12. பாசித்தியனித்³தே³ஸவண்ணனா

121. இதா³னி பாசித்தியானி த³ஸ்ஸேதும் ‘‘பாசித்தீ’’தி மாதிகாபத³ம் உத்³த⁴ரித்வா ‘‘முஸாவாதோ³மஸாவாதே³, பேஸுஞ்ஞஹரணே’’திஆதி³ வுத்தம். தத்த² முஸாவாதே³ ச ஓமஸவாதே³ ச பேஸுஞ்ஞஹரணே ச பாசித்தி வுத்தாதி ஸம்ப³ந்தோ⁴. ஏவம் ஸேஸேஸுபி. ஏத்த² பன ‘‘அதி³ட்ட²ம், அஸுதம், அமுதம், அவிஞ்ஞாதம், தி³ட்ட²ம், ஸுதம், முதம், விஞ்ஞாத’’ந்தி (பாசி. 3; பாசி. அட்ட². 3) புப்³பே³பி ‘‘முஸா ப⁴ணிஸ்ஸாமீ’’தி சேதேத்வா வசனக்க²ணேவ ‘‘முஸா ப⁴ணாமீ’’தி ஜானித்வா ஜானந்தஸ்ஸேவ முஸாப⁴ணனே பாசித்தி நாம ஆபத்தி ஹோதீதி அத்தோ². யஸ்ஸ ப⁴ணதி, ஸோ தம் ந ஸுணாதி, ஆபத்தி ந ஹோதி (கங்கா². அட்ட². முஸாவாத³ஸிக்கா²பத³வண்ணனா).

‘‘ஓமஸவாதோ³ நாம த³ஸஹி ஆகாரேஹி ஓமஸதி ஜாதியாபி நாமேனபி கோ³த்தேனபி கம்மேனபி ஸிப்பேனபி ஆபா³தே⁴னபி லிங்கே³னபி கிலேஸேனபி ஆபத்தியாபி அக்கோஸேனபீ’’தி (பாசி. 15) ஏவம் வுத்தேஹி த³ஸஹி ஆகாரேஹி உபஸம்பன்னம் யோ கு²ம்ஸேதி வம்பே⁴தி, அயம் ஓமஸதி நாம, தஸ்ஸ பாசித்தீதி அத்தோ². பரம்முகா² ப⁴ணந்தஸ்ஸ து³க்கடம், ததா² பாளியம் அனாக³தேஹி ‘‘சோரோ’’தி வா ‘‘க³ண்டி²பே⁴த³கோ’’தி வா ஆதீ³ஹி ப⁴ணந்தஸ்ஸ. ‘‘ஸந்தி இதே⁴கச்சே க²த்தியா ப்³ராஹ்மணா சண்டா³லா’’திஆதி³னா பரியாயேன ப⁴ணந்தஸ்ஸ ச அனுபஸம்பன்னம் ப⁴ணந்தஸ்ஸ ச ஸப்³ப³த்த²பி து³க்கடமேவ.

பியகம்யதாய வா பே⁴தா³தி⁴ப்பாயேன வா உபஸம்பன்னம் ஜாதிஆதீ³ஹி ஓமஸந்தஸ்ஸ உபஸம்பன்னஸ்ஸ வசனம் ஸுத்வா தஸ்ஸ உபஸம்ஹரணம் பேஸுஞ்ஞஹரணம் நாம. ஏத்தா²பி பரியாயவசனேன ச அனுபஸம்பன்னஸ்ஸ உபஸம்ஹரணேன ச து³க்கடமேவ.

பத³ஸோத⁴ம்மோதி ஏத்த² ‘‘த⁴ம்மோ நாம பு³த்³த⁴பா⁴ஸிதோ ஸாவகபா⁴ஸிதோ இஸிபா⁴ஸிதோ தே³வதாபா⁴ஸிதோ அத்தூ²பஸம்ஹிதோ த⁴ம்மூபஸம்ஹிதோ’’தி (பாசி. 46) ஏவம் வுத்தம் ஸங்கீ³தித்தயமாருள்ஹம் திபிடகத⁴ம்மம் பத³அனுபத³அன்வக்க²ரஅனுப்³யஞ்ஜனவஸேன பி⁴க்கு²ஞ்ச பி⁴க்கு²னிஞ்ச ட²பேத்வா அனுபஸம்பன்னம் ஏகதோ வாசேந்தஸ்ஸ பாசித்தி ஹோதீதி அத்தோ².

