38. குலதூ³ஸனனித்³தே³ஸவண்ணனா

297. ‘‘குலானி தூ³ஸேதி புப்பே²ன வா ப²லேன வா சுண்ணேன வா மத்திகாய வா த³ந்தகட்டே²ன வா வேளுயா வா வேஜ்ஜிகாய வா ஜங்க⁴பேஸனியேன வா’’தி (பாரா. 437) வுத்தத்தா தானி அட்ட² வத்தூ²னி த³ஸ்ஸேதும் ‘‘புப்ப²’’ந்திஆதி³மாஹ. இமாய மிச்சா²படிபத்தியா குலானம் அஞ்ஞேஸு ஸீலவந்தேஸு பஸாத³ம் தூ³ஸேதி வினாஸேதீதி குலதூ³ஸனம் து³க்கடம் ஆபஜ்ஜதி. தம் பன அத்தனோ ஸந்தகே ச பரஸந்தகே ச வேதி³தப்³ப³ம்.

298. இதா³னி இமேஸு வத்தூ²ஸு ந கேவலம் குலதூ³ஸனது³க்கடமேவ ஆபஜ்ஜதி, து²ல்லச்சயாதீ³னிபி ஆபஜ்ஜதீதி த³ஸ்ஸேதும் ‘‘து²ல்லச்சய’’ந்திஆதி³மாஹ. ஸங்கி⁴கம் க³ருப⁴ண்ட³ம் இஸ்ஸரேன தே³ந்தஸ்ஸ து²ல்லச்சயந்தி ஸம்ப³ந்தோ⁴. ஸேனாஸனத்தா²ய நியமிதம் பன புப்பா²தி³ க³ருப⁴ண்ட³ம் ஹோதி. ஸங்க⁴ஸ்ஸ வா அஞ்ஞஸ்ஸ வா ஸந்தகம் தே²ய்யசித்தேன தே³ந்தஸ்ஸ து³க்கடாதீ³னி ஹோந்தீதி பாட²ஸேஸோ, தஸ்ஸ ப⁴ண்ட³ஸ்ஸ அக்³க⁴வஸேன து³க்கடது²ல்லச்சயபாராஜிகானி ஹோந்தீதி அத்தோ².

299-300. ஸப்³ப³தா²தி (பாரா. அட்ட². 2.431) கப்பியவோஹாரஅகப்பியவோஹாரபரியாயஓபா⁴ஸனிமித்தகம்மாதீ³ஹி ந வட்டதீதி அத்தோ². வதிஆதீ³னி கத்வா ஜக்³கி³துஞ்ச. அத்தனோ பரிபோ⁴க³த்த²ந்தி ப²லபரிபோ⁴க³த்த²ம். ரோபனாதீ³னீதி ரோபாபனாதீ³னி. ஆதி³-ஸத்³தே³ன ஸிஞ்சாபனஓசினாபனாதீ³னி க³ஹிதானி. குத்³தா³லக²ணித்திவாஸிப²ரஸுஉத³கபா⁴ஜனாதீ³னி ஆஹரித்வா ஸமீபே ட²பனவஸேன நிமித்ததோ ச குத்³தா³லக²ணித்தாதீ³னி ச மாலாவச்சே² ச க³ஹேத்வா டி²தே ‘‘ஸாமணேராத³யோ தி³ஸ்வா ‘தே²ரோ காராபேதுகாமோ’தி ஆக³ந்த்வா கரோந்தீ’’தி ஸஞ்ஞாய ஓபா⁴ஸதோ ச ‘‘இமம் ருக்க²ம் ஜான, இமம் ஆவாடம் ஜானா’’திஆதி³கப்பியவோஹாரதோ ச ‘‘பண்டி³தேன மாலாவச்சா²த³யோ ரோபாபேதப்³பா³, ந சிரஸ்ஸேவ உபகாராய ஸம்வத்தந்தீ’’திஆதி³பரியாயதோ ச ரோபனாதீ³னி லப்³ப⁴ரேதி ஸம்ப³ந்தோ⁴.

