30. வத்தனித்³தே³ஸவண்ணனா

213. இதா³னி ஆக³ந்துகவத்தாதீ³னி த³ஸ்ஸேதும் ‘‘வத்த’’ந்தி மாதிகாபத³ம் உத்³த⁴டம். பரிக்கி²த்தஸ்ஸ (சூளவ. 356 ஆத³யோ; சூளவ. அட்ட². 357 ஆத³யோ) விஹாரஸ்ஸ பரிக்கே²பம், அபரிக்கி²த்தஸ்ஸ த்³வீஹி லேட்³டு³பாதேஹி பரிச்சி²ன்னட்டா²னம் பத்வா உபாஹனம் ஓமுஞ்சித்வா நீசம் கத்வா பப்போ²டேத்வா உபாஹனம் த³ண்ட³கேன க³ஹேத்வா ச²த்தம் அபனாமேத்வா ஸீஸம் விவரித்வா ஸீஸே சீவரம் க²ந்தே⁴ கரித்வா ஸாது⁴கம் அதரமானேன ஆராமோ பவிஸிதப்³போ³தி அத்தோ².

214. புச்சே²ய்ய ஸயனாஸனந்தி ‘‘கதமம் மே ஸேனாஸனம் பாபுணாதி, கிம் அஜ்ஜா²வுத்த²ம் வா அனஜ்ஜா²வுத்த²ம் வா’’தி ஏவம் புச்சி²தப்³ப³ந்தி அத்தோ².

215-6. மஞ்சபீடா²தி³தா³ருப⁴ண்ட³ஞ்ச (சூளவ. 360; சூளவ. அட்ட². 360) ரஜனபா⁴ஜனாதி³மத்திகாப⁴ண்ட³ஞ்ச. ஆபுச்சா²தி பி⁴க்கு²ஸ்ஸ வா ஸாமணேரஸ்ஸ வா ஆராமிகஸ்ஸ வா ‘‘ஆவுஸோ இமம் ஜக்³கா³ஹீ’’தி ஆரோசேத்வாதி அத்தோ². அஞ்ஞதா²தி ஏவம் அகத்வாதி அத்தோ².

217-8. வுட்³டா⁴க³ந்துகஸ்ஸாதி ஏத்த² (சூளவ. 358 ஆத³யோ; சூளவ. அட்ட². 359 ஆத³யோ) தூ³ரதோவ தி³ஸ்வா யதி³ ‘‘வுட்³டோ⁴’’தி ஜானாதி, தஸ்மிம் அனாக³தே ஏவ ஆஸனபஞ்ஞாபனாதி³வத்தம் காதப்³ப³ந்தி அத்தோ². பாதோ³த³ப்பபு⁴திந்தி பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ந்தி அத்தோ². பானீயேன ஆபுச்ச²ந்தேன ஸசே ஸகிம் ஆனீதம் பானீயம் ஸப்³ப³ம் பிவதி, புனபி ஆபுச்சி²தப்³போ³ ஏவ. பஞ்ஞபேதி ‘‘ஏதம் தும்ஹாகம் ஸேனாஸனம் பாபுணாதீ’’தி ஏவம் ஆசிக்கி²தப்³ப³ந்தி அத்தோ².

219-20. ‘‘பி⁴க்கா²சாரகா³மோ இதோ தூ³ரே’’தி வா ‘‘ஸந்திகே’’தி வா ‘‘காலஸ்ஸேவ பிண்டா³ய சரிதப்³ப³’’ந்தி வா ‘‘உபட்டா²கே சரிதப்³ப³’’ந்தி வா கோ³சரோ ஆசிக்கி²தப்³போ³. அகோ³சரோதி மிச்சா²தி³ட்டி²கானம் வா கா³மோ, பரிச்சி²ன்னபி⁴க்க²கோ வா கா³மோ, யத்த² ஏகஸ்ஸ வா த்³வின்னம் வா பி⁴க்கா² தீ³யதி, ஸோ ஆசிக்கி²தப்³போ³தி அத்தோ². கதிகந்தி ஸங்க⁴ஸ்ஸ கதிகட்டா²னம். ‘‘இமம் காலம் பவிஸிதப்³ப³ம், இமம் காலம் நிக்க²மிதப்³ப³’’ந்தி ஏவம் பவேஸனனிக்க²மனகாலம் ஆசிக்கி²தப்³ப³ம். கேஸுசி டா²னேஸு அமனுஸ்ஸா வா வாளா வா ஹோந்தி, தஸ்மா ஏவம் ஆசிக்கி²தப்³ப³மேவ. நிஸின்னோவாதி இத³ம் ஆபத்திஅபா⁴வமத்ததீ³பகம், உட்ட²ஹித்வாபி ஸப்³ப³ம் காதும் வட்டதேவ. வத்தவினிச்ச²யோ.

வத்தனித்³தே³ஸவண்ணனா நிட்டி²தா.