ஸாகா³ரேதி யம் பன ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாராதி³னா பரிக்கி²த்தத்தா ஸப்³ப³பரிச்சி²ன்னஞ்ச யேன கேனசி விதானாதி³னா அந்தமஸோ வத்தே²னபி ச²ன்னத்தா ஸப்³ப³ச்ச²ன்னஞ்ச ஸேனாஸனம், ததா²ரூபே ஸேனாஸனே ஏகூபசாரட்டா²னே அனுபஸம்பன்னேன ஸஹ வஸந்தஸ்ஸ சதுத்த²தி³வஸதோ பட்டா²ய நிபஜ்ஜனக³ணனாய ச அனுபஸம்பன்னக³ணனாய ச தே³வஸிகம் பாசித்தி ஹோதீதி அத்தோ².

உஜ்ஜா²பனககி²ய்யனேதி ஏத்த² யோ உபஸம்பன்னம் ஸங்கே⁴ன ஸம்மதம் ஸேனாஸனபஞ்ஞாபகம் வா ப⁴த்துத்³தே³ஸகம் வா யாகு³பா⁴ஜகம் வா ப²லபா⁴ஜகம் வா க²ஜ்ஜபா⁴ஜகம் வா அப்பமத்தகவிஸ்ஸஜ்ஜகம் வா மங்குகத்துகாமோ ச²ந்தே³ன ‘‘இத்த²ன்னாமோ ஸேனாஸனம் பஞ்ஞாபேதி, ப⁴த்தானி ச உத்³தி³ஸதீ’’தி வா வத³ந்தோ அஞ்ஞம் உபஸம்பன்னம் உஜ்ஜா²பேதி தேன அவஜானாபேதி, யோ பன ததே²வ வத³ந்தோ உபஸம்பன்னஸ்ஸ ஸந்திகே தஸ்ஸ அயஸம் பகாஸேந்தோ கீ²யதி, தஸ்மிம் உஜ்ஜா²பனகே ச கீ²யனகே ச பாசித்தித்³வயந்தி வேதி³தப்³ப³ம்.

122. தலஸத்திஅனாத³ர-குக்குச்சுப்பாத³னேஸு சாதி ஏத்த² யோ பி⁴க்கு² உபஸம்பன்னஸ்ஸ பஹரணாகாரம் த³ஸ்ஸேந்தோ காயம் வா காயப்படிப³த்³த⁴ம் வா உச்சாரேதி, தஸ்ஸ பாசித்தியம். ஸசே விரத்³தோ⁴ பஹாரம் தே³தி, அப்பஹரிதுகாமதாய து³க்கடம், ததா² அனுபஸம்பன்னேஸுபி து³க்கடமேவ.

உபஸம்பன்னேன பஞ்ஞத்தேன வுச்சமானோ தம் அஸிக்கி²துகாமதாய வா தஸ்ஸ வசனம் அஸோதுகாமதாய வா யோ அனாத³ரியம் கரோதி, தஸ்ஸ அனாத³ரகரணே பாசித்தியந்தி அத்தோ². அபஞ்ஞத்தேன வுச்சமானஸ்ஸ ச அனுபஸம்பன்னேன பஞ்ஞத்தேன வா அபஞ்ஞத்தேன வா வுச்சமானஸ்ஸ து³க்கடம்.

உபஸம்பன்னஸ்ஸ ‘‘ஊனவீஸதிவஸ்ஸோ மஞ்ஞே த்வம் உபஸம்பன்னோ, விகாலே மஞ்ஞே தயா பு⁴த்த’’ந்திஆதி³னா நயேன ஸஞ்சிச்ச குக்குச்சம் உப்பாதே³ந்தஸ்ஸ பாசித்தியம். அனுபஸம்பன்னஸ்ஸ உப்பாத³னே து³க்கடம்.

கா³மப்பவேஸனாபுச்சா²தி ஏத்த² பன மஜ்ஜ²ன்ஹிகாதிக்கமனதோ பட்டா²ய யாவ அருணுக்³க³மனா விகாலோ நாம, ஏத்த²ந்தரே ஸசே ஸம்ப³ஹுலா கேனசி கம்மேன கா³மம் பவிஸந்தி, ‘‘விகாலே கா³மப்பவேஸனம் ஆபுச்சா²மா’’தி ஸப்³பே³ஹிபி அஞ்ஞமஞ்ஞம் ஆபுச்சி²தப்³ப³ம். ஸசே அனாபுச்சா² பரிக்கி²த்தஸ்ஸ பரிக்கே²பம், அபரிக்கி²த்தஸ்ஸ உபசாரம் அதிக்கமந்தி, பட²மபாதே³ து³க்கடம், து³தியபாது³த்³தா⁴ரே பாசித்தியம். ஆபதா³ஸு அனாபத்தி.

