29. மிச்சா²ஜீவவிவஜ்ஜனானித்³தே³ஸவண்ணனா

209. சுண்ணந்தி ஸிரீஸசுண்ணாதி³கந்தி அத்தோ². மத்திகாதி பகதிமத்திகா வா பஞ்சவண்ணா வா ஸுத்³தா⁴ குங்குட்ட²ஆதி³கா வா. குலஸங்க³ஹாதி ஏதேஹி ஸங்க³ஹிதானம் ஸந்திகே லாபா⁴ஸாய குலஸங்க³ஹத்த²ந்தி அத்தோ². ஏத்த² பன இமேஹி ஸங்க³ஹிதானம் ஸந்திகே ‘‘கிஞ்சி லபி⁴ஸ்ஸாமீ’’தி ஸங்கி⁴கம் வா புக்³க³லிகம் வா தா³தும் ந வட்டதி ஏவ. இமினா பன நயேன லத்³த⁴ம் பஞ்சன்னம்பி ஸஹத⁴ம்மிகானம் ந வட்டதி, மிச்சா²ஜீவஞ்ச ஹோதி.

210-211. லாபா⁴ஸாய தா³யகானம் தா³ரகே உக்கி²பித்வா பரிப⁴டபா⁴வோ பாரிப⁴டகதா, தாய பாரிப⁴டகதாய ந ஜீவயேதி ஸம்ப³ந்தோ⁴. ஸேஸேஸுபி ஏஸேவ நயோ. கே²த்தாதீ³ஸு பேஸிதஸ்ஸ க³மனம் பஹேணகம்மம். ஸாஸனப்படிஸாஸனஹரணம் தூ³தகம்மம். பேஸிதஸ்ஸ கே³ஹதோ கே³ஹக³மனம் ஜங்க⁴பேஸனியம். லாபா⁴ஸாய லஞ்ஜதா³னமனுப்பதா³னம். அஞ்ஞேன வாபீதி அங்க³விஜ்ஜாதி³னா.

212. விஞ்ஞத்தீதி (பாரா. 515 ஆத³யோ; பாரா. அட்ட². 2.515 ஆத³யோ) அஞ்ஞாதகவிஞ்ஞத்தி. அனேஸனாதி புப்³பே³ வுத்தேன புப்ப²தா³னாதி³னா பச்சயேஸனா. குஹனாதீ³ஹீதி (விப⁴. 861; விப⁴. அட்ட². 861; மஹானி. 87) குஹனா லபனா நேமித்தகதா நிப்பேஸிகதா லாபே⁴ன லாப⁴ம் நிஜிகீ³ஸனதாதி இமேஹி பஞ்சஹி வத்தூ²ஹீதி அத்தோ². மிச்சா²ஜீவவினிச்ச²யோ.

மிச்சா²ஜீவவிவஜ்ஜனானித்³தே³ஸவண்ணனா நிட்டி²தா.