37. உக்³க³ஹனித்³தே³ஸவண்ணனா

281. த³ஸபே⁴த³ம்பீதி ஸசே கேனசி ஹேட்டா² த³ஸ்ஸிதம் த³ஸவித⁴ம் ரதனம் ஆனேத்வா ‘‘இத³ம் ஸங்க⁴ஸ்ஸ வா சேதியஸ்ஸ வா நவகம்மஸ்ஸ வா அஞ்ஞபுக்³க³லஸ்ஸ வா ஸுத்தந்திகக³ணஸ்ஸ வா த³ம்மீ’’தி வுத்தே ‘‘ஸாதூ⁴’’தி ஸம்படிச்ச²ந்தஸ்ஸ து³க்கடம் ஹோதீதி அத்தோ².

282-3. தேஸு த³ஸவிதே⁴ஸு ரதனேஸூதி அத்தோ². த்³வீஸூதி ரஜதஜாதரூபேஸு. க³ணஸங்க⁴புக்³க³லே (பாரா. அட்ட². 2.538-539) அனாமஸித்வா ‘‘இத³ம் ஹிரஞ்ஞஸுவண்ணம் சேதியஸ்ஸ த³ம்மி, நவகம்மஸ்ஸ த³ம்மீ’’தி வுத்தே ந படிக்கி²பேதி அத்தோ². கிம் காதப்³ப³ந்தி சே? தம் த³ஸ்ஸேதும் ‘‘வதே³’’திஆதி³ வுத்தம். ‘‘இமே ஏவம் வத³ந்தீ’’தி கப்பியகாரானம் ஆசிக்கி²தப்³ப³ந்தி அத்தோ².

284. ந கேவலம் ஹிரஞ்ஞஸுவண்ணாதி³கமேவ, அஞ்ஞம்பி கே²த்தவத்தா²தி³கம் அகப்பியம் ந ஸம்படிச்சி²தப்³ப³ந்தி தம் த³ஸ்ஸேதும் ‘‘கே²த்தம் வத்து²’’ந்திஆதி³மாஹ. தா³ஸபஸுஆதி³கம் தா³ஸபஸ்வாதி³கம். ஸசே ஹி கோசி ‘‘மய்ஹம் ஸஸ்ஸஸம்பாத³கம் மஹாதளாகம் அத்தி², தம் ஸங்க⁴ஸ்ஸ த³ம்மீ’’தி வத³தி, தஞ்சே ஸங்கோ⁴ ஸம்படிச்ச²தி. படிக்³க³ஹணேபி பரிபோ⁴கே³பி ஆபத்தியேவ. ஏவம் ஸேஸேஸுபி.

கப்பியேன கமேன க³ண்ஹேய்யாதி ஸம்ப³ந்தோ⁴. ‘‘கே²த்தம் த³ம்மீ’’தி வுத்தே ‘‘ந வட்டதீ’’தி படிக்கி²பித்வா ‘‘இதோ சத்தாரோ பச்சயே பரிபு⁴ஞ்ஜதா²’’தி வா ‘‘சதுபச்சயபரிபோ⁴க³த்தா²ய த³ம்மீ’’தி வா வத³தி சே, க³ஹேதப்³ப³ம். வத்து²ம்ஹிபி ஏஸேவ நயோ. ‘‘தளாகம் த³ம்மீ’’தி வுத்தே படிக்கி²பித்வா ‘‘சத்தாரோ பச்சயே பரிபு⁴ஞ்ஜதா²’’தி வா ‘‘ஸங்கோ⁴ உத³கம் பரிபு⁴ஞ்ஜிஸ்ஸதி, ப⁴ண்ட³கம் தோ⁴விஸ்ஸதீ’’தி வா ஆதி³னா நயேன வுத்தே ஸம்படிச்சி²தப்³ப³ம். ‘‘தா³ஸம் த³ம்மீ’’தி வுத்தே படிக்கி²பித்வா ‘‘ஆராமிகம், வேய்யாவச்சகரம், கப்பியகாரகம் த³ம்மீ’’தி வுத்தே ஸம்படிச்சி²தப்³ப³ம். ‘‘கோ³மஹிம்ஸஅஜேளகாத³யோ த³ம்மீ’’தி வுத்தே படிக்கி²பித்வா ‘‘பஞ்சகோ³ரஸபரிபோ⁴க³த்தா²யா’’தி வுத்தே ஸம்படிச்சி²தப்³ப³ம். ஏதி³ஸம் க³ஹணம் ஸந்தா⁴ய ‘‘படிக்கி²பித்வா க³ண்ஹேய்யா’’தி வுத்தம்.

285-6. நவமாதிககேதா³ரதளாககிரியா (பாரா. அட்ட². 2.238-239) ச அனவே புப்³பே³ கப்பியவோஹாரேன படிக்கி²பித்வா க³ஹிததளாகே மத்திகுத்³த⁴ரணஞ்ச பி⁴ன்னட்டா²னே பாளிப³ந்தோ⁴ ச து³ப்³ப³லட்டா²னே ஆளியா தி²ரகாரோ ச அனவே கேதா³ரே புராணபா⁴க³தோ அதிரேகபா⁴க³க்³க³ஹணஞ்ச நவே கேதா³ரே அபரிச்சி²ன்னபா⁴கே³ ‘‘ஸஸ்ஸே தே³த² ஏத்தகே’’தி கஹாபணுட்டா²பனஞ்சாபீதி இத³ம் ஸப்³ப³ம் பி⁴க்கு²ஸ்ஸ காதும் ந வட்டதி. ஸசே கரோதி, ஏவமாதி³கம் ஸப்³பே³ஸம்பி அகப்பியந்தி அத்தோ².