போ⁴ஜனே ச பரம்பராதி பரம்பரபோ⁴ஜனே ச பாசித்தியந்தி அத்தோ². ஏத்த² பன பஞ்சஸு போ⁴ஜனேஸு அஞ்ஞதரம் நாமம் க³ஹேத்வா ‘‘ஓத³னேன வா ஸத்துனா வா கும்மாஸேன வா மம்ஸேன வா மச்சே²ன வா நிமந்தேமீ’’திஆதி³னா நயேன, யேன கேனசி வேவசனேன வா அகப்பியனிமந்தனாய நிமந்திதஸ்ஸ யேன யேன பட²மம் நிமந்திதோ, தஸ்ஸ தஸ்ஸ போ⁴ஜனம் ட²பேத்வா உப்படிபாடியா, அவிகப்பேத்வா வா பட²மனிமந்தனம் பரஸ்ஸ பரஸ்ஸ குலஸ்ஸ பஞ்சன்னம் போ⁴ஜனானம் அஞ்ஞதரம் பரிபு⁴ஞ்ஜந்தஸ்ஸ பரம்பரபோ⁴ஜனே பாசித்தி ஹோதி. கி³லானசீவரதா³னசீவரகாலஸமயேஸு அனாபத்தி, ததா² பஞ்ச போ⁴ஜனானி ட²பேத்வா ஸப்³ப³த்த².

123. அனுத்³த⁴ரித்வா க³மனே ஸேய்யந்தி ஏத்த² த³ஸவிதா⁴ ஸேய்யா பி⁴ஸி சிமிலிகா உத்தரத்த²ரணம் பூ⁴மத்த²ரணம் தட்டிகா சம்மக²ண்டோ³ நிஸீத³னம் பச்சத்த²ரணம் திணஸந்தா²ரோ பண்ணஸந்தா²ரோதி. ஏதேஸு யம் கிஞ்சி ஸங்கி⁴கே விஹாரே கு³த்தஸேனாஸனே அத்தனோ வஸ்ஸக்³கே³ன க³ஹிதம் அத்தனா வா ஸந்த²ரித்வா, அனுபஸம்பன்னேன வா ஸந்த²ராபேத்வா தம் தி³வஸம் க³மிகவஸேன பக்கமந்தோ நேவ ஸயம் உத்³த⁴ரேய்ய ந அஞ்ஞம் உத்³த⁴ராபேய்ய, யதா² உபசிகாதீ³ஹி ந க²ஜ்ஜேய்ய, ஏவம் ந ட²பேய்ய, அஞ்ஞேன வா ந உத்³த⁴ராபேய்ய, பதிரூபம் பி⁴க்கு²ம் வா ஸாமணேரம் வா ஆராமிகமேவ வா அனாபுச்சா² வா க³ச்சே²ய்ய, தஸ்ஸ பரிக்கி²த்தஸ்ஸ விஹாரஸ்ஸ பரிக்கே²பம், அபரிக்கி²த்தஸ்ஸ த்³வே லேட்³டு³பாதே அதிக்கமந்தஸ்ஸ பாசித்தியம். மண்ட³பருக்க²மூலாதி³அகு³த்தஸேனாஸனே ஸந்த²ரித்வா க³ச்ச²ந்தஸ்ஸ து³க்கடம், ததா² மஞ்சபீட²பி⁴ஸிகோச்ச²கேஸு, கு³த்தஸேனாஸனேபி து³க்கடமேவ.

ஸேனாஸனானி வாதி ஏத்த² அனுத்³த⁴ரித்வா க³மனேதி ஸம்ப³ந்தோ⁴. ஏத்த² பன மஞ்சோ பீட²ம் பி⁴ஸி கோச்ச²கந்தி சதுப்³பி³த⁴ம்பி ஸேனாஸனம் வஸ்ஸானஹேமந்தானம் அட்ட²ஸு மாஸேஸு அஜ்ஜோ²காஸே வா ஓவஸ்ஸகமண்ட³பே வா ருக்க²மூலே வா ஸயம் ஸந்த²ரித்வா வா அனுபஸம்பன்னேன ஸந்த²ராபேத்வா வா தம் அனுத்³த⁴ரித்வா வா அனுத்³த⁴ராபேத்வா வா தஸ்ஸ ஸேனாஸனஸ்ஸ த்³வின்னம் லேட்³டு³பாதானம் அதிக்கமனே பாசித்தியம். ஸம்முஞ்ஜனீயாதி³ ஸேஸபரிக்கா²ரேஸு து³க்கடம்.

