11. நிஸ்ஸக்³கி³யனித்³தே³ஸவண்ணனா

116-7. இதா³னி அச்சோளாரிகானம் வஸேன த³ஸ்ஸேதும் ‘‘அரூபிய’’ந்திஆதி³ ஆரத்³த⁴ம். அஞ்ஞதா²பி யுத்தி பரியேஸிதப்³பா³. தத்தா²யம் ஸங்கே²பத்தோ² (பாரா. 591; பாரா. அட்ட². 2.589; கங்கா². அட்ட². ஜாதருபஸிக்கா²பத³வண்ணனா) – யோ ரூபியேன அரூபியஞ்ச பரிவத்தேய்ய, யோ ச இதரேன ச அரூபியேன ரூபியம் பரிவத்தேய்ய, தஸ்ஸ நிஸ்ஸக்³கி³யம் ஹோதீதி.

இதா³னி ரூபியஞ்ச அரூபியஞ்ச த³ஸ்ஸேதும் ‘‘இத⁴ ரூபிய’’ந்திஆதி³ ஆரத்³த⁴ம். ஏத்த² (பாரா. 589; கங்கா². அட்ட². ஜாதருபஸிக்கா²பத³வண்ணனா) ஸஜ்ஜு² ஸிங்கீ³தி ஸஜ்ஜூ²தி ரஜதம். ஸிங்கீ³தி ஸுவண்ணம். தம்ப³லோஹாதீ³ஹி வா தா³ரூஹி வா பண்ணேஹி வா லாகா²ய வா ரூபம் ஸமுட்டா²பேத்வா வா அஸமுட்டா²பேத்வா வா கதம் சம்மபீ³ஜமயம்பியம் யம் தே³ஸே வோஹாரம் க³ச்ச²தி, இத³ம் வோஹாரூபக³மாஸகம் நாம. இத³மித⁴ ரூபியந்தி அதி⁴ப்பேதம். வத்தா²தி³ ச முத்தாதி³ ச வத்த²முத்தாதி³. இதரந்தி அரூபியம் கப்பியவத்து²ஞ்ச து³க்கடவத்து²ஞ்ச. கிம் வுத்தம் ஹோதி? வத்த²ம் ஸுத்தம் பா²லோ படகோ கப்பாஸோ அனேகப்பகாரம் அபரண்ணம் ஸப்பி நவனீதம் தேலம் மது⁴ பா²ணிதாதி³பே⁴ஸஜ்ஜஞ்சாதி இத³ம் கப்பியவத்து² நாம. முத்தா மணி வேளுரியோ ஸங்கோ²ஸிலா பவாளம் லோஹிதங்கோ³ மஸாரக³ல்லம் ஸத்த த⁴ஞ்ஞானி தா³ஸீ தா³ஸோ கே²த்தம் வத்து² புப்பா²ராமப²லாராமாத³யோதி இத³ம் து³க்கடவத்து² நாம, தது³ப⁴யம் அரூபியம் நாமாதி வுத்தம் ஹோதி.

118. ஏத்தாவதா ரூபியஸம்வோஹாரம் த³ஸ்ஸேத்வா இதா³னி கயவிக்கயம் த³ஸ்ஸேதும் ‘‘இமம் க³ஹேத்வா’’திஆதி³மாஹ. தத்த² இமந்தி தண்டு³லாதி³கம் கப்பியப⁴ண்ட³ம் க³ஹேத்வா வா ஓத³னாதி³ம் பு⁴த்வா வா ‘‘இமம் வத்தா²தி³கம் கப்பியப⁴ண்ட³ம் தே³ஹி, இமம் ரஜனபசனாதி³கம் கர, ரஜனகட்டா²தி³மா நய, இமம் வா தவ தே³மி, த்வம் பன இமஞ்ச இமஞ்ச ஆஹர, கர, தே³ஹீ’’தி ஏவம் கயவிக்கயே ஸமாபன்னே நிஸ்ஸக்³கீ³தி ஸம்ப³ந்தோ⁴.

119. இதா³னி பரிணாமவஸேன ஆபத்திபே⁴த³ம் த³ஸ்ஸேதும் ‘‘அத்தனோ’’திஆதி³ ஆரத்³த⁴ம். தத்ராயம் பிண்ட³த்தோ² (பாரா. 659; பாரா. அட்ட². 2.658; கங்கா². அட்ட². பரிணதஸிக்கா²பத³வண்ணனா) – ஸங்க⁴ஸ்ஸ வா அஞ்ஞஸ்ஸ வா நதம் பரிணதம் லாப⁴ம் லபி⁴தப்³ப³ம் சீவராதி³பச்சயம் அத்தனோ வா அஞ்ஞஸ்ஸ வா பரிணாமேய்ய, நிஸ்ஸக்³கி³யஆதீ³னி ஹோந்தீதி. கத²ம்? யோ பன மாதுஸந்தகம்பி ஸங்க⁴ஸ்ஸ பரிணதம் அத்தனோ பரிணாமேதி, நிஸ்ஸக்³கி³யம். அஞ்ஞஸ்ஸ புக்³க³லஸ்ஸ பரிணாமேதி, ஸுத்³தி⁴கபாசித்தியம். அஞ்ஞஸ்ஸ ஸங்க⁴ஸ்ஸ வா சேதியஸ்ஸ வா பரிணாமேதி, து³க்கடம். யோ பன அஞ்ஞபுக்³க³லஸ்ஸ வா சேதியஸ்ஸ வா பரிணதம் அத்தனோ வா அஞ்ஞபுக்³க³லஸ்ஸ வா ஸங்க⁴ஸ்ஸ வா அஞ்ஞசேதியஸ்ஸ வா பரிணாமேதி, தஸ்ஸாபி து³க்கடமேவாதி.

120. யோ பன நிஸ்ஸக்³கி³ம் நிஸ்ஸஜ்ஜிதப்³ப³ம் அனிஸ்ஸஜ்ஜித்வா வினயகம்மம் அகத்வா பரிபு⁴ஞ்ஜேய்ய, தஸ்ஸ து³க்கடம். யோ வா பரேன வினயகம்மத்தா²ய நிஸ்ஸட்ட²ம் ஸகஸஞ்ஞாய ந த³தே³ய்ய, தஸ்ஸாபி து³க்கடம். அஞ்ஞதே²தரந்தி ஏத்த² அஞ்ஞதா²தி தே²ய்யஸஞ்ஞாய ஸசே ந த³தே³ய்ய, இதரம் தஸ்ஸ அக்³க⁴வஸேன பாராஜிகஞ்ச து²ல்லச்சயஞ்ச து³க்கடஞ்ச ஹோதீதி அத்தோ². நிஸ்ஸக்³கி³யவினிச்ச²யோ.

நிஸ்ஸக்³கி³யனித்³தே³ஸவண்ணனா நிட்டி²தா.