஞ்ஜதா²’’தி நியமேத்வா தி³ன்னம் ஸஹத⁴ம்மிகானம்பி தா³தும் ந வட்டதி. அக்³க³ம் க³ஹேத்வா வா கதிபாஹம் பு⁴த்வா வா புன த³தே³ய்யாதி அத்தோ².

358. உத்³தி³ஸ்ஸ யாசனேதி ஏத்த² (பாசி. அட்ட². 679) ‘‘அம்ஹாகம் விஹாரே இத்த²ன்னாமேன இத³ஞ்சித³ஞ்ச கத’’ந்தி வா ‘‘கரிஸ்ஸந்தீ’’தி வா ஏவம் உத்³தி³ஸ்ஸ ரக்க²ம் யாசனேதி அத்தோ². ஞத்வாஞத்வா வாதி ஏவம் ‘‘அம்ஹேஹி யாசியமானா இமேஸம் த³ண்டே³ஸ்ஸந்தீ’’தி தேஸம் த³ண்டி³னம் ஞத்வா வா அஞத்வா வாதி அத்தோ². தேஹி பன த³ண்டி³தே ஸோ த³ண்டோ³ உத்³தி³ஸ்ஸ யாசந்தானம் கீ³வாவ ப⁴ண்ட³தே³ய்யம் ஹோதி ஏவாதி அத்தோ². ‘‘இமினா ச இமினா ச இத³ஞ்ச இத³ஞ்ச கதம், ஏத்தகம் த³ண்ட³ம் க³ண்ஹதா²’’தி ஸயம் த³ண்டா³பனே பன அஸ்ஸ த³ண்ட³ஸ்ஸ அக்³க⁴பே⁴தே³ன பாராஜிகது²ல்லச்சயது³க்கடா ஞேய்யாதி அத்தோ².

359. அனத்தா²ய அஸ்ஸ சோரஸ்ஸ பா⁴ஸிதேதி ஸம்ப³ந்தோ⁴. ராஜராஜமஹாமத்தாதீ³ஹி தஸ்ஸ சோரஸ்ஸ த³ண்ட³ம் க³ண்ஹந்தே அஸ்ஸ பி⁴க்கு²ஸ்ஸ தத்தகம் கீ³வாதி அத்தோ².

360. விகா⁴ஸம் (பாசி. 825-826) வா உச்சாரம் வா ஸங்காரம் வா முத்தம் வா பாகாரகுட்டானம் ப³ஹி ச²ட்³டே³ய்ய, து³க்கடந்தி அத்தோ². வளஞ்ஜே நாவலோகியாதி இமினாவ அவளஞ்ஜனகாலே நாவலோகேத்வா ச²ட்³டே³தும் வட்டதீதி தீ³பேதி. ந கேவலம் தத்தே²வ, அத² கோ² ஹரிதே வாபி வீஹாதி³னாளிகேராதி³ரோபிமே ச²ட்³டே³ந்தஸ்ஸ து³க்கடமேவாதி அத்தோ².

361. ‘‘உபஹாரம் கரோமா’’தி வுத்தேதி புச்சி²தேதி அதி⁴ப்பாயோ.

362. கீளத்த²ம் (பாசி. 979; பாசி. அட்ட². 978) கதம் ராஜாகா³ரம் வா போக்க²ரணிம் வா உய்யானம் வா சித்தாகா³ரம் வா ஆராமம் வா த³ட்டு²ம் க³ச்ச²தோ பதே³ பதே³ து³க்கடந்தி அத்தோ².

363. ஆஸனேன (சூளவ. 364) நவே ந படிபா³ஹேய்ய, உண்ஹே (மஹாவ. 67, 78, 79; சூளவ. 376, 378, 380, 382) சீவரம் ந நித³ஹேய்ய. கு³ருனாதி ஆசரியாதி³னா பணாமிதோ க²மாபேய்யாதி ஸம்ப³ந்தோ⁴.