இத்தி²யாத்³தா⁴னக³மனேதி ஏத்த² மாதுகா³மேன ‘‘க³ச்சா²ம ப⁴கி³னி, க³ச்சா²ம அய்யா’’தி ஏவம் ஸம்வித³ஹித்வா ‘‘அஜ்ஜ வா ஸ்வே வா பரஸுவே வா’’தி நியமிதகாலம் விஸங்கேதம் அகத்வா த்³வாரவிஸங்கேதம் மக்³க³விஸங்கேதம் கத்வாபி க³ச்ச²தோ கா³மந்தரே கா³மந்தரே பாசித்தியம். அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி.

ஏகேகாய நிஸீத³னேதி ஏத்த² ஏகோ ஏகாய இத்தி²யா நிஸீத³னேதி அத்தோ².

124. பி⁴ம்ஸாபனேதி ஏத்த² உபஸம்பன்னோ உபஸம்பன்னம் பி⁴ம்ஸாபேதுகாமோ சோரகந்தாரவாளகந்தாராதீ³னி ஆசிக்க²தி, ப⁴யானகம் வா ரூபஸத்³தா³தி³ம் த³ஸ்ஸேதி, ஸோ பா⁴யது வா மா வா, தஸ்ஸ பயோகே³ பயோகே³ பாசித்தியம். அனுபஸம்பன்னே து³க்கடம்.

ஆகோடனேதி பஹாரதா³னே. உபஸம்பன்னோ உபஸம்பன்னஸ்ஸ அனத்தமனோ ஹுத்வா ஸசே உப்பலபத்தேனபி பஹாரம் தே³தி, பாசித்தியம். அனுபஸம்பன்னஸ்ஸ க³ஹட்ட²ஸ்ஸ வா பப்³ப³ஜிதஸ்ஸ வா இத்தி²யா வா புரிஸஸ்ஸ வா அந்தமஸோ திரச்சா²னக³தஸ்ஸாபி பஹாரம் தே³தி, து³க்கடமேவ.

அனாசாரம் ஆசரித்வா ஸங்க⁴மஜ்ஜே² ஆபத்தியா வா வத்து²னா வா அனுயுஞ்ஜியமானோ தம் அகதே²துகாமோ ‘‘கோ ஆபன்னோ, கிம் ஆபன்னோ, கிஸ்மிம் ஆபன்னோ’’திஆதி³னா நயேன அஞ்ஞேஹி வசனேஹி தம் வசனம் படிச்சா²தே³ந்தோ ஸோ அஞ்ஞம் வத³தி, அயம் அஞ்ஞவாத³கோ, தஸ்மிம் அஞ்ஞவாத³கே ச கஞ்சி வீதிக்கமம் தி³ஸ்வா ‘‘ஆவுஸோ, இத³ம் நாம தயா கத’’ந்தி வுத்தே தம் ந கதே²துகாமோ துண்ஹீபூ⁴தோவ ஸங்க⁴ம் விஹேஸதீதி ஸங்க⁴விஹேஸகோ, தஸ்மிம் விஹேஸகே ச பாசித்தி ஹோதீதி அத்தோ². இத⁴ பன ஞத்திது³தியேன கம்மேன அஞ்ஞவாத³கே ச விஹேஸகே ச ஆரோபிதே புன அஞ்ஞம் ப⁴ணந்தஸ்ஸ, விஹேஸந்தஸ்ஸ பாசித்தி. அனாரோபிதே து³க்கடந்தி வேதி³தப்³ப³ம்.

து³ட்டு²ல்லபகாஸசா²தே³தி ஏத்த² கிஞ்சாபி ‘‘து³ட்டு²ல்லா நாம ஆபத்தி சத்தாரி ச பாராஜிகானி தேரஸ ச ஸங்கா⁴தி³ஸேஸா’’தி (பாசி. 399) வுத்தா, ததா²பி இத⁴ ஸங்கா⁴தி³ஸேஸாவ அதி⁴ப்பேதா. தஸ்மா ஸங்க⁴ஸம்முதிம் வினா பி⁴க்கு²ஸ்ஸ து³ட்டு²ல்லம் ஆபத்திம் ‘‘அயம் அஸுசிம் மோசேத்வா ஸங்கா⁴தி³ஸேஸம் ஆபன்னோ’’திஆதி³னா நயேன வத்து²னா ஸத்³தி⁴ம் ஆபத்திம் க⁴டேத்வா பி⁴க்கு²ஞ்ச பி⁴க்கு²னிஞ்ச ட²பேத்வா யஸ்ஸ கஸ்ஸசி அனுபஸம்பன்னஸ்ஸ ஆரோசேந்தஸ்ஸ பாசித்தியம். து²ல்லச்சயாதி³அது³ட்டு²ல்லாரோசனே து³க்கடம். து³ட்டு²ல்லச்சா²த³னேபி ஸங்கா⁴தி³ஸேஸோவ அதி⁴ப்பேதோ. யோ பன பி⁴க்கு² பி⁴க்கு²ஸ்ஸ து³ட்டு²ல்லம் ஆபத்திம் ஸயம் வா ஜானித்வா அஞ்ஞேஸம் வா ஸுத்வா ‘‘இமம் ஜானித்வா சோதே³ஸ்ஸந்தி ஸாரேஸ்ஸந்தி மங்கும் கரிஸ்ஸந்தி, நாரோசிஸ்ஸாமீ’’தி து⁴ரம் நிக்கி²பதி, தஸ்ஸ பாசித்தியம். து⁴ரம் நிக்கி²பித்வா பச்சா² ஆரோசிதேபி ந ரக்க²தி ஏவ.

