28. கம்மனித்³தே³ஸவண்ணனா

199. அத⁴ம்மகம்மந்தி ஏத்த² கத²ம் அத⁴ம்மகம்மம் ஹோதீதி சே? வுத்தஞ்ஹேதம் ப⁴க³வதா ‘‘கதமஞ்ச, பி⁴க்க²வே, அத⁴ம்மகம்மம்? ஞத்திது³தியே சே, பி⁴க்க²வே, கம்மே ஏகாய ஞத்தியா கம்மம் கரோதி, ந ச கம்மவாசம் அனுஸ்ஸாவேதி, அத⁴ம்மகம்மம். த்³வீஹி ஞத்தீஹி கம்மம் கரோதி, ந ச கம்மவாசம் அனுஸ்ஸாவேதி, அத⁴ம்மகம்மம். ஏகாய கம்மவாசாய கம்மம் கரோதி, ந ச ஞத்திம் ட²பேதி, அத⁴ம்மகம்மம். த்³வீஹி கம்மவாசாஹி கம்மம் கரோதி, ந ச ஞத்திம் ட²பேதி, அத⁴ம்மகம்ம’’ந்தி (மஹாவ. 387). இமினா நயேன ஸேஸகம்மேஸுபி வுத்தப்பகாரேன அகத்வா அஞ்ஞதா² கரணம் அத⁴ம்மகம்மந்தி வேதி³தப்³ப³ம்.

வக்³கே³னாதி வக்³கே³ன ஸங்கே⁴ன. கத²ஞ்ச வக்³க³ம் ஹோதீதி சே? யாவதிகா ச பி⁴க்கூ² கம்மப்பத்தா, தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வக்³க³கம்மந்தி இமேஸு யேன கேனசி ஏகேனபி அங்கே³ன வக்³க³ம் ஹோதி.

ஸமக்³கே³னாதி ஸமக்³கே³ன ஸங்கே⁴ன. கத²ம் ஸமக்³க³ம் ஹோதீதி சே? யாவதிகா ச பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா நப்படிக்கோஸந்தி, ஸமக்³க³கம்மந்தி ஏவம்.

சதுத்த²ந்தி ஸமக்³கே³ன த⁴ம்மிகம். ஏத்தாவதா ‘‘சத்தாரிமானி, பி⁴க்க²வே, கம்மானி, அத⁴ம்மேன வக்³க³கம்மம், அத⁴ம்மேன ஸமக்³க³கம்மம், த⁴ம்மேன வக்³க³கம்மம், த⁴ம்மேன ஸமக்³க³கம்ம’’ந்தி (மஹாவ. 384) ஏவம் வுத்தானி சத்தாரி கம்மானி பரிக்³க³ஹிதானி ஹோந்தீதி வேதி³தப்³பா³னி.

200-202. த³ஸவக்³கி³கோ (மஹாவ. 388; கங்கா². அட்ட². நிதா³னவண்ணனா) வீஸதிவக்³கி³கோ ச த³ஸவீஸதிவக்³கி³கோ. அப்³பா⁴னோபஸம்பதா³ப்பவாரணா ட²பேத்வா ஸப்³ப³கம்மேஸு கம்மப்பத்தோதி ஸம்ப³ந்தோ⁴. ஏவம் ஸேஸேஸுபி. இதரோதி வீஸதிவக்³கோ³ ச அதிரேகவீஸதிவக்³கோ³ ச.

203. இதா³னி கம்மப்பத்தே ச ச²ந்தா³ரஹே ச த³ஸ்ஸேதும் ‘‘சதுவக்³கே³னா’’திஆதி³ வுத்தம். தத்த² (பரி. 488, 497; பரி. 487-488) பகதத்தா நாம யே பாராஜிகஉக்கி²த்தலத்³தி⁴னானாஸம்வாஸகா ந ஹோந்தி. பரேதி ஏகஸீமட்டா² பகதத்தா பி⁴க்கூ². யதி³ பகதத்தா பி⁴க்கூ²பி அஞ்ஞதரம் கா³மஸீமம் வா நதீ³ஸமுத்³த³ஜாதஸ்ஸரக²ண்ட³ஸீமாஸு வா அஞ்ஞதரம் பவிஸித்வா டி²தா ஹோந்தி, நேவ கம்மப்பத்தா, ந ச²ந்தா³ரஹா. ந ஹி தேஸம் ச²ந்தோ³ வா பாரிஸுத்³தி⁴ வா ஆக³ச்ச²தி அஞ்ஞஸீமாயம் டி²தத்தா. ஸேஸேபீதி பஞ்சவக்³கா³தி³கரணீயேபீதி அத்தோ².