364. ஆபத்தீஹி ச ஸத்தஹீதி (வஜிர. டீ. பாசித்திய 26) ஸத்தஹி ஆபத்தீஹி பி⁴க்கு²ம் பரம்முகா² அக்கோஸனேன ச ‘‘அஸ்ஸத்³தோ⁴ அப்பஸன்னோ பீ³ஜபோ⁴ஜீ’’திஆதி³னா அஞ்ஞேனேவ வா அக்கோஸனேன ச து³க்கடந்தி அதி⁴ப்பாயோ.

365. ஸத்³தா⁴தே³ய்யம் (மஹாவ. அட்ட². 361) சீவரம் வா பிண்ட³பாதம் வாதி அத்தோ². ‘‘ந பி⁴க்க²வே ஸத்³தா⁴தே³ய்யம் வினிபாதேதப்³ப³ம். யோ வினிபாதேய்ய, ஆபத்தி து³க்கடஸ்ஸா’’தி (மஹாவ. 361) ஹி வுத்தம். ‘‘அனுஜானாமி, பி⁴க்க²வே, மாதாபிதூனம் தா³து’’ந்தி (மஹாவ. 361) வுத்தத்தா ‘‘லப்³ப⁴ம் பிதூன’’ந்தி வுத்தம்.

366. வஸ்ஸம்வுத்தோ² அஞ்ஞத்ராதி ஸம்ப³ந்தோ⁴, அஞ்ஞஸ்மிம் விஹாரேதி அத்தோ². அஞ்ஞதோதி அஞ்ஞவிஹாரதோ. ‘‘ந பி⁴க்க²வே அஞ்ஞத்ர வஸ்ஸம்வுத்தே²ன அஞ்ஞத்ர சீவரபா⁴கோ³ ஸாதி³தப்³போ³. யோ ஸாதி³யேய்ய, ஆபத்தி து³க்கடஸ்ஸா’’தி (மஹாவ. 364) ஹி வுத்தம். தேஸந்தி தஸ்மிம் விஹாரே தம் சீவரம் பா⁴ஜேத்வா க³ண்ஹிதும் யுத்தானம் பி⁴க்கூ²னம் து⁴ரனிக்கே²பதோ ஹோதி ப⁴ண்ட³க்³கே⁴ன காரியோதி அத்தோ².

367. ஸஹ அந்தரேன உத்தரோதி ஸந்தருத்தரோ, கா³மம் ந பவிஸேய்யாதி அத்தோ². ‘‘ந பி⁴க்க²வே ஸந்தருத்தரேன கா³மோ பவிஸிதப்³போ³. யோ பவிஸேய்ய, ஆபத்தி து³க்கடஸ்ஸா’’தி (மஹாவ. 362) ஹி வுத்தம். கல்லோ வாதி அகி³லானோ. ஸஉபாஹனோ கா³மம் ந பவிஸேய்யாதி ஸம்ப³ந்தோ⁴. ‘‘ந பி⁴க்க²வே சாமரிபீ³ஜனீ தா⁴ரேதப்³பா³. யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 269), ‘‘அனுஜானாமி, பி⁴க்க²வே, திஸ்ஸோ பீ³ஜனியோ வாகமயம் உஸீரமயம் மோரபிஞ்ச²மய’’ந்தி (சூளவ. 269) ச வுத்தத்தா ‘‘ந தா⁴ரேய்ய சாமரீமகஸபீ³ஜனி’’ந்தி வுத்தம். மகஸபீ³ஜனீ பன த³ந்தவிஸாணதா³ருத³ண்ட³காபி வட்டதி.

368. ஆராமதோ ப³ஹீதி ஸம்ப³ந்தோ⁴. ‘‘ந பி⁴க்க²வே ச²த்தம் தா⁴ரேதப்³ப³ம். யோ தா⁴ரேய்ய, ஆபத்தி து³க்கடஸ்ஸா’’தி, ‘‘அனுஜானாமி, பி⁴க்க²வே, கி³லானஸ்ஸ ச²த்த’’ந்தி ச வுத்தத்தா அகி³லானோ ஆராமதோ ப³ஹி ந லப⁴தி, சீவரகு³த்தியாதி³அத்தா²ய அகி³லானோபி லப⁴தீதி அத்தோ².

