13. ஸமணகப்பனித்³தே³ஸவண்ணனா

125. பூ⁴தானம் ஜாதானம் நிப்³ப³த்தானம் கா³மோ பூ⁴தகா³மோ (பாசி. 91; பாசி. அட்ட². 91; கங்கா². அட்ட². பூ⁴தகா³மஸிக்கா²பத³வண்ணனா). ஸமாரம்போ⁴தி சே²த³னபா²லனபசனாதி³, தஸ்மிம் பூ⁴தகா³மஸமாரம்பே⁴ பூ⁴தகா³மஸமாரம்ப⁴ஹேது பாசித்தி ஹோதீதி அத்தோ². கதகப்பியம் (கங்கா². அட்ட². பூ⁴தகா³மஸிக்கா²பத³வண்ணனா) பன ஸமணகப்பியம் ப⁴வேதி ஸம்ப³ந்தோ⁴. ஸமணானம் கப்பியம் ஸமணகப்பியம். இதா³னி யேன கதம் கப்பியம் ஸமணகப்பியம் ஹோதி, தம் த³ஸ்ஸேதும் ‘‘நகே²ன வா’’திஆதி³மாஹ. ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும், அக்³கி³பரிஜிதம் ஸத்த²பரிஜிதம் நக²பரிஜிதம் அபீ³ஜம் நிப்³ப³ட்டபீ³ஜஞ்ஞேவ பஞ்சம’’ந்தி (சூளவ. 250) ஹி வுத்தம்.

126. இதா³னி தம் பூ⁴தகா³மம் த³ஸ்ஸேதும் ‘‘ஸமூலா’’திஆதி³மாஹ. தத்த² (பாசி. 91; பாசி. அட்ட². 91) ஸ-இதி ஸோ பூ⁴தகா³மோ நாமாதி அத்தோ², மூலபீ³ஜாதீ³ஹி பஞ்சஹி பீ³ஜேஹி பபா⁴விதோ ஹோதீதி வுத்தம் ஹோதி. தத்த² மூலபீ³ஜம் நாம ஹலித்³தி³ஸிங்கி³வேராதி³. க²ந்த⁴பீ³ஜம் நாம அஸ்ஸத்தோ² நிக்³ரோதோ⁴தி ஏவமாதி³. அக்³க³பீ³ஜம் நாம அஜ்ஜுகப²ணிஜ்ஜகாதி³. ப²ளுபீ³ஜம் நாம உச்சு²வேளுனளாதி³. ‘‘பீ³ஜபீ³ஜம் நாம புப்³ப³ண்ணம் அபரண்ணம், யானி வா பனஞ்ஞானிபி அத்தி² பீ³ஜே ஜாயந்தி பீ³ஜே ஸஞ்ஜாயந்தி, ஏதம் பீ³ஜபீ³ஜம் நாமா’’தி வுத்தம். இதா³னி ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³. நி. 1.10, 195; ம. நி. 1.293, 411; 2.11; அ. நி. 10.99; பு. ப. 179) வுத்தத்தா த⁴ம்மானுலோமேன ஆக³தம் பீ³ஜகா³மஸமாரம்ப⁴ம் த³ஸ்ஸேதும் ‘‘ஆரம்பே⁴ து³க்கட’’ந்திஆதி³மாஹ. தஸ்மா ஏதம் பட²மம் ‘‘கப்பியம் கரோஹீ’’தி பூ⁴தகா³மபரிமோசனம் காரேத்வா பீ³ஜகா³மபரிமோசனத்த²ம் புன கப்பியம் காரேதப்³ப³ம்.

127. நிப்³ப³ட்டபீ³ஜம் (பாசி. அட்ட². 92; கங்கா². அட்ட². பு⁴தகா³மஸிக்கா²பத³வண்ணனா) நாம அம்ப³பனஸாதி³. நோபீ³ஜம் நாம தருணம்ப³ப²லாதி³, ஏதம் பன ஸப்³ப³ம் அகப்பியம்பி வட்டதீதி அத்தோ². கடாஹப³த்³த⁴பீ³ஜானி கபித்த²ப²லாதீ³னி. ப³ஹித்³தா⁴ வாபி காரயேதி கபாலேபி காதும் வட்டதி, ஸசே ஏகாப³த்³தா⁴னீதி அத்தோ². கடாஹமுத்தம் பன பி⁴ந்தி³த்வா காரேதப்³ப³ம்.

128. பா⁴ஜனே வா பூ⁴மியம் வா ஏகாப³த்³தே⁴ஸு பீ³ஜேஸு ஏகஸ்மிம் பீ³ஜே கப்பியே கதே ஸப்³பே³ஸ்வேவ கதம் ப⁴வேதி அத்தோ². யதா² ச பீ³ஜே, ஏவம் ருக்க²ஸஹஸ்ஸம் வா உச்சு²ஸஹஸ்ஸம் வா சி²ந்தி³த்வா ஏகாப³த்³தே⁴ கதேபி வினிச்ச²யோ வேதி³தப்³போ³.

129. கப்பியம் கத்வா நிக்கி²த்தே பீ³ஜகா³மே புன மூலபண்ணானி ஸசே ஜாயரும், புன கப்பியம் காரேய்யாதி அத்தோ². ததா³தி மூலே ச அங்குரே ச ஜாதேதி அத்தோ².

130. உத³கஸம்ப⁴வோதி உத³கஜாதோ. சேதியாதீ³ஸூதி ஏத்த² ஆதி³-ஸத்³தே³ன கே³ஹப்பமுக²பாகாரவேதி³காதீ³ஸு நிப்³ப³த்தா க³ஹிதா. நிப்³ப³த்தத்³வத்திபத்தகோ பூ⁴தகா³மோவ, அனிப்³ப³த்தகோ அக்³க³பீ³ஜே ஸங்க³ஹம் க³ச்ச²தி. பீ³ஜம்பி யாவ மூலம் வா பண்ணம் வா ந நிக்க²மதி, தாவ பீ³ஜகா³மோவ, மூலே ச நிக்க²ந்தே பண்ணே ச ஹரிதே ஜாதே பூ⁴தகா³மோவ ஹோதீதி அத்தோ².

131. மகுளந்தி அபு²ல்லம். அஹிச²த்தகம் நாம ருக்கே² ஜாதம் அஹிச²த்தகம்.

132. அல்லருக்கே² க³ண்ஹதோதி ஸம்ப³ந்தோ⁴. தத்தா²தி அல்லருக்கே² சி²ந்த³தோ வாபீதி ஸம்ப³ந்தோ⁴.

134. ‘‘இமம் ருக்க²ம், இமம் லதம், இமம் கந்த³ம் சி²ந்த³, பி⁴ந்தா³’’திஆதி³னா நயேன நியமேத்வா பா⁴ஸிதும் ந வட்டதி. ‘‘இத³ம், ஏத’’ந்தி அவத்வா கேவலம் ‘‘ருக்க²ம் சி²ந்தா³’’திஆதி³னா (பாசி. அட்ட². 92; கங்கா². அட்ட². பூ⁴தகா³மஹிக்கா²பத³வண்ணனா) நயேன வத்தும் வட்டதீதி. ஸமணகப்பவினிச்ச²யோ.

ஸமணகப்பனித்³தே³ஸவண்ணனா நிட்டி²தா.