204. அஸம்வாஸக³ணபூரம் வா கத்வா கதம் கம்மம் குப்பஞ்ச ஹோதி, காரகானஞ்ச து³க்கடந்தி அத்தோ². ‘‘யஸ்ஸ ஸங்கோ⁴ கம்மம் கரோதி, தம்சதுத்தோ² கம்மம் கரேய்ய, அகம்மம் ந ச கரணீய’’ந்தி (மஹாவ. 389) வுத்தத்தா ‘‘கம்மாரஹக³ணபூரம் வா’’தி வுத்தம். இதா³னி பரிவாஸாதி³கம்மானம்யேவ பரிஸதோ விபத்திம் த³ஸ்ஸேதும் ‘‘க³ருகட்ட²க³ணபூரம் வா’’தி வுத்தம். தம்பி அனிக்கி²த்தவத்தம் ஸந்தா⁴ய வுத்தம். நிக்கி²த்தவத்தோ பன ஸப்³ப³த்த² க³ணபூரகோ ஹோதி ஏவ.

205. வாரேய்யாதி படிக்கி²பேய்ய. ‘‘அனுஜானாமி, பி⁴க்க²வே, அத⁴ம்மகம்மே கயிரமானே படிக்கோஸிது’’ந்தி (மஹாவ. 154) ஹி வுத்தம். அந்தராயே ஸதீதி அத்தோ². ‘‘அத⁴ம்மகம்மம் இத³ம், ந மேதம் க²மதீ’’தி ஏவம் த்³வே தயோ அஞ்ஞமஞ்ஞம் தி³ட்டி²ம் ஆவி கரேய்யுந்தி அத்தோ². யதி³ ஏகோ ஹோதி, ‘‘ந மேதம் க²மதீ’’தி ஏவம் அதி⁴ட்டா²னம் கரேய்யாதி அத்தோ². ஏத்தாவதா ஏதே நிராபத்திகா ஹோந்தி, அந்தராயா ச முச்சந்தி, கம்மம் பன அத⁴ம்மத்தா குப்பமேவ. வாரேந்தேவ ததோதி⁴காதி ஏத்த² ‘‘அனுஜானாமி, பி⁴க்க²வே, சதூஹி பஞ்சஹி படிக்கோஸிதும், த்³வீஹி தீஹி தி³ட்டி²ம் ஆவி காதும், ஏகேன அதி⁴ட்டா²தும், ‘‘ந மேதம் க²மதீ’’தி (மஹாவ. 154) வுத்தத்தா சத்தாரோ வா பஞ்ச வா வாரேந்தி ஏவாதி அத்தோ².

206. இதா³னி யேஹி படிக்கி²த்தம் ஹோதி, தே த³ஸ்ஸேதும் ‘‘கம்மாரஹா’’திஆதி³ வுத்தம். தத்த² கி²த்தசித்த-க்³க³ஹணேன உம்மத்தகோபி க³ஹிதோவ. ஏதேஸந்தி யே வுத்தப்பகாரா, தேஸம் படிக்கே²போ ந ருஹதீதி அத்தோ².

207. இதா³னி யஸ்ஸ படிக்கே²போ ருஹதி, தம் த³ஸ்ஸேதும் ‘‘பகதத்தேகஸீமட்ட²-ஸமஸம்வாஸபி⁴க்கு²னோ’’தி வுத்தம். தஸ்ஸத்தோ² (மஹாவ. 394) – ஏவரூபஸ்ஸ பி⁴க்கு²னோ படிக்கோஸனா அந்தமஸோ ஆனந்தரஸ்ஸாபி ஆரோசேந்தஸ்ஸ ருஹதீதி. ‘‘பி⁴க்கு²ஸ்ஸ, பி⁴க்க²வே, பகதத்தஸ்ஸ ஸமானஸம்வாஸிகஸ்ஸ ஸமானஸீமாயம் டி²தஸ்ஸ அந்தமஸோ ஆனந்தரிகஸ்ஸபி பி⁴க்கு²னோ விஞ்ஞாபேந்தஸ்ஸ ஸங்க⁴மஜ்ஜே² படிக்கோஸனா ருஹதீ’’தி (மஹாவ. 394) வுத்தம்.

208. ஸம்முகா² யதி³ படிக்கோஸேய்யாதி அத்தோ². திரோக்கா²தி பரம்முகா². காயஸாமக்³கி³ம் வா ச²ந்த³ம் வா நோ த³தே³ய்ய, து³க்கடந்தி அத்தோ². கம்மவினிச்ச²யோ.

கம்மனித்³தே³ஸவண்ணனா நிட்டி²தா.