369. கா³ஹேய்ய நுப⁴தோகாஜந்தி ந கா³ஹேய்ய உப⁴தோகாஜம். ஏகந்தரிககாஜகந்தி ஏகதோகாஜஞ்ச அந்தரகாஜஞ்ச. ஸீஸபா⁴ரோ ச க²ந்த⁴பா⁴ரோ ச கடிபா⁴ரோ ச ஸீஸக்க²ந்த⁴கடிபா⁴ரா. ‘‘ந பி⁴க்க²வே உப⁴தோகாஜம் ஹரிதப்³ப³ம். யோ ஹரேய்ய, ஆபத்தி து³க்கடஸ்ஸா’’தி (சூளவ. 281), ‘‘அனுஜானாமி, பி⁴க்க²வே, ஏகதோகாஜம் அந்தரகாஜம் ஸீஸபா⁴ரம் க²ந்த⁴பா⁴ரம் கடிபா⁴ரம் ஓலம்ப³க’’ந்தி (சூளவ. 281) ச வுத்தத்தா உப⁴தோகாஜமேவ ந வட்டதி, ஸேஸானி வட்டந்தீதி வேதி³தப்³பா³.

370. அனோகாஸகதந்தி (மஹாவ. 153) யோ பட²மமேவ ‘‘கரோஹி மே ஆவுஸோ ஓகாஸம், அஹம் தம் வத்துகாமோ’’தி ஏவம் அகதோகாஸம் ஆபத்தியா சோதே³ய்ய, தஸ்ஸ து³க்கடம் ஹோதீதி அத்தோ². ததா²தி து³க்கடமேவாதி அத்தோ².

371. பகதங்கு³லேன, ந ஸுக³தங்கு³லேனாதி அத்தோ².

372. மூக³ப்³ப³தாதி³ம் (மஹாவ. 209; மஹாவ. அட்ட². 209) தித்தி²யப்³ப³தம் யதி³ க³ண்ஹேய்ய, து³க்கடந்தி அத்தோ². ஆதி³-ஸத்³தே³ன கோ³வதகுக்குரவதாத³யோ ஸங்க³ஹிதா. ததா²தி (மஹாவ. 303; மஹாவ. அட்ட². 303) ந்ஹாபிதபுப்³ப³கோ கு²ரப⁴ண்ட³ம் யதி³ பரிஹரேய்ய, து³க்கடமேவாதி அத்தோ².

373. யம் கிஞ்சீதி (கங்கா². அட்ட². குடிகாரஸிக்கா²பத³வண்ணனா) ந்ஹாபிததுண்ணகாரகம்மாதி³ யம் கிஞ்சி ஹத்த²கம்மந்தி அத்தோ². தத³னுஸாரதோதி ஹத்த²கம்மயாசனானுஸாரதோதி அத்தோ². ஸசே ஏவம் யாசதோ ஹத்த²கம்மமூலமேவ தே³தி, தம் அஞ்ஞஸ்ஸ தா³பேத்வா காரேதும் வட்டதீதி அத்தோ². நிக்கம்மம் பன ஹத்த²கம்மவஸேன அயாசித்வாபி ‘‘ஏஹி இமம் கரோஹீ’’தி காரேதும் கப்பதீதி அத்தோ². யம் கிஞ்சிபரஸந்தகந்தி யம் கிஞ்சி தா³ருதிணாதி³கம் அபரஸந்தகம் அபரிக்³க³ஹிதம் ஆஹராபேதும் கப்பதீதி அதி⁴ப்பாயோ.

