31. விகப்பனானித்³தே³ஸவண்ணனா

221. ஸம்முகா²யாதி (பாசி. 374; பாரா. அட்ட². 2.469; கங்கா². அட்ட². விகப்பனஸிக்கா²பத³வண்ணனா) ஸம்முகே² டி²தஸ்ஸாதி அத்தோ². ப்³யத்தஸ்ஸாதி விகப்பனவிதா⁴னம் பச்சுத்³த⁴ரணாதி³விதா⁴னஞ்ச ஜானந்தஸ்ஸ. அப்³யத்தோ பன ‘‘இமினா மய்ஹம் தி³ன்ன’’ந்தி க³ஹேத்வாபி க³ச்சே²ய்யாதி அத்தோ². ஏகஸ்ஸாதி ஏகஸ்ஸ பி⁴க்கு²ஸ்ஸ.

222. நிதே⁴தும்வாதி நிதே⁴தும் ஏவ, நிஸ்ஸக்³கி³யம் ந ஹோதீதி அத்தோ². பரிபு⁴ஞ்ஜிதும் வா விஸ்ஸஜ்ஜேதும் வா அதி⁴ட்டா²தும் வா ந வட்டதீதி அத்தோ².

224-5. அபரா ஸம்முகா² வாதி ஸம்முகா² விகப்பனா ஏவாதி அத்தோ². இமா த்³வே விகப்பனா அத்தனா ஏவ விகப்பேத்வா பரேன பச்சுத்³த⁴ராபிதத்தா ஸம்முகா² விகப்பனா ஏவாதி வுத்தா.

227. மித்தோதி த³ள்ஹமித்தோ. ஸந்தி³ட்டோ²தி தி³ட்ட²மத்தோ நாதித³ள்ஹமித்தோ. ‘‘இதரேன ச புப்³பே³ வுத்தனயேன ‘திஸ்ஸோ பி⁴க்கூ²’தி வா ‘திஸ்ஸா பி⁴க்கு²னீ’தி வா வத்தப்³ப³ம். புன தேன ‘அஹம் திஸ்ஸஸ்ஸ பி⁴க்கு²னோ, திஸ்ஸாய பி⁴க்கு²னியா வா த³ம்மீ’தி விகப்பேத்வா தேனேவ ‘திஸ்ஸஸ்ஸ பி⁴க்கு²னோ, திஸ்ஸாய பி⁴க்கு²னியா ஸந்தகம் பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’தி பச்சுத்³த⁴ரிதப்³ப³’’ந்தி ஏவம் பாடோ² க³ஹேதப்³போ³.

228. தூ³ரஸந்திகத்தேகத்த-ப³ஹுபா⁴வம் விஜானியாதி ஏத்த² தூ³ரத்தஞ்ச ஸந்திகத்தஞ்ச ஏகத்தஞ்ச ப³ஹுபா⁴வஞ்ச விஜானித்வாதி அத்தோ².

229. ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்தி (பாரா. 462) வுத்தத்தா ‘‘த³ஸாஹம் வா’’தி வுத்தம். ‘‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா’’தி (பாரா. 649) வுத்தத்தா ‘‘மாஸமேகம் வா பஞ்ச வா’’தி வுத்தம், மாஸம் வா ஏகம் பஞ்ச வா மாஸேதி அத்தோ². ‘‘பி⁴க்கு²னோ பனேவ அகாலசீவரம் உப்பஜ்ஜேய்ய, ஆகங்க²மானேன பி⁴க்கு²னா படிக்³க³ஹேதப்³ப³ம். படிக்³க³ஹேத்வா கி²ப்பமேவ காரேதப்³ப³ம். நோ சஸ்ஸ பாரிபூரி, மாஸபரமம் தேன பி⁴க்கு²னா தம் சீவரம் நிக்கி²பிதப்³ப³ம் ஊனஸ்ஸ பாரிபூரியா ஸதியா பச்சாஸாயா’’தி (பாரா. 499) வுத்தத்தா ‘‘பச்சாஸா ஸதி மாஸக’’ந்தி வுத்தம். நுப்பாத³யதீதி அனதி⁴ட்டி²தம் அவிகப்பிதம் நிஸ்ஸக்³கி³ம் ந ஜனயதீதி அத்தோ². விகப்பனாவினிச்ச²யோ.

விகப்பனானித்³தே³ஸவண்ணனா நிட்டி²தா.