287-9. இதா³னி தம்யேவ அகப்பியம் த³ஸ்ஸேதும் ‘‘அவத்வா’’திஆதி³ வுத்தம். தஸ்ஸத்தோ² (பாரா. அட்ட². 2.238-239) – யோ பன ‘‘கஸ, வப்ப’’ இச்சாதி³கம் அவத்வா ‘‘ஏத்திகாய பூ⁴மியா ஏத்தகோ பா⁴கோ³ தே³ய்யோ’’தி பூ⁴மிம் வா பதிட்டா²பேதி, ‘‘ஏத்தகே பூ⁴மிபா⁴கே³ ஸஸ்ஸம் கதம், ஏத்தகம் க³ண்ஹதா²’’தி கஸ்ஸகே வத³ந்தே பமாணக³ண்ஹனத்த²ம் த³ண்ட³ரஜ்ஜுபி⁴ மினதி, க²லே ட²த்வா ரக்க²ணாதீ³னி கரோதி, தஸ்ஸேவ அகப்பியந்தி.

290. ப⁴ண்டா³கா³ரிகஸீஸேன பிதுஸந்தகம்பி ஸசே படிஸாமேய்ய, பாசித்தியந்தி அத்தோ².

291-2. பிதூனந்தி மாதாபிதூனம். ஸாடகாதி³கப்பியம் வத்து²ம். ‘‘படிஸாமேத்வா தே³ஹீ’’தி வுத்தேதி ஸம்ப³ந்தோ⁴. பாதேத்வான க³தே யஸ்மா அஜ்ஜா²ராமஸிக்கா²பத³வஸேன (பாசி. 505-506) பலிபோ³தோ⁴, தஸ்மா கோ³பிதும் லப்³ப⁴ந்தி அத்தோ².

293-4. ஸகம் வாஸிஆதி³பரிக்கா²ரந்தி அத்தோ². இத³ம் டா²னம் கு³த்தந்தி த³ஸ்ஸேதப்³ப³ம். ‘‘ஏத்த² ட²பேதா²’’தி பன ந வத்தப்³ப³ம்.

295. ஏத்த² ‘‘அஞ்ஞோ கோசி ந பவிஸதி, பி⁴க்கூ²ஹி வா ஸாமணேரேஹி வா க³ஹிதம் ப⁴விஸ்ஸதீ’’தி ஸங்கந்தீதி அத்தோ². வத்து²ம்ஹீதி அலங்காராதி³வத்து²ம்ஹீதி அத்தோ². தாதி³ஸேதி யாதி³ஸே வத்து²ம்ஹி நட்டே² ஆஸங்கா ஹோதி, தாதி³ஸே வத்து²ம்ஹி நட்டே²தி ஸம்ப³ந்தோ⁴.

296. இதா³னி அஸங்கிதப்³ப³ட்டா²னம் த³ஸ்ஸேதும் ‘‘விஹாராவஸத²ஸ்ஸந்தோ’’திஆதி³மாஹ. விஹாரஸ்ஸ ச க⁴ரஸ்ஸ சாதி அத்தோ². ரதனந்தி த³ஸவித⁴ம் ரதனம். ரத்னஸம்மதந்தி ஸாடகவேட²னாதி³கம். க³ஹேத்வானாதி கப்பியகாரகே அஸதி அத்தனாபி க³ஹேத்வான நிக்கி²பேய்யாதி அத்தோ². மக்³கே³ரஞ்ஞேபீதி மக்³கே³பி அரஞ்ஞேபி. தாதி³ஸேதி ‘‘பி⁴க்கூ²ஹி க³ஹிதம் ப⁴விஸ்ஸதீ’’தி ஆஸங்கிதப்³ப³ட்டா²னே. பதிரூபம் கரீயதீதி மக்³கே³ வா அரஞ்ஞே வா தாதி³ஸம் ப⁴ண்ட³ம் பஸ்ஸித்வா மக்³கா³ ஓக்கம்ம நிஸீதி³தப்³ப³ம், ஸாமிகேஸு ஆக³தேஸு தம் டா²னம் ஆசிக்கி²தப்³ப³ம். ஸசே ஸாமிகே ந பஸ்ஸதி, ரதனஸம்மதம் பம்ஸுகூலம் க³ஹேதப்³ப³ம். ரதனஞ்சே ஹோதி, துண்ஹீபூ⁴தேன க³ந்தப்³ப³ந்தி அத்தோ². அயம் மக்³கா³ரஞ்ஞகேஸு படிபத்தி. விஹாராவஸதா²னம் பன அந்தோ தாதி³ஸம் தி³ஸ்வா ப⁴ண்ட³கம் முஞ்சித்வா ‘‘ஏத்த² ஏத்தகா கஹாபணா’’திஆதி³னா நயேன ரூபேன வா லஞ்ச²னாய வா பிலோதிகாய வா ஸஞ்ஞாணம் கத்வா நிக்கி²பிதப்³ப³ம், ததோ பக்கமந்தேன பதிரூபானம் பி⁴க்கூ²னம் ஆசிக்கி²தப்³ப³ம். உக்³க³ஹவினிச்ச²யோ.

உக்³க³ஹனித்³தே³ஸவண்ணனா நிட்டி²தா.