374. கி³ஹீனந்தி கி³ஹீனம் ஸந்தகம். கோ³பகேதி ரக்க²கே. யத்தகம் தே³தி, தத்தகம் க³ஹேதும் கப்பதீதி அத்தோ². யதா²பரிச்சே²த³ந்தி ‘‘தி³வஸே தி³வஸே ஏத்தகம் உச்சு²னாளிகேரம் அம்ப³பக்கம் தும்ஹே கா²த³தா²’’தி பரிச்சி²ந்தி³த்வா தி³ன்னமேவ தேஸு தே³ந்தேஸு லப்³ப⁴தீதி அத்தோ².

375. த்³விஹாபஜ்ஜேய்யாதி த்³வீஹி ஆபஜ்ஜேய்ய. கதமேஹி த்³வீஹீதி சே, தே த³ஸ்ஸேதும் ‘‘காயவாசாஹீ’’தி வுத்தம், ‘‘த்³வீஹாகாரேஹி ஆபத்திம் ஆபஜ்ஜதி, காயேன ஆபஜ்ஜதி, வாசாய ஆபஜ்ஜதீ’’தி (பரி. 322) ஹி வுத்தம். காயவாசாஹி ஆபத்திம் ஆபஜ்ஜந்தோ ச ச²ஹி ஆகாரேஹி ஆபத்திம் ஆபஜ்ஜதி, தானி த³ஸ்ஸேதும் ‘‘அலஜ்ஜிஞாணகுக்குச்சபகதத்தா’’திஆதி³மாஹ. ஏத்த² (பரி. 295) பன அகப்பியபா⁴வம் ஜானந்தோ ஏவ வீதிக்கமம் கரோந்தோ அலஜ்ஜிதாய ஆபஜ்ஜதி நாம. கப்பியாகப்பியம் அஜானித்வா ஆபஜ்ஜந்தோ அஞ்ஞாணதாய. கப்பியம் நு கோ², நோ நு கோ²’’தி ஸம்ஸயே உப்பன்னே தமபி⁴விதரித்வா வீதிக்கமம் கரோந்தோ குக்குச்சபகதத்தா ஆபஜ்ஜதி. ஸஹஸேய்யாதி³ம் ஆபஜ்ஜந்தோ ஸதிப்லவா, ஸதிஸம்மோஸாதி அத்தோ². அச்ச²மம்ஸம் ‘‘ஸூகரமம்ஸ’’ந்தி வா ஸூகரமம்ஸம் ‘‘அச்ச²மம்ஸ’’ந்தி வா கா²த³ந்தோ அகப்பியே கப்பியஸஞ்ஞிதாய ச கப்பியே அகப்பியஸஞ்ஞிதாய ச ஆபஜ்ஜதீதி வேதி³தப்³போ³.

376. அலஜ்ஜிதாய வா அஞ்ஞாணதாய வா ஆபத்திம் காயவாசாஹி சா²த³யேதி அத்தோ². ஏகே வா ஏகஸ்மிம் வா. லிங்கே³தி லிங்க³பரிவத்தனதோ. ஏவம் சதுதா⁴ ஆபத்திவுட்டா²னம் ஹோதீதி அத்தோ². திணவத்தா²ரகஸமத²அப்³பா⁴னாதீ³னம் வஸேன ஸங்கே⁴ ஆபத்தி வுட்டா²தீதி வேதி³தப்³ப³ம் நிஸ்ஸஜ்ஜனாதீ³ஸு க³ணே. ஏகஸ்ஸ ஸந்திகே வுட்டா²னம் பாகடமேவ. ‘‘யா ஆபத்தியோ பி⁴க்கூ²னம் பி⁴க்கு²னீஹி அஸாதா⁴ரணா, தாஹி ஆபத்தீஹி அனாபத்தீ’’தி (பாரா. 69) வசனதோ லிங்க³பரிவத்தனே ஆபத்திவுட்டா²னம் ஞாதப்³ப³ம்.