ஹாஸோத³கேதி அங்கு³லிபதோத³கேன ஹாஸோ ச உத³கே ஹாஸோ சாதி ஏவமத்தோ² வேதி³தப்³போ³. உபஸம்பன்னோ உபஸம்பன்னம் ஹஸாதி⁴ப்பாயோ காயேன காயம் ஆமஸதி, ஆபத்தி பாசித்தியஸ்ஸ, கோ பன வாதோ³ உபகச்ச²காதீ³ஸு க⁴ட்டனே. அனுபஸம்பன்னே து³க்கடம், ததா² பி⁴க்கு²ஸ்ஸ காயப்படிப³த்³தா⁴மஸனே ச நிஸ்ஸக்³கி³யேன காயப்படிப³த்³தா⁴மஸனே ச. ஏத்த² பி⁴க்கு²னீபி அனுபஸம்பன்னட்டா²னே டி²தா. உத³கே ஹஸனத⁴ம்மோ நாம உபரிகோ³ப்ப²கே உத³கே கீளாதி⁴ப்பாயஸ்ஸ நிம்முஜ்ஜனஉம்முஜ்ஜனப்லவனாதி³கம். இத⁴ ஹாஸோ நாம கீளா வுச்சதி.

நிச்சு²ப⁴னே விஹாராதி ஸங்கி⁴கா விஹாரா நிக்கட்³ட⁴னேதி அத்தோ². ஏத்த² பன யோ குத்³தோ⁴ ஹுத்வா உபஸம்பன்னம் ஹத்தா²தீ³ஸு க³ஹேத்வா வா ‘‘நிக்க²மா’’தி வத்வா வா யத்தகானி த்³வாரானி ஏகேன பயோகே³ன அதிக்காமேதி, தத்த² த்³வாரக³ணனாய ஆபத்திம் அக்³க³ஹேத்வா பயோக³ஸ்ஸ ஏகத்தா ஏகா ஏவ க³ஹேதப்³பா³. ஸசே நானாபயோகே³ஹி அதிக்காமேதி, தத்த² த்³வாரக³ணனாய க³ஹேதப்³ப³ம். தஸ்ஸ பரிக்கா²ரனிக்கட்³ட⁴னே து³க்கடம், ததா² அனுபஸம்பன்னே, தஸ்ஸ பரிக்கா²ரனிக்கட்³ட⁴னே ச. அலஜ்ஜிஆதீ³ஸு பன அனாபத்தி.

அனுபக²ஜ்ஜ ஸயனேதி ஸங்கி⁴கே விஹாரே ‘‘வுட்³டோ⁴’’தி வா ‘‘கி³லானோ’’தி வா ‘‘ஸங்கே⁴ன தி³ன்னோ’’தி வா ஜானித்வா மஞ்சஸ்ஸ வா பீட²ஸ்ஸ வா பவிஸந்தஸ்ஸ வா நிக்க²மந்தஸ்ஸ வா உபசாரே ஸேய்யம் ஸந்த²ரித்வா வா ஸந்த²ராபேத்வா வா ‘‘யஸ்ஸ ஸம்பா³தோ⁴ ப⁴விஸ்ஸதி, ஸோ பக்கமிஸ்ஸதீ’’தி அதி⁴ப்பாயேன அபி⁴னிஸீத³ந்தஸ்ஸ ச அபி⁴னிபஜ்ஜந்தஸ்ஸ ச பயோக³க³ணனாய பாசித்தியம் வேதி³தப்³ப³ம். பாசித்தியவினிச்ச²யோ.

பாசித்தியனித்³தே³ஸவண்ணனா நிட்டி²தா.