26. ஸமானாஸனிகனித்³தே³ஸவண்ணனா

195. திண்ணம் வஸ்ஸானம் அந்தரம் திவஸ்ஸந்தரம். ‘‘அனுஜானாமி, பி⁴க்க²வே, திவஸ்ஸந்தரேன ஸஹ நிஸீதி³து’’ந்தி (சூளவ. 320) ஹி வுத்தம். யோ த்³வீஹி வஸ்ஸேஹி (சூளவ. அட்ட². 320) வுட்³டோ⁴ வா நவோ வா, ஸோ திவஸ்ஸந்தரோ நாம.

196. முனீதி பு³த்³த⁴முனி. ஸப்³பே³ஹேவாதி அனுபஸம்பன்னேஹிபி.

197. அந்தந்தி பச்சி²மம். ‘‘அனுஜானாமி, பி⁴க்க²வே, யம் திண்ணம் பஹோதி, ஏத்தகம் பச்சி²மம் தீ³கா⁴ஸன’’ந்தி (சூளவ. 320) வுத்தத்தா யம் திண்ணம் பஹோதி, ஏதம் ஸம்ஹாரிமம் வா ஹோது அஸம்ஹாரிமம் வா, ததா²ரூபேஸு ப²லகக²ண்டே³ஸுபி நிஸீதி³தும் வட்டதி. த்³வின்னந்தி த்³வின்னம் ஸமானாஸனிகானம். ‘‘அனுஜானாமி, பி⁴க்க²வே, து³வக்³க³ஸ்ஸ மஞ்சம் து³வக்³க³ஸ்ஸ பீட²’’ந்தி (சுளவ. 320) வுத்தத்தா த்³வே ஸமானாஸனிகா ஸஹ நிஸீதி³தும் லப⁴ந்தி. அஞ்ஞேஹி அஸமானாஸனிகேஹி, அனுபஸம்பன்னாதீ³ஹி வா த்³வே ஹுத்வாபி நிஸீதி³தும் ந லப⁴ந்தி. ஸமானாஸனிகவினிச்ச²யோ.

ஸமானாஸனிகனித்³தே³ஸவண்ணனா நிட்டி²தா.