377. பச்சயத்³வயேதி சீவரே ச பிண்ட³பாதே ச. ந கேவலஞ்ச இமே ஏவ, நிமித்தகம்மம்பி ந லப்³ப⁴தேவ, கா³தா²ப³ந்த⁴ஸுக²த்த²ம் பன ந வுத்தம். தத்த² நிமித்தகம்மம் நாம யம் கிஞ்சி பரேஸம் பச்சயதா³னஸம்யோஜனகம் காயவசீகம்மம். கா²த³னீயம் க³ஹேத்வா க³ச்ச²ந்தே தி³ஸ்வா ‘‘கிம் கா²த³னீயம் லபி⁴த்தா²’’திஆதி³னா நயேன தஸ்ஸ பவத்தி வேதி³தப்³பா³. பரிகதா² நாம யதா² யதா² தம் லப⁴தி, ததா² ததா² பரிவத்தேத்வா கத²னம். ‘‘ஏதரஹி பி⁴க்கூ² பிண்ட³பாதேன கிலமந்தீ’’திஆதி³னா நயேன தஸ்ஸ பவத்தி வேதி³தப்³பா³. ஓபா⁴ஸோ நாம பச்சயப்படிஸம்யுத்தகதா². விஞ்ஞத்தி பன பாகடா ஏவ. ததியேதி ஸேனாஸனே. ஸேனாஸனே பன நிமித்தோபா⁴ஸபரிகதா² வட்டந்தி, விஞ்ஞத்தி ஏவ ஏகா ந வட்டதி. தத்த² நிமித்தகம்மம் நாம உபாஸகே தி³ஸ்வா ஸேனாஸனத்த²ம் பூ⁴மிபரிகம்மகரணாதி³. ஓபா⁴ஸோ நாம ‘‘உபாஸகா, தும்ஹே குஹிம் வஸதா²’’தி ‘‘பாஸாதே³, ப⁴ந்தே’’தி வுத்தே ‘‘கிம் பி⁴க்கூ²னம் பாஸாதோ³ ந வட்டதீ’’திஆதி³கம் வசனம். பரிகதா² நாம ‘‘பி⁴க்கூ²னம் ஸேனாஸனம் ஸம்பா³த⁴’’ந்தி வசனம். ஸேஸேதி கி³லானபச்சயே.

378. ந ருஹதீதி ந ஹோதி. அச்சயே தா³னந்தி அச்சயதா³னம். பஞ்சஸு ஸஹத⁴ம்மிகேஸு யேன கேனசி காலம் கரோந்தேன ‘‘மமச்சயேன மய்ஹம் பரிக்கா²ரோ உபஜ்ஜா²யஸ்ஸ ஹோது, ஆசரியஸ்ஸ ஹோது, அஞ்ஞஸ்ஸ வா கஸ்ஸசி ஹோதூ’’தி வுத்தே தேஸம் ந ஹோதி, தஸ்மா வுத்தம் ‘‘ந ருஹதீ’’தி. ஸங்க⁴ஸ்ஸேவ ச தம் ஹோதீதி யதி³ பி⁴க்கு²ஸாமணேரேஹி ஏவம் வுத்தம், தஸ்மிம் மதேபி பி⁴க்கு²ஸங்க⁴ஸ்ஸேவ ஹோதி, பி⁴க்கு²னிஸிக்க²மானஸாமணேரீஹி சே வுத்தம், தஸ்மிம் மதே பி⁴க்கு²னிஸங்க⁴ஸ்ஸ தம் ஹோதீதி அத்தோ². கி³ஹீனம் பன ரூஹதீதி கி³ஹீனம் பன அச்சயதா³னம் ஏவ ஸப்³பே³ஸம் ருஹதீதி வுத்தம் ஹோதி.

379. உபஸ்ஸயேதி பி⁴க்கு²னிவிஹாரே. தா³யஜ்ஜோதி தஸ்ஸ பரிக்கா²ரஸ்ஸ தா³யஜ்ஜோ. ஸேஸேபீதி ஸசே பி⁴க்கு²னிஸிக்க²மானஸாமணேரியோ பி⁴க்கு²விஹாரே காலம் கரோந்தி, தாஸம் பரிக்கா²ரானம் பி⁴க்கு²ஸங்கோ⁴வ தா³யஜ்ஜோதி அத்தோ².