301-2. இதா³னி அட்ட²ஸு வத்தூ²ஸு அவஸேஸானி த்³வே வத்தூ²னி த³ஸ்ஸேதும் ‘‘வுத்தாவ வேஜ்ஜிகா ஜங்க⁴பேஸனே’’தி வுத்தம். தத்த² வேஜ்ஜிகா புப்³பே³ வுத்தாவ, இதா³னி ஜங்க⁴பேஸனாதி³வினிச்ச²யம் வக்கா²மீதி அத்தோ². பிதரோதி (பாரா. அட்ட². 2.436-437) மாதாபிதரோ. ப⁴ண்டு³ந்தி பப்³ப³ஜ்ஜாபேக்க²ம். பி⁴க்கு²ஸ்ஸ ஸகம் வேய்யாவச்சகரஞ்சாதி ஏதே ட²பேத்வா கஸிவாணிஜ்ஜாதி³கி³ஹிகம்மேஸு தூ³தஸாஸனம் ஹரணே து³க்கடந்தி அத்தோ². பட²மம் ஸாஸனம் அக்³க³ஹேத்வா புன தம் தி³ஸ்வா வா தஸ்ஸ ஸந்திகம் க³ந்த்வா வா வத³தோபி து³க்கடமேவாதி அத்தோ². ஸாஸனம் அக்³க³ஹேத்வா ஆக³தானம் பன ‘‘ப⁴ந்தே, தஸ்மிம் கா³மே இத்த²ன்னாமஸ்ஸ கா பவத்தீ’’தி புச்சி²யமானே கதே²தும் வட்டதி. புச்சி²தபஞ்ஹே தோ³ஸோ நத்தி².

303. ஏவம் குலதூ³ஸனேன உப்பன்னபச்சயா. ‘‘பஞ்சன்னம்பீ’’தி வுத்தத்தா அனுபஸம்பன்னேன கதம்பி ஏதி³ஸம் ந வட்டதி ஏவ மிச்சா²ஜீவத்தா. ஆதுமாவத்து² (மஹாவ. 303) சேத்த² நித³ஸ்ஸனம். கிம் வியாதி சே, தம் த³ஸ்ஸேதும் ‘‘அபூ⁴தாரோசனாரூப-ஸப்³யோஹாருக்³க³ஹாதி³ஸா’’தி வுத்தம். தத்த² உக்³க³ஹாதி³ஸாதி ஏதேஹி உப்பன்னபச்சயஸதி³ஸாதி அத்தோ².

304. இதா³னி புப்பா²தீ³னி கேஸம் தா³தும் வட்டந்தி, கேஸம் தா³தும் ந வட்டந்தீதி தம் த³ஸ்ஸேதும் ‘‘ஹராபேத்வா’’திஆதி³மாஹ. பிதூனம் (பாரா. அட்ட². 2.436-437) தா³தும் லப்³ப⁴தீதி ஸம்ப³ந்தோ⁴. ஸேஸஞாதீனம் பத்தானம் ஏவ. லிங்க³ந்தி ஸிவலிங்க³ம்.

305. ததா² ப²லந்தி ப²லம்பி மாதாபிதூனம் ஹரித்வாபி ஹராபேத்வாபி தா³தும் லப்³ப⁴தீதி அத்தோ². ந கேவலம் மாதாபிதூனம்யேவ, அஞ்ஞேஸம்பி தா³தும் லப்³ப⁴தீதி த³ஸ்ஸேதும் ‘‘கி³லானான’’ந்திஆதி³மாஹ. ஸபரஸந்தகந்தி ஏத்த² பரோதி அத்தனோ விஸ்ஸாஸஞ்ஞாதகோ ஏவ அதி⁴ப்பேதோ.

306. பா⁴ஜேந்தேதி ஸங்க⁴ஸ்ஸ ப²லபுப்ப²ம்ஹி பா⁴ஜியமானே ஸம்மதேன தே³ய்யந்தி ஸம்ப³ந்தோ⁴. இதரேன அஸம்மதேன அபலோகேத்வா தா³தப்³ப³ந்தி அத்தோ².

307. பரிச்சி²ஜ்ஜாதி ஆக³தானம் தா³தப்³ப³ந்தி ப²லவஸேன வா ருக்க²வஸேன வா பரிச்சி²ந்தி³த்வாதி அத்தோ². இதரஸ்ஸாதி இஸ்ஸராதி³கஸ்ஸ. கதிகம் வத்வாதி ‘‘இமஸ்மிம் ருக்கே² ஏத்தகானி ப²லானி லப்³ப⁴ந்தீ’’தி ஏவம் வத்வா.

308. ஸேஸேதி மத்திகாத³ந்தகட்ட²வேளும்ஹி (பாரா. அட்ட². 2.436-437). யதா²வுத்தனயோ ஏவாதி ஏத்த² அத்தனோ ச பரஸ்ஸ ச ஸந்தகம் குலஸங்க³ஹத்தா²ய த³த³தோ து³க்கடந்திஆதி³னா ஹேட்டா² வுத்தனயேனேவ வினிச்ச²யோ வேதி³தப்³போ³தி அத்தோ². பண்ணம்பீதி கிஞ்சாபி பாளியம் பண்ணதா³னம் ந வுத்தம், ததா²பி குலதூ³ஸனே பவேஸயேதி அத்தோ². குலதூ³ஸனவினிச்ச²யோ.

குலதூ³ஸனனித்³தே³ஸவண்ணனா நிட்டி²தா.