380. புரிமஸ்ஸேவாதி ஏத்த² ‘‘இமம் பரிக்கா²ரம் நேத்வா அஸுகஸ்ஸ தே³ஹீ’’தி தி³ன்னம் புரிமஸ்ஸேவ ஹோதீதி அத்தோ². ‘‘அஸுகஸ்ஸ த³ம்மீ’’தி தி³ன்னம் பன பச்சி²மஸ்ஸேவ ஹோதி பரிச்சஜித்வா தி³ன்னத்தா. இமம் விதி⁴ம் ஞத்வாவ விஸ்ஸாஸக்³கா³ஹம் வா க³ண்ஹேய்ய, மதகசீவரம் வா அதி⁴ட்டே²தி ஸம்ப³ந்தோ⁴. மதகசீவரஅதி⁴ட்டா²னம் நாம க⁴ண்டிம் பஹரித்வா காலம் கோ⁴ஸேத்வா தோ²கம் ஆக³மேத்வா ஸசே பி⁴க்கூ² ஆக³ச்ச²ந்தி, தேஹி ஸத்³தி⁴ம் பா⁴ஜேதப்³பா³னி, நோ சே ஆக³ச்ச²ந்தி, ‘‘மய்ஹிமானி சீவரானி பாபுணந்தீ’’தி அதி⁴ட்டா²தப்³பா³னி. ஏவம் அதி⁴ட்டி²தே ஸப்³பா³னி தஸ்ஸேவ ஹோந்தி, டி²திகா பன ந திட்ட²தி. ஸசே ஏகேகம் உத்³த⁴ரித்வா ‘‘அயம் பட²மபா⁴கோ³ மய்ஹம் பாபுணாதி, அயம் து³தியபா⁴கோ³’’தி ஏவம் க³ண்ஹாதி, க³ஹிதானி ச ஸுக³ஹிதானி ஹோந்தி, டி²திகா ச திட்ட²தி. ஏவம் பாபேத்வா க³ண்ஹந்தேனாபி அதி⁴ட்டி²தமேவ ஹோதி.

381. லோஹப⁴ண்டே³ பஹரணிம் ட²பேத்வா ஸப்³ப³ம் கப்பதி, தா³ருப⁴ண்டே³ ச தா³ருஜம் பத்தஞ்ச பாது³கஞ்ச, பல்லங்கஞ்ச ஆஸந்தி³ஞ்ச ட²பேத்வா ஸப்³ப³ம் கப்பதி, மத்திகாமயே கதகஞ்ச கும்ப⁴காரிகஞ்ச ட²பேத்வா ஸப்³ப³ம் கப்பதீதி அத்தோ². ‘‘அனுஜானாமி, பி⁴க்க²வே, ட²பேத்வா பஹரணிம் ஸப்³ப³ம் லோஹப⁴ண்ட³ம், ட²பேத்வா ஆஸந்தி³ம் பல்லங்கம் தா³ருபத்தம் தா³ருபாது³கம் ஸப்³ப³ம் தா³ருப⁴ண்ட³ம், ட²பேத்வா கதகஞ்ச கும்ப⁴காரிகஞ்ச ஸப்³ப³ம் மத்திகாப⁴ண்ட³’’ந்தி (சூளவ. 293) ஹி வுத்தம். ஏத்த² கதகந்தி பது³மகண்ணிகாகாரேன கதமல்லகந்தி அதி⁴ப்பேதம். த⁴னியஸ்ஸேவ ஸப்³ப³மத்திகாமயா குடி கும்ப⁴காரிகந்தி. பகிண்ணகவினிச்ச²யோ.

பகிண்ணகனித்³தே³ஸவண்ணனா நிட